ნეტგაზეთი • RU

ესპანეთში მენსტრუალური შვებულების უფლება დაწესდა

გეგმის მიხედვით, რომელსაც ესპანეთის მთავრობა მომავალ კვირას დაამტკიცებს, ქალებს, რომლებსაც აწუხებთ ძლიერი მენსტრუალური ტკივილი, უფლება ექნებათ ჰქონდეთ თვეში სამ დღემდე ვადით შვებულება.

„ტელეგრაფი“ წერს, რომ რეფორმის მიღების შემდეგ ესპანეთი გახდება პირველი დასავლური ქვეყანა, რომელიც შესთავაზებს დასაქმებულებს მენსტრუალური შვებულების უფლებას.

ამჟამად მენსტრუალურ შვებულებას იძლევიან მხოლოდ აზიის ზოგიერთ ქვეყანაში, მათ შორისაა: იაპონია, სამხრეთ კორეა, ინდონეზია და ზამბია – სამხრეთ აფრიკაში.

ესპანეთის გინეკოლოგიისა და მეანობის საზოგადოების თანახმად, ქალების დაახლოებით მესამედს აწუხებს მტკივნეული მენსტრუაცია – დისმენორეა.

დისმენორეის სიმპტომებია მუცლის მწვავე ტკივილი, თავის ტკივილი, დიარეა და ცხელება.

„თუ ვინმეს აქვს დაავადება ასეთი სიმპტომებით, მას ენიჭება დროებითი ქმედუუნარობის სტატუსი, ასე რომ, იგივე უნდა მოხდეს მენსტრუაციასთან დაკავშირებით – ძალიან მტკივნეული მენსტრუაციის მქონე ქალს სახლში დარჩენის უფლება უნდა მიეცეს,“ – განაცხადა ბარსელონას ყოველდღიურ გაზეთ El Periodico-სთან საუბრისას თანასწორობის საკითხებში ესპანეთის სახელმწიფო მდივანმა ანგელა როდრიგესმა.

„ყოველ მეოთხე ქალს არ შეუძლია აირჩიოს ჰიგიენის ის პროდუქტები, რომელთა ყიდვაც სურს, ფინანსური მიზეზების გამო,“ – თქვა მან, „სწორედ ამიტომ, ჩვენ ვთავაზობთ, რომ მათი უფასოდ გაცემა იყოს შესაძლებელი საგანმანათლებლო და სოციალურ ცენტრებში“.

რეფორმის თანახმად ჰიგიენური საფენები და ტამპონები ასევე უფასოდ გადაეცემა მარგინალიზებულ სოციალურ ვითარებაში მყოფ ქალებს, ასევე, ამ პროდუქტებზე სუპერმარკეტებში გასაყიდი ფასიდან ამოღებული იქნება დღგ.

„ტელეგრაფის“ ცნობით, იმავე რეფორმის პაკეტში, ასევე, იგეგმება 16 და 17 წლის ახალგაზრდებისთვის აბორტის სერვისებზე წვდომა მშობლების ნებართვის გარეშე.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან