ბათუმის მესამე საჯარო სკოლაში ეკოსკოლების საერთაშორისო პროგრამის მონაწილეები შვედეთის სამეფოს სრულუფლებიან ელჩს საქართველოში ულრიკ ტიდესტრომს და აჭარის განათლების, კულტურისა და სპორტის მინისტრს მაია ხაჯიშვილს შეხვდნენ.
ეკოსკოლების საერთაშორისო პროგრამა უკვე მეორე წელია შვედეთის მთავრობის მხარდაჭერით, გარემოსდაცვითი ორგანიზაციის – „დავიცვათ საქართველოს სისუფთავე“ – მიერ ხორციელდება საქართველოში.
პროგრამა გულისხმობს სასწავლო მასალების შექმნის პარალელურად, სკოლის მოსწავლეების და მასწავლებლების წახალისებას, გახდნენ გარემოსდაცვითი ცოდნის გადამცემები და ამ თემის ირგვლივ სხვადასხვა სასარგებლო აქტივობა და პროექტი დაგეგმონ.
შეხვედრაზე ბათუმის მესამე საჯარო სკოლის მოსწავლეებმა წარმოადგინეს ის შედეგები, რასაც ეკოსკოლების პროექტის ფარგლებში მიაღწიეს, ისაუბრეს იმ გამოწვევებზე, რაც გარემოსდაცვითი კუთხით არსებობს და გადაწყვეტის გზები, ახალი იდეები გაუზიარეს სტუმრებს.
ეკოსკოლების პროგრამა ეფუძნება შვიდსაფეხურიან მეთოდოლოგიას, რომლის ფარგლებში თითოეული სკოლა ირჩევს მდგრადი განვითარების მიზნებთან დაკავშირებულ თემას და შესაბამის აქტივობებს ახორციელებს. შვიდივე საფეხურის წარმატებით გავლის შემდეგ კი სკოლას „მწვანე დროშის“ მისაღებად განაცხადის გაკეთების შესაძლებლობა ეძლევა, რითაც საქართველოს ეკოსკოლების მსოფლიო რუკაზე მის კუთვნილ ადგილს დაუმკვიდრებს.
ეკოსკოლების პროგრამა მთელი მსოფლიოს მასშტაბით გარემოსდაცვითი განათლების ფონდის წევრ 80-ზე მეტ ქვეყანას და მილიონობით მოსწავლეს და მასწავლებელს აერთიანებს.