„სომხეთში ხალხი მხარს უჭერს თურქეთთან ურთიერთობის ნორმალიზებას,“ – უთხრა სომხეთის საგარეო საქმეთა მინისტრმა არარატ მირზოიანმა 15 მარტს წერილობით ინტერვიუში თურქულ მედიაგამოცემა „ანადოლუს“.
არარატ მირზოიანი ანტალიაში, სამდღიან საერთაშორისო ფორუმში იღებდა მონაწილეობას, რა დროსაც ის შეხვდა თურქეთის საგარეო საქმეთა მინისტრს, მევლუთ ჩავუშოღლუს.
სომხეთის საგარეო საქმეთა მინისტრის თქმით, სომხეთი მზად არის დიპლომატიური ურთიერთობების დასამყარებლად.
„სომხეთი მზად არის დაამყაროს დიპლომატიური ურთიერთობა [თურქეთთან], გახსნას საზღვრები. მიხარია, რომ ჩემი თურქი კოლეგისგან [მევლუთ ჩავუშოღლუ] მოვისმინე, რომ მათ აქვთ პოლიტიკური ნება, პროცესი ამ მიზნამდე მიიყვანონ,“ – უთხრა „ანადოლუს“ მირზოიანმა.
ურთიერთობების ნორმალიზების ნიმუშად სომხეთის საგარეო საქმეთა მინისტრმა მოიყვანა მაგალითი, რომ სტამბოლსა და ერევანს შორის ფრენა უკვე პირდაპირი რეისებითაა შესაძლებელი.
„საზღვრების გახსნა პოზიტიურ გავლენას მოახდენს ორ ქვეყანას შორის კავშირზე, სავაჭრო და ეკონომიკურ ურთიერთობებზე, ხალხს შორის ურთიერთობებზე და მთლიან რეგიონში სტაბილურობაზე,“ – თქვა არარატ მირზოიანმა.
მისივე თქმით, „თუ [ორ ქვეყანას შორის ურთიერთობების] ნორმალიზაციის პროცესი შეუფერხებლად წარიმართება, შესაძლებელი იქნება თურქეთსა და სომხეთს შორის ორმხრივი ვიზიტები“.
„ანადოლუს“ ცნობით, ანტალიის საერთაშორისო დიპლომატიურ ფორუმამდე რამდენიმე თვით ადრე სომხეთის პრეზიდენტმა ნიკოლ ფაშინიანმა და თურქეთის პრეზიდენტმა რეჯეფ ტაიპ ერდოღანმა გაცვალეს საჯარო განცხადებები, სადაც მზადყოფნა გამოთქვეს ორ ქვეყანას შორის მოლაპარაკებების დასაწყებად.
თურქეთის ელჩი სერდარ კილიჩი და სომხეთის ელჩი რუბენ რუბინიანი 14 იანვარს მოსკოვში შეხვდნენ ერთმანეთს, მეორე შეხვედრა კი 24 თებერვალს, ვენაში გაიმართა. ელჩები შეთანხმდნენ, რომ გააგრძელებენ მოლაპარაკებებს წინაპირობების გარეშე, რომლის საბოლოო მიზანი ორ ქვეყანას შორის ურთიერთობების სრული ნორმალიზებაა.
__________________
ფოტო: ევროპის პრესფოტო სააგენტო/თურქეთის საგარეო საქმეთა სამინისტრო.
