ირანის ხელისუფლება რუსეთისთვის დაახლოებით 1000 ერთეული იარაღის გასაგზავნად ემზადება, კერძოდ ლაპარაკია „მიწა-მიწის“ ტიპის ახლო მანძილზე მოქმედ ბალისტიკურ რაკეტებზე და უპილოტო საფრენ აპარატებზე – ინფორმაციას დასავლელ ჩინოვნიკებზე დაყრდნობით CNN ავრცელებს.
CNN-ის წყაროები ამბობენ, რომ ირანის მომავალ გზავნილს ყურადღებით დააკვირდებიან, რადგან ეს იქნება პირველი შემთხვევა, როდესაც თეირანი მოსკოვს უკრაინასთან ომში გამოსაყენებლად მოწინავე მაღალი სიზუსტის მართვად რაკეტებს აწვდის.
ერთ-ერთი წყაროს ცნობით, რუსეთი ტვირთს წლის ბოლოსთვის მიიღებს.
მანამდე ამ თვეში, ჯონ კირბიმ, აშშ-ის უსაფრთხოების საბჭოს კომუნიკაციების კოორდინატორმა განაცხადა, რომ უკრაინაში ირანელი ინსტრუქტორების ყოფნა კონფლიქტში თეირანის პირდაპირ ჩართულობაზე მიუთითებს.
„ჩვენ შეგვიძლია დავადასტუროთ, რომ რუსი სამხედროები, რომლებიც ბაზირებული არიან ყირიმში, მართავენ ირანულ უპილოტო საფრენ აპარატებს და იყენებენ მათ მთელი უკრაინის ტერიტორიაზე, მათ შორის კიევზე დარტყმებისთვის,“ – განაცხადა კირბიმ.
შეერთებული შტატები „ეძებს გზებს, რა შეიძლება გააკეთოს, არამხოლოდ სანქციებით“, რომ როგორმე ხელი შეუშალოს ირანული შეიარაღების რუსეთისთვის მიწოდებას – თქვა ტონი ბლინკენმა, შეერთებული შტატების სახელმწიფო მდივანმა გასულ კვირას და დასძინა, რომ შტატები ცდილობს „ეს ქსელი დაშალოს“.
თუმცა, როგორც CNN აღნიშნავს, ბუნდოვანია, რამდენად მოახერხებს შეერთებული შტატები შეაჩეროს რუსეთისთვის იარაღის მიწოდება.
ირანული წარმოების ლეტალურ აპარატებს რუსეთი უკრაინაში განსაკუთრებით აქტიურად ბოლო პერიოდში იყენებს. 10 ოქტომბრიდან დაწყებულ მასობრივ სარაკეტო და საავიაციო თავდასხმებში მთავარი როლი სწორედ „შაჰედებს“ აქვთ.
რუსეთისთვის ირანული დრონების გადაცემის შესახებ ცნობილი პირველად აგვისტოში გახდა. 11 ოქტომბერს უკრაინის პრეზიდენტმა ვოლოდიმირ ზელენსკიმ განაცხადა, რომ რუსეთმა ირანს დამატებით 2 400 კამიკაძე-დრონი შეუკვეთა.
18 ოქტომბერს დაზვერვის სამსახურებზე დაყრდნობით, სააგენტო Reuters-მა გაავრცელა ინფორმაცია, რომ ირანი რუსეთისთვის დრონების გარდა ბალისტიკური რაკეტების გადაცემასაც აპირებდა.
ოფიციალურმა თეირანმა რუსეთისთვის დრონების მიწოდება არაერთხელ უარყო, თუმცა როგორც უკრაინის საგარეო საქმეთა მინისტრმა, დმიტრო კულებამ განაცხადა, უკრაინა მზადაა წარუდგინოს ევროკავშირის ქვეყნებს მტკიცებულებები, რომლებიც თეირანისგან მოსკოვისთვის კამიკაძე-დრონების მიწოდებას დაადასტურებს.
