Batumelebi

გარემოს დაცვისა და სოფლის მეურნეობის სამინისტროს დაცული ტერიტორიების სააგენტოს ცნობით, გურიაში ეროვნული პარკის შექმნა იგეგმება.

ეროვნული პარკი ჩოხატაურის მუნიციპალიტეტში გაიხსნება.

სამუშაო შეხვედრა ადგილობრივი მუნიციპალიტეტის წარმომადგენელთან და მხარის გუბერნატორთან, ჩოხატაურის მერიაში გაიმართა. სააგენტოს ცნობით, უახლოეს მომავალში დაიწყება წინა საპროექტო კვლევები და მოხდება იმ ტერიტორიების იდენტიფიცირება, სადაც შემდგომ ეროვნული პარკი შეიქმნება.

წინასწარი ინფორმაციით, შესწავლის პროცესი 2021 წლამდე დამთავრდება. 

საქართველოს ეროვნული ბანკის ინფორმაციით, 2019 წლის სექტემბერში ქვეყანაში შემოსული ფულადი გზავნილების ნაკადების მოცულობამ 149,8 მლნ აშშ დოლარი [444.0 მლნ ლარი] შეადგინა, რაც 13,9%-ით [18,3 მლნ აშშ დოლარით] მეტია 2018 წლის სექტემბრის ანალოგიურ მაჩვენებელზე.

ეროვნული ბანკის მონაცემებით ყველაზე მეტი თანხა საქართველოში ევროკავშირის ქვეყნებიდან ჩამოირიცხა [56,91 მილიონი აშშ დოლარი]. ქვეყნების მიხედვით კი, ამ კუთხით, ლიდერობენ: რუსეთი, იტალია, საბერძნეთი, აშშ და ისრაელი. ამასთან, სექტემბრის მონაცემების მიხედვით, რუსეთიდან ჩამორიცხული თანხის მოცულობის წლიური ზრდის ტემპი 3,7%-ით არის შემცირებული.

უცხოეთიდან საქართველოში ფულადი გზავნილების 94% იმ 18 უმსხვილეს პარტნიორ ქვეყანაზე მოდის, საიდანაც ასეთი გზავნილების მოცულობამ სექტემბერში 1 მლნ აშშ დოლარს გადააჭარბა. იმავე 18 ქვეყანაზე გასული წლის სექტემბერში მთელი ფულადი გზავნილების 94,3% მოდიოდა.

2019 წლის სექტემბერში საქართველოდან საზღვარგარეთ 20,5 მლნ აშშ დოლარი [60,7 მლნ ლარი] გადაიგზავნა, რაც 2018 წლის სექტემბრის [19,2 მლნ აშშ დოლარი] ანალოგიურ მაჩვენებელთან შედარებით 6,5%-ით მეტია.

აჭარის საზოგადოებრივი ჯანდაცვის ცენტრის ხელმძღვანელის, რუსუდან შავიშვილის განცხადებით, ქობულეთში, სოფელ შუაღელეში კაცის გარდაცვალების მიზეზი შესაძლოა არა კრაზანის ნაკბენი, არამედ ინფარქტი გახდა.

„ქობულეთის სასწრაფო სამედიცინო დახმარების ხელმძღვანელი ამავდროულად არის ჩვენი ცენტრის ეპიდემიოლოგი. იყო გამოძახება, რომ კაცი დაკბინა კრაზანამ, მაგრამ პაციენტი სასწრაფო სამედიცინო სამსახურის ჯგუფს უკვე გარდაცვლილი დახვდა ბოსტანში.

ექიმებმა გარდაცვლილის ცხედარი შეამოწმეს და გარეგნული დათვალიერებით დაკბენის კვალი არ აღინიშნებოდა. სავარაუდოდ, მას ჰქონდა გულის პრობლემები და შესაძლებელია, ეს იყო ინფარქტი, რადგან დაკბენის კვალი ვერ აღმოაჩინეს. ოჯახმა ექსპერტიზაზე უარი განაცხადა, ექიმებმა ჩათვალეს, რომ ეს იყო ინფარქტი“ – განაცხადა რუსუდან შავიშვილმა „ბათუმელებთან“.

ამავე თემაზე: 

„ეს არის პროექტები, რომლებზეც ბიუჯეტიდან ჯამში 250 მილიონი დაიხარჯა და არ განხორციელებულა, ეს არის კორუფცია,“ – ამბობს „ერთიანი ნაციონალური მოძრაობის“ წევრი, რეზო ხარაზი. ამ პარტიამ დღეს, 15 ოქტომბერს, აჭარის მთავრობის სახლთან „განუხროციელებელი პროექტების“ გამოფენა მოაწყო პარტია „ქართული ოცნების“ წინასაარჩევნო კლიპის ფონზე.

„მაგალითად, ეს არის ბათუმის 27-ე ბაღი, სადაც ფული დაიხარჯა, მაგრამ აქ ბავშვები დღემდე არ დადიან, თავიდან აკეთებენ რემონტს. ესაა გვარას სასათბურე მეურნეობა ქობულეთში, რომელიც ასევე არ არსებობს. ეს არის ქოსოფლის გზა, რომლისთვისაც ტენდერის მიხედვით 54 300 ლარი უნდა დახარჯულიყო, მაგრამ გზა არ არსებობს. ჩვენ წარმოვადგინეთ ფოტოებიც, რა მდგომარეობაა თითოეულ პროექტზე…

ამ პროექტების შესახებ ხშირად საუბრობს მედია ცალ-ცალკე. ჩვენ ეს გამოვფინეთ იმისთვის, რომ ვაჩვენოთ კორუფციის სისტემური ხასიათი,“ – აღნიშნა რეზო ხარაზმა.

ენმ-მ აჭარის მთავრობის სახლთან სულ 17 ინფრასტრუქტურული პროექტის შესახებ მონაცემები გაასაჯაროვა.

„რითაც ჩვენ ვამაყობთ, არის ის, რომ ჩვენი მმართველობის დროს სისტემური კორუფციის და ნეპოტიზმის ფაქტები არ არის აჭარაში და, რა თქმა უნდა, ამ ხაზს აგრძელებს ყველა უწყება, რომელიც აჭარაში ფუნქციონირებს. რეზო ხარაზი ზოგადად უინტერესო ადამიანია. ასე რომ, არ ვაპირებ მაგის გამოხტომებზე დრო დავხარჯო,“ – აღნიშნა თორნიკე რიჟვაძემ, აჭარის მთავრობის თავმჯდომარემ იმ ვიდეომასალის მიხედვით, რომელიც აჭარის მთავრობის პრესცენტრმა მოგვაწოდა. ჩვენ ვთხოვდით აჭარის მთავრობას განმარტებას კონკრეტულ პროექტებთან დაკავშირებით, რაზეც ენმ-მ აქცია გამართა, თუმცა პასუხი არ მიგვიღია.

„გზები ვიწროა, სულ 3 მეტრია სიგანე, თანაც დაღმართია. არც ერთი ტექნიკური რეგლამენტი არ ითვალისწინებს ასეთ გზაზე ადაპტირებული ბილიკის მოწყობას. მაგრამ ჩვენ მაინც განვიხილავთ და ვფიქრობთ, რა შეიძლება გავაკეთოთ“, – გვითხრა ხულოს მერიის ინფრასტრუქტურის სამსახურის ხელმძღვანელმა ზაზა აბულაძემ იმედა ბოლქვაძის მოთხოვნასთან დაკავშირებით.

იმედა საკუთარი სოფლიდან, განახლებიდან, ამავე თემის ცენტრალურ გზამდე 40-მეტრიანი ადაპტირებული ბილიკის მოწყობას ითხოვს. ამ მოთხოვნით მან მერიას არაერთხელ მიმართა, თუმცა უარი უთხრეს. როგორც თვითონ გვიყვება, მას განუმარტეს, რომ ბიუჯეტში შესაბამისი თანხა არ ჰქონდათ, შემდეგ უარის მიზეზად ვიწრო გზები დაუსახელეს. ამ დრომდე იმედა დისტანციურად მუშაობდა აიპ „კურორტ ბეშუმში“ პიარსპეციალისტად და თავის საქმეს დისტანციურად აკეთებდა.

იმედას მძიმე დაავადება აქვს, ამიტომაც დისტანციურად მუშაობა მისთვის ხელსაყრელი იყო და როგორც აიპი „კურორტი ბეშუმის“ ხელმძღვანელმა დაადასტურა, იმედა თავის საქმეს კარგად აკეთებდა, მაგრამ მისი გათავისუფლების გადაწყვეტილება მაინც მიიღეს.

„იმედა ხელშეკრულებით გვყავდა აყვანილი, სხვათა შორის, მან ძალიან კარგად იმუშავა. მაგრამ ხელშეკრულების ვადა სრულდება და არც თანხა გვაქვს ამ ხელშეკრულების გასაგრძელებლად ბიუჯეტში. რეალურად, ზამთარში იქ ორი დარაჯი რჩება“, – გვითხრა აიპის დირექტორმა ემზარ ბოლქვაძემ.

ექნება თუ არა შეთავაზება დასაქმებაზე იმედას? – ამ კითხვაზე ხულოს მერიაში გვიპასუხეს, რომ უახლოეს მომავალში კონკურსების გამოცხადებას გეგმავენ და იმედას შეუძლია ამ კონკურსში რომელიმე პოზიციაზე მიიღოს მონაწილეობა.

ამავე თემაზე:

„მოკლედ დავწერ ჩემს დიაგნოზსა და ბრძოლებზე… მთავრობამ კონტრაქტი გამიჩერა და მეუბნება სახლში იჯექიო… დრო ყველას წაგვშლის, ამიტომ დედა, რა მეშველება და ვკვდები და ა.შ. მსგავს შტერობებზე ფიქრს მირჩევნია, რაღაც უფრო მნიშვნელოვანი გავაკეთო“, – წერს სოციალურ ქსელში იმედა ბოლქვაძე.

ის ამ დრომდე ხულოს მერიის აიპის – „კურორტი ბეშუმის“ პიარსპეციალისტად მუშაობდა და თავის საქმეს დისტანციურად აკეთებდა. როგორც თვითონ გვითხრა, დისტანციურად მუშაობის მიზეზი მისი დაავადებაა, რომელიც დღითი დღე პროგრესირდება. ამის მიუხედავად იმედა ამ დრომდე თავის საქმეს თავს კარგად ართმევდა და დიზაინისა და პიარის მიმართულებით სხვა შეკვეთებიც ჰქონდა:  „შეკვეთები მქონდა, ლოგოების დახატვასა და სხვა პიარმასალებზე“.

10 დღის წინ ის გააფრთხილეს, რომ სამსახურიდან ათავისუფლებენ, მიზეზი მისთვის არ აუხსნიათ.

იმედას ხულოს მერიამ ადაპტირებული გარემოს შექმნაზეც  უთხრა უარი:

„ხულოს მერიას ვთხოვე სახლიდან გამოსვლის შანსი მომეცით და ადაპტირებული 40-მეტრიანი ბილიკი გამიკეთეთ-მეთქი. დარწმუნებულმა, რომ ეს ნამდვილად გაკეთდებოდა, ელექტროეტლი დავქოქე და ბიზნესსესხიც ავიღე. ხულოს მერიამ მიპასუხა, რომ ბიუჯეტში თანხა არ არის! დარწმუნებული ვიყავი, რომ ადამიანები, თან საკუთარი ქვეყნის მთავრობიდან, ასეთ სისულელეს არ მიპასუხებდნენ. აქ, ამ რაიონში, მინდა დამოუკიდებლობა, სადაც დავიბადე და 22 წელი მოვათრიე და არა ქალაქში!“- წერს იმედა.

იმედა გვიყვება, რომ ამ ეტაპზე მას დისტანციურად მუშაობის შესაძლებლობა აღარ აქვს, რადგან მისი დაავადება პროგრესირდება:

„ბათუმის წყლის“ ინფორმაციით, ავარიის გამო, დღეს, 13 ოქტომბერს, 21:00 საათზე წყალმომარაგება შეწყდა:

[crosslist]

• ვაჟა ფშაველას ქუჩაზე
• ჭავჭავაძის ქუჩისა და გიორგი ბრწყინვალეს ქუჩების მონაკვეთში 
• პუშკინის ქუჩაზე – ლუკა ასათიანისა და ვაჟა ფშაველას ქუჩების მონაკვეთში

[/crosslist]

„ბათუმის წყალი“ ბოდიშს უხდის აბონენტებს შეფერხებისთვის.

დღეს, ასევე, ავარიული დაზიანების გამო, წყლის მიწოდება შეწყდა ლეონიძის, ტაბიძისა და რურუას ქუჩებზე.

ქალაქ ქობულეთში, მეგობრობის ქუჩის სკვერში, ავთანდილ ცხვედიანის მემორიალი/ქანდაკება დაიდგმება, ადამიანის, რომელიც 2019 წლის 5 აგვისტოს თავისი ძაღლის გადასარჩენად შევიდა ადიდებულ ზღვაში და დაიღუპა.

ქობულეთის მერიამ კონკურსი უკვე გამოაცხადა  ავთანდილ ცხვედიანის მემორიალის (ქანდაკება) ესკიზისა და საპროექტო-სახარჯთაღრიცხვო დოკუმენტაციის შესყიდვაზე. შესყიდვის სავარაუდო ღირებულება 6 000 ლარია.

ავთანდილ ცხვედიანი 51 წლის იყო. 2019 წლის 5 აგვისტოს ის ზღვაში შტორმის დროს თავისი ძაღლების, ბასტისა და ჯესის გამოსაყვანად ორჯერ შევიდა, ერთის გამოყვანა შეძლო, მეორედ შესვლის შემდეგ კი დაიღუპა. მისი ოთხფეხა მეგობარი გადარჩა, ზღვიდან გამოსვლა შეძლო და რამდენიმე საათში დაბრუნდა სახლში.

ქობულეთის მერიის ცნობით, მემორიალის განთავსებით პატივი მიეგება ჰუმანურ აქტს და მემორიალი გახდება მეგობრობისა და თავგანწირვის სიმბოლო.

საკონკურსო წინადადების თანახმად, ქანდაკების ესკიზი უნდა წარმოადგენდეს სივრცით კომპოზიციას, რომელიც არ უნდა იყოს კამერული ხასიათის. ქანდაკების ესკიზი უნდა იყოს თემატური, შთამბეჭდავი, ორიგინალური, მიმზიდველი, კონტაქტური და ადვილად აღქმადი. ქანდაკების ესკიზი გადაწყვეტილი უნდა იყოს თავისუფალი დიზაინის, სკულპტურულ
არქიტექტურული სინთეზის საშუალებით. გრაფიკული მასალების შესრულების მანერა – თავისუფალი. წარმოდგენილ მემორიალის (ქანდაკებას) ესკიზს უნდა ჰქონდეს საინფორმაციო ადგილი, სადაც განთავსდება ინფორმაცია ქანდაკების შესახებ.

კონკურსში წინადადებების მიღება 28 ოქტომბერს დასრულდება.

____________

ფოტოზე: ავთანდილ ცხვედიანი. ფოტო: fb

დღეს, 13 ოქტომბერს, „ოცნების ქალაქში“ აჭარის ჯანდაცვის მინისტრის მოადგილე რამაზ ჯინჭარაძე და აჭარის ფინანსთა სამინისტროს თანამშრომლები იმყოფებოდნენ. მათ „ოცნების ქალაქის“ მცხოვრებლებს იმ კორპუსების პროექტი გააცნეს, რომელთა აშენება „ოცნების ქალაქში“ იგეგმება.

„ავიტანეთ პროექტი და გავაცანით მოსახლეობას. იყო საუბარი, რომ პროექტს ხარვეზები ჰქონდა და არ ჰქონდა ფინანასთა და ეკონომიკის სამინისტროს ჩაბარებული. პროექტი დასრულებულია, სამინისტრომ ჩაიბარა და დაიწყება მუშაობა სატენდერო სამუშაოებთან დაკავშირებით. ეს ინფორმაცია და პროექტები გავაცანით სამივე დასახლებას,“ – გვითხრა რამაზ ჭინჭარაძემ.

მისივე თქმით, პირველ ეტაპზე „ოცნების ქალაქის“ ტერიტორიაზე სამი კორპუსი აშენდება [დაახლოებით 582 ბინა]. ვინ მიიღებს პირველ რიგში ბინას კორპუსში, ამაზე მთავრობა კორპუსების მშენებლობის პარალელურად იმსჯელებს.

აჭარის 2019 წლის ბიუჯეტში „ოცნების ქალაქში“ ბინების მშენებლობისთვის 3 750 000 ლარია გათვალისწინებული.

„სოციალური და სტიქიის შედეგად დაზარალებული ოჯახებისათვის საცხოვრებელი პირობების უზრუნველყოფის“ პროგრამით კი 2020 წლისთვის ოცნების ქალაქში ბინათმშენებლობის დასაფინანსებლად 20 მილიონი ლარია გაწერილი. ამ პროგრამის მიხედვით „ოცნების ქალაქში“ მცხოვრებთა საცხოვრებელი ბინებით უზრუნველყოფისთვის ჯამში 48 750 000 ლარის გამოყოფაა დაგეგმილი. პროგრამა 2022 წლის ჩათვლით უნდა განხორციელდეს.

პროგრამის მიხედვით, აჭარის მთავრობა „ოცნების ქალაქში“ მცხოვრები 1 550 ოჯახის ბინით უზრუნველყოფას გეგმავს. პროგრამა, რომლის მთლიანი ღირებულება 48 750 000 ლარია, 2019-2022 წლებში უნდა განხორციელდეს.

დღეს და ხვალ, 13-14 ოქტომბერს, ბათუმში ევროპის მოედანზე, ფესტივალი „განდაგანა“ გაიმართება.

ფესტივალზე აჭარის ხუთივე მუნიციპალიტეტი მხოლოდ მისთვის დამახასიათებელი ნაწარმით, პროდუქტით, ხელნაკეთი ნივთებით, ტრადიციებითა და ფოლკლორით იქნება წარმოდგენილი.

ფესტივალის მიმდინარეობისას სტუმრებს საშუალება ექნებათ მონაწილეობა მიიღონ ქორეოგრაფიულ და კულინარიულ მასტერკლასებში, ჩურჩხელის ამოვლების, ჭაჭის გამოხდის, თუთუნის დაჭრისა და საწნახელში ყურძნის დაწურვის პროცესში. ფესტივალის სტუმრების განწყობაზე ადგილობრივ ფოლკლორულ ჯგუფებთან ერთად ბენდები „არა“, SVANSIKH და SEASIDE იზრუნებენ.

[checklist]

• 16:00 – 16:50 –  ვოკალური ანსამბლი „ფესვები“  
• 16:50 – 17:50 – ვოკალური ანსამბლი „ელესა“ და ენვერ ხაბაძის სახელობის სახელმწიფო ქორეოგრაფიული ანსამბლი „ბათუმი“ 
• 17:50 – 18:30 – აჭარული კერძების პრეზენტაცია-მასტერკლასი; ბათუმის თოჯინებისა და მოზარდ მაყურებელთა პროფესიული სახელმწიფო თეატრი – სპეკტაკლი „წითელქუდა“ 
• 18:30 – 19:10 – სიმღერისა და ცეკვის ანსამბლი „ქობულეთი“
• 19:10 – 19:30 – სახალისო ინტერაქტიული ჯგუფური შეჯიბრება
• 19:30 – 21:00 – ბენდი „არა“ 
• 21:00 – 22:30 – ბენდი Svansikh 

[/checklist]

[checklist]

• 14:00 – 14:30 – ქორეოგრაფიული ანსამბლი „ბერმუხა“ 
• 14:30 – 15:30 – ვოკალური ანსამბლი „ჭვანა“ 
• 15:30 – 16:30 – ლაზური ვოკალური ანსამბლი „ათძალი“ და ქორეოგრაფიული ანსამბლი „კოლხა“ 
• 16:30 – 17:00 – ყურძნის დაწურვა საწნახელში 
• 17:00 – 18:00 – სახელმწიფო აკადემიური ანსამბლი „არსიანი“ 
• 18:00 – 19:30 – ბენდი Seaside

[/checklist]

სოფლის ტურიზმის ფესტივალი „განდგანა“ 2015 წლიდან, აჭარის ტურიზმის დეპარტამენტის ტურისტული პროდუქტების განვითარების სააგენტოს ორგანიზებით იმართება. მისი მიზანი აჭარული სოფლების პოპულარიზაცია, წარმოჩენა და სოფლად ტურისტების მოგზაურობის სტიმულირებაა.

გასული წლისგან განსხვავებით წელს, გაიზარდა ფესტივალის მონაწილეების რაოდენობაც და ისინი გარდა აჭარისა, საქართველოს სხვა რეგიონებიდანაც იქნებიან წარმოდგენილები.

______________

ფოტოზე: ფესტივალი „განდაგანა“ ბათუმში. ფოტო: აჭარის მთავრობა

60 წლის მეხანძრე-მაშველი იბრაიმ დიასამიძე, რომელიც საგანგებო სიტუაციების მართვის სამსახურში, ქედაში, წლებია მუშაობდა, მეხანძრე-მაშველებმა სამსახურიდან გააცილეს.

იბრაიმ დიასამიძეს წლების განმავლობაში გაწეული ერთგული სამსახურისთვის საგანგებო სიტუაციების მართვის სამსახურისგან სამახსოვრო საჩუქრები გადაეცა.

საგანგებო სიტუაციების მართვის სამსახურის ცნობით, იბრაიმ დიასამიძე წლების განმავლობაში ქედის რაიონის უსაფრთხოებაზე შვილთან ერთად ზრუნავდა. საგანგებო სიტუაციების მართვის სამსახურში რჩება იბრაიმის ვაჟი, მანუჩარ დიასამიძე.

იბრაიმ დიასამიძის გაცილების ღონისძიებას შინაგან საქმეთა მინისტრის მოადგილე იოსებ ჭელიძე და საგანგებო სიტუაციების მართვის სამსახურის უფროსი თემურ მღებრიშვილი დაესწრნენ.

10-19 ოქტომბერს მსოფლიოს სხვადასხვა ქალაქში ჰეშთეგით #RiseUpForRojava მომიტინგეები როჟავას (ქურთული სახელმწიფოებრივი წარმონაქმნი სირიის ტერიტორიაზე) მხარდასაჭერად იკრიბებიან.

ფეისბუქზე გახსნილია გვერდი , რომლის საშუალებითაც ორგანიზდება მხარდამჭერი აქციები. გამომსვლელები მოითხოვენ შეწყდეს თურქული მხარის შეჭრა და საბრძოლო მოქმედებები სირიის ჩრდილოეთით არსებულ ქურთულ დასახლებაში და იქცეს როჟავა ისევ მწვანე ზოლად.

პარიზში მიმდინარე აქცია

ანკონა/იტალია

აქციები გაიმართა და კიდევ გაიმართება ასევე საბერძნეთში, ინგლისში, შვედეთში, ნორვეგიაში, სერბეთში, უნგრეთში, პოლონეთში, ბელგიაში, კვიპროსზე და სხვა ქვეყნებში. მათ შორის ხვალ, 13 ოქტომბერს, თბილისშიც აპირებენ ადამიანების საპროტესტო აქციაზე შეკრებას.

შეგახსენებთ, 9 ოქტომბერს თურქულმა მხარემ დაიწყო სამხედრო ოპერაცია „მშვიდობის გაზაფხული“, რომლის ფარგლებშიც თურქეთს სურს მოსაზღვრე 32 კმ-იანი სივრცეში შექმნას ბუფერული ზონა, სადაც სირიიდან დევნილ, თურქეთში მცხოვრებ მოსახლეობას ჩაასახლებს.

წაიკითხეთ ასევე:

გარემოს დაცვისა და სოფლის მეურნეობის სამინისტროს ქიმიური ნივთიერებების მართვის დეპარტამენტი, რომელსაც ალვერდ ჩანქსელიანი ხელმძღვანელობს, ითანხმებს კერძო და სახელმწიფო კომპანიების ნარჩენების მართვის გეგმას. მისი შვილების – ბესარიონ და დავით ჩანქსელიანების დაფუძნებული შპს-ეები კი სწორედ ამ მომსახურებას უწევენ კერძო და სახელმწიფო კომპანიებს.

საქმე იმაშია, რომ კერძო და სახელმწიფო კომპანიებს კანონი ავალდებულებს გარემოს დაცვისა სამინისტროს ნარჩენების მართვის გეგმა ჩააბარონ. გარდა ამისა, ეტაპობრივად შეავსონ შესაბამისი ფორმები და სპეციალურ მისამართზე ატვირთონ, ანუ სამინისტროს ჩააბარონ ანგარიში.

ბესარიონ და დავით ჩანქსელიანების დაფუძნებული კომპანია „ეკო სერვის ჯორჯია“ არა მხოლოდ ნარჩენების მართვის გეგმებს ამზადებს, არამედ კომპანიებს მათ სამინისტროსთან შეთანხმებასაც ჰპირდება. ეს კომპანია შეკვეთებს ნარჩენების მართვასთან დაკავშირებულ სხვა მომსახურებაზე სახელმწიფო სტრუქტურებიდანაც იღებს.

ნარჩენების მართვის კოდექსი ძალაში 2014 წელს შევიდა. ამ კოდექსის მიხედვით, ფიზიკური ან იურიდიული პირი, რომლის საქმიანობის შედეგად წლის განმავლობაში 200 ტონაზე მეტი არასახიფათო ნარჩენი, 1000 ტონაზე მეტი ინერტული ნარჩენი ან ნებისმიერი რაოდენობის სახიფათო ნარჩენი წარმოიქმნება, ვალდებულია შეიმუშაოს კომპანიის ნარჩენების მართვის გეგმა. წინააღმდეგ შემთხვევაში კომპანია დაჯარიმდება, ამ მხრივ ხარვეზების გამოვლენაზე გარემოსდაცვითი ზედამხედველობის სამსახური მუშაობს.

კოდექსის მიხედვით, კომპანიის ნარჩენების მართვის გეგმა ახლდება ყოველ 3 წელიწადში ან წარმოქმნილი ნარჩენების სახეობის, რაოდენობის შეცვლის და დამუშავების პროცესში არსებითი ცვლილებების შეტანის შემთხვევაში. მოთხოვნის შემთხვევაში თითოეული ასეთი გეგმა ხელმისაწვდომი უნდა იყოს დაინტერესებული მუნიციპალიტეტისა და სხვა პირებისთვის.

კერძო კომპანიებმა ნარჩენების მართვის გეგმა რომ მოამზადონ, ამისთვის მათ სპეციფიკური ცოდნა სჭირდებათ. შესაბამისი ცოდნის არქონის შემთხვევაში კი ისინი იძულებულები არიან დაიქირაონ ამ ცოდნის მქონე პირი ან კომპანია. სწორედ ასეთ მომსახურებას სთავაზობს მათ შპს „ეკო სერვის ჯორჯია“, რომელიც ალვერდ ჩანქსელიანის შვილებმა დავით და ბესარიონ ჩანქსელიენებმა 2015 წელს დააფუძნეს.

გარემოს დაცვისა და სოფლის მეურნეობის სამინიტროს თანამდებობის პირის კომპანიამ 2017-2019 წლებში ნარჩენების უტილიზაციასთან დაკავშირებულ მომსახურებაზე პირდაპირი დაკვეთები [ტენდერის გარეშე] მიიღეს გზების დეპარტამენტისგან, მუნიციპალური ლაბორატორიისგან, საქართველოს ფოსტისგან და სხვა უწყებებისგან.

ბესარიონ ჩანქსელიანი კიდევ ერთ კომპანიაში შპს „სანიტარი +“-ში ფლობს წილებს, რომელიც ასევე ნარჩენების მართვის მიმართულებით მუშაობს. ის ამ კომპანიის 40 პროცენტის მფლობელი და დირექტორია, კომპანიის 60 პროცენტს კი შპს „სანიტარი“ ფლობს.

შპს „სანიტარი“ გარემოს დაცვით სფეროში ერთ-ერთი გავლენიანი კომპანიაა და მის 33-33 პროცენტს გიორგი კაპანაძე, ბესიკ ჭელიძე და ნიკოლოზ ჩერქეზიშვილი იყოფენ.

შპს „სანიტარს“ 2017 წლიდან დღემდე სახელმწიფო სტრუქტურებისგან თითქმის ნახევარი მილიონი ლარის ღირებულების დაკვეთა აქვს მიღებული.

ალვერდ ჩანქსელიანი შვილების კომპანიის საქმიანობასა და მისი, როგორც თანამდებობის პირის საქმიანობებს შორის ინტერესთა კონფლიქტს ვერ ხედავს, მიუხედავად იმისა, რომ კომპანიების მიერ ანგარიშების შეთანხმება პირდაპირ მისი საკურატორო სფეროა.

ალვერდ ჩანქსელიანის თქმით, მისი შვილების კომპანია უფრო სხვა ტიპის გარემოსდაცვით  საქმიანობაზეა ორიენტირებული და არა ანგარიშების მომზადება-შეთანხმებაზე. ის ასევე გვარწმუნებს, რომ „ეკო სერვის ჯორჯიას“ კომპანიების მიერ მომზადებული დოკუმენტები მასთან განსახილველად არასდროს შესულა, თუმცა ასე რომც ყოფილიყო ალვერდ ჩანქსელიანი პრობლემას ვერ ხედავს: „თუ ვინმე კანონის შესაბამისად, სრულყოფილ მომსახურებას გაუწევს მსურველებს, ამაში რა პრობლემა უნდა იყოს. როდესაც ჩვენ გვეკითხებიან, თუ ვინ წევს ასეთ მომსახურებას ჩვენ სრულ სიას ვაწვდით კომპანიებს და „ეკო სერვის ჯორჯია“ არანაირად არ არის პრივილეგირებულ მდგომარეობაში. მათი დოკუმენტები რომც შემოვიდეს სამინისტროში, ისინი მხოლოდ ჩემთან არ განიხილება და სხვადასხვა სპეციალისტები ამოწმებენ მათ, ამიტომ მე პრობლემას ვერ ვხედავ“, – გვითხრა ალვერდ ჩანქსელიანმა.