Batumelebi

საქართველოს დაავადებათა კონტროლისა და საზოგადოებრივი ჯანდაცვის ეროვნული ცენტრის დირექტორის, ამირან გამყრელიძის განცხადებით, საქართველოში ეპიდსიტუაცია სულ უფრო უარესდება.

დღეს, 6 აპრილს, საქართველოში კოვიდის 897 ახალი შემთხვევა დადასტურდა, რაც ყველაზე დიდი მაჩვენებელია ბოლო თვეების განმავლობაში.

„ეპიდსიტუაცია საკმაოდ დაძაბულია ქვეყანაში, სულ უფრო და უფრო უარესდება. მივდივართ იქითკენ, რომ მესამე ტალღა იყოს ქვეყანაში.

არ გვინდა ეს იყოს, ამიტომ ყველამ უნდა დავიცვათ რეკომენდაციები, რომ როგორმე თავი ავარიდოთ მესამე ტალღას.

მცირე ეპიდაფეთქებები, კლასტერები რაც გვაქვს, დაახლოებით ათამდე ქვეყანაში, ამის წყარო ისევ და ისევ გახლავთ დიდი თავშეყრები, ქორწილები და ქელეხები.

თუ ეპიდსიტუაცია გაუარესდა კიდევ უფრო მეტად, მაშინ საკოორდინაციო საბჭო იმსჯელებს სხვადასხვა გამკაცრებებზე,“ – განაცხადა ამირან გამყრელიძემ ტელეკომპანია „იმედთან“.

5 აპრილის მდგომარეობით, საქართველოში კორონავირუსის დადებითობის დღიური მაჩვენებელი არის 3.65 %, ბოლო 14 დღის მანძილზე – 1.94%, ხოლო 7 დღის მანძილზე – 2.32 %.

6 აპრილის მონაცემებით, ბოლო 24 საათში აჭარაში კორონავირუსის 83 ახალი შემთხვევა დადასტურდა.

აჭარის ჯანდაცვის სამინისტროს ცნობით, ამჟამად აჭარის კოვიდკლინიკებში 227 პაციენტი მკურნალობს და მათგან ერთის მდგომარეობა კრიტიკულია.

აჭარაში თვითიზოლაციაში იმყოფება 1 291 პირი. 97 ადამიანი იმყოფება რეგიონის კოვიდსასტუმროში. 

Stopcov.ge-ს ცნობით, ბოლო 24 საათში საქართველოში კოვიდის 897 ახალი შემთხვევა დადასტურდა. ჩატარდა 24 592 კვლევა ტესტით.

5 აპრილის მდგომარეობით, დადებითობის დღიური მაჩვენებელი არის 3.65 %, ბოლო 14 დღის მანძილზე – 1.94%, ხოლო 7 დღის მანძილზე – 2.32 %.

ბოლო 24 საათში ქვეყანაში კორონავირუსით გარდაიცვალა 10 პაციენტი. პანდემიის გავრცელებიდან დღემდე ვირუსით საქართველოში ჯამში 3 832 პირი დაიღუპა.

დღეს ქვეყანაში გამოვლენილი ინფიცირების 897 ახალი შემთხვევიდან: თბილისში გამოვლენილია 463 შემთხვევა, აჭარაში – 83, იმერეთში – 88, ქვემო ქართლში – 41, შიდა ქართლში – 32, გურიაში – 31, სამეგრელო – ზემო სვანეთში – 96, კახეთში – 19, მცხეთა-მთიანეთში – 24, სამცხე-ჯავახეთში – 1, რაჭა-ლეჩხუმსა და ქვემო სვანეთში – 19.

ამ ეტაპზე ინფიცირების მიმდინარე აქტიური შემთხვევა არის 5 880, საიდანაც: 1 892 ადამიანი მკურნალობს საავადმყოფოში. ხელოვნური სუნთქვის აპარატზე იმყოფება 62 პირი.

3 719  პირი ვირუსის მკურნალობის კურსს გადის საცხოვრებელ ბინაზე.

ამ ეტაპისთვის თვითიზოლაციაში იმყოფება 9 857 ადამიანი, მათ შორის თბილისში – 4 213 პირი, აჭარაში – 1 291, იმერეთში – 1 018.

დღევანდელი მონაცემებით, საქართველოში კორონავირუსის 284 061 შემთხვევაა დადასტურებული, გამოჯანმრთელდა  275 024. ვირუსის გავრცელებიდან დღემდე 3 822 ინფიცირებული გარდაიცვალა.

ამ სტატისტიკის ფონზე კორონავირუსის საწინააღმდეგო აცრის პროცესი ნელი ტემპით მიმდინარეობს საქართველოს ქალაქებსა და მუნიციპალიტეტებში, იმუნიზაციის ცენტრებში.

მიუხედავად იმისა, რომ აცრამდე იმუნიზაციის ცენტრში მისულ მოქალაქეს ანამნეზს სრულად ეკითხებიან, მაინც თითქმის შეუძლებელი ზუსტი გამოთვლა, თუ ვის რა ტიპის გვერდითი მოვლენა შეიძლება განუვითარდეს. თუმცა აცრის დროსვე ყველას აფრთხილებენ, რომ ტემპერატურის დროებით მატება და სახსრების ტკივილი აცრის შემდეგ მოსალოდნელია, მაგრამ გაივლის. ისეც ხდება, რომ ყველას ეს ნიშნებიც არ აქვს.

• ნური სალაძე, პენსიონერი

72 წლის ვარ, 30 მარტს ავიცერი ფაიზერით ბათუმის რესპუბლიკურში. გვერდითი მოვლენები არ მქონია. გრიპის აცრას ყოველ წელს ვიკეთებ და ამ აცრისაც არ შემშინებია. ტესტირება 4-ჯერ გავიკეთე და პასუხი ოთხჯერვე უარყოფითი იყო. მაგრამ მაინც გული საგულეს რომ მქონოდა, აცრა დროულად გავიკეთე.

ოთხმა ძმამ ავიცერით ერთად და ახლა მეორე დოზას ველოდებით 20 აპრილს.

სიცხე, თავის ტკივილი და ასეთები არ ყოფილა აცრის მერე, სახსრები კი მტკივა, მაგრამ ასაკში ვარ და არცაა გასაკვირი.

სანამ ავიცრებოდი, რამდენიმე კითხვა დამისვეს, ჩემს ექიმთან მქონდა შეთანხმება, მითხრა პარკინსონის მედიკამენტი, რასაც სვამ, ეგ აცრაში ხელს არ შეგიშლისო. ჯერ კიდევ ბევრს არ აქვს გაკეთებული ვაქცინა და მიკვირს. ხომ თქვა პაატა იმნაძემ, ვაქცინა ეპიდემიის დასასრულის დასაწყისიაო? აცრამ გადაარჩინა ხალხი „ისპანკისგან“, გრიპებისგან, ათასი რამისგან, უნდა გამოვიყენოთ ეს შესაძლებლობა.

ქოლერის ეპიდემია მახსოვს. სტუდენტი ვიყავი, თბილისიდან ბათუმში მოვდიოდით და ვაგონებში ვიყავით შეყუჟული. გარეთ ვერ გამოვდიოდით. მაშინაც იყო შიშის გრძნობა, კუპედან გამოსვლაც კი არ შეიძლებოდა ბათუმში ჩასვლამდე.

60, 70-იანი წლები იყო ეს. ქოლერის საშინლად ეშინოდა ხალხს, მაგრამ გადაიარა.

• გურამ მაჩიტაძე, კარდიოლოგი. 32 წლის

ერთ საღამოს, აცრის დღეს, მქონდა სიცხე მხოლოდ, პარაცეტამოლი დავლიე და დილით უკვე მშვენივრად ვიყავი. სხვა არანაირი გართულება არ მქონია. შიში ხალხში ალბათ ინფორმაციის ნაკლებობის ბრალია. რისკი ყველა ვაქცინას ახლავს თან, მაგრამ კოვიდი გაცილებით სარისკოა, ამ ვირუსს ბევრად მეტი რისკები აქვს, ვიდრე მის ვაქცინას. ოპტიმისტურად ვიყავი განწყობილი და ყველაფერმა კარგად ჩაიარა. 17 მარტს ავიცერი. სიცხე – თანმდევი გრიპოზული მოვლენებით და სახსრების ოდნავი ტკივილი – ერთ საღამოში ალაგდა ეს ყველაფერი.

ყველას ვურჩევდი ვაქცინაციას, სხვა გზა არ არსებობს პანდემიის დასასრულებლად.

• ნუგზარ როყვა, პენსიონერი

ცოტა გვერდითი მოვლენები მაქვს, სიცხე მაქვს ყოველდღე 37 და 3, 5 ხაზი, სახსრების ტკივილიც მაქვს და მოდუნებული ვარ. წნევა წესრიგშია. 37 და 7 ხაზი იყო ყველაზე მაღალი ტემპერატურა. აცრის მეორე დღესვე დამეწყო სიცხე. უფრო დღის მეორე ნახევარში იწევს ტემპერატურა მაღლა. ამის შესახებ გამაფრთხილეს კიდეც. 3 დღე შეიძლება იყოს სიცხე, კიდურების, სახსრების ტკივილი და შემდეგ თავისთავად გავაო.

ჯერჯერობით არაფერი ისეთი გვერდითი მოვლენა არ მქონია, რის შესახებაც გაფრთხილებული არ ვიყავი. 67 წლის ვარ, ფაიზერით ავიცერი ბათუმში. მეორე დოზა 23 აპრილს მიწევს.

რომ გითხრათ არ მეშინოდა-მეთქი, ტყუილი იქნება, მაგრამ ანალიზები გავიკეთე და მომზადებული მივედი. თანმდევი დაავადებები არ მაქვს, სისხლის საერთო ანალიზი გავიკეთე, არაფერი ცუდი არ გამოჩენილა, ჰემოგლობინისა და პროთრომბინის ანალიზებიც მქონდა თან, ასე მივედი.

აცრამდე ბევრი კითხვა დამისვეს: წამლების შესახებ, ვსვამდი თუ არა რაიმეს, სისხლის გამათხელებლებს ხომ არ ვიღებდი, კუჭის წყლული ხომ არ მქონდა, გული ხომ არ მაწუხებდა ან დიაბეტი და ა.შ. ანალიზსაც ჩახედეს რაც მივიტანე.

ბევრმა მითხრა არ უნდა აგეცრა, გედროვებინა ჯერ სხვებისთვისო.

დეა ქაჯაია, მედცენტრის დირექტორი

მე ასტრაზენეკა გავიკეთე მარტის ბოლოს. ჩემი შვილიც აიცრა – 23 წლისაა. საერთოდ არ ჰქონია მას არანაირი გვერდითი მოვლენა. მე მქონდა სიცხე მეორე დღეს, ამისთვის მზად ვიყავი – რეაქცია სიცხის სახით 10, 12 საათის შემდეგ მოსალოდნელია, ვიცოდი ეს.

მედცენტრი, სადაც მე ვმუშაობ, ვაქცინაციის პროცესში ჩაერთო. ჩვენთან არც ერთი ალერგიული გართულება არ ყოფილა ჯერჯერობით. ვინც ავცერით, არავის მოუმართავს მწვავე გვერდითი მოვლენებით, ყოველ დილას ვკითხულობთ ემერჯენსში, ვინმეს ხომ არ მოუმართავს ჩივილებით აცრის შემდეგ და ასეთი ჯერ არავინ ყოფილა.

ყველა ვაქცინას შესაძლოა ჰქონდეს ალერგიული ტიპის გართულება. ეს ცნობილია და შესაძლებელია ამ ვაქცინასაც ჰქონდეს უიშვიათეს შემთხვევაში გართულებები. ეს შიში ადამიანებში ალბათ განპირობებულია იმით, რომ დაავადებაც ახალია და ვაქცინებიც.

უნდა ავწონოთ სარგებელი: რას მოიტანს აცრა და რას მოიტანს აუცრელობა. ჩვენი, ყველას მოვალეობაა ვაქცინაციაში ჩართვა. ცხადია, ზოგი ვერ გაიკეთებს, ვისაც ანამნეზი აქვს აცრისთვის შეუთავსებელი, მაგრამ მასობრივად 70, 80 % მოსახლეობის უნდა აიცრას, მხოლოდ ამ შემთხვევაში შევძლებთ ვირუსის დამარცხებას.

___

საქართველოში ამჯერად ორი ვაქცინით, „ასტრაზენეკათი“ და „ფაიზერით“ მიმდინარეობს ვაქცინაცია. პირველ ეტაპზე მედპერსონალი და 55 წელს გადაცილებული მოქალაქეები იცრებიან. ვაქცინაციის მსურველებს ხშირად უჩნდებათ კითხვა, თუ რა სახის გვერდითი მოვლენები შეიძლება გამოვლინდეს კორონავირუსის საწინააღმდეგო ვაქცინაციის შემდეგ.

საქართველოს ჯანდაცვის მინისტრის, ეკატერინე ტიკარაძის განცხადებით, საქართველოს მოსახლეობას წელსაც მოკრძალებულად მოუწევს აღდგომის აღნიშვნა ეპიდვითარებიდან გამომდინარე.

„ჩვენ წელსაც მოგვიწევს, მოკრძალებულად აღვნიშნოთ აღდგომის დღესასწაული, თუმცა ვიმედოვნებ, ჩაკეტვის გზას ამ ეტაპზე არ მივმართავთ და ვიმედოვნებ, შევძლებთ ვმართოთ ინფექცია ისე, რომ არ დაგვჭირდეს გლობალური ჩაკეტვები,“ – განაცხადა ტიკარაძემ „რუსთავი 2“-ის ეთერში.

მან ასევე აღნიშნა, რომ ჩაკეტვა არ არის მთავრობის მიზანი:

„ჩვენ ინტენსიურად მივმართავთ რეგიონებში ლოკალურ დონეზე ინფექციის მართვას და გვაქვს დიდი იმედი, რომ ეს იქნება შედეგიანი, რაც თავიდან აგვაცილებს გლობალურ ჩაკეტვას, ვინაიდან ეს არ არის სახელმწიფოს მიზანი,“ – განაცხადა მან.

მართლმადიდებლური ეკლესია წელს აღდგომის დღესასწაულს 2 მაისს აღნიშნავს. ბოლო კვირებში კი კორონავირუსის ახალი შემთხვევების ზრდა შეინიშნება, რაც აჩენს კითხვებს, რომ ხომ არ იგეგმება აღდგომის წინ კორონავირუსის გამო დაწესებული შეზღუდვების გამკაცრება.

ბოლო 24 საათის განმავლობაში საქართველოში კორონავირუსით 11 ადამიანი გარდაიცვალა. ამავე პერიოდში გამოვლინდა ვირუსის 228 დადასტურებული ახალი შემთხვევა.

ბოლო 24 საათში ჩატარდა 9211 კვლევა ტესტით, მათ შორის ანტიგენის სწრაფი ტესტით – 5090, PCR ტესტით – 4121.

stopcov.ge-ის მონაცემებით, კორონავირუსის დადასტურებული შემთხვევების რაოდენობა, 5 აპრილის დილის მონაცემებით, ქვეყანაში სულ არის 284 061, მათ შორის გამოჯანმრთელებული – 275024 , ბოლო 24 საათში – 425. პანდემიის გავრცელებიდან დღემდე საქართველოში კორონავირუსით სულ 3 822 ადამიანი გარდაიცვალა.

დადებითობის მაჩვენებელი: დღიური – 2,48%, ბოლო 14 დღის – 1,85%, ბოლო 7 დღის – 2,1%

დღეს ქვეყანაში გამოვლენილი ინფიცირების 228 ახალი შემთხვევიდან: თბილისში გამოვლენილია 111 შემთხვევა, აჭარაში – 16, იმერეთში – 19, ქვემო ქართლში – 5, შიდა ქართლში – 17, გურიაში – 20, სამეგრელოში – ზემო სვანეთში – 20, კახეთში – 5, მცხეთა-მთიანეთში – 6, სამცხე-ჯავახეთში – 4, რაჭა-ლეჩხუმსა და ქვემო სვანეთში – 5.

კარანტინშია – 219, სტაციონარში მეთვალყურეობის ქვეშ – 1876, კლინიკურ სასტუმროში იმყოფება – 218 პირი.

5 აპრილის დილის მდგომარეობით, ინფიცირების მიმდინარე აქტიური შემთხვევა არის 5 189, საიდანაც: 1 876 ადამიანი მკურნალობს საავადმყოფოში, მათ შორის, თბილისის საავადმყოფოებში – 879, აჭარაში – 293, იმერეთში – 303.

ამ ეტაპზე მძიმე პაციენტია 364 პირი, მათ შორის, თბილისში – 165, აჭარაში – 45, იმერეთში -77.

ხელოვნური სუნთქვის აპარატზე იმყოფება 69 პირი, მათგან თბილისში – 47, აჭარაში – 3, იმერეთში – 6.

სიმართლეს არ შეესაბამება ბოლო დღეებში გავრცელებული ინფორმაცია იმის შესახებ, რომ ვაქცინაციის შედეგად მძიმე გართულებები გამოუვლინდა ზაალ მიქელაძეს, აჭარის ჯანდაცვის ყოფილ მინისტრს, ამჟამად საქართველოს პარლამენტის წევრს.

„ბათუმელები“ დღეს ესაუბრა ზაალ მიქელაძეს. მან გვითხრა, რომ გაუგებარია, რას უკავშირდება აღნიშნული ინფორმაციის გავრცელება.

„ჩემი ოჯახის წევრებმა ბოლო 24 საათში ალბათ 200 ზარს უპასუხეს, მე ალბათ 500 ზარზე მომიწია პასუხი ამ ორ დღეში და SMS-ები და მიმოწერები რომ გაჩვენოთ, არ ვიცი…

ზოგი ამბობს, რომ სტამბულში ვარ აპარატზე მიერთებული, ზოგი – გერმანიაში და ა.შ.

ვაქცინა გავიკეთე ასი ცნობადი სახის აცრის კამპანიის ფარგლებში. აცრის შემდეგ დღეებში უმრავლესობის სხდომაზეც ვიყავი, პარლამენტშიც – კომიტეტის სხდომაზე, დავბრუნდი გუშინ წინ ქობულეთში და დამხვდა ასეთი ამბავი.

არ ვიცი, ვინ არის ამის ინიციატორი. მესმის, რომ ყველა არ უყურებს პარლამენტის სხდომებს და რადგან ვერ დამინახეს, ქობულეთში არ ვიყავი, ალბათ ამას მოაყოლეს ეს თემა.

დღეს ვფიქრობდი, როგორ მოვიქცე-მეთქი. ვფიქრობდი, რომ ქალაქში ლაივი ხომ არ ჩამერთო“, – გვითხრა ზაალ მიქელაძემ.

ყოფილი ჯანდაცვის მინისტრი „ასტრაზენეკას“ ვაქცინით 26 მარტს აიცრა ბათუმში. მისივე თქმით, აცრის შემდეგ ჰქონდა მსუბუქი, აცრისთვის დამახასიათებელი ნიშნები:

„სტანდარტული გვერდითი მოვლენები მქონდა, რაც ზოგადად ახლავს ვაქცინაციას, ოდნავ შემცივნება და მცირედ გამოხატული ოფლიანობა. მხოლოდ ეს იყო, 48 საათის შემდეგ არაფერი არ მქონია. ამას რეაქციაც არ ჰქვია, ეს არის ორგანიზმის სტანდარტული პასუხი აცრაზე. ვიღაცას აქვს ტემპერატურა და ესეც ნორმალურია, თუ არა აქვს – ესეც. ეს ყველაფერი არის თანმდევი აცრისთვის.

ახლა ველოდები ორი თვის გასვლას, რომ მეორე დოზაც გავიკეთო“.

ზაალ მიქელაძეს, როგორც ჯანდაცვის ყოფილ მინისტრს და პროფესიით პედიატრს, ვკითხეთ რეგიონში ექიმების ვაქცინაციის პროცესში პასიურობის შესახებაც. მან გვითხრა, რომ მასაც აქვს კითხვები კოლეგებთან:

„ექიმების ამ ჯგუფმა იმუშავა კოვიდის მართვაზე და მიჩნდება კითხვა – მათ თვალწინ დამძიმდნენ ადამიანები და დაიღუპნენ და არა მხოლოდ ხანდაზმული ადამიანები, როგორც ეს ზოგიერთს ჰგონია.

ქობულეთის საკრებულოს წევრი, ჯანმრთელი ადამიანი დავკარგეთ კოვიდის გამო.

კოლეგები, რამდენიმე ექიმი დავკარგეთ… როცა ასეთი მაგალითები თვალწინ გვქონდა, მიკვირს, როგორ შეიძლება ასეთ დროს სამედიცინო საზოგადოებას გაუჩნდეს კითხვა აიცრას თუ არა. 

„ასტრაზენეკა“ ევროპული ვაქცინაა, თუ ვინმეს ამის შეხსენება უნდა. დიდ ბრიტანეთს თუ ვინმე რამეს ერჩის, არ ვიცი… თან იმ ქვეყნის და ევროპული ქვეყნების დიდი ნაწილი სწორედ ამ ვაქცინით აიცრა.

რაც შეეხება ახალციხელი ექთნის გარდაცვალებას, ჯერ კიდევ არ ვიცით, იყო თუ არა ეს ანაფილაქსია, თვითონ მწარმოებელიცაა ამ პროცესში ჩართული და უფრო ღრმა გამოკვლევებს ჩაატარებენ, რომ პასუხი იყოს აბსოლუტურად ზუსტი.

იმუნიზაცია არის ერთადერთი გამოსავალი და რატომ გაუჩნდათ კითხვები ჩემს კოლეგებს, უბრალოდ არ ვიცი“.

ზაალ მიქელაძემ „ბათუმელებთან“ ასევე აღნიშნა, რომ კორონავირუსის ახალი ტალღის საშიშროება რეალურია და ამის მთავარი განმაპირობებელი არის ადამიანების ქცევა:

„რამდენიმე დღის წინ ვიყავი ბათუმში და სიმართლე გითხრათ, გაკვირვებული დავრჩი, თბილისთან შედარებით ბათუმში გაცილებით დაბალია პირბადის ტარების მაჩვენებელი. ძალიან ბევრი ადამიანი დავინახე ბათუმში პირბადის გარეშე და თუ ეს მაჩვენებელი დაიწევს, რა თქმა უნდა, ვერანაირად ვერ გავაჩერებთ სიტუაციას. ეს არ არის დაავადების მართვა, ესაა ეპიდემიის მართვა და თუ იმუნიზაციით ვერ ვეწევით, ხელში გვრჩება სოციალური დისტანცია და პირბადე“, – ამბობს ზაალ მიქელაძე.

4 აპრილის მონაცემებით, ბოლო 24 საათში საქართველოში კორონავირუსით ინფიცირების 464 ახალი შემთხვევა დადასტურდა. ჩატარდა 15 649 კვლევა ტესტით.

3 აპრილის მდგომარეობით, დადებითობის დღიური მაჩვენებელი არის 2.97 %, ბოლო 14 დღის მანძილზე – 1.85 %, ხოლო 7 დღის მანძილზე – 2.01 %

ბოლო 24 საათში საქართველოში 7 ადამიანი გარდაიცვალა კორონავირუსით.

დღეს ქვეყანაში გამოვლენილი ინფიცირების 464 ახალი შემთხვევიდან: თბილისში გამოვლენილია 243 შემთხვევა, აჭარაში – 57, იმერეთში – 28, ქვემო ქართლში – 16, შიდა ქართლში – 23, გურიაში – 28, სამეგრელო – ზემო სვანეთში – 49, კახეთში – 7, მცხეთა-მთიანეთში – 10, სამცხე-ჯავახეთში – 0, რაჭა-ლეჩხუმსა და ქვემო სვანეთში – 3.

დღეის მონაცემებით, საქართველოში 342 მძიმე კოვიდ პაციენტია, ხელოვნური სუნთქვის აპარატზე იმყოფება 73 ადამიანი.

სულ საქართველოს კოვიდკლინიკებში 1822 პაციენტი მკურნალობის კორონავირუსზე.