აშშ-ის ომის კვლევის ინსტიტუტი (ISW) მიიჩნევს, რომ „ვაგნერის“ დამფუძნებელი რუსი ბიზნესმენი, „პუტინის მზარეულად“ წოდებული ევგენი პრიგოჟინი პოლიტიკურ ძალად ყალიბდება.
როგორც დღევანდელ ანგარიშში ISW აღნიშნავს, პრიგოჟინი კვლავაც ცდილობს თავისი სტატუსის ამაღლებას რუსულ ელიტაში. 31 ოქტომბერს მან „ვაგნერის“ სანკტ-პეტერბურგის ცენტრის შექმნის შესახებ გამოაცხადა.
„უცნობია, შექმნის თუ არა ევგენი პრიგოჟინი საკუთარ პარტიას, თუმცა ის ნამდვილად ყალიბდება პოლიტიკურ ძალად და „ვაგნერთან“ თავის კავშირს ელიტურ წრეებში ოპონენტების კრიტიკისა და საკუთარი ავტორიტეტის ინსტიტუციონალიზაციისთვის იყენებს,“ – წერენ ინსტიტუტის ანალიტიკოსები.
ისინი მიუთითებენ, რომ პრიგოჟინი ღიად აკრიტიკებს რუს ოლიგარქებს და ელიტას იმის გამო, რომ ისინი კომფორტში ცხოვრობენ და სრულ მობილიზაციას ხელს უშლიან.
ინსტიტუტის დღევანდელი ანგარიშის სხვა თემები უკრაინის ქალაქების მორიგ დაბომბვას და საბრძოლო მოქმედებებს შეეხება.
ექსპერტების აზრით, თავდასხმის გუშინდელი ტალღის მიზანი კვლავაც უკრაინელი ხალხის დაშინება და მკაცრი ზამთრის ფონზე, მათი ბრძოლისუნარიანობის შესუსტებაა.
„რუსეთის ძალებმა 50-ზე მეტი Х-101 და Х-555 ტიპის რაკეტა გაუშვეს კასპიის ზღვის ჩრდილოეთ მხრიდან და ვოლგოდონსკის რაიონიდან. ამ რაკეტების სამიზნე უკრაინის კრიტიკულად მნიშვნელოვანი ენერგოობიექტები იყო,“ – წერს ISW.
ISW-ის ანგარიშის სხვა მთავარი მიგნებები:
- რუსეთის ძალების მორიგმა მასირებულმა სარაკეტო და საავიაციო შეტევამ კიევი და სხვა ქალაქები ნაწილობრივ ელექტროენერგიისა და წყლის გარეშე დატოვა;
- საოკუპაციო ძალებმა აცხადებენ, რომ ოლქიდან ევაკუაციის მასშტაბებს აფართოებენ, რადგან უკრაინა კახოვკის ჰესზე აფეთქებას გეგმავს;
- რუსეთის ძალები განაგრძობდნენ დნეპრის დასავლეთ სანაპიროდან გასვლას;
- რუსეთის თავდაცვა საშემოდგომო გაწვევის ფონზე არწმუნებს მოსახლეობას, რომ სავალდებულო სამხედრო სამსახურის ახალწვეულებს უკრაინაში არ გაგზავნიან;
- რუსეთის საოკუპაციო ძალებმა ხერსონის ოლქში განაცხადეს, რომ რუსულ რუბლთან ერთად უკრაინული გრივნის გამოყენებასაც დაუშვებენ.
