ბათუმში, გორგასლისა და თაყაიშვილის ქუჩების კვეთაში ტროტუარი რკინისა და შუშის კონსტრუქციით შემოღობეს. აქ კაფე რამდენიმე წელია ფუნქციონირებს, თუმცა როგორც ჩანს, ახლა მისი რეკონსტრუქცია გადაწყვიტეს. ტროტუარზე კაფესთვის ადგილის მოწყობის სამუშაოები ჯერ დასრულებული არ არის.
ტროტუარზე კაფეს მოსაწყობად აქ მეტლახს აგებენ, კონსტრუქცია კი პირდაპირ უსინათლოთა ბილიკზე დგას.
ალბათ მსოფლიოში იშვიათად მოიძებნება ქალაქი, სადაც უსინათლოთა ბილიკის მოსაწყობად ბიუჯეტიდან ფულს ხარჯავენ, შემდეგ კი ამ ბილიკზე რკინისა და შუშის კონსტრუქციის დადგმის შესაძლებლობას აძლევენ მას, ვისაც უსინათლოთა უსაფრთხოდ გადაადგილება არ ადარდებს.
ამ ფოტოზე ჩანს, სად მიგიყვანთ უსინათლოთა ბილიკი
აქ უფრო ახლოდან ნახავთ, სად წყდება უსინათლოთა ბილიკი – ფაქტობრივად აქ გადაადგილება უსინათლოსთვის ორმაგად სახიფათო შეიძლება იყოს
კაფე
ბათუმის ურბანული პოლიტიკა და მიტაცებული საჯარო სივრცეები დიდი ხანია საზოგადოების კრიტიკის საგანია, თუმცა არაფერი იცვლება. მომავალ წელს თვითმმართველობის არჩევნები უნდა ჩატარდეს, ბათუმს კი ჯერ ისევ არ აქვს უკვე მრავალჯერ დაპირებული გენგეგმა.
