მზია ამაღლობელის ადვოკატები 5 თვეა საქართველოს იუსტიციის უმაღლესი საბჭოდან ითხოვენ ბათუმის საქალაქო სასამართლოს მოსამართლე ნინო სახელაშვილის უმაღლესი იურიდიული განათლების დამადასტურებელ დოკუმენტს.
დღეს, 11 ნოემბერს, ქუთაისის სააპელაციო სასამართლოში მიმდინარე სასამართლო პროცესზე ეს საკითხი ადვოკატებმა კიდევ ერთხელ დააყენეს.
მზია ამაღლობელის ადვოკატის, მაია მწარიაშვილის თქმით, მიუხედავად იმისა, რომ მოსამართლის კვალიფიკაციის შესახებ ინფორმაცია საჯაროა, არც იუსტიციის საბჭო და არც საქართველოს ტექნიკური უნივერსიტეტი, ნინო სახელაშვილის იურიდიული განათლების დამადასტურებელ დოკუმენტს არ ასაჯაროებს.
მოსამართლე ნინო სახელაშვილმა არსებითად განიხილა მზია ამაღლობელის მიმართ დაწყებული სისხლის სამართლის საქმე და მას 2-წლიანი სასჯელიც გამოუტანა.
ადვოკატების თქმით, არის თუ არა სახელაშვილი სისხლის სამართალში კვალიფიცირებული, მზია ამაღლობელის დაცვის მხარისთვის უმნიშვნელოვანეს გარემოებას წარმოადგენს.
მაია მწარიაშვილის თქმით, ის ინფორმაცია, რაც იუსტიციის უმაღლესი საბჭოს ვებგვერდზეა გამოქვეყნებული ნინო სახელაშვილის შესახებ, აჩენს კითხვის ნიშნებს იმასთან დაკავშირებით, თუ რამდენად აკმაყოფილებს მისი კვალიფიკაცია საერთო სასამართლოების შესახებ საქართველოს კანონით დადგენილ კრიტერიუმებს.
ოფიციალური სივის მიხედვით, ნინო სახელაშვილმა 2010 წელს დაამთავრა საქართველოს ტექნიკური უნივერსიტეტის ჰუმანიტარულ-სოციალური ფაკულტეტი სამართალმცოდნეობის სპეციალიზაციით, ხოლო 2012 წელს დაამთავრა საქართველოს ტექნიკური უნივერსიტეტის ბიზნეს-ინჟინერინგის მაგისტრატურა კერძო სამართლის სპეციალიზაციით.
2011 წელს გაიარა მოსამართლის თანაშემწის სასწავლო კურსი, 2019 წელს ჩააბარა მოსამართლეობის საკვალიფიკაციო გამოცდა სამოქალაქო და ადმინისტრაციული სამართლის სპეციალიზაციაში, ხოლო 2020-2021 წლებში იყო იუსტიციის უმაღლესი სკოლის მსმენელი.
ის რომ ნინო სახელაშვილს სისხლის სამართალში კვალიფიკაცია არ აქვს, 18 მარტს გამართულ სასამართლო სხდომაზე თავადვე დაადასტურა. ახლა ადვოკატები ეძებენ დოკუმენტს, რომლითაც მისი იურიდიული განათლება დადასტურდება.
დღეს, 11 ნოემბერს, ქუთაისის სააპელაციო სასამართლოში მზია ამაღლობელის საქმის განხილვა დაიწყო. „ბათუმელები“ გთავაზობთ პირდაპირ, განახლებად რეპორტაჟს მზია ამაღლობელის სასამართლო პროცესიდან.
მზია ამაღლობელის ადვოკატები ასაჩივრებენ 6 აგვისტოს, ბათუმის საქალაქო სასამართლოში, ნინო სახელაშვილის გამოტანილ განაჩენს, რომლის თანახმადაც მზია ამაღლობელს 2 წლით პატიმრობა მიესაჯა. ისინი გამამართლებელი განაჩენის გამოტანას მოითხოვენ. სააპელაციო სასამართლოში მზია ამაღლობელის საქმის მომხსენებლი მოსამართლეა ნიკოლოზ მარგველაშვილი. კოლეგიაში შედიან მოსამართლეები – მარინა სირაძე და ნანა ჯოხაძე.
მას შემდეგ, რაც „ოცნების“ მთავრობამ სასამართლოებში ფოტო/ვიდეო გადაღება აკრძალა, სასამართლო პროცესების ოპერატიულად გაშუქების ერთადერთ გზად ჟურნალისტების მიერ პროცესზე გაკეთებული ჩანაწერები გახდა.
13:05 სთ – მზია ამაღლობელის სხდომა 13:00 საათზეა დანიშნული, თუმცა ჯერ არ დაწყებულა. მანდატურები ამბობენ, რომ სხდომა 24-კაციან დარბაზში უნდა ჩატარდეს. დასწრების მსურველი ბევრად მეტია.
მზია ამაღლობელი რამდენიმე წუთის წინ მოიყვანეს რუსთავის ქალთა კოლონიიდან სასამართლოს შენობაში. პენიტენციური მანქანის დაბურულ შუშაში მისი გადაღება გამოცემა „მედიაჩექერმა“ შეძლო.
13:10 სთ – დარბაზში უკვე შევიდნენ პროკურორები – თორნიკე გოგეშვილი და შოთა ჩხაიძე.
“სამარცხვინო!” – ამ რეპლიკებით შეაცილეს ისინი ამაღლობელის მხარდასაჭერად შეკრებილებმა.
მზია ამაღლობელის კოლეგებმა, ოჯახის წევრებმა და მხარდამჭერებმა სხდომის დაწყებამდე, სასამართლოსთან სიმბოლური აქცია გამართეს. მათი მოსაზრებები შეგიძლიათ მოისმინოთ “ბათუმელების” პირდაპირ ეთერში.
13: 15 სთ – მზია ამაღლობელის მხარდასაჭერად მოსული მოქალაქეების ნაწილი სასამართლოს ჭიშკრებთან შეაყოვნეს. მათ სასამართლოს ეზოშიც კი არ უშვებენ. მზია ამაღლობელის მხარდასაჭერად, სასამართლოს უკანა ეზოსთან დაგეგმილმა სიმბოლურმა აქციამ სასამართლოს ცენტრალურ შესასვლელთან გადაინაცვლა. შეკრებილები სასამართლოს ეზოში შემოსვლას მოითხოვენ, თუმცა ჭიშკარს არ აღებენ.
13: 20 სთ – „სილა რეჟიმს“- ამ წარწერით და მზია ამაღლობელის გამოსახულებით მაისური აცვია გოჩა მჟავანაძეს, „საერთაშორისო გამჭვირვალობა – საქართველოს“ აჭარის რეგიონულ წარმომადგენელს.
სხდომათა დარბაზში შემოსვლისას მას მანდატურმა უთხრა, რომ მაისური უნდა გაეხადა, ან ზემოდან შემოეცვა რამე. გოჩა მჟავანაძემ უარი თქვა მაისურზე გამოსახული წარწერის დაფარვაზე. მანდატურმა უთხრა, რომ გაფრთხილებას აძლევს და მისი დარბაზში დარჩენის, ან გაძევების შესახებ გადაწყვეტილებას მოსამართლე მიიღებს.
13: 30 – მზია ამაღლობელი უკვე დარბაზშია. ტრადიციულად, ის დგას მისი უფლებადამცველების უკან, არ ჯდება ბრალდებულის სკამზე.
მოსამართლე ნიკოლოზ მარგველაშვილმა სხდომა გახსნა. ის მზია ამაღლობელს საკუთარ უფლებებს განუმარტავს.
„საპროცესო შეთანხმებასთან დაკავშირებით მიმდინარეობს მოლაპარაკება?” – იკითხა მოსამართლემ.
„არა“ – უპასუხა მას პროკურორმა თორნიკე გოგეშვილმა.
ადვოკატი კახა წერეთელი დარბაზის შეცვლის შუამდგომლობას აყენებს. მან მოსამართლეს განუმარტა, რომ სხვა ქალაქებიდან ჩამოსულია ბევრი ადამიანი, რომლებსაც სხდომაზე დასწრება უნდათ და სთხოვა, უფრო დიდ დარბაზში გადასვლა.
მოსამართლე ნიკოლოზ მარგველაშვილმა განაცხადა, რომ ეს საკითხი უკვე განიხილეს, თუმცა დღეს უფრო დიდ დარბაზში გადასვლის შესაძლებლობა არ არსებობს. მან ადვოკატს უთხრა, რომ თხოვნას მომდევნო სხდომისთვის გაითვალისწინებენ.
ადვოკატი მაია მწარიაშვილი აყენებს შუამდგომლობას დამატებითი მტკიცებულებების დაშვების შესახებ.
მაია მწარიაშვილმა ჩამოთვალა ის პრიზები და პრემიები, რომლებიც მზია ამაღლობელმა ბოლო თვეების განმავლობაში მიიღო საერთაშორისო ორგანიზაციებისგან. მათ შორის, ევროკავშირის უმაღლესი ჯილდო ადამიანის უფლებათა დაცვის საკითხებში, სახაროვის პრემია.
გარდა ამისა, მწარიაშვილმა მოითხოვა საქართველოს ტექნიკურ უნივერსიტეტთან და იუსტიციის სამინისტროსთან მიმოწერის დამადასტურებელი დოკუმენტების დასაშვებად ცნობა.
ამ წერილებით მზია ამაღლობელის ადვოკატები მოითხოვენ მოსამართლე ნინო სახელაშვილის განათლების დამადასტურებელ დოკუმენტს სისხლის სამართლის სპეციალიზაციაში. ისინი განმარტავენ, რომ მათ ჯერ კიდევ საქალაქო სასამართლოში საქმის განხილვისას არაერთხელ დააყენეს სახელაშვილის აცილების შუამდგომლობა იმ საფუძვლით, რომ მოსამართლეს არ აქვს შესაბამისი კომპეტენცია.
მაია მწარიაშვილმა სააპელაციო სასამართლოს მოსამართლეთა კოლეგიას სთხოვა, გაითვალისწინონ ის გარემოება, რომ მათ დღემდე არ აქვთ იმ მოსამართლის განათლების დამადასტურებელი დიპლომი, რომელმაც მზია ამაღლობელს 2-წლიანი პატიმრობა მიუსაჯა.
გარდა ამისა, მაია მწარიაშვილმა წარადგინა დოკუმენტები მზია ამაღლობელის ჯანმრთელობის დინამიკის შესახებ. მან განსაკუთრებით ყურადღება გაამახვილა მზია ამაღლობელის მხედველობის პრობლემაზე.
14:00 სთ – კიდევ ერთი შუამდგომლობა ეხება მზია ამაღლობელის მობილური ტელეფონისა და სხვა პირადი ნივთების დაბრუნების საკითხს, რომელიც, როგორც ადვოკატმა განმარტა, დღემდე არ დაუბრუნებიათ მისთვის.
ადვოკატი კახა წერეთელი განმარტავს, რომ მზიასთვის პატიმრობის მისჯიდან დღემდე მის მიმართ სხვა გამამტყუნებელი განაჩენები რომ გამოეტანათ, ისინი აუცილებლად დაერთვებოდა საქმეს დამატებით მტკიცებულებებად. ზუსტად ამავე ლოგიკით უნდა დაერთოს საქმეს ის საერთაშორისო ჯილდოები, რომლებიც მან მიიღო.
პროკურორი თორნიკე გოგეშვილი აცხადებს, რომ ის ჯილდოები, რომლებიც მზია ამაღლობელმა თავისუფლებისა და დემოკრატიისთვის, ასევე სიტყვის თავისუფლებისთვის ბრძოლისთვის მიიღო, არ არის რელევანტური მიმდინარე საქმისთვის.
მან თქვა, რომ ეს ჯილდოები არის კონკრეტული ორგანიზაციების გადაწყვეტილება, რომელსაც შემხებლობა არ აქვს მოცემულ სისხლის სამართლის საქმესთან.
გარდა ამისა, პროკურორი არ ეთანხმება, რომ საქმეს დაერთოს ის დოკუმენტები, რომლითაც ადვოკატებმა მოსამართლე ნინო სახელაშვილის განათლების დამადასტურებელი დოკუმენტები გამოითხოვეს იუსტიციის სამინისტროდან და ტექნიკური უნივერსიტეტიდან. გოგეშვილი მიიჩნევს, რომ საკმარისია ზეპირი განმარტება, რომელიც სახელაშვილმა ჯერ კიდევ პირველი ინსტანციის სასამართლოში საქმის განხილვისას გააკეთა და სააპელაციოში ამის განხილვა დროს გაწელავს.
პროკურორი თანახმაა, რომ საქმეს დაერთოს მზია ამაღლობელის ჯანმრთელობის მდგომარეობის ამსახველი დოკუმენტები. ის თანახმაა, საქმეს დაერთოს მოთხოვნა, ამაღლობელის პირადი ნივთების – მობილური ტელეფონის, გასაღებისა და პლასტიკური ბარათის დაბრუნების შესახებ. პროკურორმა განმარტა, რომ მინდობილ პირს ნებისმიერ დროს შეუძლია წაიღოს ამაღლობელის საბანკო ბარათი და გასაღები. რაც შეეხება მობილურ ტელეფონს, პროკურორის განმარტებით, მასზე დანიშნული ექსპერტიზის პასუხი ჯერ კიდევ არ მიუღიათ. შესაბამისად, მისი დაბრუნება, ამ ეტაპზე, ფიზიკურად არ შეუძლიათ.
14:15 სთ – „თქვენი ხმა ძალიან ცუდად მოდის ჩემამდე” – მიმართავს მზია ამაღლობელი მოსამართლე ნიკოლოზ მარგველაშვილს. მოსამართლე ჰპირდება, რომ უფრო ხმამაღლა ისაუბრებს.
რამდენადაც დამსწრეთა სკამიდან ჩანს (დარბაზი საკმაოდ გრძელია და ტრიბუნის მიღმა მოსამართლის დანახვა ჭირს), მოსამართლის წინ მიკროფონი არ არის დამაგრებული.
სხდომა მზია ამაღლობელის მხარდამჭერი შეძახილების ფონზე მიმდინარეობს. „თავისუფლება მზია ამაღლობელს“ – ისმის სასამართლოს ეზოში მიმდინარე აქციიდან.
როგორც ჩანს, მსგავსი პერფორმანსი უცხოა ქუთაისის სააპელაციო სასამართლოს მანდატურებისთვის. მათ სცადეს ხმის ჩახშობა – ფანჯრების დახურვა, თუმცა ყველა ფანჯარა უკვე დახურული აღმოჩნდა, შეძახილების ხმა კი დარბაზში მაინც ისმის.
უკვე თითქმის ერთი საათია, რაც სხდომა მიმდინარეობს. ყველა ზის, გარდა მანდატურებისა და თავად მზიასი.
მზია ამაღლობელი არ არღვევს მისივე დადებულ პირობას – არ ჯდება ბრალდებულის სკამზე.
ის დგას ბრალდებულებისთვის გამოყოფილი შემინული სივრცის უკიდურეს მარჯვენა ნაწილში, მოსამართლის მხარეს.
აცვია ცისფერი პერანგი, თმა ისევ მოკლედ აქვს შეჭრილი, ბათუმის საქალაქო სასამართლოში განაჩენის გამოცხადების – 6 აგვისტოს შემდეგ, თითქოს, უფრო გამხდარია.
ხელში უჭირავს კალამი და ქაღალდი. პერიოდულად იკეთებს მხედველობის სათვალეს – მაშინ, როცა რამეს ინიშნავს. თუმცა, ძირითადად სათვალის გარეშეა.
ეტყობა, რომ გულისყურით უსმენს სხდომის მიმდინარეობას და ცდილობს, არაფერი გამორჩეს. პროკურორების საუბრისას, ძირითადად, იღიმება.
„მეტი სანქციები, რაც შეიძლება“ – უპასუხა მან მოსამართლის კითხვას, ხომ არ სურდა რამის დამატება ადვოკატის სიტყვის შემდეგ.
იქამდე, ადვოკატი მაია მწარიაშვილი საუბრობდა მოსამართლე ნინო სახელაშვილის სანქცირებაზე და განმარტავდა, რა საფუძვლით ითხოვენ მის აცილებას.
შეგახსენებთ, რომ სანქცირებულები არიან საქმის პროკურორებიც — თორნიკე გოგეშვილი და შოთა ჩხაიძე.
15:30 სთ – მას შემდეგ, რაც დაცვის მხარის მიერ წარდგენილი დამატებითი მტკიცებულებების დასაშვებობის საკითხი განიხილეს, მსჯელობა გაგრძელდა იმ შუამდგომლობების განხილვით, რომელიც მზია ამაღლობელის ადვოკატებს საქალაქო სასამართლოში არ დაუკმაყოფილეს.
პირველ რიგში განიხილეს მოსამართლე ნინო სახელაშვილის აცილების შესახებ შუამდგომლობა. მაია მწარიაშვილმა სააპელაციო სასამართლოს მოსამართლეებსაც დეტალურად განუმარტა, რის საფუძველზე ითხოვდნენ სახელაშვილის აცილებას – გარდა იმ კითხვის ნიშებისა, რომელიც მის კომპეტენციასთან დაკავშირებით არსებობს, ადვოკატებმა ყურადღება გაამახვილეს საერთაშორისო სანქციებზეც, რომელიც სახელაშვილს სწორედ მზია ამაღლობელის საქმისადმი მიკერძოებული დამოკიდებულების და პოლიტიკურად მოტივირებული გადაწყვეტილებების გამო შეეხო, თუმცა, მოსამართლე ნიკოლოზ მარგველაშვილმა არ დააკმაყოფილა მოსამართლე ნინო სახელაშვილის აცილების შუამდგომლობა.
ბათუმის საქალაქო სასამართლოს მომდევნო განჩინება, რომელსაც დაცვის მხარე სააპელაციოში ასაჩივრებს, ეხება მზია ამაღლობელის დამკავებელი პოლიციელების დაკითხვას.
მაია მწარიაშვილმა განმარტა, რომ პოლიციელები, რომლებიც ხელს აწერენ მზია ამაღლობელის დაკავების ოქმს (საუბარია ადმინისტრაციულად დაკავებაზე), არ გამოკითხულან სასამართლოში. მათ მოსთხოვეს მათი დაკითხვა სისხლის სამართლის საქმის ფარგლებში, რაზეც მოსამართლე ნინო სახელაშვილმა უარი თქვა.
მაია მწარიაშვილი სააპელაციო სასამართლოში განმარტავს, რატომ არის მნიშვნელოვანი იმ პოლიციელების გამოკითხვა, რომლებმაც მზია ამაღლობელ ადმინისტრაციული წესით დააკავეს. ადვოკატის თქმით, ამ პოლიციელების გამოკითხვით სასამართლო დარწმუნდება, რომ მზია ამაღლობელის საქმე არის ფაბრიკაცია.
15:55 სთ – საქალაქო სასამართლოს კიდევ ერთი განჩინება, რომელსაც ადვოკატები სააპელაციოში ასაჩივრებენ, ეხება მზია ამაღლობელის ადმინისტრაციული დაკავების ამსახველი ვიდეოების დართვას სისხლის სამართლის საქმეზე.
ადვოკატმა განმარტა, რომ მზია ამაღლობელის დაკავებისა და ადმინისტრაციულ სამართალდარღვევის ოქმებში მზია ამაღლობელის დაკავების საფუძვლად განსხვავებული გარემოებებია მითითებული:
თუ ერთ შემთხვევაში დაკავების საფუძვლად პოლიციის შენობის დამხმარე შენობაზე საპროტესტო სტიკერის მიკვრა, პარალელურად კი პოლიციელების შეურაცხყოფაა (ვიდეოში, სადაც მზია ამაღლობელი სტიკერს აკრავს, ჩანს/ისმის, რომ ის საერთოდ არ იღებს ხმას), მეორე შემთხვევაში წერია, რომ ის წინააღმდეგობას უწევდა ვიღაც (არაიდენტიფიცირებად) პოლიციელებს, ვიღაც (არაიდენტიფიცირებული) პირების დაკავებაში.
ვიდეოები, რომელშიც ასახულია რა ხდებოდა რეალურად მზია ამაღლობელის ადმინისტრაციულ დაკავებამდე, ნინო სახელაშვილმა არ დაურთო საქმეს. დაცვის მხარე ითხოვს, აღნიშნული ვიდეოები სააპელაციო სასამართლომ მაინც დაურთოს საქმეს და მისცეს მათი გამოკვლევის შესაძლებლობა. საუბარია სულ სამ ვიდეოფაილზე.
ნინო სახელაშვილის კიდევ ერთი განჩინება, რომელიც სააპელაციოში საჩივრდება, ეხება “ქართული ოცნების” პრემიერ-მინისტრის, ირაკლი კობახიძის გამოკითხვის შესახებ შუამდგომლობას. ნინო სახელაშვილმა ეს შუამდგომლობა არ დააკმაყოფილა.
მაია მწარიაშვილმა განმარტა, რომ 2025 წლის 25 აპრილს, კობახიძემ გადაცემა “ღამის კურიერში” მზია ამაღლობელი დაადანაშაულა იმაში, თითქოს ის “კონკრეტულ დავალებას ასრულებდა”. სწორედ ამ ბრალდების განმარტებისთვის მოითხოვა დაცვის მხარემ კობახიძის გამოკითხვა.
„ჩვენ ჩავთვალეთ, რომ უმაღლესი თანამდებობის პირი რატომღაც ფლობდა ინფორმაციას, რომელსაც არ უნდა ფლობდეს […] ჩვენ მივმართეთ, რომ მას წარმოედგინა ინფორმაცია, რომელსაც ფლობდა და სასამართლომ ეს შუამდგომლობა არ დააკმაყოფილა”, – განაცხადა მაია მწარიაშვილმა.
მსგავსი განცხადება კობახიძემ გააკეთა 2025 წლის 10 ივლისსაც. ნინო სახელაშვილმა არც ამჯერად დააკმაყოფილა კობახიძის დაკითხვის შუამდგომლობა.
მსგავსი შუამდგომლობა ეხებოდა „ქართული ოცნების“ დეპუტატ, ნინო წილოსანს. საფუძველი ამ შემთხვევაშიც იგივეა – მზია ამაღლობელის საქმის შესახებ გაჟღერებული ინფორმაცია და ბრალდებები.
მაია მწარიაშვილმა მოითხოვს, როგორც კობახიძე, ისე წილოსანი დაკითხონ სააპელაციო სასამართლოში.
16:30 სთ – ადვოკატის შუამდგომლობებზე საკუთარ პოზიციას აყალიბებს პროკურორი თორნიკე გოგეშვილი. ის მიჩნევს, რომ მზია ამაღლობელის ადმინისტრაცული წესით დაკავების კანონიერების განხილვა სისხლის სამართლის საქმის სააპელაციო ეტაპზე შეუსაბამოა. გოგეშვილმა თქვა, რომ ეს გამოიწვევს საქმეების აღრევას ერთმანეთში.
“სასამართლო არ უნდა გადაიტვირთოს ზედმეტი ინფორმაციით”, – განაცხადა გოგეშვილმა ირაკლი კობახიძის დაკითხვის შესახებ შუამდგომლობაზე საუბრისას. მან თქვა, რომ კობახიძის განცხადებები იყო მხოლოდ შეფასება, მსგავსი პოზიცია შეიძლება გააჟღეროს სხვა არაერთმა ადამიანმა და ყველას დაკითხვა სასამართლოში მიზანშეწონილი არ არის.
პროკურორმა შოთა ჩხაიძემ განაცხადა, რომ კობახიძეს არ აქვს ინფორმაცია 12 იანვარს (მზია ამაღლობელის დაკავების დღეს) განვითარებულ მოვლენებთან დაკავშირებით, შესაბამისად, მისი დაკითხვა არარელევანტურია.
მაია მწარიაშვილმა არაერთხელ განმარტა, რომ ადამიანის დადანაშაულება, მით უფრო, მიმდინარე სისხლის სამართლის ფარგლებში განსახილველ საკითხთან დაკავშირებით, ვერ იქნება მხოლოდ შეფასება.
ადვოკატის თქმით, კობახიძის განცხადებები ცხადჰყოფდა, რომ მას შეიძლება ჰქონოდა დამატებითი ინფორმაცია და სწორედ ამ ინფორმაციის მისაღებად იყო საჭირო მისი გამოკითხვა. მით უფრო, რომ ის განცხადებები, რომელსაც კობახიძე აკეთებდა, ეხმიანებოდა იმ მტკიცებულებს, რომლებიც პრიკურატურას ისედაც ჰქონდა საქმის მასალებში.
„პირველ რიგში მინდა აღვნიშნო, რომ არ აქვს მნიშვნელობა პიროვნებას … ნიკოლოზ მარგველაშვილი იქნება ეს თუ ირაკლი კობახიძე, ყველა ადამიანს აქვს ვალდებულება მიაწოდოს ინფორმცია სასამართლოს”, – ასე დაიწყო საკუთარი პოლიზიის დასაბუთება მოსამართლე მარგველაშვილმა, თუმცა მან მაინც არ დააკმაყოფილა ირაკლი კობახიძის გამოკითხვის შუამდგომლობა.
“მე არ მინდა, პოლიტიკურ პროცესში გადავიდე”, – თქვა მოსამართლემ, მაგრამ დასძინა, რომ პოლიტიკური განცხადებები არ უნდა გახდეს გამოკითხვის აუცილებლობის საფუძველი.
ნიკოლოზ მარგველაშვილმა, კოლეგიის წევრებთან თათბირის შემდეგ, განაცხადა, რომ “ქართული ოცნების” ლიდერების განცხადებები მზია ამაღლობელის შესახებ, კავშირში არ არის მიმდინარე სისხლის სამართლის საქმესთან.
ნიკოლოზ მარგველაშვილმა არ დააკმაყოფილა არც მზია ამაღლობელის ადმინისტრაციული წესით დამკავებელი პოლიციელების გამოკითხვის შუამდგომლობა. მან ადვოკატს ჰკითხა, თუ ნოდარ ზენაიშვილს და გოჩა ვანაძეს ცრუ-მოწმეებს უწოდებს, რა გარანტია აქვს, რომ ისინი სააპელაციოში იტყვიან სიმართლეს.
16:40 სთ – შუამდგომლობების წარდგენს იწყებენ პროკურორები. თორნიკე გოგეშვილმა განაცხადა, რომ ბათუმის საქალაქო სასამართლომ დაუსაბუთებლად შეცვალა მათ მიერ წარდგენილი მუხლი. ის ითხოვს, მზია ამაღლობელი გასამართლდეს იმ მუხლით, რომელიც თავდაპირველად წარუდგინეს მას – პოლიციელზე თავდასხმა.
„რა ინტენსივობის უნდა ყოფილიყო ეს ქმედება, რომ ეს არის თავდასხმა და არა პოლიციელისთვის წინააღმდეგობის გაწევა? […] ამის განსაზღვრა ობიექტურად შეუძლებელიც არის”, – ამბობს გოგეშვილი და განმარტავს, რომ ნინო სახელაშვილის გადაწვეტილება არ არის საკმარისად დასაბუთებული იმის შესახებ, თუ რატომ გადააკვალიფიცირა ბრალი.
მან თქვა, რომ როგორც წარდგენილი, ისე გადაკვალიფიცირებული მუხლები არის ფორმალური ხასიათის. მისი თქმით, ამ მუხლებს შორის ძირითადი განსხვავება არა ქმედების ინტერვისობაში ან შედეგში კი არა, იმაშია, რა გარემოებებში განხორციელდა ქმედება და რა იყო მიზანი.
„ძალადობრივი ქმედება იყო თვითმიზანი, თუ ძალადობრივი ქმედება იყო მექანიზმი სხვა ქმედებისთვის, მაგალითად პოლიციელისთვის ხელის შეშლისთვის?!” – სვამს კითხვას პროკურორი და აცხადებს, რომ არასწორია, როცა ნინო სახელშვილი ეყრდნობა მზია ამაღლობელის მიერ ირალი დგებუაძისთვის სილის გარტყმის ინტენსივობას, შედეგს და ა.შ. მაშინ, როცა მან უნდა შეეფასებინა ის, თუ რა იყო მზია ამაღლობელის მიზანი.
გოგეშვილმა გაიხსენა მზია ამაღლობების განცხადებები იმის შესახებ, რომ მისი მიზანი ირაკლი დგებუაძის, როგორც პოლიციელისთვის ხელის შეშლა არ იყო. პროკურორი ირწმუნება, რომ მზია ამაღლობელი თავს დაესხა ირაკლი დგებუაძეს.
თორნიკე გოგეშვილი ამბობს, რომ საქალაქო სასამართლმ არასწორად შეაფასა საქმის გარემოებები და გადაწყვეტილება მსჯავრდებულის სასარგებლად მიიღო.
17:00 სთ – მზია ამაღლობელის პოლიციელზე თავდასხმის მუხლით გასამართლების შესახებ პროკურორების შუამდგომლობის შემდეგ, მოსამართლემ პოზიცია დაცვის მხარეს ჰკითხა.
მზია ამაღლობელმა სიტყვა ითხოვა და თქვა, რომ სანამ მისი ადვოკატები სამართლებრივ პოზიციას ჩამოაყალიბებენ, სურს თავად გააჟღეროს საკუთარი აზრი.
„მინდა გამძლეობა და გამარჯვება ვუსურვო წინააღმდეგობაში მყოფ საზოგადოებას, დარბაზში მყოფ აუდიტორიას და დარბაზს გარეთ მყოფ თანამოაზრეებსაც მადლობა მინდა ვუთხრა და ოჯახს, რომ მარტო არ მტოვებენ ამ დარბაზში.
სამწუხაროდ ისევ შუშის საკნიდან მიწევს საუბარი, თუმცა სასამართლოს ახლა შემადგენლობასთან. თუმცა, ბრალდებულის არა და უკვე მსჯავრდებულის სტატუსით. მინდა ვთქვა, რომ მიუღებლობა მაქვს ამ სტატუსთან“, – განაცხადა მზია ამაღლობელმა.
ამ დროს მოსამართლე მარგველაშვილმა მზია ამაღლობელი შეაჩერა და შესთავაზა შემინული სივრციდან გამოსვლა. მან ბადრაგის სამსახურს მიმართა, რომ თუ პროტოკოლით დაშვებულია, ის აძლევს მზია ამაღლობელს უფლებას გამოვიდეს შემინული სივრციდან.
მზია ამაღლობელის გამოვიდა შემინული კაბინიდან და დაჯდა მისი ადვოკატების გვერდით. ეს იყო პირველი შემთხვევა, როცა მზია ამაღლობელს სასამართლო პროცესზე ადვოკატების გვერდით დაჯდომის შესაძლებლობა მიეცა.
17:10 სთ – ქუთაისის სააპელაციო სასამართლოში ფაქტობრივად, არცერთი ქსელის ინტერნეტი არ იჭერს ან ძალიან ცუდად იჭერს. ამის გამო ინფორმაციის უწყვეტ რეჟიმში მიწოდება რთულდება.
17:30 სთ – პროკურორების შემდეგ, საკუარი პოზიცია ჩამოაყალიბა ადვოკატმა მაია მწარიაშვილმა.
მან დეტალურად მიმოიხილა მზია ამაღლობელის სისხლის სამართლის საქმე და ბათუმის საქალაქო სასამართლოში განხილვის ძირითადი აქცენტები.
„ბრალდება ისე ითხოვს ამაღლობელის ბრალდებას 353-ე პრიმა მუხლით, რომ არც გვეუბნება რას გვაბრალებს და არც ასაბუღებს რის საფუძველზე აბარალებს”, – ასე შეაჯამა სიტყვა მაია მწარიაშვილმა.
17:40 სთ – სასამართლო სხდომის დასასრულს განსაზღვრეს მომდევნო პროცესების თარიღი: 14 ნოემბერი, 14:00 საათი და 18 იანვარი, 13:00 საათი. სავარაუდოდ, ამავე დღეს გამოცხადდება გადაწყვეტილება.
_________________
რა ხდება?
ჟურნალისტი და მედიამენეჯერი მზია ამაღლობელი 10 თვეა უკანონო პატიმარია. მისი სასამართლო პროცესი მიმდინარეობდა მის წინააღმდეგ მიმართული „ოცნების“ დეზინფორმაციის ფონზე, ცრუ მოწმე პოლიციელების გამოყენებით.
დაკავებისას მზია ამაღლობელს ღირსების შემლახავად და არაადამიანურად მოექცნენ, თუმცა პროკურატურას საქმის გამოძიება არ დაუწყია. დაკავების დღიდან, პროტესტის ნიშნად, მზია ამაღლობელი 38 დღის განმავლობაში შიმშილობდა. მას პატიმრობაში მკვეთრად დაუქვეითდა მხედველობა.
მზია ამაღლობელის ადმინისტრაციული დაკავების საქმის განხილვა უკვე დაიწყო სტრასბურგის ევროპულმა სასამართლომ.
2025 წლის 22 ოქტომბერს მზია ამაღლობელმა მიიღო სახაროვის პრემია აზრის თავისუფლებისთვის, ევროკავშირის ადამიანის უფლებათა უმაღლესი ჯილდო და არაერთი პრიზი ჟურნალისტური საქმიანობისთვის. სააპელაციო სასამართლომდე ერთი დღით ადრე, გუშინ, 10 ნოემბერს, მზია ამაღლობელი ვენაში დააჯილდოვეს პაულ ვაიზის პრიზით.
დღეს, 11 ნოემბერს, ქუთაისის სააპელაციო სასამართლოში მზია ამაღლობელის სასამართლო პროცესზე ჟურნალისტებს და სასამართლოზე დასწრების მსურველებს სასამართლოს ეზოს ჭიშკარი ჩაუკეტეს და არათუ დარბაზში, არამედ სასამართლოს ეზოში შესვლის საშუალებაც კი არ მისცეს.
მზია ამაღლობელის სააპელაციო საჩივრის განხილვა 24-ადგილიან მცირე დარბაზში მიმდინარეობს. ჭიშკართან მობილიზებულია პოლიცია.
დღევანდელ სხდომაზე მზია ამაღლობელის ადვოკატი მაია მწარიაშვილი აყენებს შუამდგომლობას დამატებითი მტკიცებულებების დაშვების შესახებ. ის ითხოვს ბათუმის საქალაქო სასამართლოს მიერ მიღებული გადაწყვეტილების გაბათილებას და მზია ამაღლობელის უდანაშაულოდ ცნობას.
სასამართლო დარბაზში ჟურნალისტებს არ უშვებენ
სხდომის დაწყებისას ადვოკატმა მაია მწარიაშვილმა ჩამოთვალა ის პრიზები, რომლებიც პატიმრობაში მყოფ მზია ამაღლობელს გადასცეს ბოლო თვეებში გავლენიანმა საერთაშორისო ორგანიზაციებმა.
ყველა ეს ჯილდო მზია ამაღლობელმა მიიღო როგორც ეთიკური ჟურნალისტიკის, ადამიანის უფლებების დაცვის, თავისუფლებისა და დემოკრატიის ბრძოლისთვის.
ადვოკატმა კახა წერეთელმა გარეთ მყოფი ადამიანების დარბაზში შესვლის შუამდგომლობა დააყენა. მან მოსამართლეს განუმარტა, რომ ბევრი ადამიანია სხვადასხვა ქალაქიდან ჩამოსული და მათ უნდა მიეცეთ სხდომაზე დასწრების შესაძლებლობა.
თუმცა, მოსამართლე ნიკოლოზ მარგველაშვილმა ადვოკატს უთხრა, რომ თხოვნას მომდევნო სხდომისთვის გაითვალისწინებენ.
მზია ამაღლობელის სასამართლო სააპელაციო სასამართლოში 13 საათზე დაიწყო.
გარემოს ეროვნული სააგენტოს აჭარის რეგიონული ჰიდრომეტეოროლოგიური ობსერვატორიის ინფორმაციით, 11 ნოემბრის 21 საათიდან 12 ნოემბრის 21 საათამდე ბათუმსა და მთლიანად აჭარაში მოსალოდნელია ცვალებადი მოღრუბლულობა, უმეტესად უნალექოდ.
იქროლებს ცვალებადი მიმართულების ქარი 8-13 მეტრი წამში.
ბათუმში პოლიციამ ჯანმრთელობის განზრახ მსუბუქი დაზიანების ბრალდებით დააკავა 1984 წელს დაბადებული, წარსულში ნასამართლევი ა.ბ..
შს სამინისტროს ცნობით, გამოძიებით დადგინდა, რომ ბრალდებულმა ბათუმში, ურთიერთშელაპარაკების ნიადაგზე დაწყებული დაპირისპირებისას, მეზობლად მცხოვრებ – 1978 წელს დაბადებულ ი.მ. -ს დანის გამოყენებით, სხეულზე ჭრილობები მიაყენა და შემთხვევის ადგილიდან მიიმალა.
უწყების ინფორმაციით, დაშავებული კაცი კლინიკაში მოათავსეს, სადაც შესაბამისი სამედიცინო დახმარება ჩაუტარდა, ხოლო პოლიციამ ა.ბ. ცხელ კვალზე დააკავა.
„სამართალდამცველებმა დანაშაულის ჩადენის იარაღი – დანა ნივთმტკიცებად ამოიღეს“ – წერს შსს.
ჯანმრთელობის განზრახ მსუბუქი დაზიანების ფაქტზე გამოძიება სისხლის სამართლის კოდექსის 120-ე მუხლით მიმდინარეობს. დანაშაული 3 წლამდე ვადით თავისუფლების აღკვეთას ითვალისწინებს.
დღეს, 11 ნოემბერს, 13 საათზე, ქუთაისის სააპელაციო სასამართლოში იწყება მზია ამაღლობელის საჩივრის განხილვა.
მზია ამაღლობელის ადვოკატები ასაჩივრებენ ბათუმის საქალაქო სასამართლოში 6 აგვისტოს გამოტანილ განაჩენს, რითაც მზია ამაღლობელს 2 წლით თავისუფლების აღკვეთა მიუსაჯეს.
მზია ამაღლობელის ადვოკატები ითხოვენ ბათუმის საქალაქო სასამართლოს მიერ გამოტანილი გამამტყუნებელი განაჩენის გაუქმებას და გამამართლებელი განაჩენის გამოტანას.
ჟურნალისტი და მედიამენეჯერი მზია ამაღლობელი 10 თვეა უკანონო პატიმარია. მისი სასამართლო პროცესი მიმდინარეობდა მის წინააღმდეგ მიმართული „ოცნების“ დეზინფორმაციის ფონზე, ცრუ მოწმე პოლიციელების გამოყენებით.
დაკავებისას მზია ამაღლობელს ღირსების შემლახავად და არაადამიანურად მოექცნენ, თუმცა პროკურატურას საქმის გამოძიება არ დაუწყია. დაკავების დღიდან, პროტესტის ნიშნად, მზია ამაღლობელი 38 დღის განმავლობაში შიმშილობდა. მას პატიმრობაში მკვეთრად დაუქვეითდა მხედველობა.
მზია ამაღლობელის ადმინისტრაციული დაკავების საქმის განხილვა უკვე დაიწყო სტრასბურგის ევროპულმა სასამართლომ.
2025 წლის 22 ოქტომბერს მზია ამაღლობელმა მიიღო სახაროვის პრემია აზრის თავისუფლებისთვის, ევროკავშირის ადამიანის უფლებათა უმაღლესი ჯილდო და არაერთი პრიზი ჟურნალისტური საქმიანობისთვის. სააპელაციო სასამართლომდე ერთი დღით ადრე, გუშინ, 10 ნოემბერს, მზია ამაღლობელი ვენაში დააჯილდოვეს პაულ ვაიზის პრიზით.
უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2025 წლის 11 ნოემბრამდე პერიოდში, რუსეთის არმიის საბრძოლო დანაკარგი არის:
ცოცხალი ძალა – დაახლოებით 1 153 180 ადამიანი [გასულ დღე-ღამეში +1 020. ამ მონაცემებში შედის როგორც დაღუპულები ასევე დაჭრილები]
ტანკი – 11 342 ერთეული [+0]
ჯავშანტექნიკა – 23 553 ერთეული [+1]
საარტილერიო სისტემა – 34 366 ერთეული [+17]
MLRS – 1 539 ერთეული [+1]
საზენიტო საბრძოლო სისტემა – 1 239 ერთეული [+0]
თვითმფრინავი – 428 ერთეული [+0]
ვერტმფრენი – 347 ერთეული [+0]
უპილოტო საფრენი აპარატის ოპერატიულ-ტაქტიკური დონე – 79 642 ერთეული [+217]
ფრთოსანი რაკეტა [ჩამოაგდეს] – 3 926 ერთეული [+0]
გემი/ნავი – 28 ერთეული [+0]
წყალქვეშა ნავი – 1 ერთეული [+0]
მანქანები და საწვავის ავზები – 67 036 ერთეული [+79]
სპეცტექნიკა – 3 993 ერთეული [+0]
უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.
უკრაინის სამხედრო დანაკარგებზე ინფორმაცია განაახლა რუსეთმაც.
რუსეთის თავდაცვის სამინისტროს მიერ გავრცელებული მონაცემებით, ომის დაწყებიდან 2025 წლის 11 ნოემბრამდე პერიოდში სულ განადგურებულია უკრაინის:
668 თვითმფრინავი
283 ვერტმფრენი
95 994 უპილოტო საფრენი აპარატი
635 საზენიტო სარაკეტო სისტემა
25 960 ტანკი და სხვა ჯავშანტექნიკა
1 611 მრავალჯერადი სარაკეტო გამშვები
31 240 საველე არტილერია და ნაღმმტყორცნი
46 359 სპეციალური სამხედრო მანქანა
ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.
ამასთან, აღნიშნულ მონაცემებთან ერთად რუსეთის თავდაცვა, უკრაინის და რუსეთის არმიის ცოცხალი ძალის საერთო დანაკარგების შესახებ სტატისტიკას არ აქვეყნებს. უკრაინის არმიის ცოცხალი ძალის დანაკარგების შესახებ მონაცემებს არ აქვეყნებს არც უკრაინა.
—
რუსეთი უკრაინაში 2022 წლის 24 თებერვალს გამთენიისას შეიჭრა და სრულმასშტაბიანი ომი დაიწყო.
10 ნოემბერს ავსტრიის დედაქალაქში, ვენაში, პაულ ვაიზის პრემიით დააჯილდოვეს ამჟამად პატიმრობაში მყოფი ჟურნალისტი და მედიამენეჯერი მზია ამაღლობელი .
აღნიშნული პრემია გაიცემა სამოქალაქო საზოგადოების ინიციატივის, Courage2030-ის მიერ. პრემია სიმამაცისთვის გადაეცემათ იმ პირებსა და ორგანიზაციებს, რომლებმაც განსაკუთრებული წვლილი შეიტანეს ადამიანის უფლებების დაცვაში, სხვადასხვა მიმართულებით.
მზია ამაღლობელს სიმამაცისთვის პრიზი გადაეცა ჟურნალისტიკის კატეგორიაში.
დაჯილდოების ცერემონიას ვენაში „ნეტგაზეთის“ მთავარი რედაქტორი ნესტან ცეცხლაძე და „ბათუმელების“ მთავარი რედაქტორი, ეთერ თურაძე ესწრებოდნენ.
ვენა, 10 ნოემბერი, დაჯილდოების ცერემონია
პაულ ვაიზის ჯილდო დაარსდა რამდენიმე წლის წინ, ავსტრიელი, ჰოლოკოსტსგადარჩენილი იურისტის, პაულ ვაიზის პატივსაცემად.
პაულ ვაიზის ოჯახი 1938 წელს ვენიდან დახაუს ფაშისტურ საკონცენტრაციო ბანაკში იყო გადასახლებული, სადაც დაიღუპნენ მისი დედა და და. მან გადაწყვიტა მთელი ცხოვრება მიეძღვნა ლტოლვილების დაცვისათვის. იგი გახდა საერთაშორისო სამართლის ექსპერტი, რომლის მთავარი მიზანი იყო ლტოლვილთა დახმარება. იყო ჟენევის ლტოლვილთა კონვენციის თანაავტორი, მნიშვნელოვანი საფუძველი ჩაუყარა საერთაშორისო სამართალს თავშესაფრის მოთხოვნასთან დაკავშირებით. თავისი მოღვაწეობით მან მილიონობით ლტოლვილს საშუალება მისცა, აეშენებინათ უსაფრთხო ახალი ცხოვრება ახალ სამშობლოში.
„ჩვენ მისია დავისახეთ, გვახსოვდეს ეს დიდი ავსტრიელი. ამიტომ, დავაარსეთ პაულ ვაიზის პრემია, რომელიც პატივს მიაგებს ადამიანის უფლებების დაცვის საქმეში შეტანილ გამორჩეულ წვლილს. ამით ჩვენ გვსურს ვაჩვენოთ, რომ ამ სამყაროში ჯერ კიდევ ბევრია გამბედაობის, ადამიანობის და თანაგრძნობის მაგალითი. და უამრავი ადამიანია, ვინც მთელი გულით უძღვნის თავს სხვების დახმარებას – ისევე, როგორც პაულ ვაიზი აკეთებდა ამას“ – ვკითხულობთ ვებგვერდზე.
11/11 თიბისი განაწილების მორიგი ჯადოსნური დღეა-წყვილი თარიღი, როდესაც შერჩეულ ობიექტებში განსაკუთრებული შეთავაზებები გხვდებათ და განაწილების პროდუქტის სარგებელთან ერთად, დამატებით ქეშბექებს იღებთ.
წყვილი თარიღის შეთავაზების კატეგორიები მრავალფეროვანია და ყოველ წყვილ თარიღში მომხმარებლების სურვილების გათვალისწინებით იცვლება. ეს ის დღეა, როდესაც თიბისი განაწილების გუნდს განსაკუთრებით სურს მომხმარებლების გახარება.
11 ნოემბრის შეთავაზება დრესაპის ფიზიკურ მაღაზიებში დაგხვდებათ, სადაც თიბისი განაწილებით გადახდისას, 30% ქეშბექს, ჯამში მაქსიმუმ 100 ლარს დაიბრუნებთ, ხოლო ისინი, ვინც განაწილების პროდუქტით პირველად ისარგებლებთ, ჯამში მაქსიმუმ 200 ლარი დაგიბრუნდებათ.
შეთავაზება მოქმედებს მხოლოდ ფიზიკურ მაღაზიებში, 4 თვემდე განაწილებით და “მეტი განაწილებით” გადახდისას. ქეშბექი 26 ნოემბრამდე, ერთგული ლარების ანგარიშზე დაგერიცხებათ.
თიბისი განაწილებით სარგებლობის შემთხვევაში, მომხმარებლები პროდუქტის საფასურს არა ერთიანად, არამედ 4 თვეზეგანაწილებით იხდიან. რაც მთავარია, გაძვირების გარეშე, ეფექტური 0%-ით. რაც იმას ნიშნავს, რომ იხდიან ზუსტად იმდენს, რამდენიც ნივთი ღირს.
„მეტი განაწილების“გამოყენების შემთხვევაში კი, შესაძლებლობა აქვთ ნივთის საფასური 36 თვემდე გაანაწილონ, რა შემთხვევაშიც, საკომისიო თვიური 1.5 %, ეფექტური 35.25% იქნება.
გაანაწილეთ წყვილ თარიღებში, რადგან ამ დროს ყველა სურვილი ჯადოსნურად მარტივად ხდება!
შეთავაზების დამატებითი პირობებისთვის ეწვიეთ ბმულს.
„კორუფციის მხილების ნაცვლად, ანტიკორუფციული ბიურო სამოქალაქო საზოგადოებას დევნის“ – ნათქვამია სამოქალაქო ორგანიზაციების ერთობლივ განცხადებაში, რომელიც დღეს, 10 ნოემბერს გავრცელდა და მას ხელს საქართველოში მოქმედი 53 ორგანიზაცია აწერს.
„ბათუმელები“ სრულად აქვეყნებს განცხადებას.
განცხადებაში ვკითხულობთ:
„სანამ „ქართული ოცნება“ აგრძელებს საქართველოს საჯარო ინსტიტუტებისა და სახელმწიფო რესურსების მიტაცებას, ქვეყნის ანტიკორუფციული მექანიზმები გამოიყენება არა იმისთვის, რომ ამხილოს და პასუხი აგებინოს კორუფციაში მონაწილე მაღალჩინოსნებს, არამედ იმისთვის, რომ კიდევ ერთი დარტყმა მიაყენონ დამოუკიდებელ, ქართულ სამოქალაქო საზოგადოების ორგანიზაციებს.
დამოუკიდებელი მონიტორინგისთანახმად, 2013 წლიდან მოყოლებული, კომპანიებმა, რომლებიც დაკავშირებულნი არიან „ქართული ოცნების” მაღალჩინოსნებთან და პარტიის დამფუძნებელთან, ბიძინა ივანიშვილთან, სახელმწიფო ტენდერებში გამარჯვების შედეგად 3.28 მილიარდ ლარზე მეტი მიიღეს. მათ შორის, 2020–2024 წლებში სახელმწიფო ტენდერებით 1.028 მილიარდი ლარი მიენიჭათ კომპანიებს, რომლებიც დაკავშირებულნი არიან მმართველი პარტიის დონორებთან, ხოლო მათივე შემოწირულებების ოდენობამ 7.7 მილიონი ლარი შეადგინა.
სახელმწიფო ტენდერებთან დაკავშირებულიკორუფციული ქმედებებიმრავალმხრივია და მოიცავს არაკონკურენტულ შესყიდვებსა და გამარტივებულ ტენდერებს, რომლებიც მიკერძოებულია მმართველ პარტიასთან დაახლოებული კომპანიების სასარგებლოდ, ასევე დასაქმების პროგრამებს, რომლებიც ფორმალურად მიზნად ისახავს მოწყვლადი მოქალაქეების მხარდაჭერას, მაგრამ რეალურად საჯარო სახსრებს მმართველი პარტიის ვიწრო-პარტიული ინტერესების მიღწევისკენ მიმართავს, პარტიული კადრების არაფორმალურ ქსელების დაფინანსების გზით. ასევე ნიშანდობლივია, საჯარო მოხელეთა არაპირდაპირი, გაუმჭვირვალე ქონებრივი გარიგებები, მათ შორის არაერთი დადასტურებული შემთხვევა დაუფიქსირებელი ქონების შესახებ.
2024–2025 წლებში მხოლოდ ამ ფორმით დაფიქსირდა 34 მილიონ ლარზე მეტი ღირებულების ქონების, მათ შორის, ნაღდი ფულის და უძრავი ქონების გადაცემა თანამდებობის პირებზე. ფორმალურად ეს ტრანზაქციები რეგისტრირდება როგორც საჩუქარი, თუმცა ფაქტობრივად წარმოადგენს ალტერნატიულ კორუფციულ მექანიზმს, რომელიც მიზნად ისახავს პოლიტიკური ლოიალობის შენარჩუნებას და გავლენების სისტემურ განაწილებას. ეს საკითხები არ არის ასახული ანტიკორუფციული ბიუროს 2023–2024 წლების ანგარიშებში, მიუხედავად იმისა, რომ ბიუროს კანონით ევალება თანამდებობის პირების ქონებრივი დეკლარაციების კონტროლი და საეჭვო გარიგებებზე რეაგირება.
ბიუროს მიერ წარდგენილი ანგარიშები ფორმალური ხასიათისაა, მათში არ ფიქსირდება არც ერთი ელიტური კორუფციის შემთხვევა, არც ინტერესთა შეუთავსებლობის ფაქტი და არც კონკრეტული ქონებრივი გარიგებების შეფასება. ასეთი მიდგომა ცხადყოფს, რომ ბიურო რეალურად არ ახორციელებს პრევენციულ ან მაკონტროლებელ ფუნქციას, არამედ ემსახურება პოლიტიკური ანგარიშსწორების მიზნებს.
შედეგად, მიუხედავად იმისა, რომ „ქართული ოცნება” საჯაროდ საუბრობს კორუფციასთან ბრძოლაზე, პრაქტიკაში, სახელმწიფო რესურსები მიტაცებულია პოლიტიკური ელიტის და მასთან დაახლოებული ბიზნესის მიერ, რომლებიც მდიდრდებიან გამჭვირვალობის, სამართლიანი კონკურენციისა და საჯარო ანგარიშვალდებულების იგნორირების ხარჯზე.
ამავდროულად, სახელმწიფო ანტიკორუფციული ბიურო გამოიყენება დამოუკიდებელი სამოქალაქო საზოგადოების ორგანიზაციების დევნის ინსტრუმენტად. დამოუკიდებელ სამოქალაქო საზოგადოების ორგანიზაციებს ავალებენ ბიუროს მიაწოდონ მოცულობითი ინფორმაცია, მათ შორის, პირადი მონაცემები, 2024 წლიდან დღემდე შესრულებულ საქმიანობაზე, რაც უპრეცედენტო ჩარევაა სამოქალაქო სექტორის დამოუკიდებლობაში.
2025 წლის 4 სექტემბერს, ბიურომ დაიწყო 80-ზე მეტი არასამთავრობო ორგანიზაციის „მონიტორინგი“, „გრანტების შესახებ კანონში“ ამა წლის აპრილში მიღებული ცვლილებების ფარგლებში. აღნიშნული ცვლილებები ეწინააღმდეგება საქართველოს კონსტიტუციით გარანტირებულ გაერთიანების თავისუფლებას და არათანაბრად აზარალებს ადამიანის უფლებებსა და დემოკრატიულ ანგარიშვალდებულებზე მომუშავე ორგანიზაციებს.
ეს ქმედებები ასახავს მზარდ ტენდენციას, რომლის პირობებშიც მიტაცებული სახელმწიფო აპარატი მიმართულია სამოქალაქო სექტორის საქმიანობის შეზღუდვაზე, ხოლო ხელისუფლების კორუმპირებული წარმომადგენლები ხელშეუხებლები რჩებიან. კონტროლი გარდაიქმნება რეპრესიად, რომელიც ნიღბად იყენებს სამართლიანობას.
ასეთი შერჩევითი ქმედება ზღუდავს სამოქალაქო თავისუფლებებს, სპობს სამოქალაქო ორგანიზაციების შესაძლებლობას, გამოთქვან დამოუკიდებელი აზრი ან ხელისუფლებას პასუხი მოსთხოვონ კორუფციაზე ან სხვა სახის დანაშაულებზე, რაც პირდაპირ საფრთხეს უქმნის საქართველოს დემოკრატიულ მომავალს.
ყველასთვის ნათელია „ქართული ოცნების“ ორმაგი სტანდარტი. მაშინ როდესაც „ქართულ ოცნების“ მაღალჩინოსნები და მათთან ასოცირებული ბიზნესები კორუფციაშია გახვეული, “ქართული ოცნებისვე” შექმნილი ზედამხედველობის მექანიზმები მიმართულია მხოლოდ მათ წინააღმდეგ, ვინც კორუფციას ამხელს. ეს არ არის ანტიკორუფციული პოლიტიკა — ეს კორუფციის და კორუფციული მექანიზმების დაცვის სქემაა, რომლითაც იდევნება კორუფციის მამხილებელი დამოუკიდებელი სამოქალაქო სექტორი“.
ხელმომწერი ორგანიზაციები:
1. ევროპის ფონდი
2. საქართველოს ახალგაზრდა იურისტთა ასოციაცია
3. საერთაშორისო გამჭვირვალობა – საქართველო
4. ადამიანის უფლებების განვითარების ფონდი
5. ქალები საქართველოდან
6. სამოქალაქო იდეა
7. თანასწორობის მოძრაობა
8. პრევენცია პროგრესისთვის
9. ქალთა ინიციატივების მხარდამჭერი ჯგუფი
10. ადამიანის უფლებათა ცენტრი (HRC)
11. ტოლერანტობის და მრავალფეროვნების ინსტიტუტი (TDI)
12. საქართველოს მომავლის აკადემია
13. თავისუფალ ჟურნალისტთა სახლი
14. მხარდაჭერის და შესაძლებლობების განვითარების ცენტრი
15. დემოკრატ მესხთა კავშირი
16. საქართველოს რეგიონული გაძლიერების ფონდი
17. ქართული მედია ჯგუფი
18. მწვანე სექტორი
19. სამოქალაქო მოძრაობა თავისუფლებისთვის
20. დემოკრატიის კვლევის ინსტიტუტი
21. უფლებები საქართველო
22. საქართველოს ფსიქოსოციალური დახმარების ასოციაცია ნდობა
23. პარტნიორობა ადამიანის უფლებებისთვის
24. გრლზვეივ
25. ცენტრი კახეთი
26. ასოციაცია “სოციალური ქოლგა”
27. მწვანე ალტერნატივა
28. ჩართულობის და განვითარების ცენტრი
29. ბათუმის დამოუკიდებელი ცხოვრების ცენტრი
30. წამების მსხვერპლთა ფსიქოსოციალური და სამედიცინო რეაბილიტაციის ცენტრი – GCRT
31. ა(ა)იპ – ,,შეხვედრის ადგილი – დმანისი”
32. ა(ა)იპ – ახალგაზრდა ფემინისტები
33. მედიის ინსტიტუტი
34. ა(ა)იპ რაჭის სათემო ორგანიზაცია
35. საქართველოს დემოკრატიული ინიციატივა (GDI)
36. ა(ა)იპ გორელ ფოტოგრაფთა კლუბი / ხელოვნების სახლი
37. საქართველოს ევროპული ორბიტა
38. სამოქალაქო ინტეგრაციის ფონდი
39. მხარდაჭერის და შესაძლებლობის განვითარების ცენტრი
40. ყვარლის ევროკლუბი
41. პროფესიო – პიროვნული და პროფესიული განვითარების ცენტრი
42. ლომეკი
43. ეკონომიკური პოლიტიკის კვლევის ცენტრი
44. მედიის განვითარების ფონდი (MDF)
45. ინფორმაციის თავისუფლების განვითარების ინსტიტუტი (IDFI)
46. სათემო ფონდი ლელი
47. ლელიანის ზრდასრულთა განათლების ცენტრი
48. სამოქალაქო საზოგადოების ფონდი
49. საქართველოს სტრატეგიული კვლევებისა და განვითარების ცენტრი (CSRDG)
50. ევროპულ-ქართული ინსტიტუტი (EGI)
51. საჯარო მოსამსახურეთა დამოუკიდებელი პროფესიული კავშირი -კონსტიტუციის 78-ე მუხლი
52. თეთრიწყაროს ახალგაზრდული ცენტრი
53. ღია სივრცე კავკასია
______________
ფოტოზე: „არა რუსულ ოცნებას”, – წარწერა ბათუმში, ქვაფენილზე.
მას შემდეგ, რაც სასამართლოებში ფოტოს და ვიდეოს გადაღება „ოცნების“ არალეგიტიმურმა პარლამენტმა შეზღუდა, სასამართლოებში მობილური ტელეფონების სათავსოების მონტაჟი დაიწყეს.
მობილური ტელეფონებისთვის განკუთვნილი სათავსოების მონტაჟი სასამართლოებში შესაძლოა ნიშნავდეს იმას, რომ „ქართული ოცნება“ სხდომაზე დამსწრეებისთვის მობილური ტელეფონების ჩამორთმევასაც აპირებს.
2025 წლის ივნისის მიწურულს „ქართული ოცნების“ პარლამენტმა დაჩქარებული წესით, 2 დღეში მიიღო საკანონმდებლო ცვლილებათა პაკეტი, რომლის მიხედვითაც სასამართლო სხდომების გაშუქება შეიზღუდა. სასამართლოს ტერიტორიაზე, ეზოშიც კი, აიკრძალა ფოტო-ვიდეოგადაღება და აუდიოჩაწერა.
ამ შეზღუდვის შემდეგ მედია სასამართლო სხდომებზე ძირითადად მობილური ტელეფონების საშუალებით მუშაობს – ჟურნალისტები ონლაინრეჟიმში უკვე ფოტოს და ვიდეოს გარეშე ვყვებით იმის შესახებ, რაც სასამართლო სხდომაზე ხდება.
ამჯერად ჟურნალისტებს ამ გზასაც მოუჭრის „ოცნება“.
იუსტიციის უმაღლესმა საბჭომ 2025 წლის 17 ივლისის დადგენილებით განსაზღვრა საქართველოს საერთო სასამართლოებში ფოტო, კინო, ვიდეოგადაღების, ტრანსლაციის და აუდიოჩაწერის უკანონოდ განხორციელების პრევენციის წესი. ამ დადგენილების მიხედვით სასამართლოს მანდატურს მობილური ტელეფონის ჩამორთმევის უფლებაც აქვს.
„სასამართლოს მანდატური უფლებამოსილია არ დაუშვას სასამართლო სხდომის დარბაზში ფოტო, კინო, ვიდეოგადაღების, ტრანსლაციის და აუდიოჩაწერის ფუნქციის მქონე ნებისმიერი ტექნიკური საშუალების [მობილური ტელეფონის, აგრეთვე, სხვა ისეთი ნივთის ჩათვლით, რომელიც, ერთი შეხედვით, არ წარმოადგენს ამგვარ ტექნიკურ საშუალებას, თუმცა ვიზუალური დათვალიერების შედეგად აჩენს ვარაუდს, რომ მას გააჩნია ფოტო, კინო, ვიდეოგადაღების, ტრანსლაციის და აუდიოჩაწერის ფუნქცია] შეტანა [გამოყენება] და შესთავაზოს მფლობელს, აღნიშნული ტექნიკური საშუალებები გადასცეს დროებით შესანახად მანდატურს,“ – აღნიშნულია იუსტიციის საბჭოს დადგენილებაში.
ამ დრომდე არსებული პრაქტიკით, მანდატურები ითხოვენ სხვადასხვა ტექნიკური საშუალების ან ნივთის მანდატურებთან დატოვებას, მაგრამ არა მობილური ტელეფონების და ნოუთბუქების.
სანქციების, ჯარიმებისა და საურავების სახით ბათუმის ბიუჯეტში 9 თვეში 13 მილიონ 250 ათასი ლარი შევიდა, რაც საპროგნოზო მაჩვენებლის 176,7 პროცენტია. ეს თანხა ბიუჯეტის შემოსულობებში „სხვა შემოსვლების“ სახით არის ასახული.
სამი კვარტალის ანგარიშის მიხედვით, ბიუჯეტში სხვა შემოსავლების 2025 წლის 9 თვის საპროგნოზო მოცულობა 75 მილიონი ლარი იყო, ფაქტობრივმა შესრულებამ 96 მილიონი ლარი შეადგინა, ანუ გეგმის 128,1%. სხვა შემოსავლების წილი ადგილობრივი ბიუჯეტის მთლიან შემოსულობებში 28,2%-ს შეადგენს.
ჯარიმები ბიუჯეტის სამი კვარტალის შესრულების ანგარიშში დიფერენცირებული არ არის. მსგავსი დეტალური ინფორმაცია მხოლოდ წინა წლის მონაცემების შეჯამების შემდეგ, ახალი წლის დასაწყისში ქვეყნდება ანგარიშის სახით, რომელსაც ბათუმის მერია საკრებულოს წარუდგენს. გასული წლის ანგარიშის მიხედვით შეგვიძლია ვივარაუდოთ, რომ წელსაც ბიუჯეტში ყველაზე მეტი თანხა კანონდამრღვევი მძღოლების მიერ გადახდილი ჯარიმებით შეგროვდება.
გასულ წელს საგზაო მოძრაობის წესების დარღვევისათვის ბათუმის ბიუჯეტში 8 მილიონ 856 100 ლარი შევიდა. ეს თანხა არ ასახავს საპატრულო პოლიციის მიერ ბათუმში გამოწერილი ჯარიმების სრულ მონაცემს, რადგან კანონის შესაბამისად გამოწერილი ჯარიმებიდან შემოსული თანხის მხოლოდ 60 პროცენტი შედის ბათუმის ბიუჯეტში, 40 პროცენტი კი – ცენტრალურ ბიუჯეტში. ეს იმას ნიშნავს, რომ გასულ წელს ბათუმში გამოწერილი საპატრულო ჯარიმების ოდენობამ 13 მილიონს გადააჭარბა.
„ავტომობილის გაჩერების წესების გათვალისწინებული მოთხოვნების დაუცველობისათვის“ გამოწერილი ჯარიმებიდან ბიუჯეტში გასულ წელს 50 000 ლარი შესულა. გარდა ამისა, გასულ წელს მუნიციპალური ავტობუსით უბილეთო მგზავრობის გამო გადახდილი ჯარიმებიდან 172 000 ლარი შეგროვდა ბიუჯეტში, საქალაქო რეგულარული სამგზავრო გადაყვანის პირობების დარღვევის გამო კი 6 500 ლარი გადაუხდიათ.
სამი კვარტალის ანგარიშის მიხედვით, საანგარიშო პერიოდში, 2025 წლის სამ კვარტალში საკუთრებიდან მიღებული შემოსავლების სახით მობილიზებულია 13 მილიონი ლარი, მათ შორის:
10 მილიონი ლარი პროცენტებიდან, 2 მილიონი ლარი – რენტის სახით, 2 მილიონი – იჯარებიდან;
საქონლისა და მომსახურების რეალიზაციიდან მობილიზებულია 65 მილიონი ლარი, რაც საპროგნოზო მაჩვენებლის 113,6%-ია;
მეორე სამსახურზე შეზღუდვა საზოგადოებრივი მაუწყებლის, მათ შორის „აჭარის ტელევიზიის“ თანამშრომლებს აღარ შეეხებათ – „შეთავსებით“ მეორე სამსახურს საზოგადოებრივი მაუწყებლისთვის „ოცნების“ პარლამენტი დაუშვებს. ცვლილებას დაჩქარებული წესით განიხილავენ.
კანონში „კორუფციის წინააღმდეგ ბრძოლის შესახებ“ 2025 წლის პირველი ნოემბრიდან საჯარო სამსახურებში დასაქმებულ პირებს მეორე სამსახურში დასაქმება ეზღუდებათ.
„მიზანშეწონილია, კანონპროექტი განხილულ იქნეს დაჩქარებული წესით, ვინაიდან, მნიშვნელოვანია, მაქსიმალურად შემჭიდროებულ ვადებში დასრულდეს შესაბამისი ცვლილებების ასახვა კანონმდებლობაში და ქალაქ თბილისის მუნიციპალიტეტის მერთან არსებული თვითნებურად დაკავებულ მიწაზე საკუთრების უფლების აღიარების კომისიის წევრებსა და საჯარო სამართლის იურიდიული პირების — საზოგადოებრივი მაუწყებლისა და საზოგადოებრივი მაუწყებლის აჭარის ტელევიზიისა და რადიოს თანამშრომლებს დროულად მიეცეთ შეთავსებითი სამუშაოს შესაძლებლობა,“ – აღნიშნულია კანონპროექტების განმარტებით ბარათში.
„კანონპროექტის მიღებით, შესაბამისობაში მოვა ორი საკანონმდებლო აქტი და ამასთანავე, ქალაქ თბილისის მუნიციპალიტეტის მერთან არსებული თვითნებურად დაკავებულ მიწაზე საკუთრების უფლების აღიარების კომისიის წევრებსა და საჯარო სამართლის იურიდიული პირების — საზოგადოებრივი მაუწყებლისა და საზოგადოებრივი მაუწყებლის აჭარის ტელევიზიისა და რადიოს თანამშრომლებს მიეცემათ შესაძლებლობა განახორციელონ შეთავსებითი სამუშაო,“ – ვკითხულობთ კანონპროექტში.
რატომ დაუშვა არალეგიტიმურმა და ანტიკონსტიტუციურმა პარლამენტმა გამონაკლისი საზოგადოებრივი მაუწყებლისთვის?
„კორუფციის წინააღმდეგ ბრძოლის შესახებ“ საქართველოს კანონით დადგენილი შეთავსების შეზღუდვა არ ითვალისწინებდა გამონაკლისად იმ პირებს, რომლებიც საქმიანობენ საჯარო სამართლის იურიდიულ პირებში – საზოგადოებრივ მაუწყებელში და საზოგადოებრივი მაუწყებლის აჭარის ტელევიზიასა და რადიოში, მიუხედავად მათი საქმიანობის სპეციფიკისა. შესაბამისად, კანონპროექტის მიზანია… გამონაკლისის დაზუსტება ისე, რომ იგი მოიცავდეს როგორც თბილისის მერთან არსებულ საკუთრების უფლების აღიარების კომისიის წევრებს, ისე საზოგადოებრივი მაუწყებლისა და აჭარის ტელევიზიისა და რადიოს თანამშრომლებს, რათა მათ შეეძლოთ თავიანთი საქმიანობის განხორციელება.“ – აღნიშნულია განმარტებით ბარათში.
„ეს ქმნის იმის საფუძველს, რომ შემდგომში უამრავ ადამიანს აეკრძალოს პოლიტიკური საქმიანობა და „ქართულმა ოცნებამ“, მსგავსად კომუნისტური პარტიისა, ერთპარტიულად შეძლოს არსებობა,“ – მიიჩნევს იურისტი გიორგი ბურჯანაძე. მას „ქართული ოცნების“ სარჩელზე ვესაუბრეთ, რომლითაც იგი სამი პოლიტიკური პარტიის აკრძალვას ითხოვს.
გიორგი ბურჯანაძე „ოცნების“ სარჩელს ე.წ. სარჩელს უწოდებს, რადგან იგი მთლიანად პოლიტიზებულია, ამის უპირველესი დასტური კი, თავად „ოცნების“ განცხადებებია.
„ეს 3 პარტია, რომლის აკრძალვაც იგეგმება, პირდაპირ არის დასახელებული „ქართული ოცნების“ მიერ, რომ იმიტომ არიან „დასჯილები“, რომ ისინი არ აღიარებენ გაყალბებულ საპარლამენტო არჩევნებს, გაყალბებული საპარლამენტო არჩევნების არაღიარება არ არის პარტიის აკრძალვის საფუძველი,“ – განმარტავს გიორგი ბურჯანაძე.
იურისტი ყურადღებას ამახვილებს მთავარი საფრთხეზე – პარტიების აკრძალვის შემდეგ „ოცნებას“ შეეძლება მისთვის პოლიტიკურად არასასურველი ნებისმიერი პირს დააბრალოს აკრძალულ პარტიებთან კავშირი და აუკრძალოს პოლიტიკური საქმიანობა.
„ბათუმელებმა“ გიორგი ბურჯანაძესთან ინტერვიუ ჩაწერა, იგი „სამოქალაქო საზოგადოების ფონდის“ სამართლებრივი მრჩეველია და თბილისის თავისუფალი უნივერსიტეტის ასოცირებული პროფესორი.
ბატონო გიორგი, თქვენი შეფასებით, რა არის სამართლებრივად მთავარი პრობლემა „ოცნების“ სარჩელში, რომლითაც იგი ოპოზიციური პარტიების აკრძალვას ითხოვს?
მთავარი პრობლემა იმაშია, რომ ე.წ. სარჩელი სცილდება კონსტიტუციური რეგულაციის ჩარჩოს. საქართველოს კონსტიტუცია იძლევა შესაძლებლობას, რომ პოლიტიკური პარტია აკრძალო, მაგრამ კონსტიტუცია ჩამოთვლის ამომწურავ საფუძვლებს. ეს საფუძვლები არის ვიწროდ განსაზღვრული და ეხება შემთხვევებს, როდესაც პარტია წარმოადგენს დემოკრატიისთვის არსებითად საფრთხის შემცველს, მაგალითად, სხვადასხვა ტიპის შუღლის გაღვივებას ეწევა, კონსტიტუციურ წესრიგს ძალადობით ცვლის, ან რეგიონული ნიშნით შუღლს აღვივებს და ასე შემდეგ. ჯერ ერთი, რამე ასეთი ბრალდება არ არის წარმოდგენილი და ეს 3 პარტია, რომლის აკრძალვაც იგეგმება, პირდაპირ არის დასახელებული „ქართული ოცნების“ მიერ, რომ იმიტომ არიან „დასჯილები“, რომ ისინი არ აღიარებენ გაყალბებულ საპარლამენტო არჩევნებს.
გაყალბებული საპარლამენტო არჩევნების არაღიარება არ არის პარტიის აკრძალვის საფუძველი. „ქართული ოცნება“ პირდაპირ გვეუბნება, რომ გახარიას პარტიას „საქართველოსთვის“ აკრძალვა არ მოითხოვეს, რადგან იგი საპარლამენტო საქმიანობას შეუდგა.
ამას უნდა დავუმატოთ ის საკითხიც, რომ დაჩქარებული წესით შეიცვალა „საკონსტიტუციო სასამართლოს შესახებ“ ორგანული კანონი, ისევე, როგორც ორგანული კანონი „მოქალაქეთა პოლიტიკური გაერთიანების შესახებ“. ამ ცვლილებების შემდგომ უკვე დაჩქარდა სამართალწარმოება.
მეორეს მხრივ, გაჩნდა ახალი საფუძვლები იმის, რომ პარტიას თუ აკრძალავენ, შემდეგ შეიძლება პარტიის აკრძალვა გამოიყენონ ნებისმიერი პირის მიმართ. ხაზს ვუსვამ – ნებისმიერი პირის მიმართ, იმისთვის, რომ მას ჩამოართვან უამრავი უფლება, მათ შორის პასიური საარჩევნო უფლება, უფლება არჩეული იქნეს შესაბამის თანამდებობაზე.
ეს საკანონმდებლო ცვლილებები აფართოებს საქართველოს კონსტიტუციის ჩამონათვალს საკონსტიტუციო სასამართლოს უფლებამოსილების შესახებ, რომლის შესაძლებლობასაც კონსტიტუცია თვითონ არ ითვალისწინებს.
გამოდის, რომ თუ „ოცნება“ მიზანში ამოიღებს მისთვის პოლიტიკურად არსასურველ ადამიანს, შეუძლია მას დააბრალოს კავშირი რომელიმე აკრძალულ პარტიასთან და აუკრძალოს პოლიტიკური საქმიანობა?
რა თქმა უნდა. ამ ყველაფრის მიზანი არ არის მხოლოდ ის, რომ არსებული 3 პოლიტიკური პარტია აკრძალოს, არამედ მიზანი არის ის, რომ ნებისმიერ ადამიანს სამომავლოდ აუკრძალოს პოლიტიკური საქმიანობა.
ჩვენ ხომ მართლა საკონსტიტუციო სასამართლო არ გვყავს? ეს არის რვა წევრისგან შემდგარი სასამართლო, რომლისგანაც დამოუკიდებელი და რეალურად მოსამართლე მხოლოდ ორია [თემურ ტუღუში, გიორგი კვერენჩხილაძე], დანარჩენი ექვსი არის მიკერძოებული, „ქართულ ოცნებასთან“ დაახლოებული პირები, რომლებიც ყველაფერზე ხელს აწერენ. ისინი ყველა გადაწყვეტილებაში ეთანხმებიან „ქართულ ოცნებას“. ბუნებრივია, მათ მიერ დასაბუთებული გადაწყვეტილების მიღება შეუძლებელია და ეს არ არის მოსალოდნელი.
ეს არაკონსტიტუციური საკანონმდებლო ჩარჩო, რომელიც მათ შექმნეს სამ დღეში განხორციელებული ეგრეთ წოდებული საკანონმდებლო ცვლილებებით, ეწინააღმდეგება კონსტიტუციას და ქმნის იმის საფუძველს, რომ შემდგომში უამრავ ადამიანს აეკრძალოს პოლიტიკური საქმიანობა და „ქართულმა ოცნებამ“, მსგავსად კომუნისტური პარტიისა, ერთპარტიულად შეძლოს არსებობა.
ამისთვის სპეციალური ვადებიც დაადგინეს: მაგალითად, უკანონო მოსმენების კანონი 2017 წელს განიხილეს და ამ დრომდე არ არის გადაწყვეტილება მიღებული – გადაწყვეტილების მისაღებად ვადა არ არის დადგენილი, პარტიების აკრძალვასთან დაკავშირებით კი 9 თვეში უნდა იყოს გადაწყვეტილება გამოტანილი.
არსებობს ასევე 14-დღიანი ვადა უკვე კონკრეტული პირების მიმართ. მაგალითად, კონკრეტული პარტიების აკრძალვის შემდეგ გეტყვიან, რომ არ მოსწონხარ და უნდა აგიკრძალონ პასიური საარჩევნო უფლება [უფლება აგირჩიონ რომელიმე არჩევით პოლიტიკურ თანამდებობაზე], საკონსტიტუციო სასამართლომ დაავალებენ ამ პირის საკითხზე გადაწყვეტილებას მიღებას, რისთვის მას 14 დღე ექნება.
თქვენ ხშირად გიწევთ საკონსტიტუციო სასამართლოს საქმიანობის გაშუქება. ვერცერთ მაგალითს ვერ გამახსენებთ, რომ 14 დღეში რაიმე საკითხი გადაეწყვიტა საკონსტიტუციო სასამართლოს. პრეზიდენტის იმპიჩმენტის გადაწყვეტასაც კი, სჭირდება ერთი თვე.
„ნაციონალური მოძრაობას“ აკრძალვის დასასაბუთებლად „ოცნებამ“ სარჩელში ჩაწერა კონკრეტული საქმეები. არ არის სამართლებრივი არგუმენტი უფლებების დარღვევა პარტიის აკრძალვისთვის?
ცალკე აღებული ადამიანის უფლებების დარღვევა იმ მასშტაბის თუ არ იქნება, რომ წინააღმდეგობაში მოვიდეს დემოკრატიულ, კონსტიტუციურ წყობილებასთან, ვერ იქნება პარტიის აკრძალვის საფუძველი. ამ ნაწილში სარჩელი კონსტიტუციურ დადგენილ ფარგლებს ცდება.
გასათვალისწინებელია დროითი ფაქტორი – როდესაც პარტია ხელისუფლებაში აღარ ყოფილა 13 წელია, რისკი მათი მხრიდან, ადამიანის უფლებები დაირღვეს, ნაკლებია. საფრთხისშემცველი პარტია მაშინ არის, როცა მას ხელისუფლება აქვს, როცა შესაბამისი ძალაუფლება აქვს, აქედან გამომდინარე, ეს რისკის მომენტი ცალკე დასაბუთებას საჭიროებს.
„ოცნებას“ უამრავი დარღვევა აქვს ჩადენილი. მაგალითისთვის რომ ვთქვათ, პირველად ისტორიაში, „მაგნიტსკის სიაში“ არის მოხვედრილი „ქართული ოცნების“ უმაღლესი პოლიტიკური თანამდებობის პირები, მათ შორის, ვახტანგ გომელაური. მათ უპრეცედენტო დარღვევები აქვთ ჩადენილი ადამიანის უფლებების დარღვევის კუთხით და ამ ლოგიკით, მაშინ თავისი პარტიის აკრძალვაც უნდა მოითხოვონ.
ყველა ეს მიზეზი, არგუმენტი, რაც ახლა არის მოფიქრებული, არის პოლიტიკური. წულუკიანის კომისიაც მიზნად ისახავდა, რომ ვითომ საფუძველი მოეფიქრებინათ ამ სარჩელისთვის, ამ ფორმალური პროცედურისთვის.
არის თუ არა განსაკუთრებულად საფრთხისშემცველი „ოცნების“ სარჩელში ენმ-ს „დამოუკიდებლობის ხელყოფასა და ტერიტორიული მთლიანობის დარღვევაში“ დადანაშაულება? ეს ქმნის თუ არა ახალ სამართლებრივ საფუძველს იმისთვის, რომ საქართველო დაადანაშაულონომის დაწყებაში მაშინ, როცა საერთაშორისო სასამართლოებს მიღებული აქვთ ამ საკითხზე გადაწყვეტილება
ამ საკითხზე ალბათ უფრო პოლიტიკოსები იმსჯელებენ. ეს ეხება უსაფრთხოების სფეროს.
მსჯელობაც კი, რასაც ჩვენ წულუკიანის კომისიაზე ვისმენდით, საკმაოდ საშიში იყო და, რა თქმა უნდა, ძალიან ბევრ რისკებს შეიცავს.
„ოცნება“ თავის სარჩელში საუბრობს ჟურნალისტების უფლებების დარღვევაზეც იმ წლებში, როცა ხელისუფლებაში ენმ-ი იყო. „ოცნებამ“, მაგალითად, „ბათუმელების“ დასახელებას არჩია კონკრეტული ჟურნალისტის ვინაობა დაეწერა. ეს რას აჩვენებს თქვენთვის?
რა თქმა უნდა, ყველაფერი სელექციურია. „ოცნება“ ხომ მართლა სიმართლის დადგენას არ ისახავს მიზნად?!
ამ ყველაფრის მიზანია ის, რომ მოხდეს ფორმალური არგუმენტების შემოტანა და ფორმალურად ლაპარაკი, რომ აი, რაღაც დაირღვა და ასე შემდეგ.
„ნაციონალური მოძრაობისგან“ განსხვავებით, ამ სარჩელში „ოცნება“ საერთოდ არ საუბრობს „ლელოს“ და „ახალის“ აკრძალვის არგუმენტებზე. არგუმენტების მითითების გარეშე პარტიის აკრძალვის მოთხოვნა რა სამართალია?
პარტიის აკრძალვას აქვს ყველაზე მაღალი სტანდარტი.
თავის დროზე მსგავსი მექანიზმი არ არსებობდა კონსტიტუციურ სამართალში. მეორე მსოფლიო ომის შემდგომ ჩნდება ეს მექანიზმი, იმიტომ, რომ როცა პარტია, რომელიც თავისი არსით დემოკრატიული მიზნისთვის არის შექმნილი, სცდება პარტიულ მიზანს და პირიქით, დემოკრატიისთვის საფრთხისშემცველია, უნდა გაიყვანონ კონსტიტუციური წესრიგიდან.
საკონსტიტუციო სასამართლოს იმიტომ აქვს ამ ტიპის გადაწყვეტილების მიღების უფლება და არა ჩვეულებრივ სასამართლოებს, რომ ეს უნდა იყოს გამორჩეულად მაღალი მტკიცების და სტანდარტის მქონე სამართალწარმოება.
„ოცნების“ მიზანია პოლიტიკური ოპონენტების დასჯა. როგორც დასაწყისში გითხარით, პაპუაშვილმა პირდაპირ თქვა, რომ ისინი არ სჯიან ამ შემთხვევაში გახარიას პარტიას იმიტომ, რომ ამ შემთხვევაში ის პოლიტიკურ პროცესს შეუერთდა.
ეს არის მცდელობა მათი მხრიდან იმის, რომ ვინც არჩევნებს არ აღიარებს, დასაჯონ და არა ის, რომ მართლა კონსტიტუციის საწინააღმდეგო ქმედებით ვინც არის დაკავებული, მის მიმართ გამოიყენონ სამართლებრივი, კონსტიტუციური მექანიზმი.
ამ საქმეს განიხილავს მოსამართლე ვასილ როინიშვილი, რომელიც ენმ-ს ხელისუფლებაში ყოფნის დროს აჭარის მთავარი პროკურორი იყო. „ოცნება“ კი, სარჩელში ითხოვს „ნაციონალური მოძრაობის აკრძალვას“, მაგალითად, „როინ შავაძის საქმის“ გამოც, რომლის პროკურორი იყო ვასილ როინიშვილი. ეს რას ნიშნავს?
ვასილ როინიშვილი ძალიან რთულად შეიძლება ჩაითვალოს მიუკერძოებელ და დამოუკიდებელ მოსამართლედ. პირიქით, არაერთი ფაქტით დასტურდება, რომ იგი ყოველთვის ხელისუფლების მაამებლურ გადაწყვეტილებას იღებს. მას „ნაციონალური მოძრაობის“ ხელისუფლებაში ყოფნის დროს მართლმსაჯულების გარკვეული ორგანოები ებარა და ვითომ დამოუკიდებელი როლი უნდა შეესრულებინა. ის ამას ვერ ახორციელებდა. იგივე ფუნქციის შესრულება განაგრძო მან „ქართული ოცნების“ დროსაც.
დარწმუნებული ვარ, ამ შემთხვევაშიც ვასილ როინიშვილი ალბათ წარბშეუხრელად განაგრძობს საქმიანობას და მიიღებს იმ გადაწყვეტილებებს, რომლებიც „ქართული ოცნებისთვის“ მაამებლური იქნება. ამ ალბათური მსჯელობის საფუძველს მაძლევს ის წინარე, უამრავი მაგალითი, რომელიც არსებობს მასთან მიმართებით.
რაც შეეხება მიუკერძოებლობას – უფრო ალბათ მოსარჩელემ უნდა დაუყენოს ვასილ როინიშვილს აცილების შუამდგომლობა, იმიტომ რომ ის „ნაციონალური მოძრაობის“ დროს იყო პროკურორი და ვერ იქნება მიუკერძოებელი.
„ქართული ოცნების“ საკონსტიტუციო სასამართლო არის წმინდა წყლის დამორჩილებული, რეპრესიული მექანიზმი და მას სასამართლოსთან დაკავშირებული არაფერი არ სცხია ჩემი აზრით, გარდა ორი დამოუკიდებელი მოსამართლისა, რომელსაც დიდი მადლობა ეკუთვნის ამ მძიმე დროებში მათი პროფესიული ღირსების დაცვისთვის.
გამოძიებით დგინდება, რომ კოოპერატივი და დაქირავებული კომპანია ერთმანეთთან შევიდნენ გარიგებაში, კერძოდ: ,,სოფლისა და სოფლის მეურნეობის განვითარების სააგენტოდან” თანადაფინანსებისათვის გამოყოფილი ბიუჯეტის კუთვნილი ფულადი თანხის 430 200 ლარის თაღლითურად დაუფლების მიზნით შპს „ელიტმშენმა“, კოოპერატივ „რკ ქართული ბოსტნეულს“ გამოუწერა ყალბი ელექტრონული საგადასახადო ანგარიშ-ფაქტურა 1 100 800 ლარის ღირებულების სამუშაოების შესრულებაზე და შესაბამისი ყალბი სასაქონლო ზედნადები სასათბურე მეურნეობის მოსაწყობად საჭირო სხვადასხვა დასახელების საქონელის მიწოდების შესახებ, თუმცა არანაირი სამუშაო არ შესრულებულა.
თავის მხრივ, ყალბი საგადასახადო ანგარიშფაქტურის გამოწერის გზით, კოოპერატივმა მიიღო დღგ-ს ფიქტიური ჩათვლა 167 918 ლარის ოდენობით, საიდანაც დირექტორმა და გამგეობის თავმჯდომარემ მოტყუებით სახელმწიფო ბიუჯეტიდან დაიბრუნეს დღგ-ს თანხა 2 000 ლარი და დამატებით ცდილობდნენ სახელმწიფო ბიუჯეტიდან დღგ-ის ზედმეტობის თანხის ფიქტიური აქტივის 100 000 ლარის დაბრუნებას, რაც საგამოძიებო სამსახურის დროული ჩართულობით ვერ განახორციელეს“ – აცხადებს საგამოძიებო სამსახური.
ამავე სამსახურის ინფორმაციით, დანაშაული ითვალისწინებს თავისუფლების აღკვეთას 6-დან 9 წლამდე ვადით.
„იაფი სახლის“ მშენებლობა ბათუმში, გოროდოკის დასახელებაში მერიამ გასულ წელს დააანონსა, რის შემდეგაც მერიის შესაბამისმა სამსახურმა, საქალაქო ინფრასტრუქტურისა და კეთილმოწყობის სამმართველომ, ბაზრის კვლევაც ჩაატარა. დოკუმენტების მიხედვით, მერიას ვოლსკის ქუჩაზე, #13-ში, 200 ოჯახზე გათვლილი კორპუსი უნდა აეშენებინა, თუმცა მშენებლობა ამ დრომდე არ დაწყებულა.
რა გახდა შეფერხების მიზეზი? – ამ კითხვაზე „ბათუმელები“ მერიისგან პასუხს ერთი კვირის განმავლობაში უშედეგოდ ელოდა.
ტერიტორია, რომელიც მერიამ შეარჩია გოროდოკის დასახლებაში, ქალაქის N19 საბავშვო ბაღის მიმდებარედაა. მიწის ნაკვეთი, რომლის ფართობი 6 246 კვ/მ-ია, ბათუმის მუნიციპალიტეტის საკუთრებაა. საპროექტო ტერიტორიაზე ასევე არის სტადიონი.
ტერიტორია, სადაც „იაფი სახლი“ უნდა აშენებულიყო
„იაფი სახლის“ პროგრამის ფარგლებში ბინები ბოლოს მერიამ 2023 წელს გაანაწილა. ამის შემდეგ მოქალაქეებმა პროგრამაში მონაწილეობისთვის განაცხადების შეტანა ისევ დაიწყეს, ამის პარალელურად, გასულ წელს მერიამ მერამდენჯერ შეცვალა პროგრამის კრიტერიუმები, ხოლო ზოგი დეტალი დააზუსტა.
მას შემდეგ მერია პროგრამის შეფერხებაზე კითხვებს აღარ პასუხობს.
იაფ სახლზე არაფერი წერია 2025 წლის ბიუჯეტის 3 კვარტალის შესრულების ანგარიშშიც, რომელიც მერიამ საკრებულოს უკვე გადაუგზავნა.
„ბათუმელებმა“ მერიას ასევე ჰკითხა, რა გეგმა აქვს უსახლკაროებთან დაკავშირებით, რომლებმაც მიმდინარე წელს ადმინისტრაციული შენობის დაკავება რამდენჯერმე სცადესიმ მიზეზით, რომ ქირის გადახდის საშუალება აღარ აქვთ და თავშესაფარი სჭირდებათ. მერიაში არც ამ კითხვაზე პასუხისთვის უზრუნიათ.
ანგარიშის მიხედვით, რომელიც ბათუმის მერიამ საკრებულოში გადააგზავნა, მერია სოციალური სახლის ასაშენებლად მიწის ნაკვეთს ეძებს და ვერ პოულობს.
„ჩვენ მიერ დაწყებული იქნა მუნიციპალიტეტის სარგებლობაში არსებული შესაბამისი პარამეტრების მქონე ტერიტორიის მოძიება, რასაც დასჭირდა გარკვეული პერიოდი. ამასთანავე, ზემოაღნიშნულ პროცესში, სოციალურ სახლში საცხოვრისის მისაღებად გაიზარდა ბენეფიციართა განცხადებების რაოდენობა“ – ვკითხულობთ ანგარიშში.
ანგარიშში მერია თავს იმართლებს სოციალურ სახლში საცხოვრისის მისაღებად ბენეფიციართა რაოდენობა კიდევ გაიზარდა და განაცხადების კრიტერიუმებთან შესაბამისობის დასადგენად დრო მჭირდებაო, „რაც გულისხმობს მუნიციპალიტეტის მერიის მიერ საცხოვრისის მისაღებად მკაფიოდ განსაზღვრული კრიტერიუმების შესაბამისობის მიზნით, განცხადებების სათანადოდ შესწავლას და კვლევას“.
მერია განცხადებების გაზრდის მიზეზით ხსნის იმასაც, რომ ამ დრომდე სოციალური სახლის ასაშენებლად ქალაქში ადგილი ვერ იპოვა:
„ყოველივე ზემოაღნიშნულმა გარემოებამ, გამოიწვია მთლიანი კონცეფციის ცვლილება, რაც გამოიხატა მუნიციპალიტეტის საკუთრებაში არსებული, შესაბამისი პარამეტრების ალტერნატიული ტერიტორიის მოძიებაში, ბაზრის კვლევაში და სატენდერო პირობების შემუშავებაში.
ზემოჩამოთვლილ ქმედებებს, შესაბამისი პროცედურების გათვალისწინებით, ჩვენგან დამოუკიდებელი მიზეზების გამო, დასჭირდა წლის განმავლობაში არსებული მნიშვნელოვანი პერიოდი, რის გამოც ვერ განხორციელდა გეგმით გათვალისწინებული ასიგნების ათვისება“ – წერს მერია.
________________
ფოტოზე: იაფი სახლში ბინების განაწილების პროცესი, 2023 წელი.
ბათუმში დღეს, 10 ნოემბერს, ნისლია და ამასთან ჰაერი მტვრის ნაწილაკებითაცაა დაბინძურებული. ჰაერში მყარი ნაწილაკების ზრდა, გარემოს სააგენტოს ინფორმაციით, „უდაბნოს მტვრის მასების მცირედ გავრცელებას“ უკავშირდება.
ატმოსფერული ჰაერის ხარისხის პორტალის მიხედვით ბათუმში, [დღის 3 საათის] მონაცემებით, ჰაერში მყარი ნაწილაკების – PM10 და PM2.5 შემცველობის მაჩვენებელი არის დამაკმაყოფილებელი და ცუდი.
„6 ნოემბრიდან, ზოგიერთ სადგურზე, ატმოსფერულ ჰაერში შეინიშნება მყარი ნაწილაკების [PM10 და PM2.5] კონცენტრაციის ზრდა. აღნიშნული პროცესი, ტრანსსასაზღვრო ხასიათისაა და განპირობებულია სამხრეთ-აღმოსავლეთიდან უდაბნოს მტვრის მასების მცირედ გავრცელებით“ – აღნიშნულია გარემოს ეროვნული სააგენტოს ჰაერის ხარისხის პორტალზე.
წყარო: ჰაერის ხარისხის პორტალი
ბათუმში ჰაერის ხარისხს აჩვენებენ გარემოს ეროვნული სააგენტოს ატმოსფერულიჰაერის ხარისხისუწყვეტი მონიტორინგის ავტომატური სადგურები, რომლებიც ორ ადგილზეა განთავსებული – ცენტრალურ პარკში და რესპუბლიკურ საავადმყოფოსთან.
წყარო: ჰაერის ხარისხის პორტალი
სააგენტოს მიერ ატმოსფერული ჰაერის ხარისხის პორტალზე მოცემულია ასევე ჯანდაცვითი რეკომენდაციებიც.
ამ რეკომენდაციების მიხედვით:
თუ ჰაერში მტვრის ნაწილაკების შემცველობა არის „ცუდი“, ამ შემთხვევაში:
„ყველამ შეიძლება განიცადოს ზემოქმედება ჯანმრთელობაზე; ხოლო, სენსიტიური ჯგუფების წევრები შესაძლებელია განიცდიდნენ უფრო სერიოზულ ზემოქმედებას, ვიდრე მოსახლეობა ზოგადად;
შემდეგმა ჯგუფებმა თავი უნდა აარიდონ გახანგრძლივებულ ან დატვირთულ გარე ფიზიკურ აქტივობას: გულის ან ფილტვის დაავადებების მქონე პირებმა, ბავშვებმა და ხანდაზმულებმა;
ყველა დანარჩენმა უნდა შეამციროს გახანგრძლივებული ან დატვირთული გარე ფიზიკური აქტივობა.“
თუ ჰაერში მტვრის ნაწილაკების შემცველობა არის „დამაკმაყოფილებელი“, ამ შემთხვევაში:
„ჰაერის დაბინძურებისადმი სენსიტიური ჯგუფები შესაძლებელია განიცდიდნენ ზემოქმედებას ჯანმრთელობაზე. თუმცა მთელი მოსახლეობისათვის მავნე ზეგავლენა მოსალოდნელი არ არის.
შემდეგმა ჯგუფებმა უნდა შეამცირონ გახანგრძლივებული ან დატვირთული გარე ფიზიკური აქტივობა: გულის ან ფილტვის დაავადებების მქონე პირებმა, ბავშვებმა და ხანდაზმულებმა“.
„ტრანსასაზღვრო დაბინძურების“ გარდა აღნიშნული ნაწილაკების ჰაერში გაფრქვევის ძირითადი წყაროა სამშენებლო პროცესები, ღია გრუნტი, შეშის ღუმელი, დიზელის ძრავები, მრეწველობის სექტორი, ქარის მიერ მიმოფანტული მტვერი. ასევე, ე.წ. მეორადი მყარი ნაწილაკები წარმოიქმნება სხვადასხვა დამაბინძურებლის ფოტოქიმიური რეაქციის შედეგად.
მტვრის ნაწილაკების გავლენა ჯანმრთელობაზე:
თვალის გაღიზიანება, ასთმა, ბრონქიტი, ფილტვის დაზიანება, სიმსივნე, მძიმე ლითონებით მოწამვლა, უარყოფითი ზემოქმედება გულსისხლძარღვთა სისტემაზე.
2025 წლის 9 თვეში ბათუმის ბიუჯეტში მშენებლობის ნებართვის მოსაკრებლის სახით 4 მილიონ 974 000 ლარი შევიდა. ეს თანხა ბიუჯეტის შემოსულობების ნაწილში, „სხვა შემოსავლებშია“ ასახული და მშენებლობის ნებართვისა და კოეფიციენტის გაზრდის მოსაკრებელს მოიცავს, გარდა განსაკუთრებული მშენებლობის, რადიაციული ან ბირთვული ობიექტებისა.
ეს მონაცემი ნიშნავს, რომ ბათუმის განაშენიანება გენგეგმის გარეშე გაცილებით სწრაფი ტემპით გრძელდება.
ზოგადად, ადმინისტრაციული მოსაკრებლებისა და გადასახდელების სახით ქალაქის ბიუჯეტში 9 თვეში 65 მილიონ 398 900 ლარი შევიდა, მათ შორის არის მშენებლობის მოსაკრებელიც.
„სხვა შემოსავლების“ 9 თვის საპროგნოზო მოცულობა მთლიანობაში 2025 წლის ბიუჯეტში 75,3 მილიონი ლარით იყო განსაზღვრული, ფაქტობრივმა შესრულებამ კი 96,5 მილიონი ლარი შეადგინა.
საერთო ჯამში, სხვა შემოსავლების წილი ადგილობრივი ბიუჯეტის მთლიან შემოსულობებში 28,2%-ს შეადგენს.
საანგარიშო პერიოდში სხვა შემოსავლების მაჩვენებლები ცალკეული სახეების მიხედვით შემდეგია:
საკუთრებიდან მიღებული შემოსავლების სახით ბიუჯეტში მობილიზებულია 13 მილიონ 071 200 ლარი, რაც საპროგნოზო მაჩვენებლის, 8 მილიონ 197 ათასი ლარის 159,5%-ია.
პროცენტებიდან მობილიზებულია 10 მილიონ 840 ათასი ლარი, რაც სამი კვარტლის გეგმის – 6 მილიონ 317 ათასი ლარის 171,6%-ს შეადგენს.
რენტის სახით მიღებულია 2 მილიონ 231 ათასი ლარი, რაც სამი კვარტლის გეგმის 118,7 პროცენტია. აქედან, ბუნებრივი რესურსებით სარგებლობისათვის მოსაკრებელზე მოდის 198 400 ლარი, მიწის იჯარიდან და მართვაში [უზუფრუქტი, ქირავნობა და სხვა)] გადაცემიდან შემოსავალზე – 2 მილიონ 032 700 ლარი.
საქონლისა და მომსახურების რეალიზაციიდან მობილიზებულია 65 მილიონ 921 ათასი ლარი.
ბათუმის მუნიციპალიტეტის 2025 წლის 9 თვის ბიუჯეტის ფაქტობრივმა შემოსულობებმა შეადგინა 342,1 მილიონი ლარი. რაც შემოსულობების 2025 წლის მთლიანი გეგმური მაჩვენებლის 72,5%, ხოლო კვარტალთან მიმართებაში – 101,3 პროცენტია.
დღეს, 10 ნოემბერს, ბათუმის საკრებულოში 10 დღის წინ არჩეულმა კომისიის თავმჯდომარეებმა თანამდებობები დატოვეს.
ფაქტობრივად, კომისიის ხელმძღვანელები „საკუთარი განცხადების საფუძველზე“ გადადგნენ და სხვადასხვა თანამდებობაზე ერთმანეთს შეენაცვლნენ. თუმცა, ახალი კენჭისყრის შემდეგ, თანამდებობის გარეშე დარჩნენ საკრებულოს თავმჯდომარის მოადგილე ირაკლი თავდგირიძე და განათლების, კულტურის, ტურიზმისა და სპორტის საკითხთა კომისიის თავმჯდომარე დავით მიქელაძე.
არაოფიციალური ინფორმაციით, აღნიშნულ პირებსა და საკრებულოს თავმჯდომარეს ივანე მაისურაძეს შორის სიტყვიერი დაპირისპირება მოხდა, რის გამოც მიქელაძეს და თავდგირიძეს თანამდებობები დაატოვებინეს.
„ბათუმელებთან“ საუბარში ივანე მაისურაძესთან დაპირისპირების ფაქტს კატეგორიულად უარყოფს ირაკლი თავდგირიძე.
„რა სისულელეა, საიდან მოიტანეთ ეს ინფორმაცია? არანაირი კონფლიქტი არ ყოფილა, მაისურაძე ჩემი მეგობარია,“- გვითხრა ირაკლი თავდგირიძემ.
კითხვაზე, მაშინ რატომ დატოვა თანამდებობა, რომელზეც ათი დღის წინ დაინიშნა? – ირაკლი თავდგირიძე ამბობს, რომ მისი გადაწყვეტილება ოჯახური პირობებით არის განპირობებული.
„მე ჩემსას გეტყვით, სხვისას – ვერა. ჩემზე ვარ პასუხისმგებელი. პირადი პრობლემები მაქვს, ამ ამბებში ვარ და აქედან გამომდინარე მივიღე ეს გადაწყვეტილება. არსად გავქცეულვარ, არავის არ დავმალულვარ,“- ამბობს ირაკლი თავდგირიძე.
ოჯახური პრობლემისთვის თანამდებობის დატოვება რატომ გახდა საჭირო? – ვკითხეთ მას. ირაკლი თავდგირიძემ გვიპასუხა, რომ ის აუცილებლად დაბრუნდება საკრებულოში.
„მშვიდობას და სტაბილურობას ვემსახურები. ამ გუნდის წევრი ვარ და ამ გუნდს ვუდგავარ გვერდში“, – ირაკლი თავდგირიძემ კითხვაზე პასუხად „ქართული ოცნების“ პროპაგანდისტული მესიჯბოქსი გაიმეორა.
სავარაუდო დაპირისპირების შესახებ ინფორმაციის გადამოწმება ვცადეთ საკრებულოს თავმჯდომარესთან ივანე მაისურაძესთანაც. მას ვკითხეთ, თუ რა გახდა მისი მოადგილის თანამდებობიდან გათავისუფლების მიზეზი.
ივანე მაისურაძეც ირაკლი თავდგირიძესთან დაპირისპირებას უარყოფს და მის თანამდებობიდან გადაყენებას ოჯახურ პრობლემებს უკავშირებს.
„რას ამბობთ, პირიქით, ერთი დიდი ოჯახი ვართ. რატომღაც აგორებული ჭორია ეგ. როგორც ვიცი, ოჯახური პრობლემების გამო მას ინტენსიურად მოუწევს უცხო ქვეყანაში ყოფნა და ითხოვა ადამიანმა,“- ამბობს ივანე მაისურაძე.
რაზე მეტყველებს ის, რომ 10 დღის დანიშნული პირების თანამდებობიდან გათავისუფლება გიწევთ? – ამ კითხვაზე პასუხად ივანე მაისურაძე ამბობს, რომ ეს „ცოცხალი პროცესია“.
„საკრებულო გახლავთ ცოცხალი ორგანო, ჩვეულებრივი ბუნებრივი პროცესია. არანაირ პრობლემას მე ამაში ვერ ვხედავ, რომ ვიღაცამ შეიძლება განცხადება დაწეროს გადადგომასთან დაკავშირებით,“- ამბობს ივანე მაისურაძე.
საკრებულოში თანამდებობის გარეშე ირაკლი თავდგირიძის გარდა, დავით მიქელაძეც დარჩა.
მან საკრებულოს სხდომაზე თქვა, რომ შეიძლება ახალ თანამდებობაზე ვიხილოთ.
„ბათუმელებმა“ დავით მიქელაძეს ჰკითხა, თუ სად, რომელ თანამდებობაზე ელოდება დანიშვნას, რომელ უწყებაში და როდის. დავით მიქელაძე დეტალებზე არ საუბრობს, თუმცა დასძენს, რომ საკრებულოს რიგით წევრად დარჩება.
„შემოთავაზება მაქვს სხვა სამსახურიდან და ეს თანამდებობა შეუთავსებელი იყო იმასთან. თუმცა, წასვლას არ ვაპირებ საკრებულოდან. შემიძლია აქაც ვიყო ჩვეულებრივად.
მე პოლიტიკური გუნდის წევრი ვარ და სადაც გუნდს დასჭირდება, იქ ვიქნები“- ამბობს დავით მიქელაძე.
რას შეიძლება უკავშირდებოდეს საკრებულოში ეს ცვლილებები? – ვკითხეთ ბათუმის საკრებულოს წევრს „ლელოდან“ ვაჟა დარჩიას. მისი თქმით, აშკარაა, რომ ეს იყო დავალება.
„ერთი კვირის წინ დანიშნული ხალხი რომ შეთანხმებული იყო ფაქტია, ხომ? ამიტომ მათი გადადგომა, რა თქმა უნდა, კითხვებს ბადებს. ხუთსაათიანი სხდომა ჩატარდა 30 ოქტომბერს, ტაშის კვრით აირჩიეს ეს ხალხი ამ თანამდებობებზე, თავმჯდომარის მოადგილე, კომისიის თავმჯდომარეები და 7 ნოემბერს ყველამ გადაწყვიტა, რომ აღარ უნდა იყვნენ ამ თანამდებობებზე? ფაქტია, რომ დავალება იყო მიღებული.
რაღაცები ისე არ გადანაწილდა, როგორც ზედა რგოლში ვიღაცებს სურდათ და მიიღეს ეს გადაწყვეტილება.
არანაირი თვითმმართველობა, არანაირი დეცენტრალიზაცია, არანაირი საკუთარი ნება აქ არ არსებობს. იქნება დავალება და იმას შეასრულებენ. მათი როლი მხოლოდ და მხოლოდ არის ის, რომ დავალებები შეასრულონ, თორემ აქ საკუთარი ნების საფუძველზე რომ მიეღოთ გადაწყვეტილება, რა თქმა უნდა, ეს იქნებოდა სიგიჟე, მაშინ როცა ერთი კვირის წინ განსაკუთრებული ოვაციებით იღებდნენ მილოცვებს აღნიშნულ თანამდებობებზე არჩევისთვის,“- ამბობს ვაჟა დარჩია.
მისი თქმით, ლევან დავითაძეს, რომელიც ირაკლი თავდგირიძის ნაცვლად დანიშნეს საკრებულოს თავმჯდომარის მოადგილედ, ბათუმის მერიაში ვიცე-მერის თანამდებობა ეკავა არჩილ ჩიქოვანის დროს, შემდეგ კი სოფლის მეურნეობის სამინისტროში გადაიყვანეს.
„ირაკლი თავდგირიძე, სავარაუდოდ, საკრებულოს წევრად დარჩება, რადგან მაჟორიტარია და საკრებულოდან გასვლის შემთხვევაში მის სამაჟორიტარო უბანში ახალი არჩევნების ჩატარება გახდება საჭირო. ამ არჩევნებს ახლა არავინ ჩაატარებს.
დანარჩენებს კი, ფაქტობრივად, მხოლოდ ადგილები შეუცვალეს და ისევ დანიშნეს კომისიის თავმჯდომარეებად. ამიტომ ვუწოდე ამ ყველაფერს პროცედურული მასკარადი.
ერთკანდიდატიანი არჩევნები, ერთი გუნდის მიერ დანიშნული ხელმძღვანელები და მერე, ყველა ერთად გადაყენებული“- ამბობს ვაჟა დარჩია.
ბათუმის საკრებულოში 10 დღის წინ არჩეული კომისიის ხელმძღვანელები „საკუთარი განცხადების საფუძველზე“ გადადგნენ და სხვადასხვა თანამდებობაზე ერთმანეთს შეენაცვლნენ.
დღეს, 10 ნოემბერს, ბათუმის საკრებულოს რიგგარეშე სხდომა გაიმართა. სწორედ აქ გახდა ცნობილი, რომ ყველა მნიშვნელოვანი კომისიის თავმჯდომარემ თანამდებობა დატოვა.
„7 ნოემბერს საკრებულოში შემოვიდა საკრებულოს თავმჯდომარის მოადგილის, ირაკლი თავდგირიძის, საკრებულოს განათლების, კულტურის, ტურიზმისა და სპორტის საკითხთა კომისიის თავმჯდომარის დავით მიქელაძის, საფინანსო და ეკონომიკური განვითარების კომისიის ლევან დავითაძის და ჯანმრთელობისა და სოციალურ საკითხთა კომისიის თავმჯდომარის გოჩა მგელაძის განცხადებები, საკუთარი სურვილით თანამდებობების დატოვების შესახებ.
მოქმედი კანონმდებლობის შესაბამისად, საკრებულოს თანამდებობის პირს, პირადი განცხადების გაკეთების შემთხვევაში, უფლებამოსილება უწყდება პირადი განცხადების რეგისტრაციის დღეს. შესაბამისად, ზემოთ აღნიშნულ თანამდებობის პირებს, უფლებამოსილება ვადამდე შეუწყდათ 8 ნოემბერს,”- თქვა ბათუმის საკრებულოს თავმჯდომარემ, ივანე მაისურაძემ საკრებულოს სხდომაზე.
ბათუმის საკრებულოს თავმჯდომარემ ასევე წევრებს აცნობა, რომ “საკუთარი სურვილით” დატოვეს თანამდებობები ფრაქცია “ქართული ოცნება – დემოკრატიული საქართველოს” თავმჯდომარის მოადგილეებმა – ნერიმან ცინცაძემ და ჯაბა ჭანტურიამ.
„შემოვიდა პირადი განცხადება თანამდებობების დატოვების შესახებ,“ – განმარტა საკრებულოს თავმჯდომარემ, ივანე მაისურაძემ.
ბათუმის საკრებულოს თავმჯდომარის ახალ მოადგილედ ლევან დავითაძე აირჩიეს.
საკრებულოს განათლების, კულტურის, ტურიზმისა და სპორტის საკითხთა კომისიის თავმჯდომარის თანამდებობაზე აირჩიეს ჯაბა ჭანტურია, საფინანსო და ეკონომიკური განვითარების კომისიის თავმჯდომარედ – გოჩა მგელაძე და ჯანმრთელობისა და სოციალურ საკითხთა კომისიის თავმჯდომარედ – ნერიმან ცინცაძე.
უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2025 წლის 10 ნოემბრამდე პერიოდში, რუსეთის არმიის საბრძოლო დანაკარგი არის:
ცოცხალი ძალა – დაახლოებით 1 152 160 ადამიანი [გასულ დღე-ღამეში +1 090. ამ მონაცემებში შედის როგორც დაღუპულები ასევე დაჭრილები]
ტანკი – 11 342 ერთეული [+7]
ჯავშანტექნიკა – 23 552 ერთეული [+7]
საარტილერიო სისტემა – 34 349 ერთეული [+9]
MLRS – 1 538 ერთეული [+0]
საზენიტო საბრძოლო სისტემა – 1 239 ერთეული [+0]
თვითმფრინავი – 428 ერთეული [+0]
ვერტმფრენი – 347 ერთეული [+0]
უპილოტო საფრენი აპარატის ოპერატიულ-ტაქტიკური დონე – 79 425 ერთეული [+57]
ფრთოსანი რაკეტა [ჩამოაგდეს] – 3 926 ერთეული [+0]
გემი/ნავი – 28 ერთეული [+0]
წყალქვეშა ნავი – 1 ერთეული [+0]
მანქანები და საწვავის ავზები – 66 957 ერთეული [+77]
სპეცტექნიკა – 3 993 ერთეული [+0]
უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.
უკრაინის სამხედრო დანაკარგებზე ინფორმაცია განაახლა რუსეთმაც.
რუსეთის თავდაცვის სამინისტროს მიერ გავრცელებული მონაცემებით, ომის დაწყებიდან 2025 წლის 10 ნოემბრამდე პერიოდში სულ განადგურებულია უკრაინის:
668 თვითმფრინავი
283 ვერტმფრენი
95 925 უპილოტო საფრენი აპარატი
635 საზენიტო სარაკეტო სისტემა
25 939 ტანკი და სხვა ჯავშანტექნიკა
1 611 მრავალჯერადი სარაკეტო გამშვები
31 224 საველე არტილერია და ნაღმმტყორცნი
46 305 სპეციალური სამხედრო მანქანა
ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.
ამასთან, აღნიშნულ მონაცემებთან ერთად რუსეთის თავდაცვა, უკრაინის და რუსეთის არმიის ცოცხალი ძალის საერთო დანაკარგების შესახებ სტატისტიკას არ აქვეყნებს. უკრაინის არმიის ცოცხალი ძალის დანაკარგების შესახებ მონაცემებს არ აქვეყნებს არც უკრაინა.
—
რუსეთი უკრაინაში 2022 წლის 24 თებერვალს გამთენიისას შეიჭრა და სრულმასშტაბიანი ომი დაიწყო.
დღეს, 9 ნოემბერს, „ქართული ოცნების“ განათლების მინისტრის მოადგილემ, ზვიად გაბისონიამ კომენტარი გააკეთა საჯარო სკოლის მასწავლებლების რეპეტიტორობასთან დაკავშირებით და თქვა, რომ კორუფციის წინააღმდეგ კანონში შეტანილი ცვლილებები მასწავლებლებს რეპეტიტორობას არ უკრძალავს.
„კორუფციის წინააღმდეგ ბრძოლის“ კანონმდებლობით განისაზღვრა გარკვეული ტიპის სფეროები, სადაც დაშვებულია დამატებითი საქმიანობა, მათ შორის განათლების სფეროში ასეთად განისაზღვრა სამეცნიერო და პედაგოგიური საქმიანობა. ,
დამსაქმებლის თანხმობით პედაგოგებს, აკადემიური და სამეცნიერო წრეების წარმომადგენლებს უფლება აქვთ, დამატებით ეწეოდნენ სამეცნიერო და პედაგოგიურ საქმიანობას.
რაც შეეხება საგამონაკლისო წესებს, მაგალითად, ძალიან ბევრი დეზინფორმაცია ვრცელდება მასწავლებლებთან და ე.წ. კერძო რეპეტიტორის ინსტიტუტთან დაკავშირებით.
გვინდა განვმარტოთ, რომ საქართველოს საგანმანათლებლო კანონმდებლობის მიხედვით, არ არსებობს დეფინიცია რეპეტიტორობისა და აქედან გამომდინარე, შეუძლებელია, ვისაუბროთ გარკვეული ტიპის შეთავსებებზე ან თანხმობებზე, რადგან ასეთი ტიპის განმარტება კანონმდებლობაში არ არსებობს.
შესაბამისად, თუ ორ ფიზიკურ პირს შორის ხდება რაიმე ტიპის შეთანხმება იმასთან დაკავშირებით, რომ მოხდეს მომსახურების შეთანხმების გაწევა ან გარკვეული ტიპის საგანმანათლებლო ცოდნის გაზიარება, ეს სცილდება განათლების კანონმდებლობას და აქედან გამომდინარე, ის ვერ იქნება განმარტებული, როგორც შეთავსებითი ტიპის საქმიანობა,“-ამბობს ზვიად გაბისონია.
„გახარია-საქართველოსთვის“ ფრაქციის ხელმძღვანელი „ქართული ოცნების“ პარლამენტში შალვა კერესელიძე, მათი პარტიის წევრის, ჯემალ ანანიძის კლინიკაში მოხვედრასთან დაკავშირებით განცხადებას ავრცელებს.
შალვა კერესელიძის ინფორმაციით, ჯემალ ანანიძე საკუთარ სახლში ყოფნის დროს შეუძლოდ გახდა, რის შემდეგაც ის საავადმყოფოში გადაიყვანეს.
„ჩვენი საპარლამენტო გუნდის წევრის ჯემალ ანანიძის ჯამრთელობასთან დაკავშირებით სოციალური ქსელით სხვადასხვა დაუზუსტებელი ინფორმაცია ვრცელდება.
ამ ეტაპზე, არსებული ინფორმაციით, ჯემალ ანანიძე მარტო იმყოფებოდა სახლში, რა დროსაც მიიღო ინსულტი და სამზარეულოში წაქცევისას თავის არეში დაზიანება.
სამაშველო სამსახურს მოუწია ჩაკეტილი ბინის გახსნა მის გამოსაყვანად.
ორი დღის წინ ჩაუტარდა მძიმე ოპერაცია და იმყოფება სამედიცინო პერსონალის მეთვალყურეობის ქვეშ.
ამ ეტაპზე სხვა ინფორმაციას არ ვფლობთ, არც ჩვენ და არც ოჯახი. გთხოვთ, თავი შეიკავოთ ნებისმიერი სხვა სახის სპეკულაციური ინფორმაციების გავრცელებისგან,“ – წერს ფეისბუქზე შალვა კერესელიძე.
ჯემალ ანანიძის კლინიკაში გადაყვანასთან დაკავშირებით ინფორმაცია სოციალურ ქსელებში დღეს, 9 ნოემბერს გავრცელდა.
შპს „კრისტალ ჯგუფის“ მფლობელს ვლადიმერ სტეფანიანს პროკურატურამ ბრალი წაუყენა.
მათი ინფორმაციით, კრისტალ ჯგუფში შემავალი შპს „ბაკურიანი ბიზნეს ჯგუფის“ ძირითად საქმიანობას დაბა ბაკურიანში სასტუმროს ტიპის საცხოვრებელი კომპლექსების მშენებლობა და მისი შემდგომი რეალიზაცია წარმოადგენდა.
ვლადიმერ სტეფანიანი, რომელიც ფაქტობრივად ხელმძღვანელობდა საწარმოს ყოველდღიურ საქმიანობას, უხეშად არღვევდა როგორც დაბა ბაკურიანის განაშენიანების გენერალური გეგმით დადგენილ, ასევე, შესაბამისი სამსახურიდან მიღებულ მშენებლობის სანებართვო პირობებს.
უკანონოდ აშენებულ საცხოვრებელ ფართობებს კი ეტაპობრივად ასხვისებდა.
აღნიშნული გზით, შპს „ბაკურიანი ბიზნეს ჯგუფმა“ დიდი ოდენობით – 1 894 925 ლარი შემოსავალი მიიღო.
მიღებული დიდი ოდენობით თანხისათვის კანონიერი სახის მისაცემად, ბრალდებულმა თანხის ნაწილი შპს „ბაკურიანი ბიზნეს ჯგუფიდ“ საბანკო ანგარიშებზე განათავსა, ხოლო ნაწილი პირად საკუთრებაში გადაიტანა, რის შემდგომაც საწარმოს, თავისი და დაკავშირებული პირების სახელზე უძრავ/მოძრავი ქონებები შეიძინა.
დაკავებულს ბრალდება უკანონო სამეწარმეო საქმიანობისა და უკანონო შემოსავლის ლეგალიზაციის ფაქტებზე, საქართველოს სისხლის სამართლის კოდექსის 192-ე და 194-ე მუხლებით წარედგინა, რაც სასჯელის სახედ და ზომად თორმეტ წლამდე თავისუფლების აღკვეთას ითვალისწინებს“-აცხადებს პროკურატურა.
ვლადიმერ სტეფანიანი გუშინ, 8 ნოემბერს დააკავა პოლიციამ. მას ბაკურიანში, დიდველზე სასტუმრო ტიპის 5 კოტეჯის უკანონო მშენებლობას ედავებიან.
2 მილიონი ლარია გათვალისწინებული ბათუმის ახალ ბულვართან პლაჟის ხელოვნურად შენარჩუნებისთვის აჭარის 2026 წლის ბიუჯეტის პროექტში. პროგრამა პლაჟის ხელოვნურ კვებას ითვალისწინებს, რაც ჭოროხის კალაპოტიდან ხრეშის ამოღებას და ზღვის სანაპიროზე დაყრას გულისხმობს. ხრეშის ხელოვნურად შეტანის გარეშე ბათუმი პლაჟის გარეშე დარჩება.
ბათუმის ბულვარის გასწვრივ პლაჟის შენარჩუნებისთვის კი, ბოლო გათვლებით, ყოველწლიურად მინიმუმ 120 ათასი კუბური მეტრი ხრეშის შეტანაა აუცილებელი.
2024 წელს პლაჟის ხელოვნური კვებისთვის 1,3 მილიონი ლარი დაიხარჯა, ხოლო მიმდინარე 2025 წელს – 2 მილიონია გამოყოფილი, თუმცა სანაპიროზე ხრეშის შეტანა წელს ჯერ არ დაწყებულა.
2-2 მილიონი ლარი იქნება გათვალისწინებული ყოველწლიურად მომდევნო 2027-2029 წლებშიც.
„პროგრამა „პლაჟის ხელოვნური კვების სამუშაოები“ ითვალისწინებს ქალაქ ბათუმში შავი ზღვის სანაპირო ზოლის ე.წ. ახალი ბულვარის მიმდებარე მონაკვეთზე პლაჟის ხელოვნური კვების სამუშაოების განხორციელებას.
კერძოდ, მდ. ჭოროხის კალაპოტში არსებული კარიერიდან პლაჟწარმომქმნელი ნატანის ტრანსპორტირებას და შავიზღვის სანაპირო ზოლზე წინა წლებში მოწყობილი რეცხვადი ბერმის რეკონსტრუქციის სამუშაოებს.
პროგრამის ფარგლებში განხორციელდება სამუშაოების საპროექტო-სახარჯთაღრიცხვო დოკუმენტაციის, პლაჟის ხელოვნური კვების სამუშაოებისა და სამუშაოებზე ტექნიკური ზედამხედველობის მომსახურების შესყიდვა.“ – აღნიშნულია აჭარის 2026 წლის ბიუჯეტის პროექტში.
პროგრამაში, რომელსაც აჭარის გარემოს დაცვისა და ბუნებრივი რესურსების სამმართველო ახორციელებს, აღნიშნულია, რომ ხელოვნური კვების შედეგად შენარჩუნებული პლაჟის სიგანე, საშუალოდ 50 მეტრამდე უნდა იყოს.
ხელოვნური კვებით შენარჩუნებული პლაჟი ბათუმის ახალ ბულვართან. ხრეში აქ ყოველწლიურადაა შესატანი.
ბათუმის სანაპიროს პრობლემებზე „ბათუმელები“ წლებია წერს და ყველა სპეციალისტი პრობლემად ზღვაში ნატანის დეფიციტს ასახელებდა:
ბათუმის პლაჟები საუკუნეების განმავლობაში შენარჩუნებული იყო მდინარე ჭოროხის მიერ ზღვაში ჩატანილი ნატანით.
გასულ საუკუნეში მდინარის კალაპოტის შეცვლამ ნატანის რაოდენობა შეამცირა – დელტაში თავმოყრილი ნატანის ძირითადი მასა ზღვაში არსებულ ღრმა კანიონში იკარგებოდა;
თავის დროზე მდინარე ჭოროხზე კაშხლების მშენებლობამ თურქეთში, მინიმუმამდე დაიყვანა ნატანის რაოდენობა;
ამას დაერთო ჰესების მშენებლობა მდინარე აჭარისწყალზე და ჭოროხზე საქართველოში; ასევე ჭოროხის დელტაში თავმოყრილი ინერტული მასალების მშენებლობებზე გამოყენება;
შესაბამისად, ზღვას პლაჟების შენარჩუნებისთვის საჭირო მასალა აღარ დარჩა
შეწყდა ხელოვნური კვებაც, რამაც გამოიწვია კატასტროფული ეროზიული პროცესები აეროპორტის მიმდებარე ტერიტორიიდან ბულვარის მიმართულებით, რაც დღესაც გრძელდება.
ხელოვნური კვებით შენარჩუნებულ პლაჟს [რეცხვად ბერმას] შტორმის დროს ზღვა პერიოდულად რეცხავს. წარეცხილი ნატანი მასალა [ქვიშა-ხრეში] კი ბათუმის კონცხთან ზღვაში იკარგება.
ახალი ბულვარიდან აეროპორტის ასაფრენ ზოლამდე მონაკვეთში ამ დამცავი კედლის მშენებლობაში 57 მილიონამდე ლარი დაიხარჯა. ეს ნაგებობა რომ მდგრადი იყოს მის გასწვრივ მინიმუმ 20 მეტრი სიგანის პლაჟი მაინც უნდა იყოს. პლაჟი აქაც ხელოვნური კვებით უნდა მოეწყოს, რაც არ ხდება. მეტიც, ამ ნაგებობას პატრონი არ ჰყავს.
ნაპირის გამაგრებას ლოდების ჩაწყობით ზოგი სპეციალისტი ადრეც ეწინააღმდეგებოდა, თუმცა ნაგებობები ისე მოაწყვეს, რომ ზღვისგან დაცვის სტრატეგია სახელმწიფოს არ გააჩნდა და არც დღეს აქვს. შედეგად კი, ზღვამ ადლია-ბათუმთან ჯამში ჰექტრობით ხმელეთი მიიტაცა.
„ახლო მომავალში აუცილებლად უნდა შემუშავდეს [ბათუმის] სანაპიროს ექსპლოატაციის და ზღვისგან დაცვის ახალი სტრატეგია. წინააღმდეგ შემთხვევაში კატასტროფული მოვლენები გარდაუვალია, ვინაიდან ამოწურულია ზღვის სანაპიროს ბუნებრივი დინამიკის აღდგენის ყველა შესაძლებლობა“, – აღნიშნულია დოკუმენტში, რომელიც სამი წლის წინ აჭარის მთავრობის დაკვეთით მომზადდა.
აჭარის მთავრობიდან, ასევე, აჭარის სოფლის მეურნეობის სამინისტროდან და ბათუმის მერიიდან „ბათუმელებს“ დღემდე არ აქვს პასუხი კითხვაზე – დაწყებულია თუ არა მუშაობა ზღვისგან დაცვის ახალ სტრატეგიაზე.
გარემოს ეროვნული სააგენტოს აჭარის რეგიონული ჰიდრომეტეოროლოგიური ობსერვატორიის ინფორმაციით, 9 ნოემბრის 21 საათიდან 10 ნოემბრის 21 საათამდე ბათუმსა და მთლიანად აჭარაში მოსალოდნელია ცვალებადი მოღრუბლულობა, უმეტესად უნალექოდ.
იქროლებს ცვალებადი მიმართულების ქარი 8-13 მეტრი წამში.
უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2025 წლის 9 ნოემბრამდე პერიოდში, რუსეთის არმიის საბრძოლო დანაკარგი არის:
ცოცხალი ძალა – დაახლოებით 1 151 070 ადამიანი [გასულ დღე-ღამეში +970. ამ მონაცემებში შედის როგორც დაღუპულები ასევე დაჭრილები]
ტანკი – 11 335 ერთეული [+5]
ჯავშანტექნიკა – 23 545 ერთეული [+1]
საარტილერიო სისტემა – 34 340 ერთეული [+19]
MLRS – 1 538 ერთეული [+0]
საზენიტო საბრძოლო სისტემა – 1 239 ერთეული [+0]
თვითმფრინავი – 428 ერთეული [+0]
ვერტმფრენი – 347 ერთეული [+0]
უპილოტო საფრენი აპარატის ოპერატიულ-ტაქტიკური დონე – 79 368 ერთეული [+440]
ფრთოსანი რაკეტა [ჩამოაგდეს] – 3 926 ერთეული [+8]
გემი/ნავი – 28 ერთეული [+0]
წყალქვეშა ნავი – 1 ერთეული [+0]
მანქანები და საწვავის ავზები – 66 880 ერთეული [+85]
სპეცტექნიკა – 3 993 ერთეული [+0]
უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.
უკრაინის სამხედრო დანაკარგებზე ინფორმაცია განაახლა რუსეთმაც.
რუსეთის თავდაცვის სამინისტროს მიერ გავრცელებული მონაცემებით, ომის დაწყებიდან 2025 წლის 9 ნოემბრამდე პერიოდში სულ განადგურებულია უკრაინის:
668 თვითმფრინავი
283 ვერტმფრენი
95 801 უპილოტო საფრენი აპარატი
635 საზენიტო სარაკეტო სისტემა
25 925 ტანკი და სხვა ჯავშანტექნიკა
1 611 მრავალჯერადი სარაკეტო გამშვები
31 194 საველე არტილერია და ნაღმმტყორცნი
46 243 სპეციალური სამხედრო მანქანა
ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.
ამასთან, აღნიშნულ მონაცემებთან ერთად რუსეთის თავდაცვა, უკრაინის და რუსეთის არმიის ცოცხალი ძალის საერთო დანაკარგების შესახებ სტატისტიკას არ აქვეყნებს. უკრაინის არმიის ცოცხალი ძალის დანაკარგების შესახებ მონაცემებს არ აქვეყნებს არც უკრაინა.
—
რუსეთი უკრაინაში 2022 წლის 24 თებერვალს გამთენიისას შეიჭრა და სრულმასშტაბიანი ომი დაიწყო.
„მე, როგორც ერთ რიგით მასწავლებელს, ყოველდღიურ ცხოვრებაში, ყოველდღიურ საქმიანობაში მექმნება პრობლემები, არ მაქვს ელემენტარული საშუალებები იმისთვის, რომ უფრო საინტერესო გაკვეთილი ჩავატარო და რაღაც მწვერვალებზე მელაპარაკები? უკაცრავად, მაგრამ არ მჯერა“-ამბობს თამუნა მაჭარაშვილი, სამოქალაქო განათლების მასწავლებელი.
„ბათუმელები“ პედაგოგს „ქართული ოცნების“ მიერ დაანონსებულ სასკოლო რეფორმაზე ესაუბრა, რომელიც მე-12 კლასის გაუქმებას გულისხმობს.
ქალბატონო თამუნა, რა აზრის ხართ მე-12 კლასის გაუქმებაზე და იმ ცვლილებებზე, რასაც „ოცნება“ სკოლებსა და უნივერსიტეტებში აპირებს?
ამ ცვლილებებს შევაფასებდი, როგორც ნაჩქარევად მიღებულ გადაწყვეტილებას. პოლიტიკური ელფერი უფრო აქვს ამ რეფორმას და თუკი ასეთი ეროვნული იდეით და სახელმწიფოებრივი ინტერესებით არის გამსჭვალული მათი განათლების რეფორმა, რატომ არ გააკეთეს აქამდე? რას ველოდებოდით. ხომ შეიძლებოდა ამ წლების განმავლობაში უკვე ღირებული შედეგი მიგვეღო.
მაგრამ ეს მოფიქრებულია იმისთვის, რომ უფრო მეტად დაიმორჩილონ და მართონ საზოგადოება.
სრული კონტროლის დაწესება სურთ სკოლებსა და უნივერსიტეტებზე?
ყოველ შემთხვევაში, მე ასეთი შთაბეჭდილება მრჩება.
ზოგადად, სკოლაში ძალიან ბევრი პრობლემაა. დღევანდელი სკოლა ფუნქციადაკარგულია რეალურად. უფრო სოციალური ურთიერთობების სივრცედ იქცა, ვიდრე განათლების მიღების საშუალებად, ეს ახალი არავისთვის არ არის და ეს არ არის ერთი კონკრეტული სკოლის პრობლემა, ეს არის ქვეყნის პრობლემა, რომ განათლების, სასკოლო განათლების ხარისხი ქვეყანაში არის ძალიან დაბალი.
შესაბამისად, საუნივერსიტეტო სივრცეშიც როდესაც გადადიან სკოლის მოსწავლეები, არ არიან მზად, რომ საუნივერსიტეტო განათლება მიიღონ. იმიტომ, რომ სათანადო მზაობა არ აქვთ ამისთვის.
რა უშლის ხელს ხარისხის შექმნას?
უხარისხობა სისტემის ბრალია, რადგან რეფორმები, რაც აქამდე გატარებულა ან ტარდება, არ არის თანმიმდევრული. დაიწყებენ რაღაცას, მასწავლებლები გავდივართ ტრენინგებს, ვემზადებით, ჩართული ვართ რეფორმის განხორციელებაში და უცებ, ისე, რომ არავითარი კვლევა, არავითარი შედეგების ანალიზი არ ხდება, გვეუბნებიან, რომ რეფორმა არის წარუმატებელი, არ იმუშავა და ვიწყებთ ახალ რეფორმას. ეს არის არათანმიმდევრული საგანმანათლებლო პოლიტიკის შედეგი.
გამოდის, მთელი ეს 13 წელი იყო დაუსრულებელი და უშედეგო რეფორმები?
დიახ. აი, მე, როგორც მასწავლებელს, რომელიც ჩართული ვარ სასკოლო პროცესებში და თავიდანვე ძალიან მოტივირებული ვიყავი იმისთვის, რომ მასწავლებლად მემუშავა, დღეს ეს მოტივაცია მაქვს დაკარგული, იმიტომ, რომ ვერ ვხედავ ამ რეფორმების მიზანს და რეალურ შედეგს.
იკარგება ფინანსები, იკარგება ადამიანური რესურსი, მასწავლებლების მოტივაციაც და მივიღეთ გამოფიტული მასწავლებლები, რომლებიც ხშირ შემთხვევაში, ხელისუფლებისთვის საარჩევნო ხმების დაგროვების კარგი წყარო არიან და ამ მხრივაც ძალიან ილახება მასწავლებლის ავტორიტეტი, რომ სკოლას ვერ მოშორდა ეს პოლიტიკური წნეხი.
ყველა ხელისუფლება ცდილობს, რომ მასწავლებლები და სასკოლო-საგანმანათლებლო სისტემა თავისი მარწუხების ქვეშ ამყოფოს.
ის, რომ მასწავლებლები დღეს ყველაზე ნაკლებად აქტიური არიან პოლიტიკურ პროცესებში, ასევე იმ თემის გარშემო, რაც სასკოლო რეფორმას ეხება, იმის შედეგია, რომ ხელისუფლებამ მოწყვლადი გახადა ისინი, თუ სხვა მიზეზებსაც ხედავთ ამაში?
ამ ეტაპზე რისი დაკვირვების შესაძლებლობაც გვაქვს, ეს არის კონტროლის შედეგი. ამ რეფორმების მიზანიც არის კიდევ უფრო მეტი კონტროლი, უფრო მეტად დამორჩილება. თუკი ვიმორჩილებთ, მოდი, უფრო მეტად დავიმორჩილოთ, – ეს პრინციპია. იმიტომ, რომ განათლების სფეროს წარმომადგენლებმა უნდა აღზარდონ, მომავალი თაობა და თუ სკოლა დგას რეჟიმის სამსახურში, ამ შემთხვევაში მიღწევადია ის მიზანი, რასაც ხელისუფლება ისახავს.
გარდა ამისა, ამ ყველაფერს ფუთავენ იმით, რომ აი, ჩვენ გვინდა ავაყვავოთ სკოლა, ხელფასი გავზარდოთ, რაღაც დასაქმების შესაძლებლობა იყოს ქვეყანაში, თითქოს აძლევენ პატრიოტულ ელფერს ამ ყველაფერს, მაგრამ მხოლოდ პოპულისტური, ზედაპირული განცხადებებია ეს, რადგან დღეს სკოლებს ელემენტარული პრობლემები არ აქვთ მოგვარებული. დამლაგებელიც კი არ ჰყავს ბევრ სკოლას, არ არის ინფრასტრუქტურა და ამ დროს, რაღაც მწვერვალზე ასვლას ჰპირდები? ჯერ ის უნდა უთხრა, როგორ ადიხარ.
რამდენი წელია შენდება სკოლები და ვერ აშენდა. ბავშვები შეხიზნულები არიან სხვადასხვა სკოლაში და ვერ ხერხდება სათანადო პირობების შექმნა მათთვის. ბავშვების ნაწილი ისევ ონლაინ სწავლობს, იმიტომ, რომ სკოლის შენობა არ არის. ეს ვერ დაალაგეს წლებია და ახლა გვპირდებიან რაღაცა „იდეალურ მომავალს“ და პერსპექტივას, რომელიც ფაქტობრივად, წარმოუდგენელია, რადგან ჯერ ბაზისური პრობლემებიც კი არ აქვთ მოგვარებული.
მე, ერთ რიგით მასწავლებელს ყოველდღიურ ცხოვრებაში, ყოველდღიურ საქმიანობაში მექმნება პრობლემა, არ მაქვს ელემენტარული საშუალებები იმისთვის, რომ უფრო საინტერესო გაკვეთილი ჩავატარო და რაღაცა მწვერვალებზე მელაპარაკები? უკაცრავად, მაგრამ არ მჯერა.
ამ რეფორმის მიზანი არ არის ის, რომ უკეთესი განათლების სისტემა და უფრო განათლებული თაობა გვყავდეს. მიზანია უფრო კარგად ვაკონტროლოთ საგანმანათლებლო სისტემა და ჩავაყენოთ რეჟიმის სამსახურში.
დამოუკიდებლობის შემდეგ საქართველოში გაიზარდა დასავლური განათლების მქონე, პროგრესულად მოაზროვნე თაობა. ცხადია, რომ „ქართულმა ოცნებამ“ ქვეყნის კურსი რუსეთისკენ შემოაბრუნა, ქართველ ხალხს კი ევროპის გზებს უკეტავს. ფიქრობთ, რომ ეს რეფორმაც ამას ემსახურება, რომ ჩაკეტილ გარემოში მორჩილი თაობა გაიზარდოს, სადაც აღარავის შერჩება წინააღმდეგობის უნარი?
ასე გამოდის. ბევრი მოსწავლეა დღესაც, რომლებსაც ძალიან უნდათ დასავლურ უნივერსიტეტებში სწავლის გაგრძლება და წუხან იმის გამო, რაც ქვეყანაში ხდება. ამიტომ, ამ შესაძლებლობების შეზღუდვა და დავიწროება, ვფიქრობ, ბოროტებაა სახელმწიფოს მხრიდან.
რატომ უნდა შეუზღუდო განათლების მიღების შესაძლებლობა საკუთარ ახალგაზრდას, საკუთარ მოქალაქეებს? პირიქით, დიახაც უნდა მიიღონ განათლება საზღვარგარეთ, იმიტომ, რომ უკეთესი სისტემა არსებობს. შენ შეუქმენი იმის პირობა და შესაძლებლობა, რომ დაბრუნდნენ საკუთარ ქვეყანაში და აქ იმუშაონ, ამ ქვეყნის განვითარებაში მიიღონ მონაწილეობა.
ამიტომ თუ ლოგიკურად დავაკავშირებთ ამ ყველაფერს ერთმანეთს, მათი მიზანიც ადვილად გასაგები იქნება, – მიზანია, მოწყვიტონ ქართველი ახალგაზრდები კრიტიკულ გარემოს, თავისუფალ გარემოს. არ ვაჩვენოთ რას ნიშნავს თავისუფლება, როგორც საბჭოთა კავშირში იყო, არა? ჩაკეტილი თაობა, ეგონათ, რომ მხოლოდ საბჭოთა კავშირი და საბჭოთა თაობა იყო ბედნიერი.
დიახ. ალბათ, ასეთი თაობის მიღება უნდათ. თუმცა, ძალიან დიდი შრომა დასჭირდებათ ამისთვის, რადგან მოსწავლები, ვისაც მე ვასწავლი, ამ ტყუილს ნამდვილად ვერ გადაყლაპავენ და ვერ დაიჯერებენ. მათ ასე მარტივად ვერ გააჩუმებენ და ვერ გააჩერებენ. ძალიან დიდი დრო დასჭირდება ქართველი ახალგაზრდების და ბავშვების ისეთ აზროვნებამდე მიყვანას და ჩამოყალიბებას, როგორიც მათ უნდათ.
მაგრამ, მგონია, რომ ეს რეფორმაც ერთ-ერთი წყალში ჩაყრილი მცდელობა იქნება იმისა, რომ დაიმორჩილონ ქართული საზოგადოება.
ფინანსთა სამინისტროს საგამოძიებო სამსახურის ინფორმაციით, ქრთამის აღების ფაქტზე ხულოს მუნიციპალიტეტის მერიის წარმომადგენელი დააკავეს.
„გამოძიებით დადგენილია, რომ ბრალდებულმა, რომელსაც სამსახურებრივად ევალებოდა ხულოს მუნიციპალიტეტის მიერ შესყიდული საქონლის ჩაბარება და სათანადო დოკუმენტაციის გაფორმება, სახელმწიფო ტენდერში მონაწილე კომპანიის წარმომადგენლისგან ნაკლებობით ჩაიბარა საქონელი, ხოლო მიღება-ჩაბარების აქტი გააფორმა სრულ მოცულობაზე და უზრუნველყო მიმწოდებელი კომპანიისთვის სრული სატენდერო ღირებულების გადარიცხვა.
აღნიშნული ქმედების სანაცვლოდ, ბრალდებულმა მიმწოდებელი კომპანიის წარმომადგენლისგან მოითხოვა და მიიღო ფულადი თანხა, რა დროსაც მოხდა მისი დაკავება.
სასამართლოს განჩინების საფუძველზე, განხორციელდა ფარული საგამოძიებო მოქმედებები, რის შედეგადაც მოპოვებულია აღნიშნული დანაშაულებრივი ქმედების ჩადენის ამსახველი აუდიო/ვიდეომტკიცებულება“- წერს საგამოძიებო სამსახური.
მათივე ინფორმაციით, გამოძიება საქართველოს სისხლის სამართლის კოდექსის 338-ე მუხლის პირველი ნაწილით მიმდინარეობს, რაც სასჯელის სახით 6-დან 9 წლამდე ვადით თავისუფლების აღკვეთას ითვალისწინებს.
სააგენტო “ფრანს პრესი” საქართველოში გერმანიის ელჩის, პეტერ ფიშერის დაბრუნებას ეხმიანება და წერს, რომ გერმანიის საგარეო სამინისტროს ცნობით, ფიშერის გაწვევა საქართველოსთვის გაფრთხილება იყო ელჩისა და დასავლეთის წინააღმდეგ გახშირებულ თავდასხმებთან დაკავშირებით.
სააგენტოს ცნობით, გერმანიის საგარეო საქმეთა სამინისტროს პრესსპიკერმა 7 ნოემბერს განაცხადა, რომ გერმანიის მკაფიო მოლოდინია საქართველოს მთავრობამ “თავი შეიკავოს ელჩზე თავდასხმებისგან” და კიდევ ერთხელ გაუსვა ხაზი, რომ ელჩის ბერლინში კონსულტაციებისთვის გაწვევა რამდენიმე კვირის წინ წამოადგენდა “ძალიან ნათელ დიპლომატიურ სიგნალს” საქართველოს მმართველი ძალისთვის.
“ფრანს პრესის” ინფორმაციით, ბერლინსა და თბილისს შორის საუბრები უკვე შედგა, გერმანიის საგარეოს პრესსპიკერმა კი განაცხადა, რომ ახლა უკვე “ქართველ ლიდერებს მათი ქმედებების მიხედვით” შეაფასებენ და დამატებით დასკვნას ამაზე დაყრდნობით გამოიტანენ.
ელჩი პეტერ ფიშერი გერმანიამ კონსულტაციებისთვის 19 ოქტომბერს გაიწვია. ბერლინში გამართული კონსულტაციების შემდეგ გერმანიის ელჩის საქართველოში დაბრუნების შესახებ ინფორმაცია გერმანიის საგარეო საქმეთა სამინისტრომ 6 ნოემბერს გაავრცელა.
სააგენტო “ფრანს-პრესი” საქართველოში არსებულ მდგომარეობაზე წერს:
“საქართველო უკვე დაახლოებით ერთი წელია ღრმა პოლიტიკურ კრიზისშია. გასული წლის ოქტომბერში გამართული საკამათო საპარლამენტო არჩევნების შემდეგ, სადაც პრო-რუსულმა მმართველმა პარტიამ „ქართული ოცნებამ“ თავი გამარჯვებულად გამოაცხადა, ათასობით ოპოზიციური აქტივისტი თვეების განმავლობაში გამოდიოდა პროტესტზე. თუმცა, ბოლო პერიოდში პროტესტის მოძრაობამ თვალსაჩინოება დაკარგა, ხოლო მრავალი ოპოზიციონერი და ჟურნალისტი დააკავეს.
ოპოზიცია და მომიტინგეები ხელისუფლებას ადანაშაულებენ იმაში, რომ იგი სულ უფრო ავტორიტარული ხდება და თანდათან უახლოვდება რუსეთს. მთავრობა ამ ბრალდებებს უარყოფს”.
დღეს 8 ნოემბერს, ფინანსთა სამინისტროს საგამოძიებო სამსახურის ინფორმაციით, დიდი ოდენობით უკანონო შემოსავლის ლეგალიზაციის ფაქტზე „კრისტალ ჯგუფის“ ხელმძღვანელი პირი დააკავეს.
„გამოძიებით დგინდება, რომ „კრისტალ ჯგუფის“ კომერაციული დასახლების ქვეშ გაერთიანებული, შპს „ბაკურიანი ბიზნეს-ჯგუფის“და შპს „ჰოტელს მენეჯმენტ ჯგუფის“ დამფუძნებელმა პირმა, ბორჯომში, დაბა ბაკურიანში, დიდველის ტერიტორიაზე შესაბამისი ნებართვის გარეშე, თვითნებურად ააშენა 5 სასტუმრო აპარტამენტი, მოაწყო კერძო საბაგირო, კერძო სათხილამურო ტრასა და ტობოგანი, რომლის გამოყენების უფლება ჰქონდათ მხოლოდ „კრისტალ ჯგუფის“ მომხმარებლებს.
უნებართვოდ აშენებული სასტუმრო აპარატმენტების რეალიზაციის შედეგად უკანონოდ მიღებულმა შემოსავალმა, რამდენიმე ათეული მილიონი ლარი შეადგინა.
ამ ეტაპისთვის დადგენილია 1 მილიონ 894 925 ლარის ოდენობით, უკანონო შემოსავლის ლეგალიზაციის ფაქტი. გამოძიება გრძელდება მათთან შესაძლო კავშირში მყოფი პირების, მათ შორის დანაშაულში ხელშემწყობი საჯარო მოხელეების დადგენის და მხილების მიზნით“-აცხადებს ფინანსთა სამინისტროს საგამოძიებო სამსახური.
დეველოპერული კომპანია „კრისტალ ჯგუფის“ ხელმძღვანელი ვლადიმერ სტეფანიანი, „ქართული ოცნების“ შემწირველთა სიაშიც გვხვდება.
მან 2021 წელს, „ქართულ ოცნებას“ 50 000 ლარი შესწირა, 2018 წლის არჩევნებზე კი 60 000 ლარი.
შსს-ს ინფორმაციით თბილისში დააკავეს ერთი პირი, რომელსაც ბრალად ედება ოჯახის წევრის მიმართ მუქარა, იძულება და ნარკოტიკული საშუალებისა და ცეცხლსასროლი იარაღის მართლსაწინააღმდეგო შეძენა-შენახვა.
დანაშაული 6 წლამდე ვადით თავისუფლების აღკვეთას ითვალისწინებს.
„ბრალდებულმა მეგობარ ქალს მიაყენა სიტყვიერი შეურაცხყოფა, მასზე ფიზიკურად იძალადა და სიცოცხლის მოსპობით დაემუქრა.
სამართალდამცველებმა ჩატარებული საგამოძიებო მოქმედებების შედეგად ზ.დ. ბრალდებულის სახით დააკავეს.
პოლიციამ დაკავებულის პირადი, საცხოვრებელი სახლისა და ავტოფარეხის ჩხრეკის შედეგად, ნივთმტკიცებად ამოიღო ნარკოტიკული საშუალება „ალფა-პვპ”, ცეცხლსასროლი იარაღი, ხელყუმბარა, მჭიდი და 5 ვაზნა“.
მათივე ინფორმაციით, გამოძიება სისხლის სამართლის კოდექსის 11-პრიმა 150-ე მუხლით, 11-პრიმა 151-ე მუხლით, 260-ე და 236-ე მუხლებით მიმდინარეობს.
2026 წლის იანვრიდან 17 ადამიანით გაიზრდება იმ საჯარო მოხელეების რაოდენობა, რომლებიც ხელფასს აჭარის ბიუჯეტიდან აიღებენ. ხელფასებისთვის საჭირო თანხა კი, ჯამში 8 მილიონით იზრდება.
აჭარის 2026 წლის რესპუბლიკური ბიუჯეტის პროექტის მიხედვით მომავალ წელს დასაქმებულთა რაოდენობა 3 408-ს ნაცვლად იქნება 3 425. შრომის ანაზღაურებისთვის, ანუ ხელფასებისთვის კი, მთლიანობაში 82 435 700 ლარი დაიხარჯება [2025 წელს ხელფასებისთვის 74 427 000 ლარია გაწერილი].
აჭარის 2026 წლის ბიუჯეტის პროექტის მიხედვით:
აჭარის უმაღლეს საბჭოში ხელფასებისთვის დაიხარჯება 6 296 600 ლარი
აჭარის უმაღლესი საარჩევნო კომისია – 1 412 800 ლარი
აჭარის მთავრობა – 3 432 500 ლარი
აჭარაში ხუთი სამინისტროა, რომელთაგან ხელფასებისთვის ყველაზე მეტი თანხა კულტურის სამინისტროსთვისაა გამოყოფილი – 28,6 მილიონი ლარი – ესაა ჯამში სამინისტროსა და მასზე დაქვემდებარებულ ორგანიზაციებში დასაქმებულთა ხელფასებისთვის გამოყოფილი თანხა.
აჭარის სამინისტროები და ხელფასებისთვის განსაზღვრული თანხა:
აჭარის კულტურის სამინისტრო – 28 663 900 ლარი
აჭარის ფინანსთა და ეკონომიკის სამინისტრო – 12 982 800 ლარი
აჭარის განათლებისა და სპორტის სამინისტრო 12 854 100 ლარი
აჭარის სოფლის მეურნეობის სამინისტრო – 11 019 200 ლარი
აჭარის ჯანმრთელობისა და სოციალური დაცვის სამინისტრო – 5 773 900 ლარი
ხელფასები იზრდება იმ საჯარო მოხელეებისთვისაც, რომლებიც ხელფასს ქვეყნის ბიუჯეტიდან იღებენ. საქართველოს 2026 წლის სახელმწიფო ბიუჯეტის პროექტის მიხედვით, მომუშავეთა რაოდენობა მომავალი წლისთვის მცირდება 241 ადამიანით, ხელფასებისთვის განკუთვნილი თანხა კი 280,6 მილიონი ლარით იზრდება.
საქართველოს 2026 წლის სახელმწიფო ბიუჯეტის პროექტის მიხედვით, მომავალ წელს მომუშავეთა რიცხოვნობა იქნება 116 ათას 763 ადამიანი, ხოლო მათი ხელფასებისთვის ჯამში გამოიყოფა 3 მილიარდ 315 მილიონ 651 ათას 500 ლარი.
საქართველოს 2025 წლის ბიუჯეტის მიხედვით, მომუშავეთა რაოდენობა არის 117 ათას 4 ადამიანი, მათი ხელფასებისთვის კი გაწერილია 3 მილიარდ 34 მილიონ 999 ათას 800 ლარი.
2026 წლის იანვრიდან „ოცნების“ ხელისუფლების წარმომადგენლები გაზრდილ ხელფასს მიიღებენ.
მაგალითად, „ოცნების“ პრეზიდენტის და პრემიერ-მინისტრის ხელფასი [თანამდებობრივი სარგო] 2026 წლიდან 16 000 ლარი იქნება [წელს არის 14 600 ლარი]. ხოლო მინისტრის ხელფასი 2026 წლიდან იქნება 13 600 ლარი [ნაცვლად 12 410 ლარისა].
13 600 ლარამდე გაიზრდება აჭარის არალეგიტიმური უმაღლესი საბჭოს თავმჯდომარის, დავით გაბაიძისა და აჭარის არალეგიტიმური მთავრობის თავმჯდომარის, სულხან თამაზაშვილის ხელფასებიც.
საქართველოს 2026 წლის სახელმწიფო ბიუჯეტის შესახებ კანონპროექტის მიხედვით, საბაზო თანამდებობრივი სარგო 1 600 ლარი იქნება. 2025 წელს აღნიშნული სარგო 1 460 ლარით იყო განსაზღვრული.
საბაზო თანამდებობრივი სარგოს ოდენობა კი პირდაპირ კავშირშია თანამდებობის პირების ხელფასებთან, რადგან, „საჯარო დაწესებულებაში შრომის ანაზღაურების შესახებ“ საქართველოს კანონით, „პოლიტიკური თანამდებობის პირის თანამდებობრივი სარგო დგინდება ამავე კანონით დადგენილი შესაბამისი კოეფიციენტის საბაზო თანამდებობრივ სარგოზე ნამრავლით“.
ბათუმის მერია ქალაქის საკრებულოს კაბინეტებისა და სამუშაო ოთახებისთვის ახალი დიზაინის ავეჯის შესყიდვას გეგმავს, თუმცა მანამდე დიზაინერს ეძებს, ვინც შექმნის საოფისე ავეჯის დიზაინს, ჩაატარებს აზომვით სამუშაოებს და დახაზავს ესკიზებს.
საკრებულოსთვის საოფისე ინვენტარისა და ავეჯის შესასყიდად ქალაქის ბიუჯეტიდან 61 ათას 200 ლარი გამოიყოფა. უშუალოდ დიზაინერისთვის მერიას ცალკე 3 000 ლარი აქვს გათვალისწინებული.
„ავეჯის დიზაინის სფეროში“ მომსახურების შეძენა ბათუმის მერიას ტენდერით აქვს გადაწყვეტილი, თუმცა ორჯერ გამოცხადებული ტენდერი არ შედგა – მასში მონაწილეობა არავინ მიიღო.
პირველ ტენდერში წინადადებების მიღება 2025 წლის 8 აგვისტოს დასრულდა, მეორე ტენდერში კი – 4 ნოემბერს.
უცნობია მერია ტენდერს მესამედაც გამოაცხადებს თუ მომსახურებას ტენდერის გარეშე შეისყიდის.
ვიდრე მერია საკრებულოს ავეჯის განახლებისთვის დიზაინერს ეძებს, ბათუმის ახალმა საკრებულომ მუშაობა უკვე დაიწყო. პირველი სხდომა 30 ოქტომბერს ჩაატარეს და საკრებულოს ახალ თავმჯდომარედ ივანე მაისურაძე აირჩიეს.
ბათუმის საკრებულოში 25 წევრია [ადრე იყო 35]. აქედან 15 წევრი პროპორციული წესითაა არჩეული, ხოლო – 10 მაჟორიტარულით.
საკრებულოს „სამუშაო ოთახებისა და კაბინეტებისთვის განკუთვნილი საოფისე ავეჯის სავარაუდო რაოდენობები და ჩამონათვალი“ ნახეთ ამ ბმულზე:
