ახალი ცათამბჯენები ბულვართან – ბათუმის საკრებულომ კონცეფცია დაამტკიცა

ბათუმის საკრებულომ რუსთაველის ქუჩის გასწვრივ ორი ცათამბჯენის მშენებლობის კონცეფცია დაამტკიცა. პროექტი სამშენებლოდ ხუთ საკადასტრო ერთეულს აერთიანებს.

აღნიშნულ ნაკვეთებზე [ბათუმის ბულვარსა და ნურის ტბას შორის] კიდევ ორი მრავალსართულიანი შენობის აშენებას შპს „ვესტინვესტი“ და „ბრიტიშ დეველოპმენტი“ გეგმავენ. კომპანიებმა განაშენიანების დეტალური გეგმის კონცეფცია [გდგ] მერიას 2021 წელს წარუდგინეს.

კონცეფციის დამტკიცებამდე, გარემოს ეროვნული სააგენტოს გადაწყვეტილებით, აღნიშნული ტერიტორიის განაშენიანების დეტალური გეგმა სტრატეგიულ გარემოსდაცვით შეფასებას [სგშ-ს] არ დაექვემდებარა.

სგშ სტრატეგიული დოკუმენტის განხორციელებით გარემოსა და ადამიანის ჯანმრთელობაზე შესაძლო ზემოქმედების შესწავლისა და ზოგადი პროგნოზირების პროცედურაა, რომელიც მოიცავს სკოპინგს, სგშ-ის ანგარიშის მომზადებას, საზოგადოების მონაწილეობას, უფლებამოსილ ადმინისტრაციულ ორგანოებთან კონსულტაციების გამართვას და მათგან მიღებული რეკომენდაციებისა და შეფასების შედეგების მხედველობაში მიღებას სტრატეგიული დოკუმენტის დამტკიცებისას.

შესაბამისად, სააგენტოს გადაწყვეტილების საფუძველზე, ბათუმის საკრებულომ ნინოშვილის №39-ში და რუსთაველის №44-ში არსებული მიწის ნაკვეთების განაშენიანების კონცეფცია სგშ-ს პროცედურების გარეშე დაამტკიცა.

ამ კონცეფციით:

  • „განვითარების ძირითადი ფაქტორია ზემოაღნიშნული და მომიჯნავე მიწის ნაკვეთების ერთი ფუნქციით დატვირთვა. გეგმარებითი ერთეული წარმოადგენს ქალაქის ისტორიულ ნაწილს, მასზე განთავსებულია სასტუმროს დანიშნულების ობიექტები.
  • გეგმარებითი ერთეული და საპროექტო ტერიტორიები „ნურის უბანში“, ბათუმის ისტორიული ზონის საზღვართან მდებარეობს – შოთა რუსთაველის, ეგნატე ნინოშვილის ქუჩებისა და ასევე ბულვარის ვიწრო ზოლს შორის, ზღვის ნაპირთან ახლოს“.
  • აღნიშნულ ტერიტორიაზე დაგეგმილია სასტუმროს დანიშნულების ორი მრავალსართულიანი შენობის განთავსება, რომელთა დაახლოებითი სიმაღლე იქნება 180 მეტრი, ხოლო სართულიანობა – 55.
  • ძირითად ნაწილში დაგეგმილია სასტუმრო ნომრების/აპარტამენტების განთავსება, ხოლო ნაწილში (ძირითადად ე.წ. „სტილობატში“ და კომპლექსის ბოლო სართულებზე) სხვადასხვა ფუნქციური დანიშნულების საზოგადოებრივი და კომერციული ფართობების განთავსება.

სტრატეგიული გარემოსდაცვითი შეფასების [სგშ] ჩატარების საჭიროების დადგენის მიზნით, გარემოს ეროვნულ სააგენტოს ზემოთ აღნიშნული მიწის ნაკვეთების განაშენიანების დეტალური გეგმის კონცეფცია ბათუმის მერიამ წარუდგინა. სააგენტოში შეტანილი იყო სკრინინგის ანგარიშიც:

ბათუმში, ნურის ტბასა და ბულვარს შორის, 2 ცათამბჯენის აშენებას გეგმავენ – K2-ის გაზრდას ითხოვენ

რუსეთი ცივილიზებულ სამყაროს ეუბნება: „და რას მიზამ?“ – პოდოლიაკი

უკრაინის პრეზიდენტის მრჩეველი, მიხაილო პოდოლიაკი რუსეთის მიერ უკრაინის ტერიტორიების ანექსიას ეხმაურება და აცხადებს, რომ „მოსკოვი ცდილობს დემოკრატია დააჩოქოს“.

„არ გინდოდათ ესკალაცია? და მაინც, ის აქ არის. ანექსიით, „ბირთვული“ მუქარით და ტოტალური გაწვევით, რუსეთის ფედერაცია ეუბნება ცივილიზებულ სამყაროს – „და რას მიზამ?“. მოსკოვი ცდილობს დააჩოქოს დემოკრატია. პროვოკაციისა და ომის ესკალაციის თავიდან არიდებაზე კვლავ გავაგრძელებთ საუბარს?“ – წერს მიხაილო პოდოლიაკი.

რუსეთის მხარდაჭერილმა სეპარატისტულმა ძალებმა, უკრაინის ოთხ რეგიონში – ზაპოროჟიეში, ხერსონში, დონეცკში, ლუგანსკში, – უკანონო რეფერენდუმები გამართეს რუსეთთან შეერთების მოთხოვნით. ოფიციალურად, მათ ანექსიას ვლადიმერ პუტინი დღეს, 30 სექტემბერს, მოაწერს ხელს.

გასულ ღამეს რუსეთმა ზაპოროჟიესა და ხერსონის დამოუკიდებლად ცნობის განკარგულებები გაავრცელა.

პუტინი პირდაპირ მუშაობს სამხედრო მეთაურებთან, რადგან თავდაცვას აღარ ენდობა – ISW

კრემლის ჩინოვნიკების ურთიერთსაპირისპირო განცხადებები და ბიუროკრატიული ხარვეზები მობილიზაციის პროცესში, შესაძლოა, მიუთითებდეს იმაზე, რომ პუტინმა, როგორც უმაღლესმა მთავარსარდალმა, გვერდი აუარა ქვეყნის თავდაცვის უწყებას და ურთიერთსაწინააღმდეგო ბრძანებები გასცა – მიიჩნევს აშშ-ის ომის კვლევის ინსტიტუტი (ISW).

ინსტიტუტის ანალიტიკოსები ერთ-ერთ მაგალითად იხსენებენ დუმის სპიკერის განცხადებებს. ვიაჩესლავ ვოლოდინმა ჯერ განაცხადა, რომ სამხედრო აღრიცხვაზე მყოფ რუსეთის მოქალაქეებს ქვეყნის დატოვება ეკრძალებოდათ, შემდეგ კი ეს განცხადება უარყო, რადგან თავდაცვის უწყებამ დააზუსტა, რომ ასეთი აკრძალვა კანონით მხოლოდ სრული მობილიზაციის შემთხვევაში მოქმედებს და არა „ნაწილობრივის“.

ISW-ის შეფასებით კრემლი განაგრძობს „ნაწილობრივი მობილიზაციის“ შესახებ მის მიერვე გამოცხადებული პროცედურების დარღვევას და წინააღმდეგობაში მოდის საკუთარ განცხადებებთან. მობილიზაციის გამოცხადებიდან 8 დღეში კრემლმა ამ პროცესში ხარვეზებიც კი აღიარა, თუმცა ეს ბიუროკრატიულ პრობლემებს გადააბრალა.

ინსტიტუტის ინფორმაციით, გაწვევას დაუქვემდებარეს შეუსაბამო ასაკისა და სუსტი ჯანმრთელობის მქონე ხალხი.

„ბიუროკრატიული ხარვეზები რუსეთის ნაწილობრივ მობილიზაციაში, შესაძლოა, მიუთითებდეს იმაზე, რომ პუტინმა კვლავაც გვერდი აუარა რუსეთის უმაღლეს სამხედრო სარდლობას, თავდაცვის უწყებას. ახალმობილიზებულების განთავსება პირდაპირ ხარკოვისა და ხერსონის მიმართულებებზე, შესაძლოა, ასევე მეტყველებდეს იმაზე, რომ პუტინი პირდაპირ მუშაობს ადგილზე მყოფ მეთაურებთან, რომლებიც სავარაუდოდ დაუყოვნებლივ დახმარებას ითხოვენ და არ მიჰყვებიან სტანდარტულ სამხედრო პრაქტიკას, რაც წინა ხაზზე სამხედროების გაგზავნამდე მათ მომზადებას ითვალისწინებს,“ – წერენ ინსტიტუტის ანალიტიკოსები.

ISW-ი მანამდეც წერდა, რომ არსებობს არაერთი მაგალითი, როდესაც უშუალოდ „სპეციალურ სამხედრო ოპერაციასთან“ დაკავშირებული გადაწყვეტილებების მიღებისას პუტინმა ინსტანციათა ჯაჭვს გვერდი აუარა და ეს სავარაუდოდ, თავდაცვის უწყებისადმი უნდობლობის გამო გააკეთა.

ISW-ის ანგარიშის სხვა მთავარი მიგნებები:

  • ბრძოლები გრძელდება უკრაინის სამხრეთსა და ჩრდილო-აღმოსავლეთში. უკრაინის ძალებმა, სავარაუდოდ, ალყაში მოაქციეს რუსული ჯარები ლიმანთან და მათ კომუნიკაციის კრიტიკულად მნიშვნელოვანი გზები გადაუჭრეს.
  • რუსები ცდილობენ ხერსონის მიმართულების ახალმობილიზებული რეზერვისტებით გაძლიერებას.
  • უკრაინის ძალები განაგრძობენ დარტყმებს რუსეთის ლოგისტიკური სატრანსპორტო და სამხედრო პუნქტებზე ხერსონში.
  • რუსეთის ჯარები განაგრძობდნენ სახმელეთო შეტევებს დონეცკის ოლქში.
  • რუსეთმა, სავარაუდოდ, გაზარდა ირანული დრონების Shahed 136-ების გამოყენება უკრაინის სამხრეთში.

როგორი ამინდი იქნება შაბათ-კვირას ბათუმში

გარემოს ეროვნული სააგენტოს აჭარის რეგიონული ჰიდრომეტეოროლოგიური ობსერვატორიის ინფორმაციით, 30 სექტემბრის 21 საათიდან პირველი ოქტომბრის 21 საათამდე აჭარაში მოსალოდნელია ცვალებადი მოღრუბლულობა, უნალექოდ.

იქროლებს ცვალებადი მიმართულების ქარი 8-13 მეტრი წამში.

ჰაერის ტემპერატურა სანაპირო და შიდამთიან რაიონებში იქნება:

  • დღისით: 23 – 28 გრადუსი 
  • ღამით: 13 – 18 გრადუსი 

მაღალ მთაში:

  • დღისით: 20 –25 გრადუსი
  • ღამით: 5 – 10 გრადუსი

სინოპტიკოსების ცნობით, 2-3 ოქტომბერს ბათუმში მოსალოდნელია უნალექო ამინდი.

ზღვის წყლის ტემპერატურა +22 გრადუსია.

რეზერვისტებს უბრძანეს, პირველადი დახმარების ნივთები თავად შეიძინონ – ბრიტანეთის დაზვერვა

დიდი ბრიტანეთის დაზვერვის ყურადღების ცენტრში რუსეთის არმიის სამედიცინო უზრუნველყოფის საკითხია, რომელიც უწყების დასკვნით, ომის მეშვიდე თვეს კიდევ უფრო უარესდება.

„ზოგიერთ ახალმობილიზებულ რეზერვისტს უბრძანეს, პირველადი დახმარების აუცილებელი საჭიროებები თავად შეეძინათ, პრობლემის ეკონომიკურად ეფექტიან გადაწყვეტად კი ქალის ჰიგიენური საფენები ურჩიეს,“ – წერს დაზვერვა 30 სექტემბრის რელიზში.

დაზვერვის შეფასებით, ძალიან დაბალია რუსი სამხედროების სამედიცინო მომზადების დონე, მათ არც ის იციან, როგორ უნდა გაუწიონ დაჭრილს ბრძოლის ველზე პირველადი სამედიცინო დახმარება. ამის დასტურად უწყებას ის ფაქტი მოჰყავს, რომ ზოგიერთმა რუსმა სამხედრომ თანამედროვე, დასავლური ტიპის საბრძოლო ტურნიკეტის მოპოვება მოახერხა, თუმცა ეს ტურნიკეტი აღჭურვილობაზე არა მისივე ასაფხრეწი დასაკრავით, არამედ ალუმინის კაბელით მიიმაგრეს.

„სავარაუდოდ, იმიტომ, რომ ასეთი აღჭურვილობა დეფიციტურია, სამაგიეროდ მისი მოპარვაა შესაძლებელი,“ – აღნიშნავს დაზვერვა.

უწყების დასკვნით, სამხედროებში სამედიცინო მომზადების ნაკლებობა ძალიან გაართულებს და თითქმის შეუძლებელს გახდის მათი მხრიდან სათანადო პირველადი დახმარების გაწევას, მაგალითად, ძლიერი სისხლდენის შეჩერებას.

„სამედიცინო უზრუნველყოფის არქონა ხელს შუწყობს სამხედროების მორალური განწყობის დაქვეითებას და შეამცირებს მათ სურვილს, მონაწილეობა მიიღონ შეტევით ოპერაციებში,“ – წერს დაზვერვა.

გაერთიანებული სამეფოს თავდაცვის უწყების გუშინდელი სადაზვერვო ცნობარის თემაც მობილიზაცია იყო. რელიზის თანახმად, იმ ადამიანების რიცხვი, ვინც მობილიზაციისგან თავის არიდების მიზნით რუსეთი დატოვა, სავარაუდოდ, უკვე აღემატება რუსეთის ძალების იმ რაოდენობას, რომელიც კრემლმა 2022 წლის თებერვალში უკრაინაში სამხედრო აგრესიის დასაწყებად გადაისროლა.

რუსეთში მობილიზაციის გამოცხადების შემდეგ, რუსული თუ სხვა წყაროებით უკვე არაერთი ინფორმაცია გავრცელდა იმის შესახებ, რომ მობილიზებულ რეზერვისტებს ფრონტზე ყოველგვარი მომზადების გარეშე გზავნიან.

დირექტორი, რომელმაც მოსწავლეს რუსეთის დროშის ჩამოხევისთვის შენიშვნა მისცა, სკოლიდან გაუშვეს

ბათუმის მეშვიდე საჯარო სკოლის დირექტორი თანამდებობიდან გაათავისუფლეს, ამის შესახებ განაცხადა დღეს, 30 სექტემბერს, აჭარის განათლების მინისტრმა მაია ხაჯიშვილმა.

მისი თქმით, სკოლის დირექტორმა სასწავლო რესურსების გამოყენების დროს დაარღვია კანონმდებლობა. საუბარია, სკოლის ფოიეში განთავსებულ სტენდზე, სადაც მსოფლიოს სახელმწიფოების დროშების სტიკერების გვერდით რუსეთისა და აფხაზეთის დროშის სტიკერიც იყო განთავსებული.

მინისტრის თქმით, დირექტორმა სტენდზე აფხაზეთის დროშის სტიკერი განათავსა, რაც საქართველოს კონსტიტუციას ეწინააღმდეგება.

„სტენდზე აფხაზეთის სტიკერიც იყო განთავსებული გარკვეული პერიოდით, რომელიც მიუღებელია ჩვენი კანონმდებლობით, მიუღებელი ჩვენი კონსტიტუციით. შესაბამისად, იქნა გადაწყვეტილება მიღებული და აღნიშნული საჯარო სკოლის დირექტორი დღესვე დატოვებს თანამდებობას“, – ამბობს მაია ხაჯიშვილი.

მისი თქმით, სკოლის დირექტორის მხრიდან რამდენიმე გადაცდომას ჰქონდა ადგილი, თუმცა სხვა დარღვევების შესახებ ის დეტალებს არ აკონკრეტებს.

„აქ რამდენიმე დარღვევაა კომპლექსურად და მათ შორის იმ სტიკერების გამოყენება, რომელიც ეწინააღმდეგება კანონმდებლობას. ჩვენ შევისწავლეთ, თუ ვინ დაამზადა სტიკერი და როგორ მოხდა მისი სასკოლო სივრცეში განთავსება.

მოკვლევის შედეგად გამოიკვეთა, რომ სასწავლო რესურსების შერჩევის დროს ყველა ის მნიშვნელოვანი ასპექტი, რომლებიც უნდა იყოს დაცული, ამ შემთხვევაში იყო დარღვეული და ადგილი ჰქონდა კანონმდებლობის დარღვევას.

სკოლის დირექცია და მთლიანად საგანმანათლებლო სივრცე, მეტი პასუხისმგებლობით უნდა მოეკიდოს ამ საკითხს, ვინაიდან ვსაუბრობთ ქვეყნის კანონმდებლობაზე, ვსაუბრობთ ბავშვების მომავალზე და აქედან გამომდინარე მიიღო სამინისტრომ ეს გადაწყვეტილება“, – ამბობს მინისტრი.

გუშინ TV25-მა გაავრცელა ინფორმაცია იმის შესახებ, რომ ბათუმის მეშვიდე სკოლის ფოიეში კედლიდან მოსწავლემ რუსეთის დროშა ჩამოხია, რის გამოც დირექტორმა მოსწავლის წინააღმდეგ სანქციები გაატარა. TV25-მა მოგვიანებით, ინფორმაციის დაზუსტებაში დაწერა, რომ სკოლაში ჩამოხიეს არა რუსეთის, არამედ აფხაზეთის დროშა.

„ბათუმელებმა“ მეშვიდე სკოლაში ინფორმაცია გადაამოწმა გადაწყვეტილების მიმღებ ერთ-ერთ ინფორმირებულ პირთან. მას ვკითხეთ, ნამდვილად აფხაზეთის დროშის სტიკერი ჩამოხია მოსწავლემ სტენდიდან, თუ რუსეთის? მან თქვა, რომ „ნამდვილად რუსეთის დროშა იყო“.

„ეს სტენდი გავაკეთეთ სექტემბერში, სწავლა რომ იწყებოდა, შევუკვეთეთ. საქართველოს დროშა იყო შუაში და მსოფლიოს დროშები იყო ირგვლივ. 180 დროშა იყო გაკრული, პირადობის მოწმობებისხელა იყო ეს სტიკერები. სასწავლო პროცესი რომ დაიწყო, ხომ იცით, დავრბოდით იქეთ-აქეთ და არ მიგვიქცევია ყურადღება.

სტენდი მოიტანა ერთ-ერთმა სტამბამ, ვერ გეტყვით რომელი სტამბაა. შეგნებულად, ან დირექტორი, ან სასწავლო ნაწილი მაგას ვერ გააკრავდა. რომ შეგვემჩნია, ჩვენ მაგას დავუშვებდით და გავაკეთებდით? იმ სტენდთან არაერთხელ ჩამივლია, მაგრამ რომ გავჩერებულიყავი და წამეკითხა რამე, არა. ყველა დროშაზე იყო წარწერა, მაგრამ აქამდე არ წამიკითხავს, გუშინ წავიკითხე მხოლოდ ამ ამბების შემდეგ.

დამიჯერეთ, აქ აფხაზეთის დროშაზე არ ყოფილა ლაპარაკი, ბავშვმა ჩამოხია რუსეთის დროშა და საუბარი იყო იმაზე, რომ სკოლის ინვენტარი რატომ დააზიანეო. ან გარიცხვაზე, ან რამეზე ლაპარაკი არ ყოფილა“, – ამბობს აღნიშნული პირი.

მისი თქმით, რუსეთის დროშის სტიკერი სტენდიდან მეთერთმეტეკლასელმა ჩამოხია.

„ბათუმელებმა“ საკითხის დაზუსტების მიზნით დამატებით მიმართა აჭარის განათლების სამინისტროს, სადაც დაადასტურეს, რომ მოსწვლემ ბათუმის მეშვიდე საჯარო სკოლაში ნამდვილად რუსეთის დროშის სტიკერი ჩამოხია.

TV25-ის ინფორმაციით, დირექტორი სავარაუდოდ მოსწავლის მშობელზე ზეწოლას ახდენდა, რომ მას ბავშვი სხვა სკოლაში გადაეყვანა.

მინისტრი არც ამას ადასტურებს და არც მოსწავლის სკოლიდან გარიცხვის შესახებ გავრცელებულ ინფორმაციას.

„ბავშვის მშობელს არ დაუდასტურებია სკოლის დირექტორის მხრიდან ზეწოლის ფაქტი, თუმცა მოკვლევა გაგრძელდება“, – თქვა მაია ხაჯიშვილმა.

მოქმედი კანონმდებლობით, სკოლის დირექტორს აჭარის განათლების მინისტრი ნიშნავს და ათავისუფლებს. დირექტორის უფლებამოსილების შეჩერების ფაქტზე სამეურვეო საბჭო მხოლოდ არჩეული დირექტორის შემთხვევაში მსჯელობს.

„ბათუმელებმა“ სცადა მეშვიდე სკოლის ყოფილ დირექტორთან, შორენა ქონიაძესთან დაკავშირება. მას ტელეფონი გამორთული აქვს.

ბათუმის რესურსცენტრში გვითხრეს, რომ შორენა ქონიაძე არ იყო არჩეული დირექტორი, ამიტომ მინისტრს ერთპიროვნულად შეეძლო მისი გათავისუფლება.

უკრაინაში მოკლეს „ვაგნერის“ წევრი, რომელიც საქართველოშიც იბრძოდა

კერძო სამხედრო დაჯგუფება „ვაგნერის“ მოიერიშე დანაყოფის მეთაური, 41 წლის ალექსეი ნაგინი, მეტსახელად „ტერეკი“, ბახმუტთან 20 სექტემბერს მოკლეს.

ნაგინი რუსეთში რამდენიმე ორდენით იყო დაჯილდოებული – „სიმამაცისთვის“, „ყირიმის დაცვისთვის“. მას სიკვდილის შემდეგ გადასცეს რუსეთის, ასევე დონეცკისა და ლუგანსკის სეპარატისტული რესპუბლიკების გმირის წოდება.

როგორც ინტერნეტრესურსი InformNapalm-ი წერს, „ტერეკი“ უკრაინაში დონბასშიც იბრძოდა, ასევე მონაწილეობდა ბრძოლებში ჩეჩნეთში, საქართველოში, სირიასა და ლიბიაში.

Кавказский Узел-ის ცნობით, ნაგინი დიდი პატივით დაკრძალეს მშობლიურ ვოლგოგრადში, სადაც დაკრძალვის ცერემონიას ოლქის გუბერნატორი და „ვაგნერის“ დამფუძნებელი ოლიგარქი, ევგენი პრიგოჟინი ესწრებოდნენ.

მედიის ინფორმაციით, ალექსეი ნაგინი ევგენი პრიგოჟინთან ერთად არის ავტორი ფილმისა „საუკეთესოები ჯოჯოხეთში“, რომელიც რუსეთმა უკრაინაში „სპეციალურ სამხედრო ოპერაციას“ მიუძღვნა და რომლის ტრეილერიც ტელეკომპანია „კონკორდის“ საიტზე და სოციალურ ქსელებეშია გამოქვეყნებული.

სამხედრო დაჯგუფება „ვაგნერი“, რომელიც დაქირავებული სამხედროებისგან შედგება, უკრაინაში ჯერ კიდევ 2014 წელს გამოჩნდა, როდესაც ის პრორუს სეპარატისტებს ეხმარებოდა.

დაჯგუფება 2015 წლიდან მონაწილეობს სირიის ომში, აქტიურობდნენ მოზამბიკში, სუდანსა და ცენტრალური აფრიკის რესპუბლიკაშიც. 2021 წელს მომზადებულ ჟურნალისტურ გამოძიებაში  BBC აღნიშნავდა, რომ დაჯგუფება ლიბიაში სამხედრო დანაშაულებთან და რუსეთის არმიასთანაა დაკავშირებული. BBC-ის მიხედვით, „ვაგნერი“ ლიბიაში 2019 წელს გამოჩნდა და 2019-2020 წლებში იქ მისი 1 000-მდე წევრი იბრძოდა.

BBC-ის ინფორმაციით, ეს დაჯგუფება ოფიციალურად არ არსებობს, თუმცა 2014 წლამდე დაახლოებით 10 ათას ადამიანს მაინც ჰქონია ერთჯერადი კონტრაქტი „ვაგნერთან”.

უკრაინაში ომის 7 თვის განმავლობაში არაერთი ინფორმაცია გავრცელდა ბრძოლებში დაჯგუფების დანაყოფების ლიკვიდაციისა და მათი სამხედრო შტაბების აფეთქების შესახებ.

ევგენი პრიგოჟინი, რომელიც „ვაგნერის” დამფუძნებელი და ამავე დროს ვლადიმერ პუტინთან დაახლოებული ოლიგარქია, უკრაინაში რუსეთის შეჭრის შემდეგ კრემლის „სამხედრო ოპერაციის“ სახედ იქცა.

მთავარ ფოტოზე: ალექსეი ნაგინი, ფოტო: InformNapalm

ჩვენ ქურდები და მკვლელები ახლა რუსეთის ომში ვიბრძვით – როგორ აგროვებს პრიგოჟინი პატიმრებს

ახალი მონაცემები რუსეთ-უკრაინის სამხედრო დანაკარგებზე ომში – 30 სექტემბერი

უკრაინის შეიარაღებული ძალების გენერალური შტაბის დღევანდელი მონაცემებით, 24 თებერვლიდან 30 სექტემბრამდე პერიოდში, რუსეთის არმიის საბრძოლო დანაკარგი არის:

  • ცოცხალი ძალა – დაახლოებით 59 080 ადამიანი [გასულ დღე-ღამეში +500]
  • ტანკი – 2 338 ერთეული [+13]
  • ჯავშანტექნიკა – 4 932 ერთეული [+23]
  • საარტილერიო სისტემა – 1 391 ერთეული [+6]
  • MLRS – 333 ერთეული [+2]
  • საზენიტო საბრძოლო სისტემა – 176 ერთეული [+1]
  • თვითმფრინავი – 264 ერთეული [+2]
  • ვერტმფრენი – 225 ერთეული [+1]
  • უპილოტო საფრენი აპარატის ოპერატიულ-ტაქტიკური დონე – 1 003 ერთეული [+8]
  • ფრთოსანი რაკეტა [ჩამოაგდეს] – 246 ერთეული [+0]
  • გემი/ნავი – 15 ერთეული [+0]
  • მანქანები და საწვავის ავზები – 3 768 ერთეული [+17]
  • სპეცტექნიკა – 131 ერთეული [+0]

უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.

უკრაინის სამხედრო დანაკარგებზე ინფორმაცია განაახლა რუსეთმაც.

რუსეთის თავდაცვის სამინისტროს მიერ დღეს გავრცელებული მონაცემებით, 24 თებერვლიდან 30 სექტემბრამდე პერიოდში სულ განადგურებულია უკრაინის:

  • 309 თვითმფრინავი
  • 155 ვერტმფრენი
  • 2 112 უპილოტო საფრენი აპარატი
  • 377 საზენიტო სარაკეტო სისტემა
  • 5 153 ტანკი და სხვა ჯავშანტექნიკა
  • 856 მრავალჯერადი სარაკეტო გამშვები
  • 3 440 საველე არტილერია და ნაღმტყორცნი
  • 5 988 სპეციალური სამხედრო მანქანა

რუსეთის თავდაცვა, ამ მონაცემებთან ერთად, უკრაინის არმიის ცოცხალი ძალის დანაკარგების საერთო რაოდენობის შესახებ სტატისტიკას არ აქვეყნებს.

ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.


რუსეთი უკრაინაში 24 თებერვალს გამთენიისას შეიჭრა და სრულმასშტაბიანი ომი დაიწყო.

ამავე თემაზე:

რუსეთი „აზოვსტალის“ მცველების მეთაურების ექსტრადირებაზე ალაპარაკდა

როგორ ვითარდება აჭარაში ბავშვთა ფეხბურთი და რამდენს ხარჯავენ ამისთვის

არასაკმარისი, არასტანდარტული და ხშირ შემთხვევაში უხარისხო საფეხბურთო მოედნები – აჭარაში მომუშავე ფეხბურთის მწვრთნელები მიიჩნევენ, რომ ეს ერთ-ერთი ფაქტორია, რომელიც აჭარის რეგიონში ბავშვთა ფეხბურთის განვითარებას უშლის ხელს.

დღეისათვის ბათუმში 7 კერძო საფეხბურთო სკოლაა, სადაც 6-12 წლამდე ასაკის ბავშვები ფეხბურთს სწავლობენ – გადიან წვრთნას და ვარჯიშობენ. ინტერესი ფეხბურთის მიმართ მზარდია. მწვრთნელთა თქმით, ბოლო ორ წელში ბათუმში ფეხბურთის შესწავლის ბუმია. მათივე თქმით, ბავშვების ფეხბურთისადმი ინტერესის ზრდას ხელი ბათუმში აშენებულმა ახალმა სტადიონმა და საფეხბურთო კლუბ „დინამო ბათუმის“ წარმატებამ შეუწყო.

გარდა კერძო სკოლებისა, არსებობს ბათუმის მერიის პროგრამა – „ეზოს ფეხბურთი“, სადაც 350 ბავშვი სწავლობს უფასოდ ფეხბურთს.

ამ ფონზე, ბათუმში არსებული ინფრასტრუქტურა – საფეხბურთო მინიმოედნები, ვერც ბავშვთა გაზრდილი ნაკადის მოთხოვნას აკმაყოფილებს და ვერც იმ საერთაშორისო სტანდარტებს, რომლებიც საფეხბურთო მოედანს უნდა ჰქონდეს.

მწვრთნელები, საფეხბურთო საქმიანობაში ჩართული ადამიანები ამბობენ, რომ ქართული ფეხბურთის მომავალი შეიძლება იყოს ბავშვთა ფეხბურთი, თუკი სათანადო პირობები ექნებათ ბავშვებს სავარჯიშოდ. მათივე თქმით, შედეგი ხანგრძლივი პერიოდის შემდეგ, დაახლოებით ათ წელიწადში დადგება, მაგრამ დადგება.

„ბათუმელები“ დაინტერესდა რამდენს ხარჯავს სახელმწიფო ბავშვთა ფეხბურთის განვითარებისთვის. ინფორმაცია ჩვენ აჭარის ხუთი მუნიციპალიტეტიდან და ბათუმიდან მოვაგროვეთ.

აღმოჩნდა, რომ სახელმწიფოს ხელშეწყობა ძირითადად გამოიხატება ბავშვი ფეხბურთელების მიერ სხვადასხვა ტურნირში მონაწილეობის დაფინანსებაში.

  • სახელმწიფოს წვლილი ბავშვთა ფეხბურთში

აჭარის ფეხბურთის ფედერაციას 74 ათასი ლარი აქვს წლიური ბიუჯეტი აჭარაში მოქმედი ბავშვთა საფეხბურთო გუნდებისთვის. ამ თანხას ფედერაცია ხარჯავს ტურნირებზე. ფედერაცია ტრანსპორტირებას უფინანსებს ბავშვთა საფეხბურთო გუნდებს სხვადასხვა ჩემპიონატზე წასასვლელად.

რაც შეეხება მუნიციპალიტეტებს. ყველაზე მეტ თანხას ბავშვთა ფეხბურთში ქედის მუნიციპალიტეტი ითვალისწინებს, ხოლო საერთოდ არაფერს არ ხარჯავს შუახევის მუნიციპალიტეტი.

  • ბათუმი

ბათუმის მერია 90 ათასი ლარით აფინანსებს ეზოს ფეხბურთს. ბათუმში მცხოვრებ ფეხბურთით დაინტერესებულ ბავშვებს პროგრამა საშუალებას აძლევს, უფასოდ ივარჯიშონ.

ამჟამად ეზოს ფეხბურთის სექციაში 350 ბავშვი ვარჯიშობს.

  • ქობულეთი

ქობულეთის მუნიციპალიტეტის როლი ბავშვთა ფეხბურთის სტიმულირებაში სასპორტო სკოლის დაფინანსებაში გამოიხატება. მუნიციპალიტეტი ყოველწლიურად 350 ათასი ლარით აფინანსებს სასპორტო სკოლას, სადაც სხვადასხვა სპორტულ წრესთან ერთად საფეხბურთო წრეცაა.

8-13 წლის ასაკის გოგონებსა და ბიჭებს შეუძლიათ სასპორტო სკოლაში უფასოდ ისწავლონ, 13 წლიდან კი საფეხბურთო კლუბ „შუქურაში“ აგრძელებენ ვარჯიშს.

7000 ლარით ფინანსდება ტურნირებში მონაწილეობა, ხოლო 2000 ლარია გამოყოფილი ფორმების შესაკერად.

  • ხელვაჩაური

ხელვაჩაურის მუნიციპალიტეტის მხარდაჭერა ბავშვთა ფეხბურთისადმი სამოყვარულო ფეხბურთით შემოიფარგლება.

2022 წლის აპრილ-მაისში სამოყვარულო ფეხბურთის ფარგლებში ჩატარდა სოფლებს შორის ტურნირი ფეხბურთში. ტურნირში 14 სოფლის 115 ფეხბურთელი მონაწილეობდა. ამისათვის 2 240 ლარი დაიხარჯა.

  • ქედა

აჭარის მუნიციპალიტეტებს შორის ქედა ყველაზე მეტ ფულს ხარჯავს ბავშვთა ფეხბურთის განვითარებისთვის. როგორც „ბათუმელებს“ ქედის მერიაში უთხრეს, ადგილობრივი ბიუჯეტიდან 80 000 ლარია გამოყოფილი, რომელიც სპორტული ინვენტარის შესაძენად, ღონისძიებებში მონაწილეობისთვის, ბავშვების ტრანსპორტირებასა და მწვრთნელების ხელფასებში იხარჯება.

ქედის მერიის მიერ მოწოდებული ინფორმაციის თანახმად, ქედის მუნიციპალიტეტში ბავშვთა ფეხბურთის განვითარების კუთხით შექმნილია ჯგუფი, რომელშიც 6-14 წლამდე 300 მოსწავლეა ჩართული.

ბავშვები ძირითადად ქედის ცენტრალურ მოედანზე ვარჯიშობენ. ხოლო იმ ბავშვების ტრანსპორტირებას, რომლებიც მუნიციპალიტეტის სხვადასხვა სოფლიდან არიან, ქედის სასპორტო სკოლა უზრუნველყოფს.

„სოფელ ვაიოში ფუნქციონირებს ბავშვთა ფეხბურთის სექცია. მომდევნო კვირიდან იგეგმება სოფელ ბაბუჩოღლებში, აწჰესსა და მერისში გახსნა. გოგონათა გუნდი აჭარის ბავშვთა ღონისძიებაში იღებდა მონაწილეობას, სადაც მესამე ადგილი მოიპოვეს,“ – გვითხრეს ქედის მერიაში.

  • შუახევი

შუახევის მუნიციპალიტეტი ბავშვთა ფეხბურთის განვითარებისთვის თანხას არ ხარჯავს. მუნიციპალიტეტში არც საფეხბურთო სკოლაა და არც გუნდი.

  • ხულო

53 000 ლარს ხარჯავს ხულოს მუნიციპალიტეტი ბავშვთა ფეხბურთის განვითარებისთვის. საფეხბურთო კლუბ „ხიხანთან“ ბავშვთა ფეხბურთის 4 ჯგუფი არსებობს. ბავშვებს ვარჯიშები დაბა ხულოსა და სოფელ ვაშლოვანის სპორტულ მოედნებზე უტარდებათ.

თანხა, რომელიც ადგილობრივი თვითმმართველობის ბიუჯეტიდან ბავშვთა ფეხბურთზეა გამოყოფილი, სპორტულ ინვენტარზე, ფორმებზე, ბურთებზე, მწვრთნელების ხელფასებს და სხვა საოფისე ხარჯებზე იხარჯება.

ხულოს მერიიდან მოწოდებული ინფორმაციის თანახმად, ჯანსაღი ცხოვრების წესის პოპულარიზაციის მიზნით, მუნიციპალიტეტის ერთ-ერთი პრიორიტეტია სხვადასხვა სოფელსა და საზაფხულო იალაღზე  სპორტული მოედნების მშენებლობა-რეაბილიტაცია. 2022 წლის ბოლოს 2 ახალი მოედნის მშენებლობა და 4 სპორტული მოედნის რეაბილიტაცია დასრულდება.

___

რა უნდა იცოდეთ, სანამ თქვენს შვილს ფეხბურთზე შეიყვანთ – რჩევები მწვრთნელებისგან

რუსეთი „აზოვსტალის“ მცველების მეთაურების ექსტრადირებაზე ალაპარაკდა

რუსეთს ტყვეობიდან გათავისუფლებული „აზოვსტალის“ დამცველების ექსტრადირება სურს. ამის შესახებ დღეს, 29 სექტემბერს, რუსეთის სახელმწიფო სათათბიროს ხელმძღვანელმა, ვიაჩესლავ ვოლოდინმა ისაუბრა.

ვოლოდინის განაცხადებით, აზოვსტალის დამცველებმა, რომლებიც რუსეთის ტყვეობაში იყვნენ და გათავისუფლების შემდეგ თურქეთში იმყოფებიან, პასუხი უნდა აგონ თავიანთ „დანაშაულებზე“.

მოლოდინს რუსული მედია ციტირებს.

აქამდე არსებული ინფორმაციით, „აზოვსტალის“ დამცველები პუტინის ნათლია, მილიარდერ ვიქტორ მედვედჩუკში გაცვალეს. თუმცა, ვოლოდინი ამტკიცებს, რომ ისინი გაათავისუფლეს, როგორც სამხედრო ტყვეები.

ვოლოდინმა დღეს პლენარულ სხდომაზე განაცხადა, რომ „ტერორისტული ორგანიზაციის წევრებმა პასუხი უნდა აგონ თავიანთ დანაშაულებზე“. შეგახსენებთ, რომ „აზოვის პოლკი“, რომელსაც დენის პროკოპენკო მეთაურობს, რუსეთში „ტერორისტულ“ ორგანიზაციად გამოაცხადეს.

„ის, რომ ისინი გაცვალეს და მესამე ქვეყნების ტერიტორიაზე იმყოფებიან, ეს მათ არ ათავისუფლებს პასუხისმგებლობისგან. ახლა საჭიროა იმაზე მუშაობა, ვინ იქნება პასუხისმგებელი მათ ექსტრადირებაზე“, – განაცხადა რუსეთის დუმის თავმჯდომარემ.

მან ასევე განაცხადა, რომ რუსეთს გაცილებით მეტი უკრაინელი ტყვე ჰყავს, ვიდრე რუსები არიან უკრაინის ტყვეობაში. მოლოდინმა თქვა, რომ მათი რაოდენობა ათჯერ მეტია.

ახლახან უკრაინის პრეზიდენტმა, ვოლოდიმირ ზელენსკიმაც განაცხადა, რომ რუსებს მართლაც უფრო მეტი სამხედრო ტყვე ჰყავთ, ვიდრე უკრაინას. თუმცა, უკრაინის შეიარაღებული ძალების კონტრშეტევის დაწყების შემდეგ, მათი რაოდენობა მნიშვნელოვნად გაიზარდა.

___

„აზოვსტალის“ დამცველები რუსეთს ტყვედ 2022 წლის მაისში ჩაბარდნენ. 200-ზე მეტი „აზოვსტალელი“ 21 სექტემბერს გვიან საღამოს გაათავისუფლა რუსეთმა ტყვეობიდან, მათ შორის იყო 5 საბრძოლო მეთაური:

  • „აზოვის პოლკის“ მეთაური დენის [რედისი] პროკოპენკო
  • „აზოვის პოლკის“ მეთაურის მოადგილე სვიატოსლავ [კალინა] პონომარი
  • „აზოვის პოლკის“ უფროსი ოფიცერი ოლეგ ხომენკო
  • საზღვაო ქვეითი ჯარის 36-ე ცალკეული ბრიგადის მეთაური სერგეი [ვოლინა] ვოლინსკი
  • მე-12 ნაციონალური გვარდიის ბრიგადის მეთაური დენის შლეგა

მეთაურები ომის დასრულებამდე თურქეთში იქნებიან პრეზიდენტ ერდოღანის პირადი მფარველობის ქვეშ.

უკრაინის სამხედრო დაზვერვის ხელმძღვანელმა, კირილ ბუდანოვმა დააზუსტა, რომ ისინი იცხოვრებენ კერძო სახლში. მან ხაზგასმით აღნიშნა, რომ ეს არის არა დაკავების ადგილი, არამედ საცხოვრებელი.

„არ ვიცით რა შენდება, ნოტარიუსად ვიქეცით“ – საკრებულოს წევრები კუნძულის მშენებლობაზე

„ჩვენ არანაირი ინფორმაცია არ გვაქვს. საკრებულოს წევრებისთვის არ გამართულა პატარა პრეზენტაციაც კი. არ ვიცით რა უნდა აშენდეს. საკრებულო არ არის ინფორმირებული, მხოლოდ და მხოლოდ სტატიების მეშვეობით ვიგებთ“ – განაცხადა ბათუმის საკრებულოს წევრმა კაკი გვიანიძემ საკრებულოს სხდომაზე, სადაც ბათუმის მერიამ დასამტკიცებლად შპს „ამბასადორი ბათუმი აილენდისთვის“ მიწის ნაკვეთის გადაცემის საკითხი გამოიტანა კენჭისყრაზე.

დღეს, 29 სექტემბერს, კომპანიას, რომელიც ბათუმში ერთი ხელოვნური კუნძულისა და ორი ნახევარკუნძულის მშენებლობას გეგმავს, მიწის ნაკვეთი გადასცეს სიმბოლურ ფასად, ხუთი წლის ვადით.

აკაკი გვიანიძე საკრებულოს წევრია ყოფილი პრემიერის, გიორგი გახარიას პარტიიდან „საქართველოსთვის“. მას „ლელოს“ წევრი, ვაჟა დარჩიაც დაეთანხმა.

„ამ პროექტის მნიშვნელობა ჩვენ არ ვიცით. მართლა გულწრფელად გვაინტერესებს და ხალხს ვესაუბრებოდეთ, რომ ეს არის მნიშვნელოვანი პროექტი, არასერიოზულია. არამარტო რეგიონული პროექტიაო ვამბობთ, მაგრამ საკრებულოს წევრი ვარ და ერთი საჯარო განხილვა არ მინახავს ამ პროექტზე, მინახავს მხოლოდ ჩვენი მოქალაქეების გაზიარებული პოსტები – რა დროს პალმის კუნძულიაო“ – განაცხადა მან. 

ვაჟა დარჩიას კითხვა ჰქონდა იმასთან დაკავშირებითაც, რამდენად საკმარისია გაჟღერებული დაფინანსება, 100 მილიონი, კუნძულის მშენებლობისთვის. საკრებულოს თავმჯდომარემ მას განუმარტა, რომ თუ ეს თანხა არ იქნება საკმარისი, დაამატებენ.

აკაკი გვიანიძემ კუნძულის მშენებლობის ადგილზე დაგროვილ ნავთობთან დაკავშირებული კითხვებიც გააჟღერა და თან განმარტა, რომ ამ კითხვებს ისეთი სპეციალისტები სვამენ, რომლებიც „ოცნების“ ხელისუფლებაში მუშაობდნენ მაღალ თანამდებობებზე გარემოს დაცვის მიმართულებით.

„პრეზენტაციაზე კაფსულა ჩააგდეს და იქ არ მომხდარა პროექტის განხილვა. ვიცით, რომ პროექტი გათავისუფლდა გარემოზე ზემოქმედების კვლევის მომზადების ვალდებულებისგან. მხოლოდ და მხოლოდ სკრინინგის ანგარიში, 30-გვერდიანი დოკუმენტია წარმოდგენილი, რაც ვერ იძლევა ამომწურავ ინფორმაციას. შესაბამისად, ასეთი პროექტების მხარდაჭერას როცა სთხოვთ საკრებულოს, არასწორია. ჩემი აზრით ეს საკითხი უნდა გადავდოთ“. 

„ოცნების“ ფრაქციის თავმჯდომარე, თენგიზ აფხაზავა კოლეგებს დაეთანხმა. „კარგი იქნებოდა კომპანიის წარმომადგენლებს გაემართათ პროექტის პრეზენტაცია, კითხვითი ნიშნები მოიხსნებოდაო“- თქვა მან.

თენგიზ აფხაზავამ ასევე განმარტა, რომ მას შემდეგ რაც კომისიის სხდომაზე კოლეგის კითხვები მოისმინა, დაინტერესდა და ეს გაარკვია:

„გერმანელი და ჰოლანდიელი ექსპერტების დასკვნები დევს უკვე, კომპანიამ შეუკვეთა, საკმაოდ დიდი თანხაა გადახდილი ამ კვლევებში, რომლებიც ჩატარებულია, რაც აბსოლუტურად გამორიცხავს იმას, რაც თქვენ ბრძანეთ“ [იგულისხმება ნავთობის შესაძლო გაჟონვა].

„ჩვენ არ ვიცით ეს მართალია თუ არა, ამიტომ გაგვიქარწყლეთ ეჭვები, გამოაქვეყნეთ ინფორმაცია“ – უპასუხა მას აკაკი გვიანიძემ.

თენგიზ აფხაზავამ კი განაცხადა, რომ არ დაასახელებს, მაგრამ კვლევა იმ სპეციალისტზე უფრო ძლიერმა სპეციალისტებმა ჩაატარეს, ვინც კითხვებს სვამს ამ საკითხზე.

ბათუმის საკრებულოს სხდომა

რამდენიმეწუთიანი კამათის შემდეგ საკრებულოს წევრები დაინტერესდნენ, ხომ არ აქვს კომპანიას უკვე ათვისებული ეს ტერიტორია და საკრებულო ისევ ნოტარიუსის ამპლუაში ხომ არ მონაწილეობს ამ ამბავში. „მართლა ნოტარიუსები ვართ“ – თქვა მსჯელობის შემდეგ ვაჟა დარჩიამ.

საკრებულოს ოპოზიციას ასევე აინტერესებდა, ხომ არ იციან მერიაში, როგორ მდგომარეობაშია გზა, რომლითაც კუნძულისთვის დიდი რაოდენობით ქვა უნდა შემოიტანონ. ასევე, კიდევ ხომ არ გამწვავდება ამ ქუჩაზე საცობით გამოწვეული პრობლემა.

კოლეგების კითხვებმა საკრებულოს წვერს „ოცნებიდან“, დავით მახარაძეს, ბიძინა ივანიშვილის დენდროლოგიური პარკი გაახსენა:

„ზუსტად ასეთი აჟიოტაჟი გამოიწვია, როდესაც შენდებოდა დენდროლოგიური პარკი. შემდეგ ერთმანეთს ვერ ასწრებდნენ იქ რიგში დგომას. ამიტომ მიესალმეთ მშენებლობას. დარწმუნებული ვარ, ყველას გნახავთ იქ, რესტორნებში და კაფეებში.“

საკითხის განხილვაში „ნაციონალური მოძრაობის“ წევრი რეზო ხარაზიც ჩაერთო:

„კობალაძის ქუჩას წელიწად-ნახევარია ვაკეთებთ, ბაგრატიონის ქუჩას – ექვსი წელი, ხულო-ზარზმის გზას ათი წელია აკეთებს ქართული ოცნება და ახლა ეს კუნძული თუ გააკეთეთ, მაგარი ამბავი იქნება, რაღაც ძალიან მეეჭვება“.

მისმა გამოსვლამ საკრებულოს წევრი „ოცნებიდან“ მინდია გოგუაძე გააღიზიანა. „ექვსი წელი ნამდვილად არ შენდება ბაგრატიონის ქუჩა“ – შენიშნა მან.

„თქვი, რამდენი წელი შენდება?- სამი წელი ხომ ნამდვილად შენდება?“ – ჰკითხა მას რეზო ხარაზმა.

„თუ სამია, სამი თქვი“ – უპასუხა მას მინდია გოგუაძემ.

ამ კამათის შემდეგ რეზო ხარაზს კიდევ რამდენიმე დაუსრულებელი პროექტი გაახსენდა: „მწვანე ქალაქი “ ქობულეთში, ბათუმის „ნაგავსაყრელი“ და ნაპირსამაგრი.

საბოლოოდ „ოცნებამ“ მხარი დაუჭირა „ამბასადორი ბათუმი აილენდისთვის“ მიწის ნაკვეთის გადაცემას, ოპოზიციამ კი – არა.

ბათუმის საკრებულოს თავმჯდომარის მოადგილემ, ნატალია ზოიძემ კი ყველაფერი ასე შეაჯამა:

„კოლეგების უკმაყოფილება ბუნებრივია, მაგრამ მაინც ვერ დავეთანხმები მოსაზრებას, რომ ინფორმაცია გაჟღერებული არ ყოფილა საკრებულოს წევრებთან“.

რუსეთში უკვე 100 000-ზე მეტი სამხედროა მობილიზებული – უკრაინის გენშტაბი

21 სექტემბრის, ანუ „ნაწილობრივი მობილიზაციის“ გამოცხადების შემდეგ, რუსეთის ჯარში უკვე 100 ათასზე მეტი ადამიანია გაწვეული. რუსეთში აქტიურად მიმდინარეობს მობილიზაციის პროცესი.

ამის შესახებ უკრაინის გენერალური შტაბის ოპერატიული სამმართველოს უფროსის მოადგილემ ბრიფინგზე ისაუბრა.

„რუსეთში, ნაწილობრივი მობილიზაციის გამოცხადების შემდეგ, აქტიურად გრძელდება სამხედრო გამოცდილების მქონე პირების გაწვევა. ამჟამად გამოცხადებული 300 000 ადამიანიდან 100 000-ზე მეტი უკვე გამოძახებულია. გვესმის, რომ გამოცხადებული 300 000 საბოლოო არ არის. დიდი ალბათობით, მობილიზებულთა რაოდენობა გაცილებით მეტი იქნება“, – განაცხადა ალექსეი გრომოვმა.

„ნაწილობრივი მობილიზაციის“ გამოცხადების შემდეგ, რუსეთის თავდაცვის მინისტრმა, სერგეი შოიგუმ განაცხადა, რომ ამ ეტაპზე გეგმაში აქვთ 300 000 პირის მობილიზაცია.

გრომოვი დარწმუნებულია, რომ მობილიზებულთა რაოდენობა გაცილებით მეტი იქნება. მანამდე მედია წერდა, რომ რუსეთი 1,2 მილიონ ჯარისკაცის მობილიზაციას გეგმავს.

__

„ნაწილობრივი მობილიზაცია“ რუსეთში პრეზიდენტმა პუტინმა 21 სექტემბერს გამოაცხადა. რუსული უფლებადამცველი ორგანიზაცია „პირველი დეპარტამენტი“ აცხადებს, რომ მობილიზებული რუსები ყოველგვარი მომზადების გარეშე ეგრევე ფრონტზე მიჰყავთ, „ისინი არ მონაწილეობენ წვრთნებში, არ გადიან სამედიცინო კომისიას და არ გადიან არანაირი მომზადებას“.

მობილიზაციის გამოცხადების შემდეგ რუსეთის ქალაქებსა და რაიონებში საპროტესტო აქციები დაიწყო, ათობით ათასმა მოქალაქემ კი ქვეყანა დატოვა. მეზობელი სახელმწიფოების საზღვრებთან კილომეტრიანი რიგები დგას. გამოცემა Новая газета.Европа წყაროებზე დაყრდნობით წერს, რომ რუსეთი უკვე დატოვა 261 ათასმა კაცმა.

ეს ინფორმაცია ხელისუფლებას ოფიციალურად არ დაუდასტურებია.

დიდი ბრიტანეთის დაზვერვის შეფასებით, იმ ადამიანების რიცხვი, ვინც მობილიზაციისგან თავის არიდების მიზნით რუსეთი დატოვა, სავარაუდოდ, უკვე აღემატება რუსეთის ძალების იმ რაოდენობას, რომელიც კრემლმა 2022 წლის თებერვალში უკრაინაში სამხედრო აგრესიის დასაწყებად გადაისროლა.

უწყება მიუთითებს, რომ მათ შორის, ვინც რუსეთის დატოვებას ცდილობს, არიან შედარებით უზრუნველყოფილი და განათლებული ადამიანები.

„კეთილი იყოს თქვენი დაბრუნება რუსეთში!“ – მედვედევი ე.წ. „რეფერენდუმის“ შედეგებზე

რუსეთის უშიშროების საბჭოს მდივნის მოადგილე, დიმიტრი მედვედევი ტელეგრამზე უკრაინის ოკუპირებულ ტერიტორიებზე გამართულ ე.წ. „რეფერენდუმებს“ ეხმიანება და რუსეთის მიერ ოკუპირებულ, განადგურებულ რეგიონებში მოსახლეობას „სახლში დაბრუნებას“ ულოცავს.

„რეფერენდუმი დასრულდა. შედეგები აშკარაა.

კეთილი იყოს თქვენი დაბრუნება სახლში, რუსეთში!“ – წერს მედვედევი.

დონეცკისა და ლუგანსკის ე.წ. სახალხო რესპუბლიკებში, ასევე, ზაპოროჟიესა და ხერსონის ოლქების ოკუპირებულ ნაწილში რუსეთთან შეერთების საკითხზე უკანონო რეფერენდუმი 23-27 სექტემბერს დასრულდა.

ოკუპაციის პირობებში ჩატარებული ფსევდორეფერენდუმის შედეგების თანახმად, დონეცკის ოლქში 99,23%-მა ხმა მისცა რუსეთის ფედერაციაში გაწევრიანებას, ლუგანსკის ოლქში — 98,42%-მა, ხერსონის ოლქში — 87,05%, ხოლო ზაპოროჟიის ოლქში — 93,11%-მა.

რუსეთის პრეზიდენტი ვლადიმერ პუტინი 30 სექტემბერს მოაწერს ხელს უკრაინის ოკუპირებული ტერიტორიების რუსეთის შემადგენლობაში შესვლის შესახებ.

______________
ფოტო: EPA-EFE/CHRISTOPHE PETIT TESSON

უკრაინამ რუსეთისგან უფრო მეტი იარაღი „მიიღო“, ვიდრე პარტნიორებისგან – ფორბსი

Forbes-ის ინფორმაციით, სრულმასშტაბიანი ომის დაწყებიდან დღემდე უკრაინამ, მხოლოდ დოკუმენტურად დადასტურებული მონაცემებით, ნადავლის სახით რუსეთისგან „მიიღო“ თითქმის 400 ტანკი, 700 ერთეული ჯავშანტექნიკა და 170 საარტილერიო სისტემა. ეს გაცილებით მეტია, ვიდრე პარტნიორი ქვეყნების მიერ მიწოდებული დახმარება.

გამოცემა წერს, რომ ხარკოვში უკრაინელთა კონტრშეტევის შემდეგ სოციალურ ქსელებში გაჩნდა უამრავი ვიდეო, რომლებზეც მიტოვებული რუსული ტექნიკა, საბრძოლო მასალებისა და იარაღის საწყობები ჩანდა. იქ აღმოჩენილი ტექნიკისა და იარაღის რაოდენობის გამო იზიუმის ტყეებს „შერვუდის ტყეები“ დაარქვეს, მიტოვებულ რუსულ საწყობებს კუპიანსკსა და ბალაკლეაში კი – „ალადინის გამოქვაბულები.“

„კეთილი ნების“ ნიშნად და ნაჩქარევი „გადაჯგუფების“ შედეგად უკრაინისთვის „გადაცემული“ ტანკების, ჯავშანმანქანებისა და საარტილერიო სისტემების რაოდენობით რუსეთმა შეერთებულ შტატებს, პოლონეთსა და დიდ ბრიტანეთს გადაუსწრო.

„ათობით ერთეული ტექნიკა, რომელიც რუსებმა უკრაინაში მიატოვეს, მარტივად შეიძლება შეკეთდეს, ზოგიერთ მათგანს უმნიშვნელო ტექნიკური ხარვეზი აქვს. საბრძოლო მასალებისა და იარაღის ნაცვლად, რუსები ხშირად ნაძარცვი ტექნიკისა და ფერადი მეტალების წაღებას ამჯობინებდნენ, იარაღს კი საჩუქრად უკრაინის არმიას უტოვებდნენ,“ – წერს Forbes-ი.

საიტ Oryx-ის თანახმად, მხოლოდ ხარკოვში და მხოლოდ ვიდეო და ფოტომასალებზე ასახულის მტკიცებულებებით, უკრაინის შეიარაღებულმა ძალებმა ნადავლის სახით 97 ტანკი, 159 საბრძოლო ჯავშანმანქანა და 55 საარტილერიო სისტემა მიიღო. ეს შეიარაღება სრულიად საკმარისია ერთი სატანკო ბრიგადის ან ორი მექანიზებული ბრიგადის ფორმირებისთვის.

„თუმცა ცხადია, რომ ყველა ნადავლი კამერის ობიექტივში ვერ მოხვდებოდა. ამიტომაც მტრის ტექნიკის რეალური რაოდენობა, სავარაუდოდ, უფრო მეტი შეიძლება იყოს,“ – აღნიშნავს გამოცემა და დასძენს, რომ საერთო ჯამში, მხოლოდ ხარკოვის კონტრშეტევის შედეგად რუსეთმა უკრაინას 400 მილიონი დოლარის ტექნიკა და იარაღი „აჩუქა“.

ტანკები

პროექტ Oryx-ის თანახმად, ომის დაწყებიდან დღემდე უკრაინის არმიამ რუსეთის 387 ტანკი ჩაიგდო ხელში. რუსეთის შემდეგ ტანკების ყველაზე დიდი მიმწოდებელი უკრაინისთვის პოლონეთია, რომელმაც უკრაინის შეიარაღებულ ძალებს 300-მდე ტანკი გადასცა.

უკრაინას თავისი საბჭოთა ტანკები მისცა ჩეხეთმაც – 70 ერთეული. 8 ტანკით დაეხმარა ქვეყანას ჩრდილოეთ მაკედონია.

საერთო ჯამში, უკრაინამ რუსეთისა და პარტნიორებისგან დაახლოებით 750 ტანკი მიიღო. გამოცემა წერს, რომ ეს დაახლოებით იმდენივეა, რაც უკრაინის შეიარაღებულ ძალებს ომის დასაწყისში ჰქონდათ. The Military Balance-ის ინფორმაციით, უკრაინის შეიარაღებაში 2021 წელს 858 ტანკი შედიოდა.

ჯავშანტექნიკა:

ომის 7 თვეში უკრაინის არმიამ ბრძოლაში დაახლოებით 690 ერთეული ჯავშანტექნიკა მოიპოვა. ეს იმაზე მეტია, რაც უკრაინამ შეერთებული შტატებისგან მიიღო.

ოფიციალური ინფორმაციით, აშშ-მ უკრაინას 200 ერთეული ჯავშანტრანსპორტიორი M113, 100 სამედიცინო ჯავშანმანქანა, 40 ჯავშანმანქანა M1224 MaxxPro და რამდენიმე ასეული HUAMWEE გადასცა.

თურქეთთან გაფორმებული კონტრაქტით უკრაინა თურქეთისგან 200 ჯავშანმანქანა Kirpi-ს ყიდულობს. მათი ნაწილი უკვე უკრაინაშია.

136 ჯავშანმანქანა M113 უკრაინას დანიამ, ავსტრალიამ, ლიეტუვამ, ესპანეთმა და პორტუგალიამ გადასცეს.

დამატებით, ავსტრალიამ და დიდმა ბრიტანეთმა უკრაინას გადასცეს 200 სახეობის სხვადასხვა ჯავშანმანქანა. კიდევ 200 საბჭოთა ჯავშანტექნიკა კი – აღმოსავლეთ ევროპის ქვეყნებმა.

საბოლოოდ, უკრაინამ მიიღო და ნადავლის სახით მოიპოვა 2 300 ერთეული ჯავშანტექნიკა. ესეც დაახლოებით იმდენივეა, რაც ომის დასაწყისში უკრაინის შეიარაღებულ ძალებს ჰქონდა.

არტილერია:

რუსეთმა არტილერიის რაოდენობაშიც გადაასწრო შეერთებულ შტატებს – 167 საარტილერიო სისტემა დატოვა უკრაინის ტერიტორიაზე. მათი მესამედი – უკრაინელთა კონტრშეტევის ბოლო რამდენიმე კვირაში.

დასავლელმა პარტნიორებმა უკრაინას დაახლოებით 500 ერთეული არტილერია გადასცეს. ესაა როგორც საბჭოთა ტექნიკა, ისე თანამედროვე სისტემები.

როგორც Forbes-ი წერს, ამჟამად, ბრძოლის ველზე რუსეთის წინააღმდეგ დაახლოებით 350 ერთეული NATO-ს კალიბრის არტილერია გამოიყენება. უცნობია, საბჭოთა სისტემების ზუსტი რაოდენობა.

ომის დასაწყისში უკრაინას შეიარაღებაში დაახლოებით 1 540 საარტილერიო სისტემა ჰქონდა.

„ვიდრე დასავლური ბიუროკრატიის გამო ხშირად თვეები სჭირდება იმას, რომ უკრაინამ მძიმე შეიარაღების თანამედროვე სისტემები მიიღოს, რუსეთის არმია გულუხვად ტოვებს უკრაინის ტყეებსა და სტეპებში ათობით და ასობით ერთულ სამხედრო ტექნიკას. მართალია, ეს ძველი და არათანამედროვე ტექნიკაა, თუმცა ეს მაინც უკეთესია, ვიდრე არაფერი“ – წერს გამოცემა.

„ბევრი სკოლა ისეთ დღეშია, პირუტყვი არ შევა“ – რას არ ხედავს მთავრობა

სამოქალაქო პლატფორმა „სალამის“ წევრებმა სამ მუნიციპალიტეტში: მარნეულში, ბოლნისსა და დმანისში ავარიული სკოლები აღნუსხეს და ფოტომასალა საქართველოს პარლამენტის წინ გამოფინეს.

„ბათუმელები“ ესაუბრა „სალამის“ერთ-ერთ აქტივისტს, ბენიამინ კასიმოღლუს. მისი თქმით, აქტივისტები შეეცადნენ ამ გამოფენით საზოგადოებისთვის თვალსაჩინო გაეხადათ ის მდგომარეობა, რაც ამ მუნიციპალიტეტებში არსებულ საჯარო სკოლებშია.

„დაზიანებული, გაბზარული, ძველი, იატაკებიდან ქვეწარმავლები შეიძლება ამოვიდეს. ბევრ სკოლაში ისეთი მდგომარეობაა, პირუტყვი რომ არ შევა. ცოცხალი თუ გამოხვალ იქიდან, ესეც კარგია“ – გვეუბნება ბენიამინი.

სკოლა სოფელ ყულარში. მარნეული

მისი თქმით, სკოლის დირექტორებთან კომუნიკაცია რთულია, რადგან ისინი ერიდებიან პრობლემებზე ღიად საუბარს.

„არ საუბრობენ, იმიტომ, რომ არჩევნების დროს პოლიტიკური დაკვეთების შემსრულებლები არიან. არ უნდათ შემდეგ რესურსცენტრიდან, მერიიდან ან პარტიიდან დაურეკონ და უთხრან – „რატომ შეუშვი“, „რატომ გადააღებინე“ და ასე შემდეგ.

არც თავიანთ უფლებამოსილებებში არიან დამოუკიდებელნი, ამიტომ ეშინიათ, რომ ამის გამო სამსახურიდან დაითხოვენ“ – ამბობს ბენიამინი.

სკოლის ფანჯარა, სოფელ ხუტორ-ლეჟბადინში

ის იხსენებს შემთხვევას, როცა ერთ-ერთი სოფლის სკოლიდან გამოაძევეს და ფოტოების გადაღების უფლება არ მისცეს.

„ეს შემთხვევა უფრო ადრე იყო, მაშინაც ვცდილობდით, რომ აგვესახა ფოტოებზე სკოლებში არსებული მდგომარეობა, თუმცა ერთ-ერთ სოფელში ქვების სროლით გამოგვაგდეს სკოლიდან. ნუ იღებთო, – გვითხრეს.

მშობლები ჩვენთან საუბარში აპროტესტებენ სკოლებში არსებულ მდგომარეობას, თუმცა საჯაროდ მაინც ერიდებიან თქმას“ – გვეუბნება ბენიამინი.

სკოლა სოფელ ახკერპში

საქართველოს განათლების მინისტრმა მიხეილ ჩხენკელმა, ასევე პრემიერმა ირაკლი ღარიბაშვილმაც რამდენჯერ თქვეს, რომ მთავრობა 1 მლრდ ლარის ღირებულების პროექტს იწყებს, რომელიც საქართველოში 800 სკოლის მშენებლობა-რეაბილიტაციას ითვალისწინებს.

„პროექტის პირველი ეტაპი მიმდინარე წლის სექტემბერ-ოქტომბერში დაიწყება და ტენდერი 80 ახალი სკოლის მშენებლობასა და 320 სკოლის რეაბილიტაციაზე გამოცხადდება“- აცხადებს განათლების სამინისტრო.

ბენიამინ კასიმოღლუს ვკითხეთ, ხომ არ აქვთ ინფორმაცია იმის შესახებ, ამ პროექტში ხომ არის რომელიმე სკოლა ჩართული, იმ სკოლებიდან, რომელიც მათ აღბეჭდეს ფოტოებზე. მისი თქმით, ამ ინფორმაციას „სალამი“ არ ფლობს.

სარეაბილიტაციო სკოლების ფოტოები აქტივისტებმა პარლამენტის წინ გამოფინეს

„ამაზე არ გვაქვს ინფორმაცია, თუმცა ჩვენ ადრე გავაკეთეთ ერთგვარი კომიქსები მთავრობის წევრების საჯარო გამოსვლებსა თუ დაპირებებზე, რომელიც არ ასახავს რეალობას.

მაგალითად, მთავრობა ამბობს, რომ ქართული ენის სწავლება ეთნიკურად დასახლებულ რეგიონებში პრიორიტეტია, თუმცა შედეგი არის ნული, სკოლებს ავაშენებთო და შედეგი – ნული. ვნახეთ განათლების ეროვნული სტრატეგია და იქ არც სამწლიან, არც ხუთწლიან და ათწლიან გეგმაში არსად არ არის ამ საკითხებზე საუბარი.

ათასში ერთი აშენდება და ამას იყენებენ საჩვენებლად. მარნეულში ჯანდარის სკოლა გარემონტდა, იორმუღანლოში 2 სკოლა ააშენეს, გარედან მშვენიერია, შიგნით შედიხარ და არაფერი არ არის. მერხები არ არის, საპირფარეშოები ცუდ მდგომარეობაშია.

სოფელ მამეიში სკოლა ორი წელია გაუქმებულია და ტუალეტი სკოლის გაუქმების შემდეგ ააშენეს და 36 ათასი ლარი დახარჯეს. რაში – არ ვიცი“ – ამბობს ბენიამინი.

მისი თქმით, პარლამენტის წინ გამოფენილი ავარიული სკოლის ფოტოებით პარლამენტის არცერთი წევრი არ დაინტერესებულა, მათ შორის, არც განათლების კომიტეტის წევრები.

„სალამის“ წევრებმა იმ სკოლის ამსახველი ფოტოებიც მოგვაწოდეს, სადაც წლების განმავლობაში მიმდინარეობდა სასწავლო პროცესი და მხოლოდ ახლახან მოხერხდა ბავშვების ალტერნატიულ სკოლაში გადაყვანა.

ასეთია, მაგალითად, სოფელ კიროვკაში დაწყებითი საფეხურის სკოლა:

ყოფილი სკოლა სოფელ კიროვკაში (მამეი). ორი წელია რაც აქედან ბავშვები მეზობელი სოფლის სკოლაში გადაიყვანეს.
სოფელ საფარლოს სკოლა/დმანისი. ამჟამად სასწავლო პროცესი არ მიმდინარეობს.

„სალამის“ წევრები სკოლების გარდა აღნიშნულ მუნიციპალიტეტებში საბავშვო ბაღების პრობლემაზეც საუბრობენ.

მათი თქმით, მაგალითად, მთელ დმანისში 9 საბავშვო ბაღია, ამავე მუნიციპალიტეტის აზერბაიჯანულენოვან სოფლებში კი – არც ერთი.

„ვინმე ფეხზე იდგეს, არ არის მისაღები“ – როგორ ახსნა ჯინჭარაძემ სხდომაზე მოქალაქეების არ შეშვება

„სხდომათა დარბაზში რომ ვინმე ფეხზე იდგეს, ეს ჩემთვისაც არ არის მისაღები და მოქალაქისთვის, 5 საათის განმავლობაში გველოდებოდეს მოქალაქე ფეხზე დამდგარი,“ – ამ არგუმენტით სცადა ბათუმის საკრებულოს თავმჯდომარემ იმის გამართლება, რომ მოქალაქეები ბათუმის საკრებულოს სხდომებს ვეღარ ესწრებიან.

„…როგორ შეკითხვას მისვამთ ახლა იცით, ჩემზე უკეთესად ხვდებით, აქ რამდენი სკამის განთავსება შეიძლება,“ – გვიპასუხა რამაზ ჯინჭარაძემ, რომელსაც შევახსენთ, რომ დღეს 4 მოქალაქეს სურდა დასწრებოდა საკრებულოს სხდომას.

„რა საშუალებასაც მოგვცემს აღნიშნული დარბაზი, იმდენ სკამს განვათავსებთ… მაქსიმალურად გამოვიყენებთ,“ – გვიპასუხა რამაზ ჯინჭარაძემ, თუმცა ვერ დაგვიკონკრეტა, რატომ არ დაამატეს სკამები მოქალაქეებისთვის, თუკი დარბაზში ამის შესაძლებლობა არსებობს და რატომ არ განიხილავს საკრებულო სხვა ვერსიას, რაც ჩართულობის საშუალებას გააჩენს.

მოქალაქეებს საკრებულოს სხდომებზე დასწრების უფლებას თვითმმართველობის კოდექსი აძლევს.

პირდაპირ არ თქვა, თუმცა რამაზ ჯინჭარაძესთან გასაუბრებით ასევე გამოჩნდა, რა გამოსავალს ხედავს ბათუმის საკრებულოს თავმჯდომარე: „ყველასთვის ხელმისაწვდომია ჩვენი სხდომის ტრანსლაციის ყურება“, – აღნიშნა რამაზ ჯინჭარაძემ.

მოქალაქეების სხდომაზე დაშვება პრობლემა გახდა მას შემდეგ, როცა საკრებულოს წევრთა რაოდენობა 25-დან 35-მდე გაიზარდა. ამ სიახლის მიუხედავად საკრებულოს სხდომები ისევ იმ დარბაზში ტარდება, სადაც წინა მოწვევის საკრებულო იკრიბებოდა. შესაბამისად, დარბაზში რკალისებურად განლაგებულ მაგიდებსა და სკამებს კიდევ ერთი მწკრივი – მაგიდები და სკამები დაემატება. აქ მოქალაქეებისთვის განკუთვნილი ადგილები აღარ არის.

მობილიზაციის გამოცხადების შემდეგ პუტინის რეიტინგი იკლებს – კვლევა

მობილიზაციის გამოცხადების შემდეგ რუსეთის პრეზიდენტის რეიტინგი შემცირდა. მხოლოდ ბოლო ერთ თვეში პუტინმა 6% დაკარგა.

კითხვაზე: მოგწონთ თუ არა ვლადიმერ პუტინის საქმიანობა? გამოკითხულთა 77% პასუხობს, რომ კი, ხოლო 21 % – არა. ასეთია რუსული ორგანიზაცია „ლევადა-ცენტრის“ საზოგადოებრივი აზრის კვლევის შედეგები.

იმავე შეკითხვაზე ჯერ კიდევ აგვისტოში 83-მა პროცენტმა უპასუხა, რომ მოსწონდა რუსეთის პრეზიდენტის საქმიანობა, უარყოფითად განწყობილი კი 15% იყო. ზუსტად მსგავსი მაჩვენებელი იყო ივლისის, ივნისისა და მაისის გამოკითხვებში.

„ლევადა-ცენტრის“ მონაცემები აჩვენებს, რომ პუტინის რეიტინგი 2022 წლის თებერვლიდან, უკრაინაში ომის დაწყების შემდეგ, გაიზარდა და ის რამდენიმე თვის განმავლობაში არ შეცვლილა, თუმცა სექტემბრის ბოლოს, „ნაწილობრივი მობილიზაციის“ გამოცხადების შემდეგ, დაიკლო.

პუტინისადმი ნდობა 40%-ია, რაც აგვისტოსთან შედარებით, ასევე 4%-ით ნაკლებია.

ბოლო გამოკითხვით, შემცირებულია ნდობა რუსეთის სხვა სახელმწიფო ინსტიტუტების მიმართაც. გასულ თვესთან შედარებით, გამოკითხულთა 7%-ით ნაკლები მიიჩნევს, რომ ქვეყანა სწორი მიმართულებით ვითარდება.

„ლევადა-ცენტრმა“ 18 წელს გადაცილებული 1 631 მოქალაქე 137 დასახლებულ პუნქტში 22-28 სექტემბრის პერიოდში გამოჰკითხა. კვლევა პირდაპირი ინტერვიუების სახით ჩატარდა.

„ნაწილობრივი მობილიზაცია“ რუსეთში პრეზიდენტმა პუტინმა 21 სექტემბერს გამოაცხადა. მისი თქმით, ბრძანება შეეხება მხოლოდ მას, ვინც რეზერვშია და სამხედრო გამოცდილება აქვს. იმავე დღეს თავდაცვის მინისტრმა სერგეი შოიგუმ დააზუსტა, რომ იგეგმება 300 000 კაცის გაწვევა.

მობილიზაციის გამოცხადების შემდეგ რუსეთის ქალაქებსა და რაიონებში საპროტესტო აქციები დაიწყო, ათობით ათასმა მოქალაქემ კი ქვეყანა დატოვა.  გამოცემა Новая газета.Европа წყაროებზე დაყრდნობით წერს, რომ რუსეთი უკვე დატოვა 261 ათასმა კაცმა.

მობილიზაციის გამოცხადებამდე ერთი დღით ადრე რუსეთის დუმამ მიიღო კანონი, რომლის თანახმადაც დეზერტირობისა და ტყვედ ჩაბარებისთვის სასჯელი გამკაცრდა.

ომი ლუგანსკის ან დონეცკის აღებიდან 3 თვეში დამთავრდება – პოდოლიაკი

როდის და რა შემთხვევაში დამთავრდება ომი უკრაინაში – თავის შეფასებას ვიდეომიმართვის სახით აქვეყნებს უკრაინის პრეზიდენტის მრჩეველი მიხაილო პოდოლიაკი.

ის ასახელებს ორ მთავარ ფაქტორს, რომლებიც ომის დასასრულებლად გადამწყვეტი იქნება.

„პირველი – ეს ტექნიკის რაოდენობაა, ჭურვების რაოდენობა. მეორე – ამ ორიდან რომელიმე ქალაქის დაცემა – ლუგანსკის ან დონეცკის,“ – ამბობს პოდოლიაკი და დასძენს, რომ თუკი უკრაინა ლუგანსკს ან დონეცკს დაიბრუნებს, ამის შემდეგ, ომის დასრულებას მხოლოდ რამდენიმე თვე დასჭირდება.

„ეს საბოლოოდ მოახდენს ყველაფრის პარალიზებას, რაც რუსეთის ფედერაციას აქვს, ისედაც ძლივს უჭირავთ და ეს საბოლოოდ ჩამოშლის. ლუგანსკის ან დონეცკის დაცემის შემდეგ, 3 თვე, სამთვე-ნახევარი და ომი დამთავრდება უკრაინის მთელი ტერიტორიის სრულად გათავისუფლებით, 1991 წელს საერთაშორისოდ აღიარებულ საზღვრებში,“ – აცხადებს ზელენსკის მრჩეველი.

უკრაინის ხელისუფლებას დონბასის გათავისუფლების ვადები ჯერჯერობით ოფიციალურად არ დაუსახელებია.

დიდი ბრიტანეთის დაზვერვის ინფორმაციით, ბოლო დღეებში უკრაინამ ქვეყნის ჩრდილო-აღმოსავლეთ ნაწილში კონტრშეტევა გააქტიურა და მისმა ძალებმა ნელა, მაგრამ მაინც დაიწყეს წინსვლა სულ მცირე ორი მიმართულებით – მდინარეების, ოსკილისა და სივერსკი დონეცის აღმოსავლეთ სანაპიროებზე.

„რუსეთი ამჯერად უფრო ძლიერ თავდაცვის ხაზს ქმნის, ვიდრე მანამდე, სავარაუდოდ, იმიტომ, რომ უკრაინელთა შეტევა პირდაპირ ემუქრებოდა ლუგანსკის ოლქის ნაწილებს ზუსტად იმ დროს, როდესაც იქ რუსეთთან შეერთების მიზნით დაწყებული „რეფერენდუმი“ სრულდებოდა,“ – წერდა უწყებს 28 სექტემბრის რელიზში.

ბრიტანეთის დაზვერვა აღნიშნავდა, რომ ლუგანსკის ოლქში ნებისმიერი ტერიტორიის „დაკარგვა“ რუსეთის საომარი სტრატეგიისთვის უდიდესი დარტყმა იქნება.

ხულო-ზარზმის გზაზე ასფალტის დაგება დაიწყეს

ხულო-ზარზმის გზაზე, სოფელ ზარზმიდან გოდერძის უღელტეხილის მიმართულებით ასფალტის დაგება დაიწყეს. გზის რეაბილიტაციაზე დასაქმებული ერთ-ერთი მოქალაქის თქმით, გუშინ, 28 სექტემბერს, ასფალტის საფარი გზის 500 მეტრ სიგრძეზე დაიგო. ასფალტის დაგება გრძელდება.

გოდერძი-ზარზმის გზის რეაბილიტაცია /ზარზმის მონაკვეთი / ფოტო: ასლან დიასამიძე. 29.09.2022

სამუშაოები ხულო-ზარზმის გზის რეაბილიტაციის პროექტის ფარგლებში ტარდება. საავტომობილო გზების დეპარტამენტის ინფორმაციით, სარეაბილიტაციო გზა [ხულოდან ზარზმამდე] ჯამში 42 კილომეტრია და ის ორ მონაკვეთადაა დაყოფილი.

პირველი მონაკვეთი არის ხულო-გოდერძი, რომლის რეაბილიტაციისთვის 57 177 829 ლარი დაიხარჯება. აღნიშნულ მონაკვეთზე ამ დროისთვის ამუშავებენ კლდის ფერდს – მიმდინარეობს მიწის ხელოვნურად ჩამოშლის სამუშაოები, რის გამოც ავტოტრანსპორტის მოძრაობა 7 ოქტომბრის ჩათვლით შეზღუდული იქნება.

მეორეა გოდერძი-ზარზმის მონაკვეთი, რომლის რეაბილიტაციისთვის 38 511 473 ლარი დაიხარჯება. სწორედ ამ მონაკვეთზე დაიწყეს ასფალტის დაგება.

გოდერძი-ზარზმის გზის რეაბილიტაცია/ზარზმის მონაკვეთი / ფოტო: ასლან დიასამიძე. 29.09.2022

გზების დეპარტამენტის ინფორმაციით, პირველი მონაკვეთი ქუვეითის ფონდის (KFAED) მიერ ფინანსდება მეორე კი, სახელმწიფო ბიუჯეტიდან. სამუშაოების საერთო ღირებულება ჯამში 95 689 302 ლარია.

გოდერძი-ზარზმის გზის რეაბილიტაცია/ზარზმის მონაკვეთი / ფოტო: ასლან დიასამიძე. 29.09.2022

ხულო-ზარზმის 42 კმ-იან მონაკვეთს საერთაშორისო ტენდერში გამარჯვებული კომპანია „სინოჰიდრო“ აშენებს. ჩინურმა კომპანია – „სინოჰიდრომ“ აჭარაში ქობულეთის შემოვლითი გზაც ააშენა.

გოდერძი-ზარზმის გზის რეაბილიტაცია/ზარზმის მონაკვეთი / ფოტო: ასლან დიასამიძე. 28.09.2022

ხულო-ზარზმის გზა თავდაპირველად კომპანია „ტოდინს“ უნდა გაეკეთებინა, თუმცა საავტომობილო გზების დეპარტამენტმა  TODINI COSTRUZIONI GENERALI S.p.A.-სთან [„ტოდინთან“]  გაფორმებული ხელშეკრულებები 2 წლის წინ შეწყვიტა.

დეპარტამენტის მიერ „ბათუმელებისთვის“ მოწოდებული ინფორმაციით, „ტოდინთან“ დავა საერთაშორისო არბიტრაჟში (პარიზი, საფრანგეთი) მოიგეს და „საერთაშორისო არბიტრაჟმა Todini Costruzioni Generali S.p.A-ს მიაკუთვნა დაახლოებით 56 მილიონი ლარის გადახდა.“

ხულო-ზარზმის გზის კიდევ ერთი, 5-კილომეტრიანი მონაკვეთის – დაბა ხულოდან გოდერძის მიმართულებით – რეაბილიტაცია სახელმწიფო ბიუჯეტიდან უნდა დაფინანსებულიყო. გზის რეაბილიტაციაზე ხელშეკრულება კომპანია „მამისონთან“ დეპარტამენტმა 14,6 მილიონ ლარზე გააფორმა და სამუშაოები 2021 წლის დეკემბერში უნდა დასრულებულიყო, თუმცა მიმდინარე, 2022 წელს, დეპარტამენტმა ამ კომპანიასთანაც შეწყვიტა ხელშეკრულება.

ამავე თემაზე:

ხულო-გოდერძის გზაზე ტრანსპორტის მოძრაობა 7 ოქტომბრის ჩათვლით შეზღუდული იქნება

რატომ არ შეუშვეს მოქალაქეები ბათუმის საკრებულოს სხდომაზე

„საკრებულოს სხდომაზე არ გვიშვებენ“, – აცხადებენ მოქალაქეები. ისინი დღეს, 29 სექტემბერს, ბათუმის საკრებულოს სხდომაზე არ შეუშვეს. სხდომაზე დღეს 4 მოქალაქე ვერ შევიდა.

მოქალაქეების სხდომაზე დაშვება პრობლემა გახდა მას შემდეგ, როცა საკრებულოს წევრთა რაოდენობა 25-დან 35-მდე გაიზარდა. ამ სიახლის მიუხედავად საკრებულოს სხდომები ისევ იმ დარბაზში ტარდება, სადაც წინა მოწვევის საკრებულო იკრიბებოდა. შესაბამისად, დარბაზში რკალისებურად განლაგებულ მაგიდებსა და სკამებს კიდევ ერთი მწკრივი [მაგიდები და სკამები] დაემატება. ეს იმას ნიშნავს, რომ დარბაზში, სხდომაზე დასწრების მსურველთათვის, ადგილი კიდევ დავიწროვდება.

საშვთა ბიუროში დღეს მოქალაქეებს უთხრეს, რომ საშვები გუშინ უნდა მოეთხოვათ.

მოქალაქეებს სხვადასხვა პრობლემის გამო სურდათ სხდომაზე დასწრება.

მაგალითად, მოქალაქე ჰაიდე კიკნაძემ „ბათუმელებს“ უთხრა, რომ ის ავარიულ სახლში ცხოვრობს და საკრებულოს სხდომაზე უნდოდა მოესმინა ავარიული სახლების საკითხი.

„ეს ექსპერტიზის დასკვნაა, რომლის მიხედვითაც არსებული საცხოვრებელი სახლი სიცოცხლისთვის საფრთხეს წარმოადგენს,“ – აღნიშნა ჰაიდე კიკნაძემ, რომელმაც შესაბამისი დოკუმენტი აჩვენა „ბათუმელებს“.

საკრებულოს სხდომა გრძელდება.

თიბისის მხარდაჭერით ამბის თხრობის ფესტივალი – ZEG გაიმართება

ZEG Tbilisi Storytelling Festival, Impact Hub Tbilisi-ს და Coda Story-ის მიერ დაფუძნებული, ამბის თხრობის პირველი საერთაშორისო ფესტივალია რეგიონში. წელს ფესტივალის ფოკუსშია უკრაინის ომი და მისი გავლენა მსოფლიოზე. საით მიჰყავს უკრაინას თანამედროვე სამყარო და რას უნდა მივაქციოთ ყურადღება?

დღეს, თიბისი კონცეპტის მულტიფუნქციურ სივრცეში ფესტივალის შესახებ პრეს-კონფერენცია გაიმართა.

ფესტივალის ფარგლებში დაგეგმილი დისკუსიები და შეხვედრები, საერთაშორისო სტუმრებთან ერთად, მიზნად ისახავს უკრაინის ომის შედეგების გაანალიზებას, გლობალური პერსპექტივით გააზრებას და  ცვლილებებისთვის საჭირო იდეების ინსპირაციას.

ფესტივალი 15 ოქტომბერს გაიმართება და უმასპინძლებს 20-მდე საერთაშორისო თუ ადგილობრივ მომხსენებელს, რომლებიც აქტიურად აშუქებენ მიმდინარე ომს და მასთან დაკავშირებულ მოვლენებს.

ღონისძიების მომხსენებლები იქნებიან მსოფლიოში წამყვანი მედიასაშუალებების გავლენიანი წარმომადგენლები, მათ შორის MOBY Group-ის თანადამფუძნებელი და თავმჯდომარე საად მოჰსენი, Audible-ის კრეატიული განვითარების უფროსი დირექტორი მართა ლიტლი, ITN-ის აღმასრულებელი დირექტორი რეიჩელ კორპი, Ukrainska Pravda-ს აღმასრულებელი დირექტორი ანდრეი ბობორიკინი, პულიცერის პრემიის ფინალისტი და WSJ კორესპოდენტი იაროსლავ ტროფიმოვი, უკრაინელი ფილოსოფოსი და UkraineWorld.org-ის მთავარი რედაქტორი ვოლოდიმირ ერმოლენკო, რადიო თავისუფლების გამომძიებელი ჟურნალისტი ნატალია სედლეცკა, ასევე, The New Yorker-ის, Financial Times-ის, The Wall Street Journal-ის ჟურნალისტები.

დამატებითი ინფორმაცია ფესტივალის შესახებ:

ბილეთები: http://tkt.ge/zeg

ფესტივალის ორგანიზატორები: Impact Hub Tbilisi, Coda Story

ფესტივალის მხარდამჭერები: თიბისი, ამერიკის საელჩო საქართველოში, ბრიტანეთის საელჩო საქართველოში, რადიო თავისუფლება, აჭარა ჯგუფი, D Block, ჟუჟუნა ღვინო, Windfor’s.

გვქონდა უპრეცედენტო ტურისტული სეზონი – რიჟვაძე

დღეს, 29 სექტემბერს, აჭარის მთავრობის სხდომაზე თორნიკე რიჟვაძემ ტურისტულ სეზონზე ისაუბრა.

აჭარის მთავრობის თავმჯდომარის თქმით, წელს აჭარას „უპრეცედენტო სეზონი ჰქონდა“.

„ტურიზმი რჩება ადგილობრივი ეკონომიკის ძირითად ლოკომოტივად და ჩვენი მთავარი ამოცანა წელს გახლდათ ის, რომ სრულად აღდგენილიყო 2019 წლის დინამიკა.

დღეს არსებული მონაცემებით, გვქონდა უპრეცედენტო სეზონი და ორნიშნა ზრდა 2019 წელთან შედარებით, რაც აისახა სექტორის შემოსავლებზე, ასევე საბიუჯეტო შემოსავლებზე. რაც მოგვცემს საშუალებას, კიდევ უფრო მეტი ინფრასტრუქტურული პროექტი დავგეგმოთ მომავალი წლისთვის აჭარის ყველა მუნიციპალიტეტში“.

თორნიკე რიჟვაძეს კონკრეტული ციფრები არ დაუსახელებია.

მისივე თქმით, ბათუმი წელსაც წარდგენილია ტურიზმის ჯილდოზე, თუმცა მიიღებს თუ არა ამ ჯილდოს, გაირკვევა პირველ ოქტომბერს ესპანეთში.

„მომავალ წელს აღნიშნული კონკურსის ძირითად ღონისძიებას აჭარა უმასპინძლებს, რაც ჩვენი ქალაქის პოპულარიზაციას დაეხმარება“, – განაცხადა რიჟვაძემ.

„გინდათ სიცოცხლე? – გაიქეცით“ – ზელენსკის კიდევ ერთი მიმართვა რუს ჯარისკაცებს

უკრაინის პრეზიდენტმა ვოლოდიმირ ზელენსკიმ კიდევ ერთხელ მიმართა რუს ჯარისკაცებს და რუსეთის მოქალაქეებს, რომელთაც რუსეთში გამოცხადებული მობილიზაცია ეხებათ.

28 სექტემბრის გავრცელებულ, ტრადიციულ  ღამის მიმართვაში, რომელშიც უკრაინის პრეზიდენტი გასულ დღეს აფასებს, ზელენსკიმ რუსეთის მოქალაქეებს რუსულად მიმართა:

„ჩვენთვის ყველაფერი ნათელია.

მე კიდევ ერთხელ გავიმეორებ მათთვის, ვისაც მხოლოდ რუსული ესმის.

გინდათ სიცოცხლე? – გაიქეცით.

გინდათ იცოცხლოთ? – ტყვედ ჩაბარდით.

გინდათ სიცოცხლე? – იბრძოლეთ, იბრძოლეთ თქვენი ქვეყნის ქუჩებში და თქვენი თავისუფლებისთვის.

თქვენ ისედაც ყველაფერი წაგართვეს. თუ რომელიმე თქვენგანს აქვს ნავთობის ჭაბურღილები, სასახლეები, ვენახები? შეიძლება იახტები გაქვთ? ბანკი? საერთოდ რისთვის იბრძვით? თქვენ გაქვთ მხოლოდ კრედიტები, ღამით – საჭმელი და ახლა მობილიზაცია.

იბრძოლეთ თქვენთვის. ნუ მოძვრებით ჩვენს მიწაზე, ჩვენს სულში და ჩვენს კულტურაში“ – განაცხადა ზელენსკიმ.

რუსეთმა ნაწილობრივი მობილიზაცია 21 სექტემბერს გამოაცხადა.

ქვეყნის თავდაცვის მინისტრის, სერგეი შოიგუს განცხადებით, ნაწილობრივი მობილიზაციის ფარგლებში 300 000 რეზერვისტს გამოიძახებენ, თუმცა აღმოჩნდა, რომ უწყება გაწვევის შესახებ არა მხოლოდ რეზერვისტებს მისდით.

რუსეთში მობილიზაციის გამოცხადებას საზოგადოების ნაწილის პროტესტი მოჰყვა. დაღესტანში აქციები გაიმართა, სადაც მობილიზაციას აპროტესტებდნენ, ათიათასობით ადამიანმა, ვისაც მობილიზაცია ეხება, დატოვა რუსეთი და სხვადასხვა ქვეყანაში გაემგზავრა, მათ შორის საქართველოშიც.

სამხედრო აღრიცხვაზე მყოფ რუსეთის მოქალაქეებს ქვეყნის დატოვება ეკრძალებათ – დუმის სპიკერი

რუსეთის იმ მოქალაქეებს, რომლებსაც მობილიზაციის შესახებ გადაწყვეტილება შეეხებათ, ქვეყნის დატოვების უფლება არ აქვთ – ამის შესახებ ტელეგრამში სახელმწიფო დუმის სპიკერი ვიაჩესლავ ვოლოდინი წერს.

ვოლოდინი ეყრდნობა კანონს „სამობილიზაციო მომზადებისა და რუსეთის ფედერაციაში მობილიზაციის შესახებ“, რომლის თანახმადაც მობილიზაციის გამოცხადების მომენტიდან, სამხედრო კომისარიატების ნებართვის გარეშე, საცხოვრებელი ადგილის დატოვება ეკრძალებათ მოქალაქეებს, რომლებიც სამხედრო გაწვევას ექვემდებარებიან.

„კანონის ასეთი ნორმა არსებობს და ის, ვისაც სამხედრო სამსახურის ვალდებულება შეეხება, ამ ნორმით უნდა ხელმძღვანელობდეს“, – წერს ვოლოდინი, თუმცა არ აკონკრეტებს, რატომ არ ამოქმედდა კანონის ეს ნორმა მობილიზაციის გამოცხადებისთანავე.

მანამდე რამდენიმე რუსული გამოცემა წერდა, რომ კაცებს, რომლებიც შესაძლოა მობილიზაციას დაექვემდებარონ, „რეფერენდუმების“ შემდეგ ქვეყნიდან გასვლა აეკრძალებათ. საზღვრის გადაკვეთის ნებართვა მათ სამხედრო კომისარიატებისგან უნდა მიიღონ.

„ნაწილობრივი მობილიზაცია“ რუსეთში პრეზიდენტმა პუტინმა 21 სექტემბერს გამოაცხადა. მისი თქმით, ბრძანება შეეხება მხოლოდ მას, ვინც რეზერვშია და სამხედრო გამოცდილება აქვს. იმავე დღეს თავდაცვის მინისტრმა სერგეი შოიგუმ დააზუსტა, რომ იგეგმება 300 000 კაცის გაწვევა.

უფლებადამცველი ორგანიზაცია „პირველი დეპარტამენტი“ აცხადებს, რომ მობილიზებული რუსები ყოველგვარი მომზადების გარეშე ეგრევე ფრონტზე მიჰყავთ, „ისინი არ მონაწილეობენ წვრთნებში, არ გადიან სამედიცინო კომისიას და არ გადიან არანაირი მომზადებას“.

მობილიზაციის გამოცხადების შემდეგ რუსეთის ქალაქებსა და რაიონებში საპროტესტო აქციები დაიწყო, ათობით ათასმა მოქალაქემ კი ქვეყანა დატოვა. მეზობელი სახელმწიფოების საზღვრებთან კილომეტრიანი რიგები დგას. გამოცემა Новая газета.Европа წყაროებზე დაყრდნობით წერს, რომ რუსეთი უკვე დატოვა 261 ათასმა კაცმა.

ეს ინფორმაცია ხელისუფლებას ოფიციალურად არ დაუდასტურებია.

დიდი ბრიტანეთის დაზვერვის შეფასებით, იმ ადამიანების რიცხვი, ვინც მობილიზაციისგან თავის არიდების მიზნით რუსეთი დატოვა, სავარაუდოდ, უკვე აღემატება რუსეთის ძალების იმ რაოდენობას, რომელიც კრემლმა 2022 წლის თებერვალში უკრაინაში სამხედრო აგრესიის დასაწყებად გადაისროლა.

უწყება მიუთითებს, რომ მათ შორის, ვინც რუსეთის დატოვებას ცდილობს, არიან შედარებით უზრუნველყოფილი და განათლებული ადამიანები.

საქართველოს შინაგან საქმეთა სამინისტროს ცნობით, ბოლო 10 დღეში ქვეყნის საზღვარი ყველა გამშვები პუნქტის გავლით რუსეთის ფედერაციის 78 742-მა მოქალაქემ გადმოკვეთა.

რუსეთს ლიმანში კოლაფსი ელოდება – ISW-ის შეფასება

აშშ-ის ომის კვლევის ინსტიტუტის (ISW) ანალიტიკოსების შეფასებით, რუსეთი არ რეაგირებს საკუთარი არმიის დანაკარგებზე ლიმანთან, რამაც შესაძლოა, კიდევ უფრო დააქვეითოს რუსი სამხედროების მორალური განწყობა.

ინსტიტუტის ექსპერტები ვარაუდობენ, რომ ლიმანის მარცხი, სავარაუდოდ, სერიოზულ შედეგებს მოიტანს რუსეთის დანაყოფებისთვის დონეცკის ჩრდილოეთით და ლუგანსკის დასავლეთით და შესაძლოა უკრაინელებს მისცეს საშუალება, დაემუქრონ რუსების პოზიციებს ლუგანსკის დასავლეთ საზღვრის გასწვრივ და სევეროდონეცკ-ლისიჩანსკის მონაკვეთზე.

ISW-ი ასევე აღნიშნავს, რომ რუსეთის თავდაცვა არ რეაგირებს მიმდინარე დანაკარგებზე ლიმანთან, არ ემზადება კოლაფსისთვის ფრონტის ამ მონაკვეთზე, რაც სავარაუდოდ, კიდევ უფრო დააქვეითებს რუსი სამხედროების ისედაც დაბალ საბრძოლო განწყობას.

გარდა ამისა, უკრაინის მომავალმა წარმატებებმა დონეცკისა და ლუგანსკის კრიტიკულად მნიშვნელოვან რაიონებში, „შესაძლოა კიდევ უფრო დაძაბოს ვითარება რუს ნაციონალისტებსა და სამხედრო ხელმძღვანელობას, ასევე, რუს სამხედროებსა და მათ მეთაურებს შორის“.

ინსტიტუტის ანალიტიკოსების პროგნოზით, „კრემლმა შესაძლოა გადადოს უკრაინის ოკუპირებული ტერიტორიების ანექსიის შესახებ განაცხადი, რათა უკეთ მოამზადოს რუსეთის საინფორმაციო ველი, თუმცა 30 სექტემბერი კვლავაც ანექსიის გამოცხადების სავარაუდო თარიღად რჩება“.

ISW-ის მონაცემებით, რუსეთის ხელისუფლება განაგრძობს ახალმობილიზებული და მოუმზადებელი რეზერვისტების ფრონტზე გაგზავნას „ძალიან დეგრადირებული დანაყოფების გასაძლიერებლად“, მათ შორის იმ დანაყოფების, რომლებიც რუსეთის მთავარ საბრძოლო ძალად მიიჩნეოდა.

ექსპერტებს მაგალითად მოჰყავთ პირველი გვარდიის სატანკო არმია, რომელიც 24 თებერვლამდე რუსეთის მთავარ მექანიზებულ ძალად განიხილებოდა და ის ფაქტი, რომ მისი ელემენტები ახლა ცუდად დისციპლინირებული და მოუმზადებელი რეზერვისტებით ძლიერდება, ადასტურებს ISW-ის მანამდელ შეფასებებს იმის შესახებ, რომ რუსეთის ყველაზე ელიტურმა დანაყოფებმაც კი მნიშვნელოვანი დანაკარგი განიცადეს უკრაინაში.

ინსტიტუტის შეფასებით, ახალმობილიზებული ძალები ნამდვილად ვერ შესძენს პირველი გვარდიის სატანკო არმიას გადამწყვეტ სიძლიერეს.

ISW-ის ინფორმაციით უკრაინის არმიას მნიშვნელოვანი წინსვლა აქვს ლიმანთან, ხერსონის ოლქში კი ბრძოლები გრძელდება.

___

ფოტო: War Mapper

რუსეთის და უკრაინის სამხედრო დანაკარგები ომში – 29 სექტემბრის მონაცემები

უკრაინის შეიარაღებული ძალების გენერალური შტაბის დღევანდელი მონაცემებით, 24 თებერვლიდან 29 სექტემბრამდე პერიოდში, რუსეთის არმიის საბრძოლო დანაკარგი არის:

  • ცოცხალი ძალა – დაახლოებით 58 580 ადამიანი [გასულ დღე-ღამეში +430]
  • ტანკი – 2 325 ერთეული [+13]
  • ჯავშანტექნიკა – 4 909 ერთეული [+20]
  • საარტილერიო სისტემა – 1 385 ერთეული [+4]
  • MLRS – 331 ერთეული [+0]
  • საზენიტო საბრძოლო სისტემა – 175 ერთეული [+0]
  • თვითმფრინავი – 262 ერთეული [+0]
  • ვერტმფრენი – 224 ერთეული [+0]
  • უპილოტო საფრენი აპარატის ოპერატიულ-ტაქტიკური დონე – 995 ერთეული [+6]
  • ფრთოსანი რაკეტა [ჩამოაგდეს] – 246 ერთეული [+4]
  • გემი/ნავი – 15 ერთეული [+0]
  • მანქანები და საწვავის ავზები – 3 751 ერთეული [+9]
  • სპეცტექნიკა – 131 ერთეული [+0]

უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.

უკრაინის სამხედრო დანაკარგებზე ინფორმაცია განაახლა რუსეთმაც.

რუსეთის თავდაცვის სამინისტროს მიერ დღეს გავრცელებული მონაცემებით, 24 თებერვლიდან 29 სექტემბრამდე პერიოდში სულ განადგურებულია უკრაინის:

  • 307 თვითმფრინავი
  • 155 ვერტმფრენი
  • 2 107 უპილოტო საფრენი აპარატი
  • 377 საზენიტო სარაკეტო სისტემა
  • 5 147 ტანკი და სხვა ჯავშანტექნიკა
  • 855 მრავალჯერადი სარაკეტო გამშვები
  • 3 439 საველე არტილერია და ნაღმტყორცნი
  • 5 973 სპეციალური სამხედრო მანქანა

რუსეთის თავდაცვა, ამ მონაცემებთან ერთად, უკრაინის არმიის ცოცხალი ძალის დანაკარგების საერთო რაოდენობის შესახებ სტატისტიკას არ აქვეყნებს.

ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.


რუსეთი უკრაინაში 24 თებერვალს გამთენიისას შეიჭრა და სრულმასშტაბიანი ომი დაიწყო.

ამავე თემაზე:

„მე იქ აღარ წავალ“ – როგორ იწვევენ რუს კონტრაქტორებს ისევ საომრად | BBC

რუსეთი უკვე იმდენმა კაცმა დატოვა, რამდენიც კრემლმა უკრაინაში გააგზავნა – ბრიტანეთის დაზვერვა

დიდი ბრიტანეთის დაზვერვის შეფასებით, იმ ადამიანების რიცხვი, ვინც მობილიზაციისგან თავის არიდების მიზნით რუსეთი დატოვა, სავარაუდოდ, უკვე აღემატება რუსეთის ძალების იმ რაოდენობას, რომელიც კრემლმა 2022 წლის თებერვალში უკრაინაში სამხედრო აგრესიის დასაწყებად გადაისროლა.

„7 დღეში, მას შემდეგ, რაც პუტინმა „ნაწილობრივი მობილიზაცია“ გამოაცხადა, რუსების მნიშვნელოვანმა ნაწილმა დატოვა ქვეყანა მობილიზაციისთვის თავის არიდების მიზნით. ზუსტი რიცხვი უცნობია, თუმცა დიდი ალბათობით, ის უკვე აღემატება რუსეთის მთლიანი ძალის რაოდენობას, რაც კრემლმა 2022 წლის თებერვალში, უკრაინაში სამხედრო აგრესიის დასაწყებად გამოიყენა,“ – წერს უწყება 29 სექტემბრის რელიზში.

უწყება მიუთითებს, რომ მათ შორის ვინც რუსეთის დატოვებას ცდილობს, არიან შედარებით უზრუნველყოფილი და განათლებული ადამიანები.

დაზვერვა ვარაუდობს, რომ ქვეყნიდან წასულთა რაოდენობა მობილიზებულ რეზერვისტებთან ერთად, რუსეთისთვის მალე თვალსაჩინოს გახდის ეკონომიკურ შედეგებს, რაც მუშახელის რაოდენობის შემცირებაში და „ტვინების გადინებაში“ გამოიხატება.

გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელ რელიზში უწყება წერდა, რომ ბოლო დღეებში უკრაინამ თავისი კონტრშეტევა გააქტიურა და უკრაინის არმია ნელა, მაგრამ მაინც განაგრძობს წინსვლას მდინარეების – ოსკილისა და სივერსკი დონეცის ნაპირებზე.

„მე იქ აღარ წავალ“ – როგორ იწვევენ რუს კონტრაქტორებს ისევ საომრად | BBC

წყარო: BBC 

___________

საკონტრაქტო სამხედროებს, რომლებმაც დატოვეს რუსეთის არმია ომის პირველი თვეების შემდეგ, კვლავ ფრონტის ხაზზე გზავნიან – ახლა უკვე მობილიზაციის შესახებ კანონის შესაბამისად.

კვლავ ბრძოლის ველზე რომ არ აღმოჩნდნენ, ახალგაზრდები გარბიან ქვეყნიდან, თანხმდებიან პატიმრობას, მიდიან ფსიქიატრიულ კლინიკებში და „ბიბისის“ უყვებიან, რატომ აკეთებენ ამას.

– პროფესიით არტილერისტი ვარ. პირადად, ხელში იარაღით, მე არ ვკლავდი. ჩემი საქმე ასეთი იყო: კორექტორი ბინოკლით იძლევა სამიზნის კოორდინატებს, ოფიცერი თვლის კუთხეს, ვიღებ სამიზნეში და ვაჭერ ბერკეტს. რკინის არაა, ეს არ არის ძნელი. მკვდრებს მე ვერ ვხედავ. არტილერიაში გეუბნებიან – „სამიზნე დამუშავებულია“ და მორჩა.

– სად ასწავლიან ამას?

– იდეაში ჯარში, მაგრამ მე მსგავსი არაფერი მქონია. ჩემი კონტრაქტის განმავლობაში ორჯერ გავედით გარეთ – მხოლოდ გასასეირნებლად და დასამიზნებლად. არსად გვისვრია.

– გამოდის, რომ ცხოვრებაში პირველად ისროლეთ, როცა უკრაინის ტერიტორიაზე შეხვედით?

– კი. პირველად ჩვენ ბუჩასთან ვისროლეთ.

– ანუ თქვენ პირველად იყავით ცხოვრებაში ომში და გაისროლეთ იქვე, პირველად?

– კი.

20 წლის სერგეი კრასნოდარიდან BBC-სთან თავიდან უხალისოდ საუბრობს. ივლისში იგი პოპასნაიადან გაიქცა, რამდენიმე თვე სახლში იჯდა, არავის უყვებოდა იმაზე, თუ როგორ იბრძოდა 5 თვე. 23 სექტემბერს მას სამხედრო პროკურორმა დაურეკა და უთხრა: „ორშაბათს ან ისევ მიდიხარ იქ, ან ჩაჯდები ციხეში“.

„უკან წასასვლელად მე მზად არ ვარ“ – ამბობს სერგეი. ომში, 5 თვის განმავლობაში, მან ნახა „თითქმის ყველაფერი და მეტი აღარ შეუძლია“.

  • „არავითარი მიზანი, არავითარი გეგმა“

19 წლის სერგეი ჯარში 2021 წლის გაზაფხულზე გაიწვიეს და აგვისტოში უკვე კონტრაქტი შესთავაზეს. ბოლო წლებში რუსეთის თავდაცვის სამინისტროს, რაც შეიძლება მეტი ახალგაზრდა გადაჰყავდა სამხედრო სამსახურის ამ ფორმაზე. რიცხვები ჯარში პროფესიონალი ჯარისკაცების რაოდენობის შესახებ მნიშვნელოვანი იყო ანგარიშებისთვის.

იანვრის ბოლოს, თავის თანამებრძოლებთან ერთად, რომელთაგანაც ყველაზე უმცროსი 18 წლის იყო, ის ბელარუსში გაგზავნეს სამხედრო წვრთნაზე.

„გავიგეთ, რომ მივდივართ უკრაინაში 23 თებერვალს“ – ამბობს სერგეი. ჯარისკაცებს უთხრეს, რომ „თუ ზევით ღამემდე არაფერს არ გადაწყვეტენ“, ყველანი მიდიან და სამი დღის სამყოფი მშრალი საკვები დაურიგეს.

– გაქცევა არ შეიძლებოდა?

– იქ გასაქცევი არსადაა.

„იდეალურ, გაპრიალებულ, მექანიკოსების მიერ მომზადებული“ ტანკებით ისინი ჩერნობილამდე დაბომბვის გარეშე მიდიოდნენ. პირველად ეს მოხდა გოსტომელში – თითქმის 600-კაციან ბატალიონზე უკრაინული არტილერიის ჭურვები დაეშვა. „ეგრევე ხუთი გვამი და ათეულობით დაჭრილი იყო, მათაც კი მოხვდათ, ვინც ტანკში იყო, БМП-2-ები თხელია და იოლად იხვრიტება“.

იმ დღეს სერგეიმ ცხოვრებაში პირველად ნახა მკვდარი ადამიანი. დაიღუპა მისი 19 წლის თანამებრძოლი, რომელთან ერთადაც კრასნოდარში მსახურობდა.

„პანიკა დაიწყო. ტყეში, რაღაც საწყობში შევედით. გავჩერდით და სრულიად დავიბენით. არ ვიცოდით რა გვექნა. მეთაურებმაც არ იცოდნენ, რა უნდა ექნათ. ბატალიონის მეთაურმა უყვირა მათ: „…რატომ დგახართ ტყუილად!“ და მაშინ მათ გვითხრეს „პოზიცია დაგვეკავებინა“.

სერგეის პოლკმა „რაღაც სანგარი“ გათხრა და ღამე ტყეში დარჩნენ. იმ დღეს ესროლეს არა მხოლოდ მათ – სერგეის თქმით, უკრაინელმა სამხედროებმა „მთლიანად გაანადგურეს ერთი დივიზია“, გადარჩენილები კი ღამით ტყეში დახეტიალობდნენ. „ჩვენებმა სროლა დაუწყეს, ისინი ყვიროდნენ“. სერგეის ინფორმაციით, მხოლოდ ერთი ჯარისკაცი დაიჭრა.

დილას რამდენიმე კილომეტრი გაიარეს სხვა ტყემდე. უკრაინელებმა ამ დროს დაბომბეს საწყობი, სადაც პოლკის პირველი ბანაკი იყო („ბიბისის“ აქვს ამის ამსახველი ვიდეო).

არავითარი მიზანი, არავითარი გეგმა მეთაურებს არ ჰქონიათ – ამბობს სერგეი. საჭმელიც არ იყო, სამი დღისთვის გაცემულ მშრალ საკვებს ერთ კვირაზე ანაწილებდნენ.

„რატომ არ არის საჭმელი, არავინ ამბობდა. მეთაურებიც არ ჭამდნენ. პოლკის მეთაურის ამბავი არ ვიცი, მაგრამ მათ ხომ სადაზვერვო რაზმი ჰყავთ, რომელიც მაღაზიებს ასუფთავებს, ასე რომ, ვფიქრობ, მათ კარგად ჭამეს.“

  • „ვისროდით და დალევას ვაგრძელებდით“

მარტის პირველ რიცხვებში სერგეის ბატალიონი ბუჩაში შევიდა: „არტილერიით დავიცავით ქვეითები“.

დადგნენ ქალაქის ცენტრში, ტანკებიდან ჩამოვიდნენ და ნახევარი საათის შემდეგ ჭურვი მოფრინდა – „ეგრევე მინუს პოლკის მეთაურის ორი მოადგილე, ჩვენი მეთაური და რიგითები“. ასე დაიღუპა სერგეის კიდევ ერთი თანამებრძოლი კრასნოდარიდან.

როცა მეთაური იღუპება, ახალს გადარჩენილებიდან ნიშნავენ. გამოცდილები ფრონტზე ცოტანი იყვნენ, ძირითადად 19-20 წლის ახალგაზრდები – ამბობს სერგეი.

„იშვიათად იყვნენ მეთაურები, რომლებსაც 5 წელი ჰქონდათ ნამსახურები. ჩვენი მეთაური 12 წელი მსახურობდა, მაგრამ საომარ მოქმედებებში არასდროს იყო ნამყოფი, მხოლოდ ნაწილში იჯდა. ერთ კვირაში გააფრინა. დათვრა, სახლის მეორე სართულზე აძვრა, სადღაც შორს რაღაც აფეთქდა და ქვევით გადმოხტა, ფეხები დაიმტვრია. წაიყვანეს, ფული არ გადაუხადეს, ახლა ფსიქიატრიულში დადის“.

ბუჩაში ჯარისკაცებმა ცარიელი სახლების და მაღაზიების ძარცვა დაიწყეს. „საჭმელი არაფერი იყო თავიდანვე, კონსერვები და პური მიგვქონდა“. ცხოვრობდნენ მაღალსართულიანი სახლების სარდაფებში, ერთ მხარეს ადგილობრივები – მეორე მხარეს – რუსი სამხედროები.

ბუჩა, უკრაინა. რუსი ჯარისკაცების მიერ მოკლული ადამიანები ქუჩაში

„თუ ჩვენს პოზიციაზე ადგილობრივები შემოდიოდნენ, აჰყავდათ, ჰკითხავდნენ და თითქმის მაშინვე კლავდნენ. ისინი ტელეფონით უგზავნიდნენ უკრაინის შეიარაღებულ ძალებს ჩვენს ადგილმდებარეობას. იყო შემთხვევა, კაცმა ჩაიარა ველოსიპედით და ერთი წუთის მერე ჭურვი გვეცემა, ძალიან ზუსტად. იქ ისეთი კადრები გვხვდებოდა… – მოდის კვადროციკლით, ყველას ტელეფონით გვიღებს, შლემზე აწერია „სინათლის მხედარი“. იგი დაიჭირეს, მაშინვე მოკლეს“.

ამავე დროს ბუჩას მასობრივი სამარხების ფოტოებზე სერგეი ამბობს, რომ „არის დადგმულებიც“.

რამდენიმე ფოტოზე მან იცნო ორმოები, რომელიც რუსმა სამხედროებმა ამოთხარეს ტანკების შესანიღბად. „ფოტოზე კი ახლოს ჯვარი დგას. მაგრამ ეს არ არის სასაფლაოს ორმო, ჩვენ ხომ ვიცით. ისინი კი ისე აჩვენებენ, რომ, აი, ვითომ გვამებია“. ეს ეწინააღმდეგება მისივე სიტყვებს, რომ ადგილობრივებს რუსი სამხედროები ხვრეტდნენ იმის გამო, რომ ისინი უკრაინის შეიარაღებული ძალების დახმარებაში იყვნენ ეჭვმიტანილი. სერგეი ამას არ განმარტავს.

სერგეი ამბობს, რომ სამხედროები ბევრს სვამდნენ. ალკოჰოლს ყველგან პოულობდნენ – სახლებში, მაღაზიებში. არაყი, ვისკი, ბურბონი, ჯინი, რომი, გრაპა და ჭაჭა. მაგრამ თუ ამ მომენტში სამიზნის კოორდინატები მოდიოდა, გამოდიოდნენ და მთვრალები მიდიოდნენ სასროლად.

– ფხიზლდებოდით ადრენალისგან?

– არა, ვისროდით და დალევას ვაგრძელებდით.

ჩუმ დღეებში ეზოებში ხორცს წვავდნენ. ადგილობრივები არ მოდიოდნენ.

„მათ იცოდნენ, სახლის სარდაფებიდან რომ გამოსულიყვნენ, ცეცხლს გაუხსნიდნენ. ამის შესახებ მათ მაშინვე უთხრეს, როცა ბუჩაში მივედით. როცა სახლები დავიარეთ და ვწმენდდით მათ, ვინც პოლიციაში, უკრაინის შეიარაღებულ ძალებში მუშაობდა, ვინ – დოკუმენტებით, ვიღაცას ტელეფონში ჰქონდა რაღაც… სინამდვილეში ყველა კაცი აგვყავდა“.

– ქალებს რას უშვებოდით?

– სხვადასხვაგვარად იყო. მე – არაფერს. არც ჩემი პირველი ბატარეა.

  • „ტანკი არც კი დადიოდა“

სამხედრო ამოცანა იყო ბუჩადან 5 კილომეტრში მდებარე ირპენის დაბომბვა. ორი კვირის განმავლობაში არტილერისტები ყოველ დღე ისროდნენ, ქვეითები კი ქალაქის აღებას ცდილობდნენ.

„ჩვენებმა იქ 3-4-ჯერ სცადეს შეღწევა, მაგრამ 500 მეტრზე მეტის გავლა ვერ შეძლეს. უკრაინელებს ტანკები ეყენათ, ჩვენს ქვეითებს კი БМП ჰქონდათ, რომელიც ტანკში ვერ შეაღწევს. ყოველ დღე დანაკარგებით ბრუნდებოდნენ“.

მათ ეუბნებოდნენ, რომ მალე მათ შეცვლიდნენ. „უკვე მალე, მოვლენ სხვები. ახლა დაბას ავიღებთ და ჩვენ მოგვხსნიან. უკვე მალე“. მაგრამ არავინ არ მოდიოდა.

19 მარტს რუსულ ტანკს უკრაინული არტილერიის ჭურვი მოხვდა. ტანკი აფეთქდა და აალდა, პანიკა დაიწყო, ცეცხლი სხვა ტანკებზეც გადავიდა, ერთის გაყვანა შეძლეს, ექვსი ტანკი კი მთლიანად დაიწვა – ჰყვება სერგეი.

ტექნიკასთან ერთად დაიწვა ყველა ნივთი, საძილე ტომრებიდან დაწყებული ტრუსებით დასრულებული, ჯავშანჟილეტებიც კი, ჩაფხუტებთან და ავტომატებთან ერთად.

უკრაინის არმიის მიერ განადგურებული რუსული სამხედრო ძალების ტექნიკა ქალაქ ბუჩაში, კიევთან ახლოს

ახალი იარაღი დღენახევრის შემდეგ მიიღეს, ორი დღის შემდეგ კი ორი ტანკი მოიყვანეს – ერთზე საჭის გადართვა ვერ ხერხდებოდა, მეორე კი, 1964 წელს გამოშვებული ტანკი, საერთოდ არ ისროდა და არც კი დადიოდა. ახალი ნივთები არავის არ მისცეს.

ირპენის აღება რუსმა სამხედროებმა ვერ შეძლეს. 2 აპრილს, როდესაც თავდაცვის სამინისტრომ გამოაცხადა ჯარების გაყვანის შესახებ კიევი-ჩერნიგოვის მიმართულებიდან, სერგეის ასეულს 6 საათის განმავლობაში ბომბავდნენ – „თავის გარეთ გამოყოფა არ შეგვეძლო“. ერთსაათიანი ლოდინის შემდეგ, რომლის განმავლობაშიც სროლა არ ყოფილა, ისინი სარდაფიდან გამოვიდნენ, 28 ჭურვი ისროლეს უკრაინელების მხარეს და უკან დაიხიეს. თითქმის ყველა ტანკი დაიწვა, ასე რომ 40 სამხედროს მოუწია სამი, არსებული ჯავშანტექნიკით გასვლა.

  • „ისინი ყველა 19 წლის არიან. და ახლა უგზო-უკვლოდ დაკარგულები“

სერგეის პოლკი რუსეთში ბელარუსის გავლით დაბრუნდა. პირველივე გაჩერებაზე 180 ადამიანმა მოინდომა წასვლა. მეთაურებმა ისინი დაარწმუნეს, რომ ყველას ციხეში ჩასვამდნენ და დარჩნენ.

ბელგოროდში მათ ორი კვირა დაჰყვეს ტყეში, კარვებში, კამაზით მიდიოდნენ ქალაქში საჭმლის საყიდლად, რადგან „იქაც არ გვაჭმევდნენ, არავითარი მშრალი კვება არ იყო“. იქ სერგეიმ ორჯერ დაწერა განცხადება წასვლაზე, დაწერა უარი სპეცოპერაციაზე. „არაფერი, არსად არ აღწევდა. პოლკის მეთაურს ვაძლევდით, იგი არც კი კითხულობდა“.

კონტრაქტორი სხვა ბატალიონიდან, 19 წლის ანტონი ივანოვოდან „ბიბისის“ უამბობს, რომ მის მეგობრებს მეთაურები მაისში ტრიბუნალით აშინებდნენ, „მაგრამ რამდენიმე პირდაპირ ისე, უპასპორტოდ წავიდა. საგუშაგოზე დებდნენ იარაღს და მიდიოდნენ. კავშირგაბმულობის ბატალიონმა, 60-80-მა ადამიანმა, საერთოდ ყველამ უარი თქვა.

„იცით, იქ ისეთი ბიჭები იყვნენ, ისეთი ფანატიკოსები, რომლებმაც მოხალისეებად ერთი, სამი თვით გააფორმეს კონტრაქტი. ისინი მოდიან ომში ჩვენთან, შემდეგ პირდაპირ ბრძოლის ველზე ბრუნდებიან, იარაღს დებენ, ამბობენ – „მე მოვრჩი“ და მიდიან. საბოლოოდ ჩვენც უბრალოდ გზად შემხვედრ მანქანას გავყევით“.

– რა მოხდა, რატომ?

– დანაკარგები ძალიან დიდია. მაისში იქ ბევრი ბატალიონიდან კარგია თუ 10 ადამიანი დარჩა. ფსიქიკაზეც ძალიან მოქმედებს.

დავიწყე ადამიანებისთვის სროლა და მივხვდი, რომ ეს… ძნელია… მოკლულ ბიჭებსაც სახლში არ აგზავნიან. პირდაპირ იქ დამარხეს. ძალიან იშვიათად არის груз 200 [დაღუპული ჯარისკაცების ცხედრების გაგზავნა რუსეთში], განსაკუთრებით მაშინ, როცა იქ თითქმის 40 გრადუსი იყო. გვამები თითქმის მაშინვე იხრწნება. მშობლებს კი არაფერს არ ეუბნებიან, წერენ – დაიკარგა უგზო-უკვლოდ. იქ ბევრი ბიჭია, რომელთაც კონტრაქტი ერთ-ორ თვეში ეწურებოდათ. 19-20 წლის. და ახლა არიან უგზო-უკვლოდ დაკარგულები. მშობლებისთვის უბრალოდ გაქრნენ.

სახლში რომ მოვდიოდი, საზღვარზე კაცები ვნახე, პირდაპირ იწევდნენ საომრად. მათ არ ესმით ეს რა არის. მათ სხვანაირად აჩვენებენ ახალ ამბებში ყველაფერს.

– თქვენ სნაიპერი ხართ, ამბობთ, რომ ომში ორი კვირა იყავით და სამ ბრძოლაში მონაწილეობდით. ითვლიდით რამდენი ადამიანი მოკალით?

– იქ არ არის დათვლის დრო.

  • „სოფელში 21 სახლია. კვირა-ნახევარი ვიღებდით“

აპრილის შუა რიცხვებში სერგეი უკან, უკრაინის ტერიტორიაზე გაგზავნეს. გზაზე ერთი შეხედვით ახალი ტანკი გატყდა – ძრავა ყოველ სამ კილომეტრში 120 გრადუსამდე ხურდებოდა.

„ასეთში ყოფნა არ შეიძლება, ვჩერდებოდით და ველოდით გაგრილებას. 12 დღე არემონტებდნენ და როგორც კი ჩამოხსნეს კამაზიდან, რომელსაც ტექნიკა უკრაინის საზღვრამდე მოჰქონდა, 5 კილომეტრის გავლის შემდეგ ისევ ადუღდა. ისევ რემონტისთვის წაიღეს ლუგანსკში, მაგრამ მისი შეკეთება იქაც ვერ მოხერხდა“.

სერგეი ამბობს, რომ მთელი ეს დრო ფიქრობდა, როგორ გაქცეულიყო. „ყოველ დღე ვიღვიძებდი ფიქრით, რომ უარის თქმა მინდა“.

სერგეი იზიუმში ჩაიყვანეს. „მაგრამ ჩვენ პოლკს იგი არ აუღია. უბრალოდ, ვიდექით იქ ერთი თვე და არც ერთხელ არ გვისვრია არტილერიიდან. ტანკებს ვზეთავდით და სანგრებს ვთხრიდით. ღამით ვპატრულირებდით. იქ საჭმელი მაინც მოჰქონდათ“.

რაზმები, რომლებიც იზიუმში აპრილში შევიდნენ, იქიდან გაღწევას ვეღარ ახერხებდნენ: „მათ [უკრაინელებს] ხომ ჯაველინები აქვთ. ტანკისტები გვიყვებოდნენ, როგორც კი ტანკს ქოქავ იქ და წასვლას ფიქრობ, იმ წუთასვე მოფრინავს ჯაველინიდან“.

იზიუმიდან სერგეი ხიდის ასაღებად გაგზავნეს, რომლის სახელიც უკვე აღარ ახსოვს, 20 კილომეტრის დაშორებით ლისიჩანსკიდან. უკრაინის ჯარები ბორცვზე იდგნენ და სროლით არ აძლევდნენ პონტონების აგების საშუალებას. „იქაც უბრალოდ ვიდექით. არ ვისროდით. არ ვიცი რატომ. ტანკები, რომლებიც მდინარის გადასალახად მიდიოდნენ, უკან აღარ ბრუნდებოდნენ“.

მისი პოლკი ლისიჩანსკის მხარეს წავიდა. იქ მათ უთხრეს აეღოთ სოფელი ბერესტოვო, რომლიდანაც ირგვლივ მდებარე ტყეები ჩანდა. „21 სახლი. კვირა-ნახევარი ვიღებდით სოფელს“.

ერთ-ერთი შეტევის დროს რუსული ტანკიდან ჭურვი არ გაფრინდა და ლულაში აფეთქდა. „ვინც შიგნით იყო და იქვე იდგა, დაიწვნენ“. სერგეი ამას იმით ხსნის, რომ ჭურვები ახალი იყო – TBS, „არავინ იცოდა მათთან მუშაობა, მათ თითქმის არ იყენებდნენ“.

დადიოდა ხმები, რომ ლისიჩანსკთან უკრაინის შეიარაღებული ძალების სამი პოლკი იდგა, 1500 ადამიანი, ხოლო ქარხანაში 5 ათასი იყვნენ. „იმ დროს უკვე ძალიან ცოტა ვიყავით, ორი პოლკი გააერთიანეს და მაინც 300 ადამიანი იყო. და თითქმის არ იყო 20 წელზე მეტი ასაკის ადამიანი. ყველა გაწვევით იყო და კონტრაქტისთვის ხელი ნაწილში ჰქონდათ მოწერილი, ისე, რომ არ უფიქრიათ, რომ შესაძლოა ომში აღმოჩენილიყვნენ“.

რუსი ჯარისკაცები ლისიჩანსკში. ფოტო: EPA-EFE/SERGEI ILNITSKY

თებერვალში ბელარუსიდან შემოსულ სერგეის 600-კაციან ბატალიონიდან იმ დროისთვის მხოლოდ ერთი ნაწილი დარჩა, 90 ადამიანი – ამბობს ის. მეორე კონტრაქტორის, ანტონის თქმით, ყოველი ხანმოკლე ბრძოლის შემდეგ ის ხედავდა „დაახლოებით 10 დაჭრილსა და ათამდე მოკლულს“.

ანტონი ივანოვოდან და სერგეი კრასნოდარიდან ირწმუნებიან, რომ უკრაინული არტილერია „დღეში ორ-სამჯერ“ იყენებს კასეტურ და ჟენევის კონვენციით აკრძალულ ბომბებს. რუსეთის კონტრაქტორების არსენალში ასევე იყო კასეტური ბომბები, ანტონი ირწმუნება, რომ ისინი ისროდნენ „მხოლოდ საპასუხოდ“, სერგეი კი ამბობს, რომ „მათ არ რთავდნენ ამ იარაღის გამოყენების ნებას“.

ომის დროს ორგანიზაცია Human Rights Watch-მა განაცხადა, რომ რუსეთიც და უკრაინაც იყენებენ კასეტურ ბომბებს. „ბიბისიმ“ ასევე იპოვა რუსეთის მხრიდან კასეტური ბომბების გამოყენების მტკიცებულება.

  • „ან ციხეში წახვალ, ან უკან – ფრონტზე“

ივლისში სერგეის პოლკი პოპასნაში გაიყვანეს.

„ქალაქი ნანგრევები, ორივე მხარისგან განადგურებული, სადაც ყოველ დღე მოფრინავენ უკრაინის შეიარაღებული ძალების ბომბები“ და ის გაიქცა. იარაღი მეთაურს ჩააბარა და წავიდა. მასთან ერთად გაიქცა კიდევ 7 ადამიანი სხვადასხვა ქალაქიდან.

10 ივლისს პერვომაისკას მახლობლად, საზღვარზე, ისინი სასაზღვრო სამსახურის პოდპოლკოვნიკს შეხვდნენ და უთხრეს: „ომიდან წამოვედით, რა ვქნათ?” სერგეის თქმით, მან უპასუხა: „აქ მარტო თქვენ არ ხართ, ყოველდღე ასს ვხედავ, მოვა „კამაზი“ და წაგიყვანთ „ეფესბეს“დაკითხვის პუნქტში“.

იქ კონტრაქტორებს დიდხანს არ ჰკითხავდნენ, ამბობს სერგეი, მხოლოდ უკვირდათ მონათხრობი მოკლულებზე. ომის ხუთ თვეში სერგეიმ დაახლოებით 700 ათასი რუბლი მიიღო, 140 ათასი თითო თვისთვის.

რამდენიმე კვირის შემდეგ სერგეი სამხედრო კომენდატურაში დაკითხვაზე გამოიძახეს. „მეკითხებოდნენ, როდის გამოვედი საომარი მოქმედებების ზონიდან, რატომ. მე ვთქვი, რომ დავიღალე და ვაჩვენე ბუჩაში განადგურებული და დამწვარი ჩვენი დივიზიის ვიდეო (აღნიშნული ვიდეო „ბიბისის“ აქვს). კონტრაქტორი გამოუშვეს.

23 სექტემბერს კი სერგეი კვლავ გამოიძახა სამხედრო პროკურორმა. ნაწილში მას მისცეს მიმართვა სამედიცინო კომისიაში და უთხრეს: „ორი გამოსავალი გაქვს. ან ციხეში, ან ისევ უკან წახვალ“.

არტილერისტი სამი დღე ვიდეოთამაშებს თამაშობდა და გადაწყვიტა არსად არ წავიდეს. ის ადვოკატს მოელაპარაკა და ახლა ორ ვარიანტს შორის არჩევს: პირობით სასჯელს კონტრაქტის დარღვევისა და მობილიზაციაზე დაუმორჩილებლობისთვის ან გამოიყენებს ფსიქიატრის დასკვნას.

კიდევ ერთმა კონტრაქტორმა, სერგეი ბოკოვმა ურალიდან, რომლის შესახებაც „ბიბისიმ“ მაისში მოამზადა მასალა, კვირას მოასწრო ყაზახეთში გადასვლა და გერმანიაში გეგმავს ჰუმანიტარული ვიზის მიღებას.

ანტონი ივანოვოდან 25 სექტემბერს კვლავ ფრონტის ხაზზე გაემგზავრა.

_________________

მასალა ქვეყნდება მცირედი შემოკლებით. 

ფოტო: EPA-EFE/YURI KOCHETKOV

უმაღლესი სასულიერო დაწესებულება მხოლოდ მართლმადიდებლებისთვის – დავა საკონსტიტუციოში

მუსლიმი თემის ნაწილი საკონსტიტუციო სასამართლოში იმ საკანონმდებლო ნორმის არაკონსტიტუციურად ცნობას ითხოვს, რომელიც უმაღლესი საღვთისმეტყველო საგანმანათლებლო დაწესებულების სტატუსით საქმიანობის უფლებას მხოლოდ მართლმადიდებელ ეკლესიას ანიჭებს.

მოსარჩელე იურიდიული პირი „საქართველოს სრულიად მუსლიმთა სამმართველოს“ ხელმძღვანელი მირტაგ ასადოვია, რომელმაც პარლამენტის წინააღმდეგ ჩივილი მას შემდეგ გადაწყვიტა, როცა განათლების ხარისხის ეროვნული ცენტრიდან წერილობითი პასუხი მიიღო – ასადოვი ისლამური სასულიერო საგანმანათლებლო დაწესებულების გახსნისთვის შესაბამის ავტორიზაციას ითხოვდა.

„მუსლიმთა სამმართველოს სურს, რომ დააფუძნოს უმაღლესი საგანმანათლებლო დაწესებულება, რომელშიც სტუდენტები ისწავლიან თეოლოგიას, ღვთისმსახურებას და სხვა მსგავსი შინაარსის მქონე პროფესიებს,“ – ვკითხულობთ კონსტიტუციურ სარჩელში. – „აღნიშნულის განსახორციელებლად კი, მათ სჭირდებათ უმაღლესი საგანმანათლებლო დაწესებულების სტატუსის მოპოვება, რასაც სსიპ განათლების ხარისხის განვითარების ეროვნული ცენტრი ახორციელებს,“ – აღნიშნულია სარჩელში.

მირტაგ ასადოვი სარჩელში აქცენტს აკეთებს ხარისხის განვითარების ეროვნული ცენტრის პასუხზე, სადაც ხაზგასმულია „უმაღლესი განათლების შესახებ“ კანონის 47-ე პრიმა ხუთი მუხლი.

„ამ მუხლის თანახმად, საღვთისმეტყველო საგანმანათლებლო პროგრამების განხორციელების უფლება აქვთ მხოლოდ მართლმადიდებლურ საღვთისმეტყველო საგანმანათლებლო დაწესებულებებს, რაც გამომდინარეობს კონსტიტუციური შეთანხმებიდან.

მიგვაჩნია, რომ „უმაღლესი განათლების შესახებ“ საქართველოს კანონის 475-ე მუხლის პირველი და მეორე პუნქტისა და ამავე კანონის მე-2 მუხლის „ვ“ პუნქტის ის ნორმატიული შინაარსი, რომელიც მხოლოდ საქართველოს სამოციქულო ავტოკეფალურ მართლმადიდებელ ეკლესიას ანიჭებს უმაღლესი საღვთისმეტყველო საგანმანათლებლო დაწესებულების სტატუსით საგანმანათლებლო საქმიანობის განხორციელების შესაძლებლობას, არღვევს სხვა რელიგიური ორგანიზაციების კონსტიტუციურ უფლებას.

აღნიშნული მოსაზრება ეფუძნება იმას, რომ „უმაღლესი განათლების შესახებ“ საქართველოს კანონში მოცემული მოწესრიგებით საპატრიარქოს გარდა სხვა რელიგიურ გაერთიანებებს არ შეუძლიათ უმაღლესი სასულიერო დაწესებულების სტატუსით განახორციელონ საგანმანათლებლო საქმიანობა. ამას მოწმობს სსიპ „განათლების ხარისხის განვითარების ეროვნული ცენტრის“ პოზიციაც, რომელიც სწორედაც „უმაღლესი განათლების შესახებ“ საქართველოს კანონის 475-ე მუხლის საფუძველზე გამორიცხავს საპატრიარქოს გარდა სხვა რელიგიური გაერთიანების მიერ უმაღლესი საღვთისმეტყველო სასწავლების დაარსებისა და რელიგიური საგანმანათლებლო პროგრამების სწავლების შესაძლებლობას“, – წერია სარჩელში.

მუსლიმთა სამმართველო სარჩელში ყურადღებას ამახვილებს იმაზე, რომ სეკულარიზმი არ კრძალავს სახელმწიფოს მხრიდან რომელიმე რელიგიური ორგანიზაციისთვის გარკვეული შესაძლებლობის მინიჭებას, მაგრამ ეს არ უნდა ქმნიდეს შეზღუდვას სხვა რელიგიებისთვის.

„…სეკულარიზმის პრინციპის დღევანდელი გაგება არ კრძალავს სახელმწიფოს მიერ რელიგიური ორგანიზაციებისთვის გარკვეული შესაძლებლობების მინიჭებას, მაგრამ შეზღუდვა, რომელსაც ის სახელმწიფოებს უწესებს მდგომარეობს იმაში, რომ თუ კი ისინი ასეთ შესაძლებლობას მიანიჭებენ ერთ რელიგიურ ორგანიზაციას, ასეთივე უნდა მიანიჭონ სხვა ორგანიზაციებსაც, რადგან სეკულარიზმი თავის თავში მოიცავს თანასწორობის პრინციპსაც.

შესაბამისად, არაკონსტიტუციური არ არის თავისთავად მართლმადიდებელი ეკლესიისთვის უმაღლესი საღვთისმეტყველო საგანმანათლებლო დაწესებულების სტატუსით საგანმანათლებლო საქმიანობის განხორციელების შესაძლებლობის, ისევე, როგორც ჩვენ მიერ გასაჩივრებული რიგი შესაძლებლობების მინიჭება, არამედ არაკონსტიტუციურია ასეთი შესაძლებლობების მხოლოდ მისთვის მინიჭება,“ – აღნიშნულია სარჩელში.

მირტაგ ასადოვის მოპასუხე პარლამენტი იქნება, რომელსაც სარჩელის დაკმაყოფილების შემთხვევაში „უმაღლესი განათლების შესახებ“ კანონის შეცვლა მოუწევს.

4 თვის დემეტრე ფიბროსარკომას ებრძვის – მას საზოგადოების დახმარება სჭირდება

4 თვის დემეტრე ჩიტაძეს ავთვისებიანი სიმსივნე აქვს. დიაგნოზი – ფიბროსარკომა მას თურქეთში დაუსვეს.

თურქეთში დემეტრეს ამჟამად ქიმიოთერაპიის პირველ კურსს უტარებენ. ბავშვის დედის, ოლღა მერებაშვილის თქმით, საჭიროა ქიმიოთერაპიის კიდევ შვიდი კურსი.

„ერთი თვის წინ დემეტრეს ფეხი შეუშუპდა, თავიდან კოღოს ნაკბენი გვეგონა, რადგან ბავშვი აბსოლუტურად ჯანმრთელი იყო და სხვა რამ არ გვიფიქრია.

თბილისში, კლინიკაში გვყავდა, სადაც გვითხრეს, ძვლის ანთებაა ბაქტერიით გამოწვეულიო და ჩაუტარდა ოპერაცია, ანთებითი პროცესის შესაჩერებლად. თუმცა ოპერაციის შემდეგ ბავშვს ფეხი ისევ შეუშუპდა და კიდევ ორი ოპერაცია გაუკეთდეს.

სულ ტყუილად ჩატარდა ეს სამი ოპერაცია, რადგან ამის შემდეგ თურქეთში წავედით და იქ, როცა ჩაატარეს დიაგნოსტირება, დადგინდა, რომ ეს იყო ავთვისებიანი სიმსივნე – ფიბროსარკომა“- გვეუბნება ოლღა.

ოთხი თვის დემეტრე და მისი მშობლები ერთი თვეა, რაც სტამბოლში, აჯიბადემის კლინიკაში არიან. ქიმიოთერაპიის კიდევ რამდენიმე კურსია საჭირო იმისთვის, რომ დემეტრეს ფეხზე ოპერაცია გაუკეთონ, ამას კი შესაძლოა რამდენიმე თვე დასჭირდეს.

დედის თქმით, მკურნალობა ძალიან დიდ თანხას უკავშირდება, ამიტომ საზოგადოების მხარდაჭერის იმედი აქვთ.

„ქიმიოთერაპიასა და დიაგნოსტირების ხარჯების დაფარვა მოვახერხეთ ახლობლების დახმარებით,  თანხის ნაწილი მოგვცა აჭარის ჯანდაცვის სამინისტრომაც, მაგრამ შემდეგ ეტაპებზე რა გვეშველება, უკვე არ ვიცით.

ძალიან ბევრ ფონდს მივმართეთ და უმეტესობამ უარი გვითხრა დახმარებაზე, რადგან წლის ბოლოა და ბიუჯეტი ამოწურულიაო.

მიმართული გვაქვს „სოლიდარობის ფონდისთვის“ და ველოდებით პასუხს. ექსპერტიზის დასკვნა უნდა წარვუდგინოთ, რომ ეს დაავადება საქართველოში არ იკურნება. წინააღმდეგ შემთხვევაში დაფინანსებას არ გასცემენ.

ბათუმის მერიასაც მივმართეთ, სადღაც 6 ათას ლარზეა საუბარი, მაგრამ ისიც არ ვიცით, მოგვცემენ თუ არა. იმედი გვაქვს, რომ საზოგადოება გულთან მიიტანს დემეტრეს მდგომარეობას და დაგვეხმარება მკურნალობაში“- გვეუბნება ოლღა მერებაშვილი.

4 თვის დემეტრეს დახმარების მსურველებს შეგიძლიათ თანხა გადარიცხოთ შემდეგ ანგარიშებზე:

თიბისი ბანკი:

GE64TB7147745064300039

საქართველოს ბანკი:

GE76BG0000000841213900

ლიბერთი ბანკი: 

GE36LB0711190327018001
მიმღები: როინ ჩიტაძე (დემეტრეს მამა)
Paypal: chito19921@gmail.com

„გოგოს რა უნდა მთაში“… ამ სტერეოტიპს ნელ-ნელა ვანგრევ“ – 17 წლის მთამსვლელი ხულოდან

17 წლის მარი კოჩალიძე ხულოში, სოფელ რიყეთში ცხოვრობს. მარი ახალგაზრდა მთამსვლელია. ცდილობს, რომ მისი გატაცების შესახებ ბევრ თანატოლს მოუყვეს, გამოცდილება გაუზიაროს და მათთან ერთად შეეწინააღმდეგოს სტერეოტიპს, რომ თითქოს ალპინიზმი ქალის საქმე არ არის.

  • საიდან დაიწყო მთამსვლელობის გზა თქვენთვის?

16 წლის ვიყავი, როცა ჩემმა დამ აჭარის მეკლდეურთა კლუბზე მითხრა. გავწევრიანდი, ზაფხულში ლაშქრობებზე დავდიოდი და ყველაფერი აქედან დაიწყო. მე სადაც ვცხოვრობ, იქ ფაქტობრივად არაფერი არ ხდებოდა მსგავსი და თავიდან ვფიქრობდი, რომ [მთამსვლელობა] ჩემთვის შეუძლებელი იყო და ეს მხოლოდ უცხოელებს შეეძლოთ. სინამდვილეში, ბავშვობიდან ვოცნებობდი კლდეებზე ცოცვაზე.

მოთხილამურეც ვარ, გამოვდივარ ჩემპიონატებზე, სადაც „კავკასიონის ბანაკზე“ გავიგე. ბანაკის მონაწილეები ზაფხულში მწვერვალებზე დაჰყავდათ. 2 კვირით წავედით სვანეთში, ვიცოცეთ კლდეებზე, ვისწავლეთ მთაში სიარული, ავედით 2 მწვერვალზე… გამოცდილება, რომელიც აქ მივიღე, ძალიან დამეხმარა.

ჩვენთან, ხულოში, მსგავსი რაღაცები ძალიან იშვიათია, მაგრამ ონლაინსივრცეში ბევრ რამეს ვსწავლობ. სულ ძიებაში ვარ. ჩემს თავს თავგადასავლების მაძიებელს დავარქმევდი. თუ მსგავსი ლაშქრობები გამოჩნდება, მინდა წავიდე, ჩავერთო, გამოცდილება შევიძინო.

ჩემი აზრით, მთამსვლელობა ძალიან ბევრ  რამეს გასწავლის. ამ ერთი წლის განმავლობაში ჩემს თავში პროგრესს ვგრძნობ. ამ საქმეში გამოცდილ ადამიანებთან ურთიერთობამ ბევრი რამ მასწავლა.

მე სადაც ვცხოვრობ [რიყეთში], მიმაჩნია, რომ იმის იქეთ კიდევ ბევრი რამაა… მინდა მთამსვლელობაზე უფრო მეტმა ჩემმა თანატოლმა გაიგოს და ძალიან გამიხარდება, თუ ვინმეს დააინტერესებს.

არ ვიცი, ჩემი ასაკის გოგო ან ბიჭი მთამსვლელი ხულოდან. შეიძლება არის, მაგრამ მე არ ვიცნობ.

  • შენი სოფლის სხვა ახალგაზრდებიც არიან მთამსვლელობით დაინტერესებულები?

როდესაც დავდიოდი მთებში, ვიღებდი ფოტოებს და ჩემს კლასელებს, მეგობრებს ვაცნობდი, ძალიან კარგი რამაა, შემომიერთდით-მეთქი, ბევრს დააინტერესა და სხვათა შორის, ბევრი უკვე ჩემს გუნდშიცაა, მაგრამ არის წინააღმდეგობები ოჯახიდან. არის სტერეოტიპი, რომ „გოგოს რა უნდა მთაში“ … ჩემი აზრით, ამ სტერეოტიპებს ნელ-ნელა ვანგრევ. თანხმობა წამოვიდა უკვე ოჯახებიდანაც, მაგრამ ბევრგანაა იგივე მდგომარეობა. მინდა დასრულდეს ეს ყველაფერი. ასე აღარ უნდა ვაზროვნებდეთ. უფრო მეტი შესაძლებლობა უნდა მივცეთ ბავშვებს, რათა ისწავლონ დამოუკიდებლად ცხოვრება და აკეთონ ის, რაც მათ უნდათ.

პირველ რიგში, იმაში გამიმართლა, რომ ჩემი ოჯახი ყოველთვის გვერდში მიდგას. ბებია, ბაბუა, მამა, დედა – ყოველთვის ყველაზე მეტად მიჭერენ მხარს და არასდროს ზღუდავენ ჩემს თავისუფლებას. პატარ-პატარა წინააღმდეგობებია მხოლოდ. მიუჩვევლები არიან, შენ გარდა არავინ დადის ამდენს, აღარ წახვიდეო, მაგრამ როცა ვუხსნი, მხარს მიჭერენ.

  • რით არის განსაკუთრებული მთამსვლელობა?

ყოველი ლაშქრობა ახალი თავგადასავალია. ჩემთვის მთა მედიტაციაა. მთაში უფრო გახსნილი ვარ, ვწერ დღიურებს, თითქოს ბუნებასთან ვთანამშრომლობ. კარგი განცდაა, დაღლილი რომ ადიხარ მწვერვალზე და შემდეგ გადმოჰყურებ ამ სილამაზეს. ანუ, შენ ეს შეძელი, მწვერვალს მიაღწიე.

კარავს შლი. დილით იღვიძებ, უცებ ნისლი ჩამოწვება, უცებ გადაიყრება… ამის ყურება ბედნიერებას მანიჭებს.

მარი კოჩალიძე
  • მცოცავი ქვების დროს, როცა მეტია წინააღმდეგობა, როგორ იქცევით?

თუ ძალიან საშიშია, იქ არ ვრისკავთ. ინსტრუქტორი ყოველთვის ისეთ ადგილს არჩევს, სადაც ნაკლები საფრთხეა. ან თოკზე ვართ ჩაბმულები.

  • აღჭურვილობას თქვენ თვითონ იძენთ?

აღჭურვილობას თავიდან მასწავლებელი მაძლევდა, მაგრამ ახლა ჩემს აღჭურვილობას ვაგროვებ, თანდათან ვყიდულობ, საკმაოდ ძვირი ღირს, ჯერ ბევრი არაფერი მაქვს. მხოლოდ ჩანთა შევიძინე, ცოტა უხარისხოა…

რამდენი წელია სასკოლოდ არაფერი არ მიყიდია. ფულს ვაგროვებ, რომ უფრო საჭირო ნივთები ვიყიდო, მაგალითად, საძილე ტომარა, კარავი და ა.შ. ბევრს დაუცინია, ტანსაცმელს რატომ არ ყიდულობო. ჩემთვის ესაა ყველაფერი.

უკვე დამოუკიდებლად მინდა მწვერვალებზე წავიდე, სოლო ლაშქრობები დავიწყო.

  • რა უნდა გაკეთდეს, რომ ახალგაზრდები უფრო მეტად დაინტერესდნენ მთამსვლელობით?

ჩემი აზრით, ამ სპორტს უფრო მეტად უნდა გაეცნონ ბავშვები. ბევრი არაფერი იციან ახალგაზრდებმა მთამსვლელობაზე, ლაშქრობებზე …

მეც რას წარმოვიდგენდი, რომ საქართველოში ასეთი რამ ხდებოდა. პირველ რიგში, გაეცნონ ამ სპორტს, მთამსვლელთა კლუბებს შემოუერთდნენ, თუ ვინმეს სურვილი აქვს.

რა თქმა უნდა, საჭიროა საზოგადოების ცნობიერების გაზრდა, რომ ბავშვებს მისცენ ამის საშუალება, რადგან სულ „გოგო ხარ და რა გინდა მთაში“ – ისმის.

მე არასდროს მეშინია, თუნდაც მაშინ, როცა მლანძღავენ… ყოველთვის ვაკეთებ იმას, რაც მინდა და ბედნიერი ვიქნები, თუ ჩემს თანატოლებს დავეხმარები. ბევრ მშობელთან მისაუბრია, ბევრი მშობლისგან ცუდი დამოკიდებულება წამოსულა. ბევრი ამბობს ჩემზე, რომ აი, მაგალითად, „დადის აქეთ-იქით, როგორ შეიძლება გოგოსთვის ასეთი რამო“, მაგრამ მე ამას ყურადღებას არ ვაქცევ.

რაღაცნაირად ბევრი მშობელი დავარწმუნე, რომ მათი შვილები უნდა გაუშვან ლაშქრობებზე, რაც ძალიან მახარებს.

  • რას გეგმავ სამომავლოდ?

ახლა აბიტურიენტი ვარ, ფსიქოლოგიაზე მინდა ჩავაბარო. ეს ერთი წელი ნაკლებად ვივლი ლაშქრობებზე. როცა უნივერსიტეტში ჩავაბარებ, დამატებით გიდების [მოსამზადებელ] სკოლაში მინდა ვისწავლო, ნახევრად ტურიზმის სფეროს გავყვე. შემდეგ, რასაც შევძლებ, საქართველოს ყველა მხარის შემოვლას დავიწყებ და როცა გავიზრდები, გამოცდილება მექნება, საზღვარგარეთაც წავალ. ძალიან მინდა გრენლანდიაში მოგზაურობა.

მთელი ცხოვრება, სანამ შესაძლებლობა მექნება, მთამსვლელობაში მინდა ვიყო ჩართული და იმ ახალგაზრდებს დავეხმარო, რომლებიც ამ საქმით დაინტერესდებიან.

  • როგორ ფიქრობ, ხულოს მუნიციპალიტეტს ამ მიმართულებით განვითარების პოტენციალი აქვს?

მაღალმთიან აჭარაში, კერძოდ ხულოში, ბევრი საინტერესო ადგილია ტურისტებისთვის.

ჩემი მეგობარი მოლაშქრე წამოვიყვანე ხულოში. ძალიან მოეწონა აქაურობა. ვფიქრობ, მწვერვალების გარდა სხვა ყველაფერი გვაქვს. უნდა იზრუნონ, მოაწესრიგონ ინფრასტრუქტურა და ეს ტურისტული მარშრუტები განავითარონ.

ხულოს გზები ძალიან დიდ პრობლემას წარმოადგენს. საშინელი, დამღლელი გზაა და ბევრი ხულოში ამოსვლისგან ამიტომ იკავებს თავს.

მარი კოჩალიძე

ბათუმში ბიზნესგეგმის შემუშავების ორდღიანი სემინარი ტარდება – ევროკავშირის პროგრამა

პროგრამის ფარგლებში Links „რედისონ ბლუ“ ბათუმში ბიზნეს გეგმის შემუშავების ორდღიანი სემინარი ჩატარდა 26-27 სექტემბერს.

Links-ი ცოდნისა და უნარების განვითარების ქსელებისა და პლატფორმების გაძლიერების პროგრამაა. თავის მხრივ Links-ი ევროკავშირის დიდი პროგრამის ნაწილია, რომელსაც ჰქვია Skills for jobs/განათლება დასაქმებისთვის.

ეს 53 მილიონიანი პროგრამა პროფესიული განათლების და შრომის ბაზრის განვითარების მხარდასაჭერად ცხრა პროექტს აფინანსებს. ამ პროექტებს არასამთავრობო ორგანიზაციები და აკადემიური ინსტიტუციები ახორციელებენ.

ბიზნესგეგმის შემუშავების ორდღიანი სემინარი ბათუმში

პროგრამის მიზანია დაეხმაროს საქართველოს მოქალაქეებს სამუშაო ადგილების მოძიებაში, პროფესიული თუ უწყვეტი განათლების მიღებასა და მეწარმეობის გაძლიერებაში.

ჯონდო ცერცვაძე ბათუმში ბიზნეს გეგმის შემუშავების სემინარის მონაწილეა. ბიზნეს იდეა აქვს – უნდა, რომ ნივრის მწნილი აწარმოოს და პროდუქტი პოპულარული გახადოს საქართველოში. ჯონდო გორიდანაა. ბიზნესიდეა მარტივად მოუვიდა: დედის გაკეთებულ მწნილებს აკვირდებოდა, მათ შორის საუკეთესოს, ნივრის მწნილის წარმოება გადაწყვიტა.

„ბიზნესიდეები საყოფაცხოვრებო გარემოში ჩნდება. ეს იდეაც ასე მომივიდა, მწნილებს შორის ყველაზე უფრო ნივრის მწნილი მიყვარს, დედაჩემი იდეალურად აკეთებს. რატომ არ უნდა ვაქციო ეს პროდუქტად, როცა საქართველოში ნივრის მწნილს ცალკე მაღაზიაში ვერსად იყიდი? Links-ის ტრენინგებზე მეწარმეობის საფუძვლებს გავეცანი. მიუხედავად იმისა, რომ ბიზნესის მიმართულებით არ მაქვს პროფესიული ცოდნა, ტრენინგ-სემინარებზე ბევრი რამ გავიგე და დავიჯერე, რომ ყველაფერი გამომივა“, – ამბობს ტრენინგის მონაწილე.

პროგრამას „Links“ „ფონდი ღია საზოგადოება საქართველო“ ახორციელებს საქართველოს გაეროს ასოციაციასთან ერთად ოთხ რეგიონში: აჭარაში, გურიაში, შიდა ქართლსა და ქვემო ქართლში.

პროექტის მიზანი ამ ოთხ რეგიონში ცოდნისა და უნარების განვითარება, დასაქმების ხელშეწყობა,  შრომის ბაზრის მოთხოვნებთან მიწოდების შესაბამისობის გაზრდაა.

პროექტის ბენეფიციარები არიან ახალგაზრდები, რომლებიც არ არიან ჩართული საგანმანათლებლო პროცესში და არც დასაქმებულები არიან.

„Links“-ის პროექტში ჩართულები არიან საგანმანათლებლო სერვისების მიმწოდებლები, პროფესიული სასწავლებლები, ადგილობრივი ახალგაზრდული და არასამთავრობო ორგანიზაციები, სხვა ჯგუფები.

ერთი წლის განმავლობაში საქართველოს „ღია საზოგადოების ფონდი“, ორგანიზაცია Mindworks-თან ერთად ატარებდა სამეწარმეო ტრენინგებს ქვეყნის ზემოთ ხსენებულ ოთხ რეგიონში. 6 თვიან სემინარებს ოთხასამდე ახალგაზრდა დაესწრო.

23 წლის ლუკა თხილაიშვილიც „Links“-ის ბიზნეს გეგმის შემუშავების ორდღიანი სემინარის მონაწილეა. ლუკა აპირებს გურული სანელებლების წარმოებას და რეალიზაციას.

„ეს ხის სპეციალურ საცეხელში დამზადებული სუნელია, მზადდება ნედლი ქინძის, თხილის, მარილის და წითელი წიწაკისგან. ხის საცეხელი წყალზე მუშაობს წისქვილის პრინციპით და სუნელს ცეხვავს. ასე მზადდებოდა გურიაში ტრადიციული სუნელი, მინდა სარეალიზაციო პროდუქტად ვაქციო ჩვენი ტრადიცია“, – ამბობს ტრენინგების 23 წლის მონაწილე.

„ღია საზოგადოების ფონდის“ წარმომადგენელი, ხათუნა იოსელიანი ამბობს, რომ სამომავლოდ პროგრამა „Links“-ის ფარგლებში მოეწყობა ბიზნეს მოდელების, მარკეტინგული გეგმების და გაყიდვების გეგმის განხილვა.

ასევე ბიზნესპროექტებისთვის საჭირო რესურსების განსაზღვრა პროექტის განვითარების სხვადასხვა ეტაპზე.

ხათუნა იოსელიანი

„ევროკავშირის პროგრამა skills4jobs-ის სრული ბიუჯეტი 48,85 მილიონი ევროა, აქედან 7 მილიონი გაიცა 9 პროექტზე, რომელთა შორის ერთერთი ჩვენია. მიზანი არის შრომის ბაზრის მოთხოვნებსა და მიწოდებას შორის შესაბამისობის გაზრდა, ახალგაზრდებისათვის, მოწყვლადი ჯგუფებისა და ქალებისათვის საგანმანათლებლო შესაძლებლობების შექმნა, განსაკუთრებით პროფესიული განათლებისა და მეწარმეობის მიმართულებით.

ამ ორდღიან სემინარზე განვიხილავთ ასევე ფულად ნაკადებსა და ბალანსს, მოგება-ზარალის უწყისების დამუშავებას და ბოლოს გვექნება ბიზნესპროექტების წარდგენა.

ახლა გვყავს 29 მონაწილე, რომლებსაც საინტერესო ბიზნესიდეები აქვთ, ამ ბიზნესიდეებს ვხვეწთ და შემდეგ უკვე ნოემბერში გამოვაცხადებთ საგრანტო კონკურსს, სადაც მათ მონაწილეობის მიღება შეეძლებათ.

გვაქვს 8 პროექტის დაფინანსების შესაძლებლობა, თითოეული პროექტისთვის გვაქვს გამოყოფილი 4000 ევრო“, – ამბობს ხათუნა იოსელიანი.

ბიზნესგეგმის შემუშავების ორდღიანი სემინარი ბათუმში

ბათუმის ორდღიანი სემინარების მონაწილეები „Links“-ის სხვა სემინარების მონაწილეებისგან შეარჩიეს. ხათუნა იოსელიანი ამბობს, რომ შეარჩიეს ინგლისური ენის, კომპიუტერული კურსებისა და მეწარმეობის, კარიერული კურსების გამორჩეული მსმენელები.

„პროექტის ფარგლებში ვადგენთ მეწარმეობის სახელმძღვანელოსაც, რომელსაც მერე პროფესიული სასწავლებლებიც გამოიყენებენ. სახელმძღვანელო განათლების სამინისტროსთან თანამშრომლობით შევიმუშავეთ. უკვე გვაქვს სამუშაო ვერსია, მალე საბოლოო ვერსიაც გვექნება“, – ამბობს ხათუნა იოსელიანი.


„ცოდნისა და უნარების განვითარების ქსელებისა და პლატფორმების“ (LINKS) პროექტი ხორციელდება ევროკავშირის დაფინანსებით, „საქართველოს გაეროს ასოციაციისა“ (UNAG) და „საქართველოს ღია საზოგადოების ფონდის“ (OSGF) მიერ, ხოლო აჭარის რეგიონში პროექტის პარტნიორი ორგანიზაცია „თავისუფალ ჟურნალისტთა სახლია“ (IJH) 

ბათუმის მერიის თანამშრომელი ცოლის ცემის ბრალდებით დააკავეს

ბათუმის სპორტული ცენტრის დირექტორი, არჩილ ბარამიძე, ოჯახში ძალადობის მუხლით დააკავეს. მას აღკვეთი ღონისძიების სახით პატიმრობა მოსამართლე ნინო სახელაშვილმა 22 სექტემბერს შეუფარდა.

გამოძიება ბათუმის მერიის უკვე ყოფილ თანამშრომელს ცოლზე ფიზიკურ ძალადობას ედავება.

„ის არ ცნობს თავს დამნაშავედ,“ – უთხრა „ბათუმელებს“ ადვოკატმა სიმონ ასათიანმა, რომელიც არჩილ ბარამიძის ინტერესებს იცავს. ადვოკატი მოსამართლეს ბრალდებულის 5 ათასი ლარი გირაოს სანაცვლოდ გათავისუფლებას სთხოვდა, თუმცა მოსამართლემ პროკურატურის მოთხოვნა დააკმაყოფილა.

ბრალის დადასტურების შემთხვევაში არჩილ ბარამიძეს მინიმუმ საზოგადოებისთვის სასარგებლო შრომა ელის 80-დან 150 საათამდე. ოჯახში ძალადობის მუხლით გათვალისწინებული მაქსიმალური სასჯელი 3 წლამდე თავისუფლების აღკვეთაა.

—————————-

ბათუმის სპორტული ცენტრი ბათუმის მერიას ეკუთვნის და ამ პოზიციაზე არჩილ ბარამიძე ბათუმის მერმა, არჩილ ჩიქოვანმა 2022 წლის 2 მაისს დანიშნა.

მანამდე არჩილ ბარამიძე ხელვაჩაურის მერის – ჯუმბერ ვარდმანიძის მოადგილე იყო. არჩილ ბარამიძის შესახებ „ბათუმელები“ გასულ წელს წერდა, როცა დადასტურდა, რომ მისი მეგობარი და „ქართული ოცნების“ კოორდინატორი მაჭახლის ხეობაში უკანონოდ აწარმოებდა ბიზნესს, ხელვაჩაურის მერია კი, უკანონობას არ იმჩნევდა. საიას შეფასებით, ჩნდებოდა ეჭვები კორუფციაზე და საჭირო იყო მინიმუმ მოკვლევის დაწყება.

არჩილ ბარამიძეს უკავშირდება კიდევ ერთი საქმე – 2020 წელს მიშა ბოლქვაძემ ენმ-დან დააფიქსირა, რომ არჩილ ბარამიძის სამსახურებრივი ავტომანქანით თორნიკე რიჟვაძის ნათესავი და „ქართული ოცნების“ აქტივისტი – მანუჩარ რიჟვაძე გადაადგილდებოდა. ის 2020 წლის საპარლამენტო არჩევნებზე მმართველი პარტიის კამპანიაში მონაწილეობდა.

რა უნდა იცოდეთ, სანამ თქვენს შვილს ფეხბურთზე შეიყვანთ – რჩევები მწვრთნელებისგან

ბათუმში ბავშვთა ფეხბურთზე მზარდი მოთხოვნაა. ქალაქში 7 კერძო საფეხბურთო სკოლაა, სადაც ასობით ბავშვი სწავლობს.

რა სჭირდება ბავშვთა ფეხბურთს განვითარებისთვის და რას უნდა მიაქციონ ყურადღება მშობლებმა, სანამ შვილს ფეხბურთზე შეიყვანენ, ჰკითხა „ბათუმელებმა“ ორი საფეხბურთო სკოლის, „დელფინის“ მწვრთნელს იურა ალეფირენკოს  და „პორტუსის“ პრეზიდენტს, ჯაბა ჭანტურიას.

„20 წელია ამ სფეროში ვარ და მსგავსი არ მახსოვს,“ – ბავშვების მხრიდან ფეხბურთისადმი გაზრდილი ინტერესით იწყებს საუბარს „ბათუმელებთან“ საფეხბურთო კლუბ „პორტუსის“ პრეზიდენტი, საფეხბურთო მენეჯერი ჯაბა ჭანტურია.

„ძალიან ბევრი ბავშვია დაინტერესებული ფეხბურთით. ამას, პირველ რიგში, ხელი შეუწყო ბათუმის ახალმა სტადიონმა და ბათუმის „დინამოს“ წარმატებებმა. ამ რაოდენობის ბავშვების ნაკადმა კი გააჩინა აუცილებლობა, ქალაქში გახსნილიყო საფეხბურთო სკოლები,“ – ამბობს ჯაბა ჭანტურია.

მისივე თქმით, ბავშვთა გაზრდილ ნაკადს ვერცერთი საფეხბურთო სკოლა მომზადებული ვერ შეხვდა.

დღეს ბათუმში მოქმედი საფეხბურთო სკოლების უმეტესობას არ აქვს საკუთარი ინფრასტრუქტურა, ამიტომ ვარჯიშები მუნიციპალურ მინი საფეხბურთო მოედნებზე ტარდება, რომელიც ხშირ შემთხვევაში სტანდარტებს ვერ აკმაყოფილებს. ხოლო მაღალი დონის მოედნები კერძო საკუთრებაშია და მისით სარგებლობისათვის სკოლებს სოლიდური თანხის გადახდა უწევთ.

„მოგეხსენებათ, რომ საწვრთნელი ბაზა ბათუმის „დინამოს“ გარდა არცერთ საფეხბურთო სკოლას არ გააჩნია. ამიტომ ვარჯიშები მუნიციპალურ საფეხბურთო მოედნებზე ტარდება. ერთი მოედანი არის ახალ ბულვარში, მეორე არის ყინულის სახლის ტერიტორიაზე, ასევე არის მოედანი ბაგრატიონის ქუჩაზე. ცალკეული სკოლა არჩევს ორ-სამ ადგილს, სადაც ატარებს ვარჯიშებს,“ – ამბობს ჯაბა ჭანტურია.

საფეხბურთო კლუბ “პორტუსის” აღსაზრდელები და მწვრთნელები

საფეხბურთო სკოლებში სწავლის თანხა განსხვავებულია. იწყება 50 ლარიდან და რიგ შემთხვევაში 110-120 ლარზე ადის.

  • რა პრობლემები აქვს ბავშვთა ფეხბურთს

საფეხბურთო სკოლა „დელფინი“ იურა ალეფირენკომ ერთი წლის წინ დააარსა, მაშინ, როდესაც კიევიდან ბათუმში გადმოვიდა საცხოვრებლად.

„თავიდან კიევში გვინდოდა ამ ყველაფრის გაკეთება, დაბრუნებას ვგეგმავდი. მაგრამ აქ არსებული მდგომარეობა რომ დავინახე – ვარჯიშებზე ვაკვირდებოდი რა ხდებოდა მოედნებზე, მივხვდი, რომ 10-15 წლით უკან ვართ. ამიტომაც გადავწყვიტე დამეფუძნებინა საკუთარი სკოლა. იმიტომ, რომ შორს ვართ იმ რეალობისგან, რაც ხდება დღეს თანამედროვე ფეხბურთში. ამ ვარჯიშებით, ამ მიდგომით, ამ ყველაფრით ძალიან შორს ვართ,“ – ამბობს იურა ალეფირენკო.

იურა ალეფირენკოს ვთხოვეთ დაესახელებინა ის მთავარი პრობლემები, რომელიც დღეს ბათუმში ბავშვთა ფეხბურთს აქვს.

„ინფრასტრუქტურა და მწვრთნელები, თუმცა მწვრთნელები – ჩემთვის ეს არის მაინც პირველი პრობლემა. ამიტომაც დავრჩი ამ ქალაქში. ჩემს ირგვლივ მაინც თუ შევძლებ რამეს შეცვლას და მაქვს იმედი რომ შევცვლი.

მეორე არის ინფრასტრუქტურა, რომელიც არ გვაქვს. ადრე, ჩემს ბავშვობაში უფრო მეტი მოედნები იყო, ვიდრე ახლა.

მოედნები აკლია ბათუმს, დიდი მოედნები. გვყავს საფეხბურთო სკოლები, რომლებიც ხან სად ვარჯიშობენ და ხან სად. ჩვენ მაგალითად უბნებშიც ვვარჯიშობთ. უბანში რომ შევდივართ, გვიწევს ჭიდაობა – „ცოტახანს დაგვითმეთ მოედანი“ ან „გთხოვთ, ათი წუთიც გვადროვეთ“, – ამბობს იურა ალეფირენკო.

არასაკმარის მოედნებს და ინფრასტრუქტურას ასახელებს მთავარ პრობლემად ჯაბა ჭანტურიაც.

„პირველი არის ინფრასტრუქტურა და მეორე არის მეტ საერთაშორისო ტურნირებში მონაწილეობა. საერთაშორისო ტურნირები საშუალებას აძლევს ჩვენს აღსაზრდელებს, შეეჯიბრონ საერთაშორისო წამყვანი საფეხბურთო აკადემიების გუნდებს, ისეთების, როგორიცაა იტალიის, თურქეთის, გერმანიის, ესპანეთის… ეს საჭიროა ბავშვების ფსიქოლოგიური მდგრადობის განვითარებისთვის. რომ მიხვდნენ, ისინიც ჩვენნაირი ბავშვები არიან და შეიძლება მათთან არამარტო საფეხბურთო პაექრობა, არამედ გამარჯვების მოპოვებაც,“ – ამბობს ჯაბა ჭანტურია.

  • ძველი სამწვრთნელო სკოლა და ახალი რეალობა

„ბათუმში არის ძალიან სუსტი მწვრთნელები,“ – ამბობს იურა ალეფირენკო და იქვე აღნიშნავს, რომ საქართველოს ფეხბურთის ფედერაცია ამ პრობლემის გამოსწორებას ცდილობს.

კერძოდ, ფედერაციამ დანერგა სწავლების ახალი სისტემა, რომლითაც ახალი თაობის მწვრთნელები გაიზრდებიან. ეს მწვრთნელები კი ახალი მიდგომებით აღზრდიან პატარა ფეხბურთელებს.

„ფეხბურთის ფედერაციაში ვსწავლობ. ძალიან კარგი სწავლება აქვთ, თანამედროვე. ჩვენზე ასაკიანი მწვრთნელებიც კი იძახიან, რომ შედარებაც არააო, „ახლა რომ გავსულიყავით გამოცდაზე, ვერ ჩავაბარებდითო“. მათ ადრე რაღაც კვალიფიკაცია კი აიმაღლეს, მაგრამ დღეს სულ სხვა სწავლებაა. ეს ახალი სწავლება, რომელიც ფეხბურთის ფედერაციამ დანერგა, გამოიწვევს უფრო კარგ მწვრთნელებს, უფრო შედეგზე ორიენტირებული მწვრთნელების თაობა წამოვა.

ჩემ მიერ ნათქვამი „შედეგი“ ზოგს არასწორად ესმის. შედეგი არის ის, რომ ბავშვი განვითარდება და არა ის, რომ „დღეს მე „დინამო“ თბილისს მოვუგე თუ წავაგე“. ამ შედეგზე მაქვს საუბარი,“ – ამბობს იურა ალეფირენკო.

  • რა გავლენას ახდენს ბავშვობაში ვარჯიშის დროს მიღებული ტრავმები საფეხბურთო კარიერაზე

„საკმაოდ მწვავე საკითხია და ცუდ მდგომარეობაში გვაქვს სპორტული მედიცინა,“ – ამბობს ბავშვი ფეხბურთელების ტრავმებზე საუბრისას ჯაბა ჭანტურია. მისი თქმით, არცერთ საფეხბურთო სკოლას არ ჰყავს სამედიცინო წარმომადგენელი. გარდა ამისა, ბათუმში პრობლემაა სპორტული მედიცინის მუშაკის პოვნაც. ტრავმებს ხელს უწყობს უხარისხოდ გაკეთებული მინი მოედნები.

„ეს პირდაპირ აზიანებს ბავშვების ჯანმრთელობას. მაგრამ აქვე აღსანიშნავია ის გარემოებაც, რომ რიგი ტრავმები გამოწვეულია არასწორი წვრთნისგან. გარკვეული პერიოდის შემდეგ [მწვრთნელების მხრიდან] ხდება ტრავმების გადაბრალება უხარისხო მოედნებზე.

მაგრამ საფეხბურთო მოედანი სტანდარტების შესაბამისი რომ არ არის, ეს თავიდანვე ვიცით. ამიტომ ვარჯიშები იმდაგვარად უნდა იყოს დაგეგმილი, რომ ბავშვები მაქსიმალურად დაბალი ინტენსივობით დატვირთონ. ასე ბავშვი აღარ მიიღებს ტრავმას,“ – ამბობს ჯაბა ჭანტურია.

სპორტული მოედნები, რომ ცუდი და უხარისხოა ამაზე საუბრობს იურა ალეფირენკოც.

„ჩვენი მთავარი პასუხისმგებლობა არის ის, რომ ბავშვები იყვნენ ჯანმრთელები. ჩვენთან 6-12 წლამდე ბავშვებში ისეთი ფიზიკური დატვირთვები არ არის, რომ მშობლებმა ინერვიულონ – ვაიმე სად გავუშვი, ისეთი დატვირთვები არ მისცეს მწვრთნელმა, რომ მუხლების პრობლემა დაეწყოს.

მაგალითად, მაგნოლიასთან მდებარე მოედანი, რომელზეც ვვარჯიშობთ, არის ძალიან ცუდი. ამიტომ აქ ბავშვებს არ ვთხოვთ, რომ ჩაიცვან ბუცები. აზრი არ აქვს აქ ბუცების ჩაცმას. მაშინ ჩვენ თვითონ დავიწყებთ მუხლების და მყესების გაფუჭებას, აქ რომ ბუცებით ვავარჯიშოთ ბავშვები,“ – ამბობს იურა ალეფირენკო.

იურა ალეფირენკოს თქმით, არსებობს სპეციალური პროგრამა, რომლითაც შესაძლებელია შეამოწმო თუ რა პრობლემა აქვს ბავშვს.

„ხშირი პრობლემა, რასაც გუნდში ვაწყდებით, არის მყესების პრობლემა. ყველას ჩავარდნილი აქვს ფეხები და ამის გასწორებაა ჯერ საჭირო. ზოგს ზურგის პრობლემა აქვს. ამას სანამ არ გაასწორებ, შენ ფიზიკური დატვირთვა არ შეგიძლია. ტერფებს, მუხლებს ყველაფერს ყურადღებას ვაქცევთ და მერე ვიწყებთ ჩვენს სავარჯიშო გეგმას.

ბევრი მეთოდია ფეხბურთში, ბევრნაირად გამხდარან ფეხბურთელები, მაგრამ მე ვუბრუნდები მთავარს – ჩვენ გვაქვს შეხება 5-დან 12 წლამდე ასაკის ბავშვებთან. ეს ასაკი იმდენად საბაზისოა, აქ თუ ჩვენ ბავშვი დავაზიანეთ, მერე ჩვევების გადასწორება 15-16 წლის ასაკში ძალიან რთული იქნება. თუ ბავშვს არ აქვს სწორი მუხლები, ამის გასწორებაზე თუ დღეს არ ვიმუშავეთ, 15 წლის ასაკში მისი კარიერა ჩათვალეთ დამთავრებულია,“ – ამბობს იურა ალეფირენკო.

ის თვლის, რომ მწვრთნელმა მუდმივად უნდა ისწავლოს, გაეცნოს თანამედროვე მიდგომებს და შემდეგ ეს ცოდნა ბავშვებს გადასცეს. ამ პროცესში კი მწვრთნელებს სახელმწიფო უნდა ეხმარებოდეს. მას ვკითხეთ, როგორ შეუძლია სახელმწიფოს არსებული სიტუაციის გამოსწორება.

„მწვრთნელებით. ფეხბურთის ფედერაციას უნდა მოსთხოვოს, რომ გამოუშვას უფრო მაგარი და ჭკვიანი მწვრთნელები. უფრო გაამკაცრონ იქ სწავლება. უფრო მომთხოვნი უნდა იყოს, რაც გაკეთდა უკვე. ახლა მე ვსწავლობ და ვხედავ. როგორც ვიცი, ადრე  არ იყო ასეთი მოთხოვნა და კი გვეტყობა, ყველანაირად გვეტყობა. თუ ჩვენ პატარებიდან არ დავიწყეთ, დიდებში შედეგი როგორ გვექნება?“ – კითხვას სვამს ფეხბურთის მწვრთნელი.

  • მშობლების ფაქტორი

საფეხბურთო სფეროში მომუშავე პროფესიონალები ბავშვ ფეხბურთელთა წარმატების ერთ-ერთ მნიშვნელოვან ფაქტორად ასახელებენ მშობლებს, რომლებსაც ხშირ შემთხვევაში არასწორი მოლოდინები აქვთ და საბოლოოდ აზიანებენ ბავშვის წვრთნის პროცესში.

„მშობლებიც ძალიან შორს არიან დღევანდელი რეალობისგან თუ რა ხდება ჩვენი ქვეყნის საზღვრებს გარეთ. საზღვარგარეთ უფრო აქცევენ ყურადღებას, თვითონ ბავშვის განვითარებას და არა – „დღეს მოიგო ჩემმა ბავშვმა თუ წააგო“. ეს ძალიან დიდი პრობლემაა. მოგება – წაგებაზე მშობლები უპირისპირდებიან ერთმანეთს. თუ წააგო გუნდმა – ფუ, მწვრთნელი არ ვარგა, წამოდი ვეძებოთ რაღაცა სხვა გუნდში გადავიდეთ და ა.შ.“ – ამბობს იურა ალეფირენკო.

„ჩვენი სკოლა აქტიურად მუშაობს არამარტო ბავშვების წვრთნაზე, არამედ ვმუშაობთ ცნობიერების ამაღლებაზეც. მშობლებს სწორი ინფორმაცია გვინდა მივაწოდოთ, სად არიან მათი შვილები, რა არის ჩვენი მიზანი და რა გვინდა, რომ მივიღოთ სამომავლოდ.

ქართველი მშობელი აქტიურია – ჩართულია, როგორც გუნდის შენებაში, ასევე თავისი შვილის წარმატებაში და მაქსიმალურად გვერდში უდგანან სკოლის განვითარებას და შვილს რა თქმა უნდა. არის მომენტები, როდესაც ემოციები ცოტა ზედმეტი გამოდის, მაგრამ ჩვენ ამ საკითხზე ვმუშაობ. ვცდილობთ მივაწოდოთ ინფორმაცია მშობლებს, რათა ისინი თავიანთი კომპეტენციის ფარგლებში იყვნენ ჩართულები,“ – გვითხრა ჯაბა ჭანტურიამ.

  • რას ნიშნავს არასწორი წვრთნა და როგორ არ უნდა მოიქცეს მშობელი

„როდესაც ბავშვთა ფეხბურთზე ვსაუბრობთ… მე ხშირად მინახავს კი არადა, მეც როცა პატარა ვიყავი, ასე ხდებოდა: თამაშის დაწყებამდე 20 წუთით ადრე მწვრთნელი გველაპარაკებოდა -„აბა დღეს ასე უნდა ვქნათ, ისე უნდა ვქნათ“. ფაქტობრივად თამაშის წინ მიდიოდა/მიდის ფეხბურთის სწავლება.

ის ერთი კვირა რას შვრებოდნენ?

თამაშის წინ რომ კრებ პატარა ბავშვებს, მანამდე რას აკეთებდი?

ბავშვი თამაშის დღეს ისედაც განცდებშია… ბედნიერია. ასევე აქ მთავარია, გზაში, სანამ სტადიონზე მოვა, მშობლები რას ეუბნებიან.

პირველ რიგში, თქვენ ბავშვთან არ გიწევთ ურთიერთობა, მშობელთან გიწევთ. თუ მშობელი მოგყვებათ და თქვენს რჩევებს ითვალისწინებს, მაშინ უკვე გიადვილდებათ ბავშვთან ურთიერთობა.

ბავშვები თამაშზე ისედაც მოტივირებულები არიან და ისინი ყველაფერს ხედავენ: ხედავენ თამაშის დროს როცა გოლს გაუშვებს, ამაზე როგორია მშობლის რეაგირება. მშობელი რას ამბობს? როგორი სახით ზის? მხარდაჭერა არის თუ არ არის. მწვრთნელი როგორ იქცევა? ეუბნება: „არა უშავს“ თუ „ბიჭო რა ქენი? ეს რა გააკეთე“?

დაინახა მშობელმა, რომ მწვრთნელი გაბრაზდა. მერე ამ ბავშვს სანამ სახლში მივა, მეორე შიში მანქანაში აქვს. თუ მშობელი ეუბნება – „შენ ასეთო, შენ ისეთო, იქ ასე რატომ არ გააკეთე?“ – აქ უკვე ჩნდება „მშობელი მწვრთნელი“. თითქოს ერთი მწვრთნელი არ ეყო თამაშზე, ის მწვრთნელი, რომელიც უკმაყოფილოა – რა ქენით, უნდა მოგეგოთ, უნდა გაგეტანათ, როგორ ვერ გაიტანეთ, სად იხედებოდით?

ამ დროს ბავშვი როგორია? სტადიონზე რამემ რომ გადაიფრინოს, შეიძლება მაგას გააყოლოს თვალი ბურთის ნაცვლად. თამაშებზეც ხდება ასეთი რაღაცები. ასეთ რეაგირებაზე ბავშვი ისტრესება, შიში უჩნდება, მერე საერთოდ აღარ უნდა მოედანზე გამოსვლა და თამაში,“ – ამბობს იურა ალეფირენკო.

მისი თქმით, ბავშვთა ჯგუფებში ცდილობს ინოვაციური მიდგომები დანერგოს, რათა ბავშვებისთვის ვარჯიში უფრო სასიამოვნო იყოს, ვიდრე სტრესული.

„მოგება-წაგება ჩვენთვის შედეგი არ არის მნიშვნელოვანი. ჩვენ ვარჯიშებზეც ვთამაშობთ ისე, რომ ანგარიშები არ გვაქვს. 2014 წელს დაბადებულ ბავშვებს შორის ფესტივალი ჩავატარე. ბავშვები გავაფრთხილე – დღეს ვთამაშობთ ისე, რომ შედეგი არ არის. გოლები ვინ რამდენი გაიტანა, რამდენი გაუშვა არაფერს არ ვანგარიშობთ. ბავშვები იცით რა ბედნიერები იყვნენ? მაგრამ უკმაყოფილო მშობლები იყვნენ მოედნის გარეთ – რას ჰქვია შედეგი არ არის? აბა როგორ გავიგო ვინ მოიგო – ვინ წააგო? ბავშვები ბედნიერები არიან, მშობლები კი უკმაყოფილოები.

ჩვენ შეიძლება ბურთი გავათამაშოთ, დავკარგოთ, გოლი გავიტანოთ, მაგრამ არ ვუღალატებთ ჩვენს სტილს. ჩვენთან ბავშვმა იცის, რომ შეიძლება რაღაც არ გამოუვიდეს, მაგრამ ამის გამო მას არ გაუბრაზდებიან. მას მხარს დაუჭერენ.

ჩვენ, რა თქმა უნდა, ვთამაშობთ იმისათვის, რომ მოვიგოთ, მაგრამ სტილი და ფილოსოფია, რაც გვაქვს, როგორ უნდა მოვიგოთ, ამას არასდროს ვუღალატებთ“.

___

მთავარი ფოტო: იურა ალეფირენკო და ჯაბა ჭანტურია

სქესობრივი დანაშაულისთვის გასამართლებული პირები სკოლებში ვერ დასაქმდებიან

სკოლაში, საბავშვო ბაღსა და სხვა ნებისმიერ სახის საგანმანათლებლო-სააღმზრდელო  დაწესებულებაში მუშაობის დაწყებისას, პირს ნასამართლობის ცნობის წარდგენის გარდა, მოეთხოვება ცნობა იმის შესახებ, არის თუ არა ნასამართლევი სქესობრივი დანაშაულისთვის.

2020 წლის 23 ივლისის დადგენილებით, სქესობრივი დანაშაულზე ნასამართლევ პირს ეკრძალება ზოგადსაგანმანათლებლო დაწესებულებაში დასაქმება მიუხედავად იმისა, მოხსნილი ან გაქარწყლებული აქვს თუ არა ნასამართლობა.

გარდა საბავშვო ბაღებისა და სკოლებისა, სქესობრივი დანაშაულისთვის ნასამართლევი პირი ვერც სკოლისგარეშე სახელოვნებო და სასპორტო სასწავლებლებში იმუშავებს და ის შეზღუდულია ამ დაწესებულებებისთვის, ნებისმიერი სახის მომსახურების მიწოდების კუთხითაც.

როგორც ბათუმის ერთ-ერთ სკოლაში გვითხრეს, აღნიშნული ნორმა ვრცელდება იმ პირებზე, რომლებმაც 2020 წლის შემდეგ დაიწყეს მუშაობა ან აპირებენ სკოლაში ან სხვა ტიპის სააღმზრდელო ან საგანმანათლებლო დაწესებულებაში დასაქმებას.

სქესობრივ დანაშაულში ნასამართლევი პირი ასევე ვერ იმუშავებს ადამიანით ვაჭრობის (ტრეფიკინგის) მსხვერპლთა მომსახურების დაწესებულებებსა და ძალადობის მსხვერპლი ქალების თავშესაფარში.

ასევე, „სოციალური დახმარების შესახებ“ საქართველოს კანონით გათვალისწინებულ სპეციალიზებულ დაწესებულებაში, უმაღლეს საგანმანათლებლო დაწესებულებებში.

სქესობრივი დანაშაულის მუხლით ნასამართლევი პირების ელექტრონული ბაზა შექმნილია საქართველოს შს სამინისტროში, რომელშიც შეტანილია სქესობრივი თავისუფლებისა და ხელშეუხებლობის წინააღმდეგ მიმართული დანაშაულის ჩადენისთვის მსჯავრდებულ პირთა და უფლებაჩამორთმეულ პირთა პერსონალური მონაცემები.

მუნიციპალიტეტები, ადრეული, სკოლამდელი აღზრდის თუ სხვა ტიპის საგანმანათლებლო დაწესებულებები, ვალდებულნი არიან ამ ნორმის შესაბამისად იმოქმედონ.

ეს წესი მიმართულია იქითკენ, რომ მოხდეს სქესობრივი თავისუფლებისა და ხელშეუხებლობის წინააღმდეგ მიმართული დანაშაულის პრევენცია და გამოვლენის პროცესში ჩართულმა უწყებებმა კოორდინირებულად იმუშაონ.

2023-ში უკრაინის არმია შეიძლება უკვე ყირიმში იყოს – გენერალი ჰოჯესი

უკრაინის შეიარაღებული ძალები დააბრუნებენ რუს ოკუპანტებს 23 თებერვლის პოზიციებზე უკვე 2022 წლის ბოლომდე, მომავალი წლის შუაში კი უკრაინის ჯარები უკვე შეიძლება ყირიმში იყვნენ – ასეთი პროგნოზი აქვს ევროპაში აშშ-ის სახმელეთო ჯარების ყოფილ მეთაურს, გენერალ ბენ ჰოჯესს.

ლიეტუვის საზოგადოებრივი მაუწყებლისთვის მიცემულ ინტერვიუში ის ამბობს, რომ დარწმუნებულია, უკრაინა ყირიმს დაიბრუნებს.

„ვფიქრობ, ჩვენ რუსეთის არმიის მხრიდან შემდგომი ზეწოლის მოწმენი გავხდებით, მაგრამ მე მაინც ვიმედოვნებ, რომ ამ წლის ბოლომდე უკრაინის არმია რუსეთის ჯარებს 23 თებერვლის პოზიციებზე დააბრუნებს, მომდევნო წლის შუაში კი უკრაინა შეიძლება უკვე ყირიმში იყოს“, – ამბობს გენერალი.

მანამდე პრეზიდენტმა ვოლოდიმირ ზელენსკიმ განაცხადა, რომ უკრაინას აქვს გეგმა და აუცილებლად დაიბრუნებს ყირიმს.

ნახევარკუნძულის დაბრუნების საკითხზე არაერთი კომენტარი გააკეთეს უკრაინის ხელისუფლების სხვა წარმომადგენლებმაც, მათ შორის, თავდაცვის მინისტრმა ოლექსი რეზნიკოვმა. უკრაინის პრეზიდენტმა დღესაც გაიმეორა, რომ ომი მხოლოდ და მხოლოდ უკრაინის ყველა ოკუპირებული ტერიტორიის გათავისუფლებით დამთავრდება  და უკრაინა სხვა სცენარს არ განიხილავს.

ყირიმის გათავისუფლებაზე ლაპარაკი განსაკუთრებით მას შემდეგ გააქტიურდა, რაც ზაფხულში ნახევარკუნძულზე ზედიზედ რამდენიმე აფეთქება მოხდა, უკრაინის შეიარაღებული ძალების მთავარსარდალმა ვალერი ზალუჟნიმ ყირიმზე დარტყმები დაადასტურა და განაცხადა, რომ ნახევარკუნძულზე კონტროლის მოპოვება უკრაინის არმიისთვის ქვეყნის სამხრეთშიც და აღმოსავლეთშიც წარმატების საფუძველია.

Exit mobile version