სამტრედია-გრიგოლეთის ჩქაროსნული ავტომაგისტრალის 8-კილომეტრიანი მონაკვეთი [ლანჩხუთი-ლესა] გაიხსნა დღეს, 17 დეკემბერს.
ახალგახსნილი 4 -ზოლიანი მონაკვეთი იწყება ლანჩხუთში და მთავრდება სოფელ ლესაში. შესაბამისად, ავტობანით მოძრავი ავტოტრანსპორტი სოფელ ჯაპანადან სოფელ ლესამდე [და პირიქით] მონაკვეთში ისე იმოძრავებს, რომ აღარ გაივლის ქალაქ ლანჩხუთს.
სამტრედია-გრიგოლეთის ავტომაგისტრალი მაქსიმუმ 2020 წელს მაინც უნდა დასრულებულიყო მთლიანად.
სამტრედია-გრიგოლეთის გზის მშენებლობა თავის დროზე ოთხ მონაკვეთად [ლოტად] დაიწყო და 2025 წლის დეკემბრის მდგომარეობით მხოლოდ ორი მონაკვეთია დასრულებული/გახსნილი:
- ლოტი 1 – სამტრედია-ჯაპანა [დაუსრულებელია]
- ლოტი 2 – ჯაპანა-ლანჩხუთი [გახსნილია]
- ლოტი 3 – ლანჩხუთი-ხაჯალია [დაუსრულებელია, დღეს გაიხსნა ლანჩხუთი-ლესას მონაკვეთი / დარჩენილია ლესა-ხაჯალიის მონაკვეთი]
- ლოტი 4 – ხაჯალია-სუფსა [გახსნილია]
აღნიშნული გზის სამტრედია-ჯაპანის მშენებარე მონაკვეთზე [ლოტი 1] 2023 წლის თებერვალში რიონზე გადასასვლელი ხიდი ჩაინგრა. მანამდე, 2 წლით ადრე კი, ამ მონაკვეთის დასასრულებლად ბიუჯეტიდან 72 მილიონი ლარის გამოყოფა გახდა აუცილებელი, მიუხედავად იმისა, რომ მშენებლობა დონორების მიერ იყო დაფინანსებული.
რაც შეეხება ლანჩხუთი-ხაჯალიის მონაკვეთს [ლოტი 3] – სამუშაოები აქ 2022 წელს განახლდა და საქართველოს საავტომობილო გზების დეპარტამენტის მაშინდელი ინფორმაციით 2024 წელში უნდა დასრულებულიყო.
საავტომობილო გზების დეპარტამენტის დღევანდელი ინფორმაციით „სამტრედია-გრიგოლეთის მაგისტრალური გზის მესამე მონაკვეთის მშენებლობა ევროპის საინვესტიციო ბანკისგან (EIB) მიღებული სესხითა და სახელმწიფო თანადაფინანსებით ხორციელდება, რომლის საერთო მოცულობა 324.6 მილიონი ლარია.“
შეგახსენებთ, რომ სამტრედია-გრიგოლეთის გზის პირველი მონაკვეთი [ლოტი 1] კომპანია Road Building ALTCOM LLC-ს უნდა აეშენებინა, ხოლო მესამე მონაკვეთი [ლოტი 3] – Todini Costruzioni Generali S.p.A-ს, თუმცა, გზების დეპარტამენტის ინფორმაციით ამ კომპანიებმა თავის დროზე ვალდებულებები არ შეასრულეს. მაშინ „ბათუმელებს“ დეპარტამენტმა მოგვწერა, რომ მათ ყველა სასამართლო დავა მოიგეს:
„რაც შეეხება საერთაშორისო არბიტრაჟში (პარიზი, საფრანგეთი) მოგებულ დავებს, საერთაშორისო არბიტრაჟმა Road Building ALTCOM LLC-ს მიაკუთვნა დაახლოებით 64 მილიონი ლარი, Todini Costruzioni Generali S.p.A-ს მიაკუთვნა დაახლოებით 56 მლნ ლარი და Astaldi S.p.A-ს მიაკუთვნა დაახლოებით 68 მლნ ლარი. გარდა აღნიშნულისა, გაცნობებთ, რომ მთლიანად საერთაშორისო კონტრაქტორების მიმართ ამოქმედებული გარანტიების ფარგლებში ამოღებულ იქნა 123,7 მლნ ლარი. არბიტრაჟის მიერ მიღებული გადაწყვეტილება საბოლოოა და მიმდინარეობს სააღსრულებო პროცედურები“, – მოგვწერეს გზების დეპარტამენტიდან 2022 წლის ოქტომბერში.
სამტრედია-გრიგოლეთის გზა საბოლოოდ გრიგოლეთი-ქობულეთის გზის მონაკვეთით ქობულეთის შემოვლით გზას უნდა შეუერთდეს, თუმცა, გრიგოლეთი-ქობულეთის 14 კილომეტრიანი გზაც დათქმულ ვადაში არ დასრულდა და ჯამში მხოლოდ 11 კილომეტრია გახსნილი.
სამტრედია-გრიგოლეთის ავტობანი / სოფელი ლესა / ფოტო: საქართველოს საავტომობილო გზების დეპარტამენტის ფეისბუქგვერდიდან
