რუსულმა ჯარმა 2022 წლის ბოლომდე დონეცკის საზღვრებზე გასვლის დავალება მიიღო – უკრაინა

უკრაინული მხარის ცნობით, რუსულმა ჯარმა 2022 წლის ბოლომდე დონეცკის ოლქის ადმინისტრაციულ საზღვრებამდე გასვლის დავალება მიიღო.

უკრაინული გამოცემა „უნიანის“ ცნობით, ამის შესახებ უკრაინის თავდაცვის მინისტრის მოადგილემ, ანა მალიარმა ტელემარათონის ეთერში განაცხადა. მალიარის თქმით, რუსულმა მხარემ ყველაზე დიდი ძალისა და ტექნიკის კონცენტრაცია ბახმუტის მიმართულებაზე მოახდინა.

„ამოცანა აქვთ, კალენდარული წლის ბოლომდე გავიდნენ დონეცკის ოლქის საზღვრებზე“, – აღნიშნა მან.

მისივე თქმით, რუსული მხარე ვერ ინარჩუნებს დაკავებულ ფრონტის ხაზს და ამიტომ ირჩევს იმ მონაკვეთებს, სადაც ძალების მაქსიმალური კონცენტრაცია შეუძლია.

„დღეს მტერი ქალაქის ალყაში მოქცევას ცდილობს, მაგრამ ეს არ გამოსდის“, – დაამატა მან.

ბახმუტი აღმოსავლეთ უკრაინისთვის ბრძოლაში მნიშვნელოვან როლს თამაშობს. ქალაქი ამჟამად უკრაინის კონტროლის ქვეშაა. ცოტა ხნის წინ ბახმუტში პრეზიდენტი ვოლოდიმირ ზელენსკი იყო ჩასული.

• ზელენსკი ჩავიდა ბახმუტში, ფრონტის ყველაზე ცხელ წერტილში – მედია