ნეტგაზეთი • RU

ჩხუბის მონაწილე ბავშვები სხვა სკოლებში გადავიდნენ, რამდენიმეს კი სასარგებლო შრომა დაეკისრა

ბათუმის მე-8 საჯარო სკოლაში მომხდარი ჩხუბის შემდეგ, კონფლიქტში მონაწილე მოსწავლეები სხვადასხვა სკოლაში გადავიდნენ.

როგორც სკოლის დირექტორმა, გივი ხალვაშმა „ბათუმელებს“ უთხრა, ეს მშობლების გადაწყვეტილება იყო და სკოლის მხრიდან რაიმე იძულებას ადგილი არ ჰგონია.

„თვითონ მშობლებმა გადაწყვიტეს სხვა სკოლაში გადაყვანა, სკოლა არ ჩავრეულვართ ამაში. დაზარალებული ბავშვი ქალაქის სხვა სკოლაში გადავიდა, მეორე კი, ვისაც თანაკლასელის ცემას ედავებიან, ქედის ერთ-ერთი სოფლის სკოლაში გადავიდა“, – გვეუბნება დირექტორი.

დირექტორს ვკითხეთ, როგორი იყო კონფლიქტში მონაწილე ბავშვების ფსიქოლოგიური მდგომარეობა და თუ იმუშავა ვინმემ მათთან?

გივი ხალვაშის თქმით, მას შემდეგ, რაც ბავშვებმა იჩხუბეს, არცერთი მოსწავლე სკოლაში აღარ დაბრუნებულა. „ფსიქოლოგმა მხოლოდ კლასთან იმუშავა, კონფლიქტში მონაწილე მოსწავლეებს კი ადმინისტრაცია აღარ შეხვედრია.

ჩემთვის რომ ეკითხათ, სკოლისთვის უკეთესი იყო ეს ბავშვები დაბრუნებულიყვნენ სკოლაში, ჩვენ გვემუშავა მათთან და დაგვეყენებინა სწორ გზაზე. მაგრამ რადგან მშობლებმა გადაწყვიტეს გადაყვანა, მათ წინააღმდეგ ხომ ვერ წავიდოდით“, – ამბობს დირექტორი.

მისი თქმით, ზოგადი განათლების კანონით, ყველაზე მკაცრი ღონისძიება, რომელსაც დისციპლინური საბჭო ბავშვებთან მიმართებაში იღებს, სკოლიდან გარიცხვაა, თუმცა ამავე კანონით, სკოლიდან გარიცხულ მოსწავლეს უფლება აქვს სხვა სკოლაში გააგრძელოს სწავლა.

„სკოლის დისციპლინურმა საბჭომ იმსჯელა რამდენიმე ბავშვზე, რომლებიც ჩხუბის დროს, იქ ადგილზე იმყოფებოდნენ და მათ საზოგადოებისთვის სასარგებლო შრომა დაუწესეს“, – გვეუბნება დირექტორი.

მოზარდებს შორის კონფლიქტი ერთ-ერთ გაკვეთილზე დაიწყო და სკოლის გარეთ გაგრძელდა. ჩხუბის შედეგად ერთ-ერთმა ბავშვმა მძიმე დაზიანება მიიღო, რის შემდეგაც ის საავადმყოფოში გადაიყვანეს.

ფაქტზე პოლიციამ გამოძიება ძალადობის მუხლით დაიწყო. ჩხუბში 20-ზე მეტი პირი მონაწილეობდა.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com