სამოქალაქო ავიაციის სააგენტოს მონაცემებით, 2019 წლის ცხრა თვის განმავლობაში, საქართველოს აეროპორტები ჯამში 4 139 955 მგზავრს მოემსახურა.

სააგენტოს ცნობით, 2018 წლის ანალოგიურ პერიოდთან შედარებით, მგზავრთნაკადი 5.40%-ით არის გაზრდილი. დაფიქსირებული მაჩვენებელი დაახლოებით 9-10%-ით ჩამორჩება სააგენტოს საპროგნოზო მონაცემებს მოცემული პერიოდისთვის, რაც, სააგენტოს განცხადებით, 8 ივლისიდან საქართველოსა და რუსეთს შორის საჰაერო მიმოსვლის შეწყვეტას უკავშირდება.

მგზავრთა გადაყვანის მაჩვენებელი საქართველოს საერთაშორისო აეროპორტებში ასე ნაწილდება:

[checklist]

• თბილისის საერთაშორისო აეროპორტი ცხრა თვეში 2 971 398 მგზავრს მოემსახურა, რაც 0.68%-ით (20 180 მგზავრით) მეტია 2018 წლის ანალოგიური პერიოდის სტატისტიკაზე.
• ბათუმის საერთაშორისო აეროპორტის მეშვეობით 524 068 მგზავრი იქნა გადაყვანილი, რაც 2.01%-ით (10 336 მგზავრით) მეტია გასული წლის ამავე პერიოდის მაჩვენებლებზე.
• ქუთაისის საერთაშორისო აეროპორტში გადაყვანილ იქნა 629 618 მგზავრი, სულ 179 201 მგზავრით მეტი ვიდრე 2018 წლის ანალოგიურ პერიოდში. ამ აეროპორტში მგზავრთნაკადი 39.79%-ით გაიზარდა.

[/checklist]

სამოქალაქო ავიაციის სააგენტოს მონაცემებით, რაც შეეხება ადგილობრივი დანიშნულების აეროპორტებს, მესტია მიმდინარე წლის 9 თვის განმავლობაში 6 497 მგზავრს მოემსახურა, რაც 1 093 მგზავრით, შესაბამისად 20.23%-ით მეტია ვიდრე გასულ ანალოგიურ პერიოდში გადაყვანილი მგზავრების რაოდენობა. ამბროლაურის აეროპორტმა განვლილ ცხრა თვეში 1 519 მგზავრი მიიღო, რაც 193 მგზავრით მეტია (15%) ვიდრე გასული წლის ანალოგიურ პერიოდში მგზავრების რაოდენობა.

სააგენტოს ცნობით, 2019 წლის განვლილი ცხრა თვის განმავლობაში საქართველოს აეროპორტებში 512 რეისით მეტი განხორციელდა, ვიდრე გასული წლის სამ კვარტალში. სამგზავრო და სატვირთო რეისების რაოდენობა სულ იყო – 19 307, აქედან რეგულარული რეისების რაოდენობაა 16 901, ხოლო ჩარტერების  – 2 406. 2018 წლის ანალოგიურ პერიოდში განხორციელებული რეისების რაოდენობასთან შედარებით, ზრდა 2.72%-ს შეადგენს. უმნიშვნელო კლება დაფიქსირდა სატვირთო გადაზიდვების კუთხით. მიმდინარე წლის პირველი ცხრა თვის მონაცემებით, საჰაერო გზით გადაზიდული ტვირთის მოცულობამ 18 507.686 ტონა შეადგინა, რაც 380.08 ტონით, შესაბამისად, 2.01%-ით ნაკლებია, ვიდრე წინა წლის ანალოგიურ პერიოდში გადაზიდული ტვირთის ოდენობა.

სააგენტოს ინფორმაციით, 2019 წლის მესამე კვარტალში, საქართველოს აეროპორტებში საჰაერო ხომალდების აფრენა-დაფრენის რაოდენობა წინა წლის ამავე პერიოდთან შედარებით 13%-ით შემცირდა, რაც ასევე საქართველოსა და რუსეთს შორის საჰაერო მიმოსვლის შეწყვეტას უკავშირდება.

ბათუმის სასტუმრო „შერატონიდან“ შავი კვამლი ამოდის. სახანძრო სამსახურში „ბათუმელებს“ უთხრეს, რომ ეს არ არის ხანძარი.

„გაზი რომ არ არის, დიზელზე მუშაობენ. გენერატორის კვამლია“, – ასე ახსნეს შესამჩნევი კვამლი, რომელიც სასტუმროს კოშკიდან ამოდის.

ბათუმს დღეიდან სავარაუდოდ 2 დღით ბუნებრივი აირის მიწოდება შეუწყდა.

აჭარის ახალგაზრდობის რეგიონულ ცენტრში  ხუთი ვაკანტური ადგილის შესავსებად კონკურსი გამოაცხადეს, მათ შორის ისევ არ არის ახალგაზრდული ცენტრის ხელმძღვანელის პოზიცია. ამ თანამდებობაზე დავით მიქელაძე მოვალეობის შემსრულებლად რჩება.

ახალგაზრდული ცენტრის ხელმძღვანელის თანამდებობაზე  აჭარის მთავრობას კონკურსი ერთხელ უკვე გამოცხადებული ჰქონდა, თუმცა განათლების ახალი მინისტრის, მაია ხაჯიშვილის დანიშვნის შემდეგ, კონკურსი ჩაშლილად გამოაცხადეს. როგორც  მინისტრმა მოგვიანებით ახსნა, მიზეზი კვალიფიკაციასთან დაკავშირებული მოთხოვნები იყო, მან კონკურსით გათვალისწინებული მოთხოვნები არასაკმარისად მიიჩნია.

ხუთივე თანამდებობაზე საკონკურსო მოთხოვნებშია  უმაღლესი განათლება, კომპიუტერული პროგრამების ცოდნა, ინგლისური ენის ბ1- დონეზე ფლობა და სამუშაო გამოცდილება.

ხუთი საკონკურსო თანამდებობიდან ოთხზე სახელფასო სარგოდ 1400 ლარია მითითებული, გამონაკლისია მხოლოდ ადმინისტრაციული რესურსების მართვის სამსახურის უფროსის თანამდებობა, სადაც სახელფასო სარგოს სახით 2300 ლარია მითითებული, ამ შემთხვევაში განსხვავებულია მოთხოვნებიც. კონკურსანტს უნდა ჰქონდეს მუშაობის სამწლიანი გამოცდილება და იურისტის ან ფინანსისტის გამოცდილება, მათ შორის, ხელმძღვანელ პოზიციაზე მუშაობის არანაკლებ 1-წლიანი გამოცდილება.

კონკურსი გამოცხადებულია ასევე ინტელექტუალურ-კულტურული და საერთაშორისო პროექტების მართვის განყოფილების მეორე კატეგორიის უფროსი სპეციალისტის თანამდებობაზე. საკონკურსო მოთხოვნების მიხედვით, ამ თანამდებობის დაკავების მსურველს უნდა ჰქონდეს უმაღლესი განათლება, ერთწლიანი სამუშაო გამოცდილებით.

კონკურსანტი უნდა ფლობდეს ასევე კომპიუტერულ პროგრამებსა და ინგლისურ ენას [ბ1 დონე]. ამ თანამდებობაზე დასაქმებულის ხელფასი 1400 ლარი იქნება.

კონკურსი გამოცხადებულია ასევე შემეცნებითი და გასართობი პროექტების მართვის განყოფილების მეორე კატეგორიის უფროსის სპეციალისტის თანამდებობაზე, საკონკურსო მოთხოვნები და განსაზღვრული სახელფასო სარგო იდენტურია.

ახალგაზრდულმა ცენტრმა კონკურსი გამოაცხადა ასევე  ფინანსური უზრუნველყოფის განყოფილების  მეორე კატეგორიის უფროსი სპეციალისტის [ბუღალტერი] შესარჩევად. ამ შემთხვევაში კონკურსანტი უნდა ფლობდეს ეკონომისტის კვალიფიკაციას. გარდა ამისა, საკონკურსო პირობა 2-წლიან სამუშაო გამოცდილებას ითხოვს. სახელფასო სარგო ამ თანამდებობაზეც იდენტურია.

საკონკურსო პირობები იდენტურია ადმინისტრაციულ-სამართლებრივი უზრუნველყოფის განყოფილების მეორე კატეგორიის უფროსი სპეციალისტის თანამდებობაზეც [საქმისმწარმოებელი].

აჭარის საარქივო სამმართველოში ორ თანამდებობაზე კონკურსი გამოცხადებული აქვს აჭარის განათლების სამინისტროსაც. [ ეს უწყება განათლების სამინისტროს ექვემდებარება]

კონკურსი გამოცხადებულია საინფორმაციო ტექნოლოგიებისა და დიგიტალიზაციის განყოფილების მეორე კატეგორიის უფროსი სპეციალისტისა  [რედაქტორი] და დაკომპლექტებისა და დოკუმენტების სამეცნიერო-ტექნიკური დამუშავების სამსახურის პირველი კატეგორიის უფროსი სპეციალისტის თანამდებობებზე. პირველ შემთხვევაში ხელფასი 1500 ლარი, მეორე შემთხვევაში კი – 1400 ლარია.

ახალგაზრდულ ცენტრში სულ 25 შტატია გათვალისწინებული.

„შეინიშნება პროკურატურის მხრიდან პატიმრობის მოთხოვნის მაჩვენებლის ზრდის ტენდენცია და კრიტიკულად მაღალია სასამართლოს მხრიდან პატიმრობის მოთხოვნის დაკმაყოფილების მაჩვენებელი,“ – აღნიშნულია „ახალგაზრდა იურისტთა ასოციაციაის“ ახალ ანგარიშში, რომელშიც სასამართლო პროცესების მონიტორინგის შედეგებია შეჯამებული გასული წლის თებერვლიდან 2019 წლის თებერვლის ჩათვლით. საია-ს იურისტები სასამართლო პროცესებს აკვირდებოდნენ ბათუმში, თბილისში, ქუთაისში, გორსა და თელავში. ეს ორგანიზაცია მსგავს მონიტორინგს 2011 წლიდან ამზადებს.

საია-ს მონიტორინგმა აჩვენა, რომ უმრავლეს შემთხვევაში [83%] სასამართლო არ ამოწმებს დაკავების კანონიერებას.

„სასამართლო მონიტორინგმა აჩვენა, რომ სასამართლო ნაკლები გულმოდგინებით ეკიდება პატიმრობის პერიოდული გადასინჯვის საკითხს და თითქმის ყველა შემთხვევაში უცვლელად ტოვებს პატიმრობას, ხოლო უმრავლეს შემთხვევაში, სასამართლო სხდომაზე არ ასაბუთებს პატიმრობის ვადის გაგრძელების აუცილებლობას,“ – წერია საია-ს ანგარიშში.

მონიტორინგი შეეხო საპროცესო შეთანხმების ნაწილსაც. საია-ს შეფასებით, სასამართლო იშვიათად მსჯელობს სასჯელის კანონიერებასა და სამართლიანობაზე. ეს ის შემთხვევაა, როცა ბრალდებული წარდგენილ ბრალს აღიარებს, ურიგდება პროკურატურას და სასამართლო განხილვა წყდება.

„საქმის არსებითი განხილვის სხდომებზე დაკვირვებამ გამოავლინა არაერთი შემთხვევა, როდესაც პროცესები ჭიანურდებოდა, კერძოდ, სხდომები დაგვიანებით იწყებოდა ან, საკმაოდ ხშირად, გახსნისთანავე ხდებოდა მათი გადადება… საანგარიშო პერიოდში ბრალდებულის პირველი წარდგენის სხდომებზე დაკვირვებისას გამოიკვეთა, რომ მკვეთრად არის გაზრდილი ოჯახური დანაშაულების პროცენტული მაჩვენებელი, რაც სამართალდამცავი ორგანოების მხრიდან დანაშაულის გამოვლენის გაზრდილ რაოდენობაზე მიუთითებს“, – ვკითხულობთ საია-ს ანგარიშში.

საია-ს დასკვნაში საუბარია ნარკოდანაშაულებზეც. ორგანიზაციის შეფასებით, ამ კუთხით საკონსტიტუციო სასამართლოს მიერ მიღებული გადაწყვეტილებების შემდეგ კანონმდებლობას ხარვეზები აქვს. „აუცილებელია საკონსტიტუციო სასამართლოს გადაწყვეტილებების შესაბამისად დაიხვეწოს ნარკოტიკული საშუალებების ოდენობების ნუსხა და დაწესდეს ადეკვატური სასჯელები,“ – წერია საია-ს ანგარიშში.

„სასამართლო პროცესების მონიტორინგი ცხადყოფს, რომ სისხლის სამართალწარმოება ხარვეზებით მიმდინარეობს, თუმცა, გარკვეულ საკითხებში შეინიშნება გაუმჯობესებული მიდგომები,“ – მიიჩნევენ „ახალგაზრდა იურისტთა ასოციაციაში“.

„შუახევიჰესი“ სატესტო ოპერირებისთვის ემზადება. კომპანიის ცნობით, სამშენებლო სამუშაოების დიდი ნაწილი უკვე დასრულებულია და 2019 წლის ნოემბრის ბოლოს დაგეგმილია 9 მეგავატი სიმძლავრის „სხალთაჰესის“ სატესტო რეჟიმში ოპერირების დაწყება, 2020 წლის დასაწყისში კი – 178 მეგავატი სიმძლავრის „შუახევიჰესის“ ელექტროსადგურის გაშვება 50%-იანი დატვირთვით.

კომპანიის ცნობით, 2020 წლის გაზაფხულზე „შუახევიჰესი“ და „სხალთაჰესი“ სრული დატვირთვით შევა ოპერირებაში.

ოპერირება „შუახევიჰესმა“ 2017 წელს დაიწყო, თუმცა 38 კილომეტრი სიგრძის გვირაბის, ჯამურად 300-მეტრიანი მონაკვეთის რამდენიმე ადგილას დაზიანების გამო ჰესის ოპერირება შეჩერდა.

„ჩატარებული კვლევების თანახმად დადგინდა, რომ გვირაბში წყლის ინტენსივობის შედეგად შემცირებულმა ქანების სიმძლავრემ გამოიწვია დამონტაჟებული საყრდენის გადატვირთვა და შემდგომ გვირაბის დაზიანება. სამშენებლო სამუშაოების განახლებამდე ჩატარდა ყოვლისმომცველი კვლევები, ტესტირებისთვის აღებულ იქნა 1,000-ზე მეტი ქანის ნიმუში, კვლევებზე დაყრდნობით მომზადდა ქანების გამაგრების სტრატეგია ,,ფაზა 2-სთვის“. პროცესში მონაწილეობდნენ ექსპერტები მთელი მსოფლიოდან, მათ შორის: 3G Austria და პროფესორი ლუის დემელო, Zeidler Associates, Lahmeyer (ამჟამად Tractebel), შუახევი ჰესის პროექტის მენეჯერად მოწვეულ იქნა პიტერ პიტსი, გვირაბის მშენებლობის მიმართულებით, ერთერთ საუკეთესო სპეციალისტი მსოფლიოში,“ – აღნიშნულია კომპანიის მიერ მოწოდებულ პრესრელიზში.

„შუახევიჰესის“ პროექტის მფლობელები არიან: ნორვეგიული „ქლინ ენერჯი ინვესტი“, ინდური „ტატა ფაუერი“ და მსოფლიო ბანკის ჯგუფის წევრი, საერთაშორისო საფინანსო
კორპორაცია IFC-ი. „შუახევიჰესი“ ევროპის რეკონსტრუქციისა და განვითარების ბანკის (EBRD), აზიის განვითარების ბანკისა (ADB) და IFC-ის მიერ ფინანსდება.

______________________

ფოტოზე: „შუახევიჰესის“ ელექტროსადგური. ფოტო: „შუახევიჰესი“ 

ვრცლად ამ თემაზე: 

„ყველაზე დიდი თანხა – 697 105 ლარი გამარტივებული შესყიდვების გზით ბათუმის კულტურის ცენტრმა დახარჯა,“ – აღნიშნულია „საერთაშორისო გამჭვირვალობა საქართველოს“ ახალ კვლევაში. ორგანიზაციამ ის გამარტივებული შესყიდვები შეისწავლა, რომლითაც ბოლო ორი წლის განმავლობაში ბათუმში საზეიმო ღონისძიებები ჩატარდა. კვლევის შედეგად გამოჩნდა, რომ საქმე „მანკიერ პრაქტიკასთან“ გვაქვს, რადგან საზეიმო ღონისძიებები წინასწარ განსაზღვრულია და ამ დროს საბიუჯეტო ორგანიზაციებს გამარტივებული შესყიდვა არ უნდა სჭირდებოდეს.

კვლევის მიხედვით, 2017-2019 წლებში ბათუმში საზეიმო ღონისძიებებისთვის 1 მილიონ 493 ათას 385 ლარის სახელმწიფო შესყიდვა განხორციელდა, საიდანაც 827 735 ლარი [ჯამური თანხის დაახლოებით 55%] გამარტივებული შესყიდვების გზით გაიხარჯა.

2017-2019 წლებში ბათუმის კულტურის ცენტრმა, ტურისტული პროდუქტების განვითარების სააგენტომ და აჭარის განათლების, კულტურისა და სპორტის სამინისტრომ საზეიმო ღონისძიებების მოსაწყობად 33 გამარტივებული შესყიდვა გააფორმეს, რომელთა ჯამური ღირებულება 827 735  ლარი იყო.

„2017-2019 წლებში „ბათუმობისადმი“ მიძღვნილი ყველა ღონისძიება უტენდეროდ ჩატარდა და ჯამში 249 558 ლარის ოდენობის 18 პირდაპირი შესყიდვა გაფორმდა; 26 მაისის ღონისძიებებისთვის გამოყოფილი თანხის 81% ასევე უტენდეროდ დაიხარჯა. რაც შეეხება ტურისტული სეზონის გახსნას და საახალწლო ღონისძიებებს, აქ გახარჯულ თანხაში გამარტივებული შესყიდვების წილი 46% და 31%-ია,“ – აღნიშნულია კვლევაში.

„საერთაშორისო გამჭვირვალობა საქართველოს“ კვლევაში ხაზგასმულია ეჭვებიც ინტერესთა კონფლიქტის არსებობაზე.

„გამარტივებული შესყიდვების კონტრაქტორი კომპანიებიდან ერთ-ერთი –  ბათუმის კულტურის ცენტრის სამხატვრო ხელმძღვანელის, ანა სიხარულიძის კომპანია „ი(ნ)ვენტ პროდაქშენსია“. 2017 წელს აჭარის კულტურის სამინისტრომ ტურისტული სეზონის გახსნის ღონისძიებების ორგანიზება სწორედ ამ კომპანიას 105 500 ლარად დაუკვეთა. ჩვენმა ორგანიზაციამ ამ ფაქტთან დაკავშირებით ინტერესთა კონფლიქტის არსებობაზე ეჭვები მაშინაც გამოთქვა.“ – წერია კვლევაში.

კვლევაში მოხვდა ბათუმის კულტურის ცენტრის მიერ „ჯეო ივენთთან“ გაფორმებული ხელშეკრულებაც 56 980 ლარზე. ეს კომპანია ხელშეკრულების გაფორმებამდე ერთი თვით ადრე დაფუძნდა. კვლევის ავტორებმა მერიის აუდიტის სამსახურს ამ კონტრაქტის დაინტერესებისკენ მოუწოდეს.

„მნიშვნელოვანია, არტისტების შერჩევისთვის გამჭვირვალე და განჭვრეტადი კრიტერიუმები ჩამოყალიბდეს, რათა მინიმუმამდე იქნეს დაყვანილი კორუფციის რისკები… ამასთან, ხშირად ის კომპანიები, რომლებსაც აღნიშნული ღონისძიებების მოსაწყობად გამარტივებულ შესყიდვებს უფორმებენ, მსგავსი ტიპის მომსახურების მისაღებად გამოცხადებულ სახელმწიფო შესყიდვებშიც უმეტესად უკონკურენტოდ იმარჯვებენ, რაც კულტურის სფეროს ბაზარზე არაჯანსაღი კონკურენციის შთაბეჭდილებას ტოვებს,“ – წერია „საერთაშორისო გამჭვირვალობა საქართველოს“ კვლევაში.

საქართველოს კულტურული მემკვიდრეობის დაცვის სააგენტომ მესტვირეობის ტრადიციას საქართველოში – გუდასტვირის/ჭიბონის დამზადება, ოსტატ-შეგირდობა,
საშემსრულებლო ხელოვნება და მესტვირული პოეზია – არამატერიალური კულტურული მემკვიდრეობის ძეგლის სტატუსი მიანიჭა.

საქართველოს კულტურული მემკვიდრეობის დაცვის ეროვნული სააგენტოს გენერალურმა დირექტორმა ნიკოლოზ ანთიძემ შესაბამის ბრძანებას ხელი 27 სექტემბერს მოაწერა.

საქართველოს არამატერიალური კულტურული მემკვიდრეობის ძეგლთა სიაში ამჟამად 50 ძეგლია. მათგან ორი – ქართული მრავალხმიანობა და ქვევრის ღვინის დაყენების უძველესი ქართული ტრადიციული მეთოდი, იუნესკოს არამატერიალური კულტურული მემკვიდრეობის ძეგლების სიაშია.

________

ფოტოზე: თემურ არძენაძე, ჭიბონის ოსტატი ქედიდან. კადრი პირველი არხის ვიდეომასალიდან. 

ამავე თემაზე: 

დიდი ბრიტანეთისა და ჩრდილოეთ ირლანდიის გაერთიანებული სამეფოს ელჩი საქართველოში, ჯასტინ მაკკენზი სმიტი გასულ კვირას ბათუმში იმყოფებოდა. ელჩი ბათუმში დიდ ბრიტანეთსა და საქართველოს შორის განსაკუთრებული მეგობრობის აღსანიშნავ ღონისძიებას დაესწრო. „ბათუმელები“ დიდი ბრიტანეთის ელჩს საქართველოსა და დიდ ბრიტანეთს შორის ურთიერთობებზე, 2020 წლის არჩევნებზე, „გავრილოვის ღამის“ გამოძიებასა და სხვა თემებზე ესაუბრა.

• მინდა პირველივე შეკითხვა ბათუმში მიმდინარე  ღონისძიებასთან დაკავშირებით დაგისვათ, ამჟამად ბათუმში მიმდინარეობს ალიანსის საბჭოს შეხვედრა და საინტერესოა თქვენი მოსაზრება, ხედავთ თუ არა საქართველოს პროგნოზირებად მომავალში როგორც ნატოს წევრ ქვეყანას ან რა პირობები უნდა არსებობდეს იმისთვის, რომ საქართველო იყოს ნატოს წევრი? 

სასიამოვნო იყო აქ, ბათუმში ყოფნა, ჩრდილოატლანტიკური საბჭოს  რიგით მეხუთე ვიზიტის დროს საქართველოში. ეს ვიზიტი კიდევ ერთი დემონსტრირებაა ნატოს მხრიდან საქართველოსადმი პარტნიორობისა და მხარდაჭერის.

გაერთიანებული სამეფო მხარს უჭერს ბუქარესტის ნატოს სამიტის გადაწყვეტილებას, რომ საქართველო გახდება ნატოს წევრი ქვეყანა. 2008 წლის შემდეგ ჩვენ ვმუშაობთ საქართველოსთან და ნატოს მოკავშირეებთან ერთად, რათა მხარი დავუჭიროთ საქართველოს რეფორმებს თავდაცვის და უსაფრთხოების მიმართულებით.

2019 წელს, უელსის ნატოს სამიტიდან ხუთი წლის თავზე, არ შეიძლება არ აღვნიშნოთ საქართველო-ნატოს თანამშრომლობის ძირითადი პაკეტი, რომელიც მოკავშირეებმა უელსის სამიტზე შესთავაზეს საქართველოს.

რეალურად, ეს არის პარტნიორული შეთანხმების ერთ-ერთი ყველაზე ფართო პაკეტი ნატოსა და სხვა ნებისმიერ ქვეყანას შორის და ეს ასეც უნდა იყოს, იმიტომ, რომ ჩვენ ვაღიარებთ იმ მნიშვნელოვან წვლილს, რომელიც საქართველოს შეაქვს საერთაშორისო უსაფრთხოების განმტკიცების საქმეში, ნატოს, ევროკავშირისა და სხვა საერთაშორისო სამშვიდობო მისიებში ჩართულობით. ჩვენი ყველას საერთო ინტერესია ამ რეგიონის სტაბილურობა.

• საქართველოს ხელისუფლებას ბოლო წლებში ოპონენტები ხშირად აკრიტიკებენ რუსეთთან პოლიტიკის შერბილების გამო. თქვენი დაკვირვებით, აქვს თუ არა შედეგი რუსეთთან შერბილების/დათმობის პოლიტიკას? 

მე კარგად ვიცი იმ წნეხისა და ზეწოლის შესახებ, რომელსაც ბევრი ქართველი გრძნობს ყოველდღე რუსეთის პოლიტიკის შედეგად. პირველ რიგში,  ვფიქრობ, საქართველოს მოქალაქეებზე, რომლებიც ცხოვრობენ გამყოფ ხაზებთან, რომელიც კვეთს მთელ საქართველოს  და როგორი, ყოვლად მიუღებელი გავლენა აქვს ამ გაყოფას მათ ყოველდღიურ ცხოვრებაზე, მათ უფლებებზე.

ასევე, ვფიქრობ იმ ასობით ათას ქართველზე, რომლებიც რუსული პოლიტიკის შედეგად ათწლეულებია უკვე საკუთარ ქვეყანაში იძულებით გადაადგილებულ პირებად მიიჩნევიან და ყველა ადამიანზე საქართველოში, რომელთა ცხოვრებაც შეიცვალა რუსეთის მიერ მხარდაჭერილი კონფლიქტების შედეგად.

ჩემთვის ყველაზე მნიშვნელოვანია ამ კონფლიქტების მოგვარებისთვის მოიძებნოს ისეთი გზები, რომლებიც მდგრად შედეგებამდე მიგვიყვანს და რომლებიც თანხვედრაშია საქართველოს სუვერენიტეტსა და ტერიტორიული მთლიანობის პრინციპებთან. გეოგრაფია გეოგრაფიაა, ისტორია – ისტორიაა, რუსეთი საქართველოს მეზობელია და დარჩება საქართველოს მეზობლად. ასე, რომ მესმის, რატომ უწევთ მთავრობებს ეძებონ თანაარსებობის გზები და ამავდროულად, დაიცვან თავიანთი მოქალაქეებისა და ქვეყნების ინტერესები. ეს განსაკუთრებით მნიშვნელოვანია დაძაბულობის  დროს და გასაგებია, თუკი მთავრობა ეძებს ამ დაძაბულობის შემცირების გზებს და ეს გონივრული ქმედებაა. თუმცა ცხადია, ეს არ ნიშნავს კომპრომისს, რომელიც იქნება საქართველოს სუვერენიტეტისა და ტერიტორიული მთლიანობის დათმობის ხარჯზე. აქვე მინდა კიდევ ერთხელ ხაზი გავუსვა დიდი ბრიტანეთის ურყევ მხარდაჭერას საქართველოს სუვერენიტეტისა და ტერიტორიული მთლიანობის მიმართ.

•  2016 წელს, არჩევნების წინ, „ლიბერალში“ გამოქვეყნდა თქვენი წერილი, სადაც წერთ, რომ საქართველოში ყველა, ვისაც ხვდებით, გეუბნებათ, რომ პოლიტიკური პროცესებისა და პოლიტიკოსების მიმართ უნდობლობის ხარისხი თანდათან იზრდება. ახლა გვიახლოვდება 2020 წლის საპარლამენტო არჩევნები, რომელსაც წინ უძღოდა „გავრილოვის ღამე“ და აქციების სერია საქართველოს პარლამენტის წინ. როგორ ფიქრობთ, საქართველოში პოლიტიკოსების მიმართ უნდობლობა გაიზარდა თუ შემცირდა? 

ნება მომეცით ვთქვა სამი რამ. პირველი – მე კვლავ მძაფრად ვგრძნობ, რომ ერთ-ერთი ყველაზე ძვირფასი რაც გაგვაჩნია,  ეს არის არჩევნებზე ხმის მიცემის უფლება. მიმაჩნია, რომ ეს უფლება ჩვენ გვაკისრებს ვალდებულებასაც და პასუხისმგებლობასაც და რომ ეს ხმა დიდი სიფრთხილით უნდა გამოვიყენოთ. ეს ეხება როგორც ბრიტანეთს, ისე საქართველოს.

მეორე, რაც მინდა ვთქვა ისაა, რომ, რა თქმა უნდა, მთავარი სხვაობა 2016 წლისა და 2020 წლის არჩევნებს შორის იქნება ძალიან დიდი, ვინაიდან ახლა მიმდინარე ცვლილებებით 2020-ის საპარლამენტო არჩევნები, ახალი, პროპორციული საარჩევნო სისტემით ჩატარდება. ამაზე დისკუსიები და მუშაობა მიმდინარეობს და ვფიქრობ, ძალიან მნიშვნელოვანია, რომ არჩევნები 2020-ში ჩატარდეს რაც შეიძლება ფართო კონსენსუსის შედეგად. სწორედ ეს შექმნის პირობას, 2020-ის არჩევნების შემდგომი პარლამენტი იყოს აქტიური და პლურალისტური.

ასევე, მოვუწოდებდი თითოეულ პარტიას ყურადღებით მიჰყვნენ ეუთოს რჩევებსა და რეკომენდაციებს, რომლებიც გასულ არჩევნებს შემდეგ გამოქვეყნდება და სადაც საუბარია იმაზე, თუ როგორ შეიძლება საარჩევნო სისტემის კიდევ უფრო გაუმჯობესება. ვფიქრობ, ბრიტანეთშიც და საქართველოშიც, ყველანი ყურადღებით უნდა ვიყოთ, რათა არ აღმოვჩნდეთ პერმანენტულ საარჩევნო კამპანიის პირობებში. ეს დიდი ცდუნებაა და მე მესმის. მაგრამ ვისურვებდი, რომ ისევე როგორც ჩემს ქვეყანაში, ასევე საქართველოში, მეტი ყურადღება მიექცეს იმ გამოწვევებს, რომლებიც ახლა დგას და რომელთა გადაჭრაც არ უნდა გადაიდოს 2020-ის არჩევნების შემდეგ.

ჩვენი ყურადღებაც და საქართველოს მთავრობასთან მუშაობაც, იქნება ეს სხვადასხვა რეფორმის თუ პროექტის გარშემო, სწორედ ამისკენ არის მიმართული, რათა მნიშნვნელოვანი საკითხების  არჩევნების შემდგომი პერიოდისთვის  გადადება არ მოხდეს.

• თბილისში 20 ივნისის აქციას თქვენ ტვიტერზე გამოეხმაურეთ და საქართველოს ხელისუფლებას მოუწოდეთ გამჭვირვალედ წარმართულიყო გამოძიება და ასევე, მხარეებს მოუწოდეთ კომპრომისისკენ. რამდენიმე დღის წინ ცნობილი გახდა, რომ 20-21 ივნისის საქმეზე ბრალდებული სპეცრაზმელი გირაოს საფუძველზე გაათავისუფლეს ჯანმრთელობის მდგომარეობის გამო, თუმცა ციხეში რჩება 20 ივნისის ღამეს დაკავებული აქციის მონაწილე, რომელსაც ასევე ჯანმრთელობის პრობლემები აქვს [8ოქტომბერს 20/21 ივნისის საქმეზე ბრალდებული ლევან ჯიქური გირაოს საფუძველზე გაათავისუფლეს]. თქვენი აზრით, რამდენად გამჭვირვალედ და კომპრომისულად წარიმართა გამოძიება?   

ყველას გულითადად თანავუგრძნობ, ვინც დაშავდა, ვისი ცხოვრებაც შეიცვალა 20 ივნისის მოვლენებისას. თითოეულს სრულ და სწრაფ გამოჯანმრთელებას ვუსურვებ. ვფიქრობ, 20 ივნისის მოვლენები საფუძვლიანად და გამჭვირვალედ უნდა იქნეს გამოძიებული.  როდესაც გამოძიების შედეგებს გავეცნობით და თუ გამოძიება დაადგენს, რომ ცალკეულმა ადამიანებმა კანონს გადააბიჯეს ან დაკისრებული ვალდებულებები არაჯეროვნად შეასრულეს, მნიშვნელოვანი იქნება, ამაზე სწორი რეაგირება მოხდეს შესაბამისი სტრუქტურების მხრიდან.

კიდევ ორ რამეს დავამატებდი 20 ივნისის შესახებ. პირველი, როგორც ჩემს ტვიტერზე ვთქვი, ქართველებს უფრო მეტი რამ აერთიანებთ, ვიდრე ჰყოფთ და მოხარული ვარ, როგორც საქართველოს მეგობარი, როდესაც ვხედავ, რომ საზოგადოება უყურებს იმას, რაც მათ აერთიანებს, და არა იმას – რაც მას ხლეჩს. ვფიქრობ, ეს სასიცოცხლოდ მნიშვნელოვანია იმ უახლოესი პერიოდისთვის, რომელიც საქართველოს გასავლელი აქვს.

მეორე რამ, რასაც ვიტყოდი, ვფიქრობ ის არის, რომ მნიშვნელოვანია პოლიტიკოსებმა ყველა პარტიიდან მოუსმინონ,  რას ამბობენ საზოგადოების წევრები, ახალგაზრდები, იმიტომ, რომ გადაწყვეტილებები, რომლებიც ახლა მიიღება, რეალურად მიიღება ახალგაზრდების სახელით, ისევე როგორც საზოგადოების დანარჩენი ნაწილის სახელით. ძალიან მნიშვნელოვანია ახალგაზრდები დემოკრატიულად მიმდინარე პოლიტიკურ პროცესებში იყვნენ წარმოდგენილები და თავს ჩართულად გრძნობდნენ. და ჩვენ, ყველას, გვაკისრია პასაუხისმგებლობა, ხელი შევუწყოთ ამ ჩართულობას. თუ ახალგაზრდები არ იგრძნობენ თავს საკუთარი ქვეყნის პოლიტიკური ცხოვრების და სისტემის მონაწილეებად, ვშიშობ, ეს მომავალში დიდ გამოწვევებს წარმოშობს.

• წელს აღინიშნება დიდ ბრიტანეთსა და საქართველოს შორის განსაკუთრებული მეგობრობის სეზონი სამთვიანი პროგრამით. რა ღონისძიებებს მოიცავს ეს პროგრამა?

მოხარული ვარ, რომ საქართველოში პირველად ვახორციელებთ ამგვარ ფესტივალს. სამი თვის განმავლობაში განვახორციელებთ 60-ზე მეტ ღონისძიებას მთელი საქართველოს მასშტაბით, მათ შორის აჭარაშიც. ვიმედოვნებთ, ხალხი მეტ ახალს გაიგებს დიდი ბრიტანეთის შესახებ, დაწყებული ბრიტანულ მუზეუმში დაცული მე-12 საუკუნის დავით აღმაშენებლის მონეტიდან, 21-საუკუნის უახლესი მუსიკით, თეატრისა და ქორეოგრაფიის ჩათვლით. იმედი მაქვს, ყველა იპოვის რაღაც საინტერესოს ამ ბრიტანულ სეზონზე. ჩემთვის ერთ-ერთი ყველაზე მნიშვნელოვანი ამბავი იყო, ეს სეზონი საქართველოს სხვადასხვა რეგიონამდე მიგვეტანა.

• 2014 წელს საქართველოსა და დიდ ბრიტანეთს შორის ჩაეყარა საფუძველი „უორდროპის დიალოგის“ სახელით ცნობილ თანამშრომლობის ფორმატს. რა არის ამ ფორმატის ყველაზე მნიშვნელოვანი მიღწევა და რა სიახლეები იგეგმება სამომავლოდ?

ძალიან ვამაყობ, რომ „უორდროპის დიალოგის“ ფორმატი გვაქვს. მისი არსი უკავშირდება ჩვენი მეგობრობის ფესვებს, საქართველოს პირველი დამოუკიდებელი დემოკრატიული რესპუბლიკის პერიოდს, როცა ოლივერ უორდროპი აქ, საქართველოში, იმყოფებოდა. თუმცა, რაც განსაკუთრებით მახარებს, ამ ისტორიული მნიშვნელობის ფორმატში ჩვენ ვზრდით და ვავითარებთ უაღრესად თანამედროვე პარტნიორობას განათლების, ბიზნესის, კულტურის, სპორტისა და სხვა მრავალ სფეროში. ურთიერთობა ბრიტანელ და ქართველ ხალხს შორის იმაზე სწრაფად იზრდება, ვიდრე აქამდე მომხდარა. ასე რომ, როცა თქვენ მეკითხებით მომავლის შესახებ, დარწმუნებული ვარ, რომ უორდროპის დიალოგის ფორმატით გამორჩეული მეგობრობა საქართველოსა და ბრიტანეთს შორს გაგრძელდება საინტერესო და ხშირად მოულოდნელი გზებით.

• სავიზო პოლიტიკას რომ შევეხოთ, საქართველოში ამბობენ, რომ დიდი ბრიტანეთის ვიზის მიღება ძალიან რთულია. თუ შეგიძლიათ ზოგადი ტენდენციის შესახებ გვითხრათ, მაგალითად, წელიწადში რამდენი ადამიანი მიმართავს ბრიტანეთის საელჩოს ვიზის მისაღებად და აქედან რამდენი იღებს ვიზას?

ეს არის კითხვა, რომელიც ყველა სხვა კითხვაზე უფრო ხშირად დაუსვამთ ჩემთვის და კარგად ვიცი, რომ ხალხს ეს პროცესი რთულად ეჩვენება. მხოლოდ ორ რამეს ვიტყოდი, ერთია ის, რომ ჩვენ ვუსმენთ თქვენს უკუკავშირს და ვაკეთებთ ყველაფერს, რათა ეს პროცესი გახდეს რაც შეიძლება უფრო მარტივი და ხელმისაწვდომი. და მეორე – მოხარული ვარ, რომ რეალურად, ბევრი, ათასობით ქართველი სტუმრობს დიდ ბრიტანეთს ყოველწლიურად იქნება ეს სასწავლებლად, ბიზნესვიზიტით თუ უბრალოდ დასათვალიერებლად. მოვუწოდებ ყველას, ეწვიონ დიდ ბრიტანეთს და ასევე ეძებონ ისეთი არაჩვეულებრივი შესაძლებლობები, როგორიცაა ჩივნინგის სტიპენდიების პროგრამა, რომლის მეშვეობითაც ყოველწლიურად საშუალოდ  15-17 ბრწყინვალე ახალგაზრდა ლიდერი და პროფესიონალი ეუფლება სამაგისტრო პროგრამებს დიდი ბრიტანეთის წამყვან უნივერსიტეტებში.

• ორ წელზე მეტი გავიდა მას შემდეგ, რაც საქართველომ ევროკავშირთან უვიზო მიმოსვლის შესაძლებლობა მიიღო, შესაძლებელია თუ არა დადგეს დღის წესრიგში საქართველოს მოქალაქეების დიდ ბრიტანეთში უვიზო მიმოსვლის საკითხი? თქვენი მუშაობის პერიოდში ყოფილა ამაზე მსჯელობა? ან საქართველოს მთავრობას ჰქონია რაიმე ინიციატივა ამ საკითხის განსახილველად?

ეს საკითხი ამჟამად არ განიხილება. თუმცა, როგორც აქამდე ვთქვი, ყველაფერს ვაკეთებთ, რათა არსებულმა სისტემამ იმუშაობს ქართველი სტუმრების სასარგებლოდ და განვაგრძობთ მუშაობას, რათა სისტემა გახდეს უფრო ეფექტური, რამდენადაც შესაძლებელია. მოხარული ვარ, რომ ვიზიტორთა რიცხვი ორივე მიმართულებით მნიშვნელოვნად გაზრდილია.

• დიდ ბრიტანეთში არის დაძმობილებული ქალაქები: თბილისი და ბრისტოლი, ქუთაისი და ნიუპორტი, ახალციხე და ნიუ ქასლი. ჩვენ ახლა ბათუმში ვართ, ამ ქალაქის ისტორიას კავშირი აქვს დიდ ბრიტანეთთან, ვგულისხმობ ბრიტანული ჯარის შემოსვლას ბათუმში მე-20 საუკუნის დასაწყისში. ხომ არ იგეგმება ბათუმის დაძმობილება რომელიმე ქალაქთან? 

შესანიშნავი იდეაა. ეს ინიციატივები თავად ქალაქებისგან უნდა მოდიოდეს, მაგრამ მოხარული ვიქნებოდი, თუ ბათუმი იპოვის თავის მეგობარ ქალაქს დიდ ბრიტანეთში. თქვენ უკვე გაქვთ ლონდონის სკვერი ბათუმში. ერთ-ერთი ამბავი, რაც განსაკუთრებით მახარებს ჩემი აქ ყოფნის განმავლობაში, ის კავშირებია, რომლებიც საქართველოსა და ბრიტანულ ქალაქებს შორის არსებობს. ვიმედოვნებ, ბათუმიც მალე დაემატება ამ სიას.

_______________

ფოტოზე: ჯასტინ მაკკენზი სმიტი. ფოტო: „ბათუმელები“/მანანა ქველიაშვილი

რამდენიმე დღის წინ იუსტიციის სამინისტრომ ახალი ელექტროსამაჯურები იყიდა. 80 სამაჯური „არასაპატიმრო სასჯელთა აღსრულებისა და პრობაციის ეროვნულმა სააგენტომ“ შეიძინა და თითოეულში 1790 ამერიკული დოლარი გადაიხადა. ინფორმაცია იუსტიციის სამინისტროს პრობაციის ეროვნულმა სააგენტომ მოგვაწოდა. ამ უწყებას ვკითხეთ: რამდენი ელექტრონული სამაჯური აქვს იუსტიციის სამინისტროს და მათგან რამდენია დღეს გამოყენებული.

ელექტრონულ სამაჯურებს 2018 წლის პირველი იანვრიდან იყენებენ. სამაჯურებს მაშინ უკეთებენ მსჯავრდებულებს, როცა მათ სასამართლო სასჯელის სახით შინაპატიმრობას უფარდებს. შინაპატიმრობის დროს მსჯავრდებული თავის სახლში დარჩება, თუმცა მის გადაადგილებას ელექტრონული სამაჯურის მეშვეობით გააკონტროლებენ. შინაპატიმრობის მოხდის პერიოდში მსჯავრდებულს ასევე ეკრძალება საქართველოს საზღვრის გადაკვეთა. წესების დარღვევის შემთხვევაში, შინაპატიმრობა თავისუფლების აღკვეთით შეიცვლება, ანუ ციხეში სასჯელის რეალურად მოხდით.

ელექტროსამაჯური მოსამართლის გადაწყვეტილებით შეიძლება გაუკეთონ ბრლადებულსაც.

პრობაციის ეროვნული სააგენტოს ინფორმაციით, უწყებას სულ 280 ელექტროსამაჯური აქვს. ამ ეტაპზე ქვეყანაში 150 ადამიანს უკეთია სამაჯური, ანუ ეს პირები შინაპატიმრობაში იმყოფებიან.

იუსტიციის სამინისტრო ელექტრონულ სამაჯურებს ტენდერის გზით არ ყიდულობს და გამარტივებულ შესყიდვას იყენებს.

„ხარისხის გაუარესებისა და აპარატურის შემდგომი ექსპლუატაციის შეფერხების თავიდან ასაცილებლად, შესყიდვა ხორციელდება იმავე მიმწოდებლისგან, რომელიც 2015 წლიდან უზრუნველყოფს ელექტრონული ზედამხედველობის/მონიტორინგის განხორციელებისთვის საჭირო მოწყობილობების მოწოდებას და ტექნიკურ მხარდაჭერას. აღსანიშნავია, რომ პრობაციის სააგენტოში არსებულ სერვერზე შეუძლებელია სხვა მწარმოებლის მიერ წარმოებული აპარატურის დაერთება,“ – მოგვწერეს პრობაციის ეროვნული სააგენტოდან.

სახელმწიფო შესყიდვების სააგენტოს მონაცემებით, პრობაციის სააგენტო პირდაპირი შესყიდვის გზით ელექტროსამაჯურებს ისრაელში დაფუძნებული კომპანიისგან „Attenti Electronic Monitoring Ltd“-სგან ყიდულობს.

10 ოქტომბრის 06:00 საათიდან 12 ოქტომბრის 12:00 საათამდე აჭარაში  სრულიად ბათუმსა და ხელვაჩაურს, ასევე, ნაწილობრივ ქობულეთს, გაზმომარაგება შეუწყდება.

„სოკარის“ განმარტებით, გაზის შეწყვეტის მიზეზი გაზსადენზე  დაგეგმილი სარემონტო საექსპლუატაციო სამუშაოებია.

აბონენტებს ბუნებრივი გაზი სამუშაოების დასრულებისთანავე ეტაპობრივად მიეწოდებათ.

„12 ოქტომბრიდან, შაბათიდან, დავიწყებთ გაზის ჩართვას ეტაპობრივად და ორი-სამი დღე დააგვიანდება, რომ მთლიანად დავტვირთოთ რეგიონი,“ – უთხრა „ბათუმელებს“ „სოკარ ჯორჯია გაზის“ აჭარის რეგიონული ოფისის დირექტორმა, ვახტანგ ბერიშვილმა.

კომპანია „სოკარ ჯორჯია გაზი” ბოდიშს უხდის  აბონენტებს და მოუწოდებს დაკეტილ მდგომარეობაში იქონიონ ბინებში არსებული გაზის ონკანები და უყურადღებოდ არ დატოვონ გაზის დანადგარები.

დღეს, 8 ოქტომბერს, ნობელის კომიტეტმა დაასახელა სამი მეცნიერი, რომლებიც 2019 წელს ნობელის პრემიას მიიღებენ ფიზიკის დარგში.

ნობელის პრემია გადაეცემა ჯეიმს პიბლსს, 84 წლის ამერიკელ/კანადელ მეცნიერს, პრინსტონის უნივერსიტეტის პროფესორს – თეორიული აღმოჩენისათვის ფიზიკურ კოსმოლოგიაში, და, ასევე, ნობელის პრემია გადაეცემათ შვეიცარიელ ასტროფიზიკოსებს – მიშელ მაიმორსა და დიდიე კელოს – მზის მსგავსი ვარსკვლავების ირგვლივ ეგზოპლანეტების აღმოჩენისთვის. მათ ჯერ კიდევ 1995 წელს აღმოაჩინეს ეგზოპლანეტა 51 Pegasi b და იქედან მოყოლებული 4 000-ზე მეტი ეგზოპლანეტა იქნა აღმოჩენილი ირმის ნახტომის გალაქტიკაში.

ნობელის კომიტეტის განცხადებით, ამ მეცნიერების აღმოჩენები რევოლუციურია ასტრონომიაში.

ფულადი პრიზის, 9 მილიონი შვედური კრონის [900 000 აშშ დოლარი] ნახევარი გადაეცემა ჯეიმს პიბლსს, ფულადი პრიზის მეორე ნახევარი კი – მიშელ მაიმორსა და დიდიე კელოს.

bbc წერს, რომ სტოკჰოლმში გამართულ პრესკონფერენციაზე ჯეიმს პიბლსმა ხაზი გაუსვა, რომ აღმოჩენაში ბევრ მეცნიერს მიუძღვის წვლილი. მან ახალგაზრდებს, რომლებიც თავიანთი კარიერის მეცნიერებაში გაგრძელებაზე ფიქრობენ, ურჩია გადადგან ეს ნაბიჯი მეცნიერების სიყვარულის გამო.

აჭარაში გაზი ორი დღით გაითიშება, რეგიონის ჩართვას კი 2-3 დღე დასჭირდება – ინფორმაცია ამის შესახებ „ბათუმელებს“ „სოკარ ჯორჯია გაზში“ დაუდასტურეს.

„10-11 ოქტომბერს, ხუთშაბათს და პარასკევს, გაზის მიწოდება მთლიანად აჭარაში შეწყდება. 12 ოქტომბრიდან, შაბათიდან, დავიწყებთ გაზის ჩართვას ეტაპობრივად და ორი-სამი დღე დააგვიანდება, რომ მთლიანად დავტვირთოთ რეგიონი,“ – გვითხრა „სოკარ ჯორჯია გაზის“ აჭარის რეგიონული ოფისის დირექტორმა, ვახტანგ ბერიშვილმა.

მისი განმარტებით, გაზის შეწყვეტის მიზეზი სარეაბილიტაციო სამუშაოებია.

„გვარაში ავარიული მდგომარეობაა და ზამთარს უწყვეტი გაზმომარაგებით რომ შევხვდეთ, ამიტომ შესასრულებელია სამუშაოები. ტურისტული სეზონი დამთავრდა და ახლა ვგეგმავთ სამუშაოებს,“ – ამბობს ვახტანგ ბერიშვილი.

ეს ფოტოები ცნობილმა ბელგიელმა მწერალმა, ჟორჟ სიმენონმა გადაიღო ბათუმში გასული საუკუნის 30-იან წლებში. ფოტოები აჭარის ფინანსთა და ეკონომიკის მინისტრის მოადგილემ, სულხან ღლონტმა გამოაქვეყნა ფეისბუქზე, რომელიც წერს, რომ ამჟამად ბათუმში იმყოფება ჟორჟ სიმენონის შვილი, ჯონ სიმენონი, რომელიც ოჯახის არქივიდან მალე ბათუმის 1930-იანი წლების ფოტოებს გადმოსცემს ქალაქს.

ჟორჟ სიმენონი ბათუმში გასული საუკუნის 30-იან წლებში იმყოფებოდა. მის რომანში – „ხალხი მოპირდაპირე მხარეს“ [Les Gens d’en Face] ერთ-ერთ ნაწილში მოქმედება ბათუმში ხდება.

წიგნის დაწერამდე რამდენიმე თვით ადრე სიმენონმა საბჭოთა კავშირში იმოგზაურა შავი ზღვის ირგვლივ, რვა დღე დაჰყო ოდესაში და 1933 წლის პირველი ნახევრის უკრაინაში მასობრივი შიმშილობის მომსწრეც იყო. უკრაინიდან სიმენონი ბათუმში ჩამოვიდა და აქედან სტამბოლში გაემგზავრა.