ბულვართან მრავალსართულიანი სასტუმროს აშენებას გეგმავენ, ბათუმის საკრებულო გდგ-ს ამტკიცებს 

ბათუმის საკრებულოს მომავალ სხდომაზე რუსთაველის #20-ში დაგეგმილი სამშენებლო პროექტის გდგ-ს [განაშენიანების დეტალური გეგმა] დამტკიცებას გეგმავენ. 31 ოქტომბერს დაანონსებულ სხდომაზე ამ საკითხის შესაძლო დამტკიცების შესახებ „ბათუმელებმა“ მხოლოდ მას შემდეგ გაიგო, როცა ბათუმის საკრებულოს ფეისბუქის გვერდზე ინფრასტრუქტურის კომისიის სხდომის გამართვის შესახებ გამოაქვეყნეს.

თუმცა, სხდომის დღის წესრიგში, რომლის წინასწარ გამოქვეყნების ვალდებულებაც საკრებულოს აქვს, მხოლოდ ექვსი საკითხია და ამ საკითხებს შორის რუსთაველის ქუჩაზე, #20-ში გდგ-ს შესაძლო დამტკიცების შესახებ არაფერი წერია.

მართალია, საკრებულოს აქვს შესაძლებლობა რამდენიმე საკითხი ეგრეთ წოდებულ „სხვადასხვა“-ში გააერთიანოს, თუმცა პირველად არ ხდება, როცა ქალაქისთვის მნიშვნელოვანი საკითხების კონკრეტულ სხდომაზე შესაძლო განხილვის შესახებ დაგვიანებით ვიგებთ.

უფრო მეტიც, საკრებულოს დღის წესრიგში არ იძებნება ინფორმაცია კიდევ ერთი მნიშვნელოვანი პროექტის შესახებ, რაც მერიისა და საკრებულოს თანამდებობის პირებისა და საჯარო მოხელეებისთვის ხელფასების გაზრდას გულისხმობს. ეს ყველაფერი საკრებულოს წევრებს დამატებითი საკითხების სახით მიწოდეს.

• რას ითვალისწინებს დასამტკიცებელი განაშენიანების დეტალური გეგმა [გდგ], რუსთაველის #20-ში?

საკრებულოს განკარგულების პროექტის განმარტებითი ბარათის მიხედვით, რუსთაველის #20-ში რვასართულიანი სასტუმროს მშენებლობა იგეგმება და ამისთვის მშენებელი k2 კოეფიციენტის გაზრდასაც ითხოვს.

განმარტებით ბარათში მერია წერს, რომ პროექტი მისი არქიტექტურული ვიზუალიდან და ქალაქგეგმარებითი მნიშვნელობიდან გამომდინარე მოცემული ადგილის განვითარებას უზრუნველყოფს.

„დაინტერესებული პირი განმარტავს, რომ პროექტირების განხორციელების მთავარი მიზანი არის აღნიშნული კვარტლის არქიტექტურული იერ-სახის სრულყოფა და არსებული ამორტიზებული შენობის ნაცვლად ახალი ესთეტიკური ვიზუალის მქონე სასტუმროს მშენებლობა“, – წერს მერია განმარტებით ბარათში.

სამშენებლოდ მოაზრებული ტერიტორია სასტუმრო „ინტურისტს“ ესაზღვრება, რომელიც კულტურული მემკვიდრეობის ძეგლია. პროექტის რენდერის მიხედვით, რომელიც ზონალური საბჭოს სხდომაზე იყო წარდგენილი განსახილველად, მშენებლობას  რუსთაველის ქუჩაზე მდებარე ორსართულიანი შენობის ადგილას იგეგმება, სადაც 1840-1921 წლებში ბრიტანეთის საკონსულო ფუნქციონირებდა.

ბათუმი, რუსთაველის #20 – გასულ წელს მერიას ამ შენობის დემონტაჟის მოთხოვნითაც მიმართეს, თუმცა მაშინ არჩილ ჩიქოვანმა განმცხადებელი უარით გაისტუმრა.

გასათვალისწინებელია ისიც, რომ სამშენებლო ტერიტორია ძეგლის დაცვის ზონაშია. როგორც ჩანს, ჯერ კულტურული მემკვიდრეობის დაცვის სააგენტოს გადაწყვეტილება არ მიუღია, დათანხმდება თუ არა რუსთაველის #20-ში მშენებლობას არსებულის ისტორიული შენობის დემონტაჟის ხარჯზე.

განკარგულების პროექტში, რომელიც საკრებულომ უნდა დაამტკიცოს ნათქვამია: „წინამდებარე განკარგულება ძალაში შევიდეს აჭარის ავტონომიური რესპუბლიკის კულტურული მემკვიდრეობის დაცვის სააგენტოს გადაწყვეტილების შემდეგ.“

წესით, ჯერ სააგენტოს უნდა მიეღო გადაწყვეტილება, თუმცა მერია რატომღაც ჩქარობს.

ვნახოთ, რას გადაწყვეტს საკრებულო – ეს 31 ოქტომბერს დაგეგმილ სხდომაზე გამოჩნდება.

რუსთაველის #20 ში მდებარე შენობები და მიწის ნაკვეთი – 1043 კვ.მეტრი შპს „ორაქსის“ საკუთრებაა. ამ  კომპანიის 100 პროცენტს შპს „ანურია“ ფლობს.