ბათუმის, ქობულეთის, ხელვაჩაურის, შუახევის, ხულოსა და ქედის მუნიციპალიტეტებში სარეაბილიტაციო ობიექტებისთვის დეტალური საპროექტო დოკუმენტაციის მომზადებასა და სამშენებლო სამუშაოებზე მუნიციპალური განვითარების ფონდმა ტენდერი გამოაცხადა. ხელშეკრულების სავარაუდო ღირებულება 20 მილიონი ლარი იქნება. სამუშაოები კი, ხელშეკრულების გაფორმებიდან 2022 წლის 31 დეკემბრის პერიოდში უნდა დასრულდეს.
ფონდმა ელექტრონული ტენდერი „განახლებული რეგიონების“ პროგრამის ფარგლებში, აუქციონის გარეშე, პრეისკურანტით გამოაცხადა. ეს ნიშნავს, რომ განსაზღვრულია თითოეული ობიექტის რეაბილიტაციისთვის საჭირო კონკრეტული სამუშაოების ზღვრული ღირებულებები. ანუ ტენდერში მონაწილემ ამა თუ იმ სამუშაოს ღირებულება ფონდს, პრეისკურანტის გათვალისწინებით უნდა შესთავაზოს.
მაგალითად, თუ კერძო სახლში საჭიროა თაბაშირმუყაოს ორმაგი ტიხრის მოწყობა, ფონდი 1 კვ/მეტრში მაქსიმუმ 51,94 ლარს გადაიხდის.
ტენდერში მოცემულია კერძო სახლის; ადმინისტრაციული შენობის ან კორპუსის; საგზაო სამუშაოების; სკვერის, პარკისა და ღობის პრეისკურანტები.
მუნიციპალური განვითარების ფონდის სატენდერო კომისიაში „ბათუმელებს“ უთხრეს, რომ ტენდერის მიხედვით, თითოეულ ქალაქსა თუ მუნიციპალიტეტში სარეაბილიტაციო ობიექტებს შეარჩევს თავად კომპანია, მოამზადებს მათზე საპროექტო დოკუმენტაციას [ხარჯთაღრიცხვას] და ამ პროექტებით თავადვე ჩაატარებს სარეაბილიტაციო სამუშაოებს.
ტენდერის პირობის მიხედვით, მიმწოდებლის მიერ შეთავაზებული ესკიზების მინიმუმ 2 ვარიანტიდან ერთ-ერთს შეითანხმებს და დაამტკიცებს სახელმწიფო პროგრამის – „განახლებული რეგიონები“ ფარგლებში შექმნილი კომისია. აღნიშნული ესკიზების დამტკიცების შემდეგ კი, მიმწოდებელმა უნდა წარადგინოს დეტალური საპროექტო დოკუმენტაცია, ხარჯთაღრიცხვა და სამუშაოების შესრულების სრული გეგმა-გრაფიკი.
მთავრობამ პროგრამა – „განახლებული რეგიონები“ 2021 წლის 26 აპრილს დაამტკიცა. რა თანხით უნდა დაფინანსდეს პროგრამა, ვრცლად ნახეთ ამ ბმულზე:
რაც შეეხება ტენდერებს სამუშაოების შესყიდვაზე, მუნიციპალურმა განვითარების ფონდმა ამ დრომდე 8 ტენდერი უკვე გამოაცხადა სხვადასხვა ადგილზე. თითოეული ადგილის შემთხვევაში ხელშეკრულების სავარაუდო ჯამური ღირებულება მაქსიმუმ 20 მილიონი ლარი იქნება. ანუ, 34 ქალაქსა და მუნიციპალიტეტში განახლებული რეგიონების პროგრამით ჯამში 160 მილიონი ლარი დაიხარჯება.
ერთი ტენდერის ფარგლებში სამუშაოები რამდენიმე მუნიციპალიტეტში [ლოკაციაზე] ჩატარდება. როგორც ფონდში გვითხრეს, მაგალითად, ხულოს ლოკაცია გულისხმობს თავად დაბის, ასევე მთლიანად მუნიციპალიტეტის ტერიტორიას. ასეა ყველა მუნიციპალიტეტის შემთხვევაში.
3 მაისის მდგომარეობით ტენდერები გამოცხადებულია:
- ბათუმის, ქობულეთის, ხელვაჩაურის, შუახევის, ხულოს, ქედის ლოკაციებზე
- ლენტეხის, ონის, ცაგერის, ამბროლაურის, ტყიბულის ლოკაციებზე
- ხობის, სენაკის, აბაშის, ზუგდიდის ლოკაციებზე
- სამტრედიის, წყალტუბოს, ხონის ლოკაციებზე
- მესტიის, წალენჯიხის, ჩხოროწყუს, მარტვილის, ფოთის ლოკაციებზე
- თერჯოლის, ქუთაისის, ვანის ლოკაციებზე
- ლანჩხუთის, ოზურგეთის, ჩოხატაურის ლოკაციებზე
- საჩხერეს, ჭიათურას, ხარაგაულის, ზესტაფონის, ბაღდათის ლოკაციებზე
მაგალითად, აჭარის შემთხვევაში, ტენდერში წინადადებების მიღება 2021 წლის 7 მაისს დაიწყება და 10 მაისს დასრულდება.
—
ხომ არ არის ეს პროგრამა თვითმმართველობის არჩევნების წინ ამომრჩეველზე შესაძლო ზემოქმედება; რამდენად შეესაბამება ცენტრალური ხელისუფლების მიერ მსგავსი პროექტის განხორციელება თვითმმართველობის პრინციპებს და ხომ არ არის ეს ცენტრის ჩარევა თვითმმართველი ერთეულების საქმიანობაში? – ამ საკითხებზე ვრცლად წაიკითხეთ „ნეტგაზეთის“ სტატიაში:
https://netgazeti.ge/news/538160/
