შპს „ბათუმი რივიერას“ სამშენებლო პროექტთან დაკავშირებული სარჩელი ბათუმის საქალაქო სასამართლოს მოსამართლეს, ჯუმბერ ბეჟანიძეს წელიწად-ნახევრის განმავლობაში თაროზე ჰქონდა შემოდებული.
ამ სარჩელით მოსარჩელე – ორგანიზაცია „ბათომი“, საქართველოს იურისტთა ასოციაციასთან [საია] ერთად, ბათუმის საკრებულოს მიერ განაშენიანების რეგულირების გეგმის [გრგ] ბათილად ცნობას ითხოვს.
მოსამართლეს მომჩივანმა ორჯერ ოფიციალურად, წერილობით შეახსენა სარჩელის შესახებ და მოუწოდა დროულად ჩაენიშნა სხდომა, თუმცა უშედეგოდ.
მოსამართლე ჯუმბერ ბეჟანიძემ სხდომა მანამ არ ჩანიშნა, ვიდრე მომჩივანმა ამის შესახებ ბათუმის საქალაქო სასამართლოს თავმჯდომარეს არ მისწერა.
დავით მამისეიშვილისთვის მიწერილ წერილში საიას იურისტი წერდა, რომ მოსამართლემ გააჭიანურა საქმის განხილვის დაწყება და მას, როგორც ხელმძღვანელს სთხოვდა თავისი წილი პასუხისმგებლობა აეღო და დაეჩქარებინა პროცესი.
მომჩივანი ბათუმის საქალაქო სასამართლოს ასევე სწერდა, რომ თუ უახლოეს მომავალში საქმის განხილვა არ დაიწყებოდა, საია მიმართავდა იუსტიციის უმაღლეს საბჭოსთან არსებულ დამოუკიდებელ ინსპექტორს მოსამართლის წინააღმდეგ.
„ინსპექტორი განიხილავს დისციპლინურ გადაცდომებს, გადაცდომის ერთ-ერთი სახეა პროცესის გაჭიანურება, რომელიც საპატიო გარემოებებით არ არის დასაბუთებული. როცა ერთ წელზე მეტია სარჩელი შეტანილია და მოსამართლეს ერთი პროცესიც არ ჩაუნიშნია, ეს საპატიო გარემოებებით ვერ აიხსნება“, – განმარტავს იურისტი გიორგი ანთაძე.
დავით მამისეიშვილისთვის წერილის მიწერიდან სამ კვირაში, საიამ იგივე მოთხოვნით ისევ მოსამართლე ჯუმბერ ბეჟანიძეს მიმართა. ამის შემდეგ მოსამართლემ პირველი სხდომა ჩანიშნა და ის 7 ივლისს გაიმართება.
რას ედავებიან „ბათომი“ და საია საკრებულოს
2019 წლის 20 აგვისტოს ბათუმის საკრებულომ ქალაქის ისტორიულ ნაწილში – იაკობ გოგებაშვილის ქუჩასა და სანაპიროს შორის მდებარე ტერიტორიაზე, განაშენიანების რეგულირების გეგმა დაამტკიცა. გეგმის მიხედვით, ქალაქის ისტორიულ ნაწილში შესაძლებელი ხდება მრავალსართულიანი კორპუსების მშენებლობა.
საკრებულომ ისე დაამტკიცა შპს „ბათუმი რივიერას“ მიერ წარდგენილი გრგ, რომ პროექტის გარემოზე ზემოქმექმედების შეფასების დოკუმენტი [გზშ], ასევე სტრატეგიული გარემოს შეფასების დოკუმენტი [სგშ] არ მოუთხოვია. ამას კანონმდებლობა ითვალისწინებს.
„როდესაც ბათუმის მერმა მიმართა გარემოს დაცვის სამინისტროს კითხვით, უნდა წარმოედგინა თუ არა კომპანიას გზშ და ასევე სტრატეგიული გარემოს დაცვის შეფასების დოკუმენტი [სგშ], სამინისტრომ უპასუხა, რომ თუ გრგ-ს საკრებულო ინდივიდუალური აქტით ამტკიცებს, მაშინ არ სჭირდება, რადგან კანონი მხოლოდ ნორმატიული აქტით დამტკიცების შემთხვევაში აწესებს სტრატეგიული გარემოს დაცვის შეფასების ვალდებულებას. ბათუმის საკრებულომ არ მოსთხოვა ეს დოკუმენტები კომპანიას, თუმცა გრგ ნორმატიული აქტით დაამტკიცა“, – აცხადებს გიორგი ანთაძე.
ბათუმის საკრებულო გრგ-ს ინდივიდუალური აქტით ვერ დაამტკიცებდა, რადგან ამას კანონი არ ითვალისწინებს. საკრებულოში ეს კარგად იცოდნენ, ამიტომაც შპს „ბათუმი რივიერას“ გრგ ნორმატიული აქტით დაამტკიცეს, მაგრამ გარემოზე ზემოქმედების დოკუმენტები არ მოუთხოვიათ. რატომ? – ამ კითხვაზე პასუხის გაცემა სასამართლოში მოუწევთ.
შპს „ბათუმი რივიერას“ პროექტის ნებართვა სამ ეტაპად გაიცა, ბათუმის საკრებულომ სამშენებლო ნაკვეთის განაშენიანების რეგულირების გეგმა დაამტკიცა. გეგმის დამტკიცების შემდეგ, 2019 წლის 24 დეკემბერს, სსიპ ტექნიკური და სამშენებლო ზედამხედველობის სააგენტომ გასცა ბრძანება, რომლის მიხედვითაც შეთანხმდა ქალაქ ბათუმში, იაკობ გოგებაშვილის ქუჩის და ზღვის სანაპიროს შორის მდებარე ტერიტორიაზე მრავალფუნქციური მაღალსართულიანი შენობის „სილქ თაუერისა“ და ლაგუნას არქიტექტურული პროექტი და კონსტრუქციული სქემა, რაზეც გაიცა მშენებლობის ნებართვა.
