Batumelebi

მთავრობის სარეზერვო ფონდიდან საქართველოს საპატრიარქოს 700 ათასი ლარი გამოუყვეს. შესაბამის განკარგულებას ირაკლი კობახიძემ ხელი 2025 წლის 19 ნოემბერს მოაწერა, დოკუმენტი კი მოგვიანებით გასაჯაროვდა.

სახელმწიფო ბიუჯეტიდან თანხა საპატრიარქოს სხვადასხვა სამუშაოს დასაფინანსებლად გადაეცემა.

„საქართველოს ფინანსთა სამინისტრომ „საქართველოს 2025 წლის სახელმწიფო ბიუჯეტის შესახებ“ საქართველოს კანონით გათვალისწინებული საქართველოს მთავრობის სარეზერვო ფონდიდან საქართველოს საპატრიარქოს გამოუყოს 700 000 ლარი, მათ შორის:

500 ათასი ლარი – ქალაქ გორში, აღდგომის საკათედრო ტაძრის მშენებლობის ფარგლებში, ქვის მოსაპირკეთებელი  სამუშაოების დაფინანსების მიზნით;

200 ათასი ლარი – ქალაქ თბილისში, ბაგების 13 ასურელი მამის სახელობის ტაძრის მშენებლობის ფარგლებში, ფილის საიზოლაციო და მოსაპირკეთებელი სამუშაოების დაფინანსების მიზნით.“ – აღნიშნულია განკარგულებაში.

ძლიერი ხანძარი იყო ქუთაისში, გუგუნავას ქუჩაზე.

ცეცხლი სენდვიჩ პანელების საწყობს გაუჩნდა.

ხანძრის ადგილას მობილიზებულია საგანგებო სიტუაციების სამსახური. პოლიციას ტერიტორია ყვითელი ლენტით აქვს შემოსაზღვრული.

როგორც “ბათუმელებს” საგანგებო სიტუაციების სამსახურში უთხრეს, ხანძრის შედეგად არავინ დაშავებულა. უცნობია ცეცხლის გაჩენის მიზეზი.

გუგუნავას ქუჩა, სადაც ცეცხლი გაჩნდა, საწარმოო ზონაა. ამ ქუჩაზე არის სხვადასხვა დანიშნულების საწყობები და საამქროები.

„მინდა, ყველას ვაცნობო სამშობლო ჩემი საითკენ მიდის,“ – წერს ციხეში დაწერილ ლექსში ბათუმელი მედროშე ზურაბ ჭავჭანიძე. ის პროტესტის ნიშნად უკვე 14 დღეა შიმშილობს.

ზურაბ ჭავჭანიძის საქმეზე არსებითი განხილვა დღეს, 9 დეკემბერს დაიწყო თბილისის საქალაქო სასამართლოში. ადვოკატი ნინო ლომინაძე ამბობს, რომ პროკურატურას არ აქვს წარმოდგენილი ერთი მტკიცებულებაც კი, რაც დაადასტურებდა ზურაბ ჭავჭანიძის მიერ დანაშაულის ჩადენას.

ადვოკატ ნინო ლომინაძის თქმით, ზურაბ ჭავჭანიძე დღეიდან შეწყვეტს მშრალ შიმშილობას და წყლის მიღებას დაიწყებს.

„გადაჯიშებით გვემუქრებიან, სულ მთლად გაქრობას გვიპირებს მტერი“ – წერს საკანში დაწერილ ლექსში ზურაბ ჭავჭანიძე.

„ბოროტება მხოლოდ სიყვარულით მარცხდება“ – ასე სრულდება მისი წერილი.

ზურაბ ჭავჭანიძე ბათუმის პროევროპული საპროტესტო აქციის მედროშეა. მას პროკურატურა ედავება სისხლის სამართლის კოდექსის 19-222-ე მუხლის მეორე ნაწილის ა ქვეპუნქტით, რაც გულისხმობს სტრატეგიული და განსაკუთრებული მნიშვნელობის ობიექტის ხელში ჩაგდების მცდელობას ჯგუფურად და სსკ-ის 225-ე მუხლის მეორე ნაწილით, რაც გულისხმობს ჯგუფურ ძალადობაში მონაწილეობას. სასჯელის სახით ეს მუხლი 6 წლამდე თავისუფლების აღკვეთას ითვალისწინებს. მისი ადვოკატის თქმით, ზურაბ ჭავჭანიძის საქმეში მხოლოდ ერთი ვიდეოკადრია, რომელზეც ზურაბ ჭავჭანიძე ჩანს დროშით ხელში. 

დღევანდელ სასამართლო პროცესზე ზურაბ ჭავჭანიძემ მოსამართლესაც მიმართა:

„მე ვარ სოხუმელი და 15 ვაჟკაცი სოხუმში დამეღუპა საქართველოსთვის ბრძოლაში, იმისთვის, რომ ყველამ ვიცხოვროთ კარგ საქართველოში. ვილაპარაკებ ფაქტებით: რას ნიშნავს რუსული მმართველობა? მილიონამდე ქართველი მოკლეს, ყველა რუსი მმართველის ოცნებაა „საქართველო ქართველების გარეშე“.

მიუხედავად იმისა, ვინ ვართ და ვის ვემხრობით, მიმდინარეობს მიზანმიმართული გენოციდი, საქართველოს გაქრობა, გადაშენება, ან გადაჯიშება. ამის მაგალითებს ვხედავთ. „მე თუ კარგად ვარ, ცხოვრება აწყობილიაო“ – ფიქრობენ ადამიანები. ყველას გვემუქრება ხიფათი.

ნებისმიერი ძალადობის წინააღმდეგი ვარ მთელი ცხოვრებაა. „ღმერთი სიყვარულია, გიყვარდეთ“ — დიდ კედელზე მაქვს დაწერილი. სიკეთე, სიყვარული, პატიოსნება და კანონმორჩილება მამოძრავებს.

სუსის თანამშრომელი მოვიდა სახლში და მითხრა თვითონვე, ყველაფერი ვიცით შენზე და კარგი კაცი ხარო. ერთადერთი ჩემი მოწოდება არის სიკეთე და სიყვარული, „მე მოსისხლე მტერიც მიყვარს და თუ მიყვარს, მართლა მიყვარს“ — ესაა ქართული სულის გამოძახილი. პატიოსნებისა და სიყვარულის მეტი მე არაფერი გამაჩნია“ – თქვა სასამართლო სხდომაზე ზურაბ ჭავჭანიძემ.

დღეს, 9 დეკემბერს, 4 ოქტომბრის მოვლენებთან დაკავშირებული 14-პირიანი საქმის არსებითი განხილვა დაიწყო. პროცესს მოსამართლე რომეო ტყეშელაშვილი უძღვება, რომელსაც საზოგადოება უმეტესად ყოფილი პოლიტპატიმრის, გიორგი ახობაძის საქმიდან იცნობს.

„ოცნების“ მთავრობამ სივრცითი და ქალაქთმშენებლობითი განვითარების სააგენტოს ბახმაროს განაშენიანების გეგმის განახლება დაავალა. სააგენტოს ასევე ევალება „ახალი საკურორტო დასახლებების შესაქმნელად“ ბახმაროს მიმდებარე ტერიტორიები შეისწავლოს და შესაბამისად დაგეგმოს.

„ჩოხატაურის მუნიციპალიტეტის ბახმაროს სარეკრეაციო ტერიტორიის განვითარებისათვის შესაბამისი ღონისძიებების განხორციელების თაობაზე“ განკარგულებას ხელი ირაკლი კობახიძემ 2025 წლის 27 ნოემბერს მოაწერა.

„სივრცითი და ქალაქთმშენებლობითი განვითარების სააგენტოს დაევალოს „ბახმაროს სარეკრეაციო ტერიტორიის ქალაქთმშენებლობითი გეგმების დამტკიცების თაობაზე“ საქართველოს მთავრობის 2019 წლის 2 დეკემბრის №589 დადგენილებით დამტკიცებული ქალაქთმშენებლობითი გეგმების განახლება და სათანადო პროექტის საქართველოს მთავრობის სხდომაზე განსახილველად წარმოდგენა, ასევე მიმდებარე ტერიტორიების შესწავლა/დაგეგმვა ახალი საკურორტო დასახლებების შესაქმნელად“ – წერია მთავრობის 2025 წლის 27 ნოემბრის განკარგულებაში.

ინფორმაციისთვის: მთავრობის 2019 წლის N589 დადგენილებით დამტკიცებულია ბახმაროს სარეკრეაციო ტერიტორიის ქალაქთმშენებლობითი დოკუმენტაციის ტექსტური ნაწილი, ბახმაროს სარეკრეაციო ტერიტორიის გენერალური გეგმა და ბახმაროს სარეკრეაციო ტერიტორიის განაშენიანების გეგმა თანდართულ რუკებთან ერთად. ამავე დადგენილებით გაუქმდა 2017 წლის განკარგულება „ბახმაროს სარეკრეაციო ტერიტორიის ქალაქთმშენებლობითი დოკუმენტაციის დამტკიცების თაობაზე“.

ბახმაროს განაშენიანების გეგმის განახლებასა და ბახმაროს მიმდებარე ტერიტორიაზე ახალი დასახლებების შესაქმნელად საჭირო ღონისძიებების ხელშესაწყობად, მთავრობის ახალი განკარგულებით, ყველა შესაბამის სახელმწიფო უწყებას დაევალა, ხოლო ჩოხატაურის მუნიციპალიტეტს ეთხოვა – კოორდინაციაში იყვნენ სივრცითი და ქალაქთმშენებლობითი განვითარების სააგენტოსთან.

ამავე თემაზე:

„ორბი ჯგუფი ბახმაროს“, რომელსაც 2024 წლის მაისამდე კურორტ ბახმაროში სასტუმრო უნდა აემოქმედებინა, მთავრობამ ეს ვალდებულება 2028 წლის ივნისამდე გადაუვადა. სახელმწიფომ ბახმაროში „ორბს“ ჯამში 4 ჰექტარზე მეტი მიწა 1 ლარად მიჰყიდა.

ვრცლად: ბახმაროში „ორბს“ სასტუმრო კომპლექსის მშენებლობის ვადა გაუგრძელეს – მთავრობის განკარგულება

სივრცითი და ქალაქთმშენებლობითი განვითარების სააგენტოს დაკვეთით ბახმაროში ერთი ახალი უბნის განაშენიანების დეტალური გეგმის პროექტი უკვე მომზადებულია და გარემოს ეროვნულ სააგენტოში სკრინინგის ანგარიშიც იყო გადაგზავნილი.

ვრცლად ამ თემაზე: 

ბათუმის საქალაქო სასამართლომ 7 დეკემბერს ნახევარი მილიონი ლარის გირაოს სანაცვლოდ გაათავისუფლა „ბათუმის ნავთობტერმინალის“ ხელმძღვანელი პირები.

პროკურატურა აცხადებს, რომ ამ სამმა ადამიანმა 10 762.238 ტონა ნედლი ნავთობი, რომლის საბაჟო ღორებულება 15 000 000-ზე მეტი ლარია, რეზერვუარებში საბაჟოს გევრდის ავლით გადაინახეს. პროკურატურა ირწმუნება, რომ ამით სახელმწიფომ 3 მილიონი ლარი იზარალა.

სპეცოპერაცია ბათუმის ნავთობტერმინალში სახელმწიფო უსაფრთხოების სამსახურმა და ფინანსთა სამინისტროს საგამოძიებო სამსახურმა 3 დეკემბერს ჩაატარეს.

საჯარო განცხადების მიხედვით, „ბათუმის ნავთობტერმინალის“ ხელმძღვანელ პირებს სახელმწიფო ბრალდება საბაჟო წესების დარღვევას ედავებოდა, თუმცა არც პროკურატურას და არც ფინანსთა სამინისტროს დღემდე არაფერი უთქვამთ, მაგალითად, ვინ დაეხმარა ბრალდებულებს საბაჟოზე, როდესაც მათ გვერდი აუარეს საბაჟო კონტროლს და ამ გზით სახელმწიფო 3 მილიონი ლარით აზარალეს.

ასევე პროკურატურას არაფერი უთქვამს იმაზე, რის საფუძველზე დაასკვნეს, რომ ბრალდებულები [თუ ეს ბრალდება რეალურია] გავლენას არ მოახდენენ მოწმეებზე ან ინფორმაციას არ გაცვლიან საბაჟო მოხელეებთან, ვინც მათ დაეხმარა „დანაშაულის ჩადენაში“. მაშინ, როცა არაერთი ახალგაზრდა იმ მიზეზით დატოვეს წინასწარ პატიმრობაში, რომ თითქოსდა არსებობდა მოწმე პოლიციელებზე ზემოქმედების საფრთხე.

და მაინც, რატომ მოითხოვა პროკურატურამ გირაო მძიმე დანაშაულში ბრალდებულებთან მიმართებაში? – პროკურორმა ლევან მურვანიძემ სასამართლო პროცესის შემდეგ, რომელზეც ბრალდებულებს აღკვეთი ღონისძიების სახით გირაო შეუფარდეს, განმარტა:

„ჩვენ გამოვიყენეთ საპროცესო იძულებითი ღონისძიება, დაკავება. ბრალდების მხარე საგამოძიებო მოქმედებების ჩატარების დროს იყენებს სისხლის სამართლის საპროცესო კანონმდებლობით გათვალისწინებულ ყველა საპროცესო იძულებით ღონისძიებას, თუ ამის საჭიროება არის. როდესაც ამის საჭიროება არ არის, შესაბამისად იღებს გადაწყვეტილებას ამ ღონისძიების გაუქმებასთან დაკავშირებით.

როგორც მოგახსენეთ, ჩვენ ის საფრთხეები, რაც დავინახეთ გამოძიების პროცესში და იმ მომენტში, როდესაც ინტენსიურად მიმდინარეობდა საპროცესო, საგამოძიებო მოქმედებები, გამოვიყენეთ საპროცესო-იძულებითი ღონისძიება დაკავება სამივე პირის მიმართ.

ჩვენ ვაგრძელებთ მტკიცებულებების მოპოვებას და გამოძიებას, მაგრამ იმ მომენტისათვის  მნიშვნელოვანი მტკიცებულებების მოპოვებისთვის ეს საპროცესო იძულებითი ღონისძიება იყო საჭირო და ბრალდების მხარემ კანონის მოთხოვნათა სრული დაცვით ეს გავაკეთეთ. რაც შეეხება გათავისუფლებას, მოხდა მათი გათავისუფლება ასევე საპროცესო კოდექსით გათვალისწინებული მოთხოვნათა დაცვით, ვინაიდან იმ მომენტისთვის უკვე დაკავება აღარ იყო საჭირო“.

სუსი და ფინანსური პოლიცია, სპეცრაზმის ჩართულობით, 3 დეკემბერს ბათუმის ნავთობტერმინალში საპროცესო მოქმედება/სპეცოპერაციას მთელი დღის განმავლობაში ატარებდა, სადაც ადამიანები საათობით ისხდნენ ერთ სივრცეში ისე, რომ ელემენტარული მოთხოვნილებების დაკმაყოფილების უფლება არ ეძლეოდათ.

საპროცესო ღონისძიების შემდეგ კი, საქართველოს პროკურატურამ ამ შინაარსის განცხადება გაავრცელა:

„6 დეკემბერს, საქართველოს პროკურატურამ ყაზახეთის სამ მოქალაქეს ორგანიზებული ჯგუფის მიერ საბაჟო წესების დარღვევის ფაქტზე ბრალდება წარუდგინა.

ფინანსთა სამინისტროს საგამოძიებო  სამსახურის მიერ ჩატარებული გამოძიებით დადგინდა, რომ  შპს „ბათუმის ნავთობტერმინალის“ ხელმძღვანელმა პირებმა  საბაჟო გადასახდელების გადახდის გარეშე, საბაჟო პროცედურების გვერდის ავლით და საბაჟო კონტროლისგან მალულად განკარგეს შპს „ბათუმის ნავთობტერმინალის“ საბაჟო რეზერვუარებში შენახული, საბაჟო კონტროლის ქვეშ მოქცეული, 15 000 000 ლარზე მეტი საბაჟო ღირებულების, 10 762.238 ტონა ნედლი ნავთობი, რამაც სახელმწიფოსთვის 3 000 000 ლარამდე ოდენობის ზიანი გამოიწვია“.

ბრალდებულებს ბრალი საქართველოს სისხლის სამართლის კოდექსის 214-ე მუხლის მე-2 და მე-6 ნაწილებით აქვთ წარდგენილი, რაც გულისხმობს საბაჟო წესების დარღვევას, ჩადენილი განსაკუთრებით დიდი ოდენობით და  ორგანიზებული ჯგუფის მიერ.

ბრალის დამტკიცების შემთხვევაში ბრალდებულებს 11-იდან 15 წლამდე თავისუფლების აღკვეთა ელით.

მთავარი ფოტო: სქრინი ,,ტვ პირველის” ვიდეოდან

ამავე თემაზე:

რუსეთიდან საქართველოში პირდაპირი ინვესტიციების მოცულობა 2025 წლის მესამე კვარტალში 8,8 მილიონი ლარით გაიზარდა 2024 წლის მესამე კვარტალთან შედარებით.

საქართველოს სტატისტიკის ეროვნული სამსახურის [საქსტატი] მონაცემებით, 2025 წლის მესამე კვარტალში საქართველოში პირდაპირმა ინვესტიციამ რუსეთიდან 17,5 მილიონი აშშ დოლარი შეადგინა [სულ, მიმდინარე წლის სამ კვარტალში ერთად კი – 56,8 მილიონი აშშ დოლარი].

საქსტატის მონაცემებით, 2024 წლის მესამე კვარტალში რუსეთიდან პირდაპირმა ინვესტიციამ საქართველოში 8,7 მილიონი აშშ დოლარი შეადგინა, მთელი ამ წლის განმავლობაში რუსეთიდან ჯამში 71,4 მილიონი აშშ დოლარის პირდაპირი ინვესტიცია განხორციელდა; 2023 წელს კი – 116,9 მილიონი აშშ დოლარის.

საქსტატის წინასწარი მონაცემებით, საქართველოში განხორციელებული პირდაპირი უცხოური ინვესტიციების მოცულობამ 2025 წლის III კვარტალში მთლიანობაში 533.2 მლნ. აშშ დოლარი შეადგინა, რაც 2024 წლის III კვარტალის დაზუსტებულ მონაცემებზე 2-ჯერ მეტია.

საქსტატი განმარტავს, რომ ზრდა განპირობებულია სავალო ვალდებულებების მაჩვენებლის ზრდით. სავალო ვალდებულებებში კი აისახება სავაჭრო კრედიტები და სესხები.

უმსხვილესი ინვესტორი ქვეყნების წილს რაც შეეხება, საქსტატის ინფორმაციით 2025 წლის III კვარტალში პირველ ადგილზეა აშშ – 93.5 მლნ. აშშ დოლარით, რაც მთლიანი პირდაპირი უცხოური ინვესტიციების 17.5 პროცენტს შეადგენს; მეორე ადგილზე იმყოფება ესპანეთი – 72.1 მლნ. აშშ დოლარით (13.5 პროცენტი); ხოლო მესამეზე თურქეთი – 70.0 მლნ. აშშ დოლარით (13.1 პროცენტი). ამ სამი უმსხვილესი ინვესტორი ქვეყნის წილი ინვესტიციების მთლიანი მოცულობის 44.2 პროცენტს შეადგენს.

2025 წლის III კვარტალში ყველაზე მეტი პირდაპირი უცხოური ინვესტიცია უძრავი ქონების სექტორში განხორციელდა და 91.7 მლნ. აშშ დოლარი შეადგინა, რაც მთლიანი პირდაპირი უცხოური ინვესტიციების 17.2 პროცენტია.

მეორე ადგილს იკავებს ტრანსპორტის სექტორი – 79.8 მლნ. აშშ დოლარით (15.0 პროცენტი).

მესამე ადგილზეა წყალმომარაგება და ნარჩენების მართვა – 71.5 მლნ. აშშ დოლარით (13.4 პროცენტი).

საქსტატის განცხადებით, „2025 წლის დაზუსტებული მონაცემები გამოქვეყნდება 2026 წლის 17 აგვისტოს, რამაც შესაძლოა გამოიწვიოს წინა პერიოდების მონაცემების ცვლილება“.

ბათუმში საბავშვო ბაღში კვების ბლოკს საწარმოო პროცესი შეუჩერეს – ინფორმაციას სურსათის ეროვნული სააგენტო ავრცელებს.

სააგენტოს ცნობით, უწყების ინსპექტორებმა მიღებული შეტყობინების საფუძველზე, არაგეგმური ინსპექტირება განახორციელეს ბათუმში, ტბელ აბუსერიძის ქ N1-ში მდებარე საბავშვო ბაღში – “სტარ ბათუმში”.

„შემოწმებისას გამოვლინდა კრიტიკული შეუსაბამობები, არასათანადო რეცხვა-დეზინფექცია და წყალმომარაგების პრობლემა. ასევე დადგინდა, რომ ბიზნესოპერატორი საქმიანობდა ეკონომიკურ საქმიანობათა რეესტრში რეგისტრაციის გარეშე.

აღნიშნული შეუსაბამობების გამო ბიზნესოპერატორი დაჯარიმდა და შეუჩერდა საწარმოო პროცესი დარღვევების გამოსწორებამდე“ – იუწყება სააგენტო.

სტრასბურგის სასამართლოში „რუსული კანონის საქმეზე“ ჯამში 22 მხარე ჩაერთო და 9 წერილობითი პოზიციაა წარმოდგენილი. ინფორმაციას „ახალგაზრდა იურისტთა ასოციაცია“ ავრცელებს.

„საქმეში მესამე მხარედ ჩართულ პირებს შორის არიან ისეთი საერთაშორისო აქტორები, როგორებიცაა: ევროპის საბჭოს ადამიანის უფლებათა კომისარი, ვენეციის კომისია, Amnesty International და სხვა.

მესამე მხარეთა მიერ ამგვარი ჩართულობა და სასამართლოს მიერ ცხრა წერილობითი პოზიციის მიღება მიუთითებს, რომ საქმე ადამიანის უფლებათა დაცვის კუთხით მნიშვნელოვან პრობლემას შეეხება, რომელიც გავლენას ახდენს ადამიანის უფლებათა ევროპული კონვენციის ფართო ინტერპრეტაციასა და სასამართლოს პრაქტიკის განვითარებაზე,“ – აღნიშნულია საიას მიერ დღეს, 9 დეკემბერს გავრცელებულ ინფორმაციაში.

სასამართლოს მეგობრის ინსტიტუტი დაინტერესებულ პირებს ანიჭებს უფლებას საკუთარი პოზიცია წარუდგინოს სასამართლოს. მიუხედავად იმისა, რომ მესამე მხარედ ჩართული პირები დავის მხარეებს არ წარმოადგენენ, მნიშვნელოვან როლს ასრულებენ განსახილველი საქმის არსებითი სამართლებრივი საკითხების ობიქტური, აკადემიური და თეორიული განმარტებების მიწოდებისას და რიგ შემთხვევებში სასამართლო მეგობრის დასკვნა ემთხვევა ადამიანის უფლებათა ევროპული სასამართლოს გადაწყვეტილებების შინაარსს.

„ევროპის საბჭოს ადამიანის უფლებათა კომისარმა წარდგენილ პოზიციაში აღნიშნა, რომ ტერმინი ,,უცხოური ძალის ინტერესების გამტარებელი ორგანიზაცია“ ხელისუფლებისა თუ პროსამთავრობო ჯგუფების მხრიდან სამოქალაქო საზოგადოების ორგანიზაციებისა და უფლებადამცველების „სახელმწიფოს მტრებად“, „გლობალური ომის პარტიად“ და ე.წ. „Deep State“-ად გამოცხადება უკვე ატარებს დამღუპველ ეფექტს სამოქალაქო საზოგადოების ორგანიზაციების რეპუტაციაზე საქართველოში. Alliance Defending Freedom International-ის პოზიციით, ,,რუსული კანონი“ წარმოადგენს გამოხატვისა და გაერთიანების თავისუფლების შემზღუდველ კანონმდებლობას, რომლის მსგავსიც მოქმედებს რუსეთში, ინდოეთსა თუ ჩინეთში.

ვენეციის კომისიის მოსაზრებაში ხაზგასმულია, რომ ,,რუსული კანონი“ არის ფართო და ბუნდოვანი, რომელიც შესაბამის უწყებებს ანიჭებს გადაჭარბებულ დისკრეციულ უფლებამოსილებას.

Crew Against Torture ასევე მიუთითებს, რომ კანონი აკმაყოფილებს განჭვრეტადობის პრინციპს, ხოლო Media Defence-ის პოზიციით, საქართველოში მოქმედ „რუსულ კანონს“, რუსეთში მიღებული „უცხოეთის აგენტების“ შესახებ კანონებსა და სხვა ქვეყნებში მიღებულ კანონებს ერთი, საერთო ფოკუსი აერთიანებს, რაც ადამიანის უფლებების დამცველი სამოქალაქო საზოგადოების ორგანიზაციებისა და მთავრობის მიმართ კრიტიკულად მომუშავე დამოუკიდებელი მედიის სტიგმატიზაციასა და დისკრედიტაციისკენ არის მიმართული.

უნგრეთის სამოქალაქო საზოგადოების ორგანიზაციებმა აღნიშნეს, რომ მიუხედავად იმისა, რომ ასეთი კანონები ხშირად წარმოდგენილია, როგორც „ეროვნული სუვერენიტეტის დაცვის“ ან „გამჭვირვალობის გაზრდის“ საშუალება, რეალურად ისინი მიზნად ისახავენ კრიტიკული აზრის ჩახშობას და დემოკრატიული ინსტიტუტების დასუსტებას, ხოლო „International Network of Civil Liberties’ Organizations“-ის წევრების პოზიციით, ,,რუსული კანონი“ ჰგავს იმ შემზღუდველ კანონებს, რომლებიც სხვა ქვეყნებში მიიღეს და ამ კანონის მოქმედება შეუქცევადად ახდენს გავლენას სამოქალაქო საზოგადოებაზე მაშინაც კი, თუ ისინი მათ მიმართ არ გამოიყენება.

ადამიანის უფლებათა საერთაშორისო ფედერაციამ (FIDH) და Memorial Human Rights Defence Center-მა განმარტა, რომ სასამართლომ ყურადღება უნდა გაამახვილოს ადამიანის უფლებათა ევროპული კონვენციის მე-18 მუხლზე [„უფლებების შეზღუდვათა გამოყენების ფარგლები“], რამდენადაც რუსეთის მაგალითმა გვაჩვენა, რომ განვითარებული მოვლენები გადაიქცა ტოტალიტარული რეჟიმის მაგალითად. Amnesty International-ის მოსაზრებით, სახელმწიფო ვერ ამტკიცებს რეალური საფრთხის არსებობას და წინასწარ, ყველა არასამთავრობო ორგანიზაციისადმი უნდობლობას გამოხატავს, რითაც იქმნება რისკი, რომ სამოქალაქო საზოგადოების ორგანიზაციებს შეეზღუდებათ თავისუფლად და უსაფრთხოდ საქმიანობა,“ – აღნიშნულია საიას მიერ გავრცელებულ ინფორმაციაში.

რუსული კანონი ადამიანის უფლებათა ევროპულ სასამართლოში 16 მედიაორგანიზაციის, 120 სამოქალაქო საზოგადოების ორგანიზაციისა და 4 ფიზიკური პირის სახელით გასაჩივრდა.

მომჩივნები ადამიანის უფლებათა ევროპული კონვენციით დაცული შეკრებისა და გაერთიანების თავისუფლების [მე-11 მუხლი], გამოხატვის თავისუფლების [მე-10 მუხლი], პირადი და ოჯახური ცხოვრების დაცულობის უფლების [მე-8 მუხლი], დისკრიმინაციის [მე-14 მუხლი], სამართლებრივი დაცვის ქმედითი საშუალებების უფლების [მე-13 მუხლი] და უფლებების შეზღუდვათა გამოყენების ფარგლების [მე-18 მუხლის] დარღვევებზე დავობენ.

ამ თემაზე:

„რეჟიმი ქიმიური იარაღით გვწამლავს“ – ამ შინაარსის სტენსილი ბათუმის ქუჩებში, სხვადასხვა ადგილზე შეგხვდებათ.

BBC-ის მიერ მოპოვებული მტკიცებულებების თანახმად, 2024 წელს ანტისამთავრობო მომიტინგეების წინააღმდეგ „ოცნების“ ხელისუფლებამ პირველი მსოფლიო ომის ეპოქის ქიმიური იარაღი გამოიყენა.

სუს-ის ინფორმაციით, „ასეთი ნივთიერება საქართველოს შინაგან საქმეთა სამინისტროს არასდროს შეუძენია“.

ამ თემაზე:

14 დეკემბერს, ბათუმში საპროტესტო აქცია გაიმართება. აქციის მონაწილეები „ქართული ოცნებისგან“ ითხოვენ მიიღონ სრული და ამომწურავი ინფორმაცია არაბულ კომპანია Eagle Hills-თან კრწანისსა და გონიოში დაგეგმილი სამშენებლო პროექტების შესახებ.

„ჩვენ, საქართველოს მოქალაქეები, საქართველოს ეროვნული, დემოგრაფიული, ეკონომიკური, და ეკოლოგიური ინტერესებიდან გამომდინარე, „ქართული ოცნებისგან“ მოვითხოვთ:

• გასაჯაროვდეს კრწანისის ტყე-პარკსა და გონიოში დაგეგმილი დასახლებების პროექტებთან დაკავშირებული ყველა ხელშეკრულება და დანართი.
• გაიმართოს საჯარო განხილვები მოსახლეობის ფართო ჩართულობით.
• არ განხორციელდეს პროექტთან დაკავშირებული არცერთი მოქმდება, სანამ არ იქნება მიღებული საქართველოს მოსახლეობის თანხმობა აღნიშნულ პროექტებზე,“ – ნათქვამია საპროტესტო აქციის ორგანიზატორთა განცხადებაში.

აქციის ორგანიზატორები არიან ორგანიზაციები – „ქართული რესპუბლიკა“, „სართული – ახალი თაობის ძალა“ და „ეროვნული თანხმობა“.

საპროტესტო აქცია 14 დეკემბერს, 14:00 საათზე, ბათუმის ცენტრალური პარკის კოლონადებთან დაიწყება, შემდეგ კი გაიმართება მსვლელობა აჭარის ავტონომიური რესპუბლიკის მთავრობის სახლისკენ.

აქციაზე შეგროვდება ხელმოწერები პეტიციისთვის, რომელიც საპროტესტო აქციის მოთხოვნებს მოიცავს.

არაბულ კომპანია Eagle Hills-თან გაფორმებულ საინვესტიციო ხელშეკრულებას, რომლის მიხედვითაც თბილისსა და აჭარაში 6,6 მილიარდი დოლარის დეველოპერული პროექტები უნდა განხორციელდეს და ახალი საცხოვრებელი და ტურისტული ინფრასტრუქტურა შეიქმნას, კომერციული საიდუმლოს სტატუსი აქვს მინიჭებული.

„ქართული ოცნება“ ირწმუნება, რომ პროექტს ნაკლი არ აქვს, ხელშეკრულების გასაიდუმლოება კი სტანდარტული პრაქტიკაა.

ამავე თემაზე:

„ჩვენი პროფესია დღეს არსებობის საფრთხის წინაშე დგას.

ადვოკატები არსებობენ ყველაზე ავტოკრატიულ რეჟიმებშიც, მაგრამ მთავარია – რა უფლებები, რა გარანტიები აქვთ? რა საფრთხეების წინაშე არიან? შეუძლიათ კი რეალური დაცვის განხორციელება?

საქართველოს ადვოკატთა ასოციაცია უკვე არაერთი წელია სრულ ჰარმონიაშია ხელისუფლებასთან. არასოდეს ისმის ან ისმოდა მისი ხმა უსამართლო, კაბალურ და ადამიანის ფუნდამენტურ უფლებათა შემზღუდავი სამართლის ნორმების, ადვოკატის უფლებების წინააღმდეგ მიმართული სამართლის ნორმების, მართლმსაჯულების სფეროს მარეგულირებელი კანონმდებლობის ყოველდღიური გაუარესების და საერთოდ ადამიანის უფლებათა დარღვევების საკითხზე,“ – ამბობს მაია მწარიაშვილი, იურიდიული ფირმა BLB-ის უფროსი პარტნიორი და სისხლის სამართლის მიმართულების ხელმძღვანელი.

მაია მწარიაშვილი საქართველოს იურიდიული ფირმების ასოციაციის – სიფას გუნდს წარმოადგენს ადვოკატთა ასოციაციაში დაგეგმილ არჩევნებში.

ის აღმასრულებელი საბჭოს წევრობის კანდიდატია.  

საქართველოს ადვოკატთა ასოციაციის საერთო კრება 13 -14 დეკემბერს გაიმართება თბილისში. საერთო კრებაზე ადვოკატთა ასოციაციის ახალი თავმჯდომარე უნდა აირჩიონ. ასევე უნდა აირჩეს ასოციაციის აღმასრულებელი საბჭოს, ეთიკის კომისიის და სარევიზიო კომისიის წევრები.

საქართველოს ადვოკატთა ასოციაცია 11 ათასზე მეტ ადვოკატს აერთიანებს, აქედან 5 500 ადვოკატს აქვს მოქმედი სტატუსი.

„დღეს ადვოკატები დგანან უამრავი გამოწვევის წინაშე, ჩემი კოლეგები ყოველდღიურად ერკინებიან არათანაბარ, ხშირად შეურაცხმყოფელ, დამამცირებელ მოპყრობას და პირობებს. სისტემა მათ პრაქტიკულად არაფრად აგდებს, როგორც ყოველდღიურ ყოფაში, ისე ინსტიტუციურ დონეზე.

მზია ამაღლობელის საქმეზე პირადად გამოვცადე სისტემის დაპირისპირება არა მხოლოდ ადამიანთან, არამედ ადვოკატებთან, ვინაიდან ჩვენ მზიას მსგავს ადამიანებს ვიცავთ. სასამართლოს შენობებში ადვოკატებს ისევე გვაკონტროლებენ, როგორც სასჯელაღსრულების დაწესებულებაში.

სასამართლოს ეზოში შესვლამდე პოლიცია და მანდატურის სამსახური ადვოკატების ორდერის წარდგენას სთხოვდნენ, ხოლო შენობაში ჩვენი კონტროლის მიზნით ყოველ ჩვენ გადაადგილებას რაციით გადასცემდნენ ერთმანეთს.

უნდა იყოს თუ არა ეს ასოციაციისათვის განგაშის ზარი? ცხადია, უნდა იყოს.

ეს მაგალითად მოვიტანე, თორემ ადვოკატებისთვის შექმნილი არც ხელოვნური და არც სამართლებრივი პრობლემები არასოდეს ყოფილა ამ ასოციაციისთვის განგაშისა და ყურადღების საგანი, სწორედ იმიტომ, რომ ასოციაცია ირჩევს ე.წ. „პოლიტიკურ ნეიტრალიტეტს“ სისტემასთან, რომელსაც ყოველდღიურ რეჟიმში ებრძვის ჩემი ყველა კეთილსინდისიერი კოლეგა.

აღმასრულებელ საბჭოში ჩვენი ყოფნის ერთ-ერთი ამოცანა ადვოკატის ყოველდღიური პრობლემების აღნუსხვა/იდენტიფიცირება და რეაგირების სწრაფი და ეფექტური მექანიზმის შეთავაზებაა.

ხმამაღლა საუბარი და არა სიჩუმე,“ – ხსნის მაია მწარიაშვილი საკუთარ მოტივაციას, თუ რატომ გადაწყვიტა არჩევნებში მონაწილეობა.

მაია მწარიაშვილს იურიდიული საქმიანობის 35-წლიანი პროფესიული გამოცდილება აქვს, როგორც აღმასრულებელ, ისე სასამართლო ხელისუფლებასა და კერძო პრაქტიკაში.

ის წარმოადგენდა ჭადრაკში მსოფლიოს ხუთგზის ჩემპიონს, ნონა გაფრინდაშვილს „ნეთფლიქსის“ წინააღმდეგ წარმოებულ საქმეზე. ამჟამად კი იცავს „ბათუმელები/ნეტგაზეთის“ დამფუძნებლისა და მედიამენეჯერის, მზია ამაღლობელის ინტერესებს.

„ჩემი პროფესიული კარიერის უდიდესი ჯილდოა მზია ამაღლობელის განცხადება სასამართლო პროცესზე, სადაც მან მადლობა გადაგვიხადა და თქვა, რომ მისი ადვოკატების დამსახურებაა ის, რომ მან  ადამიანებისადმი ნდობა შეინარჩუნა.

მერე რა რომ სისტემა ისევ უსამართლოა, მერე რა რომ სისტემა ჩვენზე უფრო ძლიერია, ჩვენ მაინც გვაქვს მისია და ჩვენი პროფესიის ღირსებას განაპირობებს არა მხოლოდ ის, თუ რა ვიცით, არა მხოლოდ ის, თუ რა პროცესუალური ვალდებულებები გვაქვს, არამედ ის, თუ როგორ, რის ფასად ვასრულებთ ამ მისიას,“ – უთხრა მაია მწარიაშვილმა „ბათუმელებს“.

მაია მწარიაშვილი საუბრობს ადვოკატის, როგორც პროფესიის მნიშვნელობაზე და ამბობს, რომ ადვოკატის ფუნქცია მხოლოდ იურიდიული ცოდნა არ არის, რადგან ადვოკატი საზოგადოებრივი ნდობის მატარებელი ადამიანია.

„საზოგადოებაში ბალანსის შენარჩუნების და სამართლიანობის უდიადესი იდეის არსებობისადმი ნდობის გაჩენის პროცესში ჩვენ იმაზე დიდი როლი გვაქვს, ვიდრე თავად წარმოგვიდგენია. ჩვენ ყველაზე რთულ მომენტში გვიწვდიან ადამიანები ხელს იმ იმედით, რომ ვიბრძოლებთ მათთვის, მათი ოჯახების, მათი შვილების რწმენისათვის, სამართლიანობისა ან სამართლიანი ბალანსისათვის.

ადვოკატი არის ის ხაზი, ის ფარი, რომელიც მოქალაქეს იცავს, მაშინაც კი, როდესაც ყველა სხვა ბერკეტს ძალაუფლება ფლობს და აკონტროლებს. როგორ წარმოუდგენია ეს ვინმეს სიჩუმეში, ხმის ამოღების და ბრძოლის გარეშე, ე.წ „პოლიტიკური ნეიტრალიტეტის“ და აღმასრულებელი ხელისუფლების დაწესებულებებთან, დევნის ორგანოებთან პირადი კომფორტის  უზრუნველყოფის პირობებში?

ვინც ამას ამბობს, საერთოდ არ ესმის ადვოკატის როლი და ფუნქცია ან ესმის იმგვარად, რომ ჩვენი როლი სიჩუმე და კონფორმიზმია, ხოლო ადვოკატის პროფესია ჩვენი კეთილდღეობის საშუალება. ღრმად მწამს, რომ ჩვენი პროფესიული ღირებულებები არ გაიცვლება ვინმეს პირად კომფორტსა და კეთილდღეობაში,“ – ამბობს მაია მწარიაშვილი.

მაია მწარიაშვილს აქვს წლების განმავლობაში  საგამოძიებო, საპროკურორო და მოსამართლედ მუშაობის პროფესიული გამოცდილება. იყო მრჩეველი საქართველოს ეროვნულ უშიშროების საბჭოში. მონაწილეობდა არაერთ სამთავრობო და უწყებათაშორის მოლაპარაკებებში. თუმცა პირველად იღებს მონაწილეობას ადვოკატთა ასოციაციის არჩევნებში.

მაია მწარიაშვილი საუბრობს მიზეზებზე, რამაც ეს გადაწყვეტილება მიაღებინა.

„მავანს ჰგონია, რომ ადვოკატს აქვს პოლიტიკური მიკერძოება ან მონაწილეობს პოლიტიკაში მაშინ, როდესაც საუბრობს ადამიანის უფლებათა დარღვევებზე, სისტემის ძალადობასა და მართლმსაჯულების კლანურობაზე, მოსამართლის დამოუკიდებლობის არარსებობაზე, სასამართლო გადაწყვეტილებების უკანონობასა და ტოტალურ დაუსაბუთებლობაზე, გამოძიების მიკერძოებასა და უსამართლობაზე, სამართლიანი პროცესის არარსებობაზე.

ასეთი კანდიდატები იძლევიან პირობას, რომ იქნებიან „პოლიტიკურად ნეიტრალურები“ და ამავდროულად უზრუნველყოფენ ამ კორპორაციის სიჩუმეს, რასაც „ნეიტრალურობას“ უწოდებენ.

მაქვს საფუძვლიანი ეჭვი ვივარაუდო, რომ ეს დანაპირები მათ გასაგონად კეთდება, ვისთანაც აქვთ აფილაცია და/ან ანგარიშვალდებულება.

ადვოკატთა კორპორაცია სინამდვილეში არის ყველაზე დამოუკიდებელი და მებრძოლი პროფესიის მქონე ადამიანების პროფესიული, თვითმმართველი გაერთიანება. ჩვენი პროფესიული თავისუფლება და დამოუკიდებლობა ჩვენი საქმიანობის პრინციპი და კონსტიტუციური მოვალეობაა.

ამის ნაცვლად უნდათ შემოგვაჩეჩონ „პოლიტიკური ნეიტრალიტეტისადმი“ ერთგულება, რასაც კანონიც კი არ გვავალდებულებს. ასოციაციის საქმიანობის პრინციპად ვერავინ მიუთითებს „პოლიტიკური ნეიტრალიტეტის“ დაცვას, ვინაიდან კანონი ჩვენ ამას არ გვთხოვს.

ეს შემოჩეჩებული ე.წ „პოზიცია“ ჩვენ მიმართ წამოყენებული კანონსაწინააღმდეგო მოთხოვნაა და  სინამდვილეში ჩვენს „სიჩუმეს“ და „უხმო მორჩილების“ პირობას ნიშნავს.

დღეს პროფესიის გადარჩენაზე ვსაუბრობთ და ეს არაა მეტაფორა.

საქართველოში ყველა მოქალაქე გრძნობს, ხედავს, რომ ყოველდღიურად მისი უფლება ირღვევა სასამართლო დარბაზში, პოლიციის შენობაში, ქუჩაში, სამსახურში, ონლაინ სივრცეში. ამ ყველაფერში კი ერთადერთი მყარი კედელი არის ადვოკატი, რომელიც მარტოა ამ ბრძოლის ხაზზე. მას ზურგს არ უმაგრებს პროფესიული ასოციაცია.

თუ ჩვენ გვინდა ძლიერი პროფესია, უნდა გვქონდეს ძლიერი ასოციაცია, რომელიც არ იმართება ერთპიროვნულად და სწორებას არ აკეთებს ე.წ „ლიდერებზე“. ჩვენ გვინდა ასოციაცია, რომელიც იმართება დამოუკიდებელი და კეთილსინდისიერი კოლეგებისაგან შემდგარი კოლეგიური ორგანოს, აღმასრულებელი საბჭოს მიერ. ასოციაცია არ შეიძლება დაემსგავსოს სამინისტროს, ადვოკატების მმართველობის ეგ ეტაპი ბევრი წლის წინ უკან ჩამოიტოვა ამ პროფესიამ.

მე და ჩემი კოლეგები „სიფადან“, რომლებიც ვმონაწილეობთ ასოციაციის ორგანოების (აღმასრულებელი და ეთიკის საბჭო და სარევიზიო კომისია) არჩევნებში, ვთანხმდებით ამ მთავარ ღირებულებებზე. ასოციაცია რეალურად უნდა იმართებოდეს არც ერთპიროვნულად და არც ერთი გუნდის მიერ.

ჩვენ ვიმუშავებთ იმისათვის, რომ ასოციაციის მართვა ეფუძნებოდეს ქვეყნის კონსტიტუციის, ადამიანის ფუნდამენტური უფლებების, ადვოკატის უფლებების განუხრელი და უპირობო დაცვის ღირებულებებს. შესაბამისი ვალდებულებები, პროფესიული თავისუფლება და ანგარიშვალდებულება ჰქონდეს მხოლოდ კოლეგა ადვოკატებთან და არა ე.წ “ხელმძღვანელებთან” ან მით უფრო უარესი – ხელისუფლების რომელიმე შტოსთან.

ამიტომ ადვოკატთა ასოციაციის აღმსრულებელ საბჭოში ჩემი კანდიდატურის შეთავაზება ჩემი კოლეგებისთვის არის ჩემი პროფესიული და სამოქალაქო ვალი.

მწამს, რომ ამ კორპორაციის წარმომადგენლებმა იციან ადამიანის დარღვეული უფლებების  დაცვის მიზნით ბრძოლაც და ამ ბრძოლის ფასიც. „ნეიტრალიტეტის“ ცრუ ღირებულებას არაფერი აქვს საერთო ჩვენს პროფესიულ ვალდებულებებსა და ღირებულებებთან, რომელთა შესრულება დღითი დღე რთულდება და შესაძლოა, ერთ დღეს, შეუძლებელიც გახდეს.

ადვოკატთა ასოციაციის ძალა პროფესიულ თავისუფლებაში და არა „პოლიტიკურ ნეიტრალიტეტშია,“ – ამბობს მაია მწარიაშვილი.

„ჩართული ვიყავი, უმრავლესობა რომ დაგვერწმუნებინა პრემია მზიასთვის [მზია ამაღლობელი] მიგვეცა. ეს არის ჯილდო მისი პირადი სიმამაცისთვის, ასევე პრემია ქართველი ხალხისთვის, მათთვის, ვისაც სჯერა ევროპული მომავლის.

მიუხედავად რეპრესიებისა, საფრთხეებისა, ამ დრომდე ქართველების 80 %-ს სჯერა, ისევ სურს, იყოს ევროპული პროექტის ნაწილი. ეს არის ნიშანი, სიმბოლო ბევრი მამაცი ადამიანის,“ – განაცხადა „ევროსკოპის“ ეთერში ევროპარლამენტის წევრმა, სერგეი ლაგოდისნკიმ. მას შეკითხვა მზია ამაღლობელის სახაროვის პრემიით დაჯილდოების შესახებ დაუსვეს.

ჟურნალისტს, გამოცემების –  „ბათუმელებისა“ და „ნეტგაზეთის“ თანადამფუძნებელსა და დირექტორს, მზია ამაღლობელს ევროკავშირის უმაღლესი ჯილდო – სახაროვის პრემია 2025 წლის 22 ოქტომბერს გადასცეს.

„რაც მოხდა რუსეთში, ბელარუსში, ძალიან დიდი იმედი მაქვს, რომ საქართველოში არ მოხდება და ეს მოქმედი ხელისუფლება ქვეყანას ავტორიტარიზმისკენ არ წაიყვანს ისე, როგორც სხვა ქვეყნებმა ქნეს. ჩვენ უკვე ვხედავთ გმირებს ქართველებს შორის და ეს პრემია მათთვისაა,“ – აღნიშნა სერგეი ლაგოდინსკიმ.

ევროპარლამენტარმა ხაზი გაუსვა იმასაც, რომ საქართველოს ოფიციალური დელეგაცია წელს არ მონაწილეობდა ევრონესტის საპარლამენტო ასამბლეაში.

სერგეი ლაგოდისკის თქმით, ერევანში ესაუბრა ადამიანებს საქართველოდან. „ისინი უშიშრად საუბრობენ. ევროპაში ადამიანებს უკვე დაავიწყდათ, რა ფასი აქვს თავისუფლებას. ჩვენო ქართველო მეგობრებო, თავიდან გვასწავლით, როგორ უნდა აღმოვაჩინოთ თავისუფლების ფასი, ვიბრძოლოთ და ვიდგეთ თავისუფლებისთვის,“ – განაცხადა სერგეი ლაგოდისკიმ.

___

ამ თემაზე:

ახალგაზრდა იურისტთა ასოციაცია აცხადებს, რომ მათი ინფორმაციით, მიმდინარე კვირაში მზია ამაღლობელს თვალზე კვლევები მის მიერ შერჩეულ კლინიკაში ჩაუტარდება.

„საიასთვის ცნობილი გახდა, რომ მიმდინარე კვირაში ციხის ადმინისტრაცია გეგმავს მზია ამაღლობელისათვის თვალზე კვლევების ჩატარებას იმ კლინიკაში, რომელიც მზიამ შეარჩია“ – წერს საია.

ევროკავშირის ადამიანის უფლებათა უმაღლესი ჯილდოს – სახაროვის პრემიის მფლობელი, ჟურნალისტი და მედიამენეჯერი მზია ამაღლობელი 11 თვეა უკანონო პატიმრობაში იმყოფება.

სასჯელაღსრულების დაწესებულებაში მოთავსების შემდეგ მზია ამაღლობელს მნიშვნელოვნად დაუქვეითდა მხედველობა.

მიუხედავად ექიმების რეკომენდაციისა და ადვოკატის არაერთი მოთხოვნისა, მას დღემდე არ უტარდება მდგომარეობის გამოსაკვლევად აუცილებელი მაღალტექნოლოგიური კვლევები.

დღეს საიამ გამოაქვეყნა მზია ამაღლობელის მხედველობასთან დაკავშირებული სამედიცინო ისტორია, რომელიც აჩვენებს, რომ პატიმრობაში მზია ამაღლობელის მხედველობა საგანგაშოდ გაუარესდა

მზია ამაღლობელმა და მისმა ადვოკატმა არაერთხელ მოითხოვეს სრულფასოვანი კვლევების ჩატარება სპეციალიზებულ კლინიკებში: „ნიუ ჰოსპიტალსის ოფთალმოლოგიის ეროვნულ ცენტრში“, სადაც პაციენტის წინა კვლევების ისტორია ინახება და შესაძლებელია ტოპოგრაფიული მონაცემების შედარება, ან „კავკასიის სამედიცინო ცენტრში“.

ამონარიდი მზია ამაღლობელის მიერ ციხის ადმინისტრაციისთვის გაგზავნილი წერილიდან:

„…თქვენი დაწესებულების პროვაიდერ კლინიკა „მზერას“ არ გააჩნია თანამედროვე/საჭირო აპარატურა და მისი ჩატარებული კვლევები ვერ აჩვენებდა სრულყოფილ სურათს. გარდა ამისა, მე არ გამსაუბრებია კლინიკა „მზერას“ ის ექიმი, რომელმაც გასცა რეკომენდაცია.

ჩემთვის პასუხგაუცემელი დარჩა კითხვები — რა რისკები გააჩნია ან რა შედეგის შემცველი იქნებოდა ის მანიპულაცია თვალზე, რის რეკომენდაციაც მივიღე.

ვიცი, მედიცინაში გარანტიები არ არსებობს, შესაბამისად, არც გაიცემა და არც ველოდები, თუმცა, გამომდინარე იქიდან, რომ მხოლოდ ერთ თვალში (მარჯვენა) შემომრჩა მხედველობის ის ხარისხი, რითაც ძირითადად სათვალის გამოყენებით ვახერხებ კითხვას, ვალდებული ვარ, გადაწყვეტილებებში ვიყო უფრო ფრთხილი.

ჩემი მხედველობის შენარჩუნება ან/ და გაზრდა შესაძლებლად მიმაჩნია ჩემს სამედიცინო ისტორიაზე დაყრდნობით, თანამედროვე აპარატურით აღჭურვილ კლინიკაში, სადაც ექიმებს აქვთ კერატოკონუსის დიაგნოზის მქონე პაციენტების მკურნალობის გამოცდილება“.

31 წლის ვეფხია მამულაძეს საზოგადოების დახმარება სჭირდება. ვეფხიას 24 ნოემბერს თირკმლის გადანერგვის ოპერაცია ჩაუტარეს და ახლა რეაბილიტაციაა საჭირო.

ვეფხიას მეუღლემ, მედეა გოგსაძემ „ბათუმელებს“ უთხრა, რომ ვეფხია, რომელსაც პირველი ჯგუფის შშმ პირის სტატუსი აქვს, ბავშვობიდან ერთი თირკმლით ცხოვრობდა, ბოლო წელია დიალიზზე იმყოფებოდა, თუმცა მისი ჯანმრთელობის მდგომარეობა გართულდა და საბოლოოდ, ოპერაცია გახდა საჭირო.

ახლა ოჯახი ცდილობს საჭირო თანხა შეაგროვოს ანალიზებისა და მედიკამენტებისთვის, მაშინ, როცა ვერ მუშაობს ვერც ვეფხია და ვერც მისი მეუღლე. ცოლ-ქმარს ორი მცირეწლოვანი ბავშვი ჰყავს.

„აქამდე ვმუშაობდი, მაგრამ ვეღარ ვახერხებ, ვეფხიას და ბავშვებს ყურადღება სჭირდებათ და საკუთარი ძალებით ვეღარ ვახერხებთ მკურნალობის გაგრძელებისთვის საჭირო ხარჯების დაფარვას.

ოპერაცია წარმატებით დასრულდა, მაგრამ სამწუხაროდ, შემდეგი ეტაპის მკურნალობა და მუდმივი მედიკამენტები საკმაოდ ძვირი ჯდება. ამ ყველაფერმა ჩვენი ოჯახის ფინანსური რესურსები მთლიანად ამოიწურა.

ნებისმიერი დახმარება – თუნდაც ყველაზე მცირე – ჩვენთვის უმნიშვნელოვანესი იქნება. თითოეული ადამიანის მხარდაჭერა ჩვენი ოჯახის იმედია,“ – ამბობს მედეა გორგაძე.

ვეფხია მამულაძის დახმარების მსურველებს თანხის გადარიცხვა შეუძლიათ შემდეგ ანგარიშებზე:

თბს ბანკი: GE34TB7812645064300023

საქართველოს ბანკი: GE29BG0000000528305550

მიმღები: მედეა გორგაძე

დანიშნულებაში გთხოვთ მიუთითეთ: ვეფხიასთვის

ქობულეთის შემოვლითი გზის მეორე ზოლის მშენებლობისთვის, საქართველოს 2026 წლის სახელმწიფო ბიუჯეტის პროექტის მიხედვით, ჯამში 480 მილიონი ლარია საჭირო.

ბიუჯეტის პროექტის მიხედვით, ეს თანხა 4 წელზეა გადანაწილებული შემდეგი ოდენობით:

• 2026 წელი – 15 მილიონი ლარი
• 2027 წელი – 85 მილიონი ლარი
• 2028 წელი – 160 მილიონი ლარი
• 2029 წელი – 220 მილიონი ლარი

„ქობულეთის შემოვლითი საავტომობილო გზის მეორე ზოლის მშენებლობის პროექტის მოსალოდნელი შუალედური შედეგია: მიწების გამოსყიდვასთან დაკავშირებით დაწყებული პროცედურები.

საბოლოო შედეგი კი – აშენებული 31 კმ-იანი საავტომობილო გზაა, რითაც გაუმჯობესდება ავტოტრანსპორტით მგზავრთა უსაფრთხო და შეუფერხებელი გადაადგილება, შემცირდება მგზავრობის დრო და ა.შ.

ასევე საქართველოს საგზაო ინფრასტრუქტურის გაზრდილი კონკურენტუნარიანობა სატრანსპორტო გადაზიდვების საერთაშორისო კორიდორებში, ავტოტრანსპორტის გაზრდილი ნაკადების გამტარუნარიანობის უზრულველყოფა“, – აღნიშნულია ბიუჯეტის პროექტში.

გზის პროექტის დონორად კი აზიის განვითარების ბანკია [ADB] მითითებული.

რა ეტაპზეა ქობულეთის შემოვლითი გზის 4-ზოლიან მაგისტრალად მოდერნიზების პროექტი – დაფინანსების წყარო[ები], არის თუ არა ცნობილი დონორი და პროექტის მთლიანი ღირებულება [მშენებლობის ჩათვლით]. როდის გამოცხადდება ტენდერი მშენებლობაზე? – ამ კითხვებით „ბათუმელებმა“ საქართველოს საავტომობილო გზების დეპარტამენტს 2025 წლის პირველ სექტემბერს მიმართა.

„დეპარტამენტის დაკვეთით მიმდინარეობს ქობულეთის შემოვლითი გზის 4-ზოლიან მაგისტრალად მოდერნიზების დეტალური საპროექტო დოკუმენტაციის მომზადების პროცედურები და ამ ეტაპისთვის არ არის დასრულებული საპროექტო სამუშაოები. შესაბამისად, დეპარტამენტი მოკლებულია შესაძლებელობას, მოგაწოდოთ თქვენს მიერ მოთხოვნილი სხვა ინფორმაცია.“ – მოგვწერეს დეპარტამენტიდან 11 სექტემბერს.

დეპარტამენტს ასევე ვკითხეთ „ქობულეთის შემოვლითი გზის 4-ზოლიან მაგისტრალად მოდერნიზების პროექტის გამო რამდენი კერძო ნაკვეთი და რამდენი საცხოვრებელი სახლი მოხვდა აღებაში? რა თანხაა გათვალისწინებული მათ საკომპენსაციოდ? დაწყებულია თუ არა გამოსყიდვა?“

„მოგახსენებთ, რომ აღნიშნული პროექტის ფარგლებში, დეპარტამენტის დაკვეთით, მომზადების პროცესშია მიწის შესყიდვისა და განსახლების სამოქმედო გეგმა. აღნიშნულ ეტაპზე ხდება არსებული სიტუაციის შესწავლა და შესაბამისი გადაწყვეტილების მიღება საკონსულტაციო კომპანიის მიერ. შესაბამისად, დეპარტამენტისთვის დღეისათვის უცნობია განთვისების ზოლში მოქცეული უძრავი ქონების რაოდენობა და საკომპენსაციო ღირებულებები.“ – მოგვწერეს დეპარტამენტიდან.

როდის გამოცხადდება ტენდერი გზის მშენებლობაზე, ამ დროისთვისაც უცნობია.

ქობულეთის შემოვლითი ორზოლიანი გზის ოთხზოლიანად გადაკეთებაზე მუშაობა გზების დეპარტამენტმა ამ გზის სრულად გახსნიდან 5 წლის შემდეგ, 2023 წელს დაიწყო.

პროექტი ქობულეთის შემოვლითი გზის პარალელურად დამატებითი ორზოლიანი გზის მოწყობას ითვალისწინებს [ასაშენებელი გზა მიუყვება არსებულ ორზოლიან გზას პარალელურად თითქმის მთლიან სიგრძეზე მარცხენა მხრიდან და მხოლოდ გარკვეულ მონაკვეთებში გადადის არსებული გზის მარჯვენა მხარეს, მრუდების გაუმჯობესების მიზნით.]

გათვალისწინებულია ორი დამატებითი კვანძის მოწყობა და არსებული გვირაბების პარალელურად 2 ახალი, ორზოლიანი გვირაბის აშენება. გვირაბები აშენდება სოფ. ქვედა აჭყვასთან და დაბა ჩაქვთან. პირველი გვირაბის [ქვედა აჭყვასთან] სიგრძე შეადგენს 250 მეტრს, ხოლო მეორე გვირაბის [ჩაქვთან] – 164 მეტრს.

საპროექტო გზაზე მაქსიმალური დასაშვები სიჩქარე 120 კმ/სთ იქნება.

ამჯერად კი ქობულეთის შემოვლით გზაზე დაშვებული მაქსიმალური სიჩქარე 90 კმ/საათიდან 70 კმ/საათამდეა შემცირებული.

ქობულეთის შემოვლითი გზა, რომელიც ორზოლიანია, შეიძლება ითქვას, რომ ზოგადად უსაფრთხო არ არის.

საავტომობილო გზების დეპარტამენტისა და „ბათუმელების“ მონაცემებით, მთლიანობაში, 2018 წლიდან 2025 წლის 20 აგვისტოს ჩათვლით პერიოდში ქობულეთის შემოვლით გზაზე 105 ავტოსაგზაო შემთხვევის შედეგად დაიღუპა 35 და დაშავდა სულ ცოტა 221 ადამიანი [მხოლოდ 2025 წლის ზაფხულში ამ გზაზე ავარიის შედეგად 9 ადამიანი დაიღუპა და 15-მდე დაშავდა, მათ შორის არასრულწლოვანებიც]. ამ გზაზე 2014 წლიდან 2018 წლამდე პერიოდში მომხდარი ავარიების შესახებ კი მონაცემები არ გვაქვს.

ეს გზა, ისევე როგორც ბათუმის შემოვლითი გზა, არ არის ჩქაროსნული ავტომაგისტრალი [ავტობანი]. არის ორზოლიანი და სავალ ზოლებს შორის არ აქვს გამყოფი ბარიერი.

ქობულეთის შემოვლით გზაზე ასევე დაზიანებულია სადეფორმაციო ნაკერიც.

ამ თემაზე ვრცლად

საქართველოს პარლამენტის აპარატში, ჰერალდიკის სახელმწიფო საბჭოსა და ეროვნულ ბიბლიოთეკაში კანონდარღვევით გაიცა ფულადი ჯილდოები და სახელფასო დანამატები. ამის შესახებ სახელმწიფო აუდიტი წერს თავის ანგარიშში, რომლის მიხედვითაც, კანონის მოთხოვნათა გვერდის ავლით, ჯამში, 100 ათას ლარზე მეტი ჯილდო და დანამატია გაცემული 2022 წელს.

აუდიტის სამსახურმა „საქართველოს პარლამენტის 2022 წლის 31 დეკემბრით დასრულებული საანგარიშო პერიოდისთვის კონსოლიდირებული ფინანსური ანგარიშგების აუდიტის“ ანგარიში 2025 წლის 5 დეკემბერს გამოაქვეყნა.

ამ ანგარიშის მიხედვით:

„მოხელეს ფულადი ჯილდო ეძლევა ხელმძღვანელის ბრძანების საფუძველზე მისი შეფასების შედეგების გათვალისწინებით, ამასთანავე, ფულადი ჯილდო შეიძლება მიეცეს მოლოდ იმ მოხელეს, რომელმაც შეფასების შედეგად მიიღო შეფასება − „საუკეთესო“ ან „კარგი“.

პარლამენტის აპარატის მიერ წარმოდგენილი დოკუმენტები რამდენიმე შემთხვევაში არ მოიცავდა შეფასების შედეგებს. აუდიტის შედეგად გამოვლინდა, რომ 10 მოხელეზე გაცემულია ჯილდო [18 407 ლარი], მათი შეფასების გარეშე.

კანონმდებლობის შესაბამისად, საჯარო დაწესებულების ხელმძღვანელისთვის სახელფასო დანამატის და ფულადი ჯილდოს განსაზღვრის უფლებამოსილება ხორციელდება ზემდგომი თანამდებობის პირის/ორგანოს გადაწყვეტილებით.

2022 წელს ჰერალდიკის სახელმწიფო საბჭოს ხელმძღვანელზე ფულადი ჯილდო და სახელფასო დანამატი [ჯამში 8 360 ლარი] გაცემულია საკუთარი ბრძანებების საფუძველზე, ზემდგომი ორგანოს გადაწყვეტილების გარეშე.

მოქმედი კანონმდებლობა ითვალისწინებს შრომითი ხელშეკრულებით დასაქმებულ პირებზე სახელფასო დანამატის გაცემას, რომლის მიცემის უფლებამოსილება უნდა გამომდინარეობდეს ხელშეკრულების პირობებიდან.

ჰერალდიკის სახელმწიფო საბჭოში 2022 წელს გაიცა სახელფასო დანამატი შრომითი ხელშეკრულებით დასაქმებულ 5 პირზე [თანხით 6 400 ლარი], რომლის გაცემის უფლებამოსილება ხელშეკრულების პირობიდან გამომდინარე, არ არსებობდა.

კანონმდებლობის შესაბამისად, მოხელეს ფულადი ჯილდო ეძლევა შეფასების შედეგების გათვალისწინებით, შესაბამისი ბიუჯეტით გათვალისწინებული სახსრების ფარგლებში.

2022 წელს პარლამენტში 26 მოხელეზე 10 400 ლარის ჯილდო გაიცა, 2021 წლის შედეგების საფუძველზე. ანალოგიურად, ბიბლიოთეკაში 2021 წლის შედეგების გათვალისწინებით, 2022 წელს გაცემულია 72 467 ლარის ფულადი ჯილდო“.

ამ და სხვა დარღვევებისა თუ შეუსაბამობების გამო, სახელმწიფო აუდიტის სამსახურმა პარლამენტს სარეკომენდაციო წერილი გაუგზავნა.

„აუდიტის შედეგად გამოვლენილი ნაკლოვანებების საპასუხოდ, წარმოგიდგენთ ჩვენს რეკომენდაციებს და ხელმძღვანელობისთვის მნიშვნელოვან სხვა ინფორმაციას“, – აღნიშნულია აუდიტის სამსახურიდან შალვა პაპუაშვილისთვის 2025 წლის აპრილში გაგზავნილ წერილში.

ბათუმი-სარფის ახალი გზის მშენებლობასთან დაკავშირებით საქართველოს საავტომობილო გზების დეპარტამენტი კონსულტანტებს იწვევს. გარკვეულ სფეროებში სპეციალისტების მიერ ინტერესების გამოსახატად დეპარტამენტმა განცხადებები უკვე გამოაქვეყნა – განსახლების გარე მონიტორინგის, გარემოს დაცვისა და პროექტის განხორციელების ადგილობრივი სპეციალისტების მომსახურებაზე.

უშუალოდ ბათუმი-სარფის ახალი გზის მშენებლობაზე გამოცხადებულ ტენდერში კი, წინადადებების წარდგენის ვადა არაუგვიანეს 2025 წლის 22 დეკემბრის 16:00 საათია.

საავტომობილო გზების დეპარტამენტი ამჯერად იწვევს უფლებამოსილ კონსულტანტებს ინტერესის გამოსახატავად შემდეგი საკონსულტაციო მომსახურების გასაწევად:

• განსახლების გარე მონიტორინგის ადგილობრივი კონსულტანტი. დავალების სავარაუდო ხანგრძლივობაა 2 წელი. საკონსულტაციო მომსახურების ბიუჯეტი კი 18 ათასი აშშ დოლარია.

განსახლების გარე მონიტორინგის ადგილობრივ კონსულტანტს ევალება მონიტორინგი განახორციელოს მიწის შესყიდვისა და განსახლების გეგმის შიდა მონიტორინგის პარალელურად. გარე მონიტორინგის მთავარი მიზანია პროცესების შესაბამისობის, ეფექტურობის, ეფექტიანობისა და გავლენის შეფასება და საჭიროების შემთხვევაში, ნებისმიერი კორექტირების ზომების შეთავაზება. დავალება ასევე მოიცავს ადგილმდებარეობის პირობების ანალიზს, კომპენსაციის გაცემას და საჩივრების განხილვის პროცედურებს.

კონსულტანტმა უნდა გადახედოს კომპენსაციის ანგარიშებს და დაადასტუროს, რომ კომპენსაცია გაცემულია ყველა ზემოქმედების ქვეშ მყოფი პირისთვის და ზემოქმედების ქვეშ მყოფ პირთა კონტრაქტებში განსაზღვრული ოდენობით; გადახედოს და შეაფასოს ამ პირებისთვის გაცემული კომპენსაციის ადეკვატურობა, ასევე მათი საარსებო წყაროს შესაძლებლობები, შემოსავლები და ცხოვრების ხარისხი;

შეაფასოს ზემოქმედების ქვეშ მყოფ პირებთან, განსაკუთრებით დაუცველ პირებთან, კონსულტაციის პროცესის ადეკვატურობა და ეფექტურობა, მათ შორის ზემოქმედების ქვეშ მყოფი პირებისთვის ხელმისაწვდომი საჩივრების პროცედურებისა და სამართლებრივი დაცვის საშუალებების ადეკვატურობა და ეფექტურობა, ასევე ამ ინფორმაციის გავრცელება და სხვა.

• გარემოს დაცვის ადგილობრივი სპეციალისტი. დავალების სავარაუდო ხანგრძლივობაა 4 წელი, ხოლო საკონსულტაციო მომსახურების ბიუჯეტი 143 ათასი აშშ დოლარია.

ამ კუთხით კონსულტანტს ევალება თვალყური ადევნოს გარემოსდაცვითი მონიტორინგის ანგარიშების დროულ მიღებას სამშენებლო ზედამხედველობის საკონსულტაციო ფირმისგან, შეაფასოს ეს ანგარიშები და საჭიროებისამებრ გასცეს რეკომენდაციები მათი გაუმჯობესებისთვის; თვალყური ადევნოს დაფიქსირებულ დარღვევებზე რეაგირებას და დადგენილი კორექტირების ზომების გამოყენებას.

მონაწილეობა მიიღოს ნებისმიერი დამატებითი გარემოსდაცვითი კვლევის ჩატარებაში, ადგილმდებარეობის გარემოსდაცვითი მართვის გეგმების შემუშავებაში და სხვა.

• პროექტის განხორციელების ადგილობრივი სპეციალისტი. დავალების სავარაუდო ხანგრძლივობაა 4 წელი. საკონსულტაციო მომსახურების ბიუჯეტი კი ამ შემთხვევაში 178 ათასი აშშ დოლარია.

კონსულტანტი პასუხისმგებელი იქნება უცხოური პროექტების/საერთაშორისო შესყიდვების განყოფილების დახმარებაზე საქონლის, სამუშაოების და საკონსულტაციო მომსახურების შესყიდვასთან დაკავშირებულ საქმიანობაში, კონტრაქტების მართვაში, მონიტორინგისა და შეფასების საკითხებში და პროექტის მართვასთან დაკავშირებულ სხვა ასპექტებში.

კერძოდ, კონსულტანტმა რეგულარულად უნდა შეაგროვოს ზედამხედველობის ინჟინრის მიერ წარდგენილი ანგარიშები და ნებისმიერი სხვა შესაბამისი ინფორმაცია; შეგროვებული ინფორმაციის [ინჟინრის, ზედამხედველობის ინჟინრის და კონტრაქტორის] შეჯამება და ანალიზი დამსაქმებლის მიერ განსახილველად…

მასვე ევალება კონტრაქტში ცვლილებების მომზადება; დახმარება კონტრაქტებთან და შესყიდვებთან დაკავშირებული პრეტენზიების, სატენდერო წინადადებების გასაჩივრებისა და სასამართლო დავების განხილვაში. ასევე მას ექნება გარკვეული მოვალეობები პროექტის ფარგლებში უშუალოდ შესყიდვებთან დაკავშირებით,  ანგარიშების წარდგენის და სხვა.

ბათუმი [ჭოროხი]-სარფის [თურქეთის საზღვარი] გზის მშენებლობის პროექტი განხორციელდება აზიის განვითარების ბანკის სესხისა და სახელმწიფო ბიუჯეტის თანადაფინანსებით.

ფინანსთა სამინისტროს ინფორმაციით გრძელვადიანი სესხის მოცულობა 306,6 მილიონი ევროა. ამავე სამინისტროს 2025-2028 წლების საინვესტიციო/კაპიტალური პროექტების მიმოხილვის დოკუმენტის მიხედვით, ბათუმი[ჭოროხი]-სარფის ახალი ავტომაგისტრალის მშენებლობისთვის 620 მილიონი ლარი იყო გათვლილი.

2026 წლის სახელმწიფო ბიუჯეტის პროექტის მიხედვით კი, ბათუმი[ჭოროხი]-სარფის მონაკვეთზე ახალი საავტომობილო გზის მშენებლობის პროექტისთვის ჯამში 895 მილიონი ლარია გაწერილი [აქდან 2025 წელს – 35 მილიონი, 2026 წელს – 160 მილიონი, 2027 წელს – 200 მილიონი, 2028 წელს -250 მილიონი და 2029 წელს – 250 მილიონი ლარი].

ბათუმი-სარფის გზის მშენებლობის პროექტი ითვალისწინებს 11.3 კმ-იანი 2 ზოლიანი გზის, მათ შორის 7.6 კმ სიგრძის გვირაბის და 3 ხიდის, აქედან 1.47 კმ სიგრძის ვიადუკისა და 500 მ სიგრძის ზღვის ნაპირის გასამაგრებელი ნაგებობის მშენებლობას.

სამშენებლო სამუშაოების ვადა 48 თვეა.

ამავე თემაზე

შეზღუდული შესაძლებლობის მქონე ქალთა ალიანსის ორგანიზებით ბათუმში, 6 დეკემბერს, გაიმართება ფილოსოფოს ლევან ღამბაშიძის საჯარო ლექცია –  „ადამიანის უფლებები და ფილოსოფია“.

ლექცია ჩატარედება შშმ ქალთა ალიანსის ოფისში, მისამართზე: ბათუმი, გიორგი ბრწყინვალეს ქუჩა N49, შაბათს, 6 დეკემბერს, 15:00 საათზე.

„ლექციის დასასრულს დაგეგმილია თანასწორობის კუთხის გახსნა – ქართული და მსოფლიო მხატვრული, დოკუმენტური და ფილოსოფიური ლიტერატურა ხელმისაწვდომი იქნება კუთხის ყველა მკითხველისთვის.“ – აცხადებენ ორგანიზაციაში.