აჭარის მთავრობის თავმჯდომარე მახინჯაურისა და ორთაბათუმის ადმინისტრაციული ერთეულების მოსახლეობას შეხვდა.
,,მოვედი აღმასრულებელი და საკანონმდებლო ხელისუფლების წარმომადგენლებთან ერთად, რათა მოვისმინოთ თქვენი პრობლემები და განვსაზღვროთ 2020 წლის ბიუჯეტის პრიორიტეტები,’’ – განაცხადა თორნიკე რიჟვაძემ მოსახლეობასთან შეხვედრისას.
მთავრობის თავმჯდომარესთან ერთად სოფელ მახინჯაურში, განთიადში, კაპრეშუმსა და ორთაბათუმში გამართულ შეხვედრებს ესწრებოდნენ: საქართველოს პარლამენტის ვიცე-სპიკერი ილია ნაკაშიძე, პარლამენტის დეპუტატები: მუხრან ვახტანგაძე და ფატი ხალვაში, აჭარის არ მინისტრთა კაბინეტის სრული შემადგენლობა, აჭარის არ უმაღლესი საბჭოს ვიცე-სპიკერი მერაბ კარანაძე, ხელვაჩაურის მუნიციპალიტეტის მერი ჯუმბერ ვარდმანიძე.
მოსახლეობის მთავარი პრიორიტეტი სასმელი წყლისა და ბუნებრივი აირის მიწოდება, გზების მოწესრიგება და მიწის დაკანონების საკითხია.
მთავრობის თავმჯდომარისა და სახელისუფლებო გუნდის შეხვედრები მოსახლეობასთან მუნიციპალიტეტის ყველა ადმინისტრაციულ ერთეულში ეტაპობრივად გაიმართება.
აღმასრულებელი და საკანონმდებლო ხელისუფლების წარმომადგენლები შეხვდნენ დღეს შარაბიძეების, აჭარისწყლისა და მაჭახლის ადმინისტრაციული ერთეულების მოსახლეობასაც.
2020 წლის ბიუჯეტის პრიორიტეტების განსაზღვრის მიზნით, ხელვაჩაურის მერთან ერთად, მოსახლეობის პრობლემები მოისმინეს პარლამენტის ვიცე-სპიკერმა ილია ნაკაშიძემ, პარლამენტის დეპუტატებმა მუხრან ვახტანგაძემ და სვეტლანა კუდბამ, აჭარის არ ჯანდაცვის მინისტრმა ზაალ მიქელაძემ და სოფლის მეურნეობის მინისტრის მოადგილემ მამუკა თურმანიძემ.
ამ ადმინისტრაციულ ერთეულებშიც მთავარი პრიორიტეტი სასმელი წყლისა და ბუნებრივი აირის მიწოდება, გზების მოწესრიგება და მიწის დაკანონების საკითხი იყო.
