რატომ აქვს ნასვრეტები ბათუმში, რუსთაველზე დაგებულ ახალ ფილებს - „მუჭისოდენა თუა, გამოიცვლება“ - Batumelebi • ბათუმის მერია, კეთილმოწყობა, • batumelebi.ge

„მუჭისოდენა თუა [ნასვრეტები], გამოიცვლება“ – უთხრა „ბათუმელებს“ ბიზნესმენმა მამუკა ჟღენტმა, რომელსაც ბათუმში, რუსთაველის ქუჩაზე დაგებული ახალი ფილების შესახებ ვკითხეთ.

ბათუმში, რუსთაველის ქუჩის რეაბილიტაცია ჯერ არ დასრულებულა, თუმცა გარკვეულ მონაკვეთებზე ასფალტის საფარის დაგება, ასევე ტროტუარის მოწყობა დასრულებულია. ეს მონაკვეთი აჭარის არალეგიტიმური მთავრობის თავმჯდომარემ და ბათუმის მერის მოვალეობის შემსრულებელმა 2025 წლის 25 მაისს გახსნეს.

მერიის მიერ გავრცელებული კადრებით „ოცნების“ ხელისუფლების წარმომადგენლებმა ფეხით ძირითადად ავტომანქანების სავალ ნაწილზე დაგებულ ასფალტზე გაისეირნეს. რეაბილიტაციაც, სხვა სამუშაოებთან ერთად, აქ სწორედ ქვაფენილის აყრას და ასფალტის დაგებას გულისხმობდა.

მერიის ვიდეოკადრებში აქცენტიც სწორედ ასფალტზე იყო გადატანილი. ტროტუარებზე კი ერთი თვალის შევლებითაც ჩანს, რომ ახალდაგებულ ფილებს ბევრგან ღრმულები აქვს, ამოტეხილია, კიდეები კი – დაზიანებული.

ახალი ფილების ხარისხზე, მათ შორის, დიდი ზომის ნასვრეტებისა და ღრმულების გამო მოქალაქეებს კითხვები რომ გაუჩნდათ, ეს სამუშაოს შემსრულებელმაც იცის, თუმცა მამუკა ჟღენტი „ბათუმელებთან“ ამბობს, რომ მას დეფექტი ჯერ არ დაუფიქსირებია.

„ეს არის ტრავერტინი, ბუნებრივი ქვა, ნასვრეტები არის ბუნებრივი, თვითონ ქვის სტრუქტურაა ასეთი. დიდი თუა ეს [ნასვრეტი] და ქვას რთული სიტუაცია თუ აქვს, ეს გამოიცვლება. არც უნდა იყოს დიდი ნასვრეტებით – შეიძლება ხელოსანს გამოეპარა სადმე დაგების დროს.

რამდენიმე ფოტო დაიდო – 4 ფილის ფოტოსურათი, მაგრამ ჯერ უნდა მაჩვენოს ვინმემ, სად არის? მილიონ ფილაში სად უნდა ვეძებო ასეთი ფილა?“ – გვიპასუხა მამუკა ჟღენტმა. ის კომპანია „ბონდი 2009“-ის დაკვეთით, ქვეკონტრაქტის საფუძველზე მუშაობს.