დიდი ბრიტანეთის დაზვერვის შეფასებით, კერძო სამხედრო კომპანია „ვაგნერის“ მფლობელი ევგენი პრიგოჟინი რუსეთის ნაციონალური უსაფრთხოების სისტემაში საკუთარი ავტორიტეტის გამყარებას ცდილობს.
„ბოლო ორ თვეში, პრიგოჟინი აღარ უარყოფს თავის კავშირს „ვაგნერთან“, ღია და საჯარო განცხადებებს აკეთებს,“ – აღნიშნავს უწყება 2 ნოემბრის რელიზში.
დაზვერვა იხსენებს პრიგოჟინის 23 ოქტომბრის განცხადებას, რომელშიც ის ადასტურებდა, რომ მისი დაჯგუფების ძალების წინსვლის მაჩვენებელი უკრაინაში დღეში 100-200 მეტრია, რაც მისივე თქმით „თანამედროვე ომისთვის სრულიად ნორმალურია“.
„მათი სამხედრო დოქტრინის თანახმად, რუსეთის არმია დღეში 30 კმ-ით და მეტით წინსვლას გეგმავს. ჯერ კიდევ თებერვალში რუსეთი თვის განმავლობაში უკრაინაში 1000 კმ-ით წინსვლას აპირებდა,“ – წერს უწყება და მიუთითებს, რომ პრიგოჟინის მონაცემების საპირისპიროდ, სექტემბერში უკრაინის არმია დღეში დაახლოებით 20 კმ-ით მიიწევდა წინ.
ევგენი პრიგოჟინის ამბიციების შესახებ არაერთხელ წერდა ომის კვლევის ამერიკული ინსტიტუტიც (ISW), რომლის ანალიტიკოსების შეფასებითაც, „ვაგნერის“ მფლობელი და „პუტინის მზარეულად“ წოდებული ოლიგარქი პოლიტიკურ ძალად ყალიბდება და საფრთხეს უქმნის პუტინის ძალაუფლებას.
გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. დაზვერვის გუშინდელი რელიზის ყურადღების ცენტრში ბელარუსის ტერიტორიაზე განლაგებული გამანადგურებელი თვითმფრინავები და ბალისტიკური რაკეტები იყო. ამ შეიარაღებას, უწყების შეფასებით, რუსეთი ბელარუსში დასავლეთის დასანახად ინახავს.
