რუსეთის მიერ დასავლეთ უკრაინის დაბომბვის გამო პოლონეთმა და უკრაინის სხვა მოკავშირეებმა საბრძოლო ავიაცია აამოქმედეს – წერს „დოიჩე ველე“.
გამოცემის ცნობით, პოლონეთმა და მოკავშირეებმა ოთხშაბათს, 12 ივნისის ღამეს, რუსეთის მიერ უკრაინის დაბომბვის გამო სამხედრო თვითმფრინავები ააფრინეს.
პოლონეთის შეიარაღებული ძალების ოპერატიულმა სარდლობამ გაავრცელა შემდეგი გაფრთხილება:
„გთხოვთ, გაითვალისწინოთ, რომ ქვეყნის სამხრეთ-აღმოსავლეთ ნაწილში შეიძლება მოიმატოს ხმაურის დონემ, რომელიც ჩვენს საჰაერო სივრცეში პოლონეთისა და მოკავშირეთა თვითმფრინავების ფრენას უკავშირდება“.
პოლონელმა სამხედროებმა განაცხადეს, რომ ისინი აკვირდებოდნენ რუსული შორეული ავიაციის საქმიანობას, რომელიც სამიზნეებზე (მათ შორის დასავლეთ უკრაინაში), თავდასხმებს ახორციელებდა ფრთოსანი რაკეტებითა და „შაჰედებით“ . რუსული ავიაციის ასეთი აქტივობა უკრაინის დასავლეთ ნაწილში ბოლოს 6-7 ივნისს დაფიქსირდა.
„პოლონეთის საჰაერო სივრცის უსაფრთხოების უზრუნველსაყოფად საჭირო ყველა პროცედურა გააქტიურებულია, შეიარაღებული ძალების ოპერატიული სარდლობა მუდმივად აკონტროლებს სიტუაციას“, – ნათქვამია განცხადებაში.
კიევის საქალაქო სამხედრო ადმინისტრაციამ განაცხადა, რომ ოთხშაბათს, ღამით, კიევზე საჰაერო თავდასხმა განხორციელდა დრონებისა და ფრთოსანი რაკეტების გამოყენებით.
საჰაერო იერიში დაახლოებით ორ საათს გაგრძელდა, თუმცა უკრაინის საჰაერო თავდაცვის სისტემებმა ჩამოაგდეს ყველა საჰაერო სამიზნე. ნამსხვრევების ჩამოვარდნის შედეგად კიევში, სამრეწველო ობიექტში, ხანძარი გაჩნდა და ერთი ადამიანი დაშავდა.
გარდა ამისა, წუხელ და დილით ორჯერ გამოცხადდა საჰაერო თავდასხმის განგაში მთელ უკრაინაში. ნგრევის მასშტაბები ზუსტდება.
