რუსეთი ბალისტიკურ რაკეტებს ბელარუსში დასავლეთის დასანახად ინახავს – ბრიტანეთის დაზვერვა

დიდი ბრიტანეთის დაზვერვის უახლესი რელიზის ყურადღების ცენტრში ბალისტიკური რაკეტებია, რომლებსაც უწყების ვარაუდით, რუსეთი ბელარუსის ტერიტორიაზე ინახავს.

ამის დასტურად დაზვერვას სატელიტური გამოსახულება მოჰყავს.

„ფოტოებზე ჩანს, რომ ორი გამანადგურებელი MiG-31K FOXHOUND თვითმფრინავი 17 ოქტომბერს ბელარუსში, მაჩულიშჩის აეროდრომზე იდგა. იქვე, სიახლოვეს, დამცავი მიწაყრილის ქვეშ ინახებოდა დიდი კონტეინერი.

სავარაუდოდ, კონტეინერი განკუთვნილია საჰაერო ბაზირების ბალისტიკური რაკეტისთვის, AS-24 KILLJOY, რომელიც მსხვილგაბარიტიანი საბრძოლო მასალაა და რომლის გადასატანადაც ადაპტირებულია MiG-31K,“ – წერს დაზვერვა პირველი ნოემბრის რელიზში.

უწყება აღნიშნავს, რომ KILLJOY-ს რუსეთი 2018 წლიდან იყენებს, თუმცა ის დღემდე ბელარუსში არ გამოჩენილა.

„უკრაინაში ომის დროს რუსეთი ზოგჯერ იყენებდა ამ იარაღს, თუმცა მისი მარაგები, სავარაუდოდ, ძალიან შეზღუდულია,“ – აღნიშნავს დაზვერვა და დასძენს, რომ ბელარუსში KILLJOY-ს ქონა რუსეთს მხოლოდ მცირე დამატებით უპირატესობას აძლევს უკრაინის ტერიტორიაზე სამიზნეების გასანადგურებლად.

უწყების შეფასებით, ბალისტიკური რაკეტების ბელარუსში განლაგებას რუსეთმა სხვა მიზნით მიმართა – დაანახოს ეს დასავლეთს და ბელარუსი ომში უფრო მეტად ჩართულ მხარედ წარმოაჩინოს.

გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელ რელიზში უწყება რუსი მობილიზებულების ცუდ აღჭურვილობაზე წერდა და მიუთითებდა, რომ რეზერვისტების ნაწილს გამოუსადეგარი ავტომატები დაურიგეს.

მთავარ ფოტოზე: სატელიტური ფოტო, აეროდრომი ბელარუსში/ფოტო: ბრიტანეთის დაზვერვა