ბათუმის საკრებულოს ჯანდაცვის კომისიის თავმჯდომარე დიმიტრი ჭეიშვილი „ოცნებას“ ტოვებს და გახარიას გუნდში გადადის. ამის შესახებ მან ფეისბუქის საკუთარ გვერდზე დაწერა.
საკრებულოს წევრი გადაწყვეტილების მიზეზად „დაუსრულებელ კოჰაბიტაციას“ ასახელებს და წერს, რომ არ დაივიწყებს ბიძინა ივანიშვილს და „ქართული ოცნების“ როლსაც.
„რასაკვირველია, არ დამავიწყდება თავად ბიძინა ივანიშვილის და “ქართული ოცნების” როლი, რისთვისაც ვარ მადლიერი და არაერთხელ აღმინიშნავს, თუმცა უკანასკნელი პერიოდის დაუსრულებელი კოჰაბიტაცია და მეტიც, ყოფილი პრემიერის წინააღმდეგ ბრძოლაში არჩევანის გაკეთება “ქართული ოცნების” აქტივსა და “ნაციონალური მოძრაობის” აქტივს შორის ამ უკანასკნელის სასარგებლოდ არის მიუღებელი.“
საკრებულოს წევრი გადაწყვეტილების მიზეზად ასახელებს ასევე საკრებულოს აპარატის თანამშრომლის, გია აბულაძის სამსახურიდან დათხოვნას. თავად გია აბულაძის თქმით, ის ყოფილ პრემიერზე გიორგი გახარიაზე პოზიტიური სტატუსის გამოქვეყნების გამო გაათავისუფლეს.
დიმიტრი ჭეიშვილი თავის სტატუსში ხულოს საკრებულოში განვითარებულ მოვლენებსაც გამოეხმაურა.
უმაღლესი საბჭოს დეპუტატმა და „ქართული ოცნების“ ერთ-ერთმა რეგიონულმა ლიდერი, გიორგი მანველიძე არ გამორიცხავს, რომ დიმიტრი ჭეიშვილი თანამდებობიდან გადააყენონ.
