დღეს, 11 მაისს, ჯანდაცვის მინისტრმა ზურაბ აზარაშვილმა პარლამენტში სიტყვით გამოსვლისას თქვა, რომ სამინისტრო ჯანდაცვის სერვისების სრულ გაციფრულებას გეგმავს, რის შედეგადაც კლინიკებში პაციენტების სამედიცინო ისტორიები ქაღალდიდან ელექტრონულ სივრცეში გადავა.
„პრიორიტეტი გვაქვს მინიჭებული ჯანმრთელობის ელექტრონული ჩანაწერის სისტემის განვითარებისთვის. აღნიშნული ელექტრონული სისტემა საშუალებას მოგვცემს პაციენტის სამედიცინო ისტორიები, ქაღალდმატარებლიდან გადავიდეს ერთიან, დაცულ ელექტრონულ სივრცეში.
მკურნალ ექიმებს ექნებათ შესაძლებლობა საჭიროების დროს, მარტივად ჰქონდეთ წვდომა პაციენტის სრულ სამედიცინო ისტორიაზე – გადატანილ დაავადებებზე, ჩატარებულ მკურნალობასა და სხვა მნიშვნელოვან ინფორმაციაზე, რომელიც მკურნალობის სწორი სტრატეგიის დასახვისთვის კრიტიკულად მნიშვნელოვანი შესაძლებლობაა” – თქვა აზარაშვილმა.
ელექტრონული რეცეპტის სისტემა საქართველოში 1-ელი მარტიდან ამოქმედდა. მსგავს პროექტებზე მუშაობს ინფორმაციული ტექნოლოგიების სააგენტო, რომელიც ჯანდაცვის სამინისტროს სისტემაში ფუნქციონირებს.
