მილიონიანი მშენებლობა ხელვაჩაურის მერს ქონებრივ დეკლარაციაში მითითებული არ აქვს.
ამბავი 1 – მშენებლობა
ხელვაჩაურის მერმა, ჯუმბერ ვარდმანიძემ მახინჯაურში სამსართულიანი ფეშენებელური სახლი აიშენა ზღვის ხედით. სახლი ტერასულ მიწის ნაკვეთზე ისეა აშენებული, რომ ყველა სართულის ყველა ფანჯრიდან, ასევე ყველა აივნიდან ზღვის და მთის ხედი იშლება. სახლის კარკასი დასრულებულია, დახურულია სახურავიც და ახლა ხელოსნები ფასადის მოპირკეთებაზე მუშაობენ.
მერს თავისი ქონება ჯერჯერობით არ აქვს შეფასებული, თუმცა ჯუმბერ ვარდმანიძის მეზობლად მშენებარე კორპუსში ბინების კომერციული ფასის მიხედვით თუ ვიმსჯელებთ [შავი კარკასის საშუალო ღირებულება 950 დოლარი], მერის ახალი სახლი, ყოველგვარი მიწის ნაკვეთის გარეშე, 1.5 მილიონზე მეტი ლარი ღირს.
ჯუმბერ ვარდმანიძის მშენებარე სახლი
მიწის ნაკვეთზე, სადაც მერმა სახლი აიშენა, მშენებლობის ნებართვა გაცემული არ არის, რაც ბათუმის მერიაში დაგვიდასტურეს. ეს იმას ნიშნავს, რომ მუნიციპალიტეტის არჩეული მერი კანონს არ დაემორჩილა და მშენებლობის ნებართვის მოთხოვნით ბათუმის მერიის ქალაქმშენებლობისა და არქიტექტურის სამსახურს არც კი მიმართა.
რაც შეეხება მიწის ნაკვეთს, მახინჯაურში, თამარ მეფის პირველ შესახვევში, ჯუმბერ ვარდმანიძის ოჯახი მიწის ორ ნაკვეთს, ჯამში 4500 კვადრატულ მეტრს დიდი ხანია ფლობს და მერად არჩევის შემდეგ ეს ნაკვეთები უმნიშვნელოდ გააფართოვა. ამ ნაკვეთების შესახებ ქონებრივ დეკლარაციაში ჯუმბერ ვარდმანიძემ 2014 წელსაც ჩაწერა, როცა ხელვაჩაურის საკრებულოს თავმჯდომარის მოადგილე გახდა.
შემდეგ კი უკვე მერმა ჯუმბერ ვარდმანიძემ ეს ნაკვეთები რამდენიმე ნაწილად დაყო და ოჯახის წევრებზე თანასაკუთრებაში დაარეგისტრირა, ამასთან გაიზარდა ნაკვეთების ფართობიც და ჯამში 4803 კვადრატულ მეტრს მიაღწია.
მშენებლობის და მასთან დაკავშირებული ხარჯების შესახებ მერს ქონებრივ დეკლარაციაში არასდროს ჩაუწერია. თუმცა, მისივე ქონებრივი დეკლარაციების მიხედვით, სახლის ფართობი, რომელიც 2014 წლიდან 2017 წლამდე 220 კვადრატული მეტრი იყო, 2018 წელს კი 535,83-მდე გაიზარდა [ამ ეტაპზე სახლის ფასადს აპირკეთებენ]. მერს დეკლარაციაში არ აუხსნია, როგორ მოხდა ეს, როგორ გაორმაგდა საცხოვრებელი სახლის ფართობი, მიუხედავად იმისა, რომ ამის განმარტებას მას კანონი ავალდებულებდა. დეკლარაციაშივე უნდა იყოს ასახული, რა დაუჯდა მერის ოჯახს ახალი სახლის მშენებლობა.
ამ ეტაპზე არჩეული მერი, ჯუმბერ ვარდმანიძე, ოჯახთან ერთად, ახალი მშენებლობის გვერდით მდებარე სახლში ცხოვრობს. ეს სახლიც მერის ოჯახის საკუთრებაა.
რაც შეეხება კიდევ ერთ ბუნდოვანებას თუ უკანონობას – ჯუმბერ ვარდმანიძეს დეკლარაციაში უწერია, რომ ბათუმში, ჭავჭავაძის ქუჩაზე ფლობს 103 კვადრატულ მეტრ კომერციულ ფართობს. ხელვაჩაურის მერის ჩანაწერებით, ეს ქონება მას აჩუქეს, ზეპირი განმარტებით კი, კომერციული ფართობი ეკუთვნის მის სიძეს, რომელსაც თავად ბანკიდან სესხის აღებაში დაეხმარა და ბინაც სწორედ ამიტომ გადაუფორმა.
ბათუმში ქონების გაქირავებით ჯუმბერ ვარდმანიძე წელიწადში 54 ათას ლარს იღებს შემოსავლის სახით. „ყოველთვიურად ქირაში 4 500 ლარს ვიხდით“ – გვითხრეს აქ განთავსებული კომერციული დაწესებულების თანამშრომლებმა. შესაბამისად, მერი ვალდებულია ეს შემოსავალი დაბეგროს და ბიუჯეტში გარკვეული თანხა გადაიხადოს. ჯუმბერ ვარდმანიძე დიდი ალბათობით ამ გადასახადსაც უმალავს ბიუჯეტს, რადგან მის ქონებრივ დეკლარაციაში არაფერია ნათქვამი 5 400 ლარზე, რასაც ის კომერციული ფართობის გაქირავებიდან იღებს.
რასაკვირველია, ჯუმბერ ვარდმანიძეს აქვს თავისი ოფიციალური შემოსავლებიც. ის, როგორც უკვე აღვნიშნეთ, ხელვაჩაურის არჩეული მერია. ამ თანამდებობაზე მისი წლიური შემოსავალი 33 768 ლარია. ამას გარდა, ჯუმბერ ვარდმანიძე ლექციებსაც კითხულობს ბათუმის საზღვაო აკადემიაში. აქ მისი შემოსავლები 6 485 ლარია.
ჯუმბერ ვარდმანიძის დეკლარაციაში კიდევ ერთი დეტალი იქცევს ყურადღებას, მერის მეუღლისთვის 2019 წელს 16463,87 ლარი ძმას უჩუქებია.
ჯუმბერ ვარდმანიძის დეკლარაციების მიხედვით, მისი ოჯახის არც ერთი სხვა წევრი არ არის დასაქმებული და არ იღებს ხელფასს, წინააღმდეგ შემთხვევაში მერს ეს დეკლარაციაში უნდა აესახა.
ამბავი 2 –
ხელვაჩაურის მერი ჯუმბერ ვარდმანიძე სამსახურებრივი ავტომანქანით წინასაარჩევნო შეხვედრებზე სოფელ ჩხუტუნეთში დააფიქსირეს. სოფელში ამომრჩეველს შეხვდნენ „ქართული ოცნების“ კანდიდატები – ანზორ ბოლქვაძე და ფრიდონ ფუტკარაძე. სააგიტაციო შეხვედრას ხელვაჩაურის მერი, ჯუმბერ ვარდმანიძეც ესწრებოდა. ამაზე “ბათუმელებმა” სექტემბრის მიწურულს გამოაქვეყნა სტატია:
ხელვაჩაურის მერი სამსახურის ავტომანქანით „ოცნების“ სააგიტაციო შეხვედრაზე
ამბავი 3 – ჯუმბერ ვარდმანიძე ჟურნალისტს აგინებს [ჩანაწერი შეიცავს უცენზურობას]
კიდევ ერთი საინტერესო დეტალი ჯუმბერ ვარდმანიძის შესახებ – ჩანაწერი, რომელშიც ჯუმბერ ვარდმანიძემ „ბათუმელების“ ჟურნალისტს აგინა, სწორედ მაშინაა ჩაწერილი, როცა წინასაარჩევნო შეხვედრებზე სამსახურებრივი ავტომობილით გადაადგილებასთან დაკავშირებით ინტერვიუსთვის დავუკავშირდით. ხელვაჩაურის მერის გაღიზიანება მოჰყვა შეკითხვას, რატომ გადაადგილდება ის „ქართული ოცნების“ მაჟორიტარი კანდიდატის საარჩევნო კამპანიაში მერიის ანუ სახელმწიფოს ავტომანქანით, რასაც კანონი კრძალავს.
კითხვის მოსმენის შემდეგ ჯუმბერ ვარდმანიძე გაღიზიანდა და ჟურნალისტი სიტყვიერად შეურაცხყო. ჟურნალისტის შენიშვნის შემდეგ, რომ მას, როგორც არჩეულ მერს, შევახსენეთ, არ აქვს უფლება მოქალაქეებს და ჟურნალიტებს ასე ესაუბროს, მერი კიდევ უფრო აგრესიული გახდა და უცენზურო გინებაზე გადავიდა.
____
გაფრთხილება – ჩანაწერი შეიცავს უცენზურო გინებას
სტატია მომზადებულია პროექტის ფარგლებში – “სიტყვის თავისუფლების მხარდაჭერა”. პროექტს ახორციელებს არასამთავრობო ორგანიზაცია „თავისუფალ ჟურნალისტთა სახლი“. პროექტის ფინანსური მხარდამჭერია ამერიკული ფონდი „ეროვნული წვლილი დემოკრატიისთვის“ [NED]. არარის აუცილებელი სტატიაში გამოთქმული მოსაზრებები გამოხატავდეს დონორი ორგანიზაციის შეხედულებებს.
