მთავარი,სიახლეები

პენტაგონმა დაადასტურა, რომ უკრაინას 8 NASAMS-ს გადასცემს

01.11.2022 • 1126
პენტაგონმა დაადასტურა, რომ უკრაინას 8 NASAMS-ს გადასცემს

პენტაგონმა დაადასტურა, რომ შეერთებული შტატები უკრაინას 8 საზენიტო-სარაკეტო სისტემა NASAMS-ს გადასცემს: ორი კომპლექსი უკრაინაში უკვე უახლოეს მომავალში ჩავა, დანარჩენ ექვსს კი პენტაგონი მოგვიანებით გაგზავნის.

ინფორმაცია ამის შესახებ მედიას დახურულ ბრიფინგზე პენტაგონის მაღალჩინოსანმა მიაწოდა.

მისი თქმით, უკრაინის ცის დასაცავად შეერთებული შტატებმა არაერთი ნაბიჯი გადადგა:

  • უკრაინას  უკვე გადასცეს 1400 ერთეული გადასატანი საზენიტო-სარაკეტო დანადგარი Stinger;
  • შეერთებულმა შტატებმა აიღო ვალდებულება, მიაწოდოს უკრაინას NASAMS-ის 8 კომპლექსი და მისთვის საჭირო საბრძოლო მასალები;
  • შეერთებულმა შტატებმა აიღო ვალდებულება, დაეხმაროს უკრაინას გამანადგურებელ უპილოტო საფრენ აპარატებთან ბრძოლაში, რისი ნაწილიც უკრაინისთვის VAMPIRE და სხვა რადიოლოკაციური სისტემების გაგზავნაა;
  • სწორედ აშშ-ის დახმარებით გადასცა სლოვაკეთმა უკრაინას С-300-ის სისტემები ომის დასაწყისში;
  • პენტაგონმა კიევს „მიაწოდა სათადარიგო ნაწილები უკრაინის საბჭოთა ტიპის ჰაერსაწინააღმდეგო სისტემებისთვის”.

NASAMS – ეს არის საზენიტო-სარაკეტო კომპლექსი, რომელსაც დაბალ და საშუალო სიმაღლეზე მყოფი ნებისმიერი საჰაერო სამიზნის განადგურება შეუძლია, იქნება ეს რაკეტა, თვითმფრინავი თუ დრონი.

კომპლექსი ნორვეგიულმა Norwegian Kongsberg-მა და ამერიკულმა Raytheon-მა შექმნეს.

სისტემის თავისებურებები:

  • მოქმედების მანძილი – 2,5-დან 40 კილომეტრამდე;
  • მოქმედების სიმაღლე – 30 მეტრიდან 16 კილომეტრამდე;
  • რეაგირების დრო – 10 წამი.

NASAMS იყენებს „ჰაერი-ჰაერის“ ტიპის რაკეტას, რის გამოც მისი მოქმედების რადიუსი ნაკლებია, ვიდრე იმ შემთხვევაში იქნებოდა, ეს რაკეტა რომ თვითმფრინავიდან გაეშვათ. მეორე მხრივ, თვითმფრინავი მუდმივად ვერ იმორიგევებს ჰაერში, მისგან განსხვავებით, კარგად შენიღბულ გამშვებ დანადგარს შეუძლია მუდმივად საბრძოლო მზადყოფნაში იყოს.

სპეციალისტები განმარტავენ, რომ ერთი ასეთი კომპლექსიც კი საკმარისია, რათა უკრაინამ დახუროს ცა მაგალითად, ხარკოვის, უკრაინის ერთ-ერთი ყველაზე დიდი ქალაქის თავზე. ორ NASAMS-ს კი კიევის დაცვა შეუძლია.

მას შემდეგ, რაც 10 ოქტომბერს რუსეთის ფედერაციამ უკრაინის ქალაქების მასობრივი დაბომბვა დაიწყო, შეერთებულ შტატებში განაცხადეს, რომ კიევი ჰაერსაწინააღმდეგო თავდაცვის თანამედროვე სისტემებს მიიღებდა. მაშინ აშშ-ის ხელისუფლებას შეიარაღების გადაცემის ვადები არ დაუსახელებია, თუმცა პირობა დადო, რომ ეს რაც შეიძლება მალე მოხდებოდა.

26 ოქტომბერს NASAMS-ის მწარმოებელმა კომპანიამ Raytheon Technologies-მა დაადასტურა, რომ აშშ-ის ხელისუფლებას უკვე გადასცა უკრაინისთვის განკუთვნილი  ჰაერსაწინააღმდეგო თავდაცვის ორი სისტემა.

14 ოქტომბერს უკრაინის თავდაცვის მინისტრმა, ოლექსი რეზნიკოვმა განაცხადა, რომ NASAMS-ის პირველი კომპლექსები უკრაინაში უკვე ოქტომბრის ბოლოს ჩავიდოდა.

NASAMS-ის პირველი ორი კომპლექსი აშშ-ის იმ $820-მილიონიანი დახმარების პაკეტში შევიდა, რომლის შესახებაც პენტაგონმა ჯერ კიდევ პირველ ივლისს გამოაცხადა.

გადაბეჭდვის წესი


ასევე: