დიდი ბრიტანეთის დაზვერვა ყირიმის ავიაბაზაზე რუსეთის 8 სამხედრო თვითმფრინავის განადგურებას ადასტურებს. დღევანდელ რელიზში უწყება აღნიშნავს, რომ 9 აგვისტოს მომხდარის მიზეზი უცნობია.
თუმცა უზარმაზარი სოკოსებრი ღრუბლები, რომლებიც მოწმეთა ვიდეოში ჩანს, მიუთითებს, რომ საბრძოლო მასალების დაახლოებით ოთხი ღია საწყობი მაინც აფეთქდა.
„აფეთქებების შედეგად სულ მცირე ხუთი სუ-24, გამადგურებელი-ბომბდამშენი და სამი სუ-40, მულტიფუნქციური საბრძოლო თვითმფრინავი განადგურდა ან სერიოზულად დაზიანდა. ასევე მნიშვნელოვნად დაზიანდა „საკის“ ცენტრალური გაშლის ზონა, თუმცა აეროდრომი კვლავაც მოქმედია“, – წერს ბრიტანეთის დაზვერვა.
უწყების ცნობით, 8 საბრძოლო თვითმფრინავი იმ საჰაერო ფლოტის მხოლოდ მცირე ნაწილია, რომლის გამოყენებაც რუსეთს უკრაინასთან ომში შეუძლია.
„აეროდრომი, ძირითადად, რუსეთის შავი ზღვის ფლოტის თვითმფრინავების ავიაბაზად გამოიყენებოდა. საზღვაო ფლოტის ავიაციის შესაძლებლობები ახლა მნიშვნელოვნად დაქვეითებულია. ინციდენტი, სავარაუდოდ, აიძულებს რუს სამხედროებს, გადააფასონ შესაძლო საფრთხეები, რადგან ყირიმი მათთვის უსაფრთხო ზურგად განიხილებოდა,“ – მიუთითებს დაზვერვა.
ყირიმში, ნოვოფედოროვკასთან მდებარე „საკის“ სამხედრო ავიაბაზაზე, რამდენიმე აფეთქება 9 აგვისტოს მოხდა. რუსეთის თავდაცვამ განაცხადა, რომ მომხდარი უკრაინულ მხარეს არ უკავშირდება და აეროდრომზე საავიაციო საბრძოლო მასალები აფეთქდა. უწყების ცნობით, არ დაზიანებულა სამხედრო ტექნიკა და არ არის მსხვერპლი.
უკრაინის თავდაცვის უწყებამ იმავე დღეს ფეისბუქზე გამოქვეყნებულ პოსტში დაწერა, რომ ხანძრის მიზეზების შესახებ ინფორმაცია არ აქვს და რუსებს „სახანძრო უსაფრთხოების წესებისა და არასათანადო ადგილებში მოწევის აკრძალვის შესახებ“ შეახსენა.
რუსეთის ზარალი სამმა უცხოურმა წყარომ სატელიტურ ფოტოებზე დაყრდნობით შეაფასა. ანალიტიკოსებმა აღნიშნეს, რომ 9-დან 14-მდე თვითმფრინავი განადგურდა ან დაზიანდა.
