Batumelebi

გოგოს თუ ბიჭს? ვის „ეკუთვნის“ მშობლების ქონება მემკვიდრეობით? – ეს იყო ძირითადი კითხვა, რაც ერთი ოჯახის სამი თაობის წარმომადგენელს – ბებია სედიკოს, შვილ იამზეს და შვილიშვილ ირმას ჰკითხა „ბათუმელებმა“. როგორია მათი დამოკიდებულება ქონების განაწილებისადმი, ვის რჩება ქონების დიდი ნაწილი, ვისზე როგორ უნდა ნაწილდებოდეს ქონება, როგორ ნაწილდება რეალურად და როგორ მოიქცნენ ან მოიქცევიან თავად.

სედიკო გელაძემ 4 შვილი გაზარდა. ის ხულოს სოფელ დანისპარაულში ცხოვრობს. მას ბიჭი არ ჰყავს, მაგრამ ფიქრობს, რომ ქონების მესაკუთრე ბიჭი უნდა იყოს.

„საერთოდ, გოგონებს ოჯახები ქონებას არ უნაწილებენ. ჩვენ მზითვს ვეძახით, როცა გაათხოვებდნენ ოჯახიდან გოგოს, კარადებს და მსგავს რაღაცებს ატანდნენ. ოჯახის რაღაც [ქონება] მისცენ, გაუნაწილონ გოგონებს, ასეთი ადათ-წესები არ არის ჩვენში. ოჯახის ქონებიდან რაიმეს საჩუქრად თუ მოგვცემენ, თორემ რასაც ჰქვია წილი ქონებიდან, გოგო შვილს არ შეუძლია ძმასთან გაინაწილოს.

რაც შეეძლო ოჯახს [მზითვში] გაატანდა გოგო შვილს, ხოლო ბიჭ შვილებზე ქონებას [თანაბრად] გაარიგებდნენ“, – გვეუბნება სედიკო.

სედიკო თავადაა მრავალშვილიანი ოჯახიდან. 2 ძმა და 2 და ჰყავდა. ერთი ძმა ადრე დაეღუპა და მშობლებს ბიჭ შვილებს შორის ქონების განაწილება აღარ დასჭირდათ. თუმცა დარწმუნებულია, ეს ტრაგედია რომ არ მომხდარიყო მათ ოჯახში, მისი მშობლები ორივე ძმას თანაბრად გაუყოფდნენ ქონებას.

„მაგალითად, ორი საწოლი თუ ექნებოდათ, ერთს ერთ ძმას მისცემდნენ, ერთს – მეორეს. თუ, მაგალითად, წყვილად არ ექნებოდათ რაიმე ოჯახში, სხვა ნივთს შეუწყვილებდნენ. ასე არიგებენ აქ [ქონებას]“, – გვიყვება სედიკო.

სედიკოს შეუძლია დაუშვას, რომ ქონება თანაბრად უნდა განაწილდეს გოგოსა და ბიჭ შვილებს შორის, რადგან მათ შორის განსხვავება არ არის, მაგრამ „რადგან გოგო ქორწინდება, ქმრის ოჯახში ხვდება [ქონება]. არ ვიცი, რად უნდა გოგოს მშობლის ქონება, არც წაიღებენ და არც მიზანშეწონილია. რა [ქონება] უნდა გაუყოს ან/და მშობელმა ყველა შვილს, სოფელში ისეთი რა აქვს გასაყოფი?“

სედიკოს თქმით, გოგო მზითვსაც თავად „გამომიმუშავებს“: „მზითვის შეძენა როგორ ხდება იცით? გოგო შვილს მშობელი გადაუხდის ქორწილს, შემოუვა ფული და იმ ფულით უყიდის, თორემ თვითონ თუ რაღაცას აჩუქებს [გოგოს], ეს უკვე მშობლის ამბავია“, – გვეუბნება სედიკო.

სედიკოს სმენია, რომ ადრე ოჯახები გოგოსა და ბიჭ შვილებზე თანაბრად ანაწილებდნენ მიწის ნაკვეთებს, მაგრამ მსგავსი შემთხვევა თავად მას არ ახსენდება და მის ირგვლივ – სამეზობლოში, სანათესავოში, სამეგობროში თუ ა.შ. ყოველთვის გოგონებს ამზითვებდნენ, სხვა ქონება კი ბიჭებზე ნაწილდებოდა.

სედიკოს ვკითხეთ, თავად როგორ გაანაწილა ქონება  შვილებზე. მას ოთხი შვილი ჰყავდა – 3 გოგო და 1 ბიჭი. ბიჭი უბედური შემთხვევის დროს დაიღუპა. სედიკოს თქმით, ასე რომ არ მომხდარიყო, წილს ქონებიდან ქალიშვილებს მხოლოდ მაშინ მისცემდნენ მშობლები, თუ ამას ბიჭი შვილი თავად მოინდომებდა.

ქალი გვიყვება, რომ მის სახლში უმცროსი შვილი დარჩა ქმართან ერთად. შესაბამისად, ოჯახის მთელი ქონებაც ამ ქალიშვილს ეკუთვნის. უფროსი ქალიშვილები კი დედამ გამზითვა.

„ქორწილები გადავუხადე და შემოსული ფულით რისი ყიდვაც შევძელით, ყველაფერი მზითვში გავატანეთ. ოჯახიდან ავიღო, მაგალითად, გამოყენებული საწოლი და მივცე, ასე მიზანშეწონილად არ მიმაჩნია… არ გამინაწილებია მათზე მიწები, სადაც გათხოვდნენ, იქ აქვთ მიწა. მე სხვა სოფელში ვცხოვრობ, ისინი – სხვა სოფელში, მიწას როგორ გავუნაწილებ? პატარა გოგო რადგან ოჯახში დარჩა და მისი ქმარი მოვიდა ჩვენს ოჯახში, ყველაფერი მისია.

მგონია, რომ სხვა შვილებს მამის სახლიდან არაფერი სჭირდებათ. შესაძლოა, გოგო ღარიბ ოჯახში გათხოვდეს და ამიტომ მისცე ქონების ნაწილი. ჩემ შემთხვევაში ეგ არ ყოფილა საჭირო“, – გვითხრა სედიკომ ბოლოს.

2 ქალიშვილისა და 1 ბიჭის დედაა სედიკოს უფროსი შვილი, 44 წლის იამზე გელაძე. იამზე ბათუმში ცხოვრობს ოჯახთან ერთად და გვიყვება, როგორ იყოფოდა მშობლების ქონება მის თაობაში.

„ჩვენთან ტრადიციულად, ბიჭებს თანაბრად ვუყოფთ [ქონებას] და გოგოს მზითვს ვატანთ. გამართლებული ის იქნებოდა, რომ ყველა შვილს თანაბრად გაუნაწილო ქონება… მეც ტრადიციების მომხრე ვარ. თუ საშუალება გექნება, რატომაც არა, გოგოსაც გაუკეთე იგივე, რასაც ბიჭს გაუკეთებ. მაგრამ, როცა ერთი სახლი გაქვს, იმის განაწილებას როგორ შეძლებ გოგოსა და ბიჭ შვილზე? ანუ, სადაც შენი საძირკველია, შენ სადაც ცხოვრობ, რა თქმა უნდა, ბიჭთან ერთად იცხოვრებ და ჩვეულებრივად რჩება [ყველაფერი] ბიჭს. ამას ვერ გაანაწილებ, თორემ განაწილების მხრივ მეც ვფიქრობ, რომ გოგოსაც ეკუთვნის [ქონების] რაღაც წილი“, – გვეუბნება იამზე.

რაც შეეხება თავისი მშობლების ქონების გაყოფას, იამზეს თქმით, ყველაფერი უმცროსი დისაა, რომელმაც ოჯახში დარჩენით „ბიჭის როლი შეითვისა“. ფიქრობს, რომ თუ მშობლების ქონებას უფროსი დები გაინაწილებდნენ, უმცროსს არაფერი დარჩებოდა. „ჩვენი პატარა და უფრო დაჩაგრული დარჩებოდა. ჯერ ისედაც დაჩაგრულის როლშია, რომ დედაჩემს უნდა მოუაროს. რაღაც ისეთი ხომ უნდა შეხვედროდა მასაც, რაც თავს ცოტა კომფორტულად აგრძნობინებდა“, – ამბობს იამზე.

იამზეს ვკითხეთ, როგორ აპირებს ქონების განაწილებას თავის შვილებზე. ქალის თქმით, ფიქრობს, თუ შეძლებს, ქალიშვილებსაც  შეუძინოს ბინები, მაგრამ რა ქონებაც აქვს ამ ეტაპზე – სახლი და სხვა ყველაფერი, ბიჭის იქნება.

„როგორც მშობელი, სამივე შვილს ერთნაირ ცხოვრებას ავუწყობდი. შვილებს ვერ განვასხვავებ. თუ კი ჩემი შვილი მოხვდება ისეთ ოჯახში [დაქორწინდება], რომ უჭირს და სჭირდება ბინა, რა თქმა უნდა, ბოლო გროშსაც გავყოფ და ისეთ ცხოვრებას შევუქმნი, როგორც ბიჭს, არ განვასხვავებ.

სადაც ცხოვრობ, ის [სახლი] ავტომატურად ბიჭის სახელზე რჩება. როცა ერთი სახლი გაქვს და 1 ოჯახზეა [საცხოვრებლად] გათვლილი, იმას ვეღარ გაყოფ. თუ უყურებ, რომ გოგოს ცხოვრება ბევრად სჯობია ბიჭის ცხოვრებას, შესაძლოა მხოლოდ მზითვით შემოიფარგლო, მაგრამ ბიჭ შვილს წაართვა და გოგოს მისცე უფრო მეტი?“ – შეკითხვით ამთავრებს საუბარს ჩვენთან იამზე გელაძე.

იამზეს სტუდენტ შვილს, ირმა კოჩალიძესაც ვკითხეთ, რას ფიქრობს ქონების განაწილების უკვე ნახსენებ ფორმაზე და როგორი მოლოდინი აქვს, როგორ გაანაწილებენ ქონებას მასზე და მის და-ძმაზე.

ირმა მიიჩნევს, რომ ქონების განაწილების ყველაზე გამართლებული ფორმა ქონების თანაბრად გაყოფაა შვილების სქესის განურჩევლად, თუმცა მიუხედავად ამისა, გვეუბნება: „ქონების დიდი ნაწილი ბიჭს [ჩემს ძმას] დარჩება, რადგან მე დავქორწინდები. თუ არ დავქორწინდები, ვფიქრობ, ჩემი მშობლები თანაბრად გადაანაწილებენ ქონებას. თუ ქონება თანაბრად არ გადანაწილდება, რატომაც არა, ჩემს მშობლებს ქონების თანაბრად გადანაწილებას მოვთხოვ. [ქონების განაწილების] შესახებ არც ერთხელ არ მისაუბრია მშობლებთან“, – გვითხრა ირმამ.

ირმას თქმით, შვილებზე როგორ გადანაწილდეს მშობლების ქონება არ უნდა განისაზღვროს იმის მიხედვით, თუ რომელ შვილთან ერთად იცხოვრებენ თავად მშობლები.

„უმეტეს შემთხვევაში ოჯახში ქონების განაწილების ტენდენცია დიდად არ იცვლება. ახლაც იმ შემთხვევაში დარჩება გოგოს ქონება, თუ ბიჭი არ იქნება გვარში“, – გვეუბნება ირმა. ირმას თქმით, მზითვის არსებობა იმას ნიშნავს, რომ გოგო შვილს მშობლები მთლად ხელცარიელს არ ტოვებენ.

„მეტწილად ქონებას მშობლები ამ ფორმით სწორედ რომ კულტურის გამო ანაწილებენ. ჩვენთან ხომ არის ტრადიცია, რომ ქონება უნდა გადაეცეს ბიჭს. ყველაფერი ამის გამო ხდება“, – გვითხრა ირმამ.

იმ შემთხვევაში, თუ შვილების ყოლას გადაწყვეტს ირმა, ამბობს, რომ ქონებას შვილებს მაქსიმალურად თანაბრად გაუნაწილებს და მისთვის შვილების სქესი მნიშვნელოვანი არ იქნება.

„ბომბია, ფაქტობრივად, რომელიც ოდესღაც შეიძლება აფეთქდეს, მერე ვინ იქნება პასუხისმგებელი?“ – კითხულობს „სოკარ ჯორჯია გაზის“ კონტრაქტორი ფირმის საპროექტო და სამშენებლოს ყოფილი უფროსი ლაშა წულუკიძე გაზის მილებზე, რომლებიც ბათუმში, ერთ-ერთ ახალ კორპუსში, აეროპორტის ქუჩა #73-ში, პირდაპირ ფასადიდან შეუყვანიათ.

„სოკარის“ ყოფილი თანამშრომელი ამბობს, რომ გაზის შეყვანა ფასადიდან ახლა დაიწყეს, მას შემდეგ, როცა სემეკმა დაადასტურა, რომ ბათუმში, კორპუსების სადარბაზოებში გაზი დარღვევებით და „საფრთხის შემცველად“ გაჰყავდათ.

„აღნიშნული სიტუაცია რისკის ქვეშ აყენებს მომხმარებელთა უსაფრთხოებას და უგულებელყოფს ბუნებრივი გაზით მომარაგების ერთ-ერთ ძირითად პრინციპს – მომხმარებელთა უსაფრთხო მომარაგებას,“ – ეს სემეკის 2022 წლის 18 აგვისტოს გადაწყვეტილებაში წერია, სადაც ბათუმში 12 ახალი საცხოვრებელი კორპუსის გაზგაყვანილობაა აღწერილი. სემეკმა დარღვევების გამო კომპანია „სოკარ ჯორჯია გაზი“ გააფრთხილა, ასევე მისცა კონკრეტული დრო დარღვევის აღმოსაფხვრელად.

11 მისამართზე, რაც სემეკმა შემთხვევითობის პრინციპით შეარჩია და შეისწავლა ლაშა წულუკიძის მიმართვის შემდეგ, გაზი კორპუსების სადარბაზოებშია გაყვანილი. თუმცა სემეკს ჯერ არ შეუსწავლია ფასადიდან კორპუსში გაზის შეყვანის უსაფრთხოების საკითხი. ლაშა წულუკიძე აპირებს ამ შემთხვევაშიც მიმართოს სემეკს.

„კორპუსების სადარბაზოებში, სადაც ეს დარღვევები დაფიქსირდა, ხარვეზები აღარ არის გამოსწორებადი, ეს ფიზიკურად შეუძლებელია,“ – მიიჩნევს ლაშა წულუკიძე, რომელიც 2007 წლიდან მუშაობს გაზიფიცირების სფეროში, ხელმძღვანელობდა ფოთის გაზიფიცირების ჯგუფსაც, ხოლო 2019 წლიდან კომპანია „გაზის სახლის“ უფროსია, მას „სოკარი“ ადგილობრივ ხელმძღვანელობასთან დაპირისპირების გამო დაუტოვებია.

ლაშა წულუკიძის კომპანიაც გაზიფიცირების პროექტირებასა და მშენებლობაზე მუშაობს. ის საუბრის დასაწყისშივე ამბობს, რომ საუბრობს კონკურენტზე  – „გაზსერვისზე“, რომელიც „სოკარის“ კონტრაქტორია და ხაზს უსვამს იმას, რომ მისი აქცენტი უსაფრთხოებაა, რასაც ამ შემთხვევაში სახელმწიფო უწყება – სემეკიც ადასტურებს.

„სოკარის“ ყოფილი თანამშრომელი უსაფრთხოების იმ რისკებზე გვესაუბრა, რასაც ქმნის გაზის მილების გაყვანა კორპუსის ფასადიდან.

„ეს მილები არ უნდა იყოს ერთმანეთში ახლართული, რიგის მიხედვით უნდა იყოს ჩაწყობილი,“ – ლაშა წულუკიძე კონკრეტულ რისკებს ასახელებს. – „რამე რომ დაზიანდეს, როგორ უნდა გაიგო, რომელი მილია? მეორეა ჩამკეტები, რაც ასეთ შემთხვევაში პირველ სართულზეა. თუ სადარბაზოებში გაყვანის შემთხვევაში ყველა სართულზეა ჩამკეტი, აქ რა უნდა ქნა, ვიდრე მოვა სამაშველო, მაგალითად, მე-12 სართულიდან?“ – კითხულობს სპეციალისტი და იქვე დასძენს, რომ მსგავს ავარიულ სიტუაციაში, ლიფტის გამოყენებაც აკრძალულია.

ლაშა წულუკიძე ყურადღებას ამახვილებს სამაგრებზეც, რადგან მილებს წონა აქვთ და სიმყარის დაცვა მნიშვნელოვანია, ისევე, როგორც ყინვისგან, მზისა და წვიმისგან შესაბამისი დაცვის შესაძლებლობა.

„გასაგებია, რომ ეს მილები შეიფუთება, მაგრამ როგორ დაიცავ ამ რისკებისგან? აღარაფერს ვამბობ იერ-სახეზე – შეფუთვის შემთხვევაშიც ეს გაყვანილობა ფასადს ამახინჯებს. ტურისტულ ქალაქში მით უმეტეს, რატომ უნდა იყოს ასე,“ – დასძინა ლაშა წულუკიძემ.

ლაშა წულუკიძე გვიყვება, რომ სემეკის აგვისტოს გადაწყვეტილების შემდეგ, როცა დარღვევები დაფიქსირდა შენობებს შიგნით გაზგაყვანილობაში, გაზის გაყვანის სამუშაოები „სოკარმა“ შეაჩერა, ბოლო პერიოდში კი, რამდენიმე მისამართზე მილების შეყვანა ფასადიდან დაიწყეს. „სოკარის“ ყოფილი თანამშრომელი ყურადღებას ამახვილებს საქართველოს მთავრობის მიერ 2017 წელს მიღებულ 41-ე დადგენილებაზე, რომელიც გაზგაყვანილობის საკანონმდებლო რეგულირებას ამკაცრებს.

„ეს დადგენილება რეალურად ამოქმედდა 2019 წელს, მე წამოვედი ამ დროს „სოკარიდან“… ახლა ჩათვალეს, რომ თუ ფასადიდან შეიყვანენ გაზის მილებს, ასე დადგენილების მოთხოვნებს დააკმაყოფილებენ. კანონი არ კრძალავს ფასადიდან გაზის მილების შეყვანას, მაგრამ მას სჭირდება კონკრეტული ტექნიკური მოთხოვნების შესრულება, რაც დარღვეულია. იმედი მაქვს, ამასაც დაადასტურებს სემეკი,“ – ამბობს ლაშა წულუკიძე.

„ეს მილები შეიფუთება, არავითარი დარღვევა არ არის. მილების გარედან შეყვანა ზოგიერთ შემთხვევაში უფრო მოსახერხებელია,“ – უთხრა „ბათუმელებს“ ვახტანგ ბერიშვილმა, „სოკარ გაზი აჭარას“ ხელმძღვანელმა. მისი თქმით, წინა წლებშიც იყენებდნენ მსგავს პრაქტიკას, თუმცა კონკრეტულ ასეთ რომელიმე შემთხვევას ახლა ვერ იხსენებს.

„მისამართი ასე არ მახსოვს, მაგრამ იყო მსგავსი პრაქტიკა ადრეც, რამდენიმე კორპუსია ასეთი,“ – აღნიშნა ვახტანგ ბერიშვილმა.

რამდენად მართებულია გაზგაყვანილობის შეყვანა კორპუსში ფასადიდან?

„ტექნიკური რეგლამენტით არ არის შეზღუდული ბუნებრივი გაზის მილების შენობის გარე თუ შიდა ნაწილში განთავსება. აუცილებელი მოთხოვნაა, რომ იყოს დაცული რეგლამენტით გათვალისწინებული უსაფრთხოების ნორმები. რაც შეეხება „სოკარ ჯორჯია გაზისთვის“ მიცემულ გაფრთხილებას კონკრეტულ სადავო საკითხთან მიმართებაში, შეეხება ტექნიკური ხარვეზების გამოსწორებას. კომპანიამ ნორმების დაცვით უნდა განახორციელოს შესაბამისი სამუშაოები ტექნიკური ხარვეზების აღმოსაფხვრელად. სამუშაოებს თუ რა ტრაექტორიით განახორციელებს, ამაში შეზღუდული არ არის“, – მოგვწერეს სემეკის პრესცენტრიდან.

რაც შეეხება კორპუსებს, სადაც სადარბაზოებში დადგინდა გაზგაყვანილობის კუთხით დარღვევები:

„საფრთხის შემცველია აღნიშნულ საცხოვრებელ შენობებში მცხოვრები მობინადრეებისთვის,“ – წერს სემეკი 2022 წლის 18 აგვისტოს გადაწყვეტილებაში, სადაც ბათუმში 12 ახალ კორპუსში გაზგაყვანილობის უსაფრთხოება დეტალურადაა განხილული. უმთავრესი საფრთხე შესაბამისი მასალის გარეშე შეუფუთავი გაზის მილებია, რაც პირდაპირი საფრთხეა ხანძრის დროს.

„მითითებული მრავალბინიანი საცხოვრებელი კორპუსების გაზმომარაგების სისტემები მოწყობილია მეტალოპლასტიკის მრავალშრიანი მილების გამოყენებით. შესწავლის შედეგად გამოიკვეთა სამუშაოების პროცესში დაშვებული ტექნიკური ხასიათის შემდეგი არსებითი ხარვეზები:
– ყველა შენობის შიგნით გაზგაყვანილობა (პლასტმასის მრავალშრიანი მილები, გოფრირებული გარცმით) მოწყობილია ღიად დამცავი კორპუსის, მოწყობილობის ან მასალის გარეშე, რაც ვერ უზრუნველყოფს მის დაცვას ხანძრისგან დროის მოცემული მონაკვეთისათვის;

– რიგ შემთხვევებში გაზგაყვანილობა (მასზე არსებული გადაბმები და დამხშობები) დამონტაჟებულია არავენტილირებად სათავსებში;

– მილსადენებზე არსებული გასართი შეერთებები მოწყობილია იმ ადგილებში, სადაც მოქმედი ტექნიკური რეგლამენტით არ არის დასაშვები;

– რიგ შემთხვევებში მრიცხველები მოწყობილია არავენტილირებად სათავსებში,“ – ვკითხულობთ სემეკის გადაწყვეტილებაში.

საინტერესო დეტალი: სემეკი ამავე გადაწყვეტილებაში მიუთითებს, რომ უწყებას მოქალაქე ლაშა წულუკიძემ მიაწოდა ინფორმაცია და ამის შემდეგ მოიკვლიეს შემთხვევითობის პრინციპით რამდენიმე ახალი კორპუსი ბათუმში. გამოდის, რომ გაზგაყვანილობის უსაფრთხოების კუთხით პასუხისმგებლობას ახლაც არავინ იღებს და არც ამოწმებს იგივე „ლეოგრანდის“ ტრაგედიის და თითქოს გამკაცრებული კანონმდებლობის ფონზე.

„ამავდროულად უნდა აღინიშნოს, რომ გამოვლენილი დარღვევები არ შემოიფარგლება მხოლოდ შემოწმებული ობიექტებით, ანალოგიური ხარვეზებით ხორციელდება მიერთების სამუშაოები მრავალბინიან საცხოვრებელ შენობებში ქ. ბათუმში წლების (5-6 წელი) განმავლობაში (როგორც კომპანიის მიერ, ასევე დამოუკიდებელი სამშენებლო-სამონტაჟო ორგანიზაციების მიერ), რაც წარმოადგენს სისტემურ პრაქტიკას ქ. ბათუმში,“ – ვკითხულობთ სემეკის გადაწყვეტილებაში, თუმცა სემეკის პრესცენტრში დაგვიდასტურეს, რომ ეს პირველი გადაწყვეტილებაა „სოკარ ჯორჯია გაზის“ წინააღმდეგ, როცა დარღვევა დადასტურდა.

რა შეიცვალა აგვისტოში სემეკის გაფრთხილების შემდეგ?

„არ მაქვს ამდენი დრო, ვერ გიპასუხებთ,“ – მოკლედ მოგვიჭრა და ტელეფონი გამორთო „სოკარ ჯორჯია აჭარას“ ხელმძღვანელმა, ვახტანგ ბერიშვილმა, მას ვკითხეთ: რატომ მოეწყო საფრთხის შემცველად გაზგაყვანილობა საცხოვრებელ კორპუსებში, ან რა შეიცვალა სემეკის გაფრთხილების შემდეგ?

ვერც სემეკი ამბობს, რომ გაფრთხილების შემდეგ ხარვეზები „სოკარმა“ აღმოფხვრა, მით უფრო, იმ საცხოვრებელ კორპუსებში, სადაც ადამიანები უკვე ცხოვრობენ და გაზსაც მოიხმარენ.

„არის მუდმივი კომუნიკაცია კომპანიასთან. საბოლოო გადაწყვეტილება ჯერ მიღებული არ არის…მიმდინარეობს მონიტორინგი,“ – გვიპასუხეს სემეკის პრესცენტრში.

„აშკარად სახეზეა შპს „სოკარ ჯორჯია გაზის“ მიერ მოქმედი კანონმდებლობით დადგენილი პირობების, მოთხოვნების, ნორმებისა და ვალდებულებების, ასევე, კომისიის მიერ გაცემული შესაბამისი ლიცენზიით განსაზღვრული პირობების უგულებელყოფის ფაქტები, ვინაიდან კომპანიას პირველად ეკისრება კანონმდებლობით გათვალისწინებული სანქციები ანალოგიური დარღვევებისთვის, ასევე, კომპანიამ კვალიფიციურად ითანამშრომლა კომისიასთან, სრულად გაითავისა მის მიერ ჩადენილი ქმედება და თანახმაა მოკლე ვადებში აღმოფხვრას ქ. ბათუმში მრავალბინიან საცხოვრებელ სახლებში გაზგაყვანილობის სამუშაოების შესრულების დროს დაშვებული ყველა ტექნიკური ხარვეზი. კომისია თვლის, რომ ლიცენზიანტს უნდა მიეცეს წერილობითი გაფრთხილება,“ – ასე სრულდება სემეკის გადაწყვეტილება.

სემეკი თავის გადაწყვეტილებაში კონკრეტული მოთხოვნითაც მიმართავს „სოკარ ჯორჯია გაზს“.

„ხანძრისაგან დაცვის მიზნით მრავალშრიანი მილები უნდა მოთავსდეს დამცავ კორპუსში (რომელიც უზრუნველყოფს დაცვას ხანძრის შემთხვევაში) ან მოხდეს მილგაყვანილობის დაფარვა დამცავი მასალით, რაც შესაძლებელს გახდის მილგაყვანილობამ გაუძლოს მაღალ ტემპერატურებს, დროის მოცემული მონაკვეთისათვის,“ – წერს სემეკი.

სემეკის ეს მოთხოვნა ჯერ შესრულებული არ არის.

„სოკარის“ ცნობით, დღეს, 2 ნოემბერს ხელვაჩაურის მუნიციპალიტეტში ავარიული დაზიანების გამო 14:00 საათიდან ბუნებრივი გაზის მიწოდება შეუწყდა სარფის აბონენტებს.

„ამ ეტაპზე საავარიო ჯგუფი ადგილზე მუშაობს შესაბამისად ბუნებრივი გაზის მიწოდება ეტაპობრივად აღდგება 4 ნოემბრის 15:00 საათიდან“ – აცხადებს კომპანია.

„სოკარ ჯორჯია გაზი” აბონენტებს მოუწოდებს, დაკეტილ მდგომარეობაში იქონიონ ბინებში არსებული გაზის ონკანები და უყურადღებოდ არ დატოვონ გაზის დანადგარები.

9 წლის ანიტა შანთაძე მეოთხე კლასელია. უყვარს ხატვა და სკოლაში სიარული, რადგან იქ არიან ადამიანები, ვისი ნახვაც უხარია.

ანიტას და მისი ოჯახის ცხოვრება ათი თვის წინ შეიცვალა, როცა ანიტა ავარიაში მოჰყვა – მარჯვენა ხელზე სატვირთო მანქანამ გადაუარა. მარჯვენა ხელის ორი თითი დაკარგა, ხოლო მკლავი დეფორმირებული აქვს.

ანიტას დედა, ნათია შანთაძე ცრემლების გარეშე ვერ ჰყვება იმ ამბავს, როცა ის და ანიტა ავარიაში მოყვნენ. შემთხვევა ბათუმში, მათ სახლთან ახლოს მოხდა, ავტობუსის გაჩერებაზე. ანიტას და მას დიდი სატვირთო მანქანა დაეჯახათ.

„გზაზე გადასვლისას ორივე მხარეს გავიხედე, არაფერი იყო. ერთმა მანქანამ გზა დაგვითმო, გადადითო. გადავედით და ავტობუსისკენ წავედით, რომელში ჩაჯდომაც გვინდოდა. ვერ ვიხსენებ რა მომენტებში წამოვიდა [მანქანა], რა მოხდა, არაფერი აღარ მახსოვს. მახსოვს, რომ გავითიშე. არ მახსოვს რამდენი ხანი ვიყავი უგონოდ. როცა თვალი გავახილე, ბავშვი საბურავის  ქვეშ იყო. „ანიტა როგორა ხარ, შვილო რა გჭირს-მეთქი და ხელი ვიტკინეო“.

როცა იქიდან გამოვიყვანეთ, ღმერთო რა დღეში იყო… კლინიკა „მედინაში“ მივიყვანეთ პირველად. „დედიკო ხელი არ მომჭრან უთხარიო, ამას მეუბნებოდა“. ღმერთო, ის რა განცდა იყო…“ – ჰყვება ნათია.

თბილისის იაშვილის სახელობის ბავშვთა ცენტრალური საავადმყოფოს მიერ გაცემული ფორმა 100-ის მიხედვით, ანიტა შანთაძე კლინიკაში 2021 წლის 28 დეკემბერს შეიყვანეს. 2022 წლის 20 იანვარს გაწერეს.

კლინიკაში ანიტას ორი თითის ამპუტაცია ჩაუტარეს, ხელის შენარჩუნება კი შეძლეს. თუმცა ახლა ანიტას ხელი დეფორმირებულია და სტკივა.

მას შემდეგ, რაც გაარკვიეს, რომ ანიტას ხელის აღდგენა ქართულ კლინიკებში შეუძლებელი იყო, ოჯახმა თურქეთში დაიწყო კლინიკების მოძიება. იპოვეს კიდეც, თუმცა ანიტას ოპერაცია ძვირი ჯდება – 18 ათასი დოლარი.

„ანიტას ზოგჯერ ისეთ სიტყვებს ამბობს, ვდგები და სახლიდან გარეთ გავდივარ – „რა დავაშავე, რომ დამეჯახა“, „რატომ ვარ ცოცხალი, ნეტა მოვმკვდარიყავიო“ გვეუბნება. ახლა ვცდილობ თანხის შეგროვებას, რომ წავიყვანო ბავშვი და გადავურჩინო ხელი. ჩემი ოჯახი სოციალურად დაუცველია, ამიტომ მე თავად არანაირი სახსრები არ მაქვს, რომ ეს 18 ათასი დოლარი შევაგროვო. ჯანდაცვის სამინისტროს ვთხოვე და მითხრეს, რომ 70 %-ით დააფინანსებენ ანიტას, მაგრამ დარჩენილი თანხაც ძალიან დიდია ჩემთვის. არც გზის და იქ საჭირო სხვა ხარჯების დაფარვა შემიძლია“, – ამბობს გოჩა შანთაძე.

ანიტას კი იმედია აქვს, რომ ოპერაციას გაუკეთებენ და მარჯვენა ხელის ძველებურად გამოყენებას შეძლებს. ყველაზე მეტად ხატვა უყვარს და ქართული ლიტერატურა. უყვარს სკოლაც – ბავშვებთან ერთად თამაშის და კლასელების გამო.

იმის გამო, რომ მარჯვენა ხელი დაზიანებული აქვს, ხატვაც და წერაც თავიდან ისწავლა მარცხენა ხელით.

„ექიმი მინდა გამოვიდე. ოპერაციების ექიმი მინდა ვიყო და როცა ვინმე ავად გახდება, მინდა დავეხმარო,“ – ამბობს ანიტა.

ანიტას და მისი მშობლების თურქეთში კონსულტაციაზე ჩასვლა აჭარის ჯანდაცვის სამინისტრომ დააფინანსა. თუმცა ახლა ოჯახს ანიტას მკურნალობისთვის სოლიდური თანხა სჭირდება, რომელიც ჯერჯერობით არ აქვთ. დაფინანსებაზე განაცხადი შეტანილი აქვთ და პასუხს ელოდებიან.

ანიტას მკურნალობისთვის მამამ სპეციალური ანგარიშიც გახსნა, სადაც ნებისმიერ მსურველს შეუძლია თანხის გადარიცხვა.

ანგარიშის ნომერი: GE73BG0000000807779800

მიმღები: გოჩა შანთაძე

„ოცნების ქალაქის“ განაშენიანების კონცეფცია, რომელიც აჭარის მთავრობამ მოამზადა, 15 ჰექტარს მოიცავს. დოკუმენტი მეჯინისწყლის დასახლებაში, კერძოდ, ფრიდონ ხალვაშის ქუჩის #188-ში და მის მიმდებარედ არსებულ ყოფილი სამხედრო ბაზის ტერიტორიას [140551კვ.მ], სამ კერძო მიწის ნაკვეთს და აჭარის მთავრობის საკუთრებაში არსებულ ერთ ნაკვეთს აერთიანებს.

კონცეფცია ყოფილი სამხედრო ბაზის ტერიტორიაზე საცხოვრებელი კომპლექსისა და დამხმარე ინფრასტრუქტურის მოწყობის დეტალური გეგმის შემუშავებას გულისხმობს.

კონცეფციის მიხედვით, ერთ-ერთი კვარტლის ბენეფიციარები „ოცნების ქალაქში“ თვითნებურად დასახლებულები არიან. მთავრობა განმარტავს, რომ მათგან უმრავლესობა ეკომიგრანტია, გდგ დოკუმენტის შემუშავება კი სწორედ მათ საცხოვრისით უზრუნველყოფას ემსახურება. კონცეფციის მიხედვით, „ოცნების ქალაქში“ ასეთი 1607 ოჯახია.

ამონარიდი კონცეფციიდან:

„კონცეფციის დამტკიცების მიზანია არსებული განაშენიანების მაცხოვრებელთა დაკმაყოფილება ტერიტორიის ერთ ნაწილში [1607 ოჯახი – ბინების გადაცემა საკუთრების დადგენილი ფორმით], აპრობირებული ნომენკლატურისა და სტანდარტების სოციალური საცხოვრისის მშენებლობისათვის მშენებლობის ხანგრძლივობა – 2023-2026.“

დარჩენილ ნაწილზე კი მთავრობა კერძო ინვესტიციის მოზიდვას გეგმავს. კონცეფციით დადგინდა და შემდგომში განაშენიანების დეტალური გეგმით [გდგ] უნდა დაზუსტდეს პირობები კერძო ინვესტორებისთვის – კომპლექსის დარჩენილი ნაწილის განვითარების მიზნით: „მშენებლობის ხანგრძლივობა – 2023-2030“.

მთავრობის ინფორმაციით, სამხედრო ბაზის კაპიტალური ნაგებობების უმეტესობა მთლიანად ან ნაწილობრივ დაშლილია. დარჩენილია მხოლოდ ოთხი შენობა, რომელიც ტერიტორიის ათვისების შედეგად დემონტაჟს დაექვემდებარება.

არსებული განაშენიანების სამხრეთ-დასავლეთ კუთხეში ამჟამად, მიმდინარეობს მრავალბინიანი სოციალური საცხოვრებელი სახლების [3 ბლოკი] მშენებლობა, რომელშიც მთავრობამ ბინები უნდა გადასცეს ოჯახების ნაწილს, რომლებიც ბარაკული ტიპის სახლებში ცხოვრობენ.

კონცეფციის მიხედვით: გეგმარებით ტერიტორიაზე არ არის წარმოდგენილი საერთო სარგებლობის გამწვანებული ტერიტორიები და სივრცეები. ხალვაშის ქუჩის გასწვრივ ხეივანი კი დეგრადირებულია:

„არსებულ განაშენიანებას არ გააჩნია მკვეთრად გამოხატული ქუჩათა/გზათა ქსელი.“

გეგმარებით ერთეულში ასევე არ არის სოციალური ინფრასტრუქტურა, არ არის ადმინისტრაციული, ჯანდაცვის, კულტურის და სხვა ობიექტები.

დოკუმენტის მიხედვით, „ოცნების ქალაქის“ ტერიტორიაზე საჭიროა მაღალი ინტენსივობის საცხოვრისის განვითარება – კ-1/კ-2 პარამეტრების დადგენილი ზღვრული მაჩვენებლების გადამეტება, ცალკეულ შემთხვევებში კი, პარამეტრების განსხვავებული მაჩვენებლების დადგენა.

მცირე ნაწილში წარმოდგენილი იქნება ასევე საქმიანი ზონა, რომლის საჭიროებაც განაპირობა მრავალფუნქციური კომპლექსის დაგეგმვამ საცხოვრებელი ნაწილის ჩრდილო-აღმოსავლეთ კუთხეში, ხალვაშისა და ოპიზრების ქუჩების კვეთასთან.

დოკუმენტის თანახმად, დაგეგმილ პროექტებს ესაჭიროება კ 2 კოეფიციენტის გადამეტება განაშენიანებისთვის განკუთვნილ 11 მიწის ნაკვეთზე.

დოკუმენტის მიხედვით, მთლიანი გეგმარებითი ტერიტორია დაიყოფა საცხოვრებელი განაშენიანების და მისი დამხმარე ინფრასტრუქტურის შემცველ კვარტლებად – სამეზობლო ბლოკებად, რომელთა შემაკავშირებელ და ქალაქის დანარჩენ ნაწილებთან დამაკავშირებელ ფუნქციას შეასრულებს გამჭოლი კვარტალშორისი ქუჩები, სადაც საგზაო მოძრაობის ორგანიზებისთვის მომზადებულია ორი ალტერნატიული გადაწყვეტა: ცალმხრივი და ორმხრივი მოძრაობებით.

კონცეფციის მიხედვით, „გამჭოლი კვარტალშორისი ქუჩები ჯვარედინ ბადეზეა დაგეგმარებული და დაახლოებით შუაზე კვეთს  ტერიტორიას. მათ პარალელურად, სამხრეთ-დასავლეთ ნაწილში დაგეგმარებულია შიდაკვარტალური გამჭოლი და პასიური მოძრაობის პარალელური ქუჩები.“

მთლიან გეგმარებით ტერიტორიაზე დაგეგმილია საცხოვრებელი ზონის [საგზაო მოძრაობის] რეჟიმის ამოქმედება, სიჩქარის მაქსიმალური შეზღუდვით – 20 კმ/სთ. ქუჩებზე ასევე გათვალისწინებულია ველობილიკის არსებობა.

კონცეფციის თანახმად, ტერიტორიის უკიდურეს დასავლეთ კვარტალს იკავებს მიმდინარე მშენებლობა, რომელიც განიხილება პირველ ეტაპად. მის მიმდებარედ კვარტლებში დაიგეგმა: საბავშვო ბაღი, სკოლა და სპორტ-კომპლექსი. სამივე ინფრასტრუქტურა საერთო სარგებლობისაა. ამასთან, ყველა საცხოვრებელ კვარტალში დაგეგმარებულია შიდაკვარტალური ინფრასტრუქტურა: საბავშვო მოედნები და სპორტ-მოედნები.

დოკუმენტის მიხედვით, განაშენიანების სიმაღლის ზრდის შეზღუდვის ერთ-ერთი ფაქტორი განპირობებულია აეროდრომის უსაფრთხოების რეჟიმით.

სკრინინგის განცხადებაზე თანდართული შპს ,,ბათუმის აეროპორტის” წერილის მიხედვით, დოკუმენტით გათვალისწინებული მიწის ნაკვეთი მდებარეობს ბათუმის საერთაშორისო აეროპორტის დაბრკოლებების შემზღუდველი ზედაპირებით შემოფარგლული აეროდრომის რაიონში და დასაშვებია ისეთი შენობა-ნაგებობების და სხვა ობიექტების განთავსება, რომელთა მაქსიმალური სიმაღლის ნიშნული არ აღემატება საშუალო ზღვის დონიდან +56.38 მეტრს.

ამ საკითხთან დაკავშირებით გარემოს ეროვნული სააგენტო წერს: „საჭიროა, მაქსიმალურად იქნას გათვალისწინებული წერილში მითითებული საკითხი და მიღებულ იქნას შესაბამისი ზომები მაქსიმალური სიმაღლის ნიშნულის გადაჭარბების თავიდან აცილების
თაობაზე, როგორც მშენებლობის, ასევე ექსპლუატაციის პერიოდში. მათ შორის, განხილულ იქნას აღნიშნული ნიშნულის შემცირების/ არასრული ათვისების საკითხი.“

კონცეფციის მიხედვით, არასამშენებლო ტერიტორიაზე უნდა მოეწყოს საერთო სარგებლობის ბულვარი, ხეივნი და სკვერი, დარგობრივი კანონმდებლობის მოთხოვნათა დაკმაყოფილების პირობით.

ბინები, მიწის ნაკვეთები, წილები კომპანიებში, მიღებული ანაზღაურების ოდენობა – „საერთაშორისო გამჭვირვალობა – საქართველო“ აცხადებს, რომ აჭარაში არაერთი თანამდებობის პირის დეკლარაციაში ქონების შესახებ ინფორმაცია სრულად ასახული არ არის.

„გამჭვირვალობა – საქართველომ“ შეისწავლა აჭარის უმაღლესი საბჭოს და მთავრობის თანამდებობის პირების მიერ 2021-2022 წლებში შევსებული დეკლარაციები და 39%-ში ხარვეზები გამოავლინა.

„გამჭვირვალობის ცნობით, აჭარის მთავრობის თავმჯდომარემ, თორნიკე რიჟვაძემ, დღემდე მართვის უფლებით მესამე პირს არ გადასცა მის საკუთრებაში არსებული შპს „აჭარა ბერრის ლიმითედის“ 25%-იანი წილი.

„მან 2021 წელს შევსებულ დეკლარაციაში მიუთითა, რომ ამ შპს-ეს წილი მინდობის ხელშეკრულებით მართვის უფლებით გადასცა მადონა ბოლქვაძეს, თუმცა საჯარო რეესტრის ეროვნულ სააგენტოს ეს ცვლილება დღემდე არ აუსახავს.

2022 წლის დეკლარაციაში კი, 2021 წლის დეკლარაციისგან განსხვავებით, თორნიკე რიჟვაძემ საერთოდ არ მიუთითა, რომ წილი მინდობის საფუძველზე მადონა ბოლქვაძისთვის აქვს გადაცემული. მანამდე, 2017 წლის 31 ივლისს, თორნიკე რიჟვაძე ცდილობდა, აღნიშნული ბიზნესწილი ეჩუქებინა თორნიკე კუჭავასთვის, რომელიც მისი მთავრობის თავმჯდომარეობის გარკვეულ პერიოდში ფინანსთა და ეკონომიკის მინისტრის პირველ მოადგილედ მუშაობდა, მაგრამ წილის ჩუქების ხელშეკრულების სარეგისტრაციო წარმოება საჯარო რეესტრის ეროვნულმა სააგენტომ შეწყვიტა ხარვეზის აღმოუფხვრელობის გამო, კერძოდ, რეესტრში არ იქნა წარდგენილი პარტნიორთა კრების ოქმი – თანხმობა“, – წერს „გამჭვირვალობა“.

ორგანიზაციის ცნობით, აჭარის უმაღლესი საბჭოს თავმჯდომარემ, დავით გაბაიძემ, 2022 წელს შევსებულ დეკლარაციაში არ მიუთითა მის საკუთრებაში არსებული 104,39 კვ.მ ბინა ქალაქ ბათუმში.

„მან დეკლარაციაში, ასევე, არ აღნიშნა, რომ მონაწილეობს სამეწარმეო საქმიანობაში, კერძოდ, დავით გაბაიძე ფლობს 25%-იან წილს შპს გაბაიძე და პარტნიორებში (კანონმდებლობის თანახმად, წილი მართვის უფლებით გადაცემული აქვს სხვა პირისთვის). დავით გაბაიძეს აგრეთვე არ აქვს დეკლარირებული 2021 წელს უმაღლესი საბჭოს თავმჯდომარის თანამდებობაზე ყოფნის პერიოდში მიღებული შრომის ანაზღაურება/ხელფასი“, – წერს ორგანიზაცია.

„გამჭვირვალობის“ ცნობით, უმაღლესი საბჭოს განათლების, მეცნიერების, კულტურისა და სპორტის საკითხთა კომიტეტის თავმჯდომარემ, ფრაქცია „ქართული ოცნების“ წევრმა, დავით ბაციკაძემ, 2022 წელს შევსებულ დეკლარაციაში არ მიუთითა მის საკუთრებაში არსებული 199 კვ.მ მიწის ნაკვეთი 460,8 კვ.მ შენობა-ნაგებობებით და 74,5 კვ.მ ბინა ქალაქ ბათუმში.

„მან დეკლარაციაში, ასევე, არ აღნიშნა მისი და მისი მეუღლის, ნანა ბაჯელიძის სამეწარმეო საქმიანობა.

კერძოდ, დავით ბაციკაძე ფლობს შპს „როიალ ბათუმის” 25%-იან წილს და ნანა ბაჯელიძე ამავე კომპანიის დირექტორია (ნანა ბაჯელიძეა დავით ბაციკაძის 25%-ის მინდობით წილის მმართველიც). დავით ბაციკაძეს არ აქვს დეკლარირებული 2021 წელს მის მიერ აჭარის უმაღლესი საბჭოს განათლების, მეცნიერების, კულტურისა და სპორტის საკითხთა კომიტეტის თავმჯდომარის თანამდებობაზე ყოფნის პერიოდში მიღებული შრომის ანაზღაურება და მისი მეუღლის მიერ შპს „როიალ ბათუმის” დირექტორის თანამდებობაზე ყოფნის პერიოდში მიღებული ხელფასი“, – წერს ორგანიზაცია.

„გამჭვირვალობა“ წერს, რომ აჭარის უმაღლესი საბჭოს გენდერული თანასწორობის საბჭოს თავმჯდომარემ, ფრაქცია „ქართული ოცნების“ წევრმა, ფატი ხალვაშმა, 2021 წელს შევსებულ დეკლარაციაში არ მიუთითა მისი მეუღლის, ნუგზარ ყურშუბაძის მონაწილეობა სამეწარმეო საქმიანობაში, კერძოდ, შპს „პრიზას“ დირექტორობა.

ორგანიზაციის ცნობით, სსიპ „ბათუმის ბულვარის” დირექტორის მოადგილემ, სოფიო გუჯაბიძემ 2022 წელს შევსებულ დეკლარაციაში არ მიუთითა, რომ მისი მეუღლე, გიორგი ლომთათიძე ფლობს 34% წილს შპს „მაი ქებ ჯორჯიაში“, 50%-იან წილს შპს „ანდაგში“ და არის შპს „PLAY 4 WIN“-ის დირექტორი.

„გიორგი ლომთათიძე ასევე არის ბათუმის მუნიციპალიტეტის საკრებულოს წევრი პარტია „ქართული ოცნებიდან“ და ა(ა)იპ „ბათუმის საჩოგბურთო კომპლექსის” დირექტორი, საიდანაც, 2021 წლის 1-ელი იანვრიდან 31 დეკემბრის ჩათვლით ხელფასის სახით მიიღო 15 000 ლარის შემოსავალი“, – წერს „გამჭვირვალობა“.

ასევე, „გამჭვირვალობის“ ცნობით, სსიპ „ახალგაზრდობის რეგიონული ცენტრის“ დირექტორის მოადგილემ, თამარ გაბაიძემ, 2022 წელს შევსებულ დეკლარაციაში არ მიუთითა მის საკუთრებაში არსებული 97,75 კვ.მ, 65,70 კვ.მ და 65,70 კვ.მ ბინები ქალაქ ბათუმში, მემედ აბაშიძის ქუჩაზე.

„თამარ გაბაიძემ დეკლარაციაში არასწორად მიუთითა წილის ოდენობა შპს „ძველ ქალაქში“, რომლის დირექტორი და 100%-იანი წილის მფლობელია. ის ასევე არის შპს „სპექტრუმის“ დირექტორი და 50%-იანი წილის მფლობელი. მოქმედი კანონმდებლობის შესაბამისად, თამარ გაბაიძემ უნდა დატოვოს შპს „ძველი ქალაქის“ და შპს „სპექტრუმის“ დირექტორის თანამდებობები და მესამე პირს მართვის უფლებით გადასცეს ამ კომპანიების წილები. მან დეკლარაციაში აგრეთვე არ მიუთითა მეუღლის, კახა ცეცხლაძის 100%-იანი წილი და დირექტორის თანამდებობა შპს „პრექლაბში“ – წერს „გამჭვირვალობა“.

„გამჭვირვალობა“ წერს, რომ უმაღლესი საბჭოს ფრაქცია „ქართული ოცნების” თავმჯდომარემ, გიორგი მანველიძემ, 2022 წელს შევსებულ დეკლარაციაში მიუთითა, რომ ფლობს შპს I-G-ის 50% წილს, თუმცა მართვის უფლებით იგი არ გადაუცია მესამე პირზე, რითაც დაარღვია მოქმედი კანონმდებლობა.

ორგანიზაციის ცნობით, სსიპ „სამშენებლო და ტექნიკური ლაბორატორიის“ უფროსმა, ირაკლი ლოჩოშვილმა, 2022 წელს შევსებულ დეკლარაციაში არ მიუთითა მის თანასაკუთრებაში არსებული 300 კვ.მ და 300 კვ.მ (158,75 კვ.მ საერთო ფართობის შენობა-ნაგებობებით) მიწის ნაკვეთები ხელვაჩაურის მუნიციპალიტეტის სოფელ ურეხში – „მან აგრეთვე დეკლარაციაში არ აჩვენა მისი მეუღლის, შორენა მახაჭაძის საკუთრებაში არსებული 64,75 კვ.მ ბინა ქალაქ ბათუმში, თამარის დასახლებაში“.

„გამჭვირვალობის“ ინფორმაციით, აჭარის სავაჭრო-სამრეწველო პალატის თავმჯდომარემ, გიორგი რომანაძემ, 2022 წელს შევსებულ დეკლარაციაში არ მიუთითა მისი მეუღლის, თეონა ნუმანიშვილის საკუთრებაში არსებული 120 კვ.მ მიწის ნაკვეთი ხელვაჩაურის მუნიციპალიტეტის სოფელ სარფში.

„დეკლარაციიდან აგრეთვე ირკვევა, რომ თეონა ნუმანიშვილი აჭარის ავტონომიური რესპუბლიკის განათლების, კულტურისა და სპორტის სამინისტროს შესყიდვების დეპარტამენტის მეორე კატეგორიის უფროსი სპეციალისტია და პარალელურად „საჯარო დაწესებულებაში ინტერესთა შეუთავსებლობისა და კორუფციის შესახებ“ საქართველოს კანონის მე-13 მუხლის მე-2 პუნქტის მოთხოვნების დარღვევით მუშაობს შპს „ბათუმის რესპუბლიკური კლინიკური საავადმყოფოს“ შესყიდვების სპეციალისტად.

ნუმანიშვილი, ასევე, მონაწილეობს სამეწარმეო საქმიანობაში. ის, ასევე, არის 100% წილის მფლობელი და დირექტორი შემდეგ კომპანიებში: შპს „G.M.T company“, შპს „გორა+“ და შპს „G.T.GROUP“. მანამდე სამივე კომპანიის მფლობელი და დირექტორი გიორგი რომანაძე იყო“, – წერს ორგანიზაცია.

„გამჭვირვალობის“ ცნობით, სსიპ „აჭარის სატყეო სააგენტოს” უფროსმა თემურ ყურშუბაძემ 2022 წელს შევსებულ დეკლარაციაში არ მიუთითა მეუღლის, თამილა დუმბაძის საკუთრებაში არსებული 2,500 კვ.მ მიწის ნაკვეთი ქობულეთის მუნიციპალიტეტის დაბა ჩაქვში, რომელზეც განთავსებულია 4 შენობა-ნაგებობა საერთო ფართობით 330,37 კვ.მ. დეკლარაციაში აგრეთვე არ აჩვენა 2021 წელს აჭარის სატყეო სააგენტოს უფროსის თანამდებობაზე ყოფნის პერიოდში მიღებული შრომის ანაზღაურება.

ასევე,  სსიპ „აჭარის სატყეო სააგენტოს“ უფროსის მოადგილე ჯუმბერ აბულაძემ 2022 წელს შევსებულ დეკლარაციაში არ მიუთითა მის საკუთრებაში არსებული 150,40 კვ.მ ბინა ქალაქ ბათუმში“ – წერს ორგანიზაცია.

„საერთაშორისო გამჭვირვალობა – საქართველო“ კვლევაში წერს უმაღლესი საბჭოს ოპოზიციონერი დეპუტატების დეკლარაციებში აღმოჩენილ ხარვეზებზეც.

აჭარის უმაღლესი საბჭოს ადამიანის უფლებათა დაცვის კომიტეტის თავმჯდომარის მოადგილემ, ფრაქცია „ერთიანი ნაციონალური მოძრაობის“ წევრმა გია აბულაძემ 2022 წელს შევსებულ დეკლარაციაში მიუთითა, რომ 2021 წელს, აჭარის უმაღლესი საბჭოს დეპუტატობის პარალელურად, 1-ელი იანვრიდან 1-ელი დეკემბრის ჩათვლით მუშაობდა შპს „GIMG“-ის დირექტორის მოადგილედ და ხელფასის სახით მიიღო 25,920 ლარი, 1-ელი მაისიდან 30 ივნისის ჩათვლით მუშაობდა შპს „NEW CITY“-ში კონსულტანტად და ხელფასის სახით მიიღო 900 ლარი შემოსავალი, 1-ელი მაისიდან 1-ელი სექტემბრის ჩათვლით მუშაობდა შპს „სტორნო აუდიტში“ კონსულტანტად და ხელფასის სახით მიიღო 6,000 ლარი. ამ სამუშაოების შესრულებითა და შემოსავლის მიღებით მან დაარღვია მოქმედი კანონმდებლობა.

„უმაღლესი საბჭოს ჯანმრთელობის დაცვისა და სოციალურ საკითხთა კომიტეტის თავმჯდომარის მოადგილემ, ფრაქცია „ერთიანი ნაციონალური მოძრაობის“ წევრმა ლევან ანთაძემ 2022 წელს შევსებულ დეკლარაციაში მიუთითა, რომ 2021 წელს აჭარის უმაღლესი საბჭოს დეპუტატობის პარალელურად, 1-ელი იანვრიდან 31 დეკემბრის ჩათვლით ის მუშაობდა შპს „საქართველოს სამედიცინო ჯგუფის“ ლიაზონ ოფიცრად და ხელფასის სახით მიიღო 654 ლარი. ამ სამუშაოს შესრულებასაც და მისგან შემოსავლის მიღებასაც მას კანონმდებლობა უკრძალავს“, – წერს „გამჭვირვალობა“.

ასევე, ორგანიზაციის ცნობით, საფინანსო-საბიუჯეტო და ეკონომიკურ საკითხთა კომიტეტის თავმჯდომარის მოადგილემ, ფრაქცია „ერთიანი ნაციონალური მოძრაობის“ წევრმა, გიორგი კირთაძემ, 2022 წელს შევსებულ დეკლარაციაში არ მიუთითა მის საკუთრებაში არსებული 149 კვ.მ და 389 კვ.მ მიწის ნაკვეთები ხელვაჩაურის მუნიციპალიტეტის სოფელ ორთაბათუმში და 114,61 კვ.მ ბინა ბათუმში. მან დეკლარაციაში არ აჩვენა, რომ ფლობს 50%-იან წილს შპს „ასხში“, რომელიც, დეკლარაციაში ჩვენების პარალელურად, მართვის უფლებით უნდა გადაეცა მესამე პირისთვის, რაც მან არ გააკეთა და ამით დაარღვია მოქმედი კანონმდებლობა“.

„გამჭვირვალობის“ ინფორმაციით, უმაღლესი საბჭოს საკონსტიტუციო, იურიდიულ და საპროცედურო საკითხთა კომიტეტის თავმჯდომარის მოადგილემ, ფრაქცია „ერთიანი ნაციონალური მოძრაობის“ წევრმა, მედეა ვასაძემ, 2022 წელს შევსებულ დეკლარაციაში არ მიუთითა მისი ინდივიდუალური მეწარმეობა.

„დეკლარაციის შევსებისას მედეა ვასაძე შპს „როიალ გარდენსის“ დირექტორიც იყო და პარალელურად ფლობდა ამ კომპანიის 50%-იან წილს, ხოლო დარჩენილ 50%-იან წილს ფლობდა თამაზ დავითაძე.

დეკლარაციის შევსების შემდეგ ორი ცვლილება შევიდა შპს-ეს წილებსა და ხელმძღვანელობაში, კერძოდ, 2022 წლის 11 მაისის ცვლილებით, თამაზ დავითაძემ კუთვნილი 50%-იანი წილი საკუთრებაში გადასცა ქეთევან ბაგრატიონს, 25 მაისის ცვლილებით კი, ქეთევან ბაგრატიონმა მედეა ვასაძე ჩაანაცვლა დირექტორის პოზიციაზე და მართვის უფლებით მიიღო მისი 50%-იანი წილი. მედეა ვასაძემ დეკლარაციაში, აგრეთვე, არ აჩვენა მისი მეუღლის, შალვა ჯინჭარაძის მონაწილეობა სამეწარმეო საქმიანობაში. კერძოდ, ის არის შპს „კომფორტი 2“-ის დირექტორი, შპს „BROS“-ის 20% წილის მფლობელი, შპს „პრესტიჟი-2“-ის 50% წილის მფლობელი და დირექტორი, სპს „დანელია და კომპანიის” დამფუძნებელი და დირექტორი“ – წერს „გამჭვირვალობა“.

კვლევაში საუბარია ხარვეზებზე სხვა თანამდებობის პირების დეკლარაციებშიც.

„გამჭვირვალობის“ ცნობით, ჯამში 62 მოქმედი თანამდებობის პირიდან დეკლარაცია ხარვეზებით 24-მა შეავსო. მათგან 12-მა თანამდებობის პირმა დეკლარაციაში არ მიუთითა მისი ან/და მისი ოჯახის წევრის საკუთრებაში არსებული უძრავი ქონება.

12 თანამდებობის პირს არ აქვს დეკლარირებული მისი ან/და მისი ოჯახის წევრის მონაწილეობა სამეწარმეო საქმიანობაში – წილების ფლობა და საწარმოს ხელმძღვანელობა.

11 თანამდებობის პირს არ გადაუცია წილის მართვის უფლება სხვა პირისათვის.

4 თანამდებობის პირს დეკლარაციაში არ მიუთითებია თანამდებობაზე ყოფნის პერიოდში მიღებული შრომის ანაზღაურება, 3-მა პირმა თანამდებობაზე ყოფნისას მიიღო შემოსავლები აკრძალული/ნებადაურთველი საქმიანობიდან.

„ორმა თანამდებობის პირმა – უმაღლესი საბჭოს წევრებმა, ილია ვერძაძემ და ფრიდონ ფუტკარაძემ გამოასწორეს ჩვენს 2019 წლის კვლევაში მითითებული ხარვეზები, ხოლო მთავრობის თავმჯდომარემ, თორნიკე რიჟვაძემ, არ გაითვალისწინა 2020 წლის კვლევაში ნახსენები ხარვეზი“, – წერს ორგანიზაცია.

_________________

ფოტოზე: აჭარის მთავრობის თავმჯდომარე თორნიკე რიჟვაძე და აჭარის უმაღლესი საბჭოს თავმჯდომარე დავით გაბაიძე

ნათია კაპანაძის სარჩელი ქუთაისის სააპელაციო სასამართლომ არ დააკმაყოფილა.

ნათია კაპანაძე აჭარის ტელევიზიის დირექტორი იყო და იმპიჩმენტის წესით გაათავისუფლეს. ის სასამართლოში ითხოვდა უნდობლობის საკითხზე აჭარის ტელევიზიის ბორდის მიერ მიღებული გადაწყვეტილების ბათილად ცნობას, თანამდებობაზე აღდგენას, იძულებითი განაცდურის ანაზღაურებას და დირექტორის პოზიციაზე სასამართლო დავის მიმდინარეობისას გამოცხადებული კონკურსის შედეგების ბათილად ცნობას.

——————

ნათია კაპანაძე 2019 წლის 19 აპრილს იმპიჩმენტის წესით გაათავისუფლეს აჭარის ტელევიზიის დირექტორის თანამდებობიდან. დირექტორის იმპიჩმენტის პროცედურის წამოწყებას წინ უსწრებდა არაერთი საერთაშორისო ორგანიზაციის, უცხო ქვეყნის საელჩოს, ეუთოს სპეცწარმომადგენლების შეშფოთება სარედაქციო პოლიტიკაში გარე ძალების ჩარევაზე, მაგრამ ამას მაშინდელი მრჩევლებისთვის [ნატა იმედაიშვილი, გიგა ჩხარტიშვილი, ირაკლი ირემაძე, ირაკლი დარცმელიძე] არ შეუშლია ხელი დირექტორის იმპიჩმენტის პროცედურა ბოლომდე მიეყვანა.

„ნათია კაპანაძის საქმის“ განხილვა მოსამართლე ჯუმბერ ბეჟანიძემ სარჩელის შეტანიდან დაახლოებით ორი წლის შემდეგ, 2021 წლის 25 მაისს დაიწყო.

რა თქვეს მოწმეებმა სასამართლო პროცესებზე ნახეთ აქ.

ბათუმის საქალაქო სასამართლოში მოსამართლე ჯუმბერ ბეჟანიძემ ტელევიზიის ყოფილი ბორდის არგუმენტები გაიზიარა სატელევიზიო რეიტინგის, პროგრამული პრიორიტეტების შეუსრულებლობის, შრომის ანაზღაურების ცვლილებისა და თანხის არამიზნობრივი ხარჯვის ნაწილში. მოსამართლემ გაიზიარა ყოფილი ბორდის მოსაზრება, მაგალითად, რეიტინგებზე, მაშინ, როდესაც ბორდის ყოფილმა ხელმძღვანელმა, ნატა იმედაშვილმაც კი უთხრა, რომ რეიტინგი არაა საკითხი, რაც შესაძლოა იმპიჩმენტის საფუძველი გახდეს.

მოსამართლეს რეიტინგების დათვლის სპეციალისტმაც უთხრა, როგორც მოწმემ, რომ რეიტინგის შემცირება უკავშირდებოდა სატელევიზიო ბადიდან მექანიკის (სერიალები, მხატვრული ფილმები) ამოღებას და მცდელობას, ტელევიზიას საკუთარი გადაცემები შეეთავაზებინა მაყურებლისთვის.

ნათია კაპანაძის შემდეგ სასამართლოს 11-მა ჟურნალისტმა და რედაქტორმა მიმართა, რომლებიც აჭარის ტელევიზიის ახალი მენეჯმენტის პირობებში სამსახურიდან გაუშვეს, ან მათი სამსახურებრივი მდგომარეობა შეცვალეს. ამ საქმეების დიდი ნაწილის განხილვა ჯერ არ დაწყებულა.

ბათუმის მერიის შპს „სანდასუფთავება“ სამბორბლიან  8 ველოსიპედის ყიდვას გეგმავს, რისთვისაც ტენდერი უკვე გამოაცხადა. სატენდერო თანხა 27 460 ლარია.

ანუ ერთ ველოსიპედში „სანდასუფთავება“ მაქსიმუმ 3 398 ლარს გადაიხდის [ტენდერში ფასის კლების ბიჯი 270 ლარია].

ტექნიკური პირობის მიხედვით, ველოსიპედი უნდა იყოს:

• სამბორბლიანი, მრავალფუნქციური [ქარხნული წარმოების], ახალი, ფოლადის კორპუსით და სამუხრუჭე სისტემით;
• ტვირთამწეობა – არანაკლებ 190 კგ.
• გადაცემა: მრუდ მხარეს ვარსკვლავას სიჩქარის თანაფარდობა არის 36 კბილანა წინა დისკისთვის და 20 კბილანა უკანა დისკისთვის.
• დამატებითი აქსესუარები: ხმოვანი სიგნალი (ზარი);  კაბინას სამ მხარეს უნდა გააჩნდეს ამრეკლები;
• ველოსიპედი უნდა იმართებოდეს ჯაჭვისა და პედლების საშუალებით.

ტენდერის პირობის მიხედვით, პრეტენდენტი ვერ გაივლის შერჩევას, თუ ფასების ცხრილში მითითებული არ იქნება მწარმოებელი და წარმოშობის ქვეყანა.

„პრეტენდენტმა უნდა წარმოადგინოს ქარხნული ტექნიკური მახასიათებლები (დამოწმებული მწარმოებლის მიერ), რომლითაც დადასტურდება მოსაწოდებელი საქონლის შესაბამისობა სატენდერო დოკუმენტაციით მოთხოვნილ ტექნიკურ მახასიათებლებთან.

ასევე, პრეტენდენტმა უნდა წარმოადგინოს სსიპ „ლევან სამხარაულის სახელობის სასამართლო ექსპერტიზის ეროვნული ბიუროს“ ან სხვა აკრედიტებული პირის მიერ გაცემული დასკვნა, რომლითაც დადასტურდება მოსაწოდებელი საქონლის შესაბამისობა მოთხოვნილ ტექნიკურ მახასიათებლებთან“, – აღნიშნულია ტენდერის პირობებში.

ტენდერში წინადადებების მიღება დაიწყება 2022 წლის 8 ნოემბერს და 10 ნოემბერს დასრულდება.

გამარჯვებულმა „სანდასუფთავებას“ ველოსიპედები ხელშეკრულების გაფორმებიდან 30 დღეში უნდა მიაწოდოს [მოთხოვნიდან 5 დღეში კი, უნდა წარუდგინოს 1 ცალი ნიმუში].

მტირალას ეროვნული პარკიდან სამაშველო ოპერაციის შედეგად 11 მოქალაქე გამოყვანეს – ინფორმაციას საგანგებო სიტუაციების სამსახური ავრცელებს.

სამსახურის ცნობით, მაშველებმა მდინარე ჩაქვის წყლის ერთ-ერთ შენაკადზე ფორსირებისთვის სპეციალური აღჭურვილობა უმოკლეს დროში დაამონტაჟეს და ადიდებული მდინარის გამო ჩარჩენილი 11 მოქალაქე უსაფრთხო ადგილზე გადმოიყვანეს.

სამაშველო ოპერაციაში საგანგებო სიტუაციების მართვის აჭარის მთავარი სამმართველოს 7 მეხანძრე-მაშველი მონაწილეობდა.

საუდის არაბეთის ხელისუფლებამ გააფრთხილა შეერთებული შტატები, რომ „უახლოეს მომავალში“ ირანი ერაყსა და საუდის არაბეთზე თავდასხმას ამზადებს, რათა თავისი მოსახლეობის ყურადღება შიდა ანტისამთავრობო პროტესტებისგან სხვა პრობლემაზე გადაიტანოს.

სააგენტო „უნიანის“ ცნობით, ამის შესახებ The Wall Street Journal საუდის არაბეთისა და შეერთებული შტატების თანამდებობის პირებზე დაყრდნობით წერს.

როგორც გამოცემა აღნიშნავს, საუდის არაბეთის სამეფომ შეერთებულ შტატებს თავისივე დაზვერვის მიერ მოპოვებულ ცნობებთან ერთად ირანის გეგმების დამადასტურებელი მტკიცებულებებიც გაუგზავნა. ამ შეტყობინების თანახმად, ირანი ამზადებს თავდასხმას როგორც საუდის არაბეთზე, ისე ერაყის ქალაქ ერბილზეც.

The Wall Street Journal-ს დაუდასტურეს, რომ თეთრი სახლის უსაფრთხოების საბჭო ამ ინფორმაციით შეშფოთებულია და მზად არიან, ირანის ქმედებებს უპასუხონ.

„შეშფოთებულები ვართ საფრთხით და მუდმივი კონტაქტი გვაქვს საუდის არაბეთის კოლეგებთან. ეჭვგარეშეა, რომ ვიმოქმედებთ რეგიონში ჩვენი და ჩვენი პარტნიორების ინტერესების დასაცავად,“ – ამბობს გამოცემის ერთ-ერთი წყარო.

ირანმა ჩრდილოეთ ერაყზე თავდასხმები ჯერ კიდევ სექტემბრის ბოლოს დაიწყო. ქვეყანამ ათობით ბალისტიკური რაკეტა და უპილოტო საფრენი აპარატი გაუშვა. ერთ-ერთი მათგანი სწორედ ქალაქ ერბილში განლაგებული ამერიკული სამხედრო ბაზის ძალებმა ჩამოაგდეს.

თეირანი ამ თავდასხმებს იმით ამართლებს, რომ მისი თქმით, ირანში არეულობებს იწვევენ ქურთი სეპარატისტების დაჯგუფებები, რომლებიც თითქოს ქალაქ ერბილში არიან თავმოყრილნი.

პარალელურად, ურთიერთობა ირანსა და საუდის არაბეთს შორის მას შემდეგ დაიძაბა, რაც ოფიციალურმა თეირანმა საუდის არაბეთი, შეერთებული შტატები და ისრაელი ქვეყანაში მიმდინარე ანტისამთავრობო დემონსტრაციების წახალისებაში დაადანაშაულა.

ცემით მოკლეს ირანელი სკოლის მოსწავლე, რომელმაც არ იმღერა ხამენეის მადიდებელი ჰიმნი

See more

ბათუმის ბულვარის ადმინისტრაციის გადაწყვეტილებით, ბულვარში გელა წულაძის ახალ სკულპტურას – „სიყვარული მძიმეა“ დადგამენ.

ესკიზის მიხედვით, ქანდაკების დამზადება-მონტაჟის სამუშაოებს ბულვარი გამარტივებული წესით შეისყიდის და შპს „ლიბერტეს“ 25 000 ლარს გადაუხდის.

ამ კომპანიის მფლობელი და დირექტორი კი თავად გელა წულაძეა. ხარჯთაღრიცხვის დოკუმენტის მიხედვით, 25 ათასი ლარიდან 4 ათასი ლარი საავტორო ჰონორარია.

სკულპტურის დადგმა ბულვარის ადმინისტრაციას გელა წულაძემ 2022 წლის 24 ოქტომბერს შესთავაზა.

ბულვარის დირექტორის მოვალეობის შემსრულებელმა, ლაშა მიქელაძემ კი ბრძანება გამარტივებულ შესყიდვაზე დღეს, 2 ნოემბერს გამოსცა.

ბულვარის ადმინისტრაციამ დღესვე მიმართა სახელმწიფო შესყიდვების სააგენტოსაც, გამარტივებულ შესყიდვაზე თანხმობის მისაღებად.

 „მოქანდაკე გელა წულაძე გახლავთ ბათუმის ბულვარში არსებული რამდენიმე საავტორო ქანდაკების ავტორი, რომლებიც ბულვარის სიმბოლოდ და სავიზიტო ბარათადაა ქცეული. გელა წულაძის „სიყვარულის სერიად“ წოდებული რამდენიმე თანამედროვე სკულპტურა, როგორიცაა: „ვარიაცია სიყვარულზე 1“; „ვარიაცია სიყვარულზე 2“; „ვარიაცია სიყვარულზე 3“; „ყირამალა“ უკვე ათწლეულზე მეტია ამშვენებს ბულვარის ზღვისპირა ზოლს და დიდ მოწონებას იმსახურებს ვიზიტორებში.

ახალი ქანდაკება „სიყვარული მძიმეა“ წარმოადგენს ერთგვარ გაგრძელებას აქამდე არსებული ზემოაღნიშნული ნამუშევრების, რომლებიც გელა წულაძის მიერაა შექმნილი ბულვარის ტერიტორიაზე, შესაბამისად, ახალი ქანდაკების „სიყვარული მძიმეა“ განთავსება კიდევ უფრო მეტად გაამდიდრებს არსებულ ქანდაკებათა ანსამბლს, რომელიც შექმნის ბათუმის ბულვარის ვიზიტორებისთვის კიდევ ერთ ღირსშესანიშნავ სანახაობრივ ატრაქციას. სწორედ ზემოაღნიშნულმა განაპირობა შესყიდვის საჭიროება“, – აღნიშნულია ბულვარის განაცხადში.

გელა წულაძის მიერ ბულვარის ადმინისტრაციაში გაგზავნილ განცხადებაში აღნიშნულია, რომ სკულპტურის დადგმა სასურველია „ბულვარის შიდა ხეივანში, კერძოდ, ნინოშვილის ქუჩის გასწვრივ მდებარე ერთ-ერთ მწვანე სივრცეში“.

—

ბულვარის ადმინისტრაციის ინფორმაციით, გელა წულაძის საავტორო რამდენიმე სკულპტურა, რომლებიც დაზიანებული იყო, ბულვარში უკვე აღდგენილია.

ამავე თემაზე „ბათუმელების“ არქივიდან:

ბათუმის ბულვარი 72 ათას ლარს გადაიხდის 4 ქანდაკების რეაბილიტაციაში

See more

მიუხედავად იმისა, რომ ბათუმში 10-ზე მეტი წელია არსებობს ველობილიკები, იმართება ველომსვლელობები და ველომარათონები, ველოსიპედით გადაადგილება პრაქტიკული დანიშნულებით ბათუმში მოსახლეობის მხოლოდ მცირე ნაწილისთვის არის აქტუალური. მიმდინარე ურბანიზაციისა და მოსახლეობის რაოდენობის ზრდის პარალელურად, ქალაქში გაძლიერდა ზეწოლა ურბანული ტრანსპორტის სისტემებზე, ველოსიპედით მოძრაობა სამანქანო გზაზე არ არის უსაფრთხო, ველობილიკებისა და ტროტუარების დიდი ნაწილი კი ავტომობილების საპარკინგე სივრცედ არის გამოყენებული.

ქალაქის ველოგადაადგილების გენერალური გეგმა ბათუმის საკრებულომ მხოლოდ ახლა, 2022 წლის 31 ოქტომბერს დაამტკიცა.

გეგმის მიზანია „ყველას შეეძლოს ველოსიპედით უსაფრთხოდ და კომფორტულად გადაადგილება ქალაქის ყველა ნაწილში, ყოველდღიური მიზნებისთვის“. მასზე დაახლოებით ერთი წელია მუნიციპალიტეტის, ველომომხმარებელთა ადგილობრივი ჯგუფებისა და არასამთავრობო ორგანიზაციების წარმომადგენლები, გერმანიის ეკონომიკური თანამშრომლობისა და განვითარების ფედერალური სამინისტროს (BMZ) რეგიონული პროგრამის ფარგლებში მუშაობდნენ.

ბათუმში ამჟამად 26 კმ სიგრძის ველოინფრასტრუქტურაა, რომელიც ძირითადად ზღვისპირა პარკისა და ქალაქის ცენტრალურ ნაწილს მოიცავს.

გეგმაში შემოთავაზებულია, ბათუმში 66 კმ სიგრძის პერიფერიული მარშრუტების ქსელის დაგეგმვა, ველოინფრასტრუქტურის დიზაინის პროექტის ჩათვლით. შემოთავაზებული ქსელი მთელ ქალაქს მოიცავს და ეფუძნება დაცული ველობილიკების შემოღებას, რომელთა დახმარებითაც ველოსიპედით მოძრაობის სამანქანო მოძრაობისგან სტრუქტურულად განცალკევებულია. შემოთავაზებული ველოქსელების ღირებულება დაახლოებით 3.1 – 5.2 მილიონი ლარია.

ქსელის არსში უკეთ წვდომის მიზნით, ბათუმის მარშრუტიზებული ქსელი დაყოფილია პირველად და მეორად კატეგორიებად. პირველადი ქსელი არის ბათუმში ველოსიპედის ქსელის განვითარების პირველი და ყველაზე კრიტიკული ეტაპი, ხოლო მეორადი ქსელი შედგება დამატებითი საგზაო კავშირებისაგან, რომლებიც შეიქმნება განხორციელების შემდგომ ეტაპზე.

გეგმის მიხედვით, მთლიანი ქსელის მოწყობისთვის მუშაობა მომავალი წლიდან დაიწყება და ეტაპობრივად 2025-2030 წლებში დასრულდება. დაფინანსებისა და განხორციელების საკითხებზე ბათუმის მერიამ უნდა იმუშაოს.

 

ველოსიპედების უსაფრთხო საპარკინგე ადგილები – იმის გამო, რომ ქალაქში ველოსიპედის საპარკინგე ობიექტების ნაკლებობაა, ველოსიპედის ქურდობა მნიშვნელოვანი პრობლემაა, რის გამოც ველოსიპედები ადამიანებს შეაქვთ შენობებში. საცხოვრებელ კორპუსებში, როგორც წესი, არ არის ველოსიპედის შესანახი სარდაფები ან ღამით ველოსიპედის დაცვის სხვა საშუალებები. გეგმის მიხედვით, 2030 წლისთვის ველოსიპედების უსაფრთხო საპარკინგე ობიექტები ხელმისაწვდომი უნდა იყოს ყველა სათანადო დანიშნულების ადგილზე, ასევე საცხოვრებელ ადგილებში და საცხოვრებელ კორპუსებთან.

ველოსიპედის გაზიარების სერვისის (ბათუმველოს) განახლება – ბათუმში 2011 წელს ამოქმედდა ველოსიპედების გაზიარების მუნიციპალური სისტემა. მის განკარგულებაშია 370 ველოსიპედი და 23 ტერმინალი. მათი უმეტესობა მდებარეობს ქალაქის სანაპირო და ცენტრალურ რაიონებში.  თუმცა 2020 წლიდან სისტემის მუშაობა შეიზღუდა: 370 ველოსიპედიდან უმეტესობა აღარ არის გამოსაყენებლად ვარგისი, ბევრი ტერმინალი მწყობრიდან გამოსულია.

2020 წელს შპს „ბათუმის ავტოტრანსპორტმა“ განახორციელა „ბათუმველოს“ მოდერნიზება. ველოსიპედების გაზიარება და დაბრუნება შესაძლებელია „ბათუმველოს“ 15 სადგურზე. 100 ველოსიპედი აღჭურვილია განახლებული GPS სისტემით. თუმცა ჯერ კიდევ ბევრი ველოსიპედი ძველია, დაზიანებულია ან მწყობრიდან არის გამოსული. გეგმის მიხედვით, დაგეგმილია 2024 წლისთვის ველოსიპედების გაზიარების სქემის გაფართოება მთელ ქალაქში, მაღალი ხარისხის ველოსიპედების შეთავაზების მეშვეობით.

გეგმის მიხედვით, რეკომენდებულია ველოქსელის გაფართოება ბათუმის მუნიციპალიტეტის ფარგლებს გარეთ. განსაკუთრებით აქტუალურია კავშირი ჩრდილოეთით ქობულეთის მუნიციპალიტეტთან (მათ შორის, ჩაქვთან), სამხრეთით სარფისკენ გაგრძელება და აღმოსავლეთით მირვეთის ჩანჩქერის მიმდებარე ბილიკების დაკავშირება.

რეკომენდაციის სახით გეგმაში ჩადებულია, რომ ქალაქში ხშირად მოეწყოს „დღეები მანქანის გარეშე“ (2023-დან), ქალაქის დღეს – ბათუმობაზე ქალაქის ზოგიერთი ნაწილი იქცეს ველოქუჩებად (023).

გენგეგმაში წერია, რომ ვინაიდან არ არსებობს ველოინფრასტრუქტურის დიზაინის ეროვნული რეგულაცია ან არასავალდებულო სახელმძღვანელო დოკუმენტი, ბათუმის მერიამ უნდა შეიმუშაოს დიზაინის ადგილობრივი გაიდლაინი, რომელიც შეიძლება დაეფუძნოს სწორედ ამ გენგეგმაში წარმოდგენილ ინფრასტრუქტურის დიზაინს, ან სხვა საერთაშორისო გაიდლაინებს. მათ შორის არის:

გეგმის მიხედვით, იმისათვის, რომ ველობილიკები გზის არსებულ განზომილებებში მოთავსდეს, ზოგიერთ შემთხვევაში საავტომობილო მოძრაობის ზოლები და პარკირების ადგილები შეიძლება შემცირდეს ზოლების შევიწროების, პარკირების ადგილების რაოდენობის შეზღუდვის ან პარკირების ადგილების სრულად გაუქმების გზით, „ასეთი მიდგომა ეხება მხოლოდ გზებს, სადაც, სულ მცირე, ორი ზოლია და ერთი ზოლის გაუქმება არ ახდენს მნიშვნელოვან გავლენას მოძრაობაზე“; მაგალითად:

საქართველოს ფინანსთა სამინისტროს საგამოძიებო სამსახურის ინფორმაციით გატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, გამოავლინეს უკანონო სამეწარმეო საქმიანობის ცხრა ფაქტი, რაზედაც პასუხისგებაში მისცეს ათი პირი.

„გამოძიებით დადგინდა, რომ ბრალდებულებს, აჭარის რეგიონში, სხვადასხვა ლოკაციაზე კანონდარღვევით მოწყობილი ჰქონდათ სავალუტო პუნქტები, სადაც საქართველოს ეროვნული ბანკის მიერ გაცემული შესაბამისი ნებართვის გარეშე, ახორციელებდნენ სამეწარმეო საქმიანობას.

საგამოძიებო მოქმედებების შედეგად, ჯამში ამოღებულ იქნა 550 000 ლარის ოდენობის ექვივალენტი უცხოური ვალუტა.“ – აცხადებს სამსახური

აღნიშნული სახის დანაშაული ისჯება საქართველოს სისხლის სამართლის კოდექსის 192-ე მუხლის პირველი ნაწილით, თავისუფლების აღკვეთით 1-დან 3 წლამდე ვადით.

2017 წლის ადგილობრივი თვითმმართველობის არჩევნების შემდეგ მომზადებული სარჩელის განხილვას საკონსტიტუციო სასამართლო ხვალ, 2022 წლის 2 ნოემბერს დაიწყებს.

მოსარჩელეები პოლიტიკური ოპოზიციის წარმომადგენლები არიან, რომლებმაც 2018 წლის მაისში მიმართეს საკონსტიტუციო სასამართლოს და ის სამართლებრივი რეგულირება გააპროტესტეს, რომელიც არჩევნებზე დამკვირვებლების უფლებამოსილებას განსაზღვრავს – წინა წლებში ჩატარებულ არჩევნებზე ერთ-ერთ პრობლემად დასახელდა ამომრჩეველთა ნების კონტროლი, მათ შორის, პოლიტიკური პარტიების, ან რეალურად მათთან დაკავშირებული დამკვირვებლების მხრიდან.

„2017 წლის 21 ოქტომბერს ჩატარებული მუნიციპალიტეტის წარმომადგენლობითი ორგანოს – საკრებულოს და თვითმმართველი ქალაქის/თვითმმართველი თემის მერის მორიგი არჩევნები ჩატარდა ამომრჩეველზე ტოტალური კონტროლის პირობებში.

ამომრჩევლის ნებაზე კონტროლი გამოიხატებოდა სისტემურად: ყველა საარჩევნო უბანზე, კენჭისყრის ოთახში რეგისტრატორი კომისიის წევრის გვერდით, უკან ან ნაკადის მომწესრიგებელთან საარჩევნო სუბიექტის – „ქართული ოცნება – დემოკრატიული საქართველოს“ წარმომადგენლების დგომით, რომლებიც რეგისტრატორის სამაგიდო სიიდან ახორციელებდნენ უბანზე მოსული და არმისული ამომრჩევლის მონაცემების ამოღებას, მათ ვინაობას და ამომრჩევლის სიაში რეგისტრაციის ნომერს და სურვილის შემთხვევაში მათ პირად ნომერსაც. აღნიშნულზე არ რეაგირებდნენ საუბნო საარჩევნო კომისიის თავმჯდომარეები, პირიქით, ხელს უწყობდნენ მათ, რადგან ისინი ერთ „ორგანიზმად“ განიხილებოდნენ.

ამომრჩევლის ნებაა ის, რომ გამოცხადდეს არჩევნებზე და მისივე ნებაა ასევე ის, რომ არ გამოცხადდეს არჩევნებზე, შესაბამისად, მათი იდენტიფიცირება და არგამოცხადებული ამომრჩევლების დადგენა, მათი იძულებითი გამოცხადების მიზნით წარმოადგენს ამომრჩევლის ნებაზე კონტროლს. ამომრჩევლის ნებაზე კონტროლი არ უნდა იქნას გაგებული გაღარიბებული მნიშვნელობით და არ უნდა იქნას დაყვანილი მხოლოდ საარჩევნო კაბინაში კონტროლზე,“ – აღნიშნულია სარჩელში.

მოსარჩელეები არიან:„ერთიანი ნაციონალური მოძრაობა“, „სამოქალაქო პლატფორმა – ახალი საქართველო“, „საქართველოს რესპუბლიკური პარტია“, „თავისუფლება – ზვიად გამსახურდიას გზა“, „საქართველოს ევროპელი დემოკრატები,“ „ქრისტიან-დემოკრატიული მოძრაობა,“ „ეროვნულ-დემოკრატიული მოძრაობა“, „აპრიორი“, „სამართალდამცავთა რეფორმირების ცენტრი“.

მოსარჩელეები პრაქტიკულად აღწერენ არჩევნების დღეს, როცა დამკვირვებლების მხრიდან ჩარევაზე საჩივრები დაწერეს, თუმცა მათი შეფასებით, ცესკოს მაშინდელმა თავმჯდომარე თამარ ჟვანიამ პირიქით ხელი შეუწყო ამომრჩევლის ნების კონტროლს.

„…ხსენებულზე რეაგირებისა და აღკვეთის ნაცვლად, ამ პროცესს ხელი შეუწყო კენჭისყრის მიმდინარეობის პერიოდში ცესკოს თავმჯდომარის, თამარ ჟვანიას საჯარო, სატელევიზიო განცხადებამ, რამაც წაახალისა გამოცხადებული და არგამოცხადებული ამომრჩეველთა კონტროლი მმართველი პარტიის მხრიდან. ცესკოს თავმჯდომარის ჟვანიას სატელევიზიო განცხადების ტექსტი მმართველმა პარტიამ მოკლე ტექსტური შეტყობინებების სახით დაუგზავნა საუბნო საარჩევნო კომისიის თავმჯდომარეებს და სახელმძღვანელო მითითებად დაუდგინა ის… შედეგად, კენჭისყრის მთელი დღის განმავლობაში ვერ აღიკვეთა და ვერ შეეშალა ხელი ამგვარი უკანონო კონტროლს ამომრჩეველზე“, – ვკითხულობთ სარჩელში.

მოსარჩელეების მტკიცებით, დამკვირვებლის ეს როლი ამომრჩევლის ნების კონტროლის სქემის ნაწილად იქცა:

„…ინტერესი გახლდათ როგორც უბანზე მისული ამომრჩევლის რაოდენობის, ასევე (უფრო მეტად) უბანზე მოსული ამომრჩევლების ვინაობის დადგენა და ამ ინფორმაციაზე დაყრდნობით ამომრჩევლის ნებაზე კონტროლი, რაც გამოიხატა უბნებზე გამოცხადებული ამომრჩევლის აღრიცხვაში და არმისული ამომრჩევლის იდენტიფიცირებაში, რომლის შედეგადაც სახელისუფლო პარტიამ გააკეთა მათი მობილიზება და არჩევნებზე იძულებით მიყვანა, კონკრეტული პირებისთვის სხვადასხვა მნიშვნელოვან ფაქტორებზე პედალირებით – ამომრჩევლის ან მისი ოჯახის წევრის სამსახურიდან გათავისუფლების, სოციალური შემწეობის მოხსნის, პრობაციონერი პირის დაშინების და სხვა.

საკონსტიტუციო სასამართლოსთვის მიმართვამდე მოსარჩელეებს მიუმართავთ საერთო სასამართლოებისთვის, „თუმცა ყველა ინსტანციამ ყოველგვარი განმარტების გარეშე, ხსენებულ ნორმაზე მშრალი მითითებით გაამართლა პარტიული წარმომადგენლის მხრიდან ამომრჩევლის პერსონალური მონაცემების სამაგიდო სიიდან ამოღების, საუბნო კომისიაში არმისული და მისული ამომრჩევლების კონტროლი,“ – წერდნენ მოსარჩელეები 4 წლის წინ მომზადებულ სარჩელში.

მოსამართლეებმა საკონსტიტუციო სასამართლოს შეახსენეს თავად საკონსტიტუციოს მანამდე შემუშავებული განმარტება: „არჩევნები არის ერთგვარი ინსტიტუციური მექანიზმი, რომელსაც მოქმედებაში მოჰყავს დემოკრატია.“

პოლიტიკური ოპოზიციის მოსაზრებით, საკანონმდებლო რეგულირება იმგვარად უნდა მოეწყოს, რაც თვითნებობას გამორიცხავს. „ბუნდოვანი და გაუგებარი კანონმდებლობა ქმნის ნოყიერ ნიადაგს თვითნებობისთვის. შესაბამისად, კანონმდებელმა მაქსიმალურად მკაფიო, განსაზღვრული ნორმატიული რეგულირებით უნდა შეამციროს თვითნებობის რისკები სამართალშეფარდების პროცესში“, – დასძენენ მოსარჩელეები.

რატომ იწყებს 2018 წელს შეტანილი სარჩელის განხილვას საკონსტიტუციო სასამართლო 4 წლის შემდეგ? – სასამართლოს პრესცენტრში ამ საკითხზე განმარტება ვერ მოგვაწოდეს.