მოქალაქე გიორგი რომანოვსკი ამბობს, რომ მას ბათუმის მერიაში შეურაცხყოფა მიაყენეს. მისი თქმით, ის ბათუმის მერიაში კონკრეტული საქმის გამო მივიდა, სადაც სამუშაო საათებში საჯარო მოხელეები ნასვამ მდგომარეობაში დახვდნენ.
„მივედი მერიაში, გარე რეკლამასთან დაკავშირებით რაღაც დეტალების გარკვევას ვაპირებდი და შევედი ერთ-ერთ კაბინეტში, სადაც რამდენიმე ადამიანი დამხვდა. ვისკი ჰქონდათ მაგიდაზე და სვამდნენ.
ხელმძღვანელი სად არის-მეთქი ვიკითხე და „ცისფერი მთები“ ხომ გახსოვთ ფილმი, იქ რომ ეუბნებიან „შვებულებაშია, მაგრამ დაელოდეთ“, ასე მიპასუხეს დაახლოებით, „წასულია, ლექციებზეა და დაელოდეთ“. არ მითხრეს, როდის მოვა ან საერთოდ მოვა თუ არა.
ვუთხარი – „რა კარგია ვისკი, რა კარგი ცხოვრება გაქვთ“, ადმინისტრაციულ შენობაში ასეთი რამ შეიძლება ხდებოდეს-მეთქი? ამან ისინი გააღიზიანა. რამე არ მოგწონთ? თუ არ მოგწონთ, მიბრძანდით თქვენს რუსეთში ან თქვენს ისრაელშიო, მითხრეს.
მე დედა მყავს ებრაელი და ამიტომ მითხრეს. რას ნიშნავს „მიბრძანდი აქედან“. ვფიქრობ, ასეთი დამოკიდებულება საჯარო მოხელისგან შეურაცხმყოფელია.
მე შეიძლება ახლა რუსეთში ვცხოვრობ, მაგრამ აქაური ვარ, აქ ვცხოვრობდი წლების განმავლობაში. ადმინისტრაციულ შენობაში სვამენ და კიდევ აქეთ მასწავლიან როგორ მოვიქცე? თუკი მერმა მის სამსახურებში ვერ მოაგვარა საქმე, ქალაქში როგორ მოაგვარებს, როგორ მიიყვანა საქმე აქამდე“, – ამბობს გიორგი რომანოვსკი.
მან დღევანდელი ინციდენტის გამო არჩილ ჩიქოვანის სახელზე განცხადებაც დაწერა: „ასეთი დამოკიდებულება ანტისემიტური და არატოლერანტული გარემოს ჩამოყალიბებას შეუწყობს ხელს მერიაში“ – აღნიშნულია განცხადებაში.
„ბათუმელები“ მერიას დაუკავშირდა და ჰკითხა, ჰქონდა თუ არა მსგავს შემთხვევას ადგილი მერიაში. მერიის პრესსამსახურში გიორგი რომანოვსკის მერიაში ყოფნა დაადასტურეს, თუმცა არ ადასტურებენ მერიის თანამშრომლებისგან მისი შეურაცხყოფის ფაქტს.
„ეს ადამიანი ნამდვილად იმყოფებოდა მერიის არქიტექტურის სამსახურში. მას ჰქონდა სურვილი, რომ შეხვედროდა ერთ-ერთი სამსახურის თანამშრომელს, რომელიც არ იმყოფებოდა ადგილზე, რადგან სალექტორო საქმიანობით არის პარალელურად დაკავებული.
უთხრეს, რომ ხუთშაბათობითაა მოქალაქეთა მიღება და მოსულიყო ამ დღეს, რამაც გამოიწვია ამ ადამიანის გაღიზიანება და შეურაცხყოფა მიაყენა იმ მყოფ ქალებს“, – გვითხრეს მერიის პრესსამსახურში.
რაც შეეხება სამუშაო საათებში მერიის შენობაში ალკოჰოლის მიღებას, პრესსამსახურში ამ ფაქტს არ ადასტურებენ და ამბობენ, რომ „ეს არის ცილისწამება და არ შეესაბამება სინამდვილეს“.
