ბრიტანელები – შონ პინერი და ეიდენ ასლინი რუსეთის ტყვეობაში გატარებულ დღეებს იხსენებენ და ჰყვებიან, რომ მათ აშიმშილებდნენ, იარაღის კონდახით სცემდნენ და ელექტროშოკით აწამებდნენ.
49 წლის შონ პინერი, რომელიც 2018 წლიდან უკრაინაში ცხოვრობდა და უკრაინის შეიარაღებულ ძალებში იბრძოდა, რუსებმა ჯერ კიდევ აპრილში დააკავეს მარიუპოლში და ეიდენ ასლინთან და მაროკოელ საადუნ ბრაჰიმთან ერთად სიკვდილი მიუსაჯეს.
პინერი იხსენებს, რომ დაახლოებით 50 დღის განმავლობაში მას მხოლოდ წყალსა და პურს აძლევდნენ, ტყვეობის 5 თვეში კი ელექტროშოკით წამება და იარაღის კონდახით ცემა გადაიტანა.
„ფეხში დანას მირტყამდნენ… სიკვდილით დასჯა მოგვისაჯეს, თუმცა ვფიქრობდი, რომ ვიდრე დაგვხვრეტდნენ, მანამდე შიმშილით დავიხოცებოდით,“ – ამბობს შონ პინერი.
„ნორმალურად ტუალეტშიც ვერ გავდიოდით, რადგან ტუალეტი საერთოდ არ გვქონდა, ამ საქმისთვის ცარიელ ბოთლებს ვიყენებდით,“ – იხსენებს ტყვეობიდან გათავისუფლებული კიდევ ერთი ბრიტანელი ეიდენ ასლინი, რომლის თქმითაც, მათ „ძაღლსაც რომ არ ექცევიან, ისე ექცეოდნენ“.
როგორც ეიდენი ჰყვება, ჯერ იმის გამო სცემეს, რომ ბრიტანელი იყო, შემდეგ კი იმის გამო, რომ სხეულზე უკრაინის გერბის გამოსახულების ტატუ აღმოუჩინეს.
10 უცხოელი ტყვე სექტემბერში უკრაინასა და რუსეთს შორის ყველაზე მასშტაბური გაცვლის ფარგლებში გაათავისუფლეს. სწორედ მაშინ დაიბრუნა უკრაინამ „აზოვსტალის“ დამცველები და „აზოვის“ პოლკის მეთაურები, რომლებიც შეთანხმებისამებრ, ომის დასრულებამდე თურქეთში დარჩებიან.
10 უცხოელი – მათ შორის ხუთი ბრიტანელი – შონ პინერი, ეიდენ ასლინი, ჯონ ჰარდინგი, დილან ჰილი და ენდრიუ ჰილი ჯერ საუდის არაბეთში ჩაიყვანეს, შემდეგ კი ბრიტანეთში დააბრუნეს.
„როდესაც ომი დამთავრდება, ძალიან მინდა ისევ დავბრუნდე და დავრჩე უკრაინაში, ეს შესანიშნავი ქვეყანაა,“ – ამბობს შონ პინერი, რომელიც ოჯახს დაჰპირდა, რომ ტყვეობიდან გათავისუფლების შემდეგ საბრძოლველად აღარ წავიდოდა.
მთავარ ფოტოზე: ჯონ ჰარდინგი (მარცნივ), შონ პინერი (ცენტრში) და ეიდენ ასლინი ტყვეობიდან გათავისუფლების შემდეგ/ფოტო: ეიდენ ასლინი
