აშშ-ის ხელისუფლებას უკვე გადაეცა უკრაინისთვის განკუთვნილი ჰაერსაწინააღმდეგო თავდაცვის ორი სისტემა NASAMS-ი. კომპლექსებს კიევი უახლოეს მომავალში მიიღებს.
„ჩვენ ჩავაბარეთ NASAMS-ის ორი სისტემა ხელისუფლებას რამდენიმე კვირის წინ. ისინი უკვე მალე იქნება უკრაინაში,“ – უთხრა მწარმოებელი კომპანიის (Raytheon Technologies) დირექტორმა გრეგ ჰეისმა ტელეკომპანია CNBC -ს. – „ეს არის საჰაერო თავდაცვის ახლო მანძილზე მოქმედი სისტემა და მას შეუძლია ჩამოაგდოს ყველაფერი, რაც ცაშია – დრონები, ბალისტიკური რაკეტები თუ გამანადგურებელი თვითმფრინავები“.
NASAMS – ეს არის გადასატანი საზენიტო-სარაკეტო კომპლექსი, რომელიც განკუთვნილია დაბალ და საშუალო სიმაღლეზე მყოფი საჰაერო სამიზნეებისთვის, როგორებიცაა: რაკეტები, თვითმფრინავები თუ დრონები. კომპლექსი ნორვეგიულმა Norwegian Kongsberg-მა და ამერიკულმა Raytheon-მა შექმნეს.
სისტემის თავისებურებები:
- მოქმედების მანძილი – 2,5-დან 40 კილომეტრამდე;
- მოქმედების სიმაღლე – 30 მეტრიდან 16 კილომეტრამდე;
- რეაგირების დრო – 10 წამი.
მას შემდეგ, რაც 10 ოქტომბერს რუსეთის ფედერაციამ უკრაინის ქალაქების მასობრივი დაბომბვა დაიწყო, შეერთებულ შტატებში განაცხადეს, რომ კიევი ჰაერსაწინააღმდეგო თავდაცვის თანამედროვე სისტემებს მიიღებდა. მაშინ აშშ-ის ხელისუფლებას შეიარაღების გადაცემის ვადები არ დაუსახელებია, თუმცა პირობა დადო, რომ ეს რაც შეიძლება მალე მოხდებოდა.
14 ოქტომბერს უკრაინის თავდაცვის მინისტრმა, ოლექსი რეზნიკოვმა განაცხადა, რომ NASAMS-ის პირველი სისტემები უკრაინაში უკვე ოქტომბრის ბოლოს ჩავა.
კიდევ რა ჰაერსაწინააღმდეგო თავდაცვის შეიარაღებას მიიღებს უკრაინა:
სააგენტო Reuters-ის ინფორმაციით, ბაიდენის ადმინისტრაცია უკრაინისთვის HAWK-ის ტიპის ჰაერსაწინააღმდეგო თავდაცვის სისტემების გადაცემას განიხილავს.
უკრაინული მედიის ცნობით, დაახლოებით ორი კვირის წინ ცნობილი გახდა, რომ ესპანეთი უკრაინაში HAWK-ის ოთხ სისტემას გაგზავნის.
AMRAAM-ის „ჰაერი-ჰაერის“ ტიპის საშუალო მანძილზე მოქმედ რაკეტებს მიაწვდის უკრაინას დიდი ბრიტანეთი. ეს რაკეტები გამოიყენება ჰაერსაწინააღმდეგო თავდაცვის სისტემა NASAMS-ისთვის, რომლებსაც უკრაინას შეერთებული შტატებისგან მიიღებს.
ჰაერსაწინააღმდეგო თავდაცვის გასაძლიერებლად კიევს 15 მილიონი ევროს ღირებულების რაკეტებს გაუგზავნის ნიდერლანდები.
უკრაინაში უკვე ჩავიდა გერმანული სარაკეტო საზენიტო კომპლექსი IRIS-T, რომელმაც უკრაინის შეიარაღებული ძალების ინფორმაციით „საბრძოლო ნათლობაც“ გაიარა და რუსეთის არმიის ბოლოდროინდელი თავდასხმების დროს ეფექტიანად იმუშავა.
მთავარ ფოტოზე: ჰაერსაწინააღმდეგო თავდაცვის სისტემა NASAMS/ფოტო: Kongsberg