გარემოს დაცვისა და სოფლის მეურნეობის სამინისტროს დაცული ტერიტორიების სააგენტოს ცნობით, გურიაში ეროვნული პარკის შექმნა იგეგმება.
ეროვნული პარკი ჩოხატაურის მუნიციპალიტეტში გაიხსნება.
სამუშაო შეხვედრა ადგილობრივი მუნიციპალიტეტის წარმომადგენელთან და მხარის გუბერნატორთან, ჩოხატაურის მერიაში გაიმართა. სააგენტოს ცნობით, უახლოეს მომავალში დაიწყება წინა საპროექტო კვლევები და მოხდება იმ ტერიტორიების იდენტიფიცირება, სადაც შემდგომ ეროვნული პარკი შეიქმნება.
წინასწარი ინფორმაციით, შესწავლის პროცესი 2021 წლამდე დამთავრდება.
გურიის ეროვნული პარკის შექმნის პროცესი ბუნების დაცვის მსოფლიო ფონდის (WWF) მხარდაჭერით მიმდინარეობს.
ჩოხატაურის მუნიციპალიტეტში 1 დაბა და 23 სოფელია. მოსახლეობის რაოდენობა სულ 24 658 ადამიანია.
ეროვნული პარკი იქმნება ეროვნული და საერთაშორისო მნიშვნელობის, ბუნებრივი მშვენიერებით გამორჩეული ეკოსისტემების დასაცავად და არსებული ბიომრავალფეროვნების კონსერვაციის მიზნით. გარდა აღნიშნულისა, ეროვნული პარკი მნიშვნელოვან როლს ასრულებს ეკოტურიზმის განვითარებაში.
ამჟამად, საქართველოში 12 ეროვნული პარკია, მათგან სამი – მაჭახელას, კინტრიშის და მტირალას ეროვნული პარკები – აჭარაში მდებარეობს.
__________
ფოტოზე: გურია, ჩოხატაური, ბახმაროსკენ მიმავალი გზა.
ფოტო: „ბათუმელები“/თედო ჯორბენაძე
