ტაქსის კომპანია „მაქსიმის“ მძღოლები საპროტესტო აქციას მართავენ. მძღოლები კომპანიის ბათუმის ოფისთან შეიკრიბნენ და აცხადებენ, რომ აღარ იმუშავებენ, ვიდრე მგზავრობის ტარიფი არ მოიმატებს.
„ზაფხულში იყო ფასი გაზრდილი დაახლოებით 80 თეთრით, მერე ისევ დააკლეს, არ უნდა დაეკლოთ, რადგან ყველაფერი გაძვირდა, მანქანის მოვლის ხარჯმა მოიმატა, საცობებია… თუკი მგზავრობის ტარიფი მოიმატებს, ჩვენს კონკურენტებზე იაფი გამოვა მაინც „მაქსიმით“ მგზავრობა,“ – გვითხრა აქციის მონაწილე, თენგიზ ხილაძემ. მისი თქმით, მუშაობა დაახლოებით 250-მა მძღოლმა შეწყვიტა, კომპანია კი მუშაობას განაგრძობს.
ტაქსის მძღოლები უკვე შეხვდნენ კომპანიის მენეჯმენტს, თუმცა კონკრეტული პასუხი ჯერ არ მიუღიათ.
კომპანია „მაქსიმის“ ადმინისტრაციაში „ბათუმელებს“ უთხრეს, რომ სატელეფონო კომენტარს არ გააკეთებენ და მათი გადაწყვეტილების შესახებ დღის ბოლოს გახდება ცნობილი.
„მაქსიმის“ მძღოლებმა ანალოგიური მოთხოვნით საპროტესტო აქცია წლის დასაწყისშიც გამართეს.
ამავე თემაზე:
