ბათუმის საკრებულოს წევრი ირაკლი მიქელაძე საკრებულოს ტოვებს. საკრებულოს წევრის სტატუსის შეწყვეტასთან დაკავშირებით, მან ბათუმის საკრებულოს თავმჯდომარეს წერილობით უკვე მიმართა.
თუ რატომ ტოვებს საკრებულოს, ამის შესახებ ირაკლი მიქელაძემ პოსტი საკუთარ ფეისბუქის გვერდზე გამოაქვეყნა. საკრებულოს დატოვების მიზეზად ის ოჯახურ მდგომარეობას ასახელებს.
„მივიღე გადაწყვეტილება, დავტოვო ქ. ბათუმის საკრებულო. სამწუხაროდ, მინიმუმ 1 წელი კვლავ ვერ შევძლებ ჩემზე დაკისრებული მოვალეობის ჯეროვან განხორციელებას, ოჯახური მდგომარეობიდან გამომდინარე.
ჯერ ჩემს ქალიშვილს სჭირდება მამა და მამის დახმარება – სხვანაირად ვერ მოვიქცეოდი. ვფიქრობ, ადვილი იქნება ჩემი გაგება. ბევრი ყოყმანისა და წინააღმდეგობის (გუნდის წევრების/მეგობრების) მიუხედავად, ვფიქრობ, რომ სწორი გადაწყვეტილება მივიღე – ზოგადი ინტერესებიდან გამომდინარე.
ზოგადი ინტერესი კი ერთია – ყველა რგოლის ეფექტური მუშაობა, ქვეყნის სწრაფი და ეფექტური განვითარებისათვის. შევეცდები, ეს დრო მაქსიმალურად გამოვიყენო პირადი განვითარებისათვის, განათლებისათვის, გამოცდილებისათვის და რაც შეიძლება სწრაფად დავბრუნდე ჩემს ქალაქში,“ – წერს ირაკლი მიქელაძე ფეისბუქზე.
ირაკლი მიქელაძე ბათუმის საკრებულოს თავმჯდომარის მოადგილედ 2016 წლის 29 დეკემბერს აირჩიეს. ამ თანამდებობაზე არჩევის შემდეგ, 2017 წელს იგი საკრებულოს სხდომებს არ ესწრებოდა, თუმცა მის სახელზე პრემია და ხელფასი მაინც იწერებოდა.
