სატვირთო მანქანების მფლობელმა გადამზიდავი კომპანიების მესაკუთრეებმა ბათუმში დაანონსებული აქცია მას შემდეგ აღარ გამართეს, როცა გაიგეს, რომ აჭარის ფინანსთა და ეკონომიკის მინისტრი მათთან შეხვედრას აპირებს. ისინი სარფის საბაჟოზე თურქეთის მხრიდან გაჩერებული ათეულობით ტრაილერის დაუყოვნებლივ გამოტარებას ითხოვენ.
დღეს, 17 მარტს, სატვირთო მანქანების მფლობელი გადამზიდავი კომპანიის მესაკუთრეები ბათუმში, გაფორმების ეკონომიკურ ზონასთან შეიკრიბნენ და აპირებდნენ პროტესტის ნიშნად სარფის გასასვლელის გადაკეტვას საქართველოს მხრიდან.
„სამინისტროდან დაგვიკავშირდნენ, რომ მინისტრი ჯაბა ფუტკარაძე დღესვე შეგვხდება. შემდეგ მოვიფიქრებთ, რას ვიზამთ,“ – გვითხრეს აქციის მონაწილეებმა.
აქციის მონაწილეების განმარტებით, ტრაილერების მძღოლებს სარფის საბაჟოზე თურქეთის მხარემ მოულოდნელად და ერთბაშად მოსთხოვა ავტოსაგზაო დარღვევების შედეგად თურქეთში გამოწერილი ჯარიმების გადახდა.
„მაგალითად, ჩემ შემთხვევაში ესაა 4 წლის განმავლობაში დაგროვებული 220 ათასი ლირა 25 მანქანაზე… რამდენიმე დღეა უკვე იქ დგას მანქანები და საქართველოში არ უშვებენ. ტრაილერების ნაწილზე მალფუჭებადი პროდუქტია. ჩვენ ვითხოვთ იმას, რომ ხელისუფლება ჩაერთოს ამ პროცესში, მანქანები გამოატარონ და შემდეგ დავილაპარაკოთ, რა გვაქვს გადასახდელი,“ – ამბობს ირაკლი ნემსაძე.
ტრაილერების მფლობელების აქციისთვის ემზადებოდნენ პოლიციელებიც, თუმცა აქცია არ შედგა
გადამზიდავები ასევე ირწმუნებიან, რომ მათ არც კი ჩაჰბარებიათ თურქეთის სამართალდამცველების მხრიდან ჯარიმის შესახებ ოქმები წინა წლებში.
„შესაძლოა, ჩემს მძღოლებს ჩააბარეს, ვერ გამოვრიცხავ ამას, მაგრამ ფაქტია, რომ აქამდე მის გადახდას არ ითხოვდნენ. გარდა ამისა, არსებობს ხანდაზმულობის ვადა, ხომ? როგორ უნდა გავარკვიოთ ახლა, რამდენად სამართლიანად იქნა გამოწერილი ესა თუ ის ჯარიმა? ჯარიმები, როგორც წესი, უნდა მისდიოდეს მესაკუთრეს. ჩემთან კი, არც მეილზე, არც სატელეფონო შეტყობინებით არ შემოსულა ინფორმაცია ამ ჯარიმებზე,“ – გვითხრა ირაკლი ნემსაძემ.
სატვირთო მანქანების კომპანიების მფლობელებმა, ასევე მძღოლებმა, ბათუმის ეკონომიკური გაფორმების ზონასთან საპროტესტო აქცია გასული წლის სექტემბერშიც გამართეს. მაშინ ისინი ნებართვებს ითხოვდნენ გადაზიდვებზე და ხელისუფლებამ მათი მოთხოვნა აქციის შემდეგ დააკმაყოფილა.
