Batumelebi

„რამდენად იყო უფლებამოსილი თვითმმართველი ქალაქის მერი, ერთპიროვნულად გაეცა ასეთი თანხმობა?“ – იკითხა მოსამართლე დავით მამისეიშვილმა და იქვე თქვა, რომ ეს ერთ-ერთი კითხვაა, რომელსაც სამართლებრივი შეფასება სჭირდება.

დღეს, 11 ოქტომბერს გართულ სხდომაზე ბრალდებულებმა ბათუმის მოქმედ მერთან, ლაშა კომახიძესთან მიღწეული წერილობითი თანხმობა წარმოადგინეს, რომლის მიხედვითაც პატიმრობაში მყოფი ბრალდებულები 400 ათას ლარს გადაიხდიან, გამამტყუნებელი განაჩენის შემთხვევაში.

მოსამართლე დავით მამისეიშვილს სხვა კითხვებიც აქვს: ეს თანხმობა მართლაც წარმოშობს თუ არა ზიანის ანაზღაურების ვალდებულებას და რამდენად შესაძლოა იგი ახალ გარემოებად ჩაითვალოს.

„მე არ ვარ სამოქალაქო საქმეების განმხილველი მოსამართლე და ამას სჭირდება სამართლებრივი შეფასება,“ – დასძინა მოსამართლემ.

მოსამართლე დავით მამისეიშვილი მომავალი კვირის სამშაბათს, 15 ოქტომბერს დაგეგმილ სასამართლო სხდომაზე აპირებს გადაწყვიტოს: ათავისუფლებს თუ არა პატიმრობიდან ბათუმის ყოფილ მერს, გია ერმაკოვს და მერიის ყოფილ მაღალჩინოსნებს – არჩილ ვანაძეს და ეგარსლან ლომიძეს.

სხდომის დასაწყისში ადვოკატებმა მოსამართლე დავით მამისეიშვილს წინა პროცესზე ნათქვამი სიტყვები გაახსენეს, როცა „მერიის მაღალჩინოსნების საქმეზე“ 4 ბრალდებული წინასწარი პატიმრობიდან გაათავისუფლეს. გია ერმაკოვი, არჩილ ვანაძე და ეგარსლან ლომიძე კი პატიმრობაში დატოვეს.

“წინა პროცესზე თქვენ თქვით, რომ ახლადაღმოჩენილი გარემოება იქნება შეთანხმება მერიასთან. ჩვენ მივაღწიეთ ამ შეთანხმებას ზიანის ანაზღაურებაზე…,” – მიმართა მოსამართლეს ადვოკატმა ტარიელ კაკაბაძემ.

ფული, რაზეც ადვოკატებმა სასამართლო პროცესზე ისაუბრეს, უძრავი ქონებითაა უზრუნველყოფილი.

“ეს არ არის ჩვენს მიერ შეძენილი ქონება. ეს არის ჩვენი ბაბუების და მშობლების მიერ შეძენილი ქონება,” – თქვა სასამართლო პროცესზე ბრალდებულმა გია ერმაკოვმა, როცა ადვოკატებმა სიტყვებით გამოსვლა დაასრულეს.

ადვოკატებს მიმართა პროკურორმა რამაზ შავაძემ:

“თქვენ აღნიშნეთ, რომ ეს არის თეთრსაყელოიანი დანაშაული, დანაშაული დანაშაულია… მე ეს მასალები გადმომეცა 15 წუთის წინ და შემდეგ პროცესზე ვიტყვი ჩემს პოზიციას,” – აღნიშნა პროკურორმა.

“ეს არის ჩასაკითხი მაქსიმუმ 20 წუთში… წარმოდგენილია ოფიციალური დოკუმენტები, აქ ფილოსოფიაზე არაა საუბარი,” – უპასუხა მოსამართლეს ადვოკატმა რამინ პაპიძემ.

მოსამართლეს ადვოკატმა ლევან მახარაშვილმაც გაახსენა წინა პროცესზე გაჟღებული “ზიანის ანაზღაურება” მერიასთან.

“მე არ შევიქმნი უხერხულობას ჩემი სიტყვების გამო…” – შეაწყვეტინა ერმაკოვის ადვოკატს მოსამართლემ. მან კიდევ ერთხელ თქვა, რომ აღკვეთი ღონისძიების შეცვლას შესაბამისი სამართლებრივი მსჯელობა სჭირდება და ამას დღევანდელ პროცესზე ვერ მოასწრებს.

“გია ერმაკოვი ვერ იქნება გამონაკლისი,” – დასძინა მოსამართლემ.

დავის საგანი “იაფი სახლის” პროექტია. პროკურატურის ვერსიით, გაიფლანგა 1 მილიონ 370 ათასი ლარი. ამ საქმეზე დაზარალებულის სტატუსი ბათუმის მერიას აქვს.

დაზარალებული, ანუ ბათუმის მერია ბათუმის ყოფილი მერის და კიდევ ორი მაღაჩინოსნის გირაოთი გათავისუფლებას 7 ოქტომბერს დასთანხმდა.

ლაშა კომახიძემ წერილი მოსამართლეს წინა სხდომაზეც მისწერა. მაშინ ზიანის ანაზღაურებაზე მზადყოფნას არავინ გამოხატავდა, თუმცა მერი თანახმა იყო შვიდივე ბრალდებული წინასწარი პატიმრობიდან გაეშვათ.

დღევანდელ პროცესზე შპს “აჭარკავშირის” ხელმძღვანელს – გია კახიანს მოუსმინეს. ამ კომპანიამ მოამზადა “იაფი სახლის” პროექტის ხარჯთააღრიცხვა.

სახელმწიფო შესყიდვების სააგენტოს ინფორმაციით, სამედიცინო დანიშნულების მქონე ავტომანქანების შესყიდვის მიზნით, საქართველოს მთავრობა გეგმავს კონსოლიდირებული ტენდერების ჩატარებას. შესაბამისად, სააგენტომ დაიწყო ბაზრის კვლევა, ფასებისა და ტენდერის პირობების დაზუსტების მიზნით. შეთავაზებებს სააგენტო 2019 წლის 16 ოქტომბრის ჩათვლით მიიღებს, შემდეგ კი გამოაცხადებს კონსოლიდირებულ ტენდერ[ებ]ს.

იგეგმება 20 ერთეული სამედიცინო დანიშნულების [სასწრაფო სამედიცინო დახმარების] ავტომანქანისა და 25 ერთეული ე.წ. „რეანომობილის“ შესყიდვა.

სამედიცინო დანიშნულების მქონე ავტომანქანების საგარანტიო პერიოდი უნდა გავრცელდეს 3 წელზე ან 200 000 კმ. გარბენზე [რომელიც უფრო ადრე დადგება].

„პრეტენდენტმა სატენდერო პროექტით განსაზღვრული თანმდევი საგარანტიო [გეგმიური] მომსახურების გაწევა უნდა განახორციელოს არანაკლებ ექვს ქალაქში: თბილისი, ქუთაისი, ბათუმი, თელავი, ზუგდიდი ან ფოთი და ახალციხე, ხოლო სხვა საგარანტიო შემთხვევაში [არაგეგმიური] მიმწოდებელი უფლებამოსილია სატრანსპორტო საშუალება შეაკეთოს თბილისში. გთხოვთ, მოგვაწოდოთ თქვენი მოსაზრებები განსაზღვრულ ლოკაციებთან დაკავშირებით“, – აღნიშნულია ბაზრის კვლევის განაცხადში.

სააგენტო პრეტენდენტებისგან ელოდება მოსაზრებებს ავტომანქანების მიწოდების ვადების შესახებაც. ასევე მათ მოსაზრებებს ტენდერების ლოტებად დაყოფის ან/და გაერთიანების შესახებ „მაგალითად, თუ გავაერთიანებთ 25-ვე რეანომობილს, შეუქმნის თუ არა ეს რომელიმე მიმწოდებელს პრობლემას, რომელსაც შეუძლია ცალკე ლოტის პირობების დაკმაყოფილება, მაგრამ გაერთიანების შემთხვევაში ვეღარ შეძლებს და.ა.შ.“

მთავარი ფოტო: „ბათუმელების“ არქივიდან

ამ თემაზე:

ბათუმის ყოფილი მერი – გია ერმაკოვი შესაძლოა წინასწარი პატიმრობიდან გაათავისუფლონ, ასევე, მერიის ყოფილი მაღალჩინოსნები – არჩილ ვანაძე და ეგარსლან ლომიძე.

“წარმოვადგინეთ მერიასთან მიღწეული შეთანხმება, რომლის მიხედვითაც, გამამტყუნებელი განაჩენის შემთხვევაში ჩადებული ქონებიდან ანაზღაურდება ზიანი,” – გვითხრა პროცესის დაწყებამდე ადვოკატმა რამინ პაპიძემ.

გია ერმაკოვის ადვოკატის, ლევან მახარაშვილის ინფორმაციით, მერიასთან ამ შეთანხმებას 7 ოქტომბერს მიაღწიეს.

მერიის ყოფილ მაღალჩინოსნებს 1 მილიონ 370 ათასი ლარის გაფლანგვას ედავება პროკურატურა. მერიასთან მიღწეული შეთანხმებით კი, გია ერმაკოვს და არჩილ ვანაძეს 400-400 ათასი ლარის უძრავ ქონებაზე შეუძლიათ ყადაღის დადება.

“გარდა ამისა, მზად ვართ თითოეული ბრალდებულის გირაოს უზრუნველსაყოფად ჩავდოთ 100-100 ათასი ლარი,” – დასძენს ადვოკატი.

ბათუმის მერიის ყოფილი 7 მაღალჩინოსნის საქმის განხილვა ბათუმის საქალაქო სასამართლოში გრძელდება. წინა სასამართლო პროცესზე მოსამართლე დავით მამისეიშვილმა გირაოს საფუძველზე გაათავისუფლა: ბაგრატ მანველიძე, ბაგრატ ხალვაში, თენგიზ პეტრიძე და ვლადიმერ ხინთიბიძე. ამ დრომდე პატიმრობაში რჩებიან: ბათუმის ყოფილი მერი – გია ერმაკოვი, აჭარის ფინანსთა და ეკონომიკის მინისტრის ყოფილი მოადგილე – არჩილ ვანაძე და ბათუმის მერიის ქონების მართვის სამსახურის ყოფილი უფროსი – ეგარსლან ლომიძე. პატიმრობაში ის ბრალდებულები დარჩნენ, რომლებსაც პროკურატურა სამსახურებრივი უფლებამოსილების ბოროტად გამოყენების გარდა, დიდი ოდენობით თანხის გაფლანგვას ედავებიან.

მოსამართლემ წინა სხდომაზე პატიმრობაში დარჩენილ პირებს მიმართა, რომ მათ ზიანის ანაზღაურებაზე მერიას უნდა შეუთანხმდნენ.

მოსამართლე დავით მამისეიშვილი სასამართლო დარბაზში ჯერ არ შემოსულა.

აჭარის ტურიზმისა და კურორტების დეპარტამენტის ცნობით, 2020 წელს ბათუმში ცნობილი ბელგიელი მწერლის ჟორჟ სიმენონის ბათუმში გადაღებული ფოტოების გამოფენა და ბათუმზე დაწერილი ნოველის – „ხალხი მოპირდაპირე მხარეს“ ქართულად თარგმნა იგეგმება.

ამის შესახებ დღეს, 11 ოქტომბერს, აჭარის ტურიზმის დეპარტამენტში ცნობილი მწერლის შვილ ჯონ სიმენონთან გამართულ შეხვედრაზე ისაუბრეს.

დეპარტამენტის ცნობით, სამუშაო ჯგუფის წევრებმა შეხვედრისას სიმენონის ბათუმში  ვიზიტის შედეგები შეაჯამეს და ბელგიელი მწერლის ბათუმში მოგზაურობის პოპულარიზაციის მიზნით ღონისძიებები დაგეგმეს. მათ შორის საუბარია ბათუმში ჟორჟ სიმენონის ტურისტული მარშრუტის შექმნაზე, მწერლის მიერ საუკუნის წინ ბათუმში გადაღებული უცნობი ფოტოების გადმოცემასა და ფოტოგამოფენის მოწყობაზე, მის მიერ ბათუმში დაწერილი სტატიებისა და ნოველის ქართულად თარგმნასა და გამოქვეყნებაზე, ასევე მუზეუმში ჟორჟ სიმენონის კუთხის მოწყობასა და კონფერენციის ჩატარებაზე.

ბელგიელი მწერლის შვილი ჯონ სიმენონი, რომელიც  ჟორჟ სიმენონის ფონდის ხელმძღვანელია, ბათუმში აჭარის ტურიზმის დეპარტამენტის მოწვევით იმყოფება. ჯონ სიმენონმა ბათუმში ის ადგილები მოინახულა, რომლებიც ბათუმზე დაწერილ ნოველაშია აღწერილი. ის, ასევე, გაეცნო იმ საარქვიო მასალებს, სტატიებს, რომლებიც ჟორჟ სიმენონის ბათუმში მოგზაურობას ასახავს.

ჟორჟ სიმენონი ბათუმში გასული საუკუნის 30-იან წლებში იმყოფებოდა. მან საბჭოთა კავშირში იმოგზაურა შავი ზღვის ირგვლივ, რვა დღე დაჰყო ოდესაში და 1933 წლის პირველი ნახევრის უკრაინაში მასობრივი შიმშილობის მომსწრეც გახდა. უკრაინიდან სიმენონი ბათუმში ჩამოვიდა და აქედან სტამბოლში გაემგზავრა.

____________

ფოტოზე: ჯონ სიმენონი ბათუმში. ფოტო: აჭარის ტურიზმისა და კურორტების დეპარტამენტი

საჯარო უწყებებიდან აჭარაში პიარზე ყველაზე მეტს აჭარის უმაღლესი საბჭო ხარჯავს. 2018 წელს ამ უწყებამ საზოგადოებასთან ურთიერთობის სფეროში გაწეული აქტივობებისთვის და ამ მიმართულებით 11 დასაქმებულის გასამრჯელოსთვის ჯამში 218 391 დახარჯა. 2017 წელს ამავე უწყებამ პიარში 191 247 ლარი დახარჯა.  დეტალურ ინფორმაციას უწყებებიდან გამოთხოვილი საჯარო ინფორმაციების საფუძველზე „საერთაშორისო გამჭვირვალობა საქართველო“ [TI] აქვეყნებს.

TI-ის კვლევის მიხედვით, ქვეყნის მასშტაბით გაზრდილია ხარჯები პიარის მიმართულებით. 194 საჯარო უწყებიდან მიღებული საჯარო ინფორმაციის მიხედვით, 2017 წელთან შედარებით 2018 წელს 4 პროცენტით გაიზარდა პიარის მიმართულებით დასაქმებულთა რაოდენობა. გასულ წელს ხელისუფლების პიარზე სულ 1037 ადამიანი მუშაობდა. ამ მიმართულებით გაწეული ხარჯები კი 20 მილიონ 047 ათას 896 ლარამდე გაიზარდა. ეს დაახლოებით ორი მილიონით მეტია 2017 წელთან შედარებით.

რაც შეეხება აჭარას – უმაღლესი საბჭოს შემდეგ მეორე ადგილს აჭარის მთავრობის აპარატი იკავებს. ამ უწყებაში 2018 წელს პიარზე 152 280 ლარი დახარჯეს [2017 წელს – 152 700].

აჭარის სამინისტროებს შორის პიარზე ყველაზე მეტს აჭარის განათლების სამინისტრო ხარჯავს – 59 998 ლარი [2017 წელს – 58 285]; ფინანსთა და ეკონომიკის სამინისტრო – 28 750 ლარი [2017 წელს – 20 381], ჯანდაცვის სამინისტრო – 16 758 ლარი [15 435], სოფლის მეურნეობის სამინისტრო – 21 060 ლარი [20 891].

აჭარის ტურიზმის დეპარტამენტმა კი, პიარზე 153 558 ლარი დახარჯა [2017 წელს – 115 582].

შენიშვნა: აჭარის ტურიზმისა და კურორტების დეპარტამენტის ცნობით, დეპარტამენტის საზოგადოებასთან ურთიერთობისა და რეკლამის სამსახურის თანამშრომლები, გარდა ერთისა, მუშაობენ აჭარის, როგორც ტურისტული რეგიონის და არა ტურიზმის დეპარტამენტის, როგორც უწყების პიარზე.

ხელვაჩაურის სოფელ აჭარისწყალში დაგეგმილია მაჭახლის ხეობის ეთნოსოფლის საინფორმაციო ცენტრის მშენებლობა, ხოლო სოფელ ზედა ჩხუტუნეთში – სოფლის ცენტრის კეთილმოწყობა. ზედა ჩხუტუნეთში არსებული „კულტურის სახლი“ დაიშლება და ახალი, თანამედროვე საზოგადოებრივი მრავალფუნქციური ობიექტი აშენდება; დაიშლება სოფლის ცენტრში განთავსებული შენობებიც და ახალი სავაჭრო-მომსახურების ობიექტები აშენდება. სამუშაოები მაჭახლის ეთნოსოფლის კონცეფციის ფარგლებში განხორციელდება.

სოფელ აჭარისწყალში მაჭახლის ხეობის ეთნოსოფლის საინფორმაციო ცენტრის, ასევე, ზედა ჩხუტუნეთის კულტურის სახლისა და სავაჭრო ობიექტების მშენებლობისთვის დეტალური საპროექტო-სახარჯთაღრიცხვო დოკუმენტაციის შედგენაზე აჭარის ფინანსთა და ეკონომიკის სამინისტრომ კონკურსი გამოაცხადა. საკონკურსო თანხა 110 100 ლარია.

არაუგვიანეს 2020 წლის 24 თებერვლისა, კონკურსში გამარჯვებულმა სამინისტროს უნდა წარუდგინოს არქიტექტურული პროექტი შესაბამისი საექსპერტო დასკვნით. ელექტრონულ კონკურსში წინადადებების მიღება კი 2019 წლის 23 ოქტომბერს დაიწყება და 28 ოქტომბერს დასრულდება.

„აჭარის ფინანსთა და ეკონომიკის სამინისტროს დაკვეთით მომზადდა მაჭახელის ხეობის ეთნოსოფლის ქალაქმშენებლობითი დოკუმენტაცია, წინასაპროექტო კვლევა და კვლევაზე დაფუძნებული ხედვის ნაწილები. ხედვის მიზანია მაჭახლის სოფლების და მთლიანად რეგიონის მდგრადი ეკონომიკური განვითარების ხელშეწყობა და სწორედ ამ მიზნით დოკუმენტის დონეზე შემუშავდა კონკრეტული ობიექტების, ადგილებისა და კომპლექსების განვითარების ესკიზური პროექტები. პროექტის შემუშავებისას გათვალისწინებული უნდა იყოს ობიექტის არქიტექტურული იერსახის ადგილმდებარეობასთან შესაბამისობა, მაჭახელის ხეობის კულტურული ლანდშაფტის, ბუნებრივი გარემოს და ადგილობრივი ტრადიციული არქიტექტურის ხასიათის დაცვა, მისი ხაზგასმით… კონკურსში გამარჯვებული პრეტენდენტი ვალდებულია სამშენებლო სამუშაოების მიმდინარეობისას საავტორო ზედამხედველობის გაწევა უზრუნველყოს დამატებითი ანაზღაურების გარეშე“, – აღნიშნულია კონკურსის ტექნიკურ დავალებაში.

მაჭახელას ხეობაში ეთნოსოფლის განვითარების გეგმა-კონცეფციის შესამუშავებლად აჭარის ფინანსთა და ეკონომიკის სამინისტროს აჭარის ბიუჯეტიდან დაახლოებით 423 700 ლარი ჰქონდა გათვალისწინებული. გეგმა-კონცეფციის შედგენაზე კონკურსი სამინისტრომ 2018 წელს გამოაცხადა.

ხელშეკრულება კონკურსის ერთადერთ მონაწილე კომპანია „არტსტუდიო-პროექტთან“ 454 300 ლარზე [დღგ-ს ჩათვლით] გაფორმდა. საბოლოო მიღება-ჩაბარების აქტი კი, სამინისტროს ინფორმაციით, კომპანიასთან 2019 წლის 18 ივლისს გაფორმდა.

ამ თემაზე:

ბათუმის გამწვანებისა და ლანდშაფტური დაგეგმარების სამსახურის ინფორმაციით, ძველ ბათუმში, ზვიად გამსახურდიასა და გიორგი მაზნიაშვილის ქუჩებზე, წელს 744  ძირ ხე-მცენარეს დარგავენ.

დღეს, 11 ოქტომბერს,  ზ. გამსახურდიას ქუჩაზე 220 ძირ ხე-მცენარეს გამწვანების სამსახური ქუჩის მცხოვრებლებთან ერთად დარგავს. საუბარია შემდეგ მცენარეებზე: ტუია სმარაგდა პირამიდული, ტუია ოქროსფერი პირამიდული, სფეროსებრი ტუია, ფოტინია შტამბზე,  კალისტემონი და მაგნოლია სულანჟა.

__________

ფოტოზე: მაგნოლია სულანჟას ყვავილობა ბათუმში. ფოტო: greenbatumi.ge

საგანგებო სიტუაციების მართვის სამსახურის ინფორმაციით, 2019 წლის სეზონზე მაშველებმა 300-მდე ადამიანის სიცოცხლის გადარჩენა შეძლეს შავი ზღვის სანაპირო ზოლსა და ასევე, თბილისის წყლებზე.

გადარჩენილებს შორის 69 არასრულწლოვანი და უცხო ქვეყნის 67 მოქალაქე იყო. გარდა ამისა, მაშველებმა სანაპირო ზოლში დაკარგული 78 არასრულწლოვანი იპოვეს.

დღეს, 11 ოქტომბერს,  საგანგებო სიტუაციების მართვის სამსახურის მაშველებმა 2019 წლის საზღვაო სეზონი ბათუმში შეაჯამეს.

___________

ფოტოზე: კადრი საგანგებო სიტუაციების მართვის სამსახურის ვიდეომასალიდან.

„ბათუმის წყლის“ ინფორმაციით, ავარიული დაზიანების გამო დღეს, 11 ოქტომბერს, 11:00 საათზე 18:00 საათამდე წყალმომარაგება შეუწყდება:

[crosslist]

• 26 მაისის ქუჩას – რუსთაველიდან ზურაბ გორგილაძის ქუჩამდე
• მელიქიშვილის ქუჩას- რუსთაველიდან ზურაბ გორგილაძის ქუჩამდე
• ვაჟა-ფშაველას ქუჩას – რუსთაველიდან ზურაბ გორგილაძის ქუჩამდე
• ლუკა ასათიანის ქუჩას – რუსთაველიდან ზურაბ გორგილაძის ქუჩამდე
• რუსთაველის ქუჩას – მელიქიშვილიდან ლუკა ასათიანამდე
• კლდიაშვილის ქუჩას – მელიქიშვილიდან ვაჟა- ფშაველამდე
• მემედ აბაშიძის ქუჩას – მელიქიშვილიდან ლუკა ასათიანამდე
• ზურაბ გორგილაძის ქუჩას – მელიქიშვილიდან ვაჟა- ფშაველამდე

[/crosslist]

გუშინ, 9 ოქტომბერს, დღის 4 საათზე, ქობულეთის შემოვლით გზაზე  15 წლის ლიკა სარჯველაძე დაიღუპა. ის მამასთან და 2 წლის ძმასთან ერთად გურიის ერთ-ერთ სოფელში მიდიოდა. ქობულეთის შემოვლით გზაზე მორიგი ავარია მოხდა და ორი მსუბუქი ავტომანქანა შეეჯახა ერთმანეთს. ლიკა ექიმებს შემთხვევის ადგილზე უკვე გარდაცვლილი დახვდათ.

კლინიკაში ლიკას 2 წლის ძმა  და მამა გადაიყვანეს. ბავშვს სახეზე ნაკაწრები ჰქონდა და თავის ტვინის შერყევა. „მამამ სამედიცინო მომსახურების გაწევაზე უარი თქვა,“ – გვითხრეს ექიმებმა.

ამ ამბავზე დღეს ბევრი საუბრობდა, ისევე, როგორც ორი თვის წინ, ივლისში, როცა გზის იმავე მონაკვეთზე ცოლ-ქმარი დაიღუპა და 13 ადამიანი დაშავდა, მეორე დღეს კი დაღუპული მშობლების 6 წლის ბიჭიც გარდაიცვალა კლინიკაში. საზოგადოება ამ გზის უსაფრთხოებაზე ეჭვებს წინა წლის ივლისშიც გამოთქვამდა, როცა იმავე მონაკვეთში ტყუპი ბავშვები და მამა დაიღუპნენ.

არც აქამდე და არც დღეს, როცა მორიგ ავარიას 15 წლის გოგოს სიცოცხლე ემსხვერპლა, პასუხისმგებლობას არავინ იღებს. წელს, გაზაფხულზე, ამ გზაზე შსს-მ ამოყირავებული ავტომანქანაც განათავსა უსაფრთხო მოძრაობის კამპანიის ფარგლებში, თუმცა ზუსტად იმ ადგილას 14 მაისს მორიგი ავარია მოხდა, დაშავდა 4 ადამიანი. შსს-ს და რომელიმე სხვა უწყებისთვის ვერც ეს ავარია გახდა გზავნილი კონკრეტული გადაწყვეტილების მისაღებად.

თუკი „ბათუმელების“ არქივში „ქობულეთის შემოვლით გზას“ ჩაწერთ, ბევრი სხვა ავარიის შესახებ ნახავთ ინფორმაციას: დაღუპულ ქალებზე, კაცებზე, ბავშვებზე… ჩვენთვის უცნობია ოფიციალური სტატისტიკა, რამდენი დაშავდა და დაიღუპა ამ გზაზე, თუმცა „ბათუმელების“ არქივის მიხედვით, 2018 წლის ივლისიდან დღემდე ქობულეთის შემოვლით გზაზე 8 ადამიანი დაიღუპა, მათ შორის 4 ბავშვი, დაშავდა – 23. კიდევ ერთი ცოლ-ქმრის სიცოცხლე ამავე გზაზე მომხდარ ავარიას 2016 წლის 28 აგვისტოს ემსხვერპლა.

ზუსტად ანალოგიური მოტივით ხელისუფლებამ 2017 წელს ქუთაისის შემოვლითი გზა ცალმხრივად ჩაკეტა – ეს გადაწყვეტილება ამ მონაკვეთში ხშირი ავარიისა და ათეულობით ადამიანის დაღუპვის შემდეგ მიიღეს. ამჟამად ამ გზას ოთხზოლიან ავტომაგისტრალად აკეთებენ. ამ გადაწყვეტილების შემდეგ აღარ ვისმენთ მძიმე ისტორიებს გზის ამ მონაკვეთში ადამიანების სიკვდილის შესახებ.

გზების დეპარტამენტის პრესცენტრი: „დეპარტამენტის საქმიანობას წარმოადგენს ავტომაგისტრალების, შიდასახელმწიფოებრივი გზების მშენებლობა და მათი აღჭურვა უსაფრთხოების კომპონენტებით. ეს გზა აშენებულია და ყველა საერთაშორისო უსაფრთხოების კომპონენტით აღჭურვილია.  ევროპულ ქვეყნებში ასეთ ჩქაროსნულ გზებს არც ანათებენ, რადგან ესეც უსაფრთხოების ზომაა… გერმანიაშიც ყველა ავტობანი განათებული არ არის. ჩვენთან კამერებიც არის, შუქამრეკლებიც და ვიბრაციის ზოლები, რომლებიც ამცნობენ მძღოლს, რომ გადაჭარბებული სიჩქარით მოძრაობს“.

ხომ არ აპირებს ხელისუფლება იგივე გადაწყვეტილება მიიღოს ქობულეთის შემოვლით გზასთან დაკავშირებით, რაც ქუთაისში გააკეთეს, როცა შემოვლითი გზა ცალმხრივი გახდა? – ვკითხეთ საქართველოს გზების დეპარტამენტის პრესცენტრს. პრესცენტრის განმარტებით, თემაზე კომენტარს დღეს ვერ გააკეთებენ, უწყების ხელმძღვანელი პირების მოუცლელობის გამო.

დეპარტამენტის პრესცენტრში გვითხრეს, რომ მსგავს საკითხზე არავინ მსჯელობს და ქუთაისის გზის ცალმხრივად ჩაკეტვაც ხშირ ავარიას არ უკავშირდება.

„ცალმხრივ მოძრაობაზეც საკმაოდ ბევრი ხდება ავტოსაგზაო შემთხვევები… ამ ეტაპზე ვერ ვხედავთ ამის საჭიროებას. ქუთაისში იმიტომ არ დამატებულა, რომ იქ გახშირებული ავტოსაგზაო შემთხვევებია, ეგ ითვლება კოეფიციენტით და ტრაფიკის გატარებით. ამ შემთხვევაში ქუთაისის აეროპორტმა მოითხოვა ტრაფიკის გაზრდის შედეგად ორი ზოლის დამატება, რადგან ნაკადი შედიოდა ქუთაისში ძალიან დიდი… ამ ეტაპზე თურქეთის საზღვრისკენ ასეთივე დიდი მოძრაობა არ არის. არ არსებობს იმის საჭიროება, რომ ასეულობით მილიონი სესხი აიღოს სახელმწიფომ იმისთვის, რომ ვიღაცას საგზაო მოძრაობის წესების დაცვა არ სურს,“ – გვიპასუხეს საქართველოს გზების დეპარტამენტში.

თუმცა საპირისპირო რამ წერია ქუთაისის შემოვლით გზასთან დაკავშირებულ ოფიციალურ დოკუმენტში: 2018 წლის ბოლოს, როცა საქართველოს გზების დეპარტამენტმა ქუთაისში ოთხზოლიანი ავტომაგისტრალის შესახებ ტენდერი დამატებით გამოაცხადა, დოკუმენტაციაში სწორედ ის ჩაწერა, რომ გზაზე „ფატალური ავარიები“ შემცირდება. მაშინ კვლევა გზების დეპარტამენტისთვის ტენდერში გამარჯვებულმა  შპს „ტრანსპროექტმა“ ჩაატარა.

„გამოკვლევა აჩვენებს, რომ ოთხზოლიან მონაკვეთებზე დაკვირვება ფატალური ავარიებისა გაცილებით დაბალი დონეა, მაგრამ ტრავმული დაშავებების დონე ან იგივეა ან მაღალია. საერთაშორისო გამოკვლევები ადასტურებს, რომ ფატალური/მძიმე შედგებით უბედური შემთხვევების რაოდენობა მნიშვნელოვნად, ორ-სამჯერ უფრო დაბალია ოთხზოლიან გზაზე, ვიდრე ორზოლიანი სავალი ნაწილის მქონე გზაზე (საქართველოს მონაცემებში არ არის დაყოფილი მძიმე/მსუბუქი უბედური შემთხვევები).

შემოთავაზებული მიდგომა ყურადღებას გაამახვილებს ფატალური შედეგებიანი ავარიების მნიშვნელოვან პოტენციურ შემცირებაზე ოთხზოლიანი გზის სტანდარტამდე გზის გაფართოებით და არ ითვალისწინებს ტრავმული ავარიების შემცირებას, შემდეგი კოეფიციენტები უბედური შემთხვევების აღსაწერად იქნა გამოყენებული მიმდინარე კვლევისათვის,“ – წერია კვლევაში.

„გასაგებია, რომ „ჭკვიანი კამერებია“ დამონტაჟებული ქობულეთის გზაზე, კონტროლდება და არის საგზაო ნიშნები, მაგრამ ფაქტია, რომ ეს არ არის საკმარისი. ვიღაცის დასჯა და დაჯარიმება პრობლემას ვერ აგვარებს. ეს გზა სასაკლაოდ არის ქცეული,“ – მიიჩნევს ბაჩო გურაბანიძე, „აჭარის ტელევიზიის“ გადაცემა „დილის ტალღის“ რედაქტორი. ის 15 წლის გოგოს ტრაგიკულ დაღუპვას „ფეისბუქში“ გამოეხმაურა და პროტესტის ნიშნად ქობულეთის შემოვლითი გზის გადაკეტვის სურვილი გამოთქვა სამოქალაქო აქტივისტებთან ერთად ლოზუნგით – „ეს გზა კლავს“.

„ბათუმელების“ ინფორმაციით, საპროტესტო აქციას ქობულეთის შემოვლით გზაზე სამოქალაქო აქტივისტებიც გეგმავენ.

„დროებით ცალმხრივი უნდა გახდეს ეს გზა. შესაძლოა, არ მოსწონდეს ვიღაცას ის, რომ მის სახლთან ჩაივლის ისევ ტრაილერი, ან ქობულეთში გაივლიან ეს მანქანები, მაგრამ უნდა ავწონ-დავწონოთ საფრთხეები. მსხვერპლთა რაოდენობა დიდია. არსებობს პრეცედენტი, როცა ქუთაისში მოძრაობა ცალმხრივი გახდა და პრობლემა მოგვარდა,“ – ამბობს ბაჩო გურაბანიძე.

რას გეგმავს შინაგან საქმეთა სამინისტრო? – „ბათუმელებმა“ დღეს ეს შეკითხვაც დასვა, თუმცა უწყების პრესცენტრში გვითხრეს, რომ პასუხს ხვალ მივიღებთ.

„ჩვენ შეგვიძლია ჩვენი რესურსით შევისწავლოთ, რა იწვევს ამ ავარიებს და რა უნდა გაკეთდეს, მაგრამ ხელისუფლებამ უნდა გამოხატოს რეკომენდაციების შესრულების მზადყოფნა,“ – უთხრა „ბათუმელებს“ „საქართველოს ტრანსპორტის და გზების ასოციაციის“ ხელმძღვანელმა. დავით მესხიშვილის თქმით, რამდენიმე მსგავს ვითარებაზე კონკრეტული რეკომენდაციები გაიწერა, მაგრამ იგი „ფურცელზე დარჩა“.

„აჯობებს თუკი სიჩქარის შეზღუდვა დაწესდება, ვიდრე პრობლემას შეისწავლიან ექსპერტები… ვერ გეტყვით, რამდენად შეიძლება იყოს გამოსავალი ცალმხრივად მოძრაობის შეზღუდვა. ევროპის ქვეყნებში არსებობს გზების უსაფრთხოების დეპარტამენტები, რომლებშიც ჩართულები არიან გზის ინჟინრები, საპატრულო პოლიციის თანამშრომლები. უნდა განისაზღვროს, კონკრეტულად რა იწვევს ამ ავარიებს. შესაძლოა, გზის საფარი სტანდარტს აკმაყოფილებს და უსაფრთხოების რეჟიმი არსებობს, მაგრამ არის გარე ფაქტორი, რაც ახდენს გავლენას. ევროპული პრაქტიკის მიხედვით, ადგილს, სადაც ორ თვეში სამზე მეტი ავარია ხდება, „შავი წერტილის“ სტატუსს ანიჭებენ. საქართველოში ბევრი ასეთი „შავი წერტილი“ გვაქვს, მაგრამ, სამწუხაროდ, არ არსებობს არც ერთი ოფიციალური უწყება, რომელიც პასუხისმგებელია გზის უსაფრთხოებაზე,“ – აღნიშნავს დავით მესხიშვილი.

მთავარი ფოტო: 15 წლის ლიკა სარჯველაძე. ის ავტოსაგზაო შემთხვევის შედეგად გუშინ, 9 ოქტომბერს, დაიღუპა.

„სოკარ ჯორჯია გაზის“ ინფორმაცით, ბუნებრივი აირის მიწოდების აღდგენა ბათუმში ხვალ, 11 ოქტომბრიდან, დილიდან დაიწყება.

„სამუშაოები დასრულდა იმაზე ადრე, ვიდრე ვგეგმავდით“ –  განაცხადეს კომპანიაში. ამის შესახებ შეტყობინება აბონენტებმაც მიიღეს.

„სოკარ ჯორჯია გაზის“ აჭარის რეგიონული ოფისის დირექტორის, ვახტანგ ბერიშვილის ინფორმაციით, ხვალ დილიდან  ბუნებრივი აირის მიწოდება აღუდგებათ საავადმყოფოებსა და სხვა სასიცოცხლო ობიექტებს, შემდეგ კი ბათუმის სხვადასხვა უბნებისთვის ბუნებრივი აირის მიწოდების აღდგენა ქალაქის შემოსასვლელიდან დაიწყება და ეტაპობრივად გაგრძელდება.

კომპანიაში აცხადებენ, ასევე, რომ ბუნებრივი აირის მიწოდების აღდგენის პროცესი ხვალ ვერ დასრულდება: „შესაძლოა, ეს პროცესი სამ დღესაც გაგრძელდეს“

კომპანია „სოკარ ჯორჯია გაზი“ მომხმარებელს მოუწოდებს, დაკეტილ მდგომარეობაში იქონიონ საცხოვრებელ ბინებში არსებული გაზის ონკანები და უყურადღებოდ არ დატოვონ  დანადგარები.

დამატებითი ინფორმაციისთვის აბონენტებს შეუძლიათ დარეკონ „სოკარ ჯორჯია გაზის“ ცხელ ხაზზე: 16 114

მოსამართლე ჯუმბერ ბეჟანიძემ უარი თქვა „აჭარის ტელევიზიის“ ბორდის კანდიდატების შესარჩევი კომისიის მუშაობის შეჩერებაზე. განჩინებაში მოსამართლემ პირდაპირ ჩაწერა, რომ ეს „მნიშვნელოვნად დამაზიანებელი იქნება საზოგადოებრივი მაუწყებლის ფუნქციონირებისთვის“.

„მოსამართლე პირდაპირ წერს, რომ დავის განხილვის დასრულებამდე ახალ ბორდს ვეღარ აირჩევენ, თუკი კომისიის უფლებამოსილება გაუქმდება და იგი ვეღარ აირჩევს ახალ დირექტორს. რატომ სურს მოსამართლეს, რომ ახალმა ბორდმა აირჩიოს ტელევიზიის დირექტორი? სამწუხაროდ, სასამართლო ხელისუფლების ინტერესს ატარებს,“ – ამბობს გია აბულაძე, უმაღლესი საბჭოს ფრაქცია „ერთიანი ნაციონალური მოძრაობის“ ხელმძღვანელი. ამ ფრაქციამ მიმართა სასამართლოს და იმ საკონკურსო კომისიის მუშაობის შეწყვეტა ითხოვა, რომელმაც ტელევიზიის ბორდის წევრობის კანდიდატები უნდა შეარჩიოს. ფრაქციის არგუმენტი იყო ის, რომ უმაღლესი საბჭოს თავმჯდომარემ, დავით გაბაიძემ, რეგლამენტი დაარღვია და ფრაქციებთან კონსულტაცია არ გაიარა.

„ეს მნიშვნელოვან ზიანს მიაყენებს საზოგადოებრივი მაუწყებლის აჭარის ტელევიზიის და რადიოს“ საჯარო ინტერესებსაც…“ – დასძენს მოსამართლე განჩინებაში. მოსარჩელე კი შერჩევით სამართალზე ამახვილებს ყურადღებას, რადგან წინა შემთხვევაში – 24 სექტემბერს ბათუმის საქალაქო სასამართლომ დირექტორის შესარჩევი კონკურსი შეაჩერა. ამ შემთხვევაში ტელევიზიის დირექტორობის ერთ-ერთი კანდიდატი – გიორგი კოხრეიძე დავობდა მრჩეველთა საბჭოს წინააღმდეგ. მან საბჭოს სხდომაზე, რომელსაც 4 წევრი ესწრებოდა [მათგან ერთმა კენჭისყრაში არ მიიღო მონაწილეობა], 2 ხმა მიიღო და მიიჩნევს, რომ არჩეული დირექტორი თვითონაა. ამ შემთხვევაში გადაწყვეტილება მოსამართლე კობა გოცირიძემ მიიღო.

„სასამართლომ კოხრეიძის შუამდგომლობის განხილვისას რატომ არ გაითვალისწინა საზოგადოებრივი ინტერესები და აბსოლუტურად უსაფუძვლოდ შეაჩერა დირექტორის არჩევის კომისიის მუშაობა?“ – კითხულობს გია აბულაძე.

მოსამართლე ჯუმბერ ბეჟანიძემ დირექტორის კონკურსის შეჩერებაზე უარი უთხრა ასევე ნათია კაპანაძეს, ტელევიზიის წინა დირექტორს, რომელსაც 19 აპრილს იმპიჩმენტი მოუწყვეს. კაპანაძე მიიჩნევს, რომ იმპიჩმენტი უკანონია და დავის განხილვამდე სასამართლოს შუამდგომლობით მიმართა შეჩერებულიყო კონკურსი. მაშინ მოსამართლე ჯუმბერ ბეჟანიძემ თქვა, რომ იმპიჩმენტის წესით თანამდებობიდან გადაყენებულ ნათია კაპანაძეს გამოცხადებულ კონკურსში მონაწილეობის უფლება აქვს.

„უკვე რამდენიმე წლის შემდეგ მეორედ მოვინახულე შავი ზღვის სანაპირო, სხვაგვარად არ შემეძლო, ისე შევიყვარე ეს მხარე. მაშინ აღმოვაჩინე ბათუმი, კავკასიის მთელი მშვენიერება. განა, შეიძლება დაივიწყო სანაპირო, ნავსადგური, ფერების სამხრეთული ზეიმი, მოალერსე ზვირთები… მაგრამ ყველაზე მთავარი მაინც ადამიანები არიან. საათობით ვიდექი სანაპიროზე, დავდიოდი ბაზრებში (მიმაჩნია, რომ ბაზარი შესანიშნავი ადგილია დაკვირვებისთვის, აქ ადამიანები ძალიან ბუნებრივად იქცევიან) და არ შემეძლო მათთვის თვალი მომეშორებინა, ენა არ ვიცოდი, მაგრამ პრაქტიკულად ყველაფერი მესმოდა, იმდენად ნათელი და გამომხატველია ჟესტები,“ – ასე იხსენებს ბათუმს ცნობილი ფრანგი მწერალი, ჟორჟ სიმენონი 1986 წელს გაზეთ „იზვესტიაში“ გამოქვეყნებულ ინტერვიუში.

ბათუმის აკაკი წერეთლის სახელობის საჯარო ბიბლიოთეკაში წარმოდგენილია წიგნად ფონდში დაცული მწერალ ჟორჟ სიმენონის შემოქმედების თანამედროვე გამოცემები და იმ პერიოდის ბიბლიოგრაფიული მიმოხილვები, როცა ცნობილი მწერალი ბათუმს ესტუმრა. გამოფენაზე წარმოდგენილია ოთხი უნიკალური ფოტოს პრინტიც იმ ოცდაათიდან, რომლებიც ჟორჟ სიმენონმა ბათუმში ვიზიტისას გადაიღო.

მწერალმა ბათუმში გასული საუკუნის 30-იან წლებში იმოგზაურა, მის რომანში – „ხალხი მოპირდაპირე მხარეს“ [Les Gens d’en Face] ერთ-ერთ ნაწილში მოქმედება სწორედ ბათუმში ხდება.

ოქტომბერში ბათუმს ჟორჟ სიმენონის შვილი, ჯონ სიმენონი ესტუმრა აჭარის ტურიზმის დეპარტამენტის მოწვევით. საჯარო ბიბლიოთეკის გამოფენა მან 9 ოქტომბერს დაათვალიერა და ბათუმში ის ადგილები მოინახულა, სადაც სიმენონის რომანში ხდება მოქმედება. ჯონ სიმენონი ბათუმში 11 ოქტომბრამდე დარჩება.

გარდა იმისა, რომ ბათუმი მოქმედების ერთ-ერთი მთავარი ადგილია სიმენონის რომანში ,,ხალხი მოპირდაპირე მხარეს“, ბათუმში თავსგადამხდარი  ამბები დაედო ასევე საფუძვლად სიმენონის დიდ რომანს ,,ბანანას ტურისტები“. ამის შესახებ მწერალი გაზეთ ,,იზვესტიაში“ 1986 წელს გამოქვეყნებულ ზემოხსენებულ ინტერვიუში ამბობს.

„დავუმეგობრდი ერთ მოხუცს, მას ქალაქში ურმით ბოსტნეული და მწვანილი დაჰქონდა. ისეთი სახე ჰქონდა, ვნანობდი, რომ მხატვარი არ ვიყავი, სხვადასხვა ენის მოშველიებით ჩვენ როგორღაც ვახერხებდით ერთმანეთთან საუბარს. მან მიამბო თავისი ცხოვრების ისტორია და მე დავინახე კეთილშობილება, ჭეშმარიტი ადამიანური ღირსება, რომელსაც ვერაფერი დააკლო ცხოვრების სიძნელეებმა. აი, ეს იყო ნამდვილი ადამიანი, „უბრალო ადამიანი“, ვისგანაც უნდა ისწავლო გაუტეხლობა ცხოვრებაში. მე გავიგე, თუ რა დიდი მნიშვნელობა აქვს მოთმინებას სხვადასხვა ცხოვრებისეულ სიტუაციაში.

ჩემი საუბრები მოხუცთან საფუძვლად დაედო რომანს „ბანანას ტურისტები“ – ეს არის ახალგაზრდა კაცის ისტორია, რომელმაც უარი თქვა ცხოვრებასთან ბრძოლაზე. დიახ, რომანს საფუძველი ჩაეყარა ბათუმში – ჩემი იქაური დაკვირვებებისა და ფიქრების საფუძველზე.

ბათუმში ჩავუფიქრდი მთიელთა ფსიქოლოგიას, მათ ნიჭს, თვითმყოფადობას და ახლებურად შევხედე კავკასიას. ჯერ კიდევ ოციან წლებში სარეკლამო ტურისტული პროსპექტების მიხედვით, დავწერე სათავგადასავლო რომანი, სადაც იყო მზეთუნახავთა მოტაცებაც, მთის ბილიკებზე ცხენთა ჭენებაც და სროლაც… ბათუმში ნანახი და განცდილი ჩემთვის გაკვეთილი იყო მთელი ცხოვრებისათვის,“ – ამბობს ჟორჟ სიმენონი.

მთავარ ფოტოზე: ჟორჟ სიმენონი. ფოტო: spectator.co.uk

ამავე თემაზე:

ჟორჟ სიმენონის უცნობი ფოტოები და რომანი, რომელშიც მოქმედება ბათუმში ხდება

გარემოსდაცვითი ზედამხედველობის დეპარტამენტის აჭარისა და გურიის რეგიონულ სამმართველოს თეიმურაზ გელდიაშვილი უხელმძღვანელებს. დეპარტამენტის ინფორმაციით, აჭარისა და გურიის რეგიონული სამმართველოს ხელმძღვანელის თანამდებობა რამდენიმე თვის განმავლობაში ვაკანტური  იყო.

„ამ პოზიციაზე თეიმურაზ გელდიაშვილი თავდაცვის სამინისტროდან გადმოვიდა, თუმცა მას აქვს გარემოს დაცვის სფეროში მუშაობის საკმაოდ დიდი გამოცდილებაც. 2013-2016 წლებში გელდიაშვილი გარემოსდაცვითი ზედამხედველობის დეპარტამენტში სხვადასხვა პოზიციაზე ასრულებდა მოვალეობას,“ – მოგვწერეს დეპარტამენტიდან.

აჭარისა და გურიის რეგიონული სამმართველოს თანამშრომლებს  ახალი ხელმძღვანელი  გარემოს დაცვისა და სოფლის მეურნეობის მინისტრმა, ლევან დავითაშვილმა წარუდგინა. წარდგენას ესწრებოდა აჭარის მთავრობის თავმჯდომარე თორნიკე რიჟვაძე.

მთავარი ფოტო: თეიმურაზ გელდიაშვილი / წარდგენა სამმართველოში / ფოტო: გზდ

ბათუმში დღეს, 10 ოქტომბერს, შვედი დიპლომატისა და ბიზნესმენის რაულ ვალენბერგის ქუჩაზე გამოფენა მოეწყო, რომელსაც შვედეთის მოქმედი ელჩი საქართველოში ულრიკ ტიდესტრომიც ესწრებოდა. ასევე აქ იმყოფებოდნენ ბათუმის ებრაული თემის წარმომადგენლები და სხვა ოფიციალური პირები.

ამ გამოფენით საზოგადოებას კიდევ ერთხელ შეახსენეს შვედი დიპლომატის დამსახურება, რომელმაც მეორე მსოფლიო ომის წლებში 10 ათასამდე ებრაელის სიცოცხლე იხსნა ჰოლოკოსტის დროს.

„პირველ რიგში, მინდა ვთქვა, რომ ბედნიერი ვარ, ბათუმში ისევ რომ ვიმყოფები, რადგან მომწონს ეს ქალაქი და  ყველგან ვგულშემატკივრობ. ახლა ჩვენ ვართ რაულ ვალენბერგის ქუჩაზე და რა თქმა უნდა, მშვენიერია, რომ მის სახელს ატარებს ეს ქუჩა, რადგან ვალენბერგმა თავისი გმირობით გვაჩვენა ის ფუნდამენტური ღირებულებები, რაც უნდა ვასწავლოთ მომავალ თაობას. ასევე, ის, რომ ჩვენ ყველას შეგვიძლია გვქონდეს ჩვენი გმირობები“, –  თქვა ულრიკ ტიდესტრომმა „ბათუმელებთან“.

ის მოგვიყვა ახალგაზრდა ელჩზე, რომელმაც მეორე მსოფლიო ომის დროს ებრაელებისთვის შვედური დამცავი პასპორტები შექმნა, რისი წყალობითაც 10 ათასამდე ებრაელმა შეძლო თავის გადარჩენა ფაშისტური რეჟიმისგან.

წყაროების მიხედვით, ვალენბერგმა უნგრეთის საგარეო საქმეთა სამინისტრო [აქ ის შვედეთის ელჩი იყო] 4 500 პასპორტის გაცემის აუცილებლობაში დაარწმუნა, „თუმცა რეალურად უფრო მეტი პასპორტი გაიცა, რითაც დევნაში მყოფი ებრაელები ახერხებდნენ ქვეყნის დატოვებას“.

ვალენბერგმა საერთაშორისო აღიარება მიიღო. 1981 წელს ის რიგით მეორე ადამიანი გახდა, რომელსაც აშშ-ის საპატიო მოქალაქის წოდება მიენიჭა. ვალენბერგი საპატიო მოქალაქედ ცნო კანადამ და ისრაელმაც.

მსოფლიოში ვალენბერგისადმი მიძღვნილი არაერთი მონუმენტია სხვადასხვა ქალაქში აღმართული. მისი ისტორია შესულია წიგნებში, მუსიკალურ ნაწარმოებებში, მის სახელს ატარებს ბევრი ქუჩა, სკოლა და დაწესებულება, გადაღებულია არაერთი მხატვრული და დოკუმენტური ფილმი.

2012 წელს ვალენბერგის დაბადებიდან ასი წელი შესრულდა. სწორედ ამ წელს მიენიჭა ბათუმში ნავსადგურის შესახვევს შვედი დიპლომატის სახელი, რომელიც სიმბოლოა რასიზმთან ბრძოლის, სიმამაცისა და გამბედაობის.

წყაროების მიხედვით, 1945 წელს, ბუდაპეშტში შესვლის დროს, საბჭოთა სამხედროებმა ვალენბერგი დააკავეს. რა ვითარებაში გარდაიცვალა ვალენბერგი, ეს დღემდე გაურკვეველია. „რუსული მხარე აცხადებდა, რომ ვალენბერგი 1947 წელს საბჭოთა ციხეში გარდაიცვალა, თუმცა დაზუსტებული ინფორმაცია ამის შესახებ არ არსებობს“, – წერია წყაროებში.

ერთ-ერთი ვერსიით, რაულ ვალენბერგის ლიკვიდაცია უშუალოდ სტალინის და საგარეო საქმეთა მინისტრის, ვიაჩესლავ მოლოტოვის მითითებით მოხდა.

„რაულ ვალენბერგის ოჯახის წევრები დღემდე ითხოვენ რუსეთის ხელისუფლებისგან საიდუმლო საარქივო მასალებზე წვდომას, რათა ერთხელ და სამუდამოდ მოეფინოს ნათელი იმ ადამიანის გარდაცვალების დეტალებს, რომელსაც ძეგლი უდგას დედამიწის ყველა კონტინენტზე“, – ნათქვამია კვლევებში.

ამის მიუხედავად, ვალენბერგის გარდაცვალების წლად მიჩნეულია 1947 წელი, რასაც ამყარებს 2016 წელს აღმოჩენილი მაშინდელი სსრკ-ის სახელმწიფო უშიშროების კომიტეტის თავმჯდომარის სადღიურო ჩანაწერებიც.

„ვალენბერგი საჭირო ადამიანი იყო, საჭირო ადგილას და საჭირო დროს“, – წერდა მის შესახებ შვედი დიპლომატი პერ აგნერი, რომელმაც 1945 წელს ვალენბერგს უსაფრთხო ადგილას წასვლა შესთავაზა, რაზეც უარი მიიღო. „არჩევანი არ მაქვს. ამ დავალების შესრულებას დავთანხმდი და სტოკჰოლმში ვერასდროს დავბრუნდები, თუ არ მეცოდინება, რომ იმდენი ებრაელი გადავარჩინე, რამდენის ხსნაც ადამიანის ძლებს არ აღემატებოდა“, – წერდა ის აგნერს.

ელჩ ულრიკ ტიდესტრომის თქმით, ვალენბერგის ქუჩის არსებობა ბათუმში კიდევ ერთხელ აჩვენებს მეგობრულ ურთიერთობას საქართველოსა და შვედეთს შორის.

შვედეთის ელჩი მეოთხედ იმყოფება ბათუმში. დღეს ის რუსთაველის უნივერსიტეტში სტუდენტებსაც შეხვდება, ასევე სამოქალაქო აქტივისტებს, სადაც ისაუბრებენ ქალაქის განვითარებასა და იმ გარემოსდაცვით პროექტებზე, რომლებსაც შვედეთის საელჩო ახორციელებს ჩვენს რეგიონში.

„მე ძალიან მიყვარს ბათუმი, აჭარა, მიყვარს ეს ქალაქი მისი კულტურული მემკვიდრეობა, ზღვა, კლიმატი, სამზარეულო და რაც მთავარია, სტუმართმოყვარე ადამიანები“, – გვითხრა ელჩმა.