ჩრდილოკორეული დრონის მიერ საჰაერო სივრცის დარღვევის გამო სამხრეთ კორეამ ჰაერში გამანადგურებლები და ვერტმფრენები ააფრინა. როგორც „როიტერსი“ იუწყება, ამის შესახებ სამხრეთკორეელმა სამხედროებმა განაცხადეს.
გავრცელებული ცნობის თანახმად, ჩრდილოკორეულმა უპილოტო აპარატმა ორ ქვეყანას შორის არსებული დემილიტარიზებული ზონა გადაკვეთა. ეს ფხენიანის მიერ სეულის საჰაერო სივრცის დარღვევის პირველი დადასტურებული შემთხვევაა 2017 წლის შემდეგ.
ადგილობრივი გამოცემა „ნიუზ 1“ ანონიმურ სამხედრო პირზე დაყრდნობით წერს, რომ ერთ-ერთმა დრონმა სულაც დედაქალაქ სეულამდე იფრინა.
სამხრეთკორეული მხარე იუწყება, რომ დრონების ჩამოგდება სცადა, თუმცა არ აკონკრეტებს, იყო თუ არა დრონები შეიარაღებული და ჩამოაგდეს თუ ვერა.
ქვეყნის ტრანსპორტის სამინისტროს ცნობით, დაახლოებით ერთი საათის განმავლობაში, სამხედროების მოთხოვნით, შეწყდა ფრენები ინჩხონისა და კიმპჰოს აეროპორტებში.
აგრეთვე, ერთ-ერთმა სამხრეთკორეულმა გამანადგურებელმა, რომელიც დრონის ჩამოსაგდებად აფრინდა, კატასტროფა განიცადა. პილოტები გადარჩნენ და საავადმყოფოში იმყოფებიან.
