უკრაინული მედიის ცნობით, მარიუპოლის მერი ვადიმ ბოიჩენკო აცხადებს, რომ 27 დღის განმავლობაში ალყაში მოქცეულ მარიუპოლში 5 ათასი ადამიანი დაიღუპა და მათ შორის 210 ბავშვია.
მერის განცხადებით, ქალაქში ახლა დაახლოებით 170 ათასი ადამიანი რჩება, 140 ათასმა მოახერხა ქალაქის დატოვება ალყის დაწყებამდე, ხოლო 150 ათასმა – ევაკუაცია ბლოკადის დაწყების შემდეგ.
სხვადასხვა ცნობებით, მარიუპოლში შენობების 90% დაზიანებულია.
მარიუპოლში რუსეთმა დაბომბა სამშობიარო და თეატრის შენობა, რომელსაც მშვიდობიანი მოქალაქეები აფარებდნენ თავს. მარიუპოლში დაღუპულებს საერთო საფლავებში ან ხშირად ვერც მარხავენ.
ქალაქს არ მიეწოდება ელექტროენერგია, გათბობა და წყალი.
მიმდინარე საომარი მოქმედებების გამო ამ დრომდე ვერ ხერხდება დაზუსტება, რამდენი ადამიანი დაიღუპა და დაშავდა მარიუპოლში.
მარიუპოლს სტრატეგიული მნიშვნელობა აქვს, ვინაიდან მისი აღების შემთხვევაში შესაძლებელი იქნება, რუსეთის ფედერაცია სახმელეთო გზით დაუკავშირდეს ანექსირებული ყირიმისა და ქერჩის ნახევარკუნძულებს.
ქალაქი მასშტაბური ჰუმანიტარული კატასტროფის წინაშეა.
ომის პირობებში, შეუძლებელია გადამოწმება, რამდენად ზუსტია მსხვერპლის შესახებ გავრცელებული ინფორმაცია.
_______________
ფოტოზე: მასობრივი სასაფლაო მარიუპოლში, „ასოშიეიტედ პრესი“. AP Photo/Mstyslav Chernov
