Batumelebi

აჭარის უმაღლესმა საბჭომ მიიღო დადგენილება, რომლითაც აჭარის ავტონომიური რესპუბლიკის უმაღლესი საბჭოს 2025 წლის ბიუჯეტის პროექტი დაამტკიცა.

უმაღლესი საბჭოს 2025 წლის ბიუჯეტის პროექტი 8 087 154  ლარით განისაზღვრა, რაც მიმდინარე, 2024 წლის ბიუჯეტთან შედარებით 567 854 ლარით არის გაზრდილი. აჭარის უმაღლესი საბჭოსთვის წელს აჭარის ბიუჯეტში 7 519 300 ლარია გათვალისწინებული.

უცვლელი რჩება უმაღლესი საბჭოს მომუშავეთა რიცხოვნობა – 117 საშტატო ერთეული.

აჭარის უმაღლესი საბჭოს არჩევნები წელს, 2024 წლის 26 ოქტომბერს, პარლამენტის არჩევნების პარალელურად ჩატარდება.

აღნიშნული 8 მილიონი ლარიდან ხარჯები იქნება – 7 487 154 ლარი, არაფინანსური აქტივების ზრდა – 600 000 ლარი, ხოლო შრომის ანაზღაურება – 5 226 216  ლარი [მიმდინარე წელს იყო 4 658 400 ლარი, ანუ სამომავლოდ უმაღლეს საბჭოში მხოლოდ ხელფასებისთვის განკუთვნილი თანხა იზრდება].

„აღნიშნული დადგენილებით განსაზღვრული თანხები გათვალისწინებული იქნეს „აჭარის ავტონომიური რესპუბლიკის 2025 წლის რესპუბლიკური ბიუჯეტის შესახებ“ აჭარის ავტონომიური რესპუბლიკის კანონის პროექტში.“ – აღნიშნულია უმაღლესი საბჭოს დადგენილებაში.

ამავე თემაზე:

7 მილიონი თუ მილიარდი? – რამდენით დააფინანსებენ აჭარის უმაღლეს საბჭოს

See more

„გურიის ეროვნული პარკის შექმნისა და მართვის შესახებ“ საქართველოს კანონი 2024 წლის პირველი ივლისიდან ძალაში შევა.

გურიის ეროვნული პარკი იქმნება ჩოხატაურისა და ოზურგეთის მუნიციპალიტეტების ადმინისტრაციულ საზღვრებში მოქცეულ ტერიტორიაზე, რომლის საერთო ფართობი ჯამში 15 310 ჰექტარია.

„ამ კანონის ძირითადი მიზნებია: უზრუნველყოს გურიის ეროვნული პარკის შექმნა; მოაწესრიგოს გურიის ეროვნული პარკის მართვისა და დაცვის, აგრეთვე ბუნებრივი რესურსების გამოყენების სამართლებრივი მექანიზმები“ – აღნიშნულია კანონში.

ამავე კანონით ძალადაკარგულად გამოცხადდა საქართველოს 2019 წლის 30 მაისის კანონი „პონტოს მუხის აღკვეთილის შექმნისა და მართვის შესახებ“. პონტოს მუხის აღკვეთილი ჩოხატაურის მუნიციპალიტეტის საზღვრებში 443 ჰექტარს მოიცავდა. ეს ტერიტორია შევა გურიის ეროვნული პარკის საზღვრებში.

„გურიის ეროვნული პარკის მთლიანი ფართობის 92% – 14 141 ჰექტარი არის ტყის ტერიტორია, დანარჩენი ფართობი კი, ძირითადად, ალპური მდელოებია.

დაცული ტერიტორიების დაარსება გარკვეულ შეზღუდვებს ითვალისწინებს და ამ ფონზე, უნდა აღვნიშნო, რომ ეროვნული პარკის ფარგლებში ტრადიციული საქმიანობა, სათიბი და საძოვრების გამოყენება არ იზღუდება.

ეს იქნება პირველი ეროვნული პარკი გურიის ტერიტორიაზე და, ვფიქრობ, ასეთი ეროვნული პარკის შექმნა გურიის რეგიონისთვის, რეგიონული განვითარების კონტექსტში, ძალიან მნიშვნელოვანია.

მომდევნო წლებში დაგეგმილი გვაქვს ადმინისტრაციის მშენებლობა, ვიზიტორთა ცენტრის მშენებლობა და ეს ყველაფერი, საბოლოო ჯამში, მიზიდულობის ცენტრი და ადგილობრივი მოსახლეობისთვის დამატებითი სიკეთის მომტანი გახდება“, – განაცხადა ნინო თანდილაშვილმა, გარემოს დაცვისა და სოფლის მეურნეობის მინისტრის პირველმა მოადგილემ, პარლამენტის მიერ კანონის პირველი მოსმენის დროს.

დაცული ტერიტორიების სააგენტოს ინფორმაციით, „გურიის ეროვნული პარკის დაარსება მიზნად ისახავს გურიის ტყის ლანდშაფტებში არსებული გამოწვევების, კერძოდ, ადამიანის ზემოქმედებით მიღებული ზიანის შეჩერებას, ბიომრავალფეროვნების დაცვასა და ეკოსისტემის შენარჩუნებას.

ეროვნული პარკის შექმნა ხელს შეუწყობს ტურისტული ნაკადების მოზიდვას დაცულ ტერიტორიებზე, ადგილობრივ მოსახლეობას კი, დამატებითი ეკონომიკური სარგებლის გაჩენის შესაძლებლობას მისცემს.“

ახალი კანონის მიხედვით, გურიის ეროვნული პარკის ტერიტორიაზე „დასაშვებია ამ კანონის ამოქმედებამდე არსებული ქონებრივი უფლებების ან/და ვალდებულებების უძრავ ნივთებზე უფლებათა რეესტრში რეგისტრაცია.

ამასთან, ამ კანონის მოქმედება არ ვრცელდება მის ამოქმედებამდე არსებულ:

• „ნავთობისა და გაზის შესახებ“ საქართველოს კანონის შესაბამისად დადებული ხელშეკრულებებით ან/და გაცემული ლიცენზიებით განსაზღვრულ ურთიერთობებზე;
• სასარგებლო წიაღისეულითა და ბუნებრივი რესურსებით სარგებლობასთან დაკავშირებულ ურთიერთობებზე, მათ შორის, ლიცენზიის გაცემის მიზნით დაწყებულ საქმის წარმოებასთან დაკავშირებულ ურთიერთობებზე;
• საქართველოს ტყის კოდექსით განსაზღვრულ ტყითსარგებლობასთან დაკავშირებულ ურთიერთობებზე, ტყითსარგებლობის ვადით.“

ამავე თემაზე:

გომის მთისა და ბახმაროს ტყეებში ეროვნული პარკის დაარსება იგეგმება

See more

გურიაში ეროვნული პარკი შეიქმნება

See more

 

 

 

 

„ჩემი მოვალეობაა – ნაგვის ყუთთან ნაგავი არ უნდა ეყაროს“ – თავის საქმეს გვაცნობს მალხაზ ჭანიძე, სოციალურად დაუცველი ხელვაჩაურის სოფელ ჯოჭოდან, რომელიც საზოგადოებრივი დასაქმების პროგრამის ფარგლებში დასაქმდა.

40 ათას სოციალურად დაუცველს ქვეყნის მასშტაბით სხვადასხვა სამუშაო გამოუძებნეს. მათი ჯამაგირი თვეში 300 ლარია. ხშირ შემთხვევაში დასაქმებულთა სამუშაოს აღწერა აჩვენებს, რომ მათი დასაქმება ფორმალურია. მაგალითად, ტანკს ქედაში, წონიარისის ცენტრში, ორი კაცი ალაგებს, სოფელ გულებში კი, ქალი ალაგებს ოთახს, რომელიც სოფლის ცენტრში მოუწყვიათ და იქ შეკრებილი ბიჭები ჯოკერს თამაშობენ.

ამჯერად ხელვაჩაურის სოფლებში ჯოჭოსა და კირნათში 4 სოციალურად დაუცველს ვესაუბრეთ. ჯოჭოში დასაქმებულმა, მაგალითად, მოგვიყვა, რომ მოსაცდელებს ალაგებს, როცა საზოგადოებრივი ტრანსპორტი სოფლის დიდ ნაწილში წლებია აღარ მოძრაობს.

„გამოდის, რომ ჩვენ გვიყენებს [ქართული ოცნება]“ – გვითხრა ინეზა ღოლიჯაშვილმა, რომელსაც ვკითხეთ: რამდენად სამართლიანია დასაქმების პროგრამის დასრულება საპარლამენტო არჩევნების ჩატარებიდან რამდენიმე თვეში – 2025 წლის გაზაფხულზე?

ვესაუბრეთ ხულოში, სოფელ კვატიაში მცხოვრებ სოცდაუცველსაც, რომელიც მიიჩნევს, რომ ხელისუფლების მიმართ თავისი კრიტიკული დამოკიდებულებების გამო „დასაჯეს“ და ხელშეკრულება შეუწყვიტეს იმის მიუხედავად, რომ სამუშაოს შესრულების დროს მისი ჯანმრთელობა დაზიანდა.

• რუსების გამო ჩვენი საქართველო ფეხქვეშ უნდა გამოგვეცალოს? – სოცდაუცველის შეკითხვა „ოცნებას“ 

„ხიდთან რომ გადმოუხვევთ, იქ აწყვია ნაგვის ყუთები… 13 ნაგვის ყუთი იქნება სოფელში სულ,“ – მალხაზ ჭანიძე სახლში გვხდება და განმარტავს, რის გაკეთება უწევს ყოველ დილით.

„მუსორი“ არ უნდა ეყაროს ნაგვის ყუთთან, თუ რამე დამხვდება, მე ვყრი ნაგვის ყუთში, მანქანა მოდის კვირაში სამჯერ, ორჯერ, ან ერთხელ, მე არ მევალება ყუთების გაცლა. ვმუშაობ დილის 12 საათამდე, ხან პირველამდე, სამამდეც,“ – აღნიშნავს მალხაზ ჭანიძე.

ვინ ალაგებდა ნაგვის ყუთებს, ვიდრე ჯოჭოში მალხაზ ჭანიძეს დაასაქმებდნენ?

„ვინმე არ იყო, პრობლემა იყო, გაფენილი იყო ნაგავი მთლიანად,“ – ამბობს მალხაზ ჭანიძე. ის გვიდასტურებს, რომ „ქართული ოცნების“ და, შესაბამისად, რუსული კანონის მხარდასაჭერ აქციაზე მონაწილეობდა თბილისში.

„თქვენი სურვილი იყო, თუ გთხოვეს?“ – ვეკითხებით მას.

„მეც აქციაზე ვიყავი თბილისში. მთხოვეს ახლა, სურვილი რა, წავედი რა, მაგას რა მნიშვნელობა აქვს მინდოდა თუ არა, ჩემი სურვილი იყო,“ – მოკლედ გვიპასუხა მალხაზ ჭანიძემ. მან იძულების აქციაში მონაწილეობა გამორიცხა და დასძინა, რომ მისთვის არაფერი იცვლება, ქვეყანა რუსეთს დაუახლოვდება, თუ აშშ-ის მოკავშირედ დარჩება.

სოფელ ჯოჭოში დასაქმებული სოცდაუცველი ინეზა ღოლიჯაშვილი კი ამბობს, რომ ის არ ყოფილა „ქართული ოცნების“ აქციაზე და რუსულ კანონსაც ეწინააღმდეგება. თუმცა არ გამორიცხავს, მაინც „ქართულ ოცნებას“ დაუჭიროს მხარი. „არ გვიტოვებს სხვა გზას, იძულებული ვართ…“, – გასაუბრებას გვთანხმდება სოციალურად დაუცველი, ვიდეო კომენტარს – არა.

ინეზა ღოლიჯაშვილი უკიდურეს სიღარიბეში ცხოვრობს ქმართან და 5 შვილთან ერთად, მათ შორის, ერთ-ერთი შშმ პირია. ოჯახთან ერთად ცხოვრობს ინეზას დედა და მაზლიც. ინეზას ოჯახს 20 წელია წყლის პრობლემა აქვს – წყალს წყაროდან ეზიდებიან, როგორც თითქმის ყველა ოჯახი ამ სოფელში. ინეზას 9-სულიანი ოჯახი სახელმწიფოსგან დანიშნული შემწეობითა და პენსიით ირჩენს თავს.

„მეუღლე პუშკინის ქუჩაზე დგება, იქ ეძებს სამუშაოს თუ გამოჩნდა რამე, მე ბავშვებთან ვარ…

ჩვენ გვაქვს ტვინში ჩაბეჭდილი, რომ თუ არასწორად მოვიქცევით ამათ [„ქართული ოცნება“] წინაშე, მათ ეს არ მოსწონთ. ვიცით, შედეგი როგორი მოჰყვება ამას“ – გვიყვება ინეზა ღოლიჯაშვილი. ის საზოგადოებრივი ტრანსპორტის 4 მოსაცდელს ალაგებს, თუმცა სოფელში არც ერთი მიმართულებით „მარშუტკა“ აღარ მოძრაობს.

„მე ვხვეტავ 4 მოსაცდელს. მთავარია, ცოცხი მქონდეს და ასტამი, 5 – 10 წუთი მჭირდება, დავამთავრებ ამას ნახევარ საათში და დავბრუნდები… იქ სიგარეტის ნამწვავებია დარჩენილი და ამას ვალაგებ, ზოგჯერ დასალევს დალევენ, იმის ბოთლებია..

საზოგადოებრივი ტრანსპორტი პრობლემაა: ადრე წიფლნარშიც ადიოდა, ახლა აქამდეც აღარ ამოდიან უკვე 4 წელია.

წყალი არ გვაქვს 20 წელია, სამი წელი იყო შედარებით და დანარჩენი უწყლოდ ვართ. შევაწუხეთ გამგეობა, რამდენჯერმე განცხადება შევიტანეთ, ვიზამთ, გავაკეთებთო, მაგრამ ვიტანჯებით უწყლოდ. ხელვაჩაურის მერმა გვითხრა, რაც ჩემზეა დამოკიდებული, ყველაფერს გავაკეთებო, მაგრამ დრო სჭირდებაო… 2 წლის წინ გვქონდა ეს შეხვედრა,“ – ამბობს ინეზა ღოლიჯაშვილი.

რას ფიქრობს სოცდაუცველი იმაზე, რომ 2025 წლის გაზაფხულიდან ისევ დაუსაქმებელი იქნება?

„ხალხი ეძებს გამოსავალს, რომ არ დარჩეს მშიერი. ეს თუ წაართვი, ელემენტარულ 300 ლარზე ვსაუბრობთ, რა იქნება უკეთესი? გამოდის, რომ შენ ჩვენ გვიყენებ შენს სასიკეთოდ, ჩვენ ვართ იძულებული, ვიყოთ მაგათზე დამოკიდებული.

მე არ ვყოფილვარ „ქართული ოცნების“ აქციაზე თბილისში, ჩემთვის არც უთქვამთ. რომ ეთქვათ? – არც წავიდოდი. მე არ ვარ ვალდებული, თავისუფალი მოქალაქე ვარ, ჩემი აზრი მაქვს. სხვებს უთხრეს, ბევრს, ვიცი.

სამართლიანობა უნდა იყოს: შენ თუ მაძლევ იმის საშუალებას, რომ ვჭამო პური და მივაყოლო წყალი, ნამდვილად არ ვეთანხმები ასეთ რამეს [მხარდამჭერ აქციაზე წასვლა]. ეს არის უსამართლობა,“ – გვითხრა ინეზა ღოლიჯაშვილმა და დასძინა, რუსული კანონის წინააღმდეგი ვარო.

ინეზა დაქორწინებამდე გორში ცხოვრობდა, მისი დედა კი, ეთნიკურად რუსია. რუსებზე საუბრის დროს ინეზას გაბრაზება ეტყობა:

„არ შეიძლება, ჩვენ მხარს ვუჭერდეთ რუსებს… არ ვეწინააღმდეგებით, ამავე დროს, ხელს ვუწყობთ, ასე გამოდის.

ხელისუფლებამ უნდა გაითვალისწინოს ხალხის აზრი და გააკეთოს სწორი დასკვნა. რუსმა როგორ მოგვექცა ჩვენ? რუსების გამო ჩვენი საქართველო ფეხქვეშ რატომ უნდა გამოგვეცალოს?“ – სოცდაუცველს ეს შეკითხვა აქვს ხელისუფლებასთან.

• „შეკვეცეს 5 კაცი, ბევრი ათავდა… ახლა 10 ალაგებს გზას“ – რა ხდება კირნათში? 

„მე საბავშვო ბაღის ეზოს ვალაგებ, ბაღში 60 ბავშვია, ყოველდღე ჩავდივარ,“ – გვიყვება ხელვაჩაურის სოფელ კირნათში დასაქმებული ფატი ჯიხაძე. მისი თქმით, სხვა სოცდაუცველები ამ სოფელში გზას ალაგებენ.

„10 მუშაობს სოცდაუცველი, მგონი, შეიძლება მეტიც იყოს,“ – თავისი სახლის ჭიშკართან ვესაუბრებით დასაქმებულს.

ამდენი კაცი სჭირდება სოფლის გზის დალაგებას? – ვეკითხებით ფატი ჯიხაძეს.

„ზოგი შეკვეცეს, ხუთი, ბევრი ათავდა, მე არ მეხება ეს,“ – უხერხულობა დაეტყო ქალს.

სოფლებში დასაქმებული სოცდაუცველების ნაწილი რომ ისევ უმუშევარი დარჩა, ეს ამ სოფლებში რამდენიმე სოცდაუცველმა დაგვიდასტურა. ისინი ასევე გზების და სკვერების დალაგებაზე მუშაობდნენ და უთხრეს, რომ რამდენიმე თვე მუშაობა უნდა შეაჩერონ. ეს ადამიანები წინასაარჩევნოდ ისევ დასაქმებას ელიან და გვითხრეს, რომ ვერ დაგველაპარაკებიან.

„ბოთლი იქნება, ჭიქა, რაც მოჰყვებათ, ალაგებენ, დანაწილებული აქვთ საიდან სადამდე, მეტრობით იციან,“ – გვიყვება ისევ ფატი ჯიხაძე. – „მე გამგებელმა დამასაქმა, დასაქმება არის და თუ გსურთ მონაწილეობის მიღებაო.

ჩემთვის არაა კარგი, რომ გაჩერდეს ეს პროგრამა, მშვენივრად ვართ აგერ სახლში, ხარჯი არ მაქვს, ჭამა არ გვინდა [სამუშაოს შესრულების დროს], ის 300 ლარი საკმარისია“, – ამბობს დასაქმებული.

ფატი გვიდასტურებს, რომ „ოცნების“ მხარდასაჭერ აქციაზე წასვლა მასაც უთხრა „სოფლის გამგებელმა“, მაგრამ „არ შემეძლო, არ წავედიო“. მასთან გასაუბრება აჩვენებს, რამდენად გრძნობს ანგარიშვალდებულებას დასაქმებული მმართველ პოლიტიკურ პარტიასთან, რომელმაც იგი წინასაარჩევნოდ, ბიუჯეტის ხარჯზე დაასაქმა.

„ახლა თითქმის ყველა დასაქმდა სოფელში ოჯახიდან“ – ხაზს უსვამს ამას ფატი ჯიხაძე და მომავალზე საუბარი ნაკლებად სურს, მაგალითად, რა მოხდება არჩევნების შემდეგ, როცა ეს პროგრამაც შეჩერდება, ის ამ 300 ლარს ვერ აიღებს და საქართველო შესაძლოა რუსეთის ხელში აღმოჩნდეს.

„თუ შემიძლია დავეხმარები „ოცნებას“ – გვპასუხობს ფატი ჯიხაძე, რომელმაც მანამდე გვითხრა, რომ „ქართული ოცნების“ კოორდინატორი არ ყოფილა, მაგრამ იქნება, თუ ამის საჭიროებას დაინახავენ „ოცნებაში“.

„ჩემთვის, ლამაზად ვარ,“ – მოკლედ გვპასუხობს ფატი. მას ვუხსნით, რომ ეს პროგრამა ბიუჯეტიდან ფინანსდება და არა „ქართული ოცნებიდან“.

„2 წელია ვმუშაობთ, ადრე არ ვმუშაობდით,“ – გვეუბნება ფატი ჯიხაძე და დამშვიდობებამდე ხაზს უსვამს იმას, რომ მასაც ევროპული მომავალი სურს.

„რატომ გაუქმდება უვიზო მიმოსვლა, რა ვიცი, არ გაუქმდებაო…“ – მზერას გვარიდებს ქალი.

„არ უნდა გამოიყენონ ადამიანის უფლებები, არ უნდა ისარგებლონ“ – „ქართული ოცნების“ კრიტიკას თავს არიდებს, თუმცა სოცდაუცველების დასაქმების პროგრამის არჩევნების დასრულების შემდეგ შეწყვეტას აპროტესტებს ნესტან შუშანიძე, კიდევ ერთი სოცდაუცველი სოფელ კირნათიდან.

ნესტან შუშანიძე საჯარო სკოლის ეზოს ალაგებს.

„ნაძვის ტოტი ჩამოვარდება იქ, ბავშვები რაღაცას მიირთმევენ იმის დასუფთავება… ჩემი ნება-სურვილით მეორე დამლაგებელსაც ვეხმარები,“ – გვიყვება ის.

ნესტან შუშანიძისთვისაც უთქვამთ, „ქართული ოცნების“ მხარდასაჭერ აქციაზე წამოდიო, მაგრამ არ წასულა, შვილიშვილს ველოდებოდი და ეს მიზეზი დავუსახელეო. ქალი ირწმუნება, რომ თავადაც სურდა აქციაზე წასვლა თბილისში.

„ალბათ ჩვენს მთავრობას დავეხმარებოდი… ალბათ, იმიტომ, რომ დასაქმება იყოს“, – გვპასუხობს ის.

ნესტან შუშანიძე გვიყვება, რომ მისი შვილის ოჯახი უკრაინაში ცხოვრობდა, როცა ოდესის დაბომბვა დაიწყო.

„ახლა ლტოლვილად გერმანიაში ცხოვრობს ქმართან და ორ შვილთან ერთად. ეშინოდათ, როცა ბომბები იყრებოდა. ამ ბიჭის მშობლები ოდესაში არიან ისევ, ორი თვის წინ რომ ააფეთქეს საბავშვო ბაღი და ფურნე, შემეშინდა, ერთი ფურნე მოყვარესაც ჰქონდა, მაგრამ გადარჩა…“ – გვიყვება ქალი.

კითხვაზე: რუსეთთან დაახლოებაში თუ ხედავთ პრობლემას? – სოცდაუცველი გვპასუხობს, რომ მისი ხედვით, ეს პრობლემაა.

მას დასაქმების პროგრამის არჩევნების შემდეგ დასრულებაზეც ვკითხეთ:

„არაა ეს სწორი, არ უნდა გამოიყენო ადამიანის უფლებები, არ უნდა ისარგებლო, პირიქით. ხელი უნდა შეუწყო მოსახლეობას, რომ მხარში დაგიდგეს, მეტი საშუალება უნდა მისცე, რომ იცხოვროს ადამიანმა, ხალხი „მუსორში“ იქექება…

ჩვენ საქართველოს არ უნდა უჭირდეს ასე,“ – ასრულებს ნესტან შუშანიძე.

• სოცდაუცველი, რომელიც სამსახურიდან გაუშვეს: „კრიტიკული მოსაზრებების გამო დამსაჯეს“

„კრიტიკული მოსაზრებების გამო დამსაჯეს, პრობლემებზე თვალს არ ვხუჭავ,“ – გვიყვება ხულოში, სოფელ კვატიაში მცხოვრები შადიმან ხოზრევანიძე. მას 2024 წლის იანვრიდან შეუწყვიტეს ხელშეკრულება და 300-ლარიანი დასაქმების პროგრამიდან ამორიცხეს.

კრიტიკული ხედვების გამო სოცდაუცველის შესაძლო დევნის გარდა შადიმან ხოზრევანიძის შემთხვევა აჩვენებს როგორ იქცევა ხელისუფლება, როცა სახელმწიფო პროგრამით დასაქმებული ადამიანის ჯანმრთელობა ზიანდება, სახელმწიფო კი, მას დაცვის ნაცვლად სამსახურიდან ათავისუფლებს.

შადიმან ხოზრევანიძის ოჯახი შემწეობას იღებს. მის შესახებ „ბათუმელები“ 2022 წელს წერდა – მოქალაქემ, რომელსაც ჯანმრთელობის პრობლემები აწუხებდა, კვლევების დაფინანსების მოთხოვნით, აჭარის მთავრობის სახლთან შიმშილობა დაიწყო.

მოქალაქე გვიყვება, რომ ამ საპროტესტო აქციის შემდეგ მას აჭარის მთავრობიდან დახმარებას დაჰპირდნენ.

„მაშინ გადმოსცეს რაიონს, რომ ჩემი დაკმაყოფილება უნდა მომხდარიყო, უნდა გაუმჯობესებულიყო ჩემი ეკონომიკური მდგომარეობა. 2023 წლის იანვარში შემომთავაზეს ეს: სოციალური დასაქმება 300 ლარად, ასევე 100-ლარიანი საკვები პროდუქტის ვაუჩერი და ტანსაცმელი ბავშვებისთვის.

დასაქმებამდე ვესაუბრე ხულოს მერს, რომ ჩემი ჯანმრთელობის მდგომარეობა მძიმეა, ძვალსახსროვანი და კუჭ-ნაწლავის ქრონიკული დაავადებები მაწუხებს. დამპირდნენ, რომ ისეთ სამუშაოს შემირჩევდნენ, რასაც შევძლებდი.

ეს პირობა შესრულდა: ჩემი მოვალეობა იყო სოფელში ნაგვის ყუთების დალაგება, იქვე თუ ვინმე ნაგავს დაყრიდა, ის უნდა ჩამეყარა ყუთში,“ – ამბობს სოცდაუცველი და განმარტავს, რომ სამუშაო პირობებზე ის კონკრეტულად ხულოს მერიის წარმომადგენელს სხალთის თემში – რაულ მახარაძეს შეუთანხმდა. ამ თემში შედის სოფელი კვატიაც.

2023 წლის აპრილში პროგრამის ფარგლებში დასაქმებულს ხულოს მერიის წარმომადგენელმა სოფელ კვატიაში – რუსლან ხოზრევანიძემ სხვა საქმის გაკეთება მოსთხოვა:

„…მომთხოვა სოფლის შიდა საუბნო გზების გაწმენდითი სამუშაოები, რომელიც არის 6 კილომეტრზე მეტი და ჯერ ტრაქტორითაც არ იყო გაწმენდილი. იცოდა, რომ 6 კილომეტრს ფეხითაც ვერ გავივლიდი, სამუშაოს შესრულებაზე ზედმეტია ლაპარაკი.

2023 წლის აპრილში სოფლის მეურნეობის პროგრამით გათვალისწინებული ნაკვეთების დახვნის დროს ასევე მე დამავალეს ზედამხედველობა ტრაქტორზე და თუ მის დავალებებს არ შევასრულებდი, ჩამომაჭრიდა თანხას, ან საერთოდ შემიწყვეტდა დასაქმების პროგრამას, რაზეც იძულებით დავთანხმდი,“ – ამბობს შადიმან ხოზრევანიძე. იგი აღწერს, რომ ერთ-ერთი მიწის ნაკვეთის დახვნის დროს ტრაქტორი ღობეზე გადებულ ხეს გამოედო და მას მოხვდა:

„ვეღარ მოვასწარი გვერდზე გაწევა და მომხვდა თავში. ხის მოხვედრის შემდეგ იქვე მდგომი მეზობელს რომ არ დავეჭირე, პირდაპირ ტრაქტორის სახნავ მექანიზმში ვვარდებოდი, სასწრაფოთი გადამიყვანეს რაიონის საავადმყოფოში,“ – გვიამბო შადიმან ხოზრევანიძემ. მოქალაქის თქმით, მკურნალობის კურსის დასრულების შემდეგ მას თავბრუსხვევა შემორჩა, აქვს თავის ტკივილი და მხედველობის პრობლემა.

შადიმან ხოზრევანიძემ გვაჩვენა 2024 წლის თებერვალში ექიმი-ნევროლოგის მიერ გაცემული დასკვნაც, რომლის მიხედვითაც მას აქვს „ფიზიკური დატვირთვის შეზღუდვა“.

„შემეძლო გამეკეთებია იგივე საქმე, რაზეც თავდაპირველად შევთანხმდით – ნაგვის ყუთის დალაგება, მაგრამ მითხრეს, გაუქმდა თქვენი შტატიო. ეს იყო შურისძიება იმის გამო, რომ სოფლის პრობლემების შესახებ ინფორმაცია მიმქონდა ჟურნალისტებამდე, მთავრობამდე,“ – გვითხრა შადიმან ხოზრევანიძემ.

მისივე თქმით, სამუშაოს შესრულების დროს მიღებული ტრავმა არსად დაფიქსირებულა, თუმცა ამ შემთხვევას ხულოს მერიის წარმომადგენელიც ადასტურებს სოფელ კვატიაში – რუსლან ხოზრევანიძესთან გასაუბრება აჩვენებს, რა გავლენა შეიძლება ჰქონდეს „ქართულ ოცნებასთან“ დაკავშირებულ „სოფლის თავკაცს“ სოციალურად დასაქმებულებზე.

„იმ ტრავმის მერე დიდი ხანი მუშაობდა. შემდეგ თავად განაცხადა უარი სამუშაოს შესრულებაზე. ტრავმა მოხდა, მაგრამ ეს არ იყო ჩვენი ბრალი, თვითონ მივიდა მძიმე ტექნიკასთან ახლოს, ეს მოხდა პროცესში.

მერე საერთოდ აღარ გამოვიდა სამუშაოზე, არ იკადრა მუშაობა,“ – გვითხრა რუსლან ხოზრევანიძემ.

რა ფორმით დაფიქსირდა ის, რომ სამუშაოს შესრულების დროს დასაქმებულის ჯანმრთელობას ზიანი მიადგა? – ხულოს მერიის წარმომადგენელი სოფელ კვატიაში გვპასუხობს, რომ „ეს არანაირი ფორმით არ მომხდარა“, რადგან დასაქმებულს ჯანმრთელობის დაზიანებაზე პრეტენზია არ გამოუხატავს.

რუსლან ხოზრევანიძის მტკიცებით, შადიმან ხოზრევანიძე თავიდანვე სოფლის გზების მოვლა-პატრონობის კუთხით იყო დასაქმებული. ეს პირობები წესით ხელშეკრულებაში უნდა იყოს გაწერილი. შადიმან ხოზრევანიძე ამბობს, რომ დასაქმების დროს მას გარკვეულ დოკუმენტზე ხელი მოაწერინეს, თუმცა დაზუსტებით არ იცის, ეს ხელშეკრულება იყო თუ არა.

„რამდენჯერმე მოვითხოვე ხელშეკრულება, მითხრეს, გამგებელს გამოვატანთო, დამალეს ფაქტობრივად, არ მომცეს,“ – ამბობს შადიმან ხოზრევანიძე.

ეს მნიშვნელოვანი დეტალია – „ბათუმელები“ სხვადასხვა მუნიციპალიტეტის რამდენიმე სოფელში დღემდე არაერთ სოცდაუცველს ესაუბრა. თითოეულ მათგანს ჩვენ ვკითხეთ ხელშეკრულების შესახებ – დასაქმებულების თქმით, მათ სოციალური მომსახურების სააგენტოს შესაბამისი მუნიციპალიტეტის ფილიალში მოაწერინეს ხელი, თუმცა ხელშეკრულება მათთვის არ გადაუციათ, რაც კანონით სავალდებულოა.

დასაქმებულების თქმით, მათ სამუშაოს ძირითადად „სოფლის თავკაცი“ განსაზღვრავს და მის მითითებებს ასრულებენ.

„არ ისურვა ალბათ [ხელშეკრულება], თორემ მივცემდით, რა პრობლემა იყო? ჩვენ ხომ ძალით ვერ მივცემთ ხელშეკრულებას? არავინ არ დევნის მაგას, თვითონ არ ისურვა სამუშაოზე გამოსვლა,“ – უთხრა ხულოს მერიის წარმომადგენელმა, რუსლან ხოზრევანიძემ „ბათუმელებს“ და დევნაზე საუბრის დროს ხაზი გაუსვა ამ სოცდაუცველის კომუნიკაციას ჟურნალისტებთან:

„ყველაფერზე თქვენ გაწუხებთ, როგორც ვხდები… არ ვიცი, რით ვერ ლაგდება“.

რუსლან ხოზრევანიძეს ვთხოვეთ შადიმან ხოზრევანიძესთან გაფორმებული ხელშეკრულება ეჩვენებინა. ის ამ დოკუმენტის გაცნობას დაგვპირდა, როცა სამსახურში იქნება და ხელშეკრულებას იპოვის.

ხელისუფლებისგან დასჯილ მოქალაქეს კი, გზავნილი აქვს რუსულ კანონზეც:

„ვერ ვხდები, როგორ არ უნდა გქონდეს ამაზე პოზიცია, თუ ადამიანი ფიქრობს საერთოდ საკუთარ მომავალზე და ქვეყანაზე? ეს კანონი ძალიან მძიმედ აისახება ევროპულ მომავალზე, დაანგრევს ჩვენი ქვეყნის ევროპულ მომავალს, თავისუფალი აზრის გამოხატვის უფლებას, მომავალი თაობის ცხოვრებას. ეს კანონი აახლოებს ქვეყანას დიქტატურასთან,“ – თქვა შადიმან ხოზრევანიძემ „ბათუმელებთან“.

• რამდენი ადამიანი დაასაქმა წინასაარჩევნოდ „ოცნებამ“? 

2023 წლის მსგავსად, არც 2024 წელს მოაწოდა ხელისუფლებამ „ბათუმელებს“ საჯარო ინფორმაცია: რამდენი სოციალურად დაუცველი ადამიანი დასაქმდა, რა პირობებით, რა ვადით და რა თანხა დაიხარჯა ამისთვის ბიუჯეტიდან?

2024 წლის თებერვალში გამოთხოვილ საჯარო ინფორმაციაზე სოციალური მომსახურების სააგენტოდან მოგვწერეს, რომ კითხვებს დასაქმების სააგენტომ უნდა უპასუხოს. დასაქმების სააგენტოდან კი, არც საჯარო ინფორმაცია მოგვაწოდეს და არც კომენტარს დაგვთანხმდნენ.

საჯარო ინფორმაციის გაუცემლობა კანონის დარღვევაა.

დასაქმების სააგენტოს მიერ მომზადებული საპარლამენტო ანგარიშის მიხედვით კი, 2023 წელს საქართველოში 39 999 სოციალურად დაუცველი ადამიანი დასაქმდა საზოგადოებრივ სამუშაოზე.

• „გარკვეული მზადებაა, შემდეგ უკვე არჩევნებისთვის გამოიყენებენ ამ რესურსს“ – იურისტი

„პირველი ნიშნებით უკვე ჩანს, რომ გარკვეული მზადებაა, შემდეგ უკვე არჩევნებისთვის გამოიყენებენ ამ რესურსს,“ – იურისტი ირმა პავლიაშვილი ყურადღებას ამახვილებს, რომ შესაძლოა, საქმე გვქონდეს ამომრჩევლის იძულებასთან, ჩაერთოს რომელიმე პოლიტიკური სუბიექტისთვის სასარგებლო მოქმედებებში, ასევე იკვეთება ადმინისტრაციული რესურსის გამოყენების რისკები.

ირმა პავლიაშვილი საია-ს საარჩევნო პროექტების ყოფილი მენეჯერი და სამოქალაქო ორგანიზაციის „ღია სივრცე – კავკასიის“ თავმჯდომარეა.

„შეგვიძლია 2 მიმართულებით ვიფიქროთ: ერთია ძალადობრივი მოქმედებები, რაზეც მოქალაქეები საუბრობენ, რომ იძულებული არიან ჩაერთონ აქციებში, ან წავიდნენ შესაბამის ღონისძიებებში. ეს მიუთითებს იმაზე, რომ მათ ნებას აკონტროლებენ.

მეორეა ადმინისტრაციული რესურსის გამოყენების რისკი.

საარჩევნო პერიოდში ჯერ არ შევსულვართ – ორი თვით ადრე იწყება წინასაარჩევნო პერიოდი და დარღვევებზე მას შემდეგ გვექნება შესაძლებლობა ვისაუბროთ, თუმცა ტენდენციის სახით იკვეთება, რომ ერთიანი, სისტემური მექანიზმი მუშაობს, რომელიც სავარაუდოდ იმგვარად იქნება ორიენტირებული, რომ იგი მმართველი პოლიტიკური პარტიის სასარგებლო ადმინისტრაციულ რესურსად იქცეს.

ჩვენ ვიცით წინა შემთხვევებიდან, რომ საბიუჯეტო დაწესებულებებში დასაქმებული პირები, საჯარო მოხელეები არაერთხელ ჩართულან მმართველი პარტიის სასარგებლო აგიტაცია-კამპანიაში, მაგალითად, მასწავლებლებს აიძულებდნენ, რომ აქციებს დასწრებოდნენ, ან სამუშაო საათების შემდეგ კონკრეტული კანდიდატების შეხვედრებში მიეღოთ მონაწილეობა და ასე შემდეგ.

წინასაარჩევნო პერიოდი ეძღვნება სწორედ იმას, რომ ამომრჩევლის ნების ფორმირება მოხდეს, რათა შემდეგ ამომრჩეველმა თავისი ნება გამოხატოს ბიულეტენში, თუმცა წინასაარჩევნო პერიოდში ნების ფორმირებისთვის მნიშვნელოვანია ნების თავისუფალ და სამართლიან, კონკურენტულ გარემოში ჩამოყალიბება,“ – განმარტავს ირმა პავლიაშვილი.

ირმა პავლიაშვილის ორგანიზაცია, ასევე სადამკვირვებლო ორგანიზაციები სოცდაუცველების წინასაარჩევნოდ დასაქმების პროგრამის დეტალებს იკვლევენ. იურისტს ვეკითხებით, ხომ არ არის 2 თვე მცირე დრო იმისთვის, რომ საარჩევნო დარღვევების დაფიქსირება და შესაბამისი რეაგირება მოხდეს?

„იყო პერიოდი, როცა 4 თვე ჩაითვალა წინასაარჩევნო პერიოდად, რომ მსგავსი სიკეთე დაცულიყო. შემდეგ, საარჩევნო ცვლილების დროს განისაზღვრა ზუსტად 60 დღე,“ – აღნიშნა ირმა პავლიაშვილმა და ხაზი გაუსვა წინა გამოცდილებასაც, როცა გავრცელდა ინფორმაცია სოცდაუცველების შემწეობის შეწყვეტით დაშინებაზე, თუ ისინი მმართველ პარტიას ხმას არ მისცემდნენ.

„წინა გამოცდილება გვაფიქრებინებს, რომ საარჩევნო მიზნებისთვის ხდება ამ რესურსის მომზადება და შემდეგ უკვე მისი გამოყენება… შეძლებისდაგვარად უნდა მოხდეს ამ ადამიანების უფლებების დაცვა. იგივე კოპენჰაგენის დოკუმენტი გულისხმობს იმას, რომ სახელმწიფო და პარტიული საქმიანობა გამიჯნული უნდა იყოს ერთმანეთისგან, აღრევა არ უნდა მოხდეს, რომ ადმინისტრაციული სიკეთე პარტიამ სათავისოდ არ გამოიყენოს,“ – გვითხრა ირმა პავლიაშვილმა.

უკანონო აგიტაცია, ასევე ადმინისტრაციულ რესურსის გამოყენება, ამომრჩევლის იძულებით ჩართვა სააგიტაციო საქმიანობაში, დადასტურების შემთხვევაში, საარჩევნო პერიოდში ჯარიმებს ითვალისწინებს.

 

 

 

ბოლო თვეებში ბათუმის ცენტრალურ ქუჩებში თქვენს ყურადღებას მიიქცევდა ნაწნავებიანი გოგო ორი დროშით, ხან ნელი, ხან უფრო ჩქარი სვლით, ზოგჯერ აგრესიულადაც რომ აბრახუნებს ეტლის ბორბლებს ბათუმის არაადაპტირებული ტროტუარების ბორდიურებზე ასასვლელად. ასეთ დროს უნდა მიხვდეთ, რომ გაბრაზებულია, რადგან იძულებულია შეეგუოს, რომ ბათუმის მერიამ ქუჩების მოსაწყობად დიდი ფული დახარჯა ბიუჯეტიდან, თუმცა ადაპტირებული გარემო ვერ შექმნა.

თათო მახარაძე 28 წლის აქტივისტია, რომელიც რამდენიმე ფრონტზე ერთდროულად იბრძვის. ის „შშმ ქალთა ალიანსის“ ახალგაზრდულ მიმართულებას ხელმძღვანელობს.

დროშებით დადის მას შემდეგ, რაც მთავრობამ რუსული კანონი მეორედ წარუდგინა პარლამენტს და შემდეგ დაამტკიცა კიდეც:

„არ მეგულება ადამიანი, ვინც დასთანხმდება თქვას, რომ უცხო ქვეყნის ინტერესების გამტარი და აგენტია“ – ამბობს თათო და გვიყვება, როგორ შეიცვალა მისი დღის წესრიგი კანონის ინიციირებიდან დღემდე.

თვეზე მეტია უკვე სხვა ფორმატით გვიწევს მუშაობა. თუ იყო სახლი-სამსახური, სამსახური-სახლი, ახლა საპროტესტო აქციებიც ჩვენს სამსახურად იქცა“.

რუსული კანონის ხელახალი ინიციირების შემდეგ თათოს არ გამორჩენია არცერთი საპროტესტო აქცია, რაც ბათუმში გამართეს. არც წვიმა, ცივი ამინდები და არც არაადაპტირებული ტროტუარები მისთვის აღარ იყო ბარიერი, რაც ხელს შეუშლიდა წინ გასძღოლოდა ანტირუსულ მარშს ბათუმში და ამ აქციებზე მკაფიოდ დააფიქსირა, რომ მისი ეტლი „რუსეთში არ შეგორდება.“

რუსული კანონის დამტკიცების შემდეგ თათო ამბობს, რომ ბრძოლა რუსული პროპაგანდის წინააღმდეგ უნდა გაგრძელდეს, ისევე, როგორც უნდა გაგრძელდეს ბრძოლა მათ წინააღმდეგ, ვისი ხელითაც რუსეთი საქართველოში რუსულ საქმეს აკეთებს:

„ვფიქრობ, მაშინაც კი, როცა არ ვსაუბრობ, ევროკავშირის დროშით ვაფიქსირებ ჩემს პოზიციას, თუ სად მინდა ვიყო და რისთვის ვიბრძვი, რისთვის ვშრომობ“.

თათო ამბობს, რომ ანტირუსულ აქციებზე დგომა მისთვის ორმაგად მნიშვნელოვანი იყო, რადგან ეს არ იყო ბრძოლა მხოლოდ შშმ პირების უფლებების დასაცავად, ეს იყო ბრძოლა ქვეყნის გადასარჩენად. ამბობს, რომ ეს ერთგვარი შესაძლებლობაც იყო მისთვის იმის საჩვენებლად, თუ რა გამოწვევების წინაშე დგანან შშმ პირები:

„მარშის დროს მიწევდა რაღაც პერიოდში სხვა მხარეს გადასვლა, შემდეგ უკან დაბრუნება. ხალხი ხედავდა, რამდენად დიდი სირთულე გვაქვს ჩვენ, თემს. ევროპაში ამ ყველაფერზე ძალიან კარგად აქვთ ნაფიქრი, იქ ადამიანთა უფლებები დაცულია, არცერთ შშმ პირს იქ არ სჭირდება იმაზე ფიქრი, თუ როგორ იცხოვროს დამოუკიდებლად, როგორ წავიდეს სკოლაში, როგორ მიიღოს განათლება“.

მათ, ვინც ახალგაზრდების სწრაფვას ევროპისკენ, მათ ბრძოლას რუსული კანონის წინააღმდეგ გაუაზრებელს და მართულს უწოდებს, თათო პასუხობს, რომ ევროპა მისთვის არა მოდური სიტყვა, არამედ რეალური საჭიროებაა:

„ჩვენთვის, ქართველებისთვის, ევროპა ნიშნავს კარგ განათლებას, ევროპულ ჯანდაცვას, ნიშნავს, რომ დიაგნოზის საძიებლად არ გვიწევდეს სხვა ქვეყანაში წასვლა ან დასმულ დიაგნოზზე პროცედურისთვის არ გვიწევდეს ქვეყნის დატოვება. ეს ჩვენთვის ნიშნავს ფართო სივრცეს და ღირსეულ დასაქმებას, არჩევანის თავისუფლებას. ჩვენ ვერ მივყვებით განათლების საფეხურებს ისე, რომ შემდეგ ვიყოთ კონკურენტუნარიანები. ეს იმ პრობლემების უწყვეტი ჯაჭვია, რომლებიც ჩვენს გარემოში გვხვდება“.

თათო ამბობს, რომ რუსული კანონი გააქრობს იმ ორგანიზაციებს, რომლებიც უკვე წლების განმავლობაში შშმ პირების უფლებებისთვის იბრძვიან და ამის გამო ძალიან სწუხს:

„მე და ჩემი მეგობრები ვშრომობთ, ვცდილობთ ჩვენი ხმა კიდევ უფრო მკაფიოდ ისმოდეს. შეიქმნა არაერთი სერვისი, ადაპტირებული ტრანსპორტი და სხვა სერვისები, რომლებიც გვიწყობს ხელს რომ დამოუკიდებლად ვიცხოვროთ, სხვათა თანასწორად. და ამ დროს გამოჩნდა მეორედ ეს კანონი, რომელიც რუსულ იდეას ატარებს. ეს ნიშნავს, რომ ჩვენ რა შესაძლებლობაც აქამდე შეგვიქმნია, არსად არ წავა, მაგრამ სამყარო ვითარდება, მეტი გვაქვს გასაკეთებელი, რომ თანაბარ პირობებში ვიცხოვროთ. ამის შესაძლებლობას რუსული კანონი არ მოგვცემს.

შეუძლებელია იარლიყის, აგენტის უკან მუშაობის გაგრძელება. ეს კანონი გაბრკოლებს. აქამდე რაც კი გაგიკეთებია, ამაზე გეუბნება, რომ აგენტურული ქცევაა და ამდენი შესაძლებლობის მომცემ დასავლელ პარტნიორებზე გვეუბნება, რომ ეს არის უცხო ძალა. ვინც ამ შესაძლებლობას ვიყენებთ, გვეუბნება, რომ ვართ აგენტები. არ მეგულება ჩემს ირგვლივ ადამიანი, რომელსაც უნდა აგენტის სტატუსით გაგრძელოს შრომა“. 

ევროკავშირსა და მის შესაძლებლობაზე, დასავლელ პარტნიორებზე საუბრისას, თათო გვიხსნის, რა შეიძლება დაასრულოს ამ ყველაფერმა როგორც მისთვის, ერთი მებრძოლი გოგოსთვის, ასევე ქვეყნისთვის. 28 წლის აქტივისტი, საბჭოთა კავშირს გვახსენებს და ამბობს, რომ არ უნდა იქ დაბრუნება, სადაც ადამიანები „უჩინარი ცხოვრებით“ ცხოვრობდნენ:

„არცთუ ისე შორეულ წარსულში ჩვენ საბჭოთა კავშირის წევრი ქვეყანა ვიყავით, სადაც თემი არ მიიჩნეოდა საერთოდ მოქალაქედ, ადამიანად, იყო დამალული და უხილავი. მისი უფლებები და ღირსება არ იყო დაცული. არც კი აღიარებდნენ და ისეთი ტერმინებით მოიხსენიებდნენ, რომ არც მინდა ამ ტერმინების გამოყენება უფრო იმიტომ, რომ არ მინდა საზოგადოებას ეს ტერმინები შევახსენო. ჩვენ წლებია ვცდილობთ და ვიცით, როგორი ბრძოლაა ეს“. 

საბჭოთა კავშირთან პარალელის შემდეგ ისევ რუსულ გავლენებზე საუბარს ვუბრუნდებით.

„რუსული საუბარი მომრავლდა, რესტორნები მომრავლდა, სადაც რუსულად საუბრობენ, ეძებენ პერსონალს, რომელიც მეტყველებს რუსულად. მქონია შემთხვევა, რომ კომპანიას მივწერე და რუსულად მიპასუხეს. ეს მართლა გამაღიზიანებელი და შეურაცხმყოფელია“ – ამბობს თათო. 

 

მისი თქმით, კიდევ ერთი „წინა ხაზი“ რუსული პროპაგანდის წინააღმდეგ ბრძოლაა.

თათო მიიჩნევს, რომ ეს არის ბრძოლა, სადაც მარტო არავინ უნდა დარჩეს. იგი არამხოლოდ საკუთარ მოვალეობად მიიჩნევს პროპაგანდის წინააღმდეგ ბრძოლას, არამედ ახლობლებსაც უხსნის, რომ ეს მათაც უნდა გააკეთონ:

„ამ ყველაფრის მიღმა მე ყველაზე მეტად მაწუხებს რუსული პროპაგანდა, რომელიც გვაჯერებს, რომ ეს მთავრობა გვიქმნის სიმშვიდეს, მშვიდობას და თუ რაიმეს ვაპროტესტებთ გეუბნებიან: აბა ომი გინდათ? – ჩვენ არ გვინდა ომი და ზუსტად იმისთვის ვიბრძვით, რომ ომი არ იყოს. თუ ვინმეს ჰგონია, რომ ჩვენი აქციებით აქ შემოვა რუსეთი, არა, რუსეთი უკვე აქ არის, პროპაგანდით და ხელისუფლების ხელით აკეთებს რუსულ საქმეს.

მე არ მეგულება არცერთი რუსული კომპანია, რომელსაც რაღაცა დაბრკოლება აქვს ჩვენს გარემოში. სამწუხაროდ, ჩვენი გარემო ამ დაბრკოლებას მათ არ უქმნის. იმაზე უკეთ შრომობენ და ცხოვრობენ ჩვენს ქვეყანაში, ვიდრე თავის ქვეყანაში.

ვისურვებდი რომ ამ რუსულ პროპაგანდას განვუდგეთ. ჩვენს მეგობრებში, ახლობლებში ვისაუბროთ იმაზე თუ რამდენად მნიშვნელოვანია, რომ საქართველოში ვიცხოვროთ ქართული ღირებულებებით და ჩვენი მრავალფეროვნება შევძინოთ ევროპას.“

ნახეთ ვიდეო:

15-16 ივნისს, შაბათ-კვირას, ბათუმში ზაფხულის ტურისტული სეზონი „ზაფხულის ფესტივალით“ ოფიციალურად გაიხსნება.

„ზაფხულის ფესტივალი“ წელსაც ანბანის კოშკთან გაიმართება და მასზე დასწრება უფასოა.

უცვლელია ფესტივალის სლოგანიც – „ზაფხული იწყება აქ“.

ფესტივალი 15 ივნისს, 18:00 საათზე, დრამერების შოუთი და პანტომიმის მსახიობების კოსტიუმირებული მსვლელობით გაიხსნება.

მუსიკალური პროგრამის პარალელურად, რომელსაც ადგილობრივი და მოწვეული ბენდები წარმოადგენენ, ბავშვებისთვის გაიმართება თითების თეატრის წარმოდგენა, „სთრით არტი“, ილუზიონისტების შოუ, თიხის ძერწვის მასტერკლასები და სხვა საბავშვო აქტივობები.

მოეწყობა ხელნაკეთი ნივთების საგამოფენო სივრცე და გაიმართება ფრანების შოუ.

ფესტივალის აფიშა ასე გამოიყურება:

ორდღიანი ფესტივალისთვის ჯამში 541 060 ლარი იხარჯება ბიუჯეტიდან.

ფესტივალის სივრცის მოსაწყობად ბიუჯეტიდან 218 760 ლარი იხარჯება. ეს თანხა გათვალისწინებულია ანბანის კოშკის მიმდებარე, 2000 მ² ტერიტორიაზე საბავშვო სივრცეების, ფოტო-ზონების, საზაფხულო ინსტალაციების, სივრცითი დეკორაციების, კვებითი ზონების და ლაუნჯების მოსაწყობად, ასევე თეატრალური მსვლელობისა და საზაფხულო განწყობის შემქნელ სხვადასხვა აქტივობის ორგანიზებისთვის. ტენდერში მხოლოდ ერთი პრეტენდენტი, შპს „კრეატივ-ჯგუფი“ მონაწილეობდა.

გარდა ამისა, 220 000 ლარი დაიხარჯება ბიუჯეტიდან  მუსიკალური პროგრამისთვის [ადგილობრივი და მოწვეული სოლო შემსრულებლებისა და ბენდების უზრუნველსაყოფად, ასევე საბავშვო გასართობი პროგრამების, თეატრალური წარმოდგენების, ანიმაციური გმირების შოუს, პანტომიმის, ილუზიონისტის შოუს, კოსტიუმირებული მსვლელობების, დრამების შოუსა და საღამოს პროგრამის სასცენო სრული ნაწილის ორგანიზებისთვის]. ეს ტენდერი შპს „მარკამ“ მოიგო.

ასევე, 102 300 ლარი ბიუჯეტიდან ფესტივალის სცენის მოსაწყობად დაიხარჯება. ამ ტენდერში გამარჯვებული ტენდერის ერთადერთი მონაწილე, შპს „ჯითი ჰოლდინგია“. 

_____________________________________

ფოტო: აჭარის ტურიზმისა და კურორტების დეპარტამენტი

საქართველოს პროკურატურის ცნობით, ზესტაფონის რაიონულმა სასამართლომ ნარკოტიკული საშუალების უკანონო შეძენა, შენახვა, გასაღების და ჯგუფურად გასაღების მცდელობის ფაქტებზე ერთი პირს 13 წლით თავისუფლების აღკვეთა განუსაზღვრა.

„სასამართლო პროცესზე დადასტურდა, რომ ბრალდებულმა უკანონოდ შეიძინა და ინახავდა ნარკოტიკულ საშუალებებს 1,4889 გრ. „ალფა-პვპ-ს“ და 0,087 გრ. „მეთადონს“. ნარკოტიკული საშუალების ნაწილი მან ქუთაისში და ზესტაფონის მუნიციპალიტეტში გაასაღა, ხოლო ნაწილის გასაღებას ბათუმში და ქობულეთის მუნიციპალიტეტში, სხვა პირთან ერთად, ჯგუფურად ცდილობდა“ – წერს პროკურატურა.

დაკავებულს ბრალდება საქართველოს სისხლის სამართლის კოდექსის 260-ე მუხლის პირველი, მეოთხე და 19, 260-ე მუხლის მეოთხე ნაწილით და მეხუთე ნაწილის „ბ“ ქვეპუნქტით (ნარკოტიკული საშუალების უკანონო შეძენა, შენახვა, გასაღება. ნარკოტიკული საშუალების უკანონო გასაღების მცდელობა, გასაღების მცდელობა ჯგუფურად) ჰქონდა წარდგენილი.

ზესტაფონის რაიონულმა სასამართლომ ბრალდებული დამნაშავედ ცნო წარდგენილ ბრალდებაში და სასჯელის სახედ და ზომად 13 წლით თავისუფლების აღკვეთა განუსაზღვრა.