ნეტგაზეთი • RU

ბათუმის ბულვარი 72 ათას ლარს გადაიხდის 4 ქანდაკების რეაბილიტაციაში

ბათუმის ბულვარის ადმინისტრაცია 72 562 ლარს გადაიხდის ოთხი ქანდაკების რეაბილიტაციაში. ეს ქანდაკებებია: „ყირამალა“ და კიდევ სამი – „ვარიაცია სიყვარულზე“.

„აღნიშნული ქანდაკებები წარმოადგენენ ერთ-ერთ ღირსშესანიშნაობას, რომლებიც მუდმივად იზიდავენ ქალაქის სტუმრებსა და ბულვარის ვიზიტორებს. ქანდაკებები ბულვარის ტერიტორიაზე განთავსდა 2009-2013 წლებში.

ბათუმისთვის დამახასიათებელი ხშირი წვიმისა და მეტეოროლოგიური პირობების გამო, ქანდაკებების ნაწილი ბევრ ადგილზე დაიჟანგა, დაკარგა ვიზუალური მიმზიდველობა და ფუნქცია. ერთ-ერთი მათგანი, კერძოდ, „ყირამალა“ დაზიანების მაღალი ხარისხის გამო აღებულ იქნა და განთავსებულია ბულვარის საწყობში.

ყოველივე ზემოაღნიშნულიდან გამომდინარე საჭიროა ქანდაკებების დაუყოვნებლივ რეაბილიტაცია“, – აღნიშნულია ბულვარის ადმინისტრაციის განაცხადში, რომლითაც შესყიდვების სააგენტოს მიმართა.

ქანდაკებების რეაბილიტაციის მომსახურებას ბულვარი ამ ქანდაკებების ავტორისგან, გელა წულაძისგან შეისყიდის, რომელიც აღდგენა-რესტავრაციის მომსახურების შესრულების ექსკლუზიურ უფლებას ფლობს. შესაბამისად, ხელშეკრულებას ბულვარის ადმინისტრაცია მასთან ტენდერის გარეშე გააფორმებს. ბულვარი შესყიდვების სააგენტოსგან შესაბამის თანხმობას ელოდება.

რეაბილიტაციისთვის საჭირო თანხის ოდენობა, ბულვარის განაცხადის მიხედვით, განსაზღვრულია „ქანდაკების ავტორის მიერ წარმოდგენილი აღდგენა-რესტავრაციისთვის საჭირო მომსახურების ხარჯთაღრიცხვის მიხედვით.“

ქანდაკებების ძველი და ახლანდელი მდგომარეობის ამსახველი ფოტოები:

ყირამალა

„ვარიაცია სიყვარულზე“

„ვარიაცია სიყვარულზე“

„ვარიაცია სიყვარულზე“ / ფოტოები შესყიდვების პორტალიდან

ამავე თემაზე:

როდის დააბრუნებენ ბულვარში ყირამალას და სხვა ქანდაკებებს

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com