საფრანგეთის პრეზიდენტის, ემანუელ მაკრონის თქმით, გერმანიის კანცლერთან, ოლაფ შოლცთან ერთად ესაუბრა ჩინეთის სახალხო რესპუბლიკის პრეზიდენტ სი ძინპინს.
როგორც მაკრონი წერს, მათ ისაუბრეს „უკრაინაში ომის ტრაგიკულ შედეგებზე“.
„პრეზიდენტმა სიმ მხარი დაუჭირა ჩვენს ქმედებებს ცეცხლის შეწყვეტისა და ჰუმანიტარულ დახმარებაზე ხელმისაწვდომობის უზრუნველყოფის მიზნით,“ – ვკითხულობთ საფრანგეთის პრეზიდენტის პოსტში, რომელიც Twitter-ზე გამოქვეყნდა.
როგორც ჩინეთის სამთავრობო მედია CGTN წერს, ჩინეთის პრეზიდენტმა, სი ძინპინმა გერმანელ და ფრანგ კოლეგებთან ვიდეოკონფერენციის დროს აღნიშნა, რომ ამჟამინდელი მდგომარეობა უკრაინაში შემაშფოთებელია და „ჩინეთი ღრმა მწუხარებას გამოხატავს ევროპაში ომის კვლავ დაბრუნების გამო“.
ამ დრომდე, ჩინეთი თავს არიდებდა უკრაინაში რუსეთის ქმედებების ომად მოხსენიებას.
ჰონგ-კონგური ონლაინ გამოცემის ცნობით, შეხვედრაზე ჩინეთის პრეზიდენტმა კვლავ გაიმეორა, რომ რუსეთის წინააღმდეგ ეკონომიკურ სანქციებს არ ეთანხმება. მან მაკრონი და შოლცი გააფრთხილა, რომ ამ სანქციებს შეუძლია გლობალური ეკონომიკა „თან ჩაიყოლოს“.
7 მარტს, ჩინეთის საგარეო საქმეთა მინისტრმა, ვანგ იმ განაცხადა, რომ ჩინეთი უკრაინას ჰუმანიტარულ დახმარებას გაუგზავნის, თუმცა იქვე დასძინა, რომ ჩინეთისა და რუსეთის მეგობრობა „ქვასავით მყარია“.
პირველ მარტს, უკრაინის საგარეო საქმეთა სამინისტრომ გაავრცელა განცხადება, რომ მინისტრი დმიტრო კულება ჩინელ კოლეგას ტელეფონით ესაუბრა და სთხოვა „გამოიყენოს პეკინსა და მოსკოვს შორის არსებული ურთიერთობების დონე, რათა აიძულოს რუსეთი შეაჩეროს შეიარაღებული აგრესია უკრაინელი ხალხის წინააღმდეგ“. განცხადებაში აღნიშნული იყო, რომ ჩინეთმა მზაობა გამოთქვა გამოიყენოს საკუთარი დიპლომატიური კავშირები კონფლიქტის მოსაგვარებლად.
მოგვიანებით, 5 მარტს, დმიტრო კულებამ, საერთაშორისო მედიისთვის გამართულ ონლაინბრიფინგზე, ჩინეთის შესახებ დასმული შეკითხვის პასუხად განაცხადა:
„ჩინეთი დაინტერესებულია ამ ომის დიპლომატიის მეშვეობით შეჩერებით. ჩვენ მოველით, რომ ისინი იმოქმედებენ. ჩინეთს აქვს განსაკუთრებული ურთიერთობა რუსეთთან, ამიტომ მოველით, რომ ისინი დაუკავშირდებიან რუსეთს ძალიან თანმიმდევრული და ძლიერი მესიჯით – ეს ომი ასევე ეწინააღმდეგება ჩინეთის ინტერესებს, ეწინააღმდეგება კაცობრიობის ინტერესებს. პრეზიდენტმა პუტინმა უკან უნდა დაიხიოს. ჩინურ დიპლომატიას აქვს საკმარისი ინსტრუმენტები ცვლილების მისაღწევად. ჩვენ (ჩინეთის საგარეო საქმეთა მინისტრთან საუბრიდან გამომდინარე) ვთვლით, რომ ის უკვე ჩართულია და მისი ძალისხმევა წარმატებული იქნება“.
_________
