პოლონეთის ელჩი კშიშტოფ კრაევსკი დღეს, 11 მაისს, დაიბარეს რუსეთის საგარეო საქმეთა სამინისტროში და აცნობეს, რომ მოსკოვი ელოდება პოლონეთის ხელისუფლების ოფიციალურ ბოდიშს. საქმე ეხება ვარშავაში რუსეთის ელჩზე, სერგეი ანდრეევზე, 9 მაისს განხორციელებულ თავდასხმას, როდესაც მას წითელი საღებავი შეასხეს.
„კრაევსკის ეცნობა, რომ რუსული მხარე ელოდება ოფიციალურ ბოდიშს პოლონეთის ხელმძღვანელობისგან მომხდართან დაკავშირებით. მოთხოვნილია უზრუნველყონ რუსეთის ელჩისა და პოლონეთში რუსეთის საგარეო მისიის ყველა თანამშრომლის უსაფრთხოება“, – ნათქვამია რუსეთის დიპლომატიური სამსახურის განცხადებაში.
რუსეთის საგარეო საქმეთა სამინისტრომ აღნიშნა, რომ მოსკოვის გადაწყვეტილება „შემდგომი ნაბიჯების შესახებ მიღებული იქნება ვარშავის რეაქციის მიხედვით“. საგარეო უწყების განცხადებას სააგენტო Tass-ი ავრცელებს.
9 მაისს ვარშავაში პოლონეთში რუსეთის ელჩს და მის თანმხლებ პირებს წითელი საღებავი შეასხეს. ელჩმა ვარშავაში საბჭოთა ჯარისკაცის საფლავზე ყვავილები მიიტანა. აქციის მონაწილეები სკანდირებდნენ: „ფაშისტებო“, „ფაშისტებო“.
