უკრაინის შეიარაღებული ძალების მთავარსარდალი ალექსანდრე სირსკი ამბობს, რომ რუსეთის მოქმედებები, რომელიც ცდილობს წაიწიოს ხარკოვის ფრონტზე, უკრაინის საბრძოლო ფორმირებების სიღრმეში და შექმნას ე.წ. „უსაფრთხოების სარტყელი“, წარუმატებელია.
„მოწინააღმდეგე ჩარჩენილია ვოლჩანსკში, მიუხედავად ძალებისა და საშუალებებისა, რომელსაც მუდმივად ავსებს სხვა მიმართულებების დანაყოფებიდან“ – ამბობს სირსკი.
მისი თქმით, მოწინააღმდეგე აგრძელებს სხვადასხვა ინტენსივობის აქტიურ შეტევით ოპერაციებს პრაქტიკულად მთელ ფრონტზე, ძირითადი ძალისხმევა ფოკუსირებულია პოკროვსკის და კურახოვსკის მიმართულებებზე.
სირსკის განცხადებით, ამ მიმართულებებით სასტიკი ბრძოლა უკვე რამდენიმე თვეა მიმდინარეობს და ამ ხნის მანძილზე უკრაინელი ჯარისკაცები აკავებენ მოწინააღმდეგეს.
ბრძოლა გრძელდება ჩასივ-იარში, კლეშჩეევკასა და კალინოვკას რაიონებში. რუსეთი ცდილობს ამ დასახლებების ხელში ჩაგდებას.
ასევე, სირსკის განცხადებით, წარუმატებელია რუსეთის შტურმი ბელოგოროვკაზე, ლუგანსკის რეგიონში.
„მოწინააღმდეგე ორი მიმართულებით მიისწრაფვის სევერსკისკენ, მაგრამ ყოველ ჯერზე უკან ბრუნდება“- აღნიშნავს ალექსანდრ სირსკი.
მთავარსარდლის განცხადებით, პრაქტიკულად უშედეგოა აგრესორის მიერ განხორციელებული შეტევითი მოქმედებები ზაპოროჟიეს მიმართულებით.
ამავდროულად, სირსკი თავის განცხადებაში აღნიშნავს, რომ უკრაინის თავდაცვის ძალებმა უნდა მოიპოვონ უპირატესობას მტერზე, „შეამცირონ დანაკარგები და რაც მთავარია – შეცვალონ თავდაცვითი და შეტევითი ფსიქოლოგია, რაც მნიშვნელოვანი ნაბიჯი იქნება გამარჯვების გზაზე“.
