ბათუმი 65 ახალ ავტობუსს 2023 წლის მაისამდე ეტაპობრივად მიიღებს, ამის შესახებ „ბათუმელებს“ მერიის შპს „ბათუმის ავტოტრანსპორტში“ უთხრეს.
კომპანიის ინფორმაციით, ახალი ავტობუსებით ე.წ. ყვითელ ავტობუსებს ჩაანაცვლებენ.
ბათუმის ავტოტრანსპორტის ავტოპარკში ამ დროისთვის 154 ავტობუსია, თუმცა ქალაქში გარკვეულ საათებში მუნიციპალური ტრანსპორტი გადაჭედილია. ეს განსაკუთრებით დილით, სკოლებში მეცადინეობის დაწყებამდე და გაკვეთილების დასრულების შემდეგ პერიოდშია საგრძნობი.
„ბათუმელებს“ ერთ-ერთი მოქალაქე დაუკავშირდა კიდეც და გვითხრა, რომ მისი ბავშვები ქალაქის მე-2 საჯარო სკოლაში, მეორე ცვლაში სწავლობენ, დღეს, 9 დეკემბერს კი, საღამოს 6 საათის შემდეგ ვერც N11 ავტობუსში მოახერხა ასვლა და ვერც N13-ში:
„ბავშვებთან ერთად რთულია და ვერც მოვახერხე ავტობუსში ასვლა. ორი 11 ნომერი გავუშვი, შემდეგ გადმოვედი გორგილაძეზე და 13 ნომერიც გადავსებული იყო ხალხით“.
ხალხით გადაჭედილი N11 და N13 ავტობუსები ბათუმში / 9.12.2022 / მოქალაქის მიერ მოწოდებული ფოტოები
„ბათუმის ავტოტრანსპორტში“ გვითხრეს, რომ, როცა 65 ახალ ავტობუსს მიიღებენ და „ძველ“ ავტობუსებს ჩაანაცვლებენ, პარალელურად დაიწყება როგორც ძველი ავტობუსების ტექნიკური ექსპერტიზა, ასევე სამარშრუტო ხაზების ოპტიმიზაციაზე მუშაობა.
„ბათუმის ავტოტრანსპორტის“ მიერ ოთხი თვის წინ მოწოდებული ინფორმაციით, ავტოპარკში შემდეგი ავტობუსები აქვთ:
- 60 ერთეული „ზონდა“ – ე.წ. ყვითელი ავტობუსები [რომლებიც მთლიანად ჩასანაცვლებელია];
- 40 – „ისუზუ“ [ლურჯი, ახალი]
- 40 – „ისუზუ ატამან“ [ლურჯი, ახალი]
- 8 – ელექტროავტობუსი
- 6 – „ბოგდანი“ [საგარეუბნო]
რაც შეეხება ახალი ავტობუსების ყიდვას:
ბათუმისთვის 65 ახალი ავტობუსის შესყიდვასა და მათი გეგმური ფლობის მომსახურებაზე გამოცხადებულ ტენდერში გაიმარჯვა შპს „ჯი-თი გრუპმა“, რომელიც მერიას ერთ ავტობუსს 536 600 ლარად მიჰყიდის.
ჯამში ქალაქი 34 879 000 ლარს გადაიხდის 65 ავტობუსში [დღგ-სა და ყველა მომსახურების ჩათვლით].
ამ თემაზე:
https://batumelebi.netgazeti.ge/news/442471/
