Batumelebi | აჭარის უცხოეთში რეკლამირებაზე 1.5 მილიონი დაიხარჯება – რომელი ქვეყნებიდან ველით ტურისტებს აჭარის უცხოეთში რეკლამირებაზე 1.5 მილიონი დაიხარჯება – რომელი ქვეყნებიდან ველით ტურისტებს – Batumelebi
RU | GE  

აჭარის უცხოეთში რეკლამირებაზე 1.5 მილიონი დაიხარჯება – რომელი ქვეყნებიდან ველით ტურისტებს

ტურიზმის დეპარტამენტი წელს აჭარის უცხოეთში რეკლამირებაზე მილიონ-ნახევარ ლარს დახარჯავს. როგორ აპირებს ტურისტების დარწმუნებას, რომ მათ კოვიდუსაფრთხო გარემო დახვდებათ აჭარაში, მაშინ, როცა ვაქცინაციის პროცესი ტურიზმის სექტორში ჯერაც ნელა მიდის? სეზონთან დაკავშირებულ გეგმებზე „ბათუმელები“ აჭარის ტურიზმის დეპარტამენტის ხელმძღვანელს, თინათინ ზოიძეს ესაუბრა.

  • ქალბატონო თინათინ, რაში დაიხარჯება წელს სარეკლამო თანხები და როგორ აპირებთ ტურისტების მოზიდვას რეგიონში?

რადგან ყველა კვირაში იცვლება სიტუაცია მსოფლიოში, ჩვენც, რა თქმა უნდა, ბიუჯეტის ეფექტური ხარჯვის პრინციპიდან გამომდინარე, ძირითადად აქცენტს მოკლევადიან და წერტილოვან ტურისტული პროდუქტების პოზიციონირებაზე გავაკეთებთ – კიდევ ერთხელ შევახსენებთ ჩვენს სამიზნე ბაზრებს, საიდანაც ფრენები გვექნება, ჩვენს ტურისტულს პროდუქტებს. მთავარი მესიჯი უნდა იყოს უსაფრთხოება პანდემიის დროს.

წელს პირველი მარკეტინგული ხერხი სწორედ ესაა, რასაც მთელი მსოფლიო იყენებს. უსაფრთხო ქვეყნის იმიჯი ტურიზმის პირდაპირ პროპორციულია.

ყველაზე დიდი რეკლამა წელს არის დაბალი კოვიდსტატისტიკა. თუ გვექნება დაბალი კოვიდსტატისტიკა, ეს ნიშნავს, რომ ტურისტი ჩამოვა. შესაბამისად, ყველაზე დიდი ბიუჯეტი პანდემიის მართვაზე მიდის და ეს არის სწორი.

  • რომელია წელს სამიზნე ქვეყნები?

მეზობელ ქვეყნებში წელს არ ვაპირებთ სარეკლამო თანხების დახარჯვას. რადგან გრძელვადიან რეკლამას წელს ვერ ვაკეთებთ, ამიტომ ფრენები საიდანაც იქნება, იმ ქვეყნებზე გავაკეთებთ აქცენტს. უფრო მეტად ბალტიისპირეთის ქვეყნებზე, ასევე უნგრეთზე, ისრაელზე და პოლონეთზე, რომელიც  უდიდესი ბაზარია ჩვენთვის.

ასევე, ახალი სამიზნე მიმართულებებიდან საინფორმაციო გაცნობითი ტურების ორგანიზებას ვაპირებთ, რომელიც ახლა დაიგეგმება. ძირითადად ევროპული მიმართულება გვექნება – გერმანია, დიდი ბრიტანეთი, პოლონეთი და ისრაელი.

  • თქვენ ამბობთ, რომ დაბალი კოვიდსტატისტიკა და უსაფრთხოება იქნება მთავარი მესიჯი, თუმცა არც ისე დაბალი სტატისტიკა გვაქვს, მაღალია ლეტალობის მაჩვენებელიც და ვაქცინაციაც დაბალი ტემპით ტარდება ქვეყანაში. როგორ აპირებთ ეს გადაფუთოთ?

არის რამდენიმე მნიშვნელოვანი პუნქტი, რომლითაც განისაზღვრება ქვეყნის უსაფრთხო სტატუსი. მათ შორის ინფიცირებულთა რაოდენობა, ვაქცინაციის მაჩვენებელი და ეპიდემიის მართვის გეგმა. ჩვენს შემთხვევაში ვაქცინაციის დონე არ არის ისეთი მაღალი, როგორც სხვა ქვეყნებში, თუმცა დაწყებულია აქტიურად და იმედი გვაქვს ესეც მოიტანს შედეგს – დაეხმარება კერძო სექტორს და სახელმწიფოსაც, ვირუსი რომ არ გავრცელდეს.

რეგულაციის გეგმას და მონიტორინგს რაც შეეხება, გვაქვს ძალიან სწორად გაკეთებული პროტოკოლები და თუ შევადარებთ მაგალითად სხვა ქვეყნებს, დაწყებული ტურისტის საზღვარზე ჩამოსვლიდან, სამაგალითოდ არის გაკეთებული. ყველა ეს ინფორმაცია სწორად უნდა იყოს მიტანილი ტურისტამდე და კერძო სექტორთანაც.

შესაბამისად, ამ მიმართულებით ჯანდაცვის შრომის ინსპექციის სამსახურთან აქტიურად ვმუშაობთ, ისინიც აკეთებენ ელექტრონულ ტრენინგებს და ვეხმარებით საოჯახო სასტუმროებს, კვების ობიექტებს, რომ ყველა კითხვა დასვან რეგულაციებთან დაკავშირებით და მიიღონ სწორი ინფორმაცია.

  • ითქვა, რომ „სინოვაკის“ ვაქცინის 10 ათასი დოზიდან გარკვეული წილი ტურიზმის სექტორსაც შეხვდება. აჭარას რამდენი ერგება აქედან, თუ მიიღეთ ვაქცინები და რამდენი ადამიანია ამ დროისთვის დარეგისტრირებული ან ვაქცინირებული ამ სფეროში?

არის ობიექტები, რომლებიც უშუალოდ დარეგისტრირდნენ შესაბამის პლატფორმაზე, არის ობიექტები, რომლებიც დარეგისტრირდნენ ცალკე, ეკონომიკის სამინისტროს ვებგვერდზე და ისეთებიც არიან, რომლებიც ცალკე ადგენენ სიებს. ამას ჯანდაცვის სამინისტროსთან ერთად გავდივართ.

ზუსტ ციფრს ვერ გეტყვით რამდენია ვაქცინირებული, რეგისტრირებული 3 ათასზე მეტი იქნება, ვინც ელოდება ვაქცინაციას.

ჩვენ ამ საკითხებში დამოკიდებული ვართ ჯანდაცვის სამინისტროს უწყებებთან, რომლებიც უშუალოდ კურირებენ აღნიშნულ საკითხს. აჭარის ჯანდაცვაც კოორდინაციაშია ცენტრალურ სამინისტროსთან და მსგავსი საკითხებს განიხილავენ.

  • როცა ამბობს სახელმწიფო, რომ მე დავახვედრებ ტურისტს ვაქცინირებულ გიდს, მიმტანს, სასტუმრო პერსონალს და ამ დროს, ამ სექტორის ნახევარიც არ არის ვაქცინირებული, რამდენად კეთილსინდისიერი იქნება უსაფრთხო ქვეყნის ნიშნით რეკლამირება?

სასურველია, რომ ვაქცინაციის პროცესი უფრო აქტიურად მიმდინარეობდეს, თუმცა ჩვენ არ ვამბობთ, რომ ვაქცინაცია მაღალია, ჩვენ ვამბობთ, რომ ეპიდემია მართულია.

სიმართლე არის ის, რომ გვაქვს რეაგირების გეგმა ნებისმიერი შემთხვევის დროს. არსებობენ უწყებები, რომლებიც მყისიერად მოახდენენ რეაგირებას, სასტუმროებმა იციან, როგორ უნდა მოიქცნენ თუ დადასტურდება მათთან კოვიდის შემთხვევები და ასე შემდეგ.

  • წერტილოვანი რეკლამები ახსენეთ, დაწყებულია ეს პროცესი?

ფაქტობრივად, ორი კვირის წინ მოიხსნა რეგულაციები ევროპაში და დაიწყო რესტარტის ღონისძიებები. აქამდე ფიზიკურად ვერ განვათავსებდით რაიმე ტიპის რეკლამას, რადგან  არაპროგნოზირებადი იქნებოდა ჩვენი მხრიდან. მუდმივად ვართ იმ ქვეყნების პროტოკელებთან კოორდინაციაში, სადაც ვაპირებთ რეკლამის განთავსებას, ყველა პროექტი მომზადებულია და უახლოეს დღეებში ჩაეშვება.

გარდა ამისა, ქვეყანაში უკვე იმყოფება 15-მდე ბლოგერი, რომლებიც მალე დაბრუნდებიან თავიანთ ქვეყნებში და დაახლოებით ორ კვირაში ეს სარეკლამო პროდუქტიც გამოჩნდება.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com