ნეტგაზეთი • RU

უკრაინის კულტურის სამინისტრო: რუსეთი ანადგურებს ეკლესიებს, მეჩეთებსა და სინაგოგებს

მაშინ, როცა კრემლის პროპაგანდისტები, რუსეთის პატრიარქის ჩათვლით, უკრაინაში შეჭრის ერთ-ერთ მთავარ მიზეზად „მართლმადიდებლობის დაცვას“ ასახელებენ, რუსული შეიარაღებული ძალები უკრაინაში ანადგურებენ მართლმადიდებლურ ეკლესიებსა და სხვა სალოცავებს: სინაგოგებს, მეჩეთებსა თუ რელიგიურ-საგანმანათლებლო დაწესებულებებს –  უკრაინის კულტურის სამინისტრო რუსეთის მიერ დაზიანებული და განადგურებული რელიგიური ნაგებობების ონლაინ ბაზას აწარმოებს.

სამინისტროს ცნობით, მასალები გროვდება, როგორც რუსეთის მიერ უკრაინაში ჩადენილი სამხედრო დანაშაულების მტკიცებულება ჰააგის საერთაშორისო სასამართლოსთვის.

უკრაინის კულტურის სამინისტროს ცნობით, რუსეთის შეიარაღებული თავდასხმის შედეგად უკრაინაში სულ მცირე 28 რელიგიური მნიშვნელობის ნაგებობა დაზიანდა უკრაინის მინიმუმ ექვს რეგიონში: კიევში, დონეცკში, ჟიტომირში, ლუგანსკში, ხარკოვსა და ჩერნიგოვში.

უმრავლესობა მართლმადიდებლური ეკლესიებია.

წყარო: უკრაინის კულტურის სამინისტრო

პირველ მარტს დაბომბვის შედეგად დონეცკის ოლქის ქალაქ კონსტანტინოვკაში დაზიანდა მეჩეთი და მიმდებარე შენობები.

წყარო: უკრაინის კულტურის სამინისტრო

დაბომბვის შედეგად ნაწილობრივ განადგურდა სალოცავი სახლი, ევანგელისტ- ბაპტისტების ეკლესია. ხარკოვის ოლქი

კულტურის სამინისტრომ აამუშავა ონლაინ ბაზა, რომელიც ამ დროისთვის 58 შემთხვევის შესახებ დასურათებულ ინფორმაციას შეიცავს. საკულტო ნაგებობების გარდა, ბაზაში შეყვანილია როგორც  არქიტექტურული, ისე ისტორიული თვალსაზრისით ღირებული შენობები, მუზეუმები, თეატრები და ძეგლები.

მაგალითად დაბომბვის შედეგად მთლიანად განადგურდა ოხტირკას რკინიგზის სადგურის ძველი შენობა, რომელიც აგების თარიღი 1895 წელია.

ოხტირკას რკინიგზის სადგურის ძველი შენობა

ასევე,  რაკეტამ ნაწილობრივ გაანადგურა არქიტექტურული ძეგლი – ყოფილი კინოთეატრის შენობა, სადაც განთავსებული იყო რეგიონული ახალგაზრდული ცენტრი.

ყოფილი კინოთეატრის შენობა

ყოფილი კინოთეატრის შენობა

სარაკეტო დარტყმის შედეგად, დაზიანდა ისტორიული და არქიტექტურული მნიშვნელობის ძეგლის ფასადები და ფანჯრები – 1950 წლის ყოფილი საქალაქო აღმასრულებელი კომიტეტის შენობა, სადაც განთავსებულია ხარკოვის საკრებულო.

საარტილერიო დაბომბვის შედეგად დაიწვა კულტურული მემკვიდრეობის ძეგლი – წმინდა გიორგის ხის ეკლესია, რომელიც თარიღდება 1878 წლით.

უკრაინის კულტურის სამინისტრო წერს, რომ რუსეთს ამ დანაშაულისთვის რეპარაციის გადახდას დააკისრებს. რეპარაცია საერთაშორისო სამართლის სუბიექტის მატერიალური პასუხისმგებლობის ერთ-ერთი ფორმა, მისი გადახდა ხდება ფულადი ან სხვა მატერიალური კომპენსაციის სახით.

უკრაინის კულტურის სამინისტრო მოუწოდებს მოქალაქეებსა და სამხედროებს, თუ ფლობენ ინფორმაციას რუსეთის მიერ რელიგიური თუ არქიტექტურულ-ისტორიული მნიშვნელობის ნაგებობების მასობრივი განადგურებისა და დაზიანების შემთხვევების შესახებ, მონაცემები გააგზავნონ სპეციალურ ბაზაში.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან