Batumelebi

რუსეთის უშიშროების საბჭოს თავმჯდომარის მოადგილე, დიმიტრი მედვედევი დასავლეთს კიდევ ერთხელ მიანიშნებს უკრაინის  „კონფლიქტის სრულმასშტაბიან ბირთვულ ომში გადაზრდაზე“. მედვედევი ტელეგრამის საკუთარ არხზე დამაკნინებელი ეპითეტებით მოიხსენიებს დასავლეთს და წერს, რომ „არ უნდა მოატყუოთ არც საკუთარი თავი და არც სხვები“.

მედვედევის მიერ გამოქვეყნებულ ტექსტს უცვლელად გთავაზობთ:

„უცხოელი ანალიტიკოსების მსჯელობა NATO რუსეთის ომზე არ ცხრება. ამასთან, დასავლეთის „მოლაპარაკე თავების“ ცინიზმი სულ უფრო და უფრო აშკარაა. ყველანაირად ცდილობს დღის წესრიგში შემოიტანო თეზისი, რომ რუსეთი მსოფლიოს ბირთვული კონფლიქტით ემუქრება. ტრამპიც კი ბოლოს ამ თემით გამოჩნდა, თუმცა ისიც გასაგებია, რომ ბაიდენის ჯიბრით. და, რა თქმა უნდა, თავისი წვრილი ხმით წრიპინებენ ევროპელები.

დასავლეთის ქვეყნების მიერ რუსეთის წინააღმდეგ გაჩაღებული „პროქსი ომის“ [ეს არის დიდი სახელმწიფოს მიერ წამოწყებული ომი, რომელშიც თავად არ მონაწილეობს] პირობებში, მინდა კიდევ ერთხელ ძალიან მკაფიოდ გავიმეორე ის, რაც გონიერი ადამიანებისთვის ისედაც ცხადია:

1. NATO-ს ქვეყნების მიერ უკრაინის იარაღით მომარაგება, მისი სამხედროების მომზადება დასავლური ტექნიკა რომ გამოიყენონ, დაქირავებული მებრძოლების გაგზავნა და ალიანსის ქვეყნების წვრთნების გამართვა ჩვენს საზღვრებთან, ზრდის NATO-სთან პირდაპირი და ღია კონფლიქტის ალბათობას უკვე არსებული „პროქსი ომის“ ნაცვლად.
2. ყოველთვის არსებობს ასეთი კონფლიქტის სრულმასშტაბიან ბირთვულ ომში გადაზრდის რისკი.
3. ეს ყველა სცენარით კატასტროფული იქნება.

აი, სულ ესაა. ამიტომაც არ უნდა მოატყუოთ არც საკუთარი თავი და არც სხვები. უბრალოდ, უნდა იფიქროთ საკუთარი ქმედებების შესაძლო შედეგებზე და არ დაიხრჩოთ საკუთარი ნერწყვით რუსოფობიის შეტევებისას“.

უკრაინელმა ჯარისკაცებმა სანგრების გათხრისას აღმოაჩინეს უძველესი ამფორები, რომლებიც ჩვენს წელთა აღრიცხვამდე დაახლოებით IV-V საუკუნით თარიღდება.

ინფორმაცია თავდაპირველად ოდესის 126-ე ტერიტორიული თავდაცვის ბრიგადამ გაავრცელა, რომელიც გაზიარებული აქვს ოდესის არქეოლოგიურ მუზეუმსაც თავის ფეისბუქის გვერდზე.

წყაროს ინფორმაციით, არქეოლოგიური ნიმუშები ჯარისკაცებმა სწორედ ოდესის არქეოლოგიურ მუზეუმს გადასცეს.

„ბრიგადის ერთ-ერთ სტრუქტურულ ერთეულში საფორტიფიკაციო სამუშაოების დროს ჯარისკაცებმა აღმოაჩინეს ჩვენს წელთაღრიცხვამდე 4-5 საუკუნეებით დათარიღებული უძველესი ამფორები.

126-ე ბრიგადის მეთაურის გადაწყვეტილებით, უძველესი არტეფაქტები გადაეცა ოდესის არქეოლოგიური მუზეუმის თანამშრომლებს, რომლებმაც პირობა დადეს, რომ აღმოჩენილ ექსპონატებს სამუზეუმო კოლექციას დაამატებენ“, – წერს თავდაცვის ბრიგადა თავის ფეისბუქზე.

შეერთებული შტატების სანქციებმა რუსეთი იძულებული გახადა, ზოგიერთი სამხედრო ტექნიკისთვის ჭურჭლის სარეცხი მანქანებისა და მაცივრების კომპიუტერული ჩიპები გამოიყენოს – ამის შესახებ, ვაჭრობის მდივანმა, ჯინა რაიმონდომ აშშ-ის სენატში გამოსვლისას ისაუბრა.

მისი გამოსვლის დეტალებს გავლენიანი ამერიკული გამოცემა The Washington Post აქვეყნებს.

„გვაქვს ცნობები უკრაინელებისგან, რომ როდესაც ისინი ხელში იგდებენ რუსეთის სამხედრო ტექნიკას, ეს ტექნიკა სავსეა ნახევარგამტარებით, რომლებიც ამოღებულია ჭურჭლის სარეცხი მანქანებიდან და მაცივრებიდან“, – თქვა ჯინა რაიმონდომ და დასძინა, რომ ცოტა ხნის წინ ის უკრაინის პრემიერ-მინისტრის შეხვდა.

The Washington Post აღნიშნავს, რომ საყოფაცხოვრებო ტექნიკის დეტალების სამხედრო ტექნიკაში გამოყენების შესახებ ინფორმაციის პირველწყარო არიან უკრაინის ოფიციალური პირები, რომლებიც ჰყვებიან, რომ რუსულ ტანკებში აღმოაჩინეს ასეთი დეტალები, რომლებითაც სხვა კომპონენტები იყო ჩანაცვლებული.

თავის გამოსვლაში ვაჭრობის მდივანმა ხაზი გაუსვა, რომ უკანასკნელი ცნობებით, ტანკების ორი რუსული მწარმოებელი იძულებული გახდა, კომპონენტების ნაკლებობის გამო ტექნიკის გამოშვება შეეწყვიტა.

„ჩვენი მიზანი იყო რუსეთს ვეღარ მიეღო მაღალტექნოლოგიური პროდუქცია, რომლის ნაკლებობაც სამხედრო მოქმედებების გაგრძელებაში ხელს შეუშლიდა. ზუსტად ამას ვაკეთებთ“, – განაცხადა აშშ-ის ვაჭრობის მდივანმა.

სწორედ ჯინა რაიმონდოს უწყება კურირებს რუსეთში ექსპორტს, რომელზე შეზღუდვაც სანქციების პაკეტის უდიდეს ნაწილს შეადგენს.

გამოცემის ინფორმაციით, რუსეთში შეერთებული შტატების ტვირთები, მათ შორის ნახევარგამტარები, სატელეკომუნიკაციო აღჭურვილობა, ლაზერები, საავიაციო ელექტროტექნიკა და საზღვაო ტექნოლოგიები 85 პროცენტითაა შემცირებული, 2021 წლის ამავე პერიოდთან შედარებით.

კომპიუტერის ჩიპები, იგივე ნახევარგამტარები, ის ტვინია, რომელიც თანამედროვე ელექტრონული ტექნიკის უმრავლესობას ამუშავებს. რუსეთი თვითონ ძალიან მცირე რაოდენობით აწარმოებს ამგვარ ჩიპებს და ყოველთვის დამოკიდებული იყო აზიისა და დასავლეთის კომპანიების იმპორტზე.

მსოფლიოს უდიდესმა კომპანიებმა თებერვალშივე უარი თქვეს რუსეთისთვის ტექნოლოგიების მიწოდებაზე, მას შემდეგ რაც შეერთებულმა შტატებმა და ევროპამ რუსეთისთვის სანქციების დაწესება დაიწყეს.

აშშ-ის გარდა კიდევ დაახლოებით 30-მდე ქვეყანამ დაუწესა რუსეთს ექსპორტზე ანალოგიური შეზღუდვა, რომელიც ბელარუსზეც ვრცელდება.

მთავარი ფოტო: ჯინა რაიმონდო, აშშ-ის ვაჭრობის მდივანი

ფინეთის მთავრობა ადასტურებს, რომ ნატოში გაწევრიანებაზე განაცხადს გააკეთებენ.

ამის შესახებ განაცხადეს დღეს, 12 მაისს, დილას, ქვეყნის პრეზიდენტმა საული ნიინისტომ და პრემიერ-მინისტრმა სანა მარინმა.

„ფინეთი უნდა შეუერთდეს ნატოს“ – განაცხადეს ქვეყნის პრემიერ-მინისტრმა და პრეზიდენტმა.

„ფინეთი გააძლიერებს ალიანსს. ფინეთმა დაუყოვნებლივ უნდა მიმართოს ნატოს გაწევრიანებისთვის. ვიმედოვნებთ, რომ ნაბიჯები, რომლებიც ჯერ კიდევ საჭიროა ამ გადაწყვეტილების მისაღებად, სწრაფად გადაიდგმება უახლოეს დღეებში,“ – აღნიშნულია განცხადებაში.

შემდეგი ნაბიჯი საპარლამენტო პარტიების მოსაზრებები იქნება ამ თემაზე, რომელიც არაუგვიანეს მომავალ კვირაში უნდა გაჟღერდეს.

ფინეთის პრეზიდენტმა და პრემიერ-მინისტრმა, მთავრობის ანგარიში შეცვლილი უსაფრთხოების მდგომარეობის შესახებ, საპარლამენტო დებატებამდე – აპრილში წარმოადგინეს.

როგორც ფინეთის საზოგადოებრივი მაუწყებელი წერს, ანგარიშში გაცხადებულია, რომ ფინეთის გაწევრიანება ნატოში გაზრდის სტაბილურობასა და უსაფრთხოებას ბალტიის ზღვის რეგიონში. ამავდროულად, ანგარიშში აღნიშნულია, რომ ფინეთის ნატოში გაწევრიანებაზე „რუსეთის რეაქცია არ იქნება პოზიტიური“.

ფინური მედიის ცნობით, ბოლო გამოკითხვა აჩვენებს, რომ ფინეთში ნატოში გაწევრიანებას მხარს უჭერს მოსახლეობის 65 პროცენტზე მეტი.

სავარაუდოდ კვირას, 15 მაისს, გახდება ცნობილი შვედეთის მთავრობის ოფიციალური პოზიციაც ნატოში გაწევრიანების შესახებ. შვედეთის პრემიერ-მინისტრმა მაგდალენა ანდერსონმა განაცხადა, რომ თავის პოზიციას 15 მაისს დააფიქსირებს. მედიის ცნობით, შვედეთში ნატოში გაწევრიანების საკითხს უფრო სკეპტიკურად უდგებიან, ვიდრე ფინეთში.

ფინეთმა და შვედეთმა ნატოში გაწევრიანების სურვილის შესახებ  უკრაინაში საომარი ვითარების დაწყების შემდეგ განაცხადეს.

____________

ფოტოზე: ფინეთის პრემიერი სანა მარინი

12 მაისის განახლებაში, დიდი ბრიტანეთის დაზვერვა ვრცელ პოსტს უძღვნის ხარკოვის ოლქში მიმდინარე საომარ მოქმედებებს და აღნიშნავს, რომ რუსეთი ახლა იზიუმთან ძალების გაძლიერებას შეეცდება.

„უკრაინის შეიარაღებული ძალები განაგრძობენ კონტრშეტევებს ხარკოვის ჩრდილოეთით, რუსეთის საზღვრისკენ. მათ უკვე დაიკავეს რამდენიმე ქალაქი და სოფელი. დონბასში მიმდინარე საომარი მოქმედებებისთვის პრიორიტეტის მინიჭებამ, ხარკოვის ოლქში მყოფი რუსეთის სამხედრო დანაყოფები დაუცველი გახადა მობილური და ძალიან მოტივირებული უკრაინული კონტრშეტევების წინააღმდეგ ბრძოლაში“, – წერს დიდი ბრიტანეთის დაზვერვა.

უწყების ინფორმაციით, მოსკოვმა ხარკოვის ოლქიდან თავისი დანაყოფები დიდი დანაკარგების შემდეგ ძალების შესავსებად და გადასაჯგუფებლად გაიყვანა.

დიდი ბრიტანეთის დაზვერვა აღნიშნავს, რომ სავარაუდოდ, მოსკოვი თავის სამხედრო დანაყოფებს მდინარე სევერსკი დონეცის აღმოსავლეთ ნაპირებისკენ გადაისვრის და ამით შეეცდება, მოახერხოს ძალების ფორმირება დასავლეთის ფლანგზე მყოფი ჯარებისა და იზიუმში მიმდინარე საომარი მოქმედებებისთვის მასალების მიწოდების ძირითადი გზების დასაცავად.

„ხარკოვის ოლქიდან ჯარების გაყვანა ნიშნავს რუსეთის უუნარობის ჩუმ აღიარებას, რომ მან ვერ შეძლო დაეკავებინა უკრაინის ის საკვანძო ქალაქები, სადაც კრემლი მოსახლეობის სუსტ წინააღმდეგობას ელოდა“, – წერს ბრიტანეთის დაზვერვა.

11 მაისის განახლებაში, უწყება კუნძულ ზმეინზე მიმდინარე ბრძოლებს მიმოიხილავდა და აღნიშნავდა, რომ  რუსეთი კვლავაც ცდილობს იქ მყოფი თავისი გარნიზონის გაძლიერებას.

მთავარი ფოტო: ხარკოვი დაბომბვის შემდეგ/სააგენტო Unian

რუსული ჯარები ხერსონის ოლქის საზღვრებზე არიან გაჭედილი. მათ არც ძალა აქვთ და არც განზრახვა გადაადგილების. ეს მოსაზრება უკრაინული 24-ე არხის ეთერში უკრაინის შინაგან საქმეთა მინისტრის მრჩეველმა, ვიქტორ ანდრუსივმა გამოთქვა.

„მათი მთავარი ამოცანაა, დაასრულონ ჩვენი ძალების ალყა, მაგრამ მათი ჯარები უკვე საკმაოდ შესუსტებულია. მე, ზოგადად, ველი, რომ ერთ კვირაში, მაქსიმუმ 10 დღეში, მათ ექნებათ კრიტიკული მდგომარეობა. მათ ჰყავთ ისეთი ჯარისკაცების დიდი რაოდენობა,  რომლებიც უარს ამბობენ ბრძოლაზე. მათ უკვე გადაჰყავთ [ბრძოლის ველზე] უმაღლესი სარდლობა, რათა მებრძოლებს შეტევაზე წასვლის მოტივაცია გაუწიონ“, – თქვა ანდრუსივმა.

„მათ [რუსებმა] უკვე გამოიყენეს ყველაფერი, რაც ჰქონდათ და განსაკუთრებით ხელშესახებ შედეგებს ვერ მიაღწიეს. წინსვლა ხდება დასახლებული პუნქტების მიწასთან გასწორების ფასად, როცა ჩვენს ჯარისკაცებს არსად აქვთ თავის დასაცავი [ადგილი]. ასე ფიზიკურად დიდხანს ვერ იბრძოლებენ“, – დარწმუნებულია ექსპერტი.

უკრაინის შინაგან საქმეთა სამინისტრო ელოდება, რომ რუსული ჯარები ტაქტიკას ერთ კვირაში ან 10 დღეში შეცვლიან, – წერს „უნიანი“.

„მე ამას „მცოცავ ოკუპაციას“ ვუწოდებ. ისინი შეწყვეტენ შეტევას მთელი ფრონტის გასწვრივ და დაიწყებენ ძალიან ნელა ფოკუსირებას თითოეულ კონკრეტულ პუნქტზე“, – თქვა ანდრუსივმა.

გუშინ, 10 მაისს, უკრაინის შეიარაღებული ძალების გენერალური შტაბის მთავარი ოპერატიული დირექტორატის უფროსის მოადგილემ, ოლექსი გრომოვმა განაცხადა, რომ უკრაინის დამცველებმა შეაჩერეს რუსული არმიის შეტევა, – წერს უნიანი.

ხერსონის რუსეთთან შეერთების პერსპექტივაზე დღეს კრემლის პრესსპიკერი დიმიტრი პესკოვმა ისაუბრა, მას შემდეგ, რაც ხერსონის ოლქის საოკუპაციო ხელისუფლება პუტინს სთხოვს, რეგიონი რუსეთის შემადგენლობაში შეიყვანოს. უკრაინელმა მაღალჩინოსანმა კი ამის საპასუხოდ თქვა, რომ მათ შეუძლიათ მარსაც შეუერთდნენ.

ფინეთის საზოგადოებრივი მაუწყებლის ცნობით, ფინეთში კრემლთან დაკავშირებული ორი პირის ქონების კონფისკაცია მოხდა.

საუბარია პაველ გუსევსა და გრიგორ ბერეზკინზე. გუსევი რუსული უმსხვილესი ტაბლოიდური გაზეთ „მასკოვსკი კომსომოლეცის“ რედაქტორია, ხოლო გრიგორი ბერეზკინი მილიონერია, რომელიც ასევე ვლადიმერ პუტინთან დაახლოებულ პირად მიიჩნევა. ორივე მათგანი ევროკავშირის სანქციების სიაშია.

ფინური მედიის ცნობით, ბერეზკინს ჰყავს რალის გუნდი, რომელიც ფინეთის ქალაქ იუვასკიულიაში ოპერირებდა და რომლისთვისაც ის მართავდა ავტომობილ Ford Fiesta R5-ს. ფინეთის სახელმწიფო ვალის შემგროვებელმა ორგანომ ESN-ის გუნდის საკუთრებაში არსებული ავტომანქანებისა და სხვა ქონების კონფისკაცია მოახდინა, რათა შეაჩეროს მათი გაყიდვა და შემოსავლის გადაცემა ბერეზკინისთვის.

„მასკოვსკი კომსომოლეცის“ რედაქტორი გუსევი კი ყოფილ მეუღლესთან ერთად ფლობს დასასვენებელ სახლს და 20 ჰექტარ მიწას ფინეთის მუნიციპალიტეტ ჯანაკალაში. ეს ქონება ანალოგიურად იქნა ჩამორთმეული სააგენტოს მიერ, რათა გუსევს არ მიეღო მოგება ქონების თავისი წილიდან.

______________

ფოტოზე: გუსევი და ბერეზკინი

ხერსონის ოლქის საოკუპაციო ხელისუფლება პუტინს სთხოვს, რეგიონი რუსეთის შემადგენლობაში შეიყვანოს. ინფორმაციას ამის შესახებ ახალი ამბების რუსული სააგენტო TASS-ი ავრცელებს კირილ სტრემოუსოვზე დაყრდნობით, რომელიც მოსკოვის მიერ კონტროლირებადი ხერსონის ნაწილის რეგიონული სამხედრო და სამოქალაქო ადმინისტრაციის უფროსის მოადგილეა.

„მსგავსი მიმართვის, ყოფნა-არყოფნის საკითხი მაინც ხერსონის მხარის მცხოვრებლებმა უნდა გადაწყვიტონ – ეს პირველი. ხერსონის მხარის მცხოვრებლებმა  საკუთარი ბედიც უნდა განსაზღვრონ. რა თქმა უნდა, ეს საკითხი მკაფიოდ და ფრთხილად უნდა გამოარკვიონ და შეაფასონ იურისტებმა, იურიდიულმა ექსპერტებმა – რადგან, რა თქმა უნდა, ასეთ საბედისწერო გადაწყვეტილებებს უნდა ჰქონდეს აბსოლუტურად მკაფიო სამართლებრივი საფუძველი. სამართლებრივი დასაბუთება უნდა იყოს აბსოლუტურად ლეგიტიმური, როგორც ეს ყირიმის შემთხვევაში იყო,“ – ასე გამოეხმაურა ხერსონის რუსეთთან შეერთების პერსპექტივას კრემლის პრესსპიკერი დიმიტრი პესკოვი.

უკრაინის პრეზიდენტის მრჩეველმა, მიხაილო პოდოლიაკმა ხერსონის ოლქის საოკუპაციო ხელისუფლების წარმომადგენლებს გაულაიტერები უწოდა. გაულაიტერი მესამე უმაღლესი წოდება იყო ნაცისტების პოლიტიკურ ხელმძღვანელებაში და ექვემდებარებოდა მხოლოდ რაიხსლაიტერს და თავად ფიურერს. პოდოლიაკის თქმით, „უკრაინული არმია გაათავისუფლებს ხერსონს, რა სიტყვების თამაშითაც არ უნდა თამაშობდნენ ისინი“.

„ერთადერთი მიმართვა, რაც შეიძლება ხერსონის რეგიონის „გაულაიტერებმა“ მოამზადონ, არის შეწყალების თხოვნა სასამართლო განაჩენის შემდეგ. ოკუპანტებმა შეიძლება მოითხოვონ მარსთან ან იუპიტერთან შეერთება. უკრაინული არმია გაათავისუფლებს ხერსონს, რა სიტყვების თამაშითაც არ უნდა თამაშობდნენ ისინი,“ – წერს პოდოლიაკი.

რომის პაპი ფრანცისკე ვატიკანში შეხვდა „აზოვსტალის“ ქარხანაში მყოფი უკრაინელი მებრძოლების ცოლებს და „მედიაზონას“ გამომცემელს, პიოტრ ვერზილოვს. ამის შესახებ ვერზილოვი ტვიტერზე წერს და ფოტოს აქვეყნებს.

ვერზილოვი წერს, რომ რომის პაპს შეხვდა პოლკ „აზოვის“ მეთაურის, დენის პროკოპენკოს ცოლი, კატია პროკოპენკო და „აზოვსტალში“ მყოფი დაჭრილი მებრძოლის ცოლი, იულია ფედოსიუკი.

„შევხვდით რომის პაპს, რომ გვეთხოვა მისთვის მონაწილეობა მიეღო აზოვსტალის დამცველების ბედში,“ – წერს ვერზილოვი.

• რა ხდება მარიუპოლში

რუსეთის მიერ ოკუპირებული მარიუპოლი ამჟამად, ფაქტობრივად, განადგურებულია რუსული ბომბებისგან. უცნობია, რამდენი მშვიდობიანი მოქალაქე ემსხვერპლა ქალაქის ოკუპაციას. ჯერ კიდევ მარტის ბოლოს მარიუპოლის მერმა განაცხადა, რომ ქალაქში 5 ათასი მშვიდობიანი მოქალაქე დაიღუპა და მათ შორის, 210 ბავშვია.

მარიუპოლი არ დატოვეს უკრაინელმა მებრძოლებმა. ქალაქს იცავდა „აზოვი“, უკრაინის ერთ-ერთი ყველაზე ელიტარული პოლკი, საზღვაო ქვეითები და უკრაინის სასაზღვრო ძალები. ქალაქზე განუწყვეტელი შეტევის შედეგად უკრაინელი მებრძოლები მოექცნენ მარიუპოლის უდიდესი ქარხნის – „აზოვსტალის“ ტერიტორიაზე, რომელშიც მიწისქვეშა გვირაბებია. სწორედ ამ გვირაბებში აფარებენ თავს უკრაინელი მებრძოლები.

რუსეთმა მარიუპოლის მცველებს არაერთხელ მოუწოდა დანებებისკენ, მაგრამ უკრაინელი მებრძოლები დანებებაზე უარს აცხადებენ.

ბოლო დღეებამდე „აზოვსტალის“ ბუნკერებში და მარიუპოლში მდებარე სხვადასხვა თავშესაფარში იმყოფებოდა ასობით მშვიდობიანი მოქალაქე, თუმცა საერთაშორისო ორგანიზაციების, „წითელი ჯვრისა“ და გაეროს ჩართულობით მარიუპოლიდან მათი დიდი ნაწილის გამოყვანა მოხერხდა.

ახლა „აზოვსტალში“ ძირითადად მებრძოლები არიან, რომელთაც არ აქვთ წამლები დაჭრილებისთვის. უკრაინელი მებრძოლები ჰუმანიტარულ კორიდორს და ექსტრაქციას ითხოვენ, მესამე ქვეყანაში უსაფრთხოდ გაყვანას, რომელსაც ისინი ომის დასრულებამდე არ დატოვებენ.

_____________

ფოტო: Пётр Верзилов/twitter

ამავე თემაზე: 

უკრაინის ქალაქ მარიუპოლის მერი, ვადიმ ბოიჩენკო ამბობს, რომ მარიუპოლში 150-170 ათასი მოქალაქეა, პირობების არქონის გამო ქალაქში შესაძლოა ეპიდემიამ იფეთქოს და სიკვდილის შემთხვევები გაიზარდოს, ამიტომაც საჭიროა მთელი ქალაქის ევაკუაცია. ინფორმაციას მარიუპოლის რადა ავრცელებს ტელეგრამზე.

„ოკუპანტებმა მარიუპოლი შუა საუკუნეების გეტოდ აქციეს.

მედიკამენტების, სამედიცინო დახმარების, წყალმომარაგებისა და კანალიზაციის აღდგენის გარეშე ეპიდემიები იფეთქებს. დღეს მოსახლეობის უმრავლესობა მოხუცები და ავადმყოფები არიან. სათანადო პირობების გარეშე მოწყვლადი ჯგუფების სიკვდილიანობა გაიზრდება.

მარიუპოლელების ნაწილი ახლომდებარე სოფლებიდან დაბრუნდა ქალაქში, რადგან მათ არ უშვებენ თავისუფალი უკრაინის ტერიტორიაზე მკაცრი ფილტრაციის გამო. მაგრამ რუსები აგრძელებენ 24 თებერვალს დაწყებულ გენოციდს. ჩვენი ხალხი სასიკვდილო საფრთხეშია. ამიტომ საჭიროა ქალაქის სრული ევაკუაცია“, – ამბობს ვადიმ ბოიჩენკო.

• რა ხდება მარიუპოლში

რუსეთის მიერ ოკუპირებული მარიუპოლი ამჟამად, ფაქტობრივად, განადგურებულია რუსული ბომბებისგან. უცნობია, რამდენი მშვიდობიანი მოქალაქე ემსხვერპლა ქალაქის ოკუპაციას. ჯერ კიდევ მარტის ბოლოს მარიუპოლის მერმა განაცხადა, რომ ქალაქში 5 ათასი მშვიდობიანი მოქალაქე დაიღუპა და მათ შორის 210 ბავშვია.

მარიუპოლი არ დატოვეს უკრაინელმა მებრძოლებმა. ქალაქს იცავდა „აზოვი“, უკრაინის ერთ-ერთი ყველაზე ელიტარული პოლკი, საზღვაო ქვეითები და უკრაინის სასაზღვრო ძალები. ქალაქზე განუწყვეტელი შეტევის შედეგად უკრაინელი მებრძოლები მოექცნენ მარიუპოლის უდიდესი ქარხნის – „აზოვსტალის“ ტერიტორიაზე, რომელშიც მიწისქვეშა გვირაბებია. სწორედ ამ გვირაბებში აფარებენ თავს უკრაინელი მებრძოლები.

რუსეთმა მარიუპოლის მცველებს არაერთხელ მოუწოდა დანებებისკენ, მაგრამ უკრაინელი მებრძოლები დანებებაზე უარს აცხადებენ.

ბოლო დღეებამდე „აზოვსტალის“ ბუნკერებში და მარიუპოლში მდებარე სხვადასხვა თავშესაფარში იმყოფებოდა ასობით მშვიდობიანი მოქალაქე, თუმცა საერთაშორისო ორგანიზაციების, „წითელი ჯვრისა“ და გაეროს ჩართულობით მარიუპოლიდან მათი დიდი ნაწილის გამოყვანა მოხერხდა.

ახლა „აზოვსტალში“ ძირითადად მებრძოლები არიან, რომელთაც არ აქვთ წამლები დაჭრილებისთვის. უკრაინელი მებრძოლები ჰუმანიტარულ კორიდორს და ექსტრაქციას ითხოვენ, მესამე ქვეყანაში უსაფრთხოდ გაყვანას, რომელსაც ისინი ომის დასრულებამდე არ დატოვებენ.

ამავე თემაზე: 

უკრაინის შეიარაღებული ძალების 36-ე საზღვაო ქვეითი ბრიგადის მეთაური, სერგეი ვოლინა ფეისბუქის პირად გვერდზე მსოფლიოს ცივილიზებულ სამყაროს მიმართავს და მათ მარიუპოლის გარნიზონის გადარჩენაში დახმარებას სთხოვს. ვოლინას დანაყოფი „აზოვსტალში“ იბრძვის.

„თუ მსოფლიო ცივილიზაციას ჯერ კიდევ შერჩა საერთო სულიერი ღირებულებები და იდეალები, თუ ადამიანები ჯერ კიდევ ახერხებენ სხვისი ტანჯვისა და ტკივილის განცდას, თუ დახმარების მუდარას შეუძლია გამოიწვიოს მოქმედება, მაშინ მე მოგმართავთ, ვიბრძოლოთ მარიუპოლის გარნიზონისთვის!“ – წერს ვოლინა პირად ფეისბუქგვერდზე.

როგორც აზოვსტალში მებრძოლი ოფიცრები ამბობენ, გასულ თვეში სწორედ საზღვაო ქვეითების დანაყოფმა სერგეი ვოლინას მეთაურობით მოახერხა მარიუპოლის ორმაგი ალყის გარღვევა და „აზოვსტალის“ მცველებთან შეერთება.

დღეს კი ვოლინა აზოვსტალიდან სამხედროების გაყვანის თხოვნით მიმართავს მთელ მსოფლიოს, „ნებისმიერს, ვისაც შეუძლია დაიწყოს უკრაინელი სამხედროების გაყვანის პროცედურა!“

ვოლინა უკრაინელი საზღვაო ქვეითების ბრძოლის მოტივაციაზეც წერს:

„მე საზღვაო ქვეითი ვარ.

სწორედ საზღვაო ქვეითებმა მასწავლეს, როგორ უნდა მიყვარდეს უკრაინა გულწრფელად!

მიყვარდეს გაბედულად და უშიშრად, მიყვარდეს იარაღით ხელში და უდიდესი საფრთხის მომენტში, მიყვარდეს ფრთხილად, მამაცურად და უკომპრომისოდ!

და სანამ გული მიცემს, ვიგრძნობ წმინდა, უპირობო და უსაზღვრო სიყვარულს ჩემი სამშობლოს მიმართ!

სამშობლოა ის, სადაც შვილს – დედა, ძმას – და, ხოლო მამას თავისი შვილი უყვარს!

ამ სიყვარულს არ აქვს საზღვრები!

საზღვაო ქვეითები ჩემი ოჯახია. ისინი არიან უკრაინის დამცველები, რომლებიც თავიანთ სიცოცხლეს უყოყმანოდ სწირავენ დედასამშობლოს. ისინი არიან ძმები, რომლებიც ყოველთვის თანაბრად ინაწილებენ, რაც დარჩათ, ერთმანეთს სთავაზობენ მხარს დასაყრდნობად და უწვდიან დახმარების ხელს!

რადგან ჩვენ ერთი სიყვარული გვაქვს დედის – უკრაინისადმი!

ჩვენ ვიბრძვით…“

___

უკრაინის ქალაქი მარიუპოლი რუსული არმიის მთავარი სამიზნეა. ქალაქს ბომბავენ 24 თებერვლიდან ანუ ომის დაწყების დღიდან. ქალაქში, რომელიც რუსებმა უკვე დაიპყრეს, მარიუპოლის მერის, ვადიმ ბოიჩენკოს განცხადებით, დღეის მდგომარეობით დაახლოებით 150-170 ათასი ადამიანი იმყოფება.

მარიუპოლში ჯერჯერობით იბრძვის „აზოვის პოლკი“, რომელიც ალყაშია და „აზოვსტალის“ მიწისქვეშა გვირაბებშია გამაგრებული.

გასულ კვირას ჰუმანიტარული დერეფანი მოეწყო და აზოვსტალის ტერიტორიიდან გაიყვანეს ბავშვები, ქალები და მოხუცები. მედიის ინფორმაციით, ამ დროსთვის ქარხნის ტერიტორიაზე ისევ რჩება ასამდე სამოქალაქო პირი, დაჭრილი სამხედროები და აზოვის პოლკის ჯარისკაცები.

რუსეთი არ თანხმდება ჯარისკაცების გაყვანას.

აზოვის პოლკი აცხადებს, რომ რუსებს ტყვედ არ ჩაბარდება, რადგან ეს მათთვის გარანტირებული სიკვდილია. პოლკი მესამე ქვეყანაში ითხოვს გაყვანას.

გერმანიაში, ჰამბურგის პორტში, დააკავეს რუსი ოლიგარქის იახტა, რომლის ღირებულება არანაკლებ 400 მლნ ევროა. ამის შესახებ გერმანული გამოცემა Süddeutsche Zeitung-ი წერს.

სუპერიახტა „ლუნა“, რომლის სიგრძე 115 მეტრია, ახლა აზერბაიჯანული წარმოშობის რუს ოლიგარქს, ფარხად ახმედოვს ეკუთვნის, მანამდე კი „ლუნა“ რომან აბრამოვიჩის იახტა იყო.

„ფორბსის“ 2021 წლის მონაცემებით, ახმედოვის ქონება 1,4 მილიარდ აშშ დოლარს შეადგენს. ახმედოვი იმ რუს ოლიგარქებს შორისაა, რომელთაც დასავლეთის სანქციები შეეხოთ.

აპრილში ჰამბურგში კიდევ ერთი რუსი ოლიგარქის, უსმანოვის დის იახტა, Dilbar-ი დააკავეს, რომლის ღირებულება 800 მლნ დოლარია.

_________________

ფოტოზე: იახტა „ლუნა“ ჰამბურგის პორტში. ფოტო: EPA-EFE/FOCKE STRANGMANN