ორი ქონება ბათუმის ბულვარის ადმინისტრაციამ ელექტრონული აუქციონით, მაღალი კონკურენციის პირობებში, 421 910 ლარად გაასხვისა. აუქციონში მითითებული პირობის მიხედვით, ქონებას ერთი წლის ვადით, 2023 წლის პირველ იანვრამდე, იჯარის წესით გაასხვისებენ.
ორივე შემთხვევაში ელექტრონულ ვაჭრობაზე დაფიქსირებული ფასი ბევრად აჭარბებს ქონების საწყის ღირებულებას, რაც იმას ნიშნავს, რომ ბულვარში კომერციული სივრცეების ათვისებაზე მოთხოვნა კიდევ უფრო გაიზარდა.
961 კვ.მეტრი შენობა და მასთან დაკავშირებული ნაკვეთი იჯარის წესით 217 300 ლარად გასხვისდა, ამ ქონების საწყისი ფასი 82 000 ლარი იყო, ბიჯი – 2460 ლარი. ელექტრონულ ვაჭრობაზე ორი კონკურენტი მონაწილეობდა, მათ ქონების ფასი 53 ბიჯით გაზარდეს. გასხვისებულ შენობაში კლუბი „სექტორი 26“ იყო განთავსებული.
„ბათუმელების“ ინფრომაციით, ამ ადგილზე ისევ ეს კლუბი იქნება.
აუქციონის პირობებში მითითებული ინფორმაციით, ეს ქონება 2023 წლის 1-ელ იანვრამდე ვადით გასხვისდა
აუქციონის წესით გასხვისდა ასევე შენობა, სადაც კლუბი „სოჰო“ იყო განთავსებული. ქონების საწყისი ფასი 79 000 ლარი იყო და ის 204 610 ლარამდე გაიზარდა.
