გემი, რომელსაც უკრაინაში მოპარული ხორბალი გადაჰქონდა, სირიაში შევიდა – AP

„ასოშიეიტედ პრესის“ ცნობით, გემი, რომელსაც სავარაუდოდ უკრაინაში რუსების მიერ მოპარული ხორბალი გადაჰქონდა, სირიის პორტში შევიდა.

ინფორმაციას გამოცემა სატელიტურ ფოტოებზე დაყრდნობით ავრცელებს, რომელიც 10 მაისს დედამიწის შემსწავლელმა ამერიკულმა კომპანიამ Planet Labs PBC-მა გადაიღო, სადაც ნაჩვენებია რუსეთის დროშის ქვეშ მცურავი გემი Matros Pozynich-ი სირიაში, ლატაკიას ნავსადგურში.

„ფოტოზე ასახული გემის ზომები და მისი სხვა მახასიათებლები ემთხვეოდა ტვირთმზიდი გემის მახასიათებლებს. გემმა რადიო სიგნალის მიმღები თითქმის ერთი კვირის წინ, ხმელთაშუა ზღვაში, კუნძულ კვიპროსზე გამორთო.

სამირ მადანმა, რომელიც ონლაინ კვლევითი ფირმის TankerTrackers.com-ის თანადამფუძნებელია, „ასოშეიტედ პრესს“ ასევე განუცხადა, რომ გემი, რომელიც ლატაკიის ნავსადგურში შევიდა, Matros Pozynich-ი იყო“- წერს AP.

მანამდე უკრაინამ განაცხადა, რომ აღნიშნულ გემს 27 000 ტონა მარცვლეული გადაჰქონდა, რომელიც რუსეთმა მისი ქვეყნიდან მოიპარა.

AP-ის ინფორმაციით, უკრაინა აცხადებდა, რომ თავდაპირველად რუსეთი მოპარული მარცვლეულის ეგვიპტეში გაგზავნას აპირებდა, თუმცა ეგვიპტემ ტვირთის მიღებაზე უარი განაცხადა, რადგან უკრაინელი დიპლომატები ქვეყნებს სთხოვდნენ არ მიეღოთ მოპარული მარცვლეული.

„ასოშიეიტედ პრესის“ ინფორმაციით, გემის ოფიციალური მფლობელი რუსეთში რეგისტრირებული კომპანია Crane Marine Contractor-ია, რომელმაც გამოცემასთან კომენტარი არ გააკეთა.

მსგავს თემაზე:

ივანიშვილი ხორბლის სქემაშია, ის უნდა დასანქცირდეს – ელენე ხოშტარია